အခန်း ၁၀

အခန်း (၁၀) - လေ့လာစောင့်ကြည့်သူ

သူတို့နှစ်ဦး လုံခြုံရေးတံခါးရှေ့သို့ ရောက်လာသောအခါ လုံခြုံရေးတာဝန်ကျအစောင့်က လင်းတကို တစ်ချက်ကြည့်လိုက်ပြီး လုံခြုံရေးတံခါးကို ဖွင့်ပေးလိုက်သည်။

မြေအောက်စခန်းက ဆယ်စုနှစ်တစ်ခုကျော်ကြာ ချောမွေ့စွာ လည်ပတ်နေခဲ့သဖြင့် အစောင့်များမှာ သတိကင်းမဲ့နေသည်မှာ ကြာပြီဖြစ်သည်။

ဗဟိုရုံးခန်းဧရိယာသည် ခေတ်မီနည်းပညာပုံစံဖြင့် ထူးထူးခြားခြား သန့်ရှင်းသပ်ရပ်နေသည်။ နံရံများကို ငွေရောင်မှန်များဖြင့် ပြုလုပ်ထားပြီး၊ မီးအလင်းရောင်များကလည်း ဉာဏ်ရည်တုစနစ်ဖြင့် ဖုံးကွယ်တပ်ဆင်ထားသည်။

ဤနေရာနှင့် နှိုင်းယှဉ်လျှင် မြေအောက်ထပ်ပေါင်းများစွာရှိ လေ့ကျင့်ရေးနေရာများက ခွေးလှောင်အိမ်များနှင့်ပင် တူနေလေသည်။

ကောင်းရွှမ်က ရှေ့မှနေ၍ တိတ်တဆိတ် လမ်းပြကာ ယွမ်ချင်းရှန်ကို ကျိုးလန်၏ ရုံးခန်းတံခါးရှေ့အထိ ခေါ်ဆောင်လာခဲ့သည်။

တံခါးမှာ သတ္တုစပ်ဖြင့် ပြုလုပ်ထားသော လျှောတံခါးအမျိုးအစားဖြစ်ပြီး တစ်ချက်ကြည့်ရုံဖြင့် အလွန်လေးလံကြောင်း သိသာလှသည်။ တံခါးရှေ့တွင် လက်နက်ကိုင် စက်ရုပ်နှစ်ရုပ် ရပ်နေသည်။

၎င်းတို့၏ ငွေဖြူရောင် သတ္တုခွံများက ပြောင်လက်နေပြီး၊ လက်ထဲတွင် မိုးကြိုးမုန်တိုင်း အမျိုးအစား (၃) ကျည်ဆန်ပြန့်သေနတ်များကို ကိုင်ဆောင်ထားသည်။

တုတ်ခိုင်သော သေနတ်ပြောင်းဝများက အလွန် ခြိမ်းခြောက်နိုင်စွမ်း ရှိလှသည်။

ဤသေနတ်အမျိုးအစားသည် ၎င်း၏ ကျည်ဆန်မှ ပန်းထွက်လာသော သံမဏိစေ့ ရာပေါင်းများစွာဖြင့် လူ့ခန္ဓာကိုယ်ကို အလွယ်တကူ ထိုးဖောက်ဝင်ရောက်နိုင်သည်။

ထိုသေနတ်‌၏ စွမ်းအားက ကြောက်မက်ဖွယ်ကောင်းလှသည်။

၎င်း၏ ကျယ်ပြန့်သော လွှမ်းခြုံနိုင်မှုဧရိယာက မျက်လှည့်ဆန်ဆန် တိုက်ခိုက်ရေးနည်းစနစ်အမျိုးမျိုးအတွက် ပို၍ပင် ကြီးမားသော ရန်သူဖြစ်သည်။

ကောင်းရွှမ်က စကားမပြောဘဲ ခေါင်းငုံ့ထားကာ ယွမ်ချင်းရှန်ကိုလည်း အချက်ပြရန်မရဲပေ။ သူ့ပတ်လည်တွင် ကင်မရာများစွာက သူနှင့် ယွမ်ချင်းရှန်ကို အရပ်မျက်နှာအနှံ့မှ စောင့်ကြည့်နေကြောင်း သူ ခံစားသိရှိနေသည်။ ဤအချိန်တွင် သူ လုံးဝ မလှုပ်ရှားရဲပေ။

ကံကောင်းထောက်မစွာဖြင့် ယွမ်ချင်းရှန်က အလွန်တည်ငြိမ်နေသည်။ သူမက ရှေ့သို့ လျှောက်သွားကာ လက်နက်ကိုင် စက်ရုပ်များကို လင်းတ၏အသံဖြင့် ပြောလိုက်သည်။

“မန်နေဂျာချုပ် ကျိုး... ကျွန်တော် တင်ပြစရာ အရေးကြီးကိစ္စလေးတစ်ခု ရှိလို့ပါ...”

သွေးနီရောင်နှလုံးသား၏ အားကောင်းသော အတုခိုးနိုင်စွမ်းက အသံမှတ်သားမှုစနစ်ကို လှည့်စားရန် လုံလောက်သည်ဟု ကောင်းရွှမ်ယုံကြည်ထားသည်။

လက်နက်ကိုင် စက်ရုပ်၏ အင်တာကွန်က ကျိုးလန်၏လက်ထဲတွင် ရှိနေသော်လည်း၊ အထဲမှ ကျိုးလန်မှာ တိတ်ဆိတ်နေဆဲပင်။

ယွမ်ချင်းရှန် မည်သည့်တုံ့ပြန်မှုမျှ မရရှိသဖြင့် အနည်းငယ် စိတ်လှုပ်ရှားလာသည်။

‘ကျိုးလန် တစ်ခုခု ရိပ်မိသွားပြီလား'

……….

စက်ဝိုင်းပုံစံ ဧရာမ ပုံရိပ်ယောင် အလင်းစခရင်ကြီးပေါ်တွင် ပြင်းထန်လှသော အက်ရှင်ဇာတ်ကားတစ်ကားကို ပြသနေသည်။ အလင်းနှင့် အရိပ်များက အဆက်မပြတ် ပြောင်းလဲနေပြီး တိုက်ပွဲမြင်ကွင်းများက အလွန်အမင်း ကြမ်းတမ်းကာ ရှုပ်ထွေးနေသည်။

ကျိုးလန်က သူ၏ အမှုဆောင်ကုလားထိုင်ပေါ်တွင် မှီထိုင်ရင်း ခမ်းနားလှသော သစ်သားစားပွဲကြီးပေါ်သို့ ခြေထောက်နှစ်ဖက်ကို တင်ကာ ရုပ်ရှင်ကို ပျင်းရိပျင်းတွဲ ကြည့်ရှုနေသည်။

သူ၏ ဘယ်ဘက်ခြမ်းတွင် ပုံရိပ်ယောင် အလင်းစခရင်ငယ် နှစ်ခုရှိပြီး၊ တံခါးအပြင်ဘက်တွင် ရပ်နေသော လူနှစ်ဦးကို ရှင်းလင်းစွာ ပြသနေသည်။

ကျိုးလန်က မည်သည့် ထူးခြားမှုကိုမျှ သတိမထားမိသော်လည်း သူ့စိတ်ထဲတွင်တော့ ခပ်ရေးရေး နိမိတ်မကောင်းသည့် ခံစားချက်တစ်ခုက စွဲထင်နေသည်။

သူသည် ပင်ကိုယ်အားဖြင့် စူးရှသော အလိုအလျောက်သိမြင်နိုင်စွမ်းပါရမီ ရှိသူတစ်ဦးဖြစ်ပြီး၊ အန္တရာယ်ကို အမြဲတမ်း ကြိုတင်ခံစားသိရှိနိုင်သူဖြစ်သည်။

ဤပါရမီကို အားကိုးရင်းဖြင့် ကျိုးလန်သည် မြောက်ပိုင်းပြည်နယ်၏ မန်နေဂျာချုပ် ဖြစ်လာနိုင်ခဲ့ခြင်းဖြစ်သည်။

မြောက်ပိုင်းပြည်နယ်သည် ကျယ်ဝန်းပြီး လူဦးရေနည်းပါးကာ တစ်နှစ်ပတ်လုံး အပူချိန်နိမ့်ကျသော ပတ်ဝန်းကျင်ရှိသော်လည်း အရင်းအမြစ်မျိုးစုံ ပေါကြွယ်ဝသော ပြည်နယ်ကြီးတစ်ခု ဖြစ်နေဆဲပင်။

ဤနေရာရှိ သွေးနတ်ဘုရားဂိုဏ်း၏ မန်နေဂျာချုပ်တစ်ဦးအနေဖြင့် ကျိုးလန်သည် အလွန် သက်သောင့်သက်သာရှိသောဘဝကို ဖြတ်သန်းနေရသည်။

မြောက်ပိုင်းခွန် စခန်းဆိုသည်မှာ အထက်မှ ချမှတ်ပေးသော ပရောဂျက်တစ်ခုဖြစ်ပြီး မူလက နာမ်ဝိညာဉ်မျိုးနွယ်စု၏ မျိုးဗီဇသက်ရောက်မှုများကို စမ်းသပ်ရန် ရည်ရွယ်ခဲ့ခြင်းဖြစ်သည်။

သို့သော် နှစ်အနည်းငယ် ကြာပြီးနောက် ပရောဂျက်ခေါင်းဆောင်မှာ သဲလွန်စမကျန်ဘဲ ပျောက်ကွယ်သွားခဲ့သည်။

မည်သို့ပင်ဆိုစေ မြောက်ပိုင်းခွန် စခန်းတွင် ကြီးမားလှသော အရင်းအနှီးများနှင့် သယံဇာတများကို ရင်းနှီးမြှုပ်နှံထားပြီးဖြစ်သည်။

အထက်လူကြီးများက ရလဒ်များကို စုံစမ်းစစ်ဆေးလာမည်ကို စိုးရိမ်သဖြင့် ကျိုးလန်အနေဖြင့် စခန်းကို ဆက်လက်လည်ပတ်နေစေရန်မှတစ်ပါး အခြားရွေးချယ်စရာမရှိခဲ့ပေ။

ဆယ်စုနှစ်တစ်ခုကျော်ကြာ အလုပ်ရှုပ်ခဲ့ပြီးနောက် လူငယ်လုပ်ကြံသတ်ဖြတ်သူအနည်းငယ်ကိုသာ လေ့ကျင့်ပေးနိုင်ခဲ့သည်။ ရိုးရိုးသားသားပြောရလျှင် ဤလုပ်ငန်းက ကြီးမားလှသော ဆုံးရှုံးမှုကြီးတစ်ခုဟု ကျိုးလန် ခံစားရသည်။

မြောက်ပိုင်းခွန် စခန်းတစ်ခုလုံးတွင် အနည်းဆုံး ဘီလီယံနှင့်ချီ၍ ရင်းနှီးမြှုပ်နှံထားရသည်။ ထိုငွေပမာဏဖြင့် အကောင်းစား တိုက်ခိုက်ရေးယာဉ်တစ်ခုကိုပင် ငှားရမ်းနိုင်ပေသည်။

လူငယ်လုပ်ကြံသတ်ဖြတ်သူများတွင် အလားအလာကောင်းများ ရှိသော်လည်း အချိန်ကာလက ရှည်လျားလွန်းပြီး အကျိုးအမြတ်ကို အာမခံရန် ခက်ခဲလှသည်။

သို့သော် လေ့ကျင့်ပေးထားပြီးသော လုပ်ကြံသတ်ဖြတ်သူများကိုတော့ အလဟဿ မဖြစ်စေနိုင်ပေ။ မန်နေဂျာတစ်ဦးအနေဖြင့် ကျိုးလန်သည် ဤလူများထံမှ တန်ဖိုးများကို အစွမ်းကုန် ညှစ်ထုတ်နိုင်မည့် နည်းလမ်းများအား ရှာဖွေရမည်သာဖြစ်သည်။

သို့သော် စခန်းရှိလူများနှင့် ပတ်သက်ရသည်ကို သူ လုံးဝ စိတ်မဝင်စားသဖြင့် ကိစ္စရပ်အားလုံး ရွှီဟွေးကိုသာ ကိုင်တွယ်ခိုင်းထားခဲ့သည်။ လုံခြုံရေးအဖွဲ့ခေါင်းဆောင် လင်းတက သူ့ဆီ လူတစ်ယောက် ခေါ်လာသည်ဆိုရာ အနည်းငယ် ထူးဆန်းနေသည်။

‘လင်းတက ရွှီဟွေးဆီမှာပဲ အစီရင်ခံရမှာလေ။ သူ့အထက်လူကြီးကို ကျော်ပြီး ငါ့ဆီကို ဘာလို့ လာရတာလဲ'

ကျိုးလန်အနေဖြင့် လင်းတကို တွေ့ဆုံရန် ကိစ္စမရှိသော်လည်း ရင်ထဲမှ မလုံခြုံမှုက သူ့ကို အလွန် နေရခက်စေသည်။

သူက ခဏတာ တုံ့ဆိုင်းနေပြီး လင်းတကို အကြောင်းမပြန်ဘဲ ရွှီဟွေးကို ဆက်သွယ်လိုက်သည်။ သို့သော် အံ့ဩစရာကောင်းစွာပင် ရွှီဟွေးထံမှ မည်သည့်တုံ့ပြန်မှုမျှမရရှိခဲ့ပေ။

သူက သူ့အလင်းကွန်ပျူတာ၏ ပုံရိပ်ယောင် စခရင်ကို ဖွင့်ကာ ရွှီဟွေးကို ရှာဖွေရန် သူ၏ ကိုယ်ပိုင်အခွင့်အာဏာကို အသုံးပြုလိုက်သော်လည်း ရွှီဟွေး၏ တည်နေရာကို ရှာမတွေ့ခဲ့ပေ။

ကျိုးလန်၏ခံစားချက်က ပို၍ ဆိုးရွားသွားသည်။ ဘာတွေဖြစ်နေတာလဲ။

သူ၏ ဘယ်ဘက်လက်သူကြွယ်ရှိ အနက်ရောင်လက်စွပ်ကို သူ ထိကိုင်လိုက်သည်။

‘လုံးဝ ပိတ်လှောင်ထားတဲ့ ဒီစခန်းထဲမှာ ဘာအန္တရာယ် ရှိနိုင်မှာမို့လို့လဲ'

ပုံရိပ်ယောင် စခရင်ပေါ်မှ ကောင်းရွှမ်ကို ကြည့်ရင်း ကျိုးလန် အတွေးနက်သွားသည်။ ဤသင်တန်းသားကို သူ တကယ် မှတ်မိနေသည်။

တစ်ဖက်လူက အလွန်အမင်း ချောမောလွန်းသဖြင့် တစ်ကြိမ်မြင်ဖူးသူတိုင်းက ဘယ်တော့မှ မေ့နိုင်မည်မဟုတ်ပေ။

ကောင်းရွှမ်၏ အလွန်အမင်း ဆွဲဆောင်မှုရှိသော ရုပ်ရည်သွင်ပြင်ကြောင့် အမျိုးသမီးများ၏ အသည်းစွဲတစ်ဦးဖြစ်လာမည်မှာ သဘာဝပင်။

‘ဒါပေမဲ့ ဒီကောင်လေးက နေကာမျက်မှန် တပ်ထားပြီး မျက်လုံးတွေကိုလည်း မှိတ်ထားတယ်။ ဒါက ဘာသဘောလဲ'

ကျိုးလန်သည် မကောင်းမှုများစွာ ပြုလုပ်ခဲ့ဖူးသူဖြစ်ရာ အလွန်အမင်း နိုးကြားသူဖြစ်သည်။ သတိပေးချက်တစ်ခုကို ခံစားလိုက်ရပြီး အသေးစိတ်အချက်အလက်များ တစ်ခုခုမှားယွင်းနေကြောင်း သတိပြုမိသည်နှင့်တစ်ပြိုင်နက် သူ၏သတိထားမှုကို အဆုံးစွန်အထိ မြှင့်တင်လိုက်သည်။

သတ္တုစပ်တံခါး ခြားသော်ငြား မျက်လုံးမှိတ်ထားသော ကောင်းရွှမ်က ကျိုးလန်၏ အခြေအနေ အနည်းငယ် ပြောင်းလဲသွားသည်ကို ခံစားသိရှိလိုက်သည်။

ခေါက်ပံခြောက်ဖြာ ကောင်းကင်ပုရစ်သည် ဝိညာဉ်စွမ်းအင်တွင် အမြင့်မြတ်ဆုံးဖြစ်သည်။ ကောင်းရွှမ် မျက်လုံးမှိတ်ထားချိန်တွင် ထိုပုရစ်၏ အာရုံခံနိုင်စွမ်းက ပို၍ပင် စူးရှလာသည်။

ကုလားထိုင်ပေါ်တွင် ကျိုးလန်က ကိုယ်ဟန်အနေအထားကို မတ်မတ် ပြင်ထိုင်လိုက်လေပြီ။ သူ၏ ကိုယ်တွင်းရှိ မူလစွမ်းအင်များက စုစည်းကာ လျင်မြန်စွာ လည်ပတ်နေပြီး သူ့မျက်နှာပေါ်တွင် သံသယဖြစ်သည့် အရိပ်အယောင်များ ပေါ်လာသည်။

တစ်ဖက်လူက အမြင့်ဆုံး သတိအခြေအနေသို့ ဝင်ရောက်သွားကြောင်း ရှင်းလင်းနေသည်။ မြောက်ပိုင်းပြည်နယ်၏ မန်နေဂျာချုပ်ဆိုသည့် ဂုဏ်ပုဒ်နှင့်အညီ ကျိုးလန်က အလွန်စူးရှထက်မြက်လှသည်။

ကောင်းရွှမ်သည် ကျိုးလန်နှင့် အလွန်ရင်းနှီးကျွမ်းဝင်လေသည်။

ယခင်ဘဝက သူ ကျိုးလန်နောက်သို့ နှစ်အတော်ကြာ လိုက်ပါခဲ့ဖူးသည်။ ကျိုးလန်က သူ့အား ကိုယ်ခန္ဓာရောင်းစားရန် အတင်းအကျပ် ခိုင်းစေခဲ့သောကြောင့်သာ သူက ပုန်ကန်ဆန့်ကျင်ခဲ့ခြင်းဖြစ်သည်။

ယွမ်ချင်းရှန်က သူ့ကို ကယ်တင်ရင်း သေဆုံးသွားခဲ့ရသည်မှာလည်း ထိုတိုက်ပွဲတွင်ပင် ဖြစ်သည်။

အချိန်ကာလအားဖြင့် တွက်ကြည့်လျှင် နှစ်ပေါင်းခုနစ်ဆယ်၊ ရှစ်ဆယ်ခန့် ကုန်လွန်ခဲ့ပြီဖြစ်သည်။

ဤအကြောင်းကို ပြန်တွေးမိရာ ကောင်းရွှမ်အတွက် အရာအားလုံးက အိပ်မက်တစ်ခုပမာ ခံစားလိုက်ရသည်။

သို့သော် ယခု သူ ပြန်လည်မွေးဖွားလာပြီဖြစ်ရာ သူ၏ကံကြမ္မာကို သူကိုယ်တိုင် ထိန်းချုပ်ပြီဖြစ်ပြီး ယခင်ဘဝက အဖြစ်ဆိုးမျိုးကို ဘယ်တော့မှ ထပ်မံခွင့်ပြုတော့မည်မဟုတ်ပေ။

ကျိုးလန် သံသယဝင်နေပြီဖြစ်သဖြင့် သူတို့ လွယ်လွယ်ကူကူ ခိုးဝင်ရန် မဖြစ်နိုင်တော့ပေ။ ထို့ကြောင့် ဆက်လက်၍ တိတ်ဆိတ်မနေသင့်တော့ကြောင်း ကောင်းရွှမ် သိလိုက်သည်။

သူက ခေါင်းအနည်းငယ်စောင်းကာ လေးနက်သော လေသံဖြင့် ဆိုလိုက်သည်။

“၉၆၇၃... တံခါးဖွင့်စမ်း။ မင်းနဲ့ အရေးကြီးကိစ္စ ပြောစရာရှိတယ်”

ကျိုးလန်မှာ အလွန်အံ့ဩတုန်လှုပ်သွားသည်။

“မင်းက ဘယ်သူလဲ”

၉၆၇၃ သည် နတ်ဘုရားတစ်သောင်းဂိုဏ်းရှိ သူ၏ လျှို့ဝှက်ကုဒ်နံပါတ်ဖြစ်သည်။ သူ၏ မျိုးဆက်တွင်းရှိ တိုက်ရိုက် အထက်လူကြီးများသာ ဤကုဒ်ကို သိရှိကြသည်။ ရွှီဟွေးပင်လျှင် သူ၏ လျှို့ဝှက်ကုဒ်နံပါတ်ကို သိရန် မဖြစ်နိုင်ပေ။

ကောင်းရွှမ်က သာမန် သင်တန်းသားလေးတစ်ယောက်သာ ဖြစ်သည်။ သူ၏ လျှို့ဝှက်ကုဒ်ကို မည်သို့လုပ်၍ သိနေရသနည်း။

“စိတ်မလှုပ်ရှားပါနဲ့။ ငါက နာမ်ဝိညာဉ်မျိုးနွယ်စု မျိုးဗီဇစစ်ဆေးခြင်း ပရောဂျက်ရဲ့ လေ့လာစောင့်ကြည့်သူတစ်ယောက်ပဲ။ ဒေါက်တာရွှီယန်ကို တိုက်ရိုက်အစီရင်ခံရတယ်။ ငါ့ရဲ့ အဖွဲ့အစည်း နံပါတ်စဉ်က ၉၀၃၁ ပဲ”

ကောင်းရွှမ်က သူ၏ သွေးနတ်ဘုရားဂိုဏ်း အစဉ်အမှတ်နှင့် ရာထူးကို တည်ငြိမ်စွာ ပြောပြလိုက်သည်။

ဒေါက်တာရွှီယန်က နာမ်ဝိညာဉ်မျိုးနွယ်စု မျိုးဗီဇပရောဂျက်၏ ဦးဆောင်သူဖြစ်သည်။ ရွှီယန် တစ်ခုခု ဖြစ်သွားသောကြောင့်သာ ပရောဂျက်က တစ်ဝက်တစ်ပျက်နှင့် ရပ်ဆိုင်းသွားခဲ့ရခြင်းဖြစ်သည်။

ဤအရာအားလုံးက စခန်းတစ်ခုလုံးတွင် ကျိုးလန်သာ သိရှိသော ထိပ်တန်း လျှို့ဝှက်ချက်များဖြစ်သည်။

စခန်း၏ ကိစ္စရပ်များကို ကောင်းရွှမ် လက်ခမောင်းခတ် သိရှိနေခြင်းက ကျိုးလန်ကို လုံးဝ မှင်သက်သွားစေသည်။