အခန်း ၃၅၈

အခန်း (၃၅၈) လွတ်လပ်သော ကျင့်ကြံသူနှစ်ယောက်၏ ဖြောင့်မတ်ခြင်း

"ဒီစခန်းထဲမှာ သတ္တမအဆင့် ဘုရင်အဆင့်လုပ်ကြံသူတစ်ယောက် ရှိနေတာပဲ..."

ကျောက်လင်သည် စားသောက်ဆိုင်အနီးရှိ လမ်းကြားတစ်ခုသို့ ဆင်းသက်လိုက်ပြီး သူမ၏ စိတ်စွမ်းအားကို အသုံးပြုကာ စားသောက်ဆိုင်၏ မြေအောက်ခန်းထဲတွင် သတ္တမအဆင့် ပညာရှင်တစ်ဦး အမှန်တကယ် ရှိနေကြောင်းသိရှိသွား၏။

သို့သော်လည်း ကျောက်လင်က ထိုအခြင်းအရာကို နားလည်နိုင်ပေသည်။

လက်ရှိအချိန်တွင် ဖုန်းလန်မြို့၌ မိစ္ဆာဂိုဏ်းသားများဖြင့် ပြည့်နှက်နေ၏။

ဝမ့်ရှန်းလုံအနေဖြင့် ဆဋ္ဌမအဆင့် ကောင်းကင်အဆင့် လုပ်ကြံသူ အနည်းငယ်မျှဖြင့် လုပ်ကြံမှုတာဝန်များကို လက်ခံရန် ဝံ့လိမ့်မည် မဟုတ်ပေ။ ထို့ပြင် ထိုကောင်းကင်အဆင့် လုပ်ကြံသူများသည် အပြင်ထွက်၍ လှုပ်ရှားရန်လည်း ဝံ့ကြမည် မဟုတ်ပါချေ။ အဘယ်ကြောင့်ဆိုသော် သတ္တမအဆင့် ကျင့်ကြံသူများနှင့် အလွယ်တကူ ဆုံတွေ့သွားနိုင်သောကြောင့် ဖြစ်သည်။

"ဒီဝမ့်ရှန်းလုံ လုပ်ကြံသူအဖွဲ့အစည်းက ဘယ်လောက်တောင် ကြာကြာ လည်ပတ်နေခဲ့တာလဲ... အခြေခံအားဖြင့် ခရိုင်နဲ့ ပြည်နယ်မြို့တော်တိုင်းမှာ စခန်းတစ်ခုနဲ့ လုပ်ကြံသူအဖွဲ့အစည်းတစ်ခု ရှိနေတာပဲ..."

"ဒါဆိုရင် ကျင့်ကြံသူ အရေအတွက် ဘယ်လောက်တောင် လိုအပ်မှာလဲ..."

ကျောက်လင်က မိမိကိုယ်မိမိ ခပ်တိုးတိုး ပြန်လည်ရေရွတ်လိုက်မိ၏။

မဟာချင်မင်းဆက်တွင် စီရင်စု တစ်ဆယ့်ရှစ်ခုရှိပြီး စီရင်စုတစ်ခုစီ၌ ပျမ်းမျှအားဖြင့် ခရိုင် (၂၀)စီ ရှိနေလျှင် စခန်းများနှင့် လုပ်ကြံသူ အခြေစိုက်စခန်း ပေါင်း (၃၆၀) ရှိပေလိမ့်မည်။

အခြေစိုက်စခန်းတစ်ခုစီတွင် ကောင်းကင်အဆင့် လုပ်ကြံသူ နှစ်ဦးစီရှိနေပါက အနည်းဆုံး ကောင်းကင်အဆင့် လုပ်ကြံသူ (၇၂၀) သို့မဟုတ် ပေါင်းစည်းခြင်းနယ်ပယ် ကျင့်ကြံသူ (၇၂၀)ရှိနေသည်ဟု ဆိုလိုခြင်းဖြစ်သည်။

ကျောက်လင်မှာ ရင်ထဲတွင် အလွန်တရာ တုန်လှုပ်သွားရ၏။ ဝမ့်ရှန်းလုံ၏ ကွန်ရက်က အလွန်ကျယ်ပြန့်လွန်းလှပြီး ၎င်းတို့၏ အရှိန်အဝါကလည်း ကြီးမားလှပေသည်။

"ဒါပေမဲ့ ဝမ့်ရှန်းလုံက ဘယ်လောက်ပဲ အင်အားကြီးကြီး ငါ့မျက်စိထဲမှာတော့ ငါ့ရဲ့ ငွေထုတ်စက်သက်သက်ပဲ..."

