အခန်း ၉၇၀

အပိုင်း (၉၇၀) တန်ပြန်တိုက်စစ်

"အမိန့်ရှိပါ"

"အရှင်နတ်ဘုရား"

သူတို့နှစ်ယောက်က ရှေ့ဆင့်နောက်ဆင့်ဖြင့် လျင်မြန်ရိုသေစွာ ပြန်လည်ဖြေကြားလိုက်ကြသည်။

သူတို့နှစ်ယောက်က နတ်ဘုရားနိုင်ငံတော်၏ တမန်တော်ဆယ့်နှစ်ပါးထဲမှ နှစ်ပါးဖြစ်သည်။ ထိုအထဲမှ ချန်ထောင်က ရေဓာတ် အစွမ်းပိုင်ရှင်ဖြစ်ပြီး အနီးကပ်တိုက်ခိုက်ရာတွင် ကျွမ်းကျင်သူဖြစ်သည်။

တုံမြောင်မြောင်ကမူ ခန္ဓာကိုယ်ကြံ့ခိုင်မှု အမျိုးအစား အစွမ်းပိုင်ရှင်ဖြစ်သည်။ သူမ၏ မျိုးရိုးဗီဇပုံစံမှာ အဆိပ်ပြင်း မုဆိုးမပင့်ကူဖြစ်ပြီး ရန်သူကို ထောင်ချောက်ဆင်ဖမ်းဆီးရာတွင် ကျွမ်းကျင်သူဖြစ်သည်။

သူတို့နှစ်ယောက်က အဆင့်ကျော်လွန်၍ပင် တိုက်ခိုက်နိုင်စွမ်းရှိကြပြီး မျိုးရိုးဗီဇ ပြန်လည်ဖွဲ့စည်းခြင်း ၈၀ ရာခိုင်နှုန်းအထက်ရှိသော အစွမ်းပိုင်ရှင်များနှင့် တိုက်ခိုက်လျှင်တောင် အပြန်အလှန် ယှဉ်ပြိုင်နိုင်ကြသည်။

ထို့ပြင် အုပ်စုဖွဲ့တိုက်ခိုက်ရသည့် အခြေအနေမျိုးတွင် သူတို့၏စွမ်းရည်က ပို၍ပင် ထင်ရှားလာတတ်သည်။

ယခင်က နတ်ဘုရားနိုင်ငံတော်ဘက်မှ လျင်မြန်စွာ တန်ပြန်တိုက်ခိုက်နိုင်ခဲ့ခြင်းမှာ ဤနှစ်ယောက်၏ စွမ်းဆောင်ရည်က အဓိကကျခဲ့ခြင်း ဖြစ်သည်။

ယခုအချိန်တွင် ရှန်းတိက သူတို့နှစ်ယောက်ကို ခေါ်ယူလိုက်ခြင်းမှာ ထွက်ပြေးသွားသော ဟုန်ထျန်ရီကို ပိတ်လှောင်ဖမ်းဆီးရန်အတွက် ဖြစ်ကြောင်း ထင်ရှားလှသည်။

"မင်းတို့နှစ်ယောက် အခုချက်ချင်း ငါနဲ့အတူ ဟုန်ထျန်ရီကို ဝင်တိုက်မယ်... အခွင့်အရေးရတာနဲ့ သူ့ကို အသေအလဲ ဖမ်းချုပ်ထားရမယ်... အနည်းဆုံးတော့ သူ့ကို ထိန်းချုပ်ထားနိုင်မှ ဖြစ်မယ်... မဟုတ်ရင် သူက ဆက်တိုက်ထွက်ပြေးနေမှာမို့ သူ့ကိုသတ်ဖို့ အခွင့်အရေးရမှာ မဟုတ်ဘူး"

သူတို့နှစ်ယောက်က ကြားသည်နှင့် ချက်ချင်း ခေါင်းညိတ်လိုက်ကြသည်။ "ဟုတ်ကဲ့ပါ... အရှင်"

