အခန်း ၁၄၈

အခန်း (၁၄၈) အဆင့်တက်ခြင်း ပြီးဆုံးမှု၊ သွေးဝိညာဉ်ရုပ်သေးကြိုးဆွဲပညာ

"မြင့်မြတ်နယ်မြေတစ်ခု၊ ကံကြမ္မာသမီးတော် တစ်ယောက်နဲ့ ကံကြမ္မာသားတော် သုံးယောက်လား"

"ရုပ်တစ်သောင်းမြင့်မြတ်နယ်မြေက တော်တော်လေး ကောင်းကင်ကို ဆန့်ကျင်နေတာပဲ... တကယ်လို့ သူတို့သာ မပျက်စီးသွားဘူးဆိုရင် တခြား အင်အားစုတွေ အားလုံးကို ကျော်တက်သွားနိုင်တဲ့ အခွင့်အရေး တကယ်ပဲ ရှိနိုင်တယ်"

ချင်လော့မှာ အမှန်တကယ် အံ့အားသင့်သွားခဲ့၏။

လင်းရွှမ်၏ ကံကြမ္မာအဆင့်က ချင်ဖန်ကို မယှဉ်နိုင်သော်လည်း ရှန်ချင်းယန်နှင့်အတူဆိုလျှင် အနာဂတ်တွင် သူတို့က အပြန်အလှန် အောင်မြင်မှု ရရှိနိုင်ပြီး ချင်ဖန်ကို ကျော်တက်သွားရန်လည်း ဖြစ်နိုင်လေသည်။

ဤကံကြမ္မာသားတော် နှစ်ဦးနှင့်အတူ သူတို့က လင်းရွှမ်၏ လက်အောက်ငယ်သားများအဖြစ် ပြုစုပျိုးထောင်ခံရရန် ဖြစ်လာမည် ဖြစ်၍

လင်းရွှမ်၏ အနာဂတ်က တကယ့်ကို တောက်ပနေသည်ဟု ဆိုနိုင်လေသည်။

"မင်းတို့ရဲ့ အားအနည်းဆုံး အရွယ်မှာ ငါနဲ့ လာတွေ့တာ တကယ့်ကို နှမြောစရာပဲ"

ချင်လော့က သူ့ဘာသာ တိုးတိတ်စွာ ရေရွတ်လိုက်၏။

စာချုပ်၏ စွမ်းအားဖြင့် ချင်လော့၏ အသံက ထိုပါယန်၏ နားထဲတွင် ပဲ့တင်ထပ်သွားခဲ့သည်။

"မင်း အသက်ရှင်မရှင်က မင်းရဲ့ ကံကြမ္မာပေါ်မှာပဲ မူတည်တယ်... အခွင့်အရေးကိုတော့ မင်းကို ငါ ပေးမယ်"

လူသားဧကရာဇ်အလံက သူ၏ စွမ်းအား တစ်စိတ်တစ်ပိုင်းကို ထိုပါယန်အား ကူညီရန် လွှဲပြောင်းပေးလိုက်ပြီး သူ ချက်ချင်း သေဆုံးမသွားစေရန် ကာကွယ်ပေးလိုက်လေသည်။

လူသားဧကရာဇ်အလံ၏ နယ်ပယ်အတွင်းသို့ ဝင်ရောက်လာပြီး ချီအငွေ့အသက်ကို ခံစားလိုက်ရချိန်၌ သူ၏ မျက်လုံးများ ချက်ချင်း ပြူးကျယ်သွားခဲ့၏။

"ဝိညာဉ်တစ်သောင်းအလံ... ဒီကျိန်စာတိုက်ခံရမယ့်အရာက တကယ်ပဲ ဝိညာဉ်တစ်သောင်းအလံ ဖြစ်နေတာလား... ကျီး... ဒီကောင်က ငါတို့ထဲက တစ်ယောက်ပဲ"

"မင်းက ငါတို့ထဲက တစ်ယောက်ဆိုရင် အစကတည်းက ပြောသင့်တာပေါ့... ငါက ဒီလောက်ကြာအောင် တုံ့ဆိုင်းနေဖို့ တကယ်ပဲ လိုအပ်လို့လား”

