အခန်း ၁၅၃

အခန်း (၁၅၃)

ဟင်းလင်းပြင်စောင့်ကြပ်ခြင်း၊ ဖရိုဖရဲပင်လယ်၊ မှူးမတ်နယ်ပယ် အခွင့်အလမ်းများ

ပိုင်စုရှီ ဘာကြောင့် နတ်ဆိုးအတတ်ပညာကို ကျင့်ကြံရန် ရွေးချယ်ခဲ့လဲဆိုတာ အံ့ဩစရာမရှိတော့ပေ။

သူမက လက်ရှိ ခေတ်စားနေသော အဆင့်နိမ့် နတ်ဆိုးအတတ်ပညာများကို ကျင့်ကြံနေခြင်းမဟုတ်ဘဲ ရှေးဟောင်းသန့်စင်သော နတ်ဆိုးအတတ်ပညာများ၏ လမ်းစဥ်နောက်သို့ လိုက်ပါနေခြင်း ဖြစ်သည်။

သူမ၏ ကံတရားက တကယ့်ကို ထူးခြားဆန်းပြားလှပေသည်။

စဦးကျင့်စဥ်ဖြစ်သော ပင်လယ်နက်မူလသို့ပြန်ခြင်းကပင် အလွန် စွမ်းအားကြီးမားနေပြီဖြစ်ရာ ယခုအခါတွင်မူ ကာလကြာရှည် ပျောက်ဆုံးနေခဲ့သော သန့်စင်သည့်နတ်ဆိုးအတတ်ပညာ အမွေအနှစ်ကိုပါ ရှာဖွေတွေ့ရှိထားခဲ့ပြန်သည်။

“သူမက ကံတရားရဲ့ သားတော် ဖြစ်နေတာ အံ့ဩစရာမရှိတော့ပါဘူး...”

မုန့်ချန်ချင်း စိတ်လှုပ်ရှားမှုများနှင့်အတူ တိုးတိုးလေး ရေရွတ်လိုက်သည်။

သူ့ထံတွင် စွမ်းရည်ရယူကဒ်တစ်ကဒ် ရှိနေဆဲဖြစ်သည်။

ဤကဒ်ဖြင့် ပိုင်စုရှီး ဘေးနားတွင် ရှိမနေလျှင်ပင် သူမထံမှ စွမ်းရည်တစ်ခုကို ရယူနိုင်မည် ဖြစ်သည်။

ဤအတွေးဖြင့် မုန့်ချန်ချင်း သူ၏အချက်အလက်ဇယားကိုဖွင့်ပြီး ပိုင်စုရှီး၏ ပုံရိပ်ကို နှိပ်လိုက်ရာ သက်ဆိုင်ရာ အချက်အလက်များ ချက်ချင်း ထွက်ပေါ်လာခဲ့သည်။

[မိတ်ဆွေ - ပိုင်စုရှီး]

[မျိုးနွယ် - လူသား]

[ကျင့်ကြံရေး - တာအိုဖန်တီးခြင်းနယ်ပယ် အဆင့် ၈]

[အမြစ်ရိုး - အဆင့် ၂]

[နားလည်နိုင်စွမ်း - သာလွန်]

[သွေးမျိုးဆက် - ဧကရာဇ်နတ်ဆိုး (အစိတ်အပိုင်း)]

[နည်းစနစ်များ - အတုမဲ့အာဏာစက်နတ်ဆိုးနည်းစနစ် (ပြီးပြည့်စုံခြင်းအဆင့်)၊ နတ်ဆိုးသွေးဓား ခုနစ်ချောင်း (ပြီးပြည့်စုံခြင်းအဆင့်)...]

