အခန်း ၄၄၈

အခန်း(၄၄၈)

မိုက်ကယ်က မျက်နှာပြင်ပေါ်က ပထမဆုံး စနစ်မြှင့်တင်မှုဖြစ်တဲ့ အမြင်အာရုံစနစ်ကို အရင်ကြည့်လိုက်တယ်။

[ကင်မရာ] ရွေးချယ်စရာအတွက် သူ ဝယ်နိုင်တဲ့ မြှင့်တင်မှုက တစ်ခုပဲ ရှိနေတာပါ။

သူ ဒီရွေးချယ်စရာကို နှိပ်လိုက်တာနဲ့ သရီးဒီဒရုန်းရဲ့ တည်ဆောက်ပုံက အစိတ်အပိုင်းအသစ်တစ်ခုကို ပြောင်းလဲပြသလာတယ်။ စက်ဝိုင်းခြမ်းရဲ့ အပေါ်ပိုင်းက ဒရုန်းရဲ့ အထက်နားမှာ ရှိနေပြီး အောက်ပိုင်းကတော့ သူ့ရဲ့ ဝမ်းဗိုက်အောက်ခြေမှာ ရှိနေတာ ဖြစ်ပါတယ်။

ဒါက သူ့ရဲ့ အရင်ဘဝတုန်းက သိပ်ပြီး ခေတ်စားခဲ့တဲ့ ၃၆၀ ဒီဂရီမြင်ကွင်း ကင်မရာတွေကို ပြန်သတိရသွားစေတယ်။

[ဒရုန်း အမြင်အာရုံ - ဒီမြှင့်တင်မှုက သင့်ကို ဒရုန်းရဲ့ လုပ်ဆောင်ချက်အသစ်တစ်ခုဆီ အသုံးပြုခွင့်ပေးမှာ ဖြစ်ပါတယ်။ သူ့ရဲ့ ကိုယ်ထည်မှာ တပ်ဆင်ထားတဲ့ ကင်မရာကနေတစ်ဆင့် ဒရုန်းရဲ့ အမြင်အတိုင်း မြင်တွေ့နိုင်မှာဖြစ်ပြီး အခြေခံအားဖြင့်တော့ ပထမလူမြင်ကွင်းကနေ ထိန်းချုပ်နိုင်မှာ ဖြစ်ပါတယ်]

[ကုန်ကျစရိတ် - ဝိညာဉ်ဆီ ၁ စက်]

သူ့ရဲ့ အဆင့်မြင့်စွမ်းရည်ကြောင့် ဒရုန်းကို သူ စိတ်ကြိုက် ထိန်းချုပ်နိုင်တယ်ဆိုပေမဲ့ အဓိကကတော့ သူ့ရဲ့ ကိုယ်ပိုင်အမြင်အာရုံကနေ မြင်ရတဲ့ အတိုင်းအတာလောက်ပဲ ကန့်သတ်ချက် ရှိနေတာပါ။

ဆိုလိုတာက သူ ဘာမှ မမြင်ရတဲ့ နေရာမျိုးဆီ ဒရုန်းကို မောင်းနှင်သွားမယ်ဆိုရင် သူ့ရဲ့ ဒရုန်းအပေါ် ထိန်းချုပ်နိုင်စွမ်းက ဘာမှ အသုံးမဝင်တော့ဘဲ စိတ်တိုင်းကျ ရွှေ့ပြောင်းနိုင်မှာ မဟုတ်တော့ပါဘူး။

ဒါပေမဲ့ ဒီကင်မရာ လုပ်ဆောင်ချက်အသစ်နဲ့ဆိုရင်တော့ သူက ဒရုန်းတစ်စင်းရဲ့ အမြင်ကနေတစ်ဆင့် ကမ္ဘာကြီးကို မြင်နိုင်တော့မှာ ဖြစ်တယ်။

"နိုဗာ... ဒီကင်မရာက စွမ်းရည်တွေကို ဖြတ်ကျော်ပြီး အလုပ်လုပ်နိုင်ပါ့မလား"

