အခန်း ၉၆၂

အပိုင်း (၉၆၂) အံ့အားသင့်သွားသော ရှန်းတိ

အန်းပိုင်ကျွင်းက သူ့ဘေးရှိ လူများကို ချက်ချင်း ကြည့်လိုက်ပြီး တိတ်တိတ်နေကြရန် အချက်ပြလိုက်သည်။

ထို့နောက် သူက ရှေ့သို့ တစ်လှမ်းတိုးလိုက်ပြီး "နတ်သမီး... နတ်ဘုရားရဲ့ စိတ်အခြေအနေ ဘယ်လိုရှိလဲ"

"နတ်ဘုရားရဲ့ စိတ်က ခန့်မှန်းလို့ ရစရာလား... ဒေါက်တာအန်း... ရှင် စည်းကျော်နေပြီ"

အန်းပိုင်ကျွင်းသည် ချက်ချင်းပင် ဆက်မပြောရဲတော့ဘဲ သူမနောက်မှနေ၍ ခန်းမဆောင်ကြီးဆီသို့သာ လိုက်ပါသွားလေသည်။

ကျန်လူများကမူ မူလနေရာတွင်သာ ကျန်ရစ်ခဲ့ကြသည်။

သူတို့တွင် နတ်ဘုရားကို ဖူးတွေ့ခွင့် ရနိုင်မည့် အရည်အချင်း မရှိကြသေးပေ။

သူတို့နှစ်ဦးသည် ရှေ့ဆင့်နောက်ဆင့်ဖြင့် ခန်းမဆောင်ကြီးထဲသို့ လျင်မြန်စွာ ဝင်ရောက်သွားကြသည်။

ဆယ့်နှစ်ပါး တမန်တော်များထဲမှ တစ်ပါးဖြစ်သော လုရှင်းနန်လည်း ထိုနေရာတွင် ရှိနေကြောင်း အန်းပိုင်ကျွင်းက ချက်ချင်း သတိပြုမိလိုက်သည်။

သူက ခေါင်းအနည်းငယ် ညိတ်ပြကာ တစ်ဖက်လူကို နှုတ်ဆက်လိုက်၏။

လုရှင်းနန်ကလည်း အပြုံးတစ်ခုဖြင့် တုံ့ပြန်လိုက်သည်။

ထို့နောက် အန်းပိုင်ကျွင်းသည် မြင့်မားသော စင်မြင့်ထက်တွင် ထိုင်နေသည့် နတ်ဘုရား ရှန်းတိ ကို မြင်တွေ့လိုက်ရသည်။

"နတ်ဘုရား... တပည့်တော် အန်းပိုင်ကျွင်း ဂါရဝပြုပါတယ်"

ရှန်းတိက ခေါင်းအနည်းငယ် ညိတ်လိုက်ပြီး "ထပါ... ဒေါက်တာအန်း"

"ကျေးဇူးတင်ပါတယ် နတ်ဘုရား"

ရှန်းတိက စကားစလိုက်သည်။ "မင်းမှာ အရေးပေါ် သတင်း ရှိတယ်ဆို"

အန်းပိုင်ကျွင်းက အလျင်အမြန် ခေါင်းညိတ်လိုက်ပြီး "ဟုတ်ပါတယ် နတ်ဘုရား... အခု လက်ရှိ တောင်ပိုင်းဒေသရဲ့ အခြေအနေတွေနဲ့ ပတ်သက်ပြီး အရမ်းကို အရေးတကြီး ဖြစ်နေလို့ပါ"

"ပြောကြည့်စမ်းပါ"