ထိုပါယန်က မကျေမနပ် ညည်းတွားလိုက်လေသည်။

မိုးကြိုးကပ်ဘေးက ဆက်လက် ဖြစ်ပွားနေခဲ့၏။

ဤတစ်ကြိမ်တွင် မိုးကြိုးကပ်ဘေးက ခရမ်းရောင် မိုးကြိုးကပ်ဘေးအဖြစ် ပြောင်းလဲသွားပြီး ခရမ်းရောင်က အနက်ရောင်အဖြစ်သို့ ပြောင်းလဲသွားခဲ့သည်။

အချို့က လေထဲတွင်ပင် ပေါက်ကွဲသွားပြီး ရုပ်တစ်သောင်းမြင့်မြတ်နယ်မြေအတွင်းသို့ ကျဆင်းလာသော မရေမတွက်နိုင်သည့် မိုးကြိုးကပ်ဘေးငယ်လေးများအဖြစ်သို့ ကွဲထွက်သွားခဲ့လေသည်။

မိုးကြိုးကပ်ဘေး၏ သန့်စင်မှုအောက်တွင် လူသားဧကရာဇ်အလံ၏ အနက်ရောင်ချီများက လုံးဝ သန့်စင်သွားခဲ့၏။

ယခုအခါ လူသားဧကရာဇ်အလံ တစ်ခုလုံးက ရွှေရောင်အလင်းတန်းများ ဖြာထွက်နေပြီး ကျယ်ပြောလှသော ဖြောင့်မတ်သည့် ချီစွမ်းအင်များက ရုပ်တစ်သောင်းမြင့်မြတ်နယ်မြေ တစ်ခုလုံးကို ဖုံးလွှမ်းသွားကာ အသက်ရှင်ကျန်ရစ်သူများအား မျှော်လင့်ချက် ရောက်ရှိလာပြီဟု ခံစားရစေခဲ့ပေသည်။

လူသားဧကရာဇ်အလံမှာ ပို၍ပင် ကျိုးပဲ့သွားပြီး အလံစပေါ်တွင် အပေါက် လေးဆယ့်ကိုးပေါက် ပေါ်လာကာ အလံတိုင်မှာ သိသိသာသာ သေးငယ်သွားပြီး အတွင်းရှိ ဝိညာဉ်များ၏ ထက်ဝက်ကျော်မှာ သေဆုံး သို့မဟုတ် ဒဏ်ရာရသွားခဲ့လေသည်။

ကျန်ရှိနေသော ဝိညာဉ်များမှာ မိုးကြိုးကပ်ဘေး၏ သန့်စင်မှုကို ခံရပြီးနောက် အထူး သန့်စင်ပြီး အစွမ်းထက်လာခဲ့ကြ၏။

အရေးကြီးဆုံး အဆင့်က ပြီးဆုံးသွားပြီဖြစ်ပြီး လူသားဧကရာဇ်အလံက အဆင့်တက်သွားခဲ့လေပြီ။

ကျန်ရှိနေသော မိုးကြိုးကပ်ဘေးမှာ လူသားဧကရာဇ်အလံကို တက်လှမ်းရန် ကူညီပေးမည့် အာဟာရဓာတ်များ ဖြစ်ပေသည်။

မိုးကြိုးကပ်ဘေးများက လူသားဧကရာဇ်အလံကို ရိုက်ခတ်သွားပြီး လူသားဧကရာဇ်အလံ တစ်ခုလုံးကို ပိုမို တောက်ပသွားစေခဲ့၏။

ရှီးဟွမ်၏ သက်သောင့်သက်သာရှိသော်လည်း ပင်ပန်းနေသော အသံက ချင်လော့၏ နားထဲတွင် ပဲ့တင်ထပ်လာခဲ့သည်။

"ကပ်ဘေးဖြတ်ကျော်ခြင်း အောင်မြင်သွားပြီ... လူသားဧကရာဇ်အလံက အခု အဆင့်မြင့်တာအိုဧကရာဇ်လက်နက် ဖြစ်သွားပြီ"

'ဘုန်း!'