ကျောက်လင်က ခပ်ဖွဖွ ပြုံးလိုက်၏။

လက်ရှိတွင် ကျောက်လင်၏ စိတ်စွမ်းအား ထောက်လှမ်းနိုင်သည့် အကွာအဝေးမှာ မီတာ သုံးရာအထိ ရှိနေပြီ ဖြစ်သည်။ သူမသည် စားသောက်ဆိုင်ကို အမြဲမပြတ် ထောက်လှမ်းနေပြီး လှုပ်ရှားမှုအားလုံးကို အမိအရ ဖမ်းဆွဲထား၏။

"အဲ့ဒီမြေအောက်ခန်းထဲမှာ ငွေစက္ကူတွေအပြင် ငွေပြားတစ်သိန်းတောင် ရှိနေတာပဲ..."

"နှမြောစရာကောင်းတာက အဲ့ဒီဘုရင်အဆင့်လုပ်ကြံသူက မြေအောက်ခန်းထဲမှာ မလှုပ်မယှက် ရှိနေတာပဲ..."

"ငွေစက္ကူတွေနဲ့ ငွေသားတွေကို ယူချင်ရင်တော့ အဲ့ဒီဘုရင်အဆင့်လုပ်ကြံသူနဲ့ ထိပ်တိုက်ရင်ဆိုင်ရမှာပဲ..."

ကျောက်လင်သည် မိမိ၏ စိတ်စွမ်းအားဖြင့် အခြေအနေကို ထောက်လှမ်းနေရင်း ထိုငွေစက္ကူများနှင့် ငွေသားများကို မည်သို့ ခိုးယူရမည်နည်းဟုလည်း စဉ်းစားနေမိ၏။

ထိပ်တိုက် ရင်ဆိုင်ရမည်လော။

ကျောက်လင်တွင် သွေးဓားနှင့် ပျံလွှားကျားရဲအရှင်ကို သတ်ဖြတ်ခဲ့သည့် ပျက်စီးခြင်းဓားအဆောင်ရှိနေသဖြင့် သတ္တမအဆင့် ကျင့်ကြံသူတစ်ဦးကို ထိပ်တိုက် သတ်ဖြတ်နိုင်သည်မှာ အမှန်ပင်ဖြစ်၏။

သို့သော်လည်း ကျောက်လင်က သူ၏ ဝှက်ဖဲများကို အလွယ်တကူ မချပြလိုသကဲ့သို့ ဝမ့်ရှန်းလုံက သူ့အား စောစီးစွာ သတိပြုမိသွားမည်ကိုလည်း မလိုလားပေ။

ကျောက်လင်က ကျားကို တောင်ပေါ်မှ မျှားထုတ်ရန်အတွက် ကြွက်လေးကို လွှတ်ရမလားဟု အခွင့်အရေး ချင့်ချိန်နေစဉ်မှာပင် ကောင်းကင်ယံထက်မှ လူရိပ်နှစ်ခု ပျံသန်းဝင်ရောက်လာ၏။

၎င်းတို့က အမှန်တကယ်ပင် သတ္တမအဆင့် ကျင့်ကြံသူနှစ်ဦး ဖြစ်ကြသည်။

"လွတ်လပ်သော ကျင့်ကြံသူတွေလား..."

ကျောက်လင်သည် လေထုထဲရှိ ချီစွမ်းအင်များကို သူ၏ စိတ်စွမ်းအားဖြင့် ခံစားမိလိုက်ပြီးနောက် ခန့်မှန်းတွေးတောလိုက်၏။

နိုင်ငံစစ်ပွဲ ဖြစ်ပွားနေသည့် ကာလအတွင်း နေရာအနှံ့အပြားမှ လွတ်လပ်သော ကျင့်ကြံသူများနှင့် လှည့်လည်သွားလာသူများသည် အခွင့်အရေးတစ်ရပ်ကို မြင်တွေ့ခဲ့ကြသည်။ ၎င်းတို့အဖို့ တရားဝင် လမ်းစဉ်များမှတစ်ဆင့် ကျင့်ကြံခြင်း အရင်းအမြစ်များကို ရရှိရန် အလွန်တရာ ခက်ခဲလှပေသည်။

