အခန်း ၄၅၂

အခန်း(၄၅၂)

ဟက်ဖေးစတပ်စ် သွေးမျိုးဆက်တွေမှာ မီသရယ် မှော်ဝင်ပစ္စည်းတစ်ခုပေါ်ကို ဝိညာဉ်ဆီ အတိအကျ သုတ်လိမ်းနိုင်တဲ့ ထူးခြားတဲ့ ပင်ကိုယ်စွမ်းရည်တစ်ခု ရှိကြတယ်။ ဒါက မျိုးရိုးလိုက်တဲ့ စွမ်းရည်ဖြစ်နေလို့ သူတို့မျိုးနွယ်စုပဲ သုံးနိုင်တာပါ။

ဒါပေမဲ့ နိုဗာရဲ့ စွမ်းရည်ပေါင်းစပ်မှုကြောင့် ဒီမန္တန်ရဲ့ အခြေခံအုတ်မြစ်ကနေစပြီး တစ်စစီ ခွဲထုတ်ပစ်လိုက်နိုင်ပြီး မိုက်ကယ် သုံးလို့ရမယ့်အရာတစ်ခုအဖြစ် ပြန်လည်ဖန်တီးပေးနိုင်ခဲ့တယ်။

ဒါက တစ်လောကလုံးမှာ အတော်ဆုံး အေအိုင် လက်ထောက်အတွက်တော့ အေးဆေးပါပဲ။

သူ့ခေါင်းထဲက မှော်ကျင့်စဉ်အတိုင်း မျက်လုံးကိုမှိတ်ပြီး သူ့အောက်ခြေမှာ ဧရာမ မှော်စက်ဝိုင်းကြီးတစ်ခုကို ဆင့်ခေါ်လိုက်တယ်။

မန္တန်ကြောင့် စိမ်းပုပ်ရောင် ဖန်ပုလင်းလေးက လေထဲမှာ ပျံတက်သွားပြီး ပုလင်းဆို့က အလိုလို ပွင့်ထွက်သွားကာ အထဲမှာ ကျန်နေသေးတဲ့ လျှို့ဝှက်ဆန်းကြယ်ပြီး စေးပြစ်ကြည်လင်တဲ့ အရည် သုံးစက် ထွက်လာတယ်။

သူက သူ့လက်ကို မြှောက်လိုက်တော့ လက်ထိပ်ကနေ သွေးသုံးစက်က ဖြည်းဖြည်းချင်း စိမ့်ထွက်လာပါတော့တယ်။

ဒီသွေးစက်တွေက ပုလင်းထဲက ထွက်လာတဲ့ ဝိညာဉ်ဆီ သုံးစက်လိုပဲ လေထဲမှာ ဝဲပျံနေတယ်။

ချက်ကီရဲ့ နည်းလမ်းကတော့ မီသရယ် မှော်ဝင်ပစ္စည်းကို ဝိညာဉ်ဆီ သုတ်လိမ်းတိုင်း လုပ်ဆောင်ရမယ့် လုပ်ငန်းစဉ်တွေနဲ့ အဆင့်တွေ အများကြီး ပါဝင်တယ်။ ပုံမှန်ဆိုရင် ငါးမိနစ်ကနေ ဆယ်မိနစ်လောက် ကြာတတ်တာပါ။ ဒါပေမဲ့ နိုဗာရဲ့ စွမ်းရည်အသစ်က မလိုလားအပ်တဲ့ မှော်ပညာတွေကို ဖယ်ထုတ်ပစ်ပြီး လုပ်ငန်းစဉ်တစ်ခုလုံးကို သွက်လက်မြန်ဆန်သွားစေတယ်။

သွေးသုံးစက်နဲ့ ဝိညာဉ်ဆီ သုံးစက်က ကျည်ဆန်တွေလိုပဲ တစ်ခုနဲ့တစ်ခု ဆီကို ရုတ်တရက် အရှိန်အဟုန်နဲ့ ပြေးဝင်သွားကြတယ်။ ပြီးတော့ လေထဲမှာ အချင်းချင်း တိုက်မိပြီး မျှတတဲ့ အချိုးအစားနဲ့ ရောနှောသွားတဲ့ မြူမှုန်လေးတွေအဖြစ် ပြောင်းလဲသွားတယ်။