ထို့နောက် သူတို့သုံးယောက်က ဟုန်ထျန်ရီနောက်သို့ လျင်မြန်စွာ လိုက်လံတိုက်ခိုက်ကြလေသည်။

ထိုအချိန်တွင် ဟုန်ထျန်ရီက ဟင်းလင်းပြင် နေရာရွှေ့ပြောင်းခြင်း ကိရိယာကို အသုံးပြု၍ ဆက်တိုက် နေရာရွှေ့ပြောင်းနေခဲ့ပြီး မကြာမီမှာပင် သတ်မှတ်နေရာသို့ ရောက်ရှိသွားခဲ့သည်။

ဤနေရာက ပိဝူကျွန်း၏ ထိပ်ပိုင်းရှိ ဧရာမတောင်ကြားကြီးဖြစ်ပြီး ပိဝူကျွန်း၏ အဆင့်မြင့် စစ်စခန်းတစ်ခုလည်း ဖြစ်သည်။

ဟုန်ထျန်ရီ၏ ခန္ဓာကိုယ်က လျင်မြန်စွာ ဆင်းသက်လာခဲ့ပြီး လင်းယွမ်ကို မြင်လိုက်ရသည်နှင့် အလျင်အမြန် လျှောက်သွားကာ ပြောလိုက်သည်။ "ဆရာလင်း... ဟိုကောင်တွေ လိုက်လာကြပြီ"

လင်းယွမ်က ခေါင်းတစ်ချက်ညိတ်လိုက်ပြီး ပြုံးကာ ပြောလိုက်သည်။ "ကောင်းတယ်... ဒီနေရာက စွမ်းအင်ချိတ်ပိတ် အစီအရင်ကလည်း အဆင်သင့်ဖြစ်နေပါပြီ"

"ဒါပေမဲ့ စွမ်းအင်ချိတ်ပိတ် အစီအရင်ကို အခုချက်ချင်း စတင်ဖို့ မလိုသေးဘူး... ကျွန်တော်က ဒီနတ်ဘုရားနိုင်ငံတော်က နတ်ဘုရားဆိုတဲ့ကောင်ကို စိတ်ဝင်စားနေလို့... သူ့ရဲ့စွမ်းရည်ကို ကျွန်တော် အရင်စမ်းကြည့်လိုက်ပါဦးမယ်"

ထိုစကားကို ကြားလိုက်ရသဖြင့် ဟုန်ထျန်ရီလည်း စိတ်ဝင်စားသွားသည်။ ဆရာလင်း၏ အမှန်တကယ် စွမ်းရည်ကို သူ မမြင်ဖူးသေးပေ။

ယခင်က ဆရာလင်းက ကျင်းကျိုးစစ်တပ်ကို သိမ်းပိုက်ခဲ့စဉ်ကလည်း ကိုယ်တိုင် ဝင်ရောက်တိုက်ခိုက်ခဲ့ခြင်း သိပ်မရှိဘဲ စွမ်းအင်ချိတ်ပိတ် အစီအရင်ကိုသာ အဓိကအသုံးပြုကာ သူတို့ကို အငိုက်ဖမ်း တိုက်ခိုက်နိုင်ခဲ့ခြင်း ဖြစ်သည်။

ယနေ့တော့ ဆရာလင်း၏ အစွမ်းအစကို မြင်တွေ့ခွင့်ရမည့် အခွင့်အရေးပင် ဖြစ်သည်။

"ရှန်းတိက ဘယ်ကလာ နတ်ဘုရားဖြစ်ရမှာလဲ... ကိုယ့်ကိုယ်ကိုယ် နတ်ဘုရားလို့ သမုတ်ထားတဲ့ လူလိမ်တစ်ယောက်ပါ... ဆရာ့ရဲ့ အစွမ်းအစကို မြင်တွေ့ခွင့်ရတာကပဲ သူတို့အတွက် ဂုဏ်ယူစရာပါ" ဟုန်ထျန်ရီက ရယ်မောလျက် ပြောလိုက်သည်။