[လုပ်နိုင်ပါတယ်... သင့်ရဲ့ စွမ်းရည်က ပြိုင်ဘက်ရဲ့ စွမ်းရည်ထက် ပိုမိုအားကောင်းနေသရွေ့ အခြား စွမ်းရည်တစ်ခုခုရဲ့ နှောင့်ယှက်တာ ဒါမှမဟုတ် ပြုပြင်မွမ်းမံတာမျိုးတွေ ရှိနေရင်တောင် ဒရုန်းရဲ့ လုပ်ဆောင်ချက် မှန်သမျှဟာ ပုံမှန်အတိုင်း အလုပ်လုပ်နေမှာ ဖြစ်ပါတယ်]

အခုတော့ ဒါက မိုက်ကယ် ချက်ချင်း လိုအပ်နေတဲ့အရာဆိုတာ သူ သိလိုက်ပြီ။ သူက တခြား မက်ဂ်နက်တစ် အများကြီးနဲ့ မတွေ့ရသေးပေမဲ့ တချို့လူတွေရဲ့ စွမ်းရည်တစ်ခုလုံးက မျက်လှည့်ပြတာ ဒါမှမဟုတ် ကိုယ်ယောင်ဖျောက်တာမျိုးတွေအပေါ်မှာပဲ အခြေခံနေနိုင်တယ်ဆိုတာ အလွယ်တကူ မှန်းဆလို့ ရနေတာပဲ။

ပြီးတော့ အဲဒါတွေက နတ်ဘုရားပန်းပဲဖို အစိတ်အပိုင်းတွေရဲ့ တန်ခိုးနဲ့ ဖန်တီးထားတာဖြစ်လို့ သူ့ရဲ့ မှော်ပညာတစ်ခုတည်းနဲ့တင် တုံ့ပြန်တိုက်ခိုက်နိုင်မှာ မဟုတ်ဘူး။ အလုပ်ဖြစ်မှာ မဟုတ်ပါဘူး။

ဒါပေမဲ့ ဒီကင်မရာမြှင့်တင်မှုနဲ့ဆိုရင်တော့ သူက ဒီဗာတွေနဲ့ စွမ်းရည်တွေအပေါ်မှာ အာရုံစိုက်ထားတဲ့ အမြင်အာရုံအသစ်တစ်ခုကို အခြေခံအားဖြင့် ရရှိသွားမှာ ဖြစ်တယ်။ တကယ်တော့ သူ့ရဲ့ မြင်ကွင်းက သူ့ရဲ့ ကိုယ်ပိုင်ကျင့်စဉ်အဆင့်ကြောင့် ကန့်သတ်ခံထားရပေမဲ့ အနည်းဆုံးတော့ အဲဒီလိုအချိန်မျိုးတွေမှာ သူ လုံးဝ မျက်စိကန်းမနေတော့ဘူးဆိုတာ သူ သိထားလိုက်တယ်။

မိုက်ကယ်က ဝိညာဉ်ဆီ ၁ စက်ပဲ ကုန်ကျမှာဖြစ်လို့ ဒါကိုပဲ ပထမဆုံး မြှင့်တင်ဖို့ ဆုံးဖြတ်လိုက်တယ်။

"ဒီမြှင့်တင်မှုအတွက် ဝိညာဉ်ဆီ တစ်စက် ချန်ထားလိုက်မယ်... ဒါပေမဲ့ လောလောဆယ်တော့ တခြား ရွေးချယ်စရာတွေကို ဆက်ကြည့်ရအောင်"

[လက်နက်စနစ်] ဆီ ဆက်သွားတဲ့အခါ မြှင့်တင်မှုတစ်ခုက ဒရုန်းမှာ [သဟဇာတသေနတ်] တပ်ဆင်ဖို့ ရွေးချယ်စရာ ဖြစ်နေတယ်။

အဲဒါကို နှိပ်လိုက်တာနဲ့ ဒရုန်းက သူ့ရဲ့ ကိုယ်ထည် ဘေးဘက်အရှည်တွေကို ပြသဖို့ အနေအထား ထပ်ပြောင်းသွားပြန်တယ်။ ပုံမှန်အားဖြင့်တော့ ပြားချပ်နေတဲ့ ကိုယ်ထည်အစိတ်အပိုင်းတစ်ခု ဖြစ်ပေမဲ့ အခုတော့ လေးထောင့်ပွင့်ကနေ ထွက်ပေါ်လာတဲ့ ပြောင်းဝအရှည်တစ်ခုစီ ဘေးဘက်အပြားတွေမှာ ရှိနေပြီ ဖြစ်ပါတယ်။

