အခန်း ၅၁၇

အခန်း (၅၁၇) ဘေးချင်းယှဉ်ရန် သဘောတူညီချက်

ဆုမို၏ လက်ဝါးချက်မှာ တကယ့်ကို ပြိုင်ဘက်ကင်းလောက်အောင် အားပြင်းမာန်ပါလှသည်။ ဝမ်ချန်ရှင်း၏ နေရာမှာတင် သေဆုံးသွားမှုက ကြည့်ရှုနေသူတို့၏ ရင်ထဲတွင် ရှုပ်ထွေးလှသော ခံစားချက်များကို ဖြစ်ပေါ်စေသည်။

သူ၏ ဘဝဇာတ်ကြောင်းကို ပြန်ပြောင်းကြည့်လျှင်မူ ခြေလှမ်းတိုင်းမှာ အကွက်ချ လှည့်စား ခံခဲ့ရသည်မှာ ထင်ရှားလှ၏။

အကြီးအကဲ ထျန်းချွမ်၏ တပည့်အဖြစ် ဝင်ရောက်ကာ ကောင်းကင်စမ်းရေ နှလုံးသားသန့်စင် ဓားသိုင်းကို သင်ယူခဲ့ရခြင်းမှာလည်း ဓားသိုင်းကို ခိုးယူရန်အတွက်သာ ဖြစ်သည်။

နောက်ဆုံးတွင် သူ၏ အမည်နာမကိုပင် အခွာခံလိုက်ရပြီး ဤ ထျန်းချူ ဓားသိုင်းနှီးနှောပွဲ ဆိုသည်မှာလည်း ဝမ်ချန်ရှင်း အတုကို သိုင်းလောကတွင် နာမည်ကြီးလာစေရန်အတွက်သာ ဖန်တီးထားခြင်း ဖြစ်တော့၏။

အကယ်၍ ဝမ်ချန်ရှင်းသာ သရဲငါးပါး ကောင်းကင်ပိုက်ကွန် လက်ချက်ဖြင့် အစောကြီး သေဆုံးသွားခဲ့လျှင်၊ ယနေ့ ဓားသိုင်း နှီးနှောပွဲ၏ ရလဒ်က မည်သို့ပင်ဖြစ်စေ ဝမ်ချန်ရှင်း အတုမှာမူ သိုင်းလောကတွင် ဟိုးဟိုးကျော်သွားပေလိမ့်မည်။ ထိုမှတစ်ဆင့် ပေါ်ပေါက်လာမည့် အကျိုးဆက်များမှာ တွေးကြည့်ရုံနှင့်ပင် ကြောက်မက်ဖွယ် ကောင်းလှသည်။ ညသခင်၏ အစီအစဉ်များမှာ ထိုမျှနှင့်တင် မပြီးသေးချေ။ ယူချွမ်ဂိုဏ်းချုပ်ကိုပါ တစ်ပါတည်း ထောင်ချောက်ဆင်လိုက်ခြင်းမှာ တစ်ချက်ခုတ် နှစ်ချက်ပြတ် ဆိုသည်ထက်ပင် ပို၍ ပါးနပ်လှသည်။

ဝမ်ချန်ရှင်း အစစ်မှာမူ အသုံးချပြီး ပစ်ပယ်ခံလိုက်ရသော နယ်ရုပ်လေးတစ်ရုပ်မျှသာ ဖြစ်ခဲ့ရရှာသည်။ သူသည် ကျေးဇူးဆပ်ချင်သော စိတ်ဖြင့် လူယုတ်မာကို ယုံကြည်ခဲ့မိရာမှ အမှားနှင့်အမှန်ကြား ယိုင်နဲ့ခဲ့ပြီး နောက်ဆုံးတွင် မိမိ၏ ဆရာကိုပင် ဒုက္ခပေးမိခဲ့တော့၏။