ဝိညာဉ်ဆီက သွေးထဲမှာရှိတဲ့ ဒီအန်အေနဲ့ အသားကျသွားတာနဲ့ အဲဒီမြူမှုန်လေးတွေက အနီရောင်အရည်စက် အကြီးကြီး တစ်စက်အဖြစ် ပေါင်းစည်းသွားပါတော့တယ်။

သူက အဲဒီအရည်စက်ဆီကို သူ့လက်ညှိုးလေးနဲ့ လှမ်းတို့လိုက်တယ်။ အဲဒါက သူ့အရေပြားနဲ့ တစ်လက်မအကွာမှာတင် လွင့်မျောနေတာပါ။

ပြီးတော့ ဒီအရည်စက်ကို ဒရုန်းဆီ ဖြည်းဖြည်းချင်း တွန်းပို့လိုက်ပြီး နောက်ဆုံးမှာ မီသရယ် မှော်ဝင်ပစ္စည်းနဲ့ ထိတွေ့သွားစေလိုက်တယ်။

ဒရုန်းက သူ့ကိုယ်ထည်ထဲက ဝိညာဉ်ဆီကို မှတ်မိသွားတာနဲ့ တစ်ပြိုင်နက် ရုတ်တရက် ဟိန်းဟောက်ပြီး အသက်ဝင်လာတယ်။ သူ မျက်စိမှားတာလားတော့ မသိဘူး၊ ဒရုန်းရဲ့ ကိုယ်ထည်က နည်းနည်းလေး လှုပ်ရှားသွားသလိုပဲလို့ ကျိန်းသေပေါက် ပြောနိုင်တယ်။

ပြီးတော့ အရင်ကနဲ့မတူဘဲ ဒရုန်းက ကန္တာရထဲမှာ ပိတ်မိနေတဲ့ ရေငတ်နေတဲ့လူတစ်ယောက်လို ဝိညာဉ်ဆီစက်တွေကို စုတ်ယူပစ်လိုက်တယ်။ မိုက်ကယ်က ဒရုန်းရဲ့ မျက်နှာပြင်တစ်ခုလုံးအနှံ့ ဝိညာဉ်ဆီကို လိုက်သုတ်ရမှာ ဖြစ်ပေမဲ့ အဲဒါက အကုန်လုံးကို အပြီးအပိုင် စုတ်ယူသွားခဲ့တာပါ။

သွေးနဲ့ ဝိညာဉ်ဆီ ရောနှောထားတဲ့ အရည်က ဒရုန်းရဲ့ ကိုယ်ထည်အနှံ့ သွေးကြောတွေလိုမျိုး ဖြည်းဖြည်းချင်း ပြန့်နှံ့သွားတယ်။ အဲဒါက စက်ပစ္စည်းကို အသက်သွင်းပေးလိုက်သလိုမျိုး တဒုတ်ဒုတ် ခုန်လှုပ်နေတယ်။

စက္ကန့်အနည်းငယ် ကြာပြီးနောက်မှာတော့ ဒရုန်းက ဝိညာဉ်ဆီကို အပြီးအပိုင် စုတ်ယူလို့ ပြီးသွားခဲ့ပြီ။ သူ့ရဲ့ မျက်နှာပြင်ပေါ်က အနီရောင် သွေးကြောတွေကလည်း ကိုယ်ထည်ရဲ့ အနက်ရှိုင်းဆုံး အစိတ်အပိုင်းတွေထဲကို ငုံ့လျှိုးကွယ်ပျောက်သွားသလိုမျိုး ပျောက်ကွယ်သွားတယ်။

ဒီအချိန်မှာပဲ သူ့မျက်စိရှေ့မှာ နောက်ထပ် စနစ်မျက်နှာပြင်တစ်ခု ပေါ်လာပြန်တယ်။

[မီသရယ် မှော်ဝင်ပစ္စည်း: ဒရုန်း]

[ရှေးဟောင်းဝိညာဉ်: ၃ စက်]

[အမြင်အာရုံ]

—ကင်မရာ

——ဒရုန်းအမြင်အာရုံ

——မျှဝေခံစားမှု အမြင်အာရုံ

——XXXX

[လက်နက်]

—ပေါင်းစည်းထားသော သေနတ်များ

——သဟဇာတသေနတ်

——XXXX

—စွမ်းရည်

——ပစ္စည်းသိုလှောင်ခန်း ပြောင်းလဲခြင်း

——XXXX

[ပန်ကာ]