သူ့ရဲ့ ဒရုန်းက သူ့ရဲ့ ကိုယ်ထည်မှာ အမြောက်ပေါက်တွေပါတဲ့ ရှေးဟောင်း သစ်သားသင်္ဘောကြီးတစ်စင်းလို ဖြစ်နေတာပါ။

အမြောက်တွေကတော့ သွယ်လျပြီး သေနတ်ပြောင်းဝတွေထက် အင်တင်နာတွေနဲ့ ပိုတူနေတယ်။

"ဒါကတော့ တကယ်ကို ဆွဲဆောင်မှု ရှိတာပဲ"

၃၆၀ ဒီဂရီ ကင်မရာနဲ့ ပေါင်းစပ်ထားတဲ့ ဘေးဘက်က အဲဒီလက်နက်နှစ်ခုက ရူးသွပ်စရာကောင်းတဲ့ အတွဲအစပ်တစ်ခု ဖြစ်လာစေတယ်။

သူ့ရဲ့ တကယ်ခန္ဓာကိုယ်ကို ဘေးကင်းတဲ့နေရာမှာ ဝှက်ထားပြီး ဒရုန်းတစ်ခုတည်းကိုပဲ သုံးပြီး အခြေခံအားဖြင့် တိုက်ခိုက်နိုင်တော့မှာပါ။

သူ့ဒရုန်းရဲ့ ကန့်သတ်ချက်တစ်ခုက သူ မြင်နိုင်သလောက် အကွာအဝေးအထိပဲ သွားခိုင်းလို့ ရတာ ဖြစ်တယ်။ ဒါပေမဲ့ ကင်မရာ ရှိနေရင်တော့ သူ့ခန္ဓာကိုယ်ကနေ ဘယ်လောက်ပဲ ဝေးဝေး ရောက်နေပါစေ ထိန်းချုပ်နိုင်လိမ့်မယ်လို့ သူ ခံစားမိနေတယ်။

[သင့်ရဲ့ အတွေးတွေက မှန်ကန်ပါတယ်] လို့ နိုဗာက ပြောလိုက်တယ်။

[ကင်မရာမြှင့်တင်မှုက သင့်ရဲ့ အသိစိတ်ကို ဒရုန်းထဲဆီ ရွှေ့ပြောင်းပေးမှာဖြစ်ပြီး သင့်ရဲ့ အဆင့်မြင့်စွမ်းရည်ကို ဒရုန်းဆီ လွှဲပြောင်းပေးနိုင်မှာ ဖြစ်ပါတယ်... ဒါပေမဲ့ ဒါက သင်ကိုယ်တိုင် ဒရုန်းကို ထိန်းချုပ်နေတဲ့ အချိန်တိုင်းမှာ သင့်ရဲ့ ခန္ဓာကိုယ်က တစ်နေရာတည်းမှာပဲ ရှိနေမှာဖြစ်ပြီး လှုပ်ရှားနိုင်မှာ မဟုတ်ဘူးလို့ ဆိုလိုတာ ဖြစ်ပါတယ်]

ကင်မရာလုပ်ဆောင်ချက်နဲ့ဆိုရင် သူ သွားချင်တဲ့အထိ ဝေးဝေး သွားနိုင်တယ်။ ဒါပေမဲ့ သူ့ရဲ့ ကိုယ်ပိုင်ခန္ဓာကိုယ်က ငြိမ်သက်နေရမယ်ဆိုတဲ့ အခြေအနေတော့ ရှိတာပေါ့။ ဒါက အပေးအယူတစ်ခုဖြစ်ပြီး မိုက်ကယ်အနေနဲ့ စိတ်ပျက်စရာကောင်းတယ်လို့ ယူဆပေမဲ့ တရားမျှတမှုတော့ ရှိပါတယ်။