သူသည် လောကအလယ်တွင် ဆက်လက် ရှင်သန်ရန် မျက်နှာမရှိတော့သော်လည်း၊ သူ၏ သေဆုံးမှုက လူတိုင်းကို စိတ်မကောင်း ဖြစ်စေခဲ့သည်မှာ အမှန်ပင် ဖြစ်သည်။

လူတိုင်း စိတ်မကောင်း ဖြစ်နေစဉ်မှာပင် ယူချွမ်ဂိုဏ်းချုပ်မှာမူ ဒေါသမီးများ တဟုန်းဟုန်း တောက်လောင်နေတော့၏။

ဝမ်ချန်ရှင်းသည် သေခြင်းဖြင့် လောကကြီးနှင့် သူ၏ ဂိုဏ်းကို ရှင်းလင်းချက် ပေးသွားခဲ့သော်လည်း၊ သူ သိချင်သော ကိစ္စကိုမူ ဘာမှ မပြောသွားခဲ့ချေ။ ညသခင်၏ ရည်ရွယ်ချက်မှာ တုန်းချန်ဂိုဏ်းများကို လမ်းဖွင့်ပေးပြီး သူ၏ ချီမေတောအုပ်ကို တိုက်ခိုက်စေရန်လား ဆိုသည့် အချက်ကို သူ အဖြေရှာမရ ဖြစ်နေသည်။

ယူချွမ်ဂိုဏ်းချုပ်သည် လူအုပ်ကြီးက ဝမ်ချန်ရှင်း၏ အလောင်းကို အာရုံစိုက်နေစဉ်မှာပင် သူ၏ မျက်နှာဖုံးအောက်မှ မျက်လုံးများက အရူးအလား လှုပ်ရှားသွားပြီး ကိုယ်ပေါ်မှ သွေးရောင် အရှိန်အဝါများမှာ ဝုန်းခနဲ ပေါက်ကွဲထွက်လာတော့၏။

သူ၏ ဝတ်ရုံနီကြီးမှာ လေထဲတွင် လွင့်ပျံသွားပြီး သွေးပင်လယ် တစ္ဆေငိုသံကြီးမှာ ဟိန်းထွက်လာသည်။ သွေးရောင် အလင်းတန်းများသည် ထက်မြက်လှသော ဓားသွားပေါင်း ထောင်ချီအဖြစ် ပြောင်းလဲသွားကာ အရပ်မျက်နှာ အသီးသီးသို့ 'လောကကို အုပ်စိုး သိုင်းကွက်'ဖြင့် ဝိုင်းပတ် တိုက်ခိုက်လိုက်တော့၏။

ဂိုဏ်းကြီး ခုနစ်ဂိုဏ်းမှ ခေါင်းဆောင်များသည် ဝမ်ချန်ရှင်းအတွက် စိတ်မကောင်း ဖြစ်နေကြသော်လည်း သတိဝီရိယကိုမူ လုံးဝ လျှော့မထားကြချေ။

ယူချွမ်ဂိုဏ်းချုပ် စတင် လှုပ်ရှားလိုက်သည်နှင့် သူတို့ကလည်း ချက်ချင်းပင် တုံ့ပြန်လိုက်ကြသည်။

ရှရွှမ်ရန်သည် သူ၏ ခေါက်ယပ်တောင်ကို ပါးနပ်စွာ လှည့်ပတ်ကာ သွေးရောင်အတွင်းအားများကို ကာကွယ်လိုက်၏။

ဝေချီမုန့်၏ လက်များမှာ တုန်ခါသွားပြီး ပြင်းထန်လှသော ချီစွမ်းအင်များဖြင့် သွေးရောင်လက်သီးကို တည့်တည့် ဆိုင်တိုက်လိုက်သည်။

ရွှမ်ယွမ်ရှောင်ရှမ်းကမူ ခပ်ပြုံးပြုံးဖြင့်ပင် သူမ၏ နုနယ်လှသော လက်ချောင်းလေးများကို သစ်ခွပန်းပုံသဏ္ဌာန် ပြုလုပ်ကာ သွေးရောင်စွမ်းအားများကို (၃) လက်မခန့် အကွာတွင် ဟန့်တားထား၏။