"နတ်ဘုရားနိုင်ငံတော်က တောင်ဘက်ကို ပြောင်းရွှေ့ဖို့ စီစဉ်နေတယ်ဆိုတာ တပည့်တော် သိထားပါတယ်... အခု လက်ရှိ နတ်ဘုရားနိုင်ငံတော်ရဲ့ တောင်ဘက်မှာ ခိုက်ရီနည်းပညာ နဲ့ မုန်ယာကုမ္ပဏီ ဆိုတဲ့ အင်အားစုကြီး နှစ်ခုက ယွီကျိုးပြည်နယ် အလယ်ပိုင်းနဲ့ တောင်ပိုင်းဒေသတွေကို သိမ်းပိုက်ထားကြပါတယ်"

"ဒါပေမဲ့ အခုချိန်မှာတော့... ခိုက်ရီနည်းပညာ နဲ့ မုန်ယာကုမ္ပဏီ တို့ဟာ အရင်ကလို မဟုတ်တော့ပါဘူး"

"အခုဆိုရင် ခိုက်ရီနည်းပညာ ပဲဖြစ်ဖြစ် မုန်ယာကုမ္ပဏီ ပဲဖြစ်ဖြစ်... အကုန်လုံးက ထိုက်ယန်တောင် ခိုလှုံရေးစခန်း ဆိုတဲ့ အင်အားစုတစ်ခုဆီကို ခိုလှုံသွားကြပါပြီ"

"ဒီ ထိုက်ယန်တောင် ခိုလှုံရေးစခန်း က လင်ကျန်းမြို့မှာရှိတဲ့ ခိုလှုံရေးစခန်းတစ်ခုပါ... တခြားလူတွေက သူ့အကြောင်း သေသေချာချာ မသိကြပေမဲ့ လင်ကျန်းမြို့ကနေ ထွက်ပြေးလာခဲ့ကြတဲ့ တပည့်တော်တို့အတွက်တော့ ဒီအင်အားစုအကြောင်းကို နားကွဲမတတ် ကြားဖူးနေခဲ့တာပါ"

ရှန်းတိက မျက်ခုံးပင့်လိုက်ပြီး မေးလိုက်သည်။ "ဒီ ထိုက်ယန်တောင် ခိုလှုံရေးစခန်း က အဲဒီလောက်တောင် နာမည်ကြီးတာလား"

အန်းပိုင်ကျွင်းက အလျင်အမြန် ပြန်ဖြေလိုက်၏။ "ဟုတ်ပါတယ်... ထိုက်ယန်တောင် ခိုလှုံရေးစခန်း ဆိုတာ လင်ကျန်းမြို့က ထိုက်ယန်တောင် ကို အစွဲပြုပြီး ပေးထားတာပါ... သူ့ရဲ့ ခေါင်းဆောင် နာမည်က လင်းယွမ် လို့ ခေါ်ပါတယ်"

"အဲဒီလူက အစောပိုင်းတုန်းကတော့ သာမန် အသက်ရှင်ကျန်ရစ်သူ တစ်ယောက်ပါပဲ... ဒါပေမဲ့ ထိုက်ယန်တောင် ကို ရောက်သွားပြီးတဲ့နောက်မှာ သူ့ရဲ့ စွမ်းအင်တိုးတက်မှုက အလွန်မြန်ဆန်လွန်းပြီး ဝါးအစည်းပြေ သလို အတားအဆီးမရှိ ဖြစ်လာခဲ့တယ်... ထိုက်ယန်တောင် ပေါ်မှာရှိတဲ့ တခြား အင်အားစုတွေကို ရှင်းလင်းပစ်ခဲ့ရုံသာမကဘူး... ထိုက်ယန်တောင် တစ်ခုလုံးကိုပါ သိမ်းသွင်းပြီး ထိုက်ယန်တောင် ခိုလှုံရေးစခန်း ကို တည်ထောင်ခဲ့တာပါ"

"အဲဒီနောက်မှာလည်း လင်ကျန်းမြို့အတွင်းက ကြီးငယ်မဟူ အင်အားစု အသီးသီးကို ဆက်တိုက် တိုက်ခိုက် သိမ်းပိုက်ခဲ့ပါတယ်... တပည့်တော် အရင်က နေခဲ့တဲ့ ကွမ်ဖူစစ်ဒေသ တောင် အပါအဝင်ပါပဲ"