စွမ်းရည်ကဏ္ဍပေါ်ရှိ နည်းစနစ်များကို ကြည့်ရင်း မုန့်ချန်ချင်း သူ၏လက်များကို တင်းတင်းဆုပ်လိုက်မိသည်။

၎င်းက မဟာအကြီးအကဲ ပြောခဲ့သည့် ကာလကြာရှည် ပျောက်ဆုံးနေသည့် နတ်ဆိုးအတတ်ပညာ အစစ်အမှန်ပင် ဖြစ်သည်။

"နတ်ဘုရားရရှိခြင်းနယ်ပယ် ကျင့်ကြံသူတွေအတွက် ကောင်းကင်နတ်ဆိုးရဲ့ အနှစ်သာရက အကောင်းဆုံး ကျင့်ကြံရေး အရင်းအမြစ်ပဲ... ချီတစ်မျှင်ချင်းစီမှာ များပြားတဲ့ ဝိညာဥ်ပိုင်းဆိုင်ရာ သိမြင်နားလည်မှုတွေ ပါဝင်ပြီး စုပ်ယူလိုက်တာနဲ့ ဝိညာဥ်ကျင့်ကြံရေးကို အလျှင်အမြန် မြှင့်တင်ပေးနိုင်တယ်... "

"ဒါပေမဲ့ ကောင်းကင်နတ်ဆိုးရဲ့ အနှစ်သာရက မူလအရင်းအမြစ်ပစ္စည်း ဖြစ်နေလို့ ထိတွေ့လိုက်တာနဲ့ သူ့အလိုလို ပျက်စီးသွားတတ်လို့ သန့်စင်ဖို့ ခက်ခဲလွန်းတယ်... ဒါကြောင့်လည်း နတ်ဘုရားရရှိခြင်းနယ်ပယ် ကျင့်ကြံခြင်းက ကိုယ်ပိုင် နားလည်နိုင်စွမ်းအပေါ်မှာပဲ အဓိက မှီခိုရတာပဲ... ဒါပေမဲ့ ငါသာ ဒီနည်းစနစ်ကို ရလိုက်မယ်ဆိုရင် ကျင့်ကြံဖို့အတွက် ကောင်းကင်နတ်ဆိုးရဲ့ အနှစ်သာရတွေကို အဆက်မပြတ် သန့်စင်နိုင်လိမ့်မယ်..."

မုန့်ချန်ချင်းမျက်လုံးများ ပိုမို တောက်ပလာခဲ့သည်။

သူ၏ နားလည်နိုင်စွမ်းက ထူးခြားထက်မြက်ခြင်းအဆင့်တွင် ရှိနေပြီဖြစ်သော်လည်း နတ်ဘုရားရရှိခြင်းနယ်ပယ်မှာ သေးငယ်သော နယ်ပယ်တစ်ခု မဟုတ်ပေ။

ကိုယ်ပိုင်နားလည်နိုင်စွမ်းတစ်ခုတည်းအပေါ်တွင်သာ မှီခိုပါက နတ်ဘုရားရရှိခြင်းနယ်ပယ် အဆင့် ၉ သို့ ရောက်ရှိရန် အနည်းဆုံးနှစ်ဝက်ခန့် အချိန်ယူရမည် ဖြစ်သည်။

ကောင်းကင်နတ်ဆိုးအနှစ်သာရ၏ အကူအညီသာ ရှိပါက ဤအချိန်ကို ထက်ဝက် သို့မဟုတ် ထိုထက်မက လျှော့ချနိုင်လိမ့်မည် မဟုတ်လား။

“တကယ့်ကို ဝမ်းသာစရာ အံ့ဩမှုပဲ...”

မုန့်ချန်ချင်း တိုးတိုးလေး ရေရွတ်လိုက်သည်။

ယခင်က အန္တရာယ်ရှိပုံရသော လျှိုမြောင်ကြီးမှာ ယခုအခါ ရတနာသိုက်ကြီးတစ်ခုကဲ့သို့ ဖြစ်နေခဲ့ပြီ ဖြစ်သည်။

“ဒါကို ယူထားလိုက်ပါ, ဂိုဏ်းချုပ်က ငါ့ကို မင်းအတွက် ပေးခိုင်းလိုက်တာပဲ...”