သို့သော် နောက်တစ်ခဏတွင်မူ သူမ၏ မျက်ခုံးတန်းများမှာ တွန့်ချိုးသွားရလေ၏။

ယူချွမ်ဂိုဏ်းချုပ်၏ လက်ဝါးချက်မှာ လူ (၇) ယောက်လုံးကို ရည်ရွယ်ထားသော်လည်း သူ၏ အတွင်းအားမှာမူ အထင်သေး၍ မရနိုင်လောက်အောင် ပြင်းထန်လှသည်။ သူမသည် ဂိုဏ်း၏ အဆင့်မြင့် သိုင်းကွက်ဖြင့် ခုခံနေသော်လည်း ခေတ္တမျှ ကြာအောင် အားပြိုင်နေရလေတော့၏။

ထိုခဏ၌ ရဟန်းငယ်လေး ရွှမ်ကျန်းက ဒေါသတကြီး အော်ဟစ်လိုက်တော့၏။ သူ၏ ဟိန်းဟောက်သံကြောင့် ယူချွမ်ဂိုဏ်းချုပ်၏ သွေးရောင်စွမ်းအားများမှာ လေထဲတွင် တုံ့ခဲသွားသကဲ့သို့ ဖြစ်သွားရသည်။

တဆက်တည်းမှာပင် ရွှမ်ကျန်းသည် ရှေ့သို့ တစ်ဟုန်ထိုး တိုးဝင်ကာ သူ၏ ‘ချီမေတုတ်’ ကို ကောင်းကင်ယံမှနေ၍ အားကုန် လွှဲရိုက်လိုက်တော့၏။

ဒါက ကျင့်ချန်းကျောင်းတော်၏ အသံဖြင့် တိုက်ခိုက်သည့် အဆင့်မြင့် သိုင်းပညာ ‘ရုတ်တရက် တုတ်ချက်’ ပင် ဖြစ်သည်။ အော်ဟစ်သံက စိတ်ဝိညာဉ်ကို တုန်လှုပ်စေပြီး တုတ်ချက်က ပြိုင်ဘက်ကင်းသော စွမ်းအားကို ထွက်ပေါ်စေခြင်း ပင်တည်း။ ရဟန်းငယ်လေးသည် ယူချွမ်ဂိုဏ်းချုပ်ကို မြင်ကတည်းက တုတ်နှင့် ရိုက်ချင်နေသည်မှာ အခုမှပင် အခွင့်အရေး ရတော့၏။

သို့သော် တုတ်ချက် ကျရောက်သွားချိန်တွင်မူ သွေးရောင်ဝတ်ရုံကြီးမှာ လွင့်စဉ်သွားပြီး သွေးရောင်အရိပ်တစ်ခုကိုသာ ထိမှန်လိုက်သည်။ ယူချွမ်ဂိုဏ်းချုပ်မှာမူ ဝိုင်းရံထားသည့် ကြားမှ ဖောက်ထွက်ကာ လေထဲသို့ ရောက်ရှိနေပြီ ဖြစ်၏။ သူသည် သူ၏ ဝတ်ရုံစကို ဝှေ့ယမ်းကာ ဘောလုံးတစ်လုံးပမာ ကိုယ်ကို လိပ်လိုက်ပြီး ထွက်ပြေးရန် ပြင်လိုက်သည်။

သို့သော် ထိုအခိုက်အတန့်၌ ကြယ်ရောင်လမင်းရောင်များ လွှမ်းခြုံထားသော လက်ဝါးတစ်ချက်သည် မျက်တောင်တစ်ခတ်အတွင်း ပေါ်ပေါက်လာပြီး ယူချွမ်ဂိုဏ်းချုပ်၏ လွတ်လမ်းကို အပိုင် ပိတ်ဆို့လိုက်တော့၏။ ကြားဖြတ် တိုက်ခိုက်လိုက်သူမှာ လန်ယွဲ့နန်းတော်၏ ဒုတိယနန်းတော်သခင်မ ပင် ဖြစ်သည်။