"တပည့်တော် ရရှိထားတဲ့ နောက်ဆုံး သတင်းတွေအရဆိုရင် ဒီ ထိုက်ယန်တောင် ခိုလှုံရေးစခန်း ဟာ ခိုက်ရီနည်းပညာ... မုန်ယာကုမ္ပဏီ တို့နဲ့တောင် တိုက်ခိုက်ပြီးသွားပါပြီ"

ထိုအခါ ဘေးနားရှိ ဆယ့်နှစ်ပါး တမန်တော်များထဲမှ တစ်ပါးဖြစ်သော လုရှင်းနန်ကလည်း ဝင်ပြောလိုက်သည်။ "ဒီသတင်းကို ကျွန်တော်တို့လည်း စုံစမ်းသိရှိထားပါတယ်... ခိုက်ရီနည်းပညာ နဲ့ မုန်ယာကုမ္ပဏီ တို့ရဲ့ အင်အားနဲ့ ယှဉ်တိုက်တာတောင် ထိုက်ယန်တောင် ခိုလှုံရေးစခန်း က ပျက်စီးမသွားဘူးဆိုတော့ သူတို့ရဲ့ အင်အားက တကယ်ပဲ မသေးလှဘူး"

"ဒါပေမဲ့ ခိုက်ရီနည်းပညာ က ဂျိမ်းစ် နဲ့ မုန်ယာကုမ္ပဏီ က ကျင်းရှီရုံ တို့ ကိုယ်တိုင် ဝင်ပါခဲ့သလား ဆိုတာတော့ မသိရသေးဘူး"

"တကယ်လို့ သူတို့နှစ်ယောက် ကိုယ်တိုင် ဝင်ပါတာတောင်မှ ထိုက်ယန်တောင် ခိုလှုံရေးစခန်း နဲ့ ခေါင်းဆောင် လင်းယွမ်ကို မနှိမ်နင်းနိုင်ခဲ့ဘူး ဆိုရင်တော့ ထိုက်ယန်တောင် ခိုလှုံရေးစခန်း ရဲ့ အင်အားကြီးမားမှုကို အမှန်တကယ် အသိအမှတ်ပြုရပါလိမ့်မယ်"

အန်းပိုင်ကျွင်းက ခေါင်းခါယမ်းလိုက်ပြီး လုရှင်းနန်ကို ကြည့်ကာ ပြောလိုက်၏။ "တမန်တော်ကြီး... ခင်ဗျားရဲ့ သတင်းအချက်အလက်တွေက တိကျမှု မရှိသေးပါဘူး... တကယ်တော့ ထိုက်ယန်တောင် ခိုလှုံရေးစခန်း ဟာ ခိုက်ရီနည်းပညာ နဲ့ မုန်ယာကုမ္ပဏီ တို့ကို တိုက်ခိုက်ခဲ့ရုံသာမက အဲဒီ အင်အားစုကြီး နှစ်ခုစလုံးကို အနိုင်ယူသွားခဲ့ပါပြီ"

"သူတို့ရှုံးသွားတာလား..." လုရှင်းနန် ကြောင်အမ်းသွားပြီး အလိုအလျောက် ရေရွတ်လိုက်မိသည်။ "ဘယ်လိုလုပ် ဖြစ်နိုင်မှာလဲ... လွန်ခဲ့တဲ့ ရက်အနည်းငယ်ကမှ ခိုက်ရီနည်းပညာ ရဲ့ အဓိက ခေါင်းဆောင်တစ်ယောက်ဖြစ်တဲ့ စုန်းမ မော်လီ က ငါတို့ဆီ လာပြီး မဟာမိတ်ဖွဲ့ဖို့တောင် တောင်းဆိုသွားသေးတာကို"

ရှန်းတိသည်လည်း မျက်မှောင်ကြုတ်သွားပြီး အန်းပိုင်ကျွင်းကို ကြည့်ကာ မေးလိုက်သည်။ "ဒေါက်တာအန်း... မင်း ဘာတွေ သိထားသေးလဲ"

အန်းပိုင်ကျွင်းက အလျင်အမြန် ပြန်ဖြေလိုက်၏။ "နတ်ဘုရား... တပည့်တော်မှာ ယုံကြည်စိတ်ချရတဲ့ သတင်းရင်းမြစ် ရှိပါတယ်... သတင်းအချက်အလက်တွေ မှန်ကန်ကြောင်း အာမခံနိုင်ပါတယ်"

"ခိုက်ရီနည်းပညာ နဲ့ မုန်ယာကုမ္ပဏီ တို့ဟာ ထိုက်ယန်တောင် ခိုလှုံရေးစခန်း ကို ရှုံးနိမ့်သွားရုံသာမက မုန်ယာကုမ္ပဏီ ရဲ့ ခေါင်းဆောင် ကျင်းရှီရုံ ပါ ကျဆုံးသွားခဲ့ပါပြီ"

"ခိုက်ရီနည်းပညာ ရဲ့ ခေါင်းဆောင် ဂျိမ်းစ် တောင်မှ ထိုက်ယန်တောင် ဆီကို လက်နက်ချ အရှုံးပေးသွားခဲ့ပါပြီ"

"ဘာ"

"မဖြစ်နိုင်ဘူး"

လုရှင်းနန်မှာ ချက်ချင်းပင် အံ့သြတုန်လှုပ်စွာ အော်ဟစ်လိုက်ပြီး မယုံကြည်နိုင်စွာဖြင့် ပြောလိုက်လေသည်။

မုန်ယာကုမ္ပဏီ နှင့် ခိုက်ရီနည်းပညာ တို့ စစ်ပွဲတွင် ရှုံးနိမ့်သွားသည်ဟု ဆိုလျှင် သူ ယုံကြည်နိုင်စရာ အကြောင်းရှိပေသည်။

သို့သော် ကျင်းရှီရုံ သေဆုံးသွားပြီး ဂျိမ်းစ် လက်နက်ချသွားသည် ဟူသော အန်းပိုင်ကျွင်း၏ စကားကိုမူ သူ မည်သို့မျှ မယုံကြည်နိုင်ပေ။

အဘယ်ကြောင့်ဆိုသော် ဆယ့်နှစ်ပါး တမန်တော် တစ်ပါးအနေဖြင့် ထိုလူနှစ်ဦး၏ စွမ်းအားကို သူ ကောင်းကောင်းကြီး သိရှိထားသောကြောင့် ဖြစ်သည်။

အစောပိုင်းက နတ်ဘုရား ကိုယ်တိုင် ထိုလူနှစ်ဦးနှင့် ယှဉ်တိုက်ခဲ့စဉ်ကပင် များစွာ အသာစီး မရခဲ့ပေ။

အရှုံးနှင့်ပင် နောက်ဆုတ်ခဲ့ရသေးသည်။

နတ်ဘုရား၏ စွမ်းအားသည် နတ်ဘုရားနိုင်ငံတော် အတွင်း၌ ပြိုင်ဘက်ကင်းလုနီးပါး ဖြစ်ကြောင်း သိထားရမည်။

သို့သော် ထိုမျှ အင်အားကြီးမားသော နတ်ဘုရား ကိုယ်တိုင်ပင် ကျင်းရှီရုံ နှင့် ဂျိမ်းစ် တို့အပေါ် အသာစီး မယူနိုင်ခဲ့ရာ... နတ်ဘုရား၏ တပည့်တစ်ဦးဖြစ်သော သူ့အနေဖြင့် ကျင်းရှီရုံ အသတ်ခံရပြီး ဂျိမ်းစ် လက်နက်ချသွားသည် ဟူသော ကိစ္စမျိုးကို သဘာဝကျကျ လက်မခံနိုင်ခြင်း ဖြစ်သည်။