လင်းယွမ်က ပြုံးလိုက်ပြီး "ဘယ်ရန်သူကိုမှ အထင်မသေးပါနဲ့... ဒီလူတွေဆီမှာ ခင်ဗျား တွေးတောင် မတွေးကြည့်ဖူးတဲ့ အစွမ်းတွေ ရှိနေနိုင်တယ်" ဟု ပြောလိုက်သည်။

ကောင်းကင်ထက်မှ လိုက်လံချေမှုန်းလာသော ရှန်းတိတို့၏ ပုံရိပ်များက ပို၍ ထင်ရှားလာသည်။

လင်းယွမ်က မနေနိုင်ဘဲ သက်ပြင်းချကာ ပြောလိုက်သည်။ "ကျွန်တော် စောစောကတည်းက သဘောပေါက်ထားတဲ့ အမှန်တရားတစ်ခု ရှိတယ်... အဲဒါက ဒီလောကကြီးမှာ ဘယ်သူမှ မယှဉ်နိုင်တဲ့ အစွမ်းဆိုတာ မရှိဘူး ဆိုတာပဲ"

"အစွမ်းတွေက အမျိုးအစားပေါင်းစုံ ရှိတယ်... ဘယ်လိုအစွမ်းမျိုးမဆို တည်ရှိနေနိုင်တယ်... ခင်ဗျား လုံးဝ ထင်မှတ်မထားတဲ့ ထူးဆန်းတဲ့ အစွမ်းတွေတောင် ရှိနိုင်တာပဲ"

"တကယ်လို့များ ပေါ့ဆမိသွားရင်တော့ အနှေးနဲ့အမြန်ဆိုသလို အရှုံးကြီးရှုံးပြီး ဒုက္ခရောက်သွားလိမ့်မယ်"

ဟုန်ထျန်ရီက ထိုစကားကို ကြားလိုက်ရသောအခါ အဆက်မပြတ် ခေါင်းညိတ်လိုက်ပြီး "ဆရာ ပြောတာ မှန်ပါတယ်... ကျွန်တော်က အမြဲတမ်း ကျင်းကျိုးစစ်တပ်မှာပဲ ရှိနေခဲ့တာလေ... ကျွန်တော့်ရဲ့ အစွမ်းက ထူးခြားနေလို့သာ စစ်တပ်ရဲ့ နံပါတ်တစ်ဆိုတဲ့ နာမည်ကို ကံကောင်းထောက်မစွာနဲ့ ရခဲ့တာ... ဒါကြောင့် နည်းနည်းတော့ ဘဝင်မြင့်သွားခဲ့မိတယ်"

"တစ်လောကလုံးမှာ အစွမ်းပိုင်ရှင်တွေက အများကြီး ရှိနေတာပဲကို... တကယ်ကို မောက်မာဝင့်ကြွားတဲ့ စိတ်မျိုး မထားသင့်ဘူး"

ဟုန်ထျန်ရီက သူ့ကိုယ်သူ ပြန်လည် ဆင်ခြင်သုံးသပ်လိုက်သည်။ ယခု ရှန်းတိနှင့်ပတ်သက်၍လည်း ယခင်တစ်ခေါက် တိုက်ခိုက်ခဲ့စဉ်က တစ်ဖက်လူမှာ ထိုမျှအထိ အစွမ်းထက်နေလိမ့်မည်ဟု သူ မထင်မှတ်ထားခဲ့ပေ။

အကြိမ်ပေါင်းများစွာ သူက တစ်ဖက်လူကို သတ်ဖြတ်နိုင်လုနီးပါး ဖြစ်ခဲ့သည်။

သို့သော် တစ်ဖက်လူက ထွက်ပြေးလွတ်မြောက်သွားပြီးနောက် ဤမျှတိုတောင်းသော အချိန်လေးအတွင်းမှာပင် သူ့ကို ပြန်လည်ရင်ဆိုင်ရန် ပြည့်စုံသော နည်းဗျူဟာတစ်ရပ်ကို ရှာဖွေတွေ့ရှိသွားလိမ့်မည်ဟု သူ လုံးဝ မထင်ထားခဲ့ပေ။