မဟာအကြီးအကဲက ရုတ်တရက် သူ၏ ညာဘက်လက်ကို လှန်လိုက်ရာ မှန်အသေးလေးတစ်ချပ် ထွက်ပေါ်လာခဲ့သည်။

ရိုးရှင်းပုံရသော်လည်း ဆန်းကြယ်သော အရှိန်အဝါတစ်ခု ထွက်ပေါ်နေသဖြင့် ၎င်း၏ ထူးခြားဆန်းပြားသော သဘာဝကို သိသာစေသည်။

“ဒါက ဘာလဲ...”

မုန့်ချန်ချင်း မေးလိုက်သည်။

“ဒါက ဟင်းလင်းပြင်မှန်ရဲ့ ပုံတူတစ်ခုပဲ...”

မဟာအကြီးအကဲက ပြောလိုက်သည်။

“အန္တရာယ်နဲ့ ရင်ဆိုင်ရတဲ့ အချိန်ကျရင် ဒီမှန်ကို သုံးပြီး နတ်ဆိုးချောက်နက်ထဲကနေ ထွက်ခွာနိုင်သလို ဂိုဏ်းချုပ်ရဲ့ အကူအညီကိုလည်း တောင်းခံနိုင်တယ်...”

“ဂိုဏ်းချုပ်က ဂိုဏ်းထဲမှာပဲ နေရင်းနဲ့ ဒီလောက် ဝေးတဲ့ အကွာအဝေးကနေ ကူညီနိုင်တာလား...”

မုန့်ချန်ချင်း အံ့ဩသွားခဲ့သည်။

ချောက်နက်ထဲမှ ထွက်ခွာနိုင်သည်ဆိုသည်မှာ နားလည်နိုင်သော်လည်း ဤမှန်က ဂိုဏ်းချုပ်ကိုပါ ဝင်ရောက်စွက်ဖက်ခွင့် ပေးနိုင်သည် တဲ့လား။

“အချို့သော အကြောင်းပြချက်တွေကြောင့် ဂိုဏ်းချုပ်က ဂိုဏ်းထဲကနေ ထွက်ခွာလို့မရဘူး... ငါတို့လည်း နတ်ဆိုးချောက်နက်ထဲကို လွယ်လွယ်နဲ့ ဝင်လို့မရဘူး... အဲဒါက ဟန်ချက်ညီမှုကို ပျက်ပြားစေပြီး ပိုပြီး ကြောက်မက်ဖွယ်ကောင်းတဲ့ တည်ရှိမှုတွေကို ဆွဲဆောင်မိလိမ့်မယ်...”

မဟာအကြီးအကဲ ရှင်းပြလိုက်သည်။

သာမန်လူများ နားမလည်နိုင်သော်လည်း မုန့်ချန်ချင်းကတော့ သဘောပေါက်လိုက်သည်။

ကိုယ်က အရမ်းသန်မာနေပါက ပိုမိုအစွမ်းထက်သော ကောင်းကင်နတ်ဆိုးများကို ဆွဲဆောင်မိလိမ့်မည် ဖြစ်သည်။

“ဒီဟင်းလင်းပြင်မှန်က မင်းကို ကာကွယ်ဖို့အတွက် ရှားပါးတဲ့ ရတနာတစ်ခုပဲ...”

မဟာအကြီးအကဲက ပြောလိုက်သည်။

“အန္တရာယ်ရှိလာရင် ဒါကို အသက်သွင်းလိုက်ပါ... ဂိုဏ်းချုပ် ချက်ချင်း ဝင်ရောက်ကူညီလိမ့်မယ်...”

“ကျွန်တော် နားလည်ပြီ...”