လူသားဧကရာဇ်အလံက ချက်ချင်း ကြီးမားလာပြီး ရုပ်တစ်သောင်းမြင့်မြတ်နယ်မြေ တစ်ခုလုံးကို ဖုံးလွှမ်းသွားခဲ့လေသည်။

ချင်လော့က ရှေ့သို့ လှမ်းတက်လိုက်ရာ လူသားဧကရာဇ်အလံ၏ စုတ်ပြဲနေသော အလံစပေါ်တွင် ရွှေရောင် တံခါးပေါက်တစ်ခု ပွင့်လာပြီး ချင်လော့၏ ခြေရင်းတွင် ရွှေရောင်လမ်းကြောင်းကြီးတစ်ခုပင် ဖြန့်ကျက်သွားခဲ့၏။

အလွန် ခမ်းနားလှပေသည်။

ဤအခိုက်အတန့်တွင် ရုပ်တစ်သောင်းမြင့်မြတ်နယ်မြေမှ ကံကောင်းသော အသက်ရှင်ကျန်ရစ်သူ အနည်းငယ် ပေါ်လာခဲ့ပြီး သူတို့ရှေ့ရှိ လုံးဝ စိမ်းသက်နေသော ပတ်ဝန်းကျင်ကို စိုက်ကြည့်ကာ သူတို့ တစ်ယောက်စီ၏ မျက်နှာပေါ်တွင် ဇဝေဇဝါဖြစ်နေသော အမူအရာများ ပေါ်နေခဲ့လေသည်။

"ငါ့ရဲ့ ရုပ်တစ်သောင်းမြင့်မြတ်နယ်မြေက ပျက်စီးသွားပြီလား"

အဘိုးအိုက သူ့ဘာသာ တိုးတိတ်စွာ ရေရွတ်လိုက်၏။

"ဒါပေမဲ့ အဲဒီ သူတော်စင်လက်နက်ကရော…"

သူ၏ စကားအဆုံးတွင် လှောင်ပြောင်သော အသံတစ်ခုက သူ၏ နားထဲတွင် ပဲ့တင်ထပ်လာခဲ့သည်။

"မင်းက အခု အဲဒီ သူတော်စင်လက်နက်ထဲမှာ ရောက်နေတာလေ... မဟုတ်ဘူး... တကယ်တော့ မင်းက လူသားဧကရာဇ်အလံထဲမှာ ရောက်နေတာ"

'ဧကရာဇ်လက်နက်' ဟူသော စကားလုံးက အဘိုးအိုကို တစ်ကိုယ်လုံး တုန်ယင်သွားစေပြီး သူ၏ မျက်လုံးများတွင် ပြင်းထန်သော လောဘများ ပြည့်နှက်သွားခဲ့၏။

"ဧကရာဇ်လက်နက်... ဒါက တကယ်ပဲ ဧကရာဇ်လက်နက် ဖြစ်နေတာလား"

သူ၏ အကြည့်က သူ့ဆီသို့ ဖြည်းညင်းစွာ လျှောက်လာနေသော ရှီးဟွမ်အပေါ်သို့ ကျရောက်သွားခဲ့သည်။

တစ်ခဏအတွင်း ရှီးဟွမ်တွင် ရုပ်ခန္ဓာကိုယ် မရှိဘဲ ဝိညာဉ်သာ ရှိကြောင်း သူ ကောက်ချက်ချလိုက်လေသည်။

"လှပလိုက်တဲ့ အမျိုးသမီး... ဒါပေမဲ့ ရုပ်ခန္ဓာကိုယ် ဆုံးရှုံးသွားတာတော့ နှမြောစရာပဲ... တကယ့်ကို နှမြောစရာကောင်းတာပဲ"

"ဒါပေမဲ့ ဝိညာဉ်တွေကလည်း နတ်ဘုရားတွေနဲ့ ဆက်သွယ်လို့ ရတာပဲလေ"

အဘိုးအို၏ မျက်နှာပေါ်တွင် ရွံရှာဖွယ် အမူအရာတစ်ခု ပေါ်လာခဲ့ရာ ရှီးဟွမ်၏ အမူအရာကို ချက်ချင်း မည်းမှောင်သွားစေခဲ့၏။

"အဓိပ္ပာယ်မရှိတာ... ကြည့်ရတာ မင်းက ကိုယ့်အခြေအနေကိုယ် မသိသေးဘူး ထင်တယ်"