အကယ်၍ သူ့ထံတွင်သာ ဟင်းလင်းပြင် ပစ္စည်းသိုလှောင်ခန်းနှင့် ဆရာလင်း ရှိမနေပါက ဤတစ်ကြိမ်တွင် သူ သေချာပေါက် အန္တရာယ်ကြုံရမည်ဟု ခံစားနေရသည်။

ရှန်းတိ၏ ပြောင်းလဲမှုက အလွန်ကြီးမားလွန်းလှသည်။ အဓိကအချက်မှာ သူ၏အစွမ်းက အလွန် ထူးဆန်းလွန်းနေခြင်း ဖြစ်သည်။

လွန်ခဲ့သော ရက်အနည်းငယ်က ထိုကဲ့သို့သော အဆင့်မြင့် ပြန်လည်ကုသခြင်း အစွမ်းမျိုး မရှိခဲ့သေးသော်လည်း ယခုတစ်ကြိမ်တွင်မူ အပြည့်အဝ ကျွမ်းကျင်ပိုင်နိုင်နေပြီ ဖြစ်သည်။

ထို့အပြင် နတ်ဘုရားဆန္ဒ သန့်စင်ခြင်း ဟူသော သေစေနိုင်သည့် အစွမ်းကိုလည်း ဖုံးကွယ်ထားသေးရာ သူ့အတွက် ကြိုတင် ကာကွယ်ရန်ပင် ခက်ခဲလွန်းလှသည်။

"ဝုန်း"

လျင်မြန်သော လေခွင်းသံက လေထုကို တိုက်ရိုက် ပေါက်ကွဲထွက်သွားစေပြီး မျက်တောင်တစ်ခတ်အတွင်းမှာပင် ရှန်းတိတို့ သုံးယောက်က ဟုန်ထျန်ရီနှင့် လင်းယွမ်တို့၏ အရှေ့သို့ ရောက်ရှိလာကြသည်။

ရှန်းတိက ဟုန်ထျန်ရီကို စိုက်ကြည့်ကာ လှောင်ပြောင်လိုက်သည်။ "ဘယ်လိုလဲ... မပြေးတော့ဘူးလား"

"ဟက်ဟက်" ဟုန်ထျန်ရီက အေးစက်စွာ ရယ်မောလိုက်ပြီး ပြောလိုက်သည်။ "မကြာခင် ထွက်ပြေးရမယ့်လူက မင်းပဲ ဖြစ်မှာပါ"

ရှန်းတိက မျက်မှောင်ပင့်လိုက်ပြီး သူ့ဘေးရှိ လင်းယွမ်ကို တစ်ချက်ကြည့်ကာ အေးစက်စွာ ရယ်မောလိုက်သည်။ "ဟက်... ဘယ်သူကများ မင်းကို ဒီလိုစကားမျိုး ပြောရဲတဲ့ သတ္တိတွေ ပေးလိုက်တာလဲ"

ထိုသို့ပြောရင်း သူက လင်းယွမ်ကို ရုတ်တရက် စိုက်ကြည့်လိုက်သည်။ "မင်းလား... ကောင်လေး"

လင်းယွမ်၏ အသက်အရွယ်က သူ့ထက် ပိုငယ်ပုံရသည်။ အနည်းဆုံးတော့ အပြင်ပန်းသွင်ပြင်အရ လင်းယွမ်က သူ့လောက် အသက်မကြီးပေ။

သို့သော် ထို "ကောင်လေး" ဟူသော စကားစုက လင်းယွမ်ကို ဒေါသထွက်စေခြင်း မရှိဘဲ ဟုန်ထျန်ရီကိုမူ ချက်ချင်း ဒေါသပေါက်ကွဲသွားစေသည်။

သူက ရုတ်တရက် အော်ဟစ်လိုက်သည်။ "အတင့်ရဲလှချည်လား"