သို့သော် စစ်ပွဲကာလအတွင်း လုယက်မှုများကိုမူ နိုင်ငံတော်အနေဖြင့် ဂရုမစိုက်နိုင်သကဲ့သို့ ဂရုလည်း မစိုက်တော့ပေ။

စစ်တပ်စုစည်းခြင်းအမိန့် ထုတ်ပြန်ပြီးကတည်းက မဟာချင်မင်းဆက်အတွင်းရှိ လွတ်လပ်သော ကျင့်ကြံသူများနှင့် လှည့်လည်သွားလာသူများ၏ ထက်ဝက်ခန့်သည် ကောင်းဖန်တိုင်းပြည်၏ ကျင့်ကြံခြင်း အရင်းအမြစ်များကို လုယူရန်အတွက် အပြေးအလွှား ရောက်ရှိလာခဲ့ကြခြင်း ဖြစ်သည်။

ယခု ပျံသန်းလာသော လူနှစ်ဦးမှာ ထိုလွတ်လပ်သော ကျင့်ကြံသူနှစ်ဦးပင် ဖြစ်၏။

"အစ်ကိုချူ... ဒါက ဝမ့်ရှန်းလုံရဲ့ အခြေစိုက်စခန်းပဲ... ငါစုံစမ်းထားရသလောက်တော့ ဒီမှာ တာဝန်ကျတဲ့ ဘုရင်အဆင့်လုပ်ကြံသူ တစ်ယောက်ပဲရှိတယ်..."

"ငါတို့နှစ်ယောက် ပူးပေါင်းမယ်ဆိုရင် ဒီစခန်းကို အမြစ်ပြတ် ရှင်းလင်းပစ်လို့ရတယ်..."

"အထဲက အဖိုးတန်ပစ္စည်းတွေကို ငါတို့အညီအမျှ ခွဲကြတာပေါ့..."

၎င်းတို့ထဲမှ တစ်ယောက်က အေးစက်စွာ ပြောလိုက်၏။

"ရတာပေါ့... ငါတို့တွေ တစ်ဒါဇင်ကျော်လောက် ပူးပေါင်းခဲ့ပြီးပြီပဲ... သတ္တမအဆင့် မြေကမ္ဘာနတ်ဆိုးနယ်ပယ်ကို ချိုးဖျက်နိုင်ဖို့ တစ်ယောက်ကိုတစ်ယောက် တစ်လမ်းလုံး ကူညီလာခဲ့တာ..."

"အခု ဖုန်းလန်မြို့မှာ ကျင့်ကြံသူတွေနဲ့ ပြည့်နှက်နေတာ... သတ္တမအဆင့်နဲ့ အဋ္ဌမအဆင့် ကျင့်ကြံသူတွေ အများကြီးရှိသလို ရှေးဟောင်းသိုင်းပညာရှင် မိသားစုတွေလည်း ထွက်ပေါ်လာကြပြီ..."

"ငါတို့နှစ်ယောက်သာ ဝမ့်ရှန်းလုံက လုပ်ကြံသူတွေကို သတ်ပစ်လိုက်ရင် ဝမ့်ရှန်းလုံကလူတွေ တရားခံအစစ်ကို ရှာဖွေနိုင်မှာ မဟုတ်ဘူး... ပြီးရင် ငါတို့ တောနက်ထဲကို ထွက်ပြေးပုန်းအောင်းလို့ရတယ်..."

အခြားတစ်ယောက်က သဘောတူလိုက်၏။

ဤလွတ်လပ်သော ကျင့်ကြံသူနှစ်ဦးသည် မဟာချင်စစ်တပ်က မဟာလီမင်းဆက်ကို ဖြုတ်ချစဉ်အတွင်း အကြိမ်ကြိမ် ပူးပေါင်းကာ ကျင့်ကြံခြင်း အရင်းအမြစ်မြောက်မြားစွာကို လုယူခဲ့ကြသဖြင့် သတ္တမအဆင့် နယ်ပယ်သို့ ချိုးဖျက် ရောက်ရှိနိုင်ခဲ့ခြင်းဖြစ်သည်။