"ဟွန့်... ဝိညာဉ်ခန္ဓာကိုယ်လေး တစ်ခုက ငါ့ရှေ့မှာ ဘာများ လုပ်နိုင်မှာလဲ"

အဘိုးအိုက ကျောကို မတ်လိုက်ပြီး မဟာသူတော်စင်၏ ချီအငွေ့အသက်က ထွက်ပေါ်လာခဲ့လေသည်။

ကျင့်ကြံခြင်းက သူ၏ အခြေခံအုတ်မြစ်ဖြစ်ပြီး သူ၏ ယုံကြည်မှု အရင်းအမြစ် ဖြစ်ပေ၏။

"မင်းက မင်းရဲ့ အထွတ်အထိပ်ကို မရောက်သေးတာကို မပြောနဲ့... မင်းက ဒဏ်ရာမရဘူးဆိုရင်တောင်မှ လူသားဧကရာဇ်အလံထဲမှာ မင်း ဘာပြဿနာမှ ဖန်တီးလို့ မရဘူး"

"ဧကရာဇ်လက်နက်ရဲ့ ကြောက်စရာကောင်းပုံကို မင်း ဘာမှမသိဘူး"

ရှီးဟွမ်က မြင့်မြတ်သော မိဖုရားတစ်ပါးကဲ့သို့ အဘိုးအိုကို ပုရွက်ဆိတ်တစ်ကောင်အလား အထင်သေးစွာ ငုံ့ကြည့်လိုက်လေသည်။

"မင်းက ရေတွင်းထဲက ဖားတစ်ကောင်ပါပဲ"

ရှီးဟွမ် စကားပြောပြီးသည်နှင့် အဘိုးအိုက ဝိညာဉ်၏ ဆွဲငင်မှုကို ချက်ချင်း ခံစားလိုက်ရပြီး သူ၏ ခန္ဓာကိုယ်ထဲမှ ထွက်ခွာသွားသကဲ့သို့ ခံစားလိုက်ရ၏။

သူက ဟိန်းဟောက်လိုက်သည်။

"ဝိညာဉ်ခန္ဓာကိုယ်လေး တစ်ခုက ငါ့ရှေ့မှာ ဒီလောက်တောင် ရိုင်းစိုင်းရဲတယ်ပေါ့... သေလမ်းကို သွားစမ်း!"

စကားပြောရင်း သူက ရှီးဟွမ်ဆီသို့ တိုက်ရိုက် ပြေးဝင်သွားခဲ့လေသည်။

သို့သော် နောက်တစ်စက္ကန့်တွင် တစ်ခုခု မှားယွင်းနေကြောင်း သူ သတိပြုမိလိုက်၏။

သူ၏ ခန္ဓာကိုယ်က အလွန် ပေါ့ပါးနေပြီး အလွန် ပေါ့ပါးနေသည်ကို ခံစားလိုက်ရသည်။

ခေါင်းလှည့်ကြည့်လိုက်ရာ သူ၏ ခန္ဓာကိုယ်က မဝေးလှသော နေရာတွင် ရပ်တန့်နေပြီး သူ၏ ဝိညာဉ်သာ ပျံသန်းထွက်လာခဲ့ကြောင်း တွေ့ရှိလိုက်ရသဖြင့် သူ ထိတ်လန့်သွားခဲ့ပေသည်။

"ဖိနှိပ်စမ်း!"

ရှီးဟွမ်က စကားတစ်ခွန်းတည်းကိုသာ တည်ငြိမ်စွာ ပြောဆိုလိုက်၏။

လူသားဧကရာဇ်အလံအတွင်းမှ မရေမတွက်နိုင်သော ဖိနှိပ်ခြင်း အက္ခရာများက အဘိုးအို၏ ဝိညာဉ်ဆီသို့ ဟိန်းဟောက်ကာ ပြေးဝင်သွားပြီး သူ့ကို တစ်လက်မမျှပင် မလှုပ်ရှားနိုင်အောင် ဖိနှိပ်ထားလိုက်လေသည်။