ဒါပေမဲ့လည်း ဒါက ဝယ်ယူရကျိုးနပ်တဲ့ မြှင့်တင်မှုတစ်ခု ဖြစ်နေတုန်းပါပဲ။ အကယ်၍ သဟဇာတသေနတ် မြှင့်တင်မှုနဲ့သာ တွဲဖက်လိုက်ရင် သူ ဘယ်လိုမှ လှုပ်ရှားနေဖို့တောင် မလိုတော့ဘူးလေ။

သူက လက်နက်တွေအတွက် နောက်ထပ်ရွေးချယ်စရာဆီ ဆက်သွားလိုက်ပြီး အဲဒါက သူ့ရဲ့ စွမ်းရည်အတွက် ပြုလုပ်ထားတဲ့အရာ ဖြစ်ပါတယ်။

[ပစ္စည်းစာရင်း ပြောင်းလဲခြင်း - ဒီမြှင့်တင်မှုက ဒရုန်း သယ်ဆောင်နိုင်တဲ့ ပစ္စည်းအရေအတွက်ကို ၁၀ ခုအထိ တိုးမြှင့်ပေးမှာ ဖြစ်ပါတယ်... သူ့ရဲ့ ပစ်လွှတ်မှုအရှိန်ကလည်း သူ့ရဲ့ အဟုန်ထက် နှစ်ဆ မြန်ဆန်လာမှာ ဖြစ်ပါတယ်]

[ကုန်ကျစရိတ် - ဝိညာဉ်ဆီ ၁ စက်]

သူ အမှန်တကယ် လိုအပ်တာက သုံးခုပဲ ဖြစ်လို့ သူ့ဒရုန်းရဲ့ ပစ္စည်းဆံ့ဝင်ဆံ့အားကို မြှင့်တင်ဖို့ သူ အဲဒီလောက်ကြီး မလောပါဘူး။ ဒါပေမဲ့ ပစ်လွှတ်တဲ့အရှိန်ကတော့ သူ့ပြိုင်ဘက် တုံ့ပြန်ဖို့ အချိန်နည်းသွားစေမှာ ဖြစ်လို့ တကယ်ကို အသုံးဝင်လှပါတယ်။

"ဒီမြှင့်တင်မှုကိုတော့ နောက်မှပဲ ချန်ထားလိုက်တော့မယ်... အထူးသဖြင့် နောက်ထပ် ရွေးချယ်စရာက ပိုအရေးကြီးနေလို့ပဲ"

[ကိုယ်ထည်စနစ်] မှာလည်း သူ လိုအပ်တဲ့ ကိုယ်ယောင်ဖျောက် မြှင့်တင်မှုတွေ ရှိနေတာပါ။

ဒီရွေးချယ်စရာကို သူ နှိပ်လိုက်တာနဲ့ ဒရုန်းရဲ့ ပင်မကိုယ်ထည်တစ်ခုလုံးက လင်းထွက်သွားတာကို သူ မြင်လိုက်ရတယ်။

[အသွင်ပြောင်း ကိုယ်ယောင်ဖျောက်ခြင်း - ဒီမြှင့်တင်မှုက ဒရုန်းရဲ့ မျက်နှာပြင်ကို သူ့ရဲ့ ပတ်ဝန်းကျင်နဲ့ လိုက်လျောညီထွေ ဖြစ်အောင် ပြောင်းလဲပေးမှာ ဖြစ်ပါတယ်]

[ကုန်ကျစရိတ် - ဝိညာဉ်ဆီ ၁ စက်]

ဒရုန်းရဲ့ မျက်နှာပြင်က ပုံစံပြောင်းသွားပြီး သူ့ရဲ့ ဧရိယာတစ်ခုလုံးမှာ ခြောက်ထောင့်ပုံသဏ္ဍာန်တွေ ထွက်ပေါ်လာတယ်။ ဒီ ဧရာမ ဗဟုဂံပုံစံတွေထဲမှာ အရောင်အမျိုးမျိုး တောက်ပပြီး ပြောင်းလဲနေတဲ့ ပိုမိုသေးငယ်တဲ့ ခြောက်ထောင့်ပုံတွေ ထပ်ပြီး ပါဝင်နေတာပါ။