ယခုအခါ ၎င်းတို့နှစ်ဦးသည် မဟာချင်မင်းဆက်နှင့် ကောင်းဖန်တိုင်းပြည်တို့အကြား စစ်ပွဲအတွင်း အခွင့်အရေးကို မြင်တွေ့ခဲ့ရသဖြင့် ဖုန်းလန်မြို့သို့ ရောက်ရှိလာခဲ့ကြသည်။

၎င်းတို့ထဲမှ တစ်ဦးသည် ဝမ့်ရှန်းလုံ၏ စခန်းကို ရှာဖွေတွေ့ရှိခဲ့ပြီး သုံးရက်တိုင်တိုင် တိတ်တဆိတ် စောင့်ကြည့်ခဲ့သည်။ ထိုစခန်းတွင် သတ္တမအဆင့် နယ်ပယ်ရှိ လုပ်ကြံသူတစ်ဦးသာ ရှိကြောင်း အတည်ပြုပြီးနောက် ဘေးကင်းစိတ်ချရစေရန်အတွက် သူ၏ အဖော်ကို ဖိတ်ခေါ်ခဲ့ခြင်း ဖြစ်၏။

ထိုလူနှစ်ဦးသည် စားသောက်ဆိုင်၏ အမိုးပေါ်သို့ ဆင်းသက်လိုက်ပြီး ၎င်းတို့၏ လက်နက်များကို ဆွဲထုတ်ကာ တစ်ချက်တည်းဖြင့် စားသောက်ဆိုင်တစ်ခုလုံးကို ဖျက်ဆီးပစ်ရန် ပြင်ဆင်လိုက်ကြသည်။

ဝှစ်... ရုတ်တရက်ပင် ဟင်းလင်းပြင်ထဲ၌ လူရိပ်တစ်ခု ထွက်ပေါ်လာ၏။

မြေအောက်ခန်းထဲ၌ စောင့်ကြပ်နေသော ဘုရင်အဆင့်လုပ်ကြံသူသည် လွတ်လပ်သော ကျင့်ကြံသူနှစ်ဦး ရောက်ရှိလာခြင်းကို ပထမဆုံး သိရှိသွားသူ ဖြစ်သည်။ သူသည် ရုတ်တရက် လျှပ်စီးပမာ လှုပ်ရှားလိုက်ပြီး ထိုကျင့်ကြံသူနှစ်ဦး၏ ရှေ့၌ ပိတ်ရပ်လိုက်၏။

"မင်းတို့က ဘယ်လိုသတ္တိမျိုးနဲ့ ဝမ့်ရှန်းလုံရဲ့ ပိုင်ဆိုင်မှုကို လက်ဖျားနဲ့တောင် တို့ဝံ့ရတာလဲ..."

မျက်နှာဖုံးတပ်ဆင်ထားပြီး လုပ်ကြံသူဓားကို ကိုင်ဆောင်ထားသော ဘုရင်အဆင့်လုပ်ကြံသူက ဓားဦးကို လွတ်လပ်သော ကျင့်ကြံသူနှစ်ဦးထံသို့ ချိန်ရွယ်လိုက်၏။

"သတ်..."

ဘုရင်အဆင့်လုပ်ကြံသူ ထွက်ပေါ်လာသည်ကို မြင်လိုက်ရသောအခါ လွတ်လပ်သော ကျင့်ကြံသူနှစ်ဦးသည် တပြိုင်နက်တည်း အော်ဟစ်လိုက်ကြပြီး တိုက်ခိုက်မှုများကို စတင်လိုက်ကြတော့သည်။

"မိုက်မဲတဲ့ အကောင်တွေ... တကယ့်ကို မောက်မာလွန်းတာပဲ..."