အဘယ်ကြောင့်ဆိုသော် ထိုသို့ဖြစ်ခဲ့လျှင် နတ်ဘုရား သည်လည်း ထိုကဲ့သို့သော အခြေအနေမျိုး ကြုံတွေ့ရနိုင်ခြေ ရှိနေသည် မဟုတ်ပါလော။

ရှန်းတိ ကိုယ်တိုင်ပင် မျက်လုံးများ ပြူးကျယ်သွားပြီး အန်းပိုင်ကျွင်းကို စိုက်ကြည့်နေမိသည်။

ကျင်းရှီရုံ၊ ဂျိမ်းစ် တို့နှင့် ယှဉ်တိုက်ဖူးသူ တစ်ယောက်အနေဖြင့် ဤရန်သူနှစ်ဦး မည်မျှ ကြောက်စရာကောင်းကြောင်း သူ ကောင်းကောင်း သိထားသည်။

ယခု လက်ရှိ သူ၏ စွမ်းအားဖြင့်ပင် နတ်ဘုရားနိုင်ငံတော် ၏ အပြင်ဘက်၌ ထိုနှစ်ဦးကို အနိုင်ယူနိုင်မည်ဟု သူ အာမမခံရဲပေ။

ယခုမူ သူ အဓိက ရန်သူကြီးများအဖြစ် သတ်မှတ်ထားသော ရန်သူနှစ်ဦးမှာ တစ်ယောက်က သေဆုံးပြီး တစ်ယောက်က လက်နက်ချသွားပြီ ဖြစ်ကြောင်း အန်းပိုင်ကျွင်းက ရုတ်တရက် လာပြောနေလေသည်။

ထိုအရာက သူ့ကို မည်သို့ အံ့သြမသွားစေဘဲ နေမည်နည်း။

"ဒေါက်တာအန်း... ဒီသတင်းတွေကို ဘယ်ကရတာလဲ" ရှန်းတိသည် အသက်ကို ပြင်းပြင်းတစ်ချက် ရှူသွင်းလိုက်ပြီး ရင်ထဲမှ အံ့သြဒေါသများကို ဖိနှိပ်ကာ ချက်ချင်း မေးလိုက်သည်။

အန်းပိုင်ကျွင်းက အလျင်အမြန် ပြန်ဖြေလိုက်၏။ "နတ်ဘုရား... တပည့်တော်မှာ မိတ်ဆွေအချို့ ရှိပါတယ်... သူတို့က လင်ကျန်းမြို့ အနီးတစ်ဝိုက်ကနေ အခုလေးတင် ထွက်ပြေးလာကြတာပါ"

"လင်ကျန်းမြို့ဘက်က အခြေအနေတွေကို သူတို့က တပည့်တော်ထက်တောင် ပိုပြီး အသေးစိတ် သိထားကြပါတယ်"

"လင်ကျန်းမြို့က ထိုက်ယန်တောင် ခိုလှုံရေးစခန်း ဟာ မြောက်ဘက်ကို တက်လာပြီး မုန်ယာကုမ္ပဏီ နဲ့ ခိုက်ရီနည်းပညာ တို့ကို အနိုင်ယူလိုက်ပြီလို့ သူတို့ ပြောကြပါတယ်... ဒီသတင်းတွေ အကုန်လုံးက သူတို့ ပြောပြလို့ သိရတာပါ"

ရှန်းတိက မျက်မှောင်အနည်းငယ် ကြုတ်လိုက်ပြီး မေးလိုက်သည်။ "သူတို့ရဲ့ သတင်းတွေက တိကျရဲ့လား"