သူ့ကို နမူနာပြသတဲ့အနေနဲ့ တောအုပ်တစ်ခုရဲ့ တုပဖန်တီးထားတဲ့ ပတ်ဝန်းကျင်က ဒရုန်းရဲ့ နောက်ကွယ်မှာ ပေါ်လာတယ်။ ပြီးတော့ ဒရုန်းက သစ်ပင်တွေရဲ့ အုပ်ဆိုင်းနေတဲ့ အဖျားပိုင်းဆီ ဖြည်းဖြည်းချင်း ရွှေ့လျားသွားတဲ့အခါ ခြောက်ထောင့်ပုံသဏ္ဍာန်တွေက အစိမ်းရောင် အရိပ်အမျိုးမျိုးဆီ မပြောင်းလဲခင်မှာ တောက်ပသွားခဲ့တယ်။

အခုတော့ ဒါက အသွင်ပြောင်း ကိုယ်ယောင်ဖျောက်ခြင်းပဲ ရှိသေးတာဖြစ်လို့ အနီးကပ် သေချာကြည့်ရင် သစ်ရွက်တွေကြားထဲကနေ ထွက်နေတဲ့ ဒရုန်းရဲ့ အနားသတ်ပုံသဏ္ဍာန်ကို မြင်နိုင်ဦးမှာ ဖြစ်ပါတယ်။ အကယ်၍ တစ်ယောက်ယောက်က ဒရုန်းကို သေသေချာချာလိုက်ရှာနေပြီး သူ့ရဲ့ တိကျတဲ့ ပုံသဏ္ဍာန်နဲ့ အသေးစိတ်အချက်အလက်တွေကို သိနေရင်တော့ အဲဒီအသွင်ပြောင်းမှုကို အလွယ်တကူ အကဲခတ်မိသွားနိုင်တယ်။

သူ့ရဲ့ အားနည်းချက်တွေ ရှိနေပေမဲ့လည်း မိုက်ကယ်က ဒီမြှင့်တင်မှုကို ဝယ်ဖို့ စဉ်းစားနေတုန်းပါပဲ။ ဘာပဲဖြစ်ဖြစ် ဒီကမ္ဘာက လူတွေက ဒရုန်းတွေအကြောင်း ဘာမှ မသိကြဘူးလေ။ ပြီးတော့ သူကသာ ဒီအတိုင်း ဆက်ထားလိုက်ရင် ရိုးရိုး အသွင်ပြောင်း ကိုယ်ယောင်ဖျောက်ခြင်းကတောင် သူတို့မျက်စိထဲမှာ မမြင်နိုင်လုနီးပါး ဖြစ်သွားမှာပါ။ ပြီးတော့ ဖယောင်းဖလံ အကြားအာရုံ နဲ့သာ တွဲဖက်လိုက်ရင် ဒါက ဒရုန်းကို အရင်ကထက် ပိုပြီး လျှို့ဝှက်သွားစေဖို့ လုံလောက်နေပါပြီ။

ဒါပေမဲ့လည်း ဒရုန်းအတွက် ရနိုင်တဲ့ နောက်ထပ် မြှင့်တင်မှုတစ်ခု ရှိနေပါသေးတယ်။ ဒီတစ်ကြိမ်မှာတော့ တကယ့်ကို အစစ်အမှန် ကိုယ်ယောင်ဖျောက်ခြင်းပါ။

[မျက်စိတဆုံး ကိုယ်ယောင်ဖျောက်ခြင်း - ဒီမြှင့်တင်မှုက ဒရုန်းကို လုံးဝ မမြင်နိုင်အောင် ပြုလုပ်ပေးမှာ ဖြစ်ပါတယ်]

[ကုန်ကျစရိတ် - ဝိညာဉ်ဆီ ၂ စက်]

သူ ဒီရွေးချယ်စရာကို နှိပ်လိုက်တာနဲ့ ဒရုန်းက သူ့မျက်စိရှေ့မှာတင် လုံးဝ ပျောက်ကွယ်မသွားခင် ချက်ချင်း တောက်ပသွားတယ်။ ပျောက်သွားပြီ။

"ဒါကတော့ ပြီးပြည့်စုံတဲ့ လျှို့ဝှက်ချက်ပဲ"