ယူချွမ်ဂိုဏ်းချုပ် 'လောကကို အုပ်စိုး သိုင်းကွက်'ကို ထုတ်ဖော်စဉ်ကတည်းက သူမသည် လမင်းခြေလှမ်း ကို အသုံးပြုကာ လေထဲသို့ ကြိုတင် ခုန်တက်နေခဲ့၏။ ယခု သူမ ထုတ်ဖော်လိုက်သော လက်ဝါးချက်မှာ လန်ယွဲ့နန်းတော်၏ အထူးသိုင်းဖြစ်သော ‘ကြယ်လမင်းဝတ်ရုံ လက်ဝါး’ ပင် ဖြစ်သည်။

ထိုလက်ဝါးချက်တွင် ကြယ်လမင်း၏ အစစ်အမှန်ချီများ ကိန်းအောင်းနေပြီး တကယ့်ကို သန့်စင်လှ၏။ ယူချွမ်ဂိုဏ်းချုပ်သည်လည်း သွေးရောင်ဝတ်ရုံကို ဝှေ့ယမ်းကာ သွေးလက်ဝါးဖြင့် ပြန်လည် တိုက်ခိုက်လိုက်သည်။

ဒုတိယနန်းတော်သခင်မမှာ သိုင်းလောကတွင် ကျွမ်းကျင်သူတစ်ဦး ဖြစ်သော်လည်း ယူချွမ်ဂိုဏ်းချုပ်၏ အတွင်းအားကိုမူ တည့်တည့် ရင်ဆိုင်ရန်မှာ ခက်ခဲလှသည်။ အကယ်၍သာ တိုက်ရိုက် ထိတွေ့မိပါက သူမ ချက်ချင်း ဒဏ်ရာရသွားနိုင်၏။

သို့ဖြစ်ရာ လက်ဝါးနှစ်ဖက် မထိတွေ့မီမှာပင် သူမ၏ ကိုယ်ခန္ဓာမှာ အရိပ်များစွာအဖြစ် ကွဲပြားသွားတော့၏။ မရေမတွက်နိုင်သော ကြယ်တာရာများအလား လက်ဝါးရိပ်များမှာ အရပ်မျက်နှာအနှံ့မှ တိုးဝင်သွားသည်။ ယူချွမ်ဂိုဏ်းချုပ်မှာမူ လေထဲတွင် နှင်းလုံးကြီး တစ်ခုအလား လည်ပတ်နေပြီး လက်ဝါးရိပ်များကို ဆက်တိုက် ထုတ်ဖော်နေရသည်။

သူတို့နှစ်ဦးသည် လေထဲတွင် မျက်တောင်တစ်ခတ်အတွင်း အကြိမ်ပေါင်း များစွာ အပြန်အလှန် တိုက်ခိုက်လိုက်ကြသော်လည်း၊ အံ့ဩစရာကောင်းသည်မှာ လက်ဝါးချက် တစ်ချက်မျှ တည့်တည့်မတ်မတ် မထိမှန်သည်မှာ ထူးဆန်းလှသည်။ တစ်ချက်ထိသည်နှင့် ချက်ချင်း နောက်ဆုတ်လိုက်ကြသဖြင့် တိုက်ပွဲမှာ တကယ့်ကို ကြည့်ကောင်းနေတော့၏။

၎င်းမှာ ဒုတိယနန်းတော်သခင်မ၏ ဗျူဟာပင် ဖြစ်သည်။

သူမသည် ရန်သူကို အသေသတ်ရန်ထက် ‘ကြယ်လမင်းဝတ်ရုံ လက်ဝါး’ နှင့် ‘လမင်းခြေလှမ်း’ ကို အသုံးပြုကာ ရန်သူကို ပိတ်ဆို့ထားရန်သာ ရည်ရွယ်ထားခြင်းတည်း။

--