ဘုရင်အဆင့်လုပ်ကြံသူက လလှောင်ပြုံးပြုံးလိုက်ပြီးနောက် သူ၏ ခန္ဓာကိုယ်မှာ ချက်ချင်းပင် ပျောက်ကွယ်သွား၏။

သူသည် အမှောင်ထုထဲတွင် ပုန်းကွယ်သွားသည့်နှယ်ဖြစ်၏။

လွတ်လပ်သော ကျင့်ကြံသူနှစ်ဦး၏ တိုက်ခိုက်မှုများသည် ဟင်းလင်းပြင်တစ်ခုလုံးကို လွှမ်းခြုံသွားသော်လည်း ဘုရင်အဆင့်လုပ်ကြံသူကိုမူ အပြင်သို့ မျှားမထုတ်နိုင်ခဲ့ကြပေ။

ထို့နောက် နောက်တစ်စက္ကန့်တွင် ဘုရင်အဆင့်လုပ်ကြံသူသည် ကျင့်ကြံသူတစ်ဦး၏ နောက်ကျောဘက်၌ ရုတ်တရက် ထွက်ပေါ်လာပြီး ဓားဖြင့် တစ်ချက်တည်း ထိုးဖောက်လိုက်၏။ ဝိညာဉ်စွမ်းအင်များ ပေါက်ကွဲထွက်သွားသည်နှင့်အတူ ထိုလွတ်လပ်သော ကျင့်ကြံသူ၏ ရုပ်ခန္ဓာမှာ တစ်စစီ ပေါက်ကွဲသွားရတော့သည်။

"မကောင်းတော့ဘူး..."

ကျန်ရှိနေသော လွတ်လပ်သော ကျင့်ကြံသူသည် ဘုရင်အဆင့်လုပ်ကြံသူ၏ ကြောက်မက်ဖွယ်ကောင်းမှုကို ခံစားမိလိုက်ပြီးနောက် ထွက်ပြေးရန် ကြိုးပမ်းလိုက်၏။

"မင်းက ထွက်ပြေးနိုင်မယ်လို့ ထင်နေတာလား..."

ဘုရင်အဆင့်လုပ်ကြံသူက လွတ်လပ်သော ကျင့်ကြံသူ၏ အတွေးကို ရိပ်မိသွားပြီးနောက် လှောင်ပြောင်ရယ်မောလိုက်၏။

လွတ်လပ်သော ကျင့်ကြံသူမှာ မီတာ ၁၀ ပင် မပျံသန်းရသေးမီ ဘုရင်အဆင့်လုပ်ကြံသူက သူ၏ နောက်ကျော၌ ဆန်းကြယ်စွာ ပြန်လည်ထွက်ပေါ်လာပြီး လုပ်ကြံသူဓားဖြင့် ခန္ဓာကိုယ်ကို ထပ်မံ ထိုးဖောက်လိုက်ပြန်သည်။ ထိုလွတ်လပ်သော ကျင့်ကြံသူ၏ ခန္ဓာကိုယ်မှာလည်း ထပ်မံ ပေါက်ကွဲသွားရပြန်၏။

"အခုတလော ဖုန်းလန်မြို့မှာ လွတ်လပ်သော ကျင့်ကြံသူတွေနဲ့ လှည့်လည်သွားလာသူတွေ အများကြီး ရှိနေတာ... ငါတစ်ယောက်တည်းနဲ့တော့ ဒီစခန်းကို ထိန်းထားဖို့ ခက်ခဲလိမ့်မယ်..."

"ဌာနချုပ်က စေလွှတ်လိုက်တဲ့ အင်ပါယာအဆင့်လုပ်ကြံသူလည်း မကြာခင် ရောက်လာတော့မှာပဲ..."

ဘုရင်အဆင့်လုပ်ကြံသူက တည်ငြိမ်စွာ ရေရွတ်လိုက်ပြီးနောက် စားသောက်ဆိုင်ထဲသို့ ခုန်ဝင်သွား၏။

ခဏအကြာတွင် ဘုရင်အဆင့်လုပ်ကြံသူသည် မြေအောက်ခန်းထဲသို့ ထပ်မံ ဝင်ရောက်သွားသည်။

"အား..."

ဘုရင်အဆင့်လုပ်ကြံသူသည် ဝင်ရောက်သွားပြီးနောက် ဗလာကျင်းနေသော အခန်းကို မြင်လိုက်ရသဖြင့် မှင်တက်သွားရ၏။

ထို့နောက် ဘုရင်အဆင့်လုပ်ကြံသူသည် မြေအောက်လမ်းကြောင်းတစ်ခုကို သတိပြုမိသွား၏။

"အကောင်စုတ်... ငါ လွတ်လပ်သော ကျင့်ကြံသူနှစ်ယောက်ကို သတ်နေတဲ့အချိန်မှာ တစ်ယောက်ယောက်က စခန်းထဲက အဖိုးတန်ပစ္စည်းအားလုံးကို ခိုးသွားတာပဲ..."