လုရှင်းနန်က ဝင်ပြောလိုက်၏။ "သူတို့ ရောက်နေကြပြီလား... သူတို့ကိုပါ ဝင်လာခိုင်းပြီး မေးကြည့်ရအောင်"

အန်းပိုင်ကျွင်းက ခေါင်းညိတ်ပြလိုက်ပြီး "သူတို့ အပြင်မှာ ရောက်နေကြပါတယ်"

"သူတို့ကို ဝင်လာခိုင်းလိုက်ပါ" ရှန်းတိက ချက်ချင်း ပြောလိုက်သည်။

အစေခံမိန်းကလေး ထွက်သွားပြီး မကြာမီ ဝူမုန့်၊ ရှူကျန့်ယွဲ့ နှင့် အခြားလူများကို ခေါ်ဆောင်လာခဲ့သည်။

ဝူမုန့်သည် ဤ နတ်ဘုရား ကို ပထမဆုံးအကြိမ် ဖူးတွေ့ရခြင်း ဖြစ်သဖြင့် ခေါင်းမော့၍ တစ်ချက် ကြည့်လိုက်သည်။

ဤနတ်ဘုရားမှာ အလွန် ငယ်ရွယ်ပြီး သူနှင့် အသက်အရွယ် သိပ်ကွာမည် မဟုတ်ပေ။

သို့သော် သူသည် မြင့်မားသော စင်မြင့်ထက်တွင် ထိုင်နေပြီး သူ၏ ခန္ဓာကိုယ်မှ ကြီးမားလှသော အရှိန်အဝါများ ထွက်ပေါ်နေကာ တစ်ကိုယ်လုံးတွင် နတ်ဘုရား၏ အလင်းရောင်များ လွှမ်းခြုံထားသကဲ့သို့ ရှိနေသည်။

အပြင်ပန်း အသွင်အပြင်နှင့် အရှိန်အဝါကို ကြည့်ရုံမျှဖြင့် ဤနတ်ဘုရား၏ စွမ်းအားသည် အမှန်တကယ်ပင် အကဲဖြတ်၍ မရနိုင်လောက်အောင် နက်ရှိုင်းလှပြီး အနည်းဆုံးတော့ တစ်ဖက်လူထံမှ ခြိမ်းခြောက်မှု အငွေ့အသက်များကို သူ ခံစားလိုက်ရသည်။

ဝူမုန့်သည် ခေါင်းငုံ့လိုက်ပြီး ရှူကျန့်ယွဲ့ နှင့်အတူ ထိုနတ်ဘုရားကို ဂါရဝပြုလိုက်ကြသည်။

အန်းပိုင်ကျွင်းက ပြောလိုက်၏။ "ဝူမုန့်... ရှူကျန့်ယွဲ့... မင်းတို့ သိထားတဲ့ သတင်းအချက်အလက် အားလုံးကို နတ်ဘုရားကို အကုန်အစင် သေချာ ရှင်းပြလိုက်ကြ... ပိုလည်း မပြောနဲ့... ဘာမှလည်း ဖုံးကွယ်မထားနဲ့"

ရှူကျန့်ယွဲ့ က အလျင်အမြန် ခေါင်းညိတ်ပြလိုက်ပြီး "ဟုတ်ကဲ့ပါ... ဒေါက်တာ"

ဝူမုန့်ကလည်း ခေါင်းညိတ်လိုက်သည်။

ထို့နောက် ရှူကျန့်ယွဲ့ သည် ကျန်းနန်ပြည်နယ် ၏ အခြေအနေများကို စတင် ရှင်းပြလေတော့သည်။

ကြားထဲတွင် ဝူမုန့်ကလည်း သူမ၏ ပြောစကားများကို ဖြည့်စွက်ရန် စကားအချို့ ဝင်ပြောပေးခဲ့သည်။

မကြာမီမှာပင် ရှူကျန့်ယွဲ့ သည် ထိုက်ယန်တောင် ၏ အခြေအနေများကို ပြောပြ၍ ပြီးဆုံးသွားလေသည်။