အကယ်၍ ဈေးနှုန်းသာ မရှိရင် သူ ဒီမြှင့်တင်မှုကို ချက်ချင်း ဝယ်မိမှာပါ။ ဝိညာဉ်ဆီ ၂ စက်။

အခု ကိုယ်ယောင်ဖျောက်ခြင်းရဲ့ အကျိုးကျေးဇူးအတွက်ဆိုရင် ဒါက တကယ်ကို ဝယ်ယူရကျိုးနပ်တဲ့အရာ ဖြစ်ပါတယ်။ ဒါပေမဲ့ လောလောဆယ်မှာတော့ တခြားမြှင့်တင်မှုတွေကို ဝယ်ယူတာက ပိုကောင်းလိမ့်မယ်လို့ သူ ထင်မိတယ်၊ ဘာဖြစ်လို့လဲဆိုတော့ အဲဒီ ဝိညာဉ်ဆီ ၂ စက်က မတူညီတဲ့ မြှင့်တင်မှု နှစ်ခုကို ဝယ်ယူနိုင်မှာဖြစ်ပြီး ဒါက သူ့ရဲ့ ဝိညာဉ်ဆီ အတွက် ပိုမိုကောင်းမွန်တဲ့ အသုံးချမှု ဖြစ်လာမှာမို့လို့ပါ။

[ကိုယ်ထည်စနစ်] အတွက် နောက်ထပ် မြှင့်တင်မှုတစ်ခုကတော့ ကာကွယ်ရေးအတွက် ဖြစ်ပါတယ်။

[သဟဇာတအကာအကွယ် - ဒီမြှင့်တင်မှုက ဒရုန်းကို အချိန်နဲ့အမျှ ပြန်လည်ပြည့်ဖြိုးမြှင့်တင်ပေးနိုင်တဲ့ ကိုယ်ပိုင်အကာအကွယ်တစ်ခု ရရှိစေမှာ ဖြစ်ပါတယ်]

[ကုန်ကျစရိတ် - ဝိညာဉ်ဆီ ၁ စက်]

"နိုဗာ... ကင်မရာလုပ်ဆောင်ချက်ကို သုံးနေတဲ့အချိန်မှာ ကျွန်ုပ်ရဲ့ မန္တန်တွေကို သုံးနိုင်ဦးမလား"

[သုံးနိုင်ပါတယ်... ဒရုန်းကို မောင်းနှင်နေတဲ့အချိန်မှာ သင်သိထားတဲ့ မန္တန်မှန်သမျှကို အသုံးပြုနိုင်ပါတယ်... သင် မောင်းနှင်နေတဲ့အချိန်မှာ သင့်ရဲ့ အဆင့်မြင့်စွမ်းရည်က သင်နဲ့အတူ လွှဲပြောင်းရောက်ရှိသွားတာ ဖြစ်လို့ မှော်စွမ်းအင် ကို ပုံမှန်အတိုင်းပဲ စိတ်ကြိုက် စီမံကိုင်တွယ်နိုင်မှာ ဖြစ်ပါတယ်]

ဆိုလိုတာက သူ ဒရုန်းကို မောင်းနှင်နေတဲ့ အချိန်တိုင်းမှာ ဒီမြှင့်တင်မှုကို သူ မဝယ်ထားရင်တောင် အကြွင်းမဲ့ ဒြပ်စင်ဘက်စုံအကာအကွယ် က စတင်အသက်ဝင်နေမှာ ဖြစ်ပါတယ်။

ဒါပေမဲ့ အဲဒါက သူကိုယ်တိုင် မောင်းနှင်နေတဲ့ အချိန်ကျမှသာ ဖြစ်တာပါ။ အကယ်၍ သူ မမောင်းနှင်ထားဘူးဆိုရင်တော့ ဒရုန်းက မီသရယ် မှော်ဝင်ပစ္စည်း တစ်ခုအနေနဲ့ သူ့ရဲ့ ပင်ကိုယ်ကြံ့ခိုင်မှုကလွဲလို့ တခြား ကာကွယ်ရေးတွေ ရှိနေမှာ မဟုတ်ပါဘူး။

* * * * * * * *

စာစဉ်(၃၈)