"အခုကစပြီး မင်းက လူသားဧကရာဇ်အလံထဲက ဝိညာဉ်ကျွန်တစ်ယောက်ပဲ"

ရှီးဟွမ်က တည်ငြိမ်စွာ ပြောဆိုလိုက်သည်။

အဘိုးအို၏ ဝိညာဉ်ခန္ဓာကိုယ်၏ မျက်လုံးများတွင် ဇဝေဇဝါဖြစ်မှုနှင့် နက်ရှိုင်းသော ကြောက်ရွံ့မှု အရိပ်အယောင်တစ်ခု ပေါ်လာခဲ့၏။

နောက်တစ်စက္ကန့်တွင်... သူ၏ မျက်လုံးများတွင် ကြည်လင်မှု အရိပ်အယောင်မျှ မရှိတော့ချေ။

တန်ခိုးကြီးမားသော မဟာသူတော်စင်သည် သာမန် အစေခံတစ်ဦး ဖြစ်သွားခဲ့လေပြီ။

'ဒေါက်... ဒေါက်... ဒေါက်...'

ချင်လော့က လူသားဧကရာဇ်အလံထဲသို့ ဝင်ရောက်လာပြီး ပတ်ဝန်းကျင်ရှိ မြင်ကွင်းကို ကြည့်ကာ ခံစားချက်ပြင်းပြစွာဖြင့် ပြောဆိုလိုက်၏။

"ထင်တဲ့အတိုင်းပဲ လူသားဧကရာဇ်အလံက အဆင့်မြင့်တာအိုဧကရာဇ်လက်နက်ကို အဆင့်တက်သွားတော့ ကွာခြားသွားတာပဲ"

လူသားဧကရာဇ်အလံအတွင်း ရွှေရောင်အလင်းတန်းများ လင်းလက်သွားပြီး ဝိညာဉ်တိုင်းမှာ ပုံမှန်လူတစ်ဦးနှင့် တူနေခဲ့လေသည်။

အတွေးတစ်ခုနှင့်အတူ ချင်လော့သည် နဂါးဝိညာဉ်မှ ပြောင်းလဲသွားသော ကုလားထိုင်တစ်ခုကို ချင်လော့၏ရှေ့တွင် ပေါ်လာစေခဲ့၏။

သူက နဂါးကုလားထိုင်ပေါ်တွင် ထိုင်လိုက်ပြီး လူသားဧကရာဇ်အလံကို သူ ထိန်းချုပ်ထားရသည်ဟု ခံစားလိုက်ရကာ ဤနေရာရှိ ဧကရာဇ်တစ်ပါးကဲ့သို့ပင် ဖြစ်လေသည်။

"ဒီကို လာခဲ့!"

ချင်လော့က တည်ငြိမ်စွာ ပြောဆိုလိုက်၏။

ချင်လော့၏ရှေ့တွင် လူငါးဦး ပေါ်လာခဲ့သည်။

အမျိုးသား လေးဦးနှင့် အမျိုးသမီး တစ်ဦး ဖြစ်လေသည်။

ရှန်ယဲ့၊ လီချန်နှင့် ရှန်ချင်းရွှမ်တို့ အပြင် အမျိုးသား တစ်ဦးနှင့် အမျိုးသမီး တစ်ဦးတို့မှာ ယခုအခါ ရုပ်တစ်သောင်းမြင့်မြတ်နယ်မြေမှ အသက်ရှင်ကျန်ရစ်သူများ ဖြစ်ပေသည်။

"မင်းတို့က ကံကောင်းသလို ကံလည်းဆိုးကြပါတယ်... ကံကောင်းတာက မင်းတို့ သေရမှာ မဟုတ်ဘူး... အနည်းဆုံးတော့ အဲဒီလောက် အပြီးအပိုင် သေရမှာ မဟုတ်ဘူး"

"ဒါပေမဲ့ ကံဆိုးတာက အနာဂတ်မှာ မင်းတို့ရဲ့ မိသားစု တစ်ခုလုံးကို သုတ်သင်ခဲ့တဲ့ ရန်သူဖြစ်တဲ့ ငါ့အတွက် မင်းတို့က တိုက်ပွဲဝင်ပေးရလိမ့်မယ်"