အန်းပိုင်ကျွင်း ပြောပြချက်များနှင့် အခြေခံအားဖြင့် ကိုက်ညီနေသဖြင့် ရှန်းတိ၏ မျက်နှာမှာ တည်ကြောသွားပြီး ပြောလိုက်သည်။ "မင်းတို့ ပြောပုံအရဆိုရင်... အခု လက်ရှိ ခိုက်ရီနည်းပညာ ရဲ့ နောက်ကွယ်က တကယ့် ကြိုးကိုင်သူဟာ အဲဒီ ထိုက်ယန်တောင် ခိုလှုံရေးစခန်း က ခေါင်းဆောင် လင်းယွမ် ပေါ့လေ"

"ဒီလူရဲ့ စွမ်းအားက ဘယ်လိုရှိလဲ... သူက ဘာအမျိုးအစား သန္ဓေပြောင်း အစွမ်းပိုင်ရှင်လဲ... မျိုးရိုးဗီဇ ပြန်လည်ဖွဲ့စည်းခြင်း အဆင့်က ဘယ်လောက်ရှိလဲဆိုတာ မင်းတို့ သေသေချာချာ သိကြလား"

ရှန်းတိသည် သူ အသိချင်ဆုံး မေးခွန်းများကို မေးလိုက်လေသည်။

အန်းပိုင်ကျွင်း သည်လည်း လက်ရှိ လင်းယွမ် မည်မျှ အင်အားကြီးမားနေပြီ ဆိုသည်ကို မသိသဖြင့် ရှူကျန့်ယွဲ့ နှင့် ဝူမုန့်တို့ကိုသာ လှမ်းကြည့်လိုက်ရသည်။

ရှူကျန့်ယွဲ့ သည် အနည်းငယ် တုံဆိုင်းသွားပြီးနောက် "နတ်ဘုရား... တကယ်တော့ အဲဒီ လင်းယွမ်က ဘယ်အမျိုးအစား အစွမ်းပိုင်ရှင် လဲဆိုတာ ကျွန်မတို့လည်း မသိပါဘူး... သူ့ရဲ့ မျိုးရိုးဗီဇ ပြန်လည်ဖွဲ့စည်းခြင်း အဆင့်ကိုလည်း မသိရပါဘူး"

"ဘာအဓိပ္ပါယ်လဲ... မင်းတို့က ထိုက်ယန်တောင် ခိုလှုံရေးစခန်း နဲ့ ဒီလောက် အကြာကြီး ဆက်ဆံခဲ့တာတောင် ထိုက်ယန်တောင် ခေါင်းဆောင်ရဲ့ သန္ဓေပြောင်းအစွမ်း အမျိုးအစားကို မသိဘူး ဟုတ်လား" လုရှင်းနန်က မနေနိုင်ဘဲ ဒေါသတကြီး မေးလိုက်သည်။

ရှူကျန့်ယွဲ့ က အလျင်အမြန် ပြန်ဖြေလိုက်၏။ "တမန်တော်ကြီး... အဲဒီ လင်းယွမ် ရဲ့ တိုက်ခိုက်ပုံတွေကို ကျွန်မတို့ မျက်မြင်ကိုယ်တွေ့ မြင်ဖူးတာတော့ မှန်ပါတယ်... ဒါပေမဲ့ သူ့ဆီမှာရှိတဲ့ အစွမ်းတွေက အရမ်းကို များပြားလွန်းတယ်... ကျွန်မ သိသလောက်ဆိုရင်တောင် ရေခဲဓာတ်၊ အမှောင်ဓာတ်၊ မီးဓာတ်၊ ဟင်းလင်းပြင်ဓာတ် ဆိုပြီး အနည်းဆုံး လေးမျိုးလောက်တောင် ရှိနေတာပါ"