ထိုသို့ပြောပြီးနောက် သူက အပိုစကားတွေ ပြောမနေတော့ဘဲ ခန္ဓာကိုယ်ကို ချက်ချင်း လှုပ်ရှားလိုက်ရာ မျက်သုံးလုံး ကောင်းကင်ခွေးကြီး၏ ပုံစံအဖြစ်သို့ ပြောင်းလဲသွားသည်။

သူ၏ လေးနှင့်မြှားကို ထုတ်ယူလိုက်ခြင်း မရှိဘဲ ခေါင်းကိုမော့ကာ တတိယမြောက် မျက်လုံးကြီးကို ရုတ်တရက် ဖွင့်လိုက်သည်။

"ဝှစ်"

တတိယမြောက် မျက်လုံးထဲမှ ကြောက်မက်ဖွယ်ကောင်းသော စွမ်းအင်ရောင်ခြည်တန်းတစ်ခု ချက်ချင်း ပေါက်ကွဲထွက်ပေါ်လာသည်။

ရှန်းတိက အေးစက်စွာ ပြုံးလိုက်ပြီး လုံးဝ ကာကွယ်ခြင်းမပြုဘဲ ဟုန်ထျန်ရီဆီသို့ တဟုန်ထိုး ပြေးဝင်သွားသည်။

"ဘုန်း"

ထိုစွမ်းအင်ရောင်ခြည်တန်းက ရှန်းတိ၏ ရင်ဘတ်ကို ချက်ချင်း ဖောက်ထွင်းသွားပြီး သွေးသံရဲရဲ ဒဏ်ရာကြီးတစ်ခု ချက်ချင်း ဖြစ်ပေါ်လာကာ သွေးများ ပန်းထွက်လာပြီး အသားစများလည်း လွင့်စဉ်ထွက်သွားသည်။

သို့သော် ရှန်းတိက လုံးဝ ဂရုမစိုက်ပေ။ သူ၏ အလျင်က အနည်းငယ်မျှ လျော့ကျသွားခြင်း မရှိဘဲ လက်ကိုမြှောက်ကာ ဟုန်ထျန်ရီဆီသို့ ညွှန်ပြလိုက်သည်။

ဟုန်ထျန်ရီက အလျင်အမြန် နောက်ဆုတ်လိုက်သော်လည်း ထိုအချိန်မှာပင် ဘေးဘက်ရှိ တုံမြောင်မြောင်နှင့် ချန်ထောင်တို့က စတင် တိုက်ခိုက်လာကြပြီ ဖြစ်သည်။

ချန်ထောင်က လက်ကို တစ်ချက်ဝှေ့ယမ်းလိုက်သည်နှင့် ကောင်းကင်သို့တိုင် မြင့်မားသော လှိုင်းလုံးကြီးများ ဖြစ်ပေါ်လာပြီး ဟုန်ထျန်ရီ၏ ပတ်ပတ်လည်ကို တိုက်ရိုက် ဝိုင်းရံလိုက်ကာ ဧရာမ ရေဘောလုံးကြီးတစ်ခုအဖြစ် ပြောင်းလဲသွားပြီး သူ့ကို ထွက်ပြေးခွင့် မပေးတော့ပေ။

တုံမြောင်မြောင်ကမူ ဧရာမ ပင့်ကူမည်းကြီး တစ်ကောင်အဖြစ်သို့ အသွင်ပြောင်းလိုက်ပြီး လှိုင်းလုံးကြီးများထဲသို့ ခုန်ဆင်းသွားသည်။

လှိုင်းလုံးကြီးများက လိမ့်တက်သွားပြီး သူမကို ဟုန်ထျန်ရီဆီသို့ တရှိန်ထိုး လွင့်စင်သွားစေသည်။

ထို့နောက် ပင့်ကူမည်းကြီးက ဧရာမ ပင့်ကူမျှင်များကို အဆက်မပြတ် မှုတ်ထုတ်လိုက်ပြီး ဟုန်ထျန်ရီဆီသို့ လျင်မြန်စွာ ပစ်လွှတ်လိုက်သည်။