မုန့်ချန်ချင်း ထိုမှန်ကို ဂရုတစိုက် သိမ်းဆည်းလိုက်သည်။

သူသည် ဂိုဏ်းချုပ်၏ စစ်မှန်သော ခွန်အားအပြည့်အစုံကို မသိသော်လည်း ၎င်းက စိတ်ကူး၍မရနိုင်လောက်အောင် ဖြစ်လိမ့်မည်ဖြစ်သည်။

ဂိုဏ်းချုပ်၏ အကာအကွယ် ရှိနေသဖြင့် သူသည် ဘေးအန္တရာယ်များကို အလွန်အမင်း စိုးရိမ်ပူပန်နေရန် မလိုဘဲ ပိုမို ရဲရဲဝံ့ဝံ့ လှုပ်ရှားနိုင်တော့မည် ဖြစ်သည်။

“တောင်ပိုင်း ပါရမီရှင်များတိုက်ပွဲ စတင်ဖို့ လေးလပဲ လိုတော့တယ်... မင်းက နတ်ဘုရားရရှိခြင်းနယ်ပယ်ကို ရောက်နေပြီဆိုပေမဲ့ ဒါက မလုံလောက်သေးဘူး... မင်းအနေနဲ့ ကောင်းကင်နတ်ဆိုးရဲ့ အနှစ်သာရကို မကြာခင်မှာ အောင်မြင်စွာ သန့်စင်နိုင်လိမ့်မယ်လို့ ငါ မျှော်လင့်တယ်...”

မဟာအကြီးအကဲက ပြောလိုက်သည်။

“ဒါက မင်းကို နယ်ပယ်သေး အနည်းငယ် အမြန် ချိုးဖျက်ဝင်ရောက်နိုင်ဖို့ ကူညီပေးလိမ့်မယ်...”

“တောင်ပိုင်း ပါရမီရှင်များတိုက်ပွဲ?...”

မုန့်ချန်ချင်းက မျက်ခုံးပင့်လိုက်သည်။

ဂိုဏ်းတွင်းပြိုင်ပွဲအတွင်း သူ့ကို လာရောက်စည်းရုံးခဲ့သော ယွမ်ချန်းထံမှ ဤအကြောင်းကို သူ ကြားဖူးခဲ့သည်။

“အခုကစပြီး ခြောက်လကြာရင် တောင်ပိုင်း ပါရမီရှင်များတိုက်ပွဲ စတင်လိမ့်မယ်... အဲဒီအချိန်ကျရင် ငါတို့ ပြန်ဆုံကြတာပေါ့...”ဟု ယွမ်ချန်း ခြိမ်းခြောက်သည့် လေသံဖြင့် ပြောခဲ့ဖူးသည်။

“ဂိုဏ်းချုပ်က မင်းကို မပြောပြဘူးလား...”

မဟာအကြီးအကဲ အံ့ဩစွာ မေးလိုက်သည်။

“ဟင့်အင်း... မပြောပြဘူး...”

မုန့်ချန်ချင်း ခေါင်းခါလိုက်သည်။

“သူက ဒါကို ဘယ်လိုဖြစ်ပြီး မေ့သွားရတာလဲ... တစ်နေ့ကုန် ဘာတွေ လုပ်နေမှန်းကို မသိဘူး...”

မဟာအကြီးအကဲ စိတ်ပျက်လက်ပျက်ဖြင့် ညည်းတွားလိုက်သည်။

သူ့တွင် ဂိုဏ်းချုပ်အပေါ် မကျေနပ်ချက်များစွာ ရှိနေပုံရသော်လည်း ပို၍ မပြောတော့ဘဲ စိတ်ရှည်စွာဖြင့် ဆက်လက် ရှင်းပြလိုက်သည်။

"တောင်ပိုင်း ပါရမီရှင်များတိုက်ပွဲဆိုတာ တောင်ပိုင်းနယ်စပ်မှာရှိတဲ့ စီရင်စု ၁၃ စုက ထိပ်သီးပါရမီရှင်တွေကြား ပြိုင်ပွဲတစ်ခုပဲ... ဒီပြိုင်ပွဲက အရင်းအမြစ်တွေ ခွဲဝေတဲ့နည်းလမ်းဆိုလည်း ဟုတ်တယ်..."

"နှစ်စဥ်နှစ်တိုင်း ဗဟိုစီရင်စု ကနေ နယ်စပ်လေးခုကို အဆင့်မြင့် အရင်းအမြစ်တွေ အများကြီး ချပေးလေ့ရှိတယ်လေ... နယ်စပ်တစ်ခုချင်းစီအတွင်းမှာ ခွဲဝေမှုကတော့ ပြိုင်ပွဲမှာ ဂိုဏ်းတပည့်တွေရဲ့ စွမ်းဆောင်ရည်အပေါ် မူတည်ပြီး ဆုံးဖြတ်တာ..."