လူသားဧကရာဇ်အလံသည် ဝိညာဉ်ထိန်းချုပ်ရေး ရတနာတစ်ခုဖြစ်ပြီး ယခုအခါ အဆင့်မြင့်တာအိုဧကရာဇ်လက်နက်အဖြစ် အဆင့်တက်သွားခဲ့ပြီ ဖြစ်လေသည်။

လူသားဧကရာဇ်အလံအတွင်းရှိ လူများနှင့် ဝိညာဉ်များအားလုံးသည် လူသားဧကရာဇ်အလံ၏ သက်ရောက်မှုကို ခံရမည်ဖြစ်ပြီး သူတို့၏ ကျင့်ကြံမှုက မဟာသူတော်စင်အဆင့်ကို ကျော်လွန်မှသာလျှင် လူသားဧကရာဇ်အလံမှ လွတ်မြောက်နိုင်မည် ဖြစ်ပေ၏။

သူတို့ထဲမှ မည်သူကမျှ မလုပ်နိုင်ကြောင်း ထင်ရှားပြီး သူတို့ သေဆုံးရန်ပင် မဖြစ်နိုင်ချေ။

"ချင်လော့!"

လီချန်သည် ချင်လော့ကို သုံးကြိမ်မြောက် မြင်တွေ့ခဲ့ခြင်း ဖြစ်လေသည်။

ပထမအကြိမ်မှာ လင်းရွှမ် ဒုက္ခိတဖြစ်သွားချိန်ကဖြစ်ပြီး ဒုတိယအကြိမ်မှာ ဝိညာဉ်နယ်မြေ၏ အပြင်ဘက်နှင့် ရှန်ချင်းယန် သေဆုံးမှုအတွက် ဝိညာဉ်နယ်မြေ၏ အပြင်ဘက်တွင် ဖြစ်ကာ တတိယအကြိမ်မှာ ရုပ်တစ်သောင်းမြင့်မြတ်နယ်မြေ ပျက်စီးသွားချိန်တွင် ဖြစ်ပေသည်။

သူက အံကြိတ်ကာ ချင်လော့ကို ကြည့်ပြီး မေးမြန်းလိုက်၏။

"ချင်လော့... သူတော်စင်မလေးကို မင်း သတ်ခဲ့တာလား"

လီရှောင်က ရှန်ချင်းယန်ကို သတ်ဖြတ်မှုမှာ သံသယများစွာ ရှိနေပြီး ချန်းလန်မြင့်မြတ်နယ်မြေ၏ သူတော်စင်ဖြစ်သော လင်းဟောက်သည်လည်း ရှန်ချင်းယန်၏ အားပေးသူ တစ်ဦးဖြစ်ရာ သူ၏ စကားများက သဘာဝကျကျ ယုံကြည်နိုင်ဖွယ် ရှိသော်လည်း သူတို့က လီရှောင်ကို မဖမ်းမိသေးဘဲ နောက်ဆုံးရလဒ်က ဘာဖြစ်မည်ကို သေချာ မသိရသေးချေ။

"လူသတ်သမားက အမြဲတမ်း လူသတ်တာ ခံရတာပါပဲ"

ချင်လော့က တည်ငြိမ်စွာ ပြောဆိုလိုက်၏။

ဤသည်ကို ကြားချိန်၌ ရှန်ယဲ့မှာ ချက်ချင်း ဒေါသထွက်သွားပြီး သူ၏ မျက်လုံးများ နီရဲလာကာ ချင်လော့ကို ရက်စက်သော အမူအရာဖြင့် ကြည့်လိုက်လေသည်။

"ချင်လော့!... မင်းကို ချင်းယန်နဲ့ အတူတူ သေစေချင်တယ်!"

'ဘုန်း!'

