အခန်း ၇၄၁

အခန်း (၇၄၁) ကိုးထပ် တာအိုမျှော်စင်၊ ရှေးဟောင်း ယွဲ့ အင်မော်တယ် နန်းတော်၏ ဂုဏ်ကျက်သရေ (အပိုင်း ၁)

အစောပိုင်းက အသေးစား အောင်မြင်ပြီးသား တာအိုနယ်ပယ်သည် အဆက်မပြတ် စီးဆင်းနေသော မြစ်ပြင်ကြီးတစ်ခုနှင့် တူပါက ယခု တာအိုမျှော်စင်၏ ပဉ္စမအထပ်သို့ စုယွီ ခြေချလိုက်ချိန်တွင် တာ့ချန် တာအိုစွမ်းအားများက ကောင်းကင်ကြယ်မြစ်ကြီးအောက်သို့ ရောက်သွားသကဲ့သို့ သူ့အား ပြင်းထန်စွာ ရိုက်ခတ်ဖိနှိပ်လာတော့၏။

ထိုစွမ်းအားများက အသေးစား အောင်မြင်ပြီးသား တာအိုနယ်ပယ်ထက် အဆပေါင်းများစွာ ပိုမိုကြီးမားပြင်းထန်လှပေသည်။ စုယွီ၏ သန်မာလှသော ခန္ဓာကိုယ်ကြီးပင် ပဉ္စမအထပ်သို့ ခြေချလိုက်သည့် အခိုက်အတန့်၌ နောက်သို့ ခြေသုံးလှမ်းခန့် ဆုတ်သွားရပါ၏။

ဓာတ်ကြီးငါးပါး တာအိုနယ်ပယ်၏ ကြီးမားလှသော ဝိညာဉ်စွမ်းအားများကို သူ၏ ပတ်ပတ်လည်၌ စုစည်းလိုက်ပြီးမှသာ ပဉ္စမအထပ်တွင် ခြေကို မြဲမြံစွာ ရပ်တည်နိုင်ခဲ့တော့သည်။

“ဝုန်း…”

စုယွီက သူ၏ ဓာတ်ကြီးငါးပါး တာအိုနယ်ပယ် စွမ်းအားများကို ထုတ်ဖော်ပြသလိုက်သည်နှင့် တစ်ပြိုင်နက် ပဉ္စမအထပ်အတွင်းရှိ ကြီးမားခမ်းနားလှသော ကောင်းကင်နှင့်မြေကြီး စွမ်းအားများက ပဲ့တင်ထပ်သွားကာ ဓာတ်ကြီးငါးပါး တာအိုစွမ်းအားများအဖြစ် အသွင်ပြောင်းသွားလေ၏။ ထို့အပြင် ထိုစွမ်းအားများက အသက်ဝင်လှုပ်ရှားလာသကဲ့သို့ ပေါ်လွင်လာသည်။

ရွှေ၊ သစ်သား၊ ရေ၊ မီး၊ မြေကြီး... ဓာတ် တစ်ခုစီက ကောင်းကင်နှင့် မြေကြီး၏ အစိတ်အပိုင်း တစ်ခုစီကို နေရာယူထားကြပါ၏။

ဓာတ်ကြီးငါးပါး တာအိုနယ်ပယ်၏ မဟာအောင်မြင်ခြင်းအဆင့် အဖြစ် စုစည်းသွားပြီးနောက် ဓာတ်ကြီးငါးပါး၏ စစ်မှန်သော ဝိညာဉ်များက သက်ဆိုင်ရာ နယ်ပယ်အသီးသီးတွင် ပုံသဏ္ဌာန် ပေါ်ထွက်လာကြတော့သည်။

စုယွီ ခြေမြဲသွားသည့် အခိုက်အတန့်မှာပင် ဓာတ်ကြီးငါးပါး၏ စစ်မှန်သော ဝိညာဉ်များက သူ့ထံသို့ တဟုန်ထိုး ဝင်ရောက် တိုက်ခိုက်လာကြလေပြီ။

“ဝှစ်…”

အပြင်ဘက်တွင်မူကား...