"တပည့်တွေရဲ့ အဆင့်က ပိုမြင့်လေလေ သူတို့ရဲ့ ဂိုဏ်း ရရှိမယ့် အရင်းအမြစ်က ပိုများလေလေပဲ... ဒီတစ်ကြိမ်မှာတော့ ထိပ်သီးပါရမီရှင် အယောက်နှစ်ဆယ်က ဖရိုဖရဲပင်လယ်ကို ဝင်ရောက်ဖို့ အခွင့်အရေးလည်း ရလိမ့်မယ်..."

မဟာအကြီးအကဲ ရှင်းပြလိုက်သည်။

“အင်း, ကျွန်တော်သိပြီ...”

မုန့်ချန်ချင်း ခေါင်းညိတ်လိုက်သည်။

ဂိုဏ်းများအတွင်းနှင့် ဂိုဏ်းများအကြား ယှဥ်ပြိုင်မှုများအားလုံးက ကျင့်ကြံရေးအတွက် ပိုမိုများပြားသော အရင်းအမြစ်များကို ရယူရန် အမြဲတစေ ရည်ရွယ်ခြင်း ဖြစ်သည်။

အရင်းအမြစ်များက ရှားပါးလှပြီး သန်မာသူများသာလျှင် ၎င်းတို့ကို ပိုင်ဆိုင်ခွင့် ရှိကြသည်။

“ဖရိုဖရဲပင်လယ်ဆိုတာက ဘာလဲ...”

မုန့်ချန်ချင်းက မေးလိုက်သည်။

“ရှေးဟောင်း နေရာတစ်ခုပေါ့...”

မဟာအကြီးအကဲ၏ အသံတွင် တောင့်တသည့် အရိပ်အယောင်အနည်းငယ် ပါဝင်နေခဲ့သည်။

“အဲ့တာက ထိပ်သီးပါရမီရှင် အများအပြားအတွက် အဓိကပန်းတိုင်ပဲ... ဘာလို့လဲဆို အဲ့နေရာမှာ အလွန်တရာ အဖိုးတန်တဲ့ မှူးမတ်နယ်ပယ် အခွင့်အလမ်းတွေ ရှိနေလို့ပဲ...”

ဤအရာကို ကြားလိုက်ရသည့်အခါ မုန့်ချန်ချင်း မျက်လုံးများ ကျဥ်းမြောင်းသွားခဲ့သည်။

မှူးမတ်နယ်ပယ်...

ရှီယင်ချင်းနှင့် စကားပြောဆိုဖူးခြင်းအရ မှူးမတ်နယ်ပယ်၏ အောက်တွင် ရှိသော နယ်ပယ်များကို ချိုးဖျက်ရန်အတွက် ကိုယ်ပိုင်အရည်အချင်းနှင့် နားလည်နိုင်စွမ်းသာ လိုအပ်သည်ဟု သူ သိရှိထားခဲ့သည်။

သို့သော် မှူးမတ်နယ်ပယ်သို့ ရောက်ရှိရန်အတွက်မူ ရှေးဟောင်း ဝိညာဥ်ပစ္စည်းတစ်ခု လိုအပ်ပေသည်။

၎င်းက မုန့်ချန်ချင်းအတွက် အလွန်ဝေးကွာလွန်းလှသေးသဖြင့် ဂိုဏ်းချုပ်က အသေးစိတ် ရှင်းမပြခဲ့ခြင်း ဖြစ်နိုင်သည်။

မှူးမတ်နယ်ပယ်သို့ ရောက်ရှိရန်အတွက် ဝိညာဥ်ပစ္စည်းတစ်ခုကို ကျိန်းသေပေါက် ပိုင်ဆိုင်ထားရမည် ဖြစ်ရာ ၎င်းက အလွန်တရာ အရေးကြီးလှပေသည်။