သူက ဒေါသတကြီးဖြင့် ချင်လော့ကို သတ်ချင်ခဲ့သော်လည်း ထိုအတွေးများ ပြီးနောက် သူ အနည်းငယ်မျှပင် မလှုပ်ရှားနိုင်ခဲ့ချေ။

ချင်လော့က ထိုအဖွဲ့ကို ကြည့်ကာ ခေါင်းခါယမ်းလိုက်သည်။

"အားလုံးပဲ... မင်းတို့က လူသားဧကရာဇ်အလံမှာ ရှိနေတာလေ... လူသားဧကရာဇ်အလံဆိုတာ ဘာလဲ... ဒါက အဆင့်မြင့်တာအိုဧကရာဇ်လက်နက်ပဲ"

"မင်းတို့လို ကောင်လေးတွေကို လက်တစ်ချက် ဝှေ့ယမ်းရုံနဲ့ ငါ သုတ်သင်ပစ်နိုင်တယ်"

ချင်လော့၏ လက်တစ်ချက် ဝှေ့ယမ်းလိုက်မှုနှင့်အတူ လူအနည်းငယ်၏ ဝိညာဉ်များက ချက်ချင်း ကွာကျလာပြီး ဖိနှိပ်ခံလိုက်ရလေသည်။

တစ်ခဏအတွင်း ကံကြမ္မာသားတော်သည် ဝိညာဉ်ပင် မကျန်ရစ်ဘဲ သုတ်သင်ခံလိုက်ရပြီး ကံကြမ္မာသားတော် အသက်ပြန်ရှင်လာနိုင်မည့် ဖြစ်နိုင်ခြေအားလုံးကို ဖြတ်တောက်လိုက်ခြင်းပင်။

[သတ်ဖြတ်လိုသော ရည်ရွယ်ချက်ရှိသည့် ကံကြမ္မာသားတော် ရှန်ချင်းရွှမ်ကို တိုက်ခိုက်ပြီး ကံကြမ္မာတန်ဖိုး အမှတ် ၁၀၀,၀၀၀ ရရှိပါသည်... ထိုတန်ဖိုးများသည် ဗီလိန်အမှတ်များအဖြစ် အလိုအလျောက် ပြောင်းလဲသွားပါမည်]

[အဆင့်မြင့်တာအိုဧကရာဇ်လက်နက် အဆင့်တက်ခြင်း ပြီးဆုံးသွားပြီး ကံကြမ္မာသားတော် နှစ်ဦးကို သတ်ဖြတ်လိုက်သည့်အတွက် သုံးဆ ပျော်ရွှင်မှု ရရှိပါသည်]

[ဆုချီးမြှင့်မှု ရရှိပါသည် - ဝိညာဉ်သလင်းကျောက် * ၁]

[ဆယ်ရာခိုင်နှုန်း လျှော့စျေး ရရှိပါသည်]

[လျှို့ဝှက်ပညာ - နတ်ဘုရားအဆင့် (သွေးဝိညာဉ်ရုပ်သေးကြိုးဆွဲပညာ)]

[လူသားဧကရာဇ်အလံမှ သင်ယူရရှိသော ဝိညာဉ်လျှို့ဝှက်ပညာတစ်ခုဖြစ်ပြီး ရုပ်သေးကို အပြည့်အဝ ထိန်းချုပ်နိုင်ရန် အသုံးပြုနိုင်ပါသည်... ရုပ်သေးသည် အပြည့်အဝ တိုက်ခိုက်ရေးစွမ်းအားကို ပိုင်ဆိုင်နိုင်ပြီး ကြီးထွားလာနိုင်သော အလားအလာ ရှိကာ ပစ္စည်းများ ပေါင်းထည့်ခြင်းဖြင့် အဆင့်မြှင့်တင်နိုင်ပြီး လူနှင့် တူရိယာ နှစ်မျိုးလုံး ဖြစ်ပါသည်]

[လဲလှယ်ရန် ဈေးနှုန်း - ဗီလိန်အမှတ် ၂၀၀,၀၀၀]

ချင်လော့ အံ့အားသင့်သွားပြီးနောက် ပြုံးလိုက်၏။

"လစ်လပ်နေတဲ့ စစ်သား‌တွေက

ဒီမှာ ရှိနေတာ မဟုတ်လား... ဒါ့အပြင် အခု ငါက လစာမပေးဘဲ ပေါ်ပေါ်တင်တင် ခိုင်းလို့ရပြီ"

"ကျွတ်ကျွတ်... စစ်ဘုရင် တစ်ယောက်ဖြစ်လာပြီး လစာမပေးရဘဲ နေရတာ မဆိုးပါဘူး”