ဟုန်ထျန်ရီက အေးစက်စွာ ရယ်မောလိုက်သည်။ "မင်းတို့နှစ်ယောက်မှာလည်း အဆင့်မြင့် ပြန်လည်ကုသခြင်း အစွမ်း ရှိနေမယ်ဆိုတာကို ငါတော့ မယုံဘူးကွာ"

သူက တတိယမြောက် မျက်လုံးကို ဖွင့်လိုက်ပြီး စွမ်းအင်ရောင်ခြည်တန်းများကို အဆက်မပြတ် ပေါက်ကွဲထွက်ပေါ်စေကာ ပင့်ကူမည်းကြီး တုံမြောင်မြောင်ဆီသို့ အရူးအမူး ပစ်ခတ်လိုက်သည်။

တုံမြောင်မြောင်က ခန္ဓာကိုယ်ကို ကာကွယ်ရန်အတွက် စွမ်းအင်အကာအကွယ်ကို အလျင်အမြန် စုစည်းလိုက်သည်။

သို့သော် ဟုန်ထျန်ရီ၏ တိုက်ခိုက်မှုက အကာအကွယ်ကို လုံးဝ လျစ်လျူရှုထားပြီး အကြောင်းအကျိုး ဆက်စပ်မှုအပေါ် မူတည်ကာ တိုက်ရိုက် အလုပ်လုပ်ခြင်း ဖြစ်သည်။

"ဝုန်း" ဟူသော အသံတစ်သံနှင့်အတူ ပင့်ကူမည်းကြီး၏ ဝမ်းဗိုက်အောက်ပိုင်းမှာ ချက်ချင်း ဖောက်ထွင်းခံလိုက်ရသည်။

တုံမြောင်မြောင်က ချက်ချင်းပင် နာကျင်စွာ အော်ဟစ်လိုက်ပြီး သူမ၏ ခန္ဓာကိုယ်က လျင်မြန်စွာ ကျုံ့ဝင်သွားကာ လူသားပုံစံသို့ ပြန်လည်ပြောင်းလဲသွားပြီး ဝမ်းဗိုက်ကို ဖိလျက် လှိုင်းလုံးကြီးများထဲသို့ ပြုတ်ကျသွားလေသည်။

သူတို့က တမန်တော်ဆယ့်နှစ်ပါးသာ ဖြစ်ပြီး ရှန်းတိ မဟုတ်သည့်အတွက် ဟုန်ထျန်ရီ၏ ပြိုင်ဘက် မည်သို့ ဖြစ်နိုင်ပါမည်နည်း။

ဟုန်ထျန်ရီက ရှန်းတိရှေ့တွင် အနည်းငယ် အထိနာခဲ့ရုံမျှသာ ဖြစ်ပြီး မည်သူမဆို ဝင်ရောက် စိန်ခေါ်နိုင်သူမျိုး မဟုတ်ပေ။

သို့သော် တုံမြောင်မြောင်နှင့် ချန်ထောင်တို့ ပူးပေါင်းတိုက်ခိုက်မှုက ဟုန်ထျန်ရီ၏ အာရုံကို အမှန်တကယ် ပြန့်လွင့်သွားစေခဲ့သည်။

ထိုအချိန်တွင် ရှန်းတိက အရှေ့သို့ ရောက်ရှိနေပြီဖြစ်ရာ ဤတစ်ကြိမ်တွင် သူက လက်ကို ထပ်မံမြှောက်လိုက်ပြီး ဟုန်ထျန်ရီ၏ နဖူးတည့်တည့်သို့ လက်ညိုးတစ်ချောင်းဖြင့် ညွှန်ပြကာ ရက်စက်စွာ ပြုံးလျက် အော်ဟစ်လိုက်သည်။ "သေစမ်း"

သို့သော် ဟုန်ထျန်ရီက နှုတ်ခမ်းထောင့်တွင် အေးစက်သောအပြုံးတစ်ခု ပေါ်လာပြီး အနည်းငယ်မျှပင် ကြောက်ရွံ့ခြင်း မရှိပေ။

ရှန်းတိက မျက်မှောင်ကြုတ်သွားသည်။ တစ်ဖက်လူက ဘယ်ကနေ ယုံကြည်မှုတွေ ရနေမှန်း သူ နားမလည်နိုင်ပေ။ ဤအချိန်အထိတောင် ရှောင်တိမ်းခြင်း မပြုသေးပေ။

သူက ပင်ကိုယ်အသိစိတ်အရ တစ်ခုခု မှားယွင်းနေကြောင်း ခံစားလိုက်ရသဖြင့် လက်ထဲမှ လှုပ်ရှားမှုကို အနည်းငယ် နှေးကွေးသွားစေသည်။

ထင်သည့်အတိုင်းပင်၊ ထိုအချိန်မှာပင် ယခင်က သူ သတိထားမိခဲ့သော ဟုန်ထျန်ရီဘေးမှ လူငယ်လေးက စတင် လှုပ်ရှားလာလေပြီ။

တစ်ဖက်လူ၏ ခန္ဓာကိုယ်က ရုတ်တရက် လျှပ်တစ်ပြက် လှုပ်ရှားသွားပြီး တိုက်ရိုက်ပင် အရိပ်အယောင် ပျောက်ကွယ်သွားသည်ကို မြင်လိုက်ရသည်။

ရှန်းတိ၏ ရင်ထဲတွင် ဒိန်းခနဲ ဖြစ်သွားသော်လည်း နတ်ဘုရားဆန္ဒ သန့်စင်ခြင်း တိုက်ခိုက်မှုကိုတော့ ရပ်တန့်မပစ်ခဲ့ပေ။

ယခုအချိန်တွင် ဘာသာဝင်များ၏ ဆုတောင်းယုံကြည်မှု စွမ်းအားကို အားကိုးကာ မည်သည့် ဒဏ်ရာမျိုးကိုမဆို လျင်မြန်စွာ ပြန်လည်ကောင်းမွန်လာစေနိုင်ပြီဟု သူ့ကိုယ်သူ ယုံကြည်ထားသည်။

ထို့ကြောင့် သူက ဘာကိုမှ ဂရုမစိုက်တော့ဘဲ ဟုန်ထျန်ရီကိုသာ အရင်ဆုံး သတ်ဖြတ်ပစ်ရန် ဆုံးဖြတ်လိုက်သည်။

သို့နှင့် လင်းယွမ်က သူ၏ခေါင်းထက်တွင် ပေါ်လာသောအချိန်၌ သူက မည်သည့် ကာကွယ်မှုမျိုးကိုမျှ မပြုလုပ်ခဲ့ပေ။

လင်းယွမ်က ထိုမြင်ကွင်းကို မြင်လိုက်ရသောအခါ မျက်နှာပေါ်တွင် ထူးဆန်းသော အရိပ်အယောင်များ မနေနိုင်ဘဲ ပေါ်လာလေသည်။

ဒီ ရှန်းတိက ဒီလောက်တောင် ကိုယ့်ကိုယ်ကိုယ် ယုံကြည်မှုလွန်ကဲနေတာလား။

သူ့ကိုတောင် လျစ်လျူရှုရဲတယ်ပေါ့လေ။

ထိုသို့ တွေးမိလိုက်သည်နှင့် လင်းယွမ်က မူလက အသုံးပြုရန် ရည်ရွယ်ထားသော ရုပ်သေးကြိုးမျှင် အစွမ်းကို ရုတ်တရက် ပြန်လည်ရုပ်သိမ်းလိုက်ပြီး လက်ဝါးထဲတွင် ဝိညာဉ် ချုပ်နှောင်ခြင်း သင်္ကေတတစ်ခုကို စုစည်းလိုက်လေတော့သည်။

ဆက်ရန်...