သူမ ပြောပြီးသည်နှင့် ဘေးနားရှိ ဝူမုန့်ကို အလျင်အမြန် ကြည့်လိုက်ကာ မြန်မြန် ကူညီရှင်းပြပေးရန် အချက်ပြလိုက်သည်။

ဝူမုန့်က အသံနက်ကြီးဖြင့် ဝင်ပြောလိုက်၏။ "အရှင်... လင်းယွမ်ရဲ့ အစွမ်းတွေက အရမ်းကို များပြားလွန်းပါတယ်... တကယ်တော့ ကျွန်တော် သူ့ကို ပထမဆုံးအကြိမ် စတွေ့ခဲ့တုန်းကဆိုရင် သူ့ရဲ့ ခွန်အား... အလျင်... စိတ်စွမ်းအင် နဲ့ ခန္ဓာကိုယ်ကြံ့ခိုင်မှု ဆိုတဲ့ အဓိက အရည်အသွေး လေးခုစလုံးဟာ အရမ်းကို မြင့်မားနေပြီး အားနည်းချက် လုံးဝ မရှိသလောက်ပါပဲ"

"နောက်ပိုင်း သူ မျိုးရိုးဗီဇမျိုးစေ့ ကို နိုးထလာနိုင်ခဲ့ပြီးတဲ့နောက်မှာဆိုရင် မတူညီတဲ့ မျိုးရိုးဗီဇ ပုံစံအမျိုးမျိုးကို အသုံးပြုပြခဲ့တာ ကျွန်တော် ကိုယ်တိုင် မျက်မြင်ကိုယ်တွေ့ မြင်ခဲ့ရပါတယ်"

"ဒါကြောင့် သူက ဘယ်အမျိုးအစား အစွမ်းပိုင်ရှင် လဲဆိုတာကို ကျွန်တော်တို့ တိတိကျကျ မသိဘူးလို့ ပြောရတာထက်... သူက ကျင်းရှီရုံ လိုမျိုး အစွမ်းပိုင်ရှင် တစ်ယောက်ဖြစ်ပြီး စွမ်းရည်မျိုးစုံကို တစ်ပြိုင်နက်တည်း ပိုင်ဆိုင်ထားတယ်လို့ ကျွန်တော် ပိုပြီး ယုံကြည်ပါတယ်"

ထိုစကားကို ကြားလိုက်ရသောအခါ လုရှင်းနန်နှင့် ရှန်းတိတို့ နှစ်ဦးစလုံး အံ့သြသွားကြလေသည်။

လုရှင်းနန်က ပြောလိုက်၏။ "နောက်ထပ် ကျင်းရှီရုံ တစ်ယောက် ထွက်လာပြန်ပြီလား"

ရှန်းတိသည် စကားမပြောသော်လည်း ရင်ထဲတွင်မူ တိတ်တဆိတ် တွေးတောနေမိသည်။

ကျင်းရှီရုံ ကို သတ်ဖြတ်နိုင်ခဲ့သော အစွမ်းပိုင်ရှင် တစ်ယောက်၏ စွမ်းအားသည် ကျင်းရှီရုံ ကို နှိမ်နင်းနိုင်စွမ်း ရှိရမည်မှာ သေချာလှပေသည်။

ကျင်းရှီရုံ တွင် ပုံတူကူးချအစွမ်း ရှိပြီး ဤ ထိုက်ယန်တောင် ခေါင်းဆောင် လင်းယွမ်သည်လည်း ဓာတ်စွမ်းအင်မျိုးစုံ ပါဝင်သော အစွမ်းကို ပိုင်ဆိုင်ထားသည်။

ဒါက ဖြစ်နိုင်ချေရှိသည်ဟု ဆိုနိုင်သော်လည်း ဤလူက ဂျိမ်းစ် ကို မည်သို့ အနိုင်ယူနိုင်ခဲ့သနည်း။

ဆက်ရန်...