ပဉ္စမအထပ်တွင် ဓာတ်ကြီးငါးပါး၏ စစ်မှန်သော ဝိညာဉ်များက စုယွီကို ပြင်းထန်စွာ တိုက်ခိုက်နေသည်ကို ရွှေရောင်ချပ်ဝတ် ခေါင်းဆောင်နှစ်ဦးက မျက်လုံးအပေါက် ဟာလာဟင်းလင်းကြီးများဖြင့် စောင့်ကြည့်နေကြ၏။ စုယွီကို အနီးကပ် စောင့်ကြည့်နေစဉ် သူတို့၏ မျက်နှာအမူအရာများက တင်းမာသွားကြသည်။

တာအိုမျှော်စင်က အန္တရာယ် ကင်းမဲ့နေခြင်း မဟုတ်ပေ။

အထူးသဖြင့် ဤတာအိုနယ်ပယ် မဟာအောင်မြင်ခြင်းအဆင့်သို့ ရောက်ရှိပြီးနောက် ဝင်ရောက်နိုင်သော ပဉ္စမအထပ်တွင် တာအိုစွမ်းအားများက ကိုယ်ပိုင် ပုံသဏ္ဌာန်များအဖြစ် အသက်ဝင်နေခဲ့ပြီ ဖြစ်သည်။

အကယ်၍ စုယွီသာ ဓာတ်ကြီးငါးပါး တာအို စစ်မှန်သော ဝိညာဉ်များ၏ တိုက်ခိုက်မှုကို ခုခံနိုင်စွမ်း မရှိပါက သူသည် ပြင်းထန်သော ဒဏ်ရာများကို ရရှိသွားနိုင်ပြီး အဆိုးရွားဆုံး အနေဖြင့် မျှော်စင်ထဲမှ အပြင်သို့ လွင့်စင်ထွက်သွားနိုင်ပါ၏။ အဆိုးဆုံး အခြေအနေတွင်တော့ သူ သေဆုံးသွားနိုင်ပေသည်။

သို့ဖြစ်၍ ရွှေရောင်ချပ်ဝတ် ခေါင်းဆောင် နှစ်ဦးစလုံး၏ အမူအရာက အနည်းငယ် လေးနက်တည်ကြည်သွားတော့၏။

အကြောင်းမူကား စုယွီသည် အသေးစား အောင်မြင်မှု ဓာတ်ကြီးငါးပါး တာအိုနယ်မြေကို မကြာသေးမီကမှ နားလည်သဘောပေါက်ထားခဲ့ခြင်း ဖြစ်သောကြောင့်ပင်။

တာအိုမျှော်စင်၏ ပဉ္စမအထပ်သို့ ဝင်ရောက်ခြင်းက သူ့အတွက် အနည်းငယ် တင်းကျပ်နေခဲ့သည်။

သို့သော်ငြား ဓာတ်ကြီးငါးပါး၏ စစ်မှန်သော ဝိညာဉ်များက စုယွီကို အဆက်မပြတ် ဝင်ရောက်တိုက်ခိုက်နေချိန်တွင် သူက ပဉ္စမအထပ်၏ ဟင်းလင်းပြင်၌ တင်ပျဉ်ခွေ ထိုင်ချကာ တည်ငြိမ်နေခဲ့လေပြီ။ ဓာတ်ကြီးငါးပါး တာအိုနယ်ပယ်အပြင် သူ့ပတ်ပတ်လည်တွင် အတားအဆီး အလွှာတစ်ခုပါ ရှိနေပြီး ပြင်ပမှ တာအိုစွမ်းအားများကို ပိတ်ဆို့ခုခံထားသည်။

၎င်းက စုယွီအား တာအိုမျှော်စင်၏ ပဉ္စမအထပ်တွင် ဓာတ်ကြီးငါးပါး တာအိုကို နားလည်သဘောပေါက်ရန် အေးချမ်းစွာ ရပ်တည်နေနိုင်ခွင့် ပေးထားပါ၏။

ဤမြင်ကွင်းကို မြင်လိုက်ရသောအခါ ရွှေရောင်ချပ်ဝတ် ခေါင်းဆောင်နှစ်ဦးက အံ့ဩတကြီး ရေရွတ်လိုက်၏။

“ဟင်...”

ဘယ်ဘက်မှ ရွှေရောင်ချပ်ဝတ် ခေါင်းဆောင်က အံ့သြဟန်ဖြင့် မှတ်ချက်ပေးလာသည်။

“ခေါင်းဆောင်ကြီး... ကြည့်ရတာ သူက ဟင်းလင်းပြင် တာအိုစွမ်းအားကို ကောင်းကောင်းကြီး နားလည်သဘောပေါက်ထားပုံပဲ... တာအိုနယ်ပယ် မဟာအောင်မြင်ခြင်းအဆင့်ရဲ့ ပြင်းထန်တဲ့ တိုက်ခိုက်မှုအောက်မှာတောင် သူက ဘာဒဏ်ရာမှ မရဘဲ ရှိနေတယ်...”

ဗလတောင့်တောင့် ရွှေရောင်ချပ်ဝတ် ခေါင်းဆောင်က အနည်းငယ် အံ့သြသွားသော်လည်း တစ်ချက် ရယ်ကာ တုံ့ပြန်လိုက်၏။

“အဟဲ..မဆိုးဘူး... ငါ ထင်ထားတဲ့အတိုင်းပဲ... ဟင်းလင်းပြင် တာအိုစွမ်းအားနဲ့ ပဉ္စမအထပ်ကို ရောက်လာတာဆိုတော့ သူလည်း အကန့်အသတ်ကို ရောက်နေလောက်ပြီ...”

တာအိုမျှော်စင် အတွင်း၌ကား...

စုယွီက ရွှေ ပုစဉ်းရင်ကွဲ မျက်လုံးဖြင့် အထက်ဘုံ သန့်စင်သော မူလ တာအိုကျင့်စဉ်ကို လည်ပတ်စေလိုက်သည်။ ကြည်လင်သော စိတ်အာရုံဖြင့် သူ၏ ပတ်ပတ်လည်တွင် ပုံသဏ္ဌာန် ပေါ်ထွက်လာသော ဓာတ်ကြီးငါးပါး တာအိုစွမ်းအားများကို သူ စတင် နားလည်သဘောပေါက်ရန် ကြိုးပမ်းနေတော့၏။

သို့သော်ငြား မျှော်စင်၏ အားနည်းချက် အချို့ကို သူ ရှာဖွေတွေ့ရှိသွားခဲ့သည်။

သူက ဓာတ်ကြီးငါးပါး တာအိုကို စုစည်းလိုက်သည်နှင့် တာအိုမျှော်စင်က သက်ဆိုင်ရာ ဓာတ်ကြီးငါးပါး တာအိုစွမ်းအားများကို ပုံသဏ္ဌာန် ဖော်ဆောင်ပေးနိုင်ခဲ့သည်။

သို့ရာတွင် သူက ဟင်းလင်းပြင် တာအိုစွမ်းအားကို စုစည်းလိုက်သောအခါ တာအိုမျှော်စင်က သက်ဆိုင်ရာ ဟင်းလင်းပြင် တာအိုစွမ်းအားကို ပုံသဏ္ဌာန် မဖော်ဆောင်ပေးနိုင်ခဲ့ချေ။ ထို့ကြောင့် သူ၏ ဟင်းလင်းပြင် တာအိုကို နားလည်သဘောပေါက်ရန် ကြိုးပမ်းမှုက သိပ်ပြီး အဆင်မပြေလှဘဲ တိုက်ရိုက် မကျသကဲ့သို့ ဖြစ်နေရပါ၏။

တစ်နည်းအားဖြင့် ဆိုရသော် မျှော်စင်ကြီးက ဟင်းလင်းပြင် တာအိုကို နားလည်သဘောပေါက်ရန်အတွက် သူ့ကို မကူညီနိုင်ခဲ့ပါပေ။

စုယွီက သက်ပြင်းခပ်ဖွဖွ ချလိုက်ပြီး အတွေးထဲ နစ်မျောသွားသည်။

‘နှမြောစရာပဲ... အကယ်၍ ငါသာ ဟင်းလင်းပြင် တာအိုကို ကနဦးအဆင့် ဒါမှမဟုတ် အသေးစားနဲ့ မဟာအောင်မြင်ခြင်းအဆင့် အဆင့်လောက်အထိ နားလည်သဘောပေါက်နိုင်ခဲ့ရင် ဟင်းလင်းပြင် တာအိုစွမ်းအားနဲ့ မူလဝိညာဉ် ကျင့်စဉ် အဆင့် ဆရာကြီးတွေကိုတောင် ရင်ဆိုင်နိုင်လောက်တယ်...’

သက်ပြင်းချပြီးနောက် စုယွီသည် သူ၏ အာရုံလွင့်ပါးနေသော အတွေးများကို ထိန်းချုပ်လိုက်ပြီး တာအိုမျှော်စင်မှ ပုံသဏ္ဌာန် ဖော်ဆောင်ပေးနေသော ဓာတ်ကြီးငါးပါး တာအိုစွမ်းအားများကို နားလည်သဘောပေါက်ရန်သာ အပြည့်အဝ အာရုံစိုက်လိုက်တော့သည်။

သုံးနှစ်တာ ကာလက မျက်စိတစ်မှိတ်အတွင်း ကုန်လွန်သွားခဲ့လေပြီ။

“ဝူး…”