—ကိုယ်ပျောက်စနစ်

——အသံတိတ်ပန်ကာ

——XXXX

[အရှိန်]

—ဒိန်ပန်ကာနှစ်ဖက်

——XXXX

[ကိုယ်ထည်]

—ကိုယ်ပျောက်စနစ်

——အရောင်ပြောင်းလဲခြင်း

——မမြင်ရအောင် ဖျောက်ထားခြင်း

——XXXX

[ခံစစ်]

—ပေါင်းစည်းထားသောအကာအကွယ်

——XXXX

[တိုးချဲ့မှု]

—ဒရုန်းများ

——ဒရုန်းအသေးစား

——XXXX

[ပုံစံပြောင်းလဲခြင်း]

—ကျုံ့ခြင်း

——ချဲ့ခြင်း

——XXXX

[XXXX]

အခု သူ ဒရုန်းအမြင်အာရုံကို အဆင့်မြှင့်တင်လိုက်တဲ့အတွက် အဆင့်မြှင့်တင်မှုအသစ်တစ်ခု ပေါ်လာတယ်။

[မျှဝေခံစားမှု အမြင်အာရုံ: ဒီအဆင့်မြှင့်တင်မှုက ဒရုန်းမျက်မှန်ကို ပိုပြီး ကြည်လင်တောက်ပလာစေမယ်။ ဒါက မင်းရဲ့ အသိစိတ်ထဲကို ဆော့ဝဲလ်ရဲ့ ဝန်ထုပ်ဝန်ပိုး ဖြစ်စေတာကို လျှော့ချပေးမှာ ဖြစ်ပြီး မင်းက ကိုယ့်ခန္ဓာကိုယ်ထဲမှာပဲ ရှိနေရင်တောင် ဒရုန်းကို မောင်းနှင်နိုင်စေလိမ့်မယ်။

ဒရုန်းရဲ့ ကင်မရာကလည်း အကြီးအကျယ် အဆင့်မြင့်သွားလိမ့်မယ်။ ကင်မရာရဲ့ ပုံရိပ်အရည်အသွေးက ဒီဗာတစ်ယောက်နဲ့ စွမ်းရည်တစ်ခုက လက်တွေ့လောကထဲမှာ အပြည့်အဝ အသက်မဝင်ခင် ပြုလုပ်လိုက်တဲ့ နှောင့်ယှက်မှုတွေကိုပါ ဖောက်ထွင်းမြင်နိုင်လောက်အောင် ရှင်းလင်းပြတ်သားလိမ့်မယ်။]

[ကုန်ကျစရိတ်: ၂ စက်]

ဒါက တကယ့်ကို စုဆောင်းရကျိုးနပ်တဲ့ အဆင့်မြှင့်တင်မှုတစ်ခုပဲ။ သူ့စိတ်ထဲမှာ ကြိုတင်စဉ်းစားထားတဲ့ အဆင့်မြှင့်တင်မှုအချို့သာ မရှိခဲ့ရင် သူ ဒီအဆင့်မြှင့်တင်မှုကို ချက်ချင်း ဝယ်ပစ်လိုက်မှာ ကျိန်းသေတယ်။

[ဒီအဆင့်မြှင့်တင်မှုက မင်းကို စွမ်းရည်တွေကို အပူချိန်တိုင်း ကင်မရာ တပ်ဆင်ထားသလိုမျိုး မြင်တွေ့ခွင့် ပေးလိမ့်မယ်။]

ကိုယ့်ရဲ့ ခန္ဓာကိုယ်ပိုင်းဆိုင်ရာ လုပ်ဆောင်ချက်တွေကို မဆုံးရှုံးစေဘဲ ဒရုန်းကို မောင်းနှင်နိုင်တယ်ဆိုတဲ့ အချက်တစ်ခုတည်းနဲ့တင် ဒီအဆင့်မြှင့်တင်မှုကို ဝယ်ဖို့ လုံလောက်တဲ့ အကြောင်းပြချက် ဖြစ်နေပြီ။ ဒါပေမဲ့ ကင်မရာအရည်အသွေး အကြီးအကျယ် မြင့်တက်သွားတာက သူ့ကို စွမ်းရည်တစ်ခုရဲ့ ပုံရိပ်ယောင်ကိုပါ တကယ်မြင်တွေ့ခွင့် ပေးတာပဲ။

ဝယ်လိုက်ရမလား။ တကယ်ကြီး ