အခန်း ၂၂၀

အပိုင်း (၂၂၀)

၆လပိုင်း၏ တော်ဝင်နန်းတော်ထဲရှိ စိမ်းလန်းစိုပြည်နေသော သစ်ပင်ပန်းမန်များကြားတွင် ထုန်ချွဲသည် ကျောက်ဟွာနန်းဆောင်၏ အတွင်းခန်းမဆောင်ဆီသို့ စာတစ်စောင်ကို ကိုင်ဆောင်လျက် အလျင်အမြန် လျှောက်လာခဲ့သည်။ ခြံဝင်းထဲတွင် အသစ်စိုက်ပျိုးထားသော စပါးပင်များသည် အားအင်အပြည့် ကြီးထွားနေပြီး ပျိုးပင်များသည် ဒူးခေါင်းအထက်သို့ပင် ရောက်ရှိနေလေပြီ။

"မင်းသမီး... ချင်းယွင်ကိုယ်ရံတော်တပ်က အရေးပေါ် သတင်းတစ်ရပ် လက်ခံရရှိထားပါတယ်။ ဖူအော်ရှီ မျိုးနွယ်စုက ချန်နိုင်ငံ မြင်းတပ်တစ်ခုက သူတို့ရဲ့ မျိုးနွယ်စုတစ်ဝက်လောက်ကို သတ်ဖြတ်ခဲ့ပြီး သူတို့ရဲ့ ခေါင်းဆောင်ကိုလည်း ပြင်းပြင်းထန်ထန် ဒဏ်ရာရအောင် လုပ်ခဲ့တယ်လို့ ပြောပါတယ်။ သူတို့က တော်ဝင်နန်းတော်ဆီကနေ ဖြေရှင်းချက်တစ်ခုကို တောင်းဆိုနေကြပါတယ်”

နန်းဆောင်၏ ပြတင်းပေါက်များကို ဟင်းလင်းဖွင့်ထားပြီး အလွှာလိုက် ဖြစ်နေသော ဝါးခန်းဆီးများက နေရောင်ခြည်ကို စစ်ထုတ်ပေးရန် အနိမ့်အမြင့် အမျိုးမျိုးဖြင့် ချိတ်ဆွဲထားသည်။ ပြတင်းပေါက်အနီးရှိ စာရေးစားပွဲတစ်ခုထက်တွင် မှတ်တမ်းလွှာများနှင့် ဝါးစာလိပ်များက ပြည့်လျှံနေ၏။ ဝိန်းယွီသည် ထိုစားပွဲအနောက်တွင် အပြာရင့်ရောင် ပိုးထည်နန်းတွင်းဝတ်စုံကို ဝတ်ဆင်လျက် ထိုင်နေပြီး သူမ၏ ရိုးရှင်းစွာ စည်းနှောင်ထားသော မည်းနက်နေသော ဆံနွယ်များသည် သူမ၏ဝတ်ရုံကဲ့သို့ပင် ကြမ်းပြင်ပေါ်သို့ ဖြာကျနေလေသည်။ စားပွဲပေါ်တွင် ထောက်ထားသော လက်တစ်ဖက်ဖြင့် သူမ၏ ပါးပြင်ကို မှီထားပြီး သူမ၏ ကျောက်စိမ်းကဲ့သို့ မျက်နှာလေးပေါ်က အေးစက်စက် မျက်ခုံးတစ်စုံ‌သည် ပင်ပန်းနွမ်းနယ်မှုများ ရောယှက်နေကာ မသိမသာ တွန့်ချိုးထားလေသည်။

အစီရင်ခံစာကို ကြားပြီးနောက် သူမသည် မျက်လုံးကို ပင့်ကြည့်လိုက်၏။ မျက်မှောင်ကြုတ်ထားသော်လည်း သူမ၏ ရေခဲနေသော မဟူရာကျောက်များနှယ် မည်းနက်သော မျက်လုံးများက နက်ရှိုင်းသော တည်ငြိမ်မှုကိုသာ ထုတ်လွှတ်နေလေသည်။ စားပွဲပေါ်မှ စာရွက်စာတမ်းတစ်ခုကို ယူ၍ ဖွင့်ကြည့်လိုက်ရင်း သူမက ပြောလိုက်သည်။ "ဖူအော်ရှီ မျိုးနွယ်စုက တိုက်ခိုက်ခံရတယ် ဟုတ်လား။ ဒါဆို လွန်ခဲ့တဲ့ ရက်အနည်းငယ်က သူတို့ရဲ့ နာမည်နဲ့ တောင်ကြားလမ်းကို ဖြတ်ဝင်လာတာက ဘယ်သူတွေလဲ”

ထုန်ချွဲသည် ထိုအဓိပ္ပါယ်ကို သဘောပေါက်သွားပြီး ပြောလိုက်၏။ "ဒါက... တစ်ယောက်ယောက်က ဖူအော်ရှီ မျိုးနွယ်စုကို တိုက်ခိုက်ပြီးတော့ တော်ဝင်နန်းတော်ကို ချဉ်းကပ်ဖို့ သူတို့လို ဟန်ဆောင်ခဲ့တာများ ဖြစ်နိုင်မလား”

ဝိန်းယွီသည် ချင်းယွင်ကိုယ်ရံတော်တပ်၏ အရေးပေါ် အစီရင်ခံစာကို လေ့လာလိုက်ရာ သူမ၏ မျက်မှောင်က ပိုလို့ပင် ကျုံ့သွားတော့သည်။ "အားလီရဲ့ ရက်တစ်ရာပြည့် ပွဲတော်အတွက် လာကြမယ့် မျိုးနွယ်စု သံတမန်တွေ အခု ဘယ်မှာလဲ”

ထုန်ချွဲက တွက်ဆလိုက်ပြီး ပြောလိုက်၏။ "သူတို့ အခုလောက်ဆို တော်ဝင်နန်းတော်နားကို ရောက်နေလောက်ပါပြီ”

ခဏတာ စဉ်းစားပြီးနောက် ဝိန်းယွီက အမိန့်ပေးလိုက်သည်။ "တောင်ကြားလမ်း လေးခုလုံးကို ပိတ်လိုက်။ မျိုးနွယ်စု သံတမန်တွေ အားလုံးကို လောလောဆယ် အပြင်မှာပဲ တားထားပါ။ ဖူအော်ရှီ ကိစ္စကို သေသေချာချာ စုံစမ်းဖို့ ချင်းယွင်ကိုယ်ရံတော်တပ်ကို စေလွှတ်လိုက်၊ ပြီးတော့ တခြား မျိုးနွယ်စုတွေကိုလည်း စစ်ဆေးပါ။ အနောက်ဘက် နယ်စပ်က စစ်သူကြီး မုယိုလျန်ဆီကိုလည်း ဒီမြင်းတပ်ကိစ္စကို ရှင်းလင်းဖို့ စာတစ်စောင် ပို့လိုက်ပါ”

အခြေအနေ၏ အရေးတကြီးပုံကို သဘောပေါက်သွားသဖြင့် ထုန်ချွဲက သိရှိကြောင်း ပြလိုက်ပြီး အလျင်အမြန် ထွက်ခွာသွားခဲ့သည်။

ခြံဝင်းအတွင်း လေများ တိုက်ခတ်လာပြီး တိမ်တိုက်များက နေမင်းကို မျိုချလိုက်ကာ တောက်ပနေသော ကောင်းကင်ယံကို မှိုင်းညို့သွားစေသည်။ အားလီသည် လှုပ်ယမ်းနေသည့် ပုခက်ထဲမှ နိုးလာခဲ့၏။ စားပွဲတွင် အတွေးနစ်နေသော ဝိန်းယွီကို မြင်လိုက်ရသောအခါ သူမသည် မငိုဘဲ သန်မာသော ခြေထောက်သေးသေးလေးများဖြင့် ပါးလွှာသော စောင်ကို ကန်ထုတ်လိုက်ပြီး နို့သွားသေးသေးလေးများကို ပေါ်စေလျက် ပျော်ရွှင်စွာဖြင့် စကားမပီတပီ ရေရွတ်နေလေသည်။

ဝိန်းယွီက လှည့်ကြည့်လိုက်သည်။ ကလေးငယ်လေးသည် သူမ၏ ခြေလက်များကို တက်ကြွစွာ ဝှေ့ယမ်းကာ သူမကို ပြုံးပြနေ၏။ ပုခက်ကို ညင်သာစွာ လွှဲပေးရင်း ဝိန်းယွီသည် လေကြောင့် ဝါးကန့်လန့်ကာများနှင့် နန်းဆောင်ခန်းဆီးများ တဖျတ်ဖျတ် လွင့်ဝဲနေသည်ကို ကြည့်နေလိုက်သည်။ သူမက တိုးညှင်းစွာ ရေရွတ်လိုက်၏။ "မုန်တိုင်း လာနေပြီပဲ”

တောင်ကြားလမ်း လေးခု၏ အပြင်ဘက်တွင် မည်းနက်သော သံမဏိမြင်းတပ်ကြီးက တိုက်ပွဲဗျူဟာအခင်းအကျင်းဖြင့် ဖြန့်ကျက်ထားသည်။ ခပ်အုပ်အုပ် ခရာသံများကို အေးစက်သော လေပြေများက ချန်မျှော်စင်များဆီသို့ သယ်ဆောင်သွားပြီး ထိုနေရာတွင် တင်းမာသော "ရှောင်း" စစ်အလံက မှိုင်းညို့နေသော ကောင်းကင်ယံနောက်ခံဖြင့် ကြောက်မက်ဖွယ်ကောင်းလောက်အောင် လွင့်ဝဲနေကာ ကာကွယ်ရေး စစ်သူကြီးများကို မငြိမ်မသက် ဖြစ်စေခဲ့သည်။

"ရှောင်း အလံတွေလား။ မြောက်ပိုင်းနယ်စပ်က ရှောင်းစစ်တပ်လား။ သူတို့က ဘာလို့ ဒီကို ရောက်နေတာလဲ”

"အချက်ပေး ခေါင်းလောင်းတွေ တီးကြစမ်း”

မျှော်စင်များတွင် ချိတ်ဆွဲထားသော ကြေးခေါင်းလောင်းများသည် အရေးတကြီး မြည်ဟည်းသွားကြသည်။ ချန်စစ်သည်များသည် သူတို့၏ အသိုက်ကို ကာကွယ်နေသော ပုရွက်ဆိတ်များကဲ့သို့ ပြေးလွှားနေကြ၏။ လောက်လွဲများကို မပြင်ဆင်ရသေးချိန်တွင် ဒူးလေးသမားများသည် မြို့ရိုးထက်တွင် ပြည့်နှက်နေကြသည်။ အောက်ဘက်တွင် သံချပ်ကာဝတ် စစ်သည် ဒါဇင်ပေါင်းများစွာသည် ကြီးမားသော လေးမြားစက်ကို ဆွဲတင်ရန် ရစ်လုံးတစ်ခုကို အတူတကွ လှည့်နေကြသည်။ တူတစ်လက်က မောင်းခလုတ်ကို ရိုက်ချလိုက်ရာ သုံးခွသွားပါ ကြီးမားသော မြားတံကြီးက ကျောက်ဆူးတစ်ခုပမာ ကြောက်မက်ဖွယ်ကောင်းသော အရှိန်အဟုန်ဖြင့် မျှော်စင်များဆီသို့ ပစ်လွှတ်သွားလေသည်။

"စစ်သူကြီး... ပုန်းနေပါ” မြို့ရိုးပေါ်ရှိ ဒုစစ်သူကြီးတစ်ဦးသည် အန္တရာယ်ကို မြင်လိုက်ရသဖြင့် မြားတံကြီးက သူတို့ဆီသို့ အသံမြည်လျက် ပြေးဝင်လာစဉ် ကွပ်ကဲရေး စစ်သူကြီးကို ဘေးသို့ တွန်းဖယ်လိုက်သည်။

မိုးခြိမ်းသံကဲ့သို့ ကျယ်လောင်သော အသံကြီး ပဲ့တင်ထပ်သွားပြီး သံမဏိကဲ့သို့ မာကျောသော မြို့ရိုးအုတ်ခဲများသည် ထိုမြားတံတစ်စင်းတည်း၏ အောက်တွင် ပုပ်ဆွေးနေသော သစ်သားများနှယ် အပိုင်းပိုင်းအစစ ကွဲကြေသွားကာ အပြင်ဘက် တံတိုင်းကို ဖောက်ထွင်းသွားပြီးနောက် အတွင်းဘက် နံရံထဲသို့ အရှိန်မလျော့ဘဲ နက်ရှိုင်းစွာ စူးဝင်သွားခဲ့သည်။

ဤမြင်ကွင်းကို မျက်မြင်တွေ့လိုက်ရသူများသည် သူတို့၏ နှလုံးသားများ ကြောက်ရွံ့မှုဖြင့် တုန်လှုပ်သွားသည်ကို ခံစားလိုက်ရ၏။

မြေပြင်ပေါ်မှ ယက်ကန်ယက်ကန် ထလာစဉ် ထုံးမှုန့်များ ပေကျံသွားသော ကွပ်ကဲရေး စစ်သူကြီးသည် ယခုအခါတွင် သွေးဆုတ်နေသော မျက်နှာဖြင့် ရပ်နေတော့သည်။

မိုးသည်းထန်စွာ ရွာသွန်းလာပြီး ပဲစေ့အရွယ် မိုးပေါက်များသည် အပြာရောင်သန်းသော မီးခိုးရောင် မြို့ရိုးအုတ်ခဲများထက်တွင် အမည်းရောင် အစွန်းအထင်းများကို ပြန့်ကျဲသွားစေသည်။ အောက်ဘက်တွင် ရွှေရောင် ပုံစံများပါဝင်ပြီး "ရှောင်း" စာလုံး ရေးထိုးထားသော အမည်းရောင် စစ်အလံကြီးသည် ပိုမို အေးစက်လာသော လေပြေထဲတွင် ကြမ်းတမ်းစွာ လွင့်ဝဲနေဆဲပင်။

ရှေ့တန်းတွင် စစ်မြင်းကို စီးနင်းလျက် ရပ်နေသော လူငယ်စစ်သူကြီးသည် သားရဲအုပ်ကို ဦးဆောင်နေသော ခေါင်းဆောင်ဝံပုလွေကြီးနှင့် တူနေပြီး စူးရှထက်မြက်သော မျက်လုံးများ ပိုင်ဆိုင်ထားသည်။ သူက အေးစက်စွာ ပြောလိုက်၏။ "ဟန့်ယန်ကို လက်နက်ချလိုက်”

"ဒီလိုမှမဟုတ်ရင် ငါ့ရဲ့ ဝံပုလွေမြင်းတပ်က မင်းတို့ရဲ့ ချန်တော်ဝင်နန်းတော်ကို ပြားပြားဝပ်သွားအောင် နင်းခြေပစ်လိမ့်မယ်”

ကာကွယ်ရေး စစ်သူကြီးသည် ပြန်လည် တုံ့ပြန်ရန် စကားတစ်ခွန်းမျှပင် မဟရဲတော့ဘဲ သတင်းစကားကို နန်းတော်သို့ အလျင်အမြန် ပို့ဆောင်ရန် သူ၏ ကိုယ်ရံတော်များကို ချက်ချင်း အချက်ပြလိုက်လေသည်။

ချန်စစ်သည်များသည် မိုးသည်းထန်စွာ ရွာသွန်းနေသည့်ကြားမှ ပြေးလွှားသွားကြပြီး သူတို့၏ အမည်းရောင် ဘွတ်ဖိနပ်များက မှင်သွေးကျောက်ပေါ်တွင် ပြန့်ကျဲနေသော မှင်ရည်များကဲ့သို့ ရွှံ့ဗွက်များကို စင်ထွက်စေသည်။

ဝိန်းယွီသည် စာရေးရန် သူမ၏ အင်္ကျီလက်များကို ပင့်တင်လိုက်စဉ်မှာပင် ထုန်ချွဲက ဖရိုဖရဲ အခြေအနေဖြင့် ခန်းမဆောင်ထဲသို့ ပြေးဝင်လာပြီး အော်ပြောလိုက်၏။ "မင်းသမီး... သတင်းဆိုးပါပဲ။ မြောက်ပိုင်းနယ်စပ်က ရှောင်းစစ်တပ်က တော်ဝင်နန်းတော်ဆီ ချီတက်လာပါပြီ”

ဝိန်းယွီ၏ စုတ်တံက ရပ်တန့်သွားပြီး ခရမ်းရောင် အမွေးအဖျားလေးက စာရွက်ပေါ်တွင် မှင်ကွက်ကြီးတစ်ခုကို ဖြစ်သွားတော့သည်။ သူမက မျက်မှောင်ကြုတ်လိုက်ပြီး "ဒါဆို နယ်စပ်ကို ဖြတ်ကျော်ဖို့ ဖူအော်ရှီ မျိုးနွယ်စုလို့ ဟန်ဆောင်ခဲ့တာက သူပေါ့”

ဒါပေမယ့် ဖူအော်ရှီ မျိုးနွယ်စုလို့ ဟန်ဆောင်ရုံနဲ့ တောင်ကြားလမ်းကနေ ခိုးသွင်းလာနိုင်တဲ့ အင်အားက အကန့်အသတ် ရှိလိမ့်မယ်။ သူက နယ်စပ်ကနေ တော်ဝင်နန်းတော်အထိ အဲဒီလောက် ကြီးမားတဲ့ စစ်တပ်ကြီးကို ဘယ်လိုများ ဦးဆောင်လာနိုင်ခဲ့တာလဲ။ ပြီးတော့ ချန်တပ်ဖွဲ့တွေလို့ ဟန်ဆောင်ပြီး ဖူအော်ရှီ မျိုးနွယ်စုကို တိုက်ခိုက်ခဲ့တဲ့ စစ်သည်တွေနဲ့ သူ့ကြားမှာ ဆက်စပ်မှုများ ရှိနေမလား...

မေးခွန်းများစွာက ဝိန်းယွီ၏ စိတ်ထဲတွင် ပြည့်နှက်လာခဲ့၏။ လေးနက်သော မျက်နှာအမူအရာဖြင့် သူမက ခဏလောက် စဉ်းစားလိုက်ပြီးနောက် အမိန့်ပေးလိုက်သည်။ "အရေးပေါ် အစည်းအဝေးအတွက် အမတ်တွေ အားလုံးကို အမြန် ဆင့်ခေါ်လိုက်ပါ”

ချန်တပ်ဖွဲ့များကို ခြိမ်းခြောက်ရန် လေးမြားစက်ဖြင့် ပစ်ခတ်မှုကို အသုံးပြုပြီးနောက် ရှောင်းလိ၏ ဝံပုလွေမြင်းတပ်က မြို့ကိုသာ ဆက်ပြီး ဝိုင်းရံထားလိုက်သည်။ ချန်နယ်မြေသည် လျန်နယ်မြေလောက် မကျယ်ပြန့်ချေ။ — နယ်စပ်မှ တော်ဝင်နန်းတော်သို့ ရက်အနည်းငယ်အတွင်း ခရီးသွားနိုင်ပေသည်။ ထို့အပြင် ရေအရင်းအမြစ်များပေါ် မူတည်၍ ရေကြည်ရာမြက်နုရာ ပြောင်းရွှေ့နေထိုင်သော မျိုးနွယ်စုများရှိသည့် သူတို့၏ နယ်စပ်အလွန်တွင် သဲကန္တာရများက ကြီးစိုးနေသဖြင့် ချန်၏ နယ်စပ်ကာကွယ်ရေးသည် အမြဲတမ်း ပြန့်ကျဲနေသော နေရာများတွင် ဖြန့်ကျက်ထားလေ့ရှိသည်။

တိုက်ခိုက်မှု ဖြစ်ပွားသည့် မည်သည့်နေရာမဆို အနီးနားရှိ တပ်စွဲထားသော စစ်သည်များက အကူအညီပေးရန် အလျင်အမြန် သွားရောက်ကြလိမ့်မည်။ သို့သော်လည်း လွန်ခဲ့သော နှစ်နှစ်အတွင်း ရှီးလင်၏ ခြိမ်းခြောက်မှုမှ ရုန်းထွက်ပြီး လျန်နယ်မြေသို့ ပြန်လည်ဝင်ရောက်ရန် ကြိုးပမ်းမှုတွင် ဝိန်းယွီနှင့် ပူးပေါင်းဆောင်ရွက်မှု ရရှိပြီးနောက် ချန်သည် စစ်သည် သောင်းနှင့်ချီ၍ လျန်သို့ စေလွှတ်ခဲ့သည်။ သည်နှစ်တွင် ရှီးလင်နှင့် အင်းအားအပြည့် စစ်မက်ဖြစ်ပွားလာသဖြင့် မူလ နယ်စပ် တပ်စွဲထားသော အင်အား၏ ထက်ဝက်ကျော်ကို အနောက်ဘက်စစ်မျက်နှာပြင်သို့ ကူညီရန် လွှဲပြောင်းပေးခဲ့ရသည်။

လက်ရှိ အနောက်ဘက်စစ်မျက်နှာပြင် အခြေအနေသည် ချန်၏ အနောက်ဘက်နယ်စပ်ကို လျန်၏ စစ်ဆင်ရေး ပြီးဆုံးမှုအပေါ်တွင် လုံးလုံးလျားလျား မှီခိုနေရ၏။ သို့မှသာ အင်အားစုများက ချန်အနောက်ဖက်နယ်စပ်ကို ထောက်ပံ့ပေးရန် ပြန်လှည့်လာနိုင်လိမ့်မည်။

ထို့ကြောင့် ရှောင်းလိ၏ ဝံပုလွေမြင်းတပ်က နယ်စပ်ကာကွယ်ရေးများကို ကျော်ဖြတ်ပြီး တော်ဝင်နန်းတော်ကို တိုက်ရိုက် ဝိုင်းရံရန် မျိုးနွယ်စု အမျိုးမျိုးအဖြစ် ရုပ်ဖျက်လာသောအခါ ထိုနေရာတွင် မူလက တပ်စွဲထားသော တော်ဝင်ကိုယ်ရံတော်များသာ အနည်းငယ် ခုခံနိုင်စွမ်း ရှိခဲ့သည်။ အချိန်တိုအတွင်းတွင် ချန်သည် အပိုစစ်အင်အားများကို တကယ်ပင် မစုစည်းနိုင်ခဲ့ချေ။

ရှောင်းလိက တဲအတွင်းသို့ ဝင်ရောက်လာသောအခါ သူ ယခင်က ကယ်တင်ခဲ့သော ပါးရှစ်ယဲ့ မျိုးနွယ်စုခေါင်းဆောင်သည် စိတ်လှုပ်ရှားစွာဖြင့် လက်ဟန်ခြေဟန်များ စတင်ပြသလာပြီး သူ၏ စိုးရိမ်ပူပန်မှုကြောင့် တရားဝင်ဘာသာစကားကို မေ့လျော့ကာ သူ၏ မျိုးနွယ်စုဘာသာစကားဖြင့် အလျင်အမြန် ပြောဆိုလာတော့သည်။ သူ၏ မျက်နှာအမူအရာက ရှောင်းလိကို အပြစ်တင်နေကြောင်း ရှင်းလင်းစွာ ပြသနေလေသည်။ ဝိန်းယွီကို ကယ်တင်ပေးရန် ရှောင်းလိအား ယခင်က တောင်းပန်ပြီးနောက် ပါးရှစ်ယဲ့ ခေါင်းဆောင်က သတိပေးချက်များ ပေးပို့ရန် မျိုးနွယ်စုများကြားတွင် ခရီးသွားရန် လိုအပ်သည်ဟု ဆိုခဲ့သည်။ သို့သော် သူ၏ မြားဒဏ်ရာကြောင့် သတင်းစကားများ ဖြန့်ဝေရန် သူ့ကိုသာ အားကိုးခြင်းက နှေးကွေးလွန်းမည်ဖြစ်ရာ ရှောင်းလိက သူ့ကို စာများ အစားထိုးရေးခိုင်းခဲ့ပြီး ဝံပုလွေမြင်းတပ်က သူ့ကိုယ်စား ပို့ဆောင်ပေးခဲ့ခြင်း ဖြစ်သည်။

ပါးရှစ်ယဲ့ မျိုးနွယ်စု၏ ဒုက္ခနှင့် ဝိန်းယွီ၏ အကျပ်အတည်းကို သိရှိပြီးနောက် သဲကန္တာရထဲရှိ မျိုးနွယ်စုအသီးသီးသည် ဝိန်းယွီ ယူဆောင်လာပေးသော ကာလတို ငြိမ်းချမ်းရေးကို တန်ဖိုးထားကြပြီး ချန်အစိုးရက ဝိန်းယွီ၏ ထိန်းချုပ်မှုအောက်မှ လွတ်ကင်းသွားသည်နှင့်တစ်ပြိုင်နက် သူတို့၏ မျိုးနွယ်စုများသည် ရှီးလင်နှင့် ချန်တို့ကြား ပဋိပက္ခတွင် နောက်တစ်ကြိမ် ထိခိုက်နစ်နာရသူများ ဖြစ်လာမည်ကို စိုးရိမ်ခဲ့ကြသည်။

"ရန်သူကို သတိပေးခြင်း"မှ ရှောင်ရှားရန်နှင့် တော်ဝင်နန်းတော်တွင် ခိုအောင်းနေသော သူလျှိုသည် ဝိန်းယွီကို အန္တရာယ်ပြုနိုင်သည့် မည်သည့်တိုးတက်မှုကိုမဆို သိရှိသွားခြင်းမှ တားဆီးရန် မျိုးနွယ်စုအားလုံးက ရှောင်းလိ၏ အစီအစဉ်များကို သဘောတူခဲ့ကြသည်။ သူတို့သည် တော်ဝင်နန်းတော်ရှိ မင်းသမီးလေး၏ ရက်တစ်ရာပြည့် ပွဲတော်သို့ တက်ရောက်ရန် စီစဉ်ထားသည့်အတိုင်း ဆက်လက်လုပ်ဆောင်ခဲ့ကြသော်လည်း လိုက်ပါလာသော လက်ဆောင်ယာဉ်တန်းတွင် ရှောင်းလိ၏ ဝံပုလွေမြင်းတပ်များသာ လုံးလုံးလျားလျား ပါဝင်နေခဲ့သည်။

သူတို့၏ မူလရည်ရွယ်ချက်မှာ အချုပ်အခြာအာဏာပိုင်ကို ကာကွယ်ရန် မြို့တော်သို့ ဝင်ရောက်ရန် ဖြစ်သော်လည်း ရှောင်းလိ၏ လက်ရှိ တော်ဝင်နန်းတော်ကို ဝိုင်းရံထားမှုသည် စစ်ကြေညာခြင်းနှင့် ညီမျှနေပြီး သူတို့၏ ကနဦး ရည်ရွယ်ချက်နှင့် ရှင်းလင်းစွာ ဆန့်ကျင်ဘက် ဖြစ်နေလေသည်။

ပါးနပ်လှသည့် ကျောက်ယိုချိုက်သည် သည်ရက်ပိုင်းများတွင် ပါးရှစ်ယဲ့ ခေါင်းဆောင်နှင့်အတူ ဖြတ်သန်းခဲ့ပြီး သူတို့၏ မျိုးနွယ်စုဘာသာစကား အများအပြားကို သင်ယူခဲ့သည်။ ခေါင်းဆောင်၏ မိခင်ဘာသာစကားဖြင့် ပေါက်ကွဲထွက်လာမှုကို ကြားရသောအခါ ကျောက်ယိုချိုက်သည် သူ့ပါးစပ်ကို ချက်ချင်း အုပ်လိုက်ပြီး နောက်သို့ ဆွဲခေါ်သွားလိုက်သည်။ "စိတ်အေးအေးထားပါ၊ စိတ်အေးအေးထားပါ။ နယ်စားကြီးက ဒီလိုလုပ်ရတဲ့ သူ့အကြောင်းပြချက်တွေ ရှိမှာ သေချာပါတယ်”

ရှောင်းလိသည် စားပွဲရှည်ကြီးအနောက်တွင် ဝင်ထိုင်လိုက်ပြီး မေးလိုက်၏။ "သူ ဘာပြောတာလဲ”

ကျောက်ယိုချိုက်က အနေခက်စွာ ပြန်ဖြေလိုက်သည်။ "ခေါင်းဆောင်ပါလုက လူကြီးမင်းက ဘယ်လိုလုပ် ကတိဖျက်ပြီး တော်ဝင်နန်းတော်နဲ့ ဟန့်ယန်မင်းသမီးကို စစ်ကြေညာနိုင်ရတာလဲလို့ ပြောတာပါ”

ပါးရှစ်ယဲ့ ခေါင်းဆောင်သည် ကျောက်ယိုချိုက်၏ လက်ထဲက ရုန်းထွက်လိုက်ပြီး ရှောင်းလိကို ဒေါသတကြီး စိုက်ကြည့်လိုက်၏။

ရှောင်းလိက မေးလိုက်၏။ "တော်ဝင်နန်းတော်က ဘာလို့ တောင်ကြားလမ်း လေးခုလုံးကို ရုတ်တရက် ပိတ်လိုက်ရတာလဲ”

ပါးရှစ်ယဲ့ ခေါင်းဆောင်၏ မျက်နှာပေါ်ရှိ ဒေါသများက တုံ့ဆိုင်းသွားခဲ့သည်။

ရှောင်းလိ၏ စူးရှသော အကြည့်က သူ့အပေါ်တွင် ရပ်တန့်သွားသည်။ "ငါက မျိုးနွယ်စု အသီးသီးကို ဝင်ရောက်တိုက်ခိုက်နေတဲ့ ချန်စစ်သည်တွေအဖြစ် ဟန်ဆောင်ထားတဲ့ ရှီးလင် စစ်တပ် နှစ်ခုကို သတ်ဖြတ်ခဲ့တယ်။ ခေါင်းဆောင်ပါလုကို ကယ်တင်ခဲ့တဲ့ နေ့မှာပဲ ငါတို့ ရှင်းလင်းခဲ့တဲ့ တခြား ရှီးလင် စစ်တပ်က သူတို့က ဖူအော်ရှီ မျိုးနွယ်စုကို လုံးဝ ဖျက်ဆီးပစ်ခဲ့တယ်လို့ ဝန်ခံခဲ့တယ်။ ရှီးလင်က စစ်တပ် နှစ်ခု ဆက်တိုက် ဆုံးရှုံးသွားတော့ တစ်ခုခုကို သံသယဝင်ပြီး တော်ဝင်နန်းတော်ထဲမှာရှိတဲ့ သူတို့ရဲ့ သူလျှိုဆီကို သတင်းပို့လိုက်နိုင်တယ်လို့ ခေါင်းဆောင်ပါလု ထင်သလား”

ကျောက်ယိုချိုက်သည် စိုးရိမ်တကြီးဖြင့် လက်များကို ယှက်လိုက်သည်။ "ဒါဆို ဒုက္ခပဲ။ တကယ်လို့ တော်ဝင်နန်းတော်က သူလျှိုက ပါးရှစ်ယဲ့နဲ့ ဖူအော်ရှီ မျိုးနွယ်စု နှစ်ခုလုံး ဖျက်ဆီးခံလိုက်ရပြီလို့ သိသွားပေမယ့် ကျွန်တော်တို့ရဲ့ ဝင်ရောက်လာတဲ့ အဖွဲ့ထဲမှာ အဲဒီ မျိုးနွယ်စု နှစ်ခုက လူတွေ ပါဝင်နေတယ်ဆိုရင် အဲဒီသူလျှိုက မင်းသမီးရှေ့မှာ ကျွန်တော်တို့ကို တော်ဝင်နန်းတော်အပေါ် ရည်ရွယ်ချက်ဆိုး ရှိတယ်လို့ မဟုတ်မမှန် စွပ်စွဲနိုင်တယ်။ သူတို့ကိုယ်သူတို့ ကာကွယ်ဖို့ မင်းသမီးကိုတောင် ဓားစာခံ လုပ်သွားနိုင်တယ်”

ပါးရှစ်ယဲ့ ခေါင်းဆောင်သည် ဤအချက်အလက်များကို နားလည်သဘောပေါက်ရန် ရုန်းကန်နေရပြီး သူ၏ ဒေါသသည် လုံးဝ ကွဲပြားခြားနားသော စိုးရိမ်မှုတစ်မျိုးဖြင့် အစားထိုးခံလိုက်ရတော့သည်။ သူသည် ရှောင်းလိရှေ့တွင် နောက်တစ်ကြိမ် ဒူးထောက်လိုက်လေသည်။ "နယ်စားကြီး... မင်းသမီးကို ကယ်တင်ပေးဖို့ တောင်းပန်ပါတယ်”

ရှောင်းလိသည် နောက်သို့ အနည်းငယ် မှီချလိုက်ပြီး သူ၏ မိုးရေစိုနေသော ဆံပင်များသည် သူ၏ နဖူးပေါ်သို့ ဖရိုဖရဲ ကျနေလေသည်။ သူ၏ တံတောင်ဆစ်များရှိ မာကျောသော လက်ပတ်များသည် ကုလားထိုင်လက်တန်းများပေါ်တွင် တင်ထားပြီး သူ၏ မည်းနက်သော မျက်လုံးများက အံ့မခန်း ပြင်းထန်နေလျက် သူက ပြောလိုက်၏။ "ငါ အရင်က ပြောခဲ့ပြီးသားပဲ - ဟန့်ယန်ကို ငါ လိုချင်တယ်”

"သူတို့က သူ့ကို မထိရဲပါဘူး”

တော်ဝင်နန်းတော်၏ ပင်မခန်းမဆောင်တွင် ဝိန်းယွီသည် ပလ္လင်ပေါ်၌ မြင့်မားစွာ ထိုင်နေသည်။ လှေကားထစ်များရှေ့က ပုတီးစေ့ခန်းဆီးများကို ဖယ်ရှားလိုက်ပြီဖြစ်ရာ သူမ၏ အသွင်အပြင်သည် နန်းထိုင်နေသော ဘုရင်တစ်ပါးနှင့် လုံးဝ ခြားနားမှု မရှိတော့ချေ။

အောက်ဘက်ရှိ အမတ်များအားလုံးသည် ရှောင်းလိက တော်ဝင်နန်းတော်ကို ဝိုင်းရံထားကြောင်း ကြားသိခဲ့ကြပြီး ဖြစ်သည်။ ရှောင်းလိ၏ တပ်ဖွဲ့များနှင့် တစ်ကြိမ် ထိပ်တိုက်တွေ့ဆုံရုံဖြင့် ကာကွယ်ရေး စစ်သူကြီးက မြို့သိမ်းဒူးလေးဖြင့် အသတ်ခံရလုနီးပါး ဖြစ်ခဲ့ရသည်ဟူသော သတင်းသည်လည်း ပျံ့နှံ့သွားခဲ့ရာ အမတ်များအားလုံးကြားတွင် ဆူညံပွက်လောရိုက်သွားစေခဲ့သည်။

ထိုစဉ် သာမန် နန်းတွင်းအစေခံမလေးအဖြစ် ဝတ်ဆင်ထားသော အမျိုးသမီးတစ်ဦးသည် အသစ်ချုပ်လုပ်ထားသော အဝတ်အစားလင်ပန်းကို ကိုင်ဆောင်လျက် လင်ရှီးနန်းဆောင်ဆီသို့ အလျင်အမြန် လျှောက်သွားနေသည်။ နန်းဆောင်တံခါးရှိ အစောင့်များက တားဆီးလိုက်သောအခါ သူမက သူမ၏ ခါးမှ တံဆိပ်ပြားကို ပြသလိုက်၏။ "ကျွန်မက မယ်တော်ကြီးအတွက် အသစ်ချုပ်ထားတဲ့ နွေရာသီ အဝတ်အစားတွေ လာပို့တဲ့ တော်ဝင်အဝတ်အစားဌာနကပါ”

အစောင့်များက တံဆိပ်ပြားကို စစ်ဆေးပြီးနောက် သူမကို ဝင်ခွင့်ပြုလိုက်ပြီးနောက်တွင် အမျိုးသမီးသည် ဗုဒ္ဓခန်းမဆောင်ထဲသို့ အပြေးအလွှား ဝင်သွားလေသည်။ မယ်တော်ကြီးရှေ့တွင် ဒူးထောက်လိုက်ပြီး သူမကို "ဒေါ်ဒေါ်" ဟု ခေါ်ကာ တစ်စုံတစ်ရာကို တိုးတိုးလေး ပြောလိုက်ရာ ယခင်က ဘာသာရေးကိုင်းရှိုင်းနေသော မယ်တော်ကြီးမှာ ရုတ်တရက် မျက်လုံးများ ပြူးကျယ်သွားစေခဲ့သည်။ "ဒါ တကယ်လား”

...တော်ဝင်ကိုယ်ရံတော်များက တစ်နှစ်ကျော်ကြာ ပိတ်ဆို့ထားခဲ့သော ကျန်းဟွာနန်းဆောင်တွင် ယခုအခါ ဒုစစ်သူကြီး ယန်ကျန်းက သူ၏ လက်အောက်ငယ်သားများကို လွှတ်လိုက်သည်ကို မြင်တွေ့ရသည်။ သူသည် ဒူးတစ်ဖက်ထောက်ကာ ခန်းမဆောင်အတွင်းက ဖရိုဖရဲ အဝတ်အစားများ၊ ချိုင့်ဝင်နေသော ပါးပြင်များနှင့် အသွင်တစ်ခုလုံးက ရူးသွပ်နေသော အသွင်အပြင်ဖြင့် ရပ်နေသော ချန်ဝမ်ထံသို့ လက်သီးဆုပ်ကာ အရိုအသေပေးလိုက်လေသည်။ "အရှင်မင်းကြီး ဒုက္ခများခဲ့ရပါပြီ” ယန်ကျန်းက ပြောလိုက်၏။

ချန်ဝမ်သည် လှောင်ပြောင်ရယ်မောသံတစ်ခုမှလွဲ၍ ဘာမှ ပြန်မတုံ့ပြန်ခဲ့ချေ။ သူ၏ အနက်ရောင် တော်ဝင်ဝတ်ရုံကို တရွတ်တိုက်ဆွဲသွားပြီး သူသည် ခန်းမဆောင်အတွင်းရှိ လှေကားထစ်များပေါ်တွင် ထိုင်ကာ ကျန်နေသော ကြက်ရိုးတစ်ခုကို ဝါးနေလေသည်။ သူ၏ သွားများနှင့် အရိုးပွတ်တိုက်သံက ကြားရသည်မှာ ကြက်သီးထဖွယ် ကောင်းလှ၏။

ခဏတာ ဝါးပြီးနောက် သူသည် ကြက်ရိုးကို ယန်ကျန်း၏ ခြေရင်းသို့ ထွေးထုတ်လိုက်သည်။ အဆိပ်ပြင်းသော မြွေတစ်ကောင်ကဲ့သို့ ဆိုးညစ်သော ရည်ရွယ်ချက်များ ရောယှက်နေပြီး အလားတူ ချိုင့်ဝင်နေသော သူ၏ မျက်လုံးများက ယန်ကျန်းကို စေ့စေ့စပ်စပ် ကြည့်ရှုနေလျက် သူက ပြောလိုက်သည်။ "ဒုစစ်သူကြီး ယန်ကျန်းလား။ တကယ့်ကို ရှားပါးတဲ့ ဧည့်သည်ပဲ”

အစည်းအဝေး ခန်းမဆောင်တွင် နန်းတွင်းအမတ်များသည် ဆူညံသော အငြင်းပွားမှုများတွင် လုံးထွေးနေကြဆဲပင်။

"ဒီလူက နာမည်ကြီးတာ နောက်ကျပေမယ့် ဒီနှစ်တွေတစ်လျှောက်လုံး တစ်ခါမှ မရှုံးခဲ့ဖူးသေးဘူး။ တော်ဝင်နန်းတော်ကို ဝိုင်းရံဖို့ ကြီးမားတဲ့ စစ်တပ်ကြီးကို လျှို့ဝှက်ပြီး ဦးဆောင်လာနိုင်တယ်လို့ တွေးကြည့်ရင်— ငါတို့ ချန်နိုင်ငံကတော့ ကြီးမားတဲ့ အန္တရာယ်ကြီးနဲ့ ရင်ဆိုင်နေရပြီပဲ”

"အဲဒီ သစ္စာဖောက် ဝံပုလွေနှလုံးသားနဲ့ လူယုတ်မာကောင်။ သူက ဖေစုန့်ကို တိုက်ခိုက်ဖို့ ငါတို့နဲ့ မဟာမိတ်ဖွဲ့ခဲ့တာ မဟုတ်ဘူးလား။ သူက သူ့ရဲ့ သစ္စာကို ဖောက်ဖျက်ပြီး ငါတို့ ချန်နိုင်ငံကို ဘယ်လိုများ ပြန်လှည့်တိုက်နိုင်ရတာလဲ”

"ဖေရဲ့ စခန်းက စစ်ဗျူဟာမှူးတစ်ယောက်က သူ့ကို အရင်က မဟုတ်မမှန် စွပ်စွဲခဲ့တုန်းက အဲဒီလူကို အရှင်လတ်လတ် လှီးဖြတ်ပြီး ပြုတ်သတ်ခဲ့တယ်လို့ ငါ ကြားတယ်။ ဝေ့ချီရှန်းက သူ့ကို မတရား အကျဉ်းချခဲ့တုန်းက သူက ဝေ့ချီရှန်းရဲ့ မျိုးနွယ်စု တစ်ခုလုံးကို ရှင်းလင်းပစ်ခဲ့တာ။ သူက သူ့အမေ သေဆုံးမှုအတွက် ဖေစုန့်ကို သွေးကလဲ့စားချေဖို့ အငြိုးထားနေပြီး သူ့ရဲ့ မြို့ကို သိမ်းပိုက်ပြီးတဲ့နောက် လက်နက်ချတဲ့ စစ်သည် နှစ်သောင်းကို သတ်ဖြတ်ခဲ့တယ်။ ဒီလူက 'ငရဲမင်း ရှောင်း' ဆိုတဲ့ နာမည်နဲ့ တကယ်ကို ထိုက်တန်တာပဲ။ ငါတို့ ချန်နိုင်ငံက ဒီလို ဘေးဒုက္ခမျိုးကို ဘယ်လိုများ ကျရောက်ရတာလဲ”

အထက်တွင် ထိုင်နေသော ဝိန်းယွီသည် အမတ်များက ကျရောက်လာတော့မည့် ဘေးဒုက္ခအတွက် ငိုကြွေးမြည်တမ်းနေခြင်း သို့မဟုတ် အပြစ်တင်ခြင်းများကို နားထောင်နေခဲ့သည်။ ပလ္လင်၏ လက်တန်းပေါ်တွင် လက်ကို တင်ထားလျက် သူမသည် သူမ၏ လက်ချောင်းများဖြင့် နဖူးကို ဖိကာ သူတို့ကို ဖြတ်ပြောရန် မျက်လုံးများကို ပင့်ကြည့်လိုက်၏။ "ဘယ်လို တုံ့ပြန်သင့်လဲဆိုတာကို ဆွေးနွေးဖို့ ရှင်တို့အားလုံးကို ဒီကို ဆင့်ခေါ်လိုက်တာပါ”

သူမ၏ အသံက တည်ငြိမ်ပြီး ချင့်ချိန်မှုရှိကာ သူမ၏ စကားများက ဆူညံနေသော ခန်းမဆောင်ကို အောင်မြင်စွာ တိတ်ဆိတ်သွားစေခဲ့သည်။

ခဏအကြာတွင် ထိုအချိန်အထိ တိတ်ဆိတ်နေခဲ့သော ချီစီးမြောင်က ရှေ့သို့ထွက်လာပြီး ပြောလိုက်လေသည်။ "အခုလုပ်ရမယ့် တစ်ခုတည်းသော လုပ်ရပ်ကတော့ အနောက်ဘက် နယ်စပ်ကလွဲပြီး နယ်စပ်ကာကွယ်ရေး စစ်သည်တွေ အားလုံးကို ဘုရင်ကို ကာကွယ်ဖို့ တော်ဝင်နန်းတော်ဆီ အလျင်အမြန် လာဖို့ ဆင့်ခေါ်ဖို့ပါပဲ။ ကျွန်တော်တို့ နယ်စပ်အလွန်က သဲကန္တာရ မျိုးနွယ်စုတွေက ပြီးခဲ့တဲ့ တစ်နှစ်အတွင်း ချန်နိုင်ငံနဲ့ ကုန်သွယ်မှုကနေ အများကြီး အကျိုးအမြတ် ရခဲ့ကြလို့ အလွယ်တကူ ကျူးကျော်လာဖို့ မရှိပါဘူး။ မင်းသမီးက ကျွန်တော်တို့ကို ကူညီဖို့ လျန်ကနေ စစ်တပ်တွေကို စုစည်းပေးနိုင်ရင်တော့ အဲဒါက အကောင်းဆုံး ဗျူဟာ ဖြစ်ပါလိမ့်မယ်”

ချက်ချင်းပင် အခြား အမတ်တစ်ဦးက ငြင်းဆိုလိုက်၏။ "နယ်စပ်ကာကွယ်ရေး စစ်သည်တွေက တော်ဝင်နန်းတော်ကို ရောက်ဖို့ အနည်းဆုံး သုံးရက် ကြာလိမ့်မယ်။ ဒါ့အပြင် အဲဒီ ဝံပုလွေနှလုံးသားနဲ့ လူယုတ်မာကောင်က သူ့ရဲ့ စစ်တပ်ကို တော်ဝင်နန်းတော်ဆီ ဖိအားပေးဖို့ ဦးဆောင်လာပြီးပြီ ဖြစ်ပေမယ့် နယ်စပ်တွေကနေ ကြိုတင်ပြီး ဘာသတင်းမှ မလာခဲ့ဘူးလေ။ နယ်စပ်ကာကွယ်ရေး စစ်သည်တွေ ဘေးဒုက္ခနဲ့ မကြုံရသေးဘူးဆိုတာကို ငါတို့ ဘယ်လို သိနိုင်မှာလဲ။ သူတို့က အကောင်းအတိုင်း ရှိနေသေးရင်တောင် တော်ဝင်နန်းတော်ရဲ့ တော်ဝင်ကိုယ်ရံတော်တွေက သူ့ရဲ့ ကျားတွေ ဝံပုလွေတွေလို စစ်တပ်ကြီးကို သုံးရက်ကြာအောင် တောင့်ခံထားနိုင်ပါ့မလား”

ထိုစကားများကြောင့် ညီလာခံထဲတွင် တီးတိုးပြောဆိုသံများ နောက်တစ်ကြိမ် ထွက်ပေါ်လာခဲ့သော်လည်း အခြားမည်သူမျှ ငြင်းခုံရန် ရှေ့သို့ ထွက်မလာခဲ့ကြချေ။

ခန်းမဆောင်အတွင်း ပြည့်နှက်နေသော တိတ်ဆိတ်မှုကို ဖြိုခွဲလျက် ဝိန်းယွီက ပြောလိုက်သည်။ "သူက ကျွန်မကို တွေ့ဖို့ တောင်းဆိုထားမှတော့ သူနဲ့ ငြိမ်းချမ်းရေး ဆွေးနွေးဖို့ မြို့ရိုးမျှော်စင်ပေါ်ကို ကျွန်မ ကိုယ်တိုင် တက်သွားမယ်။ ငြိမ်းချမ်းရေး ဆွေးနွေးပွဲက ကျရှုံးသွားရင်တောင် ကျွန်မ သုံးရက် အပြည့် အချိန်ဆွဲထားပါ့မယ်”

တီးတိုး ဆွေးနွေးမှုအချို့ ပြုလုပ်ပြီးနောက် အမတ်များက ၎င်းသည် အခြေအနေအရ အကောင်းဆုံး အစီအစဉ်ဖြစ်ကြောင်း ခေါင်းညိတ်သဘောတူလိုက်သည်။ သို့သော် ခန်းမဆောင် အပြင်ဘက်မှ အသံတစ်သံ ထွက်ပေါ်လာခဲ့၏။ "ရှောင်းလိဆိုတာ နာကြည်းချက်ကို ဘယ်တော့မှ မမေ့တဲ့ လူတစ်ယောက်ပဲ။ သူ့ကို မဟုတ်မမှန် စွပ်စွဲခဲ့တဲ့ ယွီ သားအဖ၊ ဝေ့ မိသားစုနဲ့ ဖေရဲ့ စခန်းက လက်နက်ချတဲ့ စစ်သည် နှစ်သောင်း ဘာဖြစ်သွားခဲ့လဲဆိုတာကို— မင်းသမီးက မေ့သွားပြီလား”

တော်ဝင်ကိုယ်ရံတော် နှစ်တန်း ဝင်ရောက်လာကြပြီး သူတို့၏ သံချပ်ကာများက တိုးညှင်းသော အသံများဖြင့် တချွင်ချွင်မြည်နေလေသည်။ ယန်ကျန်းသည် သူတို့၏ အနောက်မှ ထွက်ပေါ်လာပြီး ပလ္လင်ထက်တွင် မြင့်မားစွာ ထိုင်နေသော ဝိန်းယွီကို ပထမဆုံးအကြိမ်အဖြစ် တိုက်ရိုက် ကြည့်လိုက်သည်။ "တော်ဝင်နန်းတော်ကို ဝိုင်းရံပြီးတဲ့နောက် မင်းသမီးကို သူ တောင်းဆိုတာက အတိတ်က သူ့အသက်ကို လုပ်ကြံဖို့ ကြိုးစားခဲ့တာအတွက် ကလဲ့စားချေဖို့လို့ မင်းသမီး မထင်ဘူးလား”

ရှောင်းလိသည် ယွီသားအဖ၏ မဟုတ်မမှန် စွပ်စွဲခြင်းကို ခံရချိန်တွင် ဖေစုန့်က မီးလောင်ရာ လေပင့်ပေးခဲ့ပြီး လျန်စခန်းမှ သူ၏ အတိတ်က ခွဲထွက်မှုကို ထုတ်ဖော်ပြောဆိုခဲ့သည်။ ထိုအချိန်က ရှောင်းလိ၏ စခန်းက သူတို့သည် သူ့ကို မတရားသဖြင့် ကွပ်မျက်လုနီးပါး ဖြစ်ခဲ့သောကြောင့် သူက လျန်စခန်းမှ ထွက်ခွာခဲ့ခြင်း ဖြစ်ကြောင်း ရှင်းလင်းချက်တစ်ခု ထုတ်ပြန်ခဲ့သည်။

ဤအရာက လျှို့ဝှက်ချက်တစ်ခု မဟုတ်တော့ချေ။ ကြောက်ရွံ့မှု၏ စီးနင်းခြင်းခံလိုက်ရသော နန်းတွင်းအမတ်များသည် သူတို့အချင်းချင်း နောက်တစ်ကြိမ် တီးတိုးပြောဆိုလာကြတော့သည်။

ယန်ကျန်းက ဆက်ပြောလိုက်၏။ "တော်ဝင်နန်းတော်က အပြစ်ကင်းတဲ့ ပြည်သူတွေကို စစ်ပွဲရဲ့ ပျက်စီးယိုယွင်းမှုတွေကနေ ကင်းလွတ်စေဖို့ ဒီကျိုးနွံတဲ့ ကျွန်တော်မျိုး စစ်သူကြီးကတော့ မင်းသမီးအနေနဲ့ သူတို့ရဲ့ ဝံပုလွေလို ရည်မှန်းချက်တွေကို ငြိမ်သက်သွားစေဖို့ ရှောင်းစစ်တပ်ဆီကို ကိုယ့်ကိုယ်ကိုယ် ကြိုးတုပ်ပြီး ဆန္ဒအလျောက် ပေးအပ်သင့်တယ်လို့ ယုံကြည်ပါတယ်။ ဒါ့အပြင်... နိုင်ငံရေး အာဏာကို လက်ဝါးကြီးအုပ်ဖို့အတွက် မင်းသမီးက ကျွန်တော်တို့ရဲ့ ဘုရင်ကို တစ်နှစ်ကျော်ကြာ အကျဉ်းချထားခဲ့တယ်— တကယ့်ကို မြွေပွေးတစ်ကောင်ရဲ့ လုပ်ရပ်ပဲ”

စကားပြောပြီးနောက် သူသည် ဘေးသို့ ဖယ်ပေးလိုက်လေသည်။ ပင်မခန်းမဆောင် ဝင်ပေါက်မှ အလင်းရောင်ကို ကျောခိုင်းလျက် ပုံရိပ်တစ်ခု ထွက်ပေါ်လာခဲ့၏။ —ချန်ဝမ်ပင်။

မြင့်မားသော နေရာတွင် အနှောင့်အယှက်ကင်းစွာဖြင့် တည်တည်ငြိမ်ငြိမ် ထိုင်နေဆဲဖြစ်သော ဝိန်းယွီကို ငေးကြည့်ရင်း သူသည် လွန်ခဲ့သော တစ်နှစ်အတွင်း ခံစားခဲ့ရသော ညှဉ်းပန်းနှိပ်စက်မှုများကို ပြန်လည်အမှတ်ရလာခဲ့သည်။ မိမိ၏ အမုန်းတရားများကို ဆက်လက် မဖိနှိပ်ထားနိုင်တော့ဘဲ သူသည် ဝိန်းယွီဆီသို့ လက်ညှိုးထိုးကာ ကျိန်ဆဲလိုက်လေတော့သည်။ "ရက်စက်တဲ့ မိန်းမ”

...