ဘုရင်အဆင့်လုပ်ကြံသူမှာ ဒေါသတကြီး ဖြစ်သွားရသည်။

ချက်ချင်းပင် ဘုရင်အဆင့်လုပ်ကြံသူက မြေအောက်ဂူလမ်းကြောင်းထဲသို့ ခုန်ဝင်ကာ လိုက်လံဖမ်းဆီးတော့၏။

မီတာ (၃၀၀ )ခန့် ပျံသန်းပြီးနောက် ဘုရင်အဆင့်လုပ်ကြံသူသည် လမ်းကြားတစ်ခုမှ ထွက်လာသော်လည်း သူ၏ စိတ်စွမ်းအား ထောက်လှမ်းမှုအတွင်း မည်သည့် ထူးခြားမှုကိုမျှ မတွေ့ရှိရတော့ပေ။

"ထွက်ပြေးသွားတာလား..."

"ဒီလူက ဘယ်သူလဲ... အချိန်တိုလေးအတွင်းမှာ ဒီလိုဥမင်လိုဏ်ခေါင်းကို ဘယ်လိုတူးလိုက်တာလဲ... ငွေတွေကိုလည်း ဒီလောက်မြန်မြန် သယ်သွားပြီး အရိပ်အယောင်တောင် မကျန်အောင် ထွက်ပြေးသွားနိုင်တာ..."

ဘုရင်အဆင့်လုပ်ကြံသူမှာ မည်သို့မျှ စဉ်းစားမရဘဲ လေးနက်စွာ တွေးတောနေမိတော့၏။

ထိုအချိန်တွင် ကျောက်လင်မှာမူ ကောင်းကင်ယံထက်တွင် မောင်းသူမဲ့ယာဉ်တစ်စင်းကို စီးနင်းကာ ရောက်ရှိနေပြီ ဖြစ်သည်။

"လွတ်လပ်သော ကျင့်ကြံသူနှစ်ယောက်ရဲ့ ရက်ရောမှုအတွက် ကျေးဇူးတင်ရမှာပဲ... ငါက ကျားကို တောင်ပေါ်က မျှားထုတ်ဖို့ စဉ်းစားနေတုန်း ရှိသေးတယ်... ဒီကျင့်ကြံသူနှစ်ယောက် ရောက်လာပြီး အဲ့ဒီဘုရင်အဆင့်လုပ်ကြံသူကို မျှားထုတ်ပေးသွားတာပဲ..."

"ငွေပြာ တစ်သိန်းကိုတော့ အရင်ဆုံး စနစ်အမှတ်တွေအနေနဲ့ လဲလှယ်လိုက်မယ်... ကျန်တဲ့ ငွေပြား နှစ်သန်းတန် ငွေစက္ကူတွေကိုတော့ တာ့ချန်ငွေလဲဌာနမှာ လဲလှယ်ဖို့ တခြားအခွင့်အရေး ရှာရမှာပဲ..."

ကျောက်လင်က ပျော်ရွှင်စွာ ပြောလိုက်၏။

ချက်ချင်းပင် ကျောက်လင်က မောင်းသူမဲ့ယာဉ်ကို ထိန်းချုပ်ကာ ဖုန်းလန်မြို့အပြင်ဘက်သို့ ပျံသန်းခဲ့ပြီး ဟေးဟူတောင်ဆီသို့ ဦးတည်လိုက်တော့သည်။

နေ့ခင်းဘက်တွင် ကျောက်လင်သည် ထောက်လှမ်းရန်အတွက် မောင်းသူမဲ့ယာဉ်ကို အနိမ့်ပျံသန်းရန် မဝံ့သော်လည်း အမှောင်ထုထဲတွင်မူ ထိုတစ္ဆေပမာ မောင်းသူမဲ့ယာဉ်က အကောင်းဆုံး ကာကွယ်မှု ဖြစ်ပေသည်။

ကောင်းဖန်စစ်တပ်ကို မရင်ဆိုင်မီ ကျောက်လင်အနေဖြင့် အချို့သော ထောက်လှမ်းမှုများကို လုပ်ဆောင်ရန် လိုအပ်နေသေး၏။