သုံးနှစ်အကြာ တစ်နေ့တွင်။

စုယွီ၏ ပတ်ပတ်လည်တွင် စုဆောင်းထားသော ဓာတ်ကြီးငါးပါး တာအိုက တိတ်ဆိတ်စွာပင် အသွင်ပြောင်းသွားခဲ့၏။ အင်မော်တယ် အလင်းတန်းများက တောက်ပစွာ စုစည်းသွားပြီး သက်ဝင်လှုပ်ရှားနေသော စစ်မှန်သည့် တာအိုဝိညာဉ်များကို ဖန်တီးလိုက်တော့သည်။

ဤစစ်မှန်သော ဝိညာဉ်များက ဝိညာဉ်စွမ်းအားဖြင့် ဖွဲ့စည်းထားခြင်း မဟုတ်ဘဲ ဓာတ်ကြီးငါးပါး နယ်ပယ်၏ ကောင်းကင်နှင့် မြေကြီး တာအိုစွမ်းအားများဖြင့်သာ တိုက်ရိုက် ဖွဲ့စည်းထားခြင်း ဖြစ်သည်။

စစ်မှန်သော တာအိုဝိညာဉ်များ ပုံသဏ္ဌာန် ပေါ်ထွက်လာခြင်းက တာအိုနယ်မြေ တစ်ခု၏ မဟာအောင်မြင်ခြင်း အဆင့်ကို အောင်မြင်ခြင်း၏ လက္ခဏာရပ်ပင် ဖြစ်ပါ၏။

အကယ်၍သာ ၎င်းက ပြီးပြည့်စုံသွားမည် ဆိုပါက ဤစစ်မှန်သော တာအိုဝိညာဉ်များသည် စုယွီ၏ ကိုယ်ပိုင် ခန္ဓာကိုယ်နှင့် ခွဲခြား၍မရနိုင်လောက်အောင်ပင် ဖြစ်သွားပေလိမ့်မည်။

၎င်းတို့က စုယွီ၏ ခန္ဓာကိုယ်မှ ခွဲထွက်သွားနိုင်ပြီး ရက်ပေါင်းများစွာတိုင်အောင် ပြိုကွဲမသွားဘဲ တည်ရှိနေနိုင်စွမ်း ရှိကြသည်။

၎င်းတို့က စစ်မှန်သော တာအို ခန္ဓာကိုယ်များနှင့် တူညီနေခဲ့၏။

စုယွီက သူ၏ ဓာတ်ကြီးငါးပါး တာအိုနယ်ပယ်မှ စစ်မှန်သော ဝိညာဉ်များကို ပုံသဏ္ဌာန် ဖော်ဆောင်လိုက်သည့် အခိုက်အတန့်မှာပင် သူ၏ မျက်လုံးများကို ဖွင့်လိုက်သည်။

စုယွီက တည်ငြိမ်မှု အပြည့်ဖြင့် သူ၏ ဘေးရှိ စစ်မှန်သော ဝိညာဉ်ငါးခုနှင့် ယခုအခါ ငြိမ်သက်သွားပြီဖြစ်သော တာအိုမျှော်စင် ပဉ္စမအထပ်၏ တာအိုစွမ်းအားများကို ကြည့်လိုက်ပါ၏။

သူ၏ တာအိုစွမ်းအား ဖိနှိပ်မှုအောက်တွင် ပဉ္စမအထပ်၏ တာအိုစွမ်းအားများက လှိုင်းလုံးကြီးများကို ထပ်မံ၍ မွှေနှောက်နိုင်စွမ်း မရှိကြတော့ချေ။

“ဝူး…”

အနည်းငယ်မျှပင် တုံ့ဆိုင်းမနေတော့ဘဲ စုယွီက မျှော်စင်၏ ပဉ္စမအထပ်ကို ဖြတ်ကျော်ကာ ဆဋ္ဌမအထပ်ဆီသို့ ဦးတည်သွားခဲ့တော့သည်။

အပြင်ဘက်တွင်မူ စုယွီ၏ ဓာတ်ကြီးငါးပါး တာအိုနယ်ပယ်က တာ့ချန် ကျင့်ကြံခြင်းကမ္ဘာ အဖြစ်သို့ အသွင်ပြောင်းသွားသောအခါ ရွှေရောင်ချပ်ဝတ် ခေါင်းဆောင်နှစ်ဦး၏ မျက်နှာအမူအရာများက သိသိသာသာ ပြောင်းလဲသွားပြီး အံ့အားသင့်သွားရ၏။

“ဒီကောင်လေး... အဆင့်ချိုးဖြတ်သွားတာလား...”

“မဖြစ်နိုင်တာ... သူက နှစ်အနည်းငယ်လေး အတွင်းမှာတင် မဟာအောင်မြင်ခြင်းအဆင့်ကို အဆင့်ချိုးဖြတ်သွားတာလား... အထူးသဖြင့် ဓာတ်ကြီးငါးပါးရဲ့ မဟာအောင်မြင်ခြင်းအဆင့်တဲ့လား...”

“သူ့ရဲ့ နားလည်နိုင်စွမ်း ပါရမီက အဲဒီလောက်တောင် အားကောင်းနေတာလား...”

ရွှေရောင်ချပ်ဝတ် ခေါင်းဆောင်နှစ်ဦးမှာ အလွန်အမင်း အံ့ဩသွားကြတော့သည်။

သို့သော်ငြား တစ်ခဏမျှ တုံ့ဆိုင်းသွားပြီးနောက် မျှော်စင်၏ ဆဋ္ဌမအထပ်တွင် အနည်းငယ် ယိမ်းယိုင်နေသော စုယွီ၏ ပုံရိပ်ကို သူတို့ မြင်တွေ့လိုက်ရ၏။

ဗလတောင့်တောင့် ရွှေရောင်ချပ်ဝတ် ခေါင်းဆောင်က လေသံတိုးတိုးဖြင့် မှတ်ချက်ချလိုက်သည်။

“အလွန်ဆုံးကတော့ သူ သတ္တမအထပ်ကိုပဲ ရောက်လိမ့်မယ်... သူက ဓာတ်ကြီးငါးပါး တာအိုနယ်ပယ် မဟာအောင်မြင်ခြင်းအဆင့်ကို အခုလေးတင် အဆင့်ချိုးဖြတ်ထားတာဆိုတော့ အဲဒီထက် ပိုမြင့်တဲ့နေရာကို မသွားနိုင်တော့ဘူး... အရင်ကတော့ စုဆောင်းထားတဲ့ အရာတွေ ရှိနေနိုင်ပေမယ့် အခုတော့ မတူတော့ဘူးလေ...”

သူ၏ ဘေးတွင်ရပ်နေသော ရွှေရောင်ချပ်ဝတ် ခေါင်းဆောင်ကလည်း ခေါင်းညိတ်ကာ သဘောတူလိုက်၏။ ဆဋ္ဌမအထပ် ၊ သတ္တမအထပ်အထိ ရောက်ရှိခြင်းကပင် သူတို့ မျှော်လင့်ထားသည်ထက် ကျော်လွန်နေခဲ့ပြီ ဖြစ်သည်။

ရှေးဟောင်းခေတ် ကာလများတွင်ပင် နှစ်တစ်ထောင်၌ တစ်ခါမျှသာ တွေ့ရခဲသော ကြောက်မက်ဖွယ် ပါရမီရှင်မျိုး ဖြစ်ပေသည်။

တာအို ပေါင်းစည်း သခင် နယ်ပယ်၏ အဆင့်အတန်းကိုပင် လှမ်းကိုင်နိုင်ရန် အခွင့်အရေး ရှိကောင်း ရှိနေနိုင်ပါ၏။

အခြားတစ်ဖက်တွင်လည်း တာအို ပေါင်းစည်း သခင် နယ်ပယ်ဆိုသည်မှာ ကျင့်ကြံခြင်း ကမ္ဘာအတွင်းရှိ ထိပ်သီး စွမ်းအားရှင်ကြီးများ ရှိနေသော နယ်ပယ်ဖြစ်ပြီး ဂုဏ်သတင်း ကြီးမားလှသည့် ယွဲ့ အင်မော်တယ် နန်းတော်တွင်ပင် လက်ချိုးရေတွက်၍ နည်းပါးလှပါသည်။

စုယွီ ထုတ်ဖော်ပြသလိုက်သော အံ့မခန်း နားလည်နိုင်စွမ်း ပါရမီက သူတို့ နှစ်ဦးစလုံးကို ဝမ်းသာ

ပျော်ရွှင်သွားစေခဲ့၏။

ဤကဲ့သို့သော ပါရမီရှင်က သူ့ကို ပြုစုပျိုးထောင်ရန်အတွက် သူတို့ ရင်းနှီးမြှုပ်နှံမည့် အချိန်နှင့် ကြိုးစားအားထုတ်မှုများနှင့် တကယ်ကို ထိုက်တန်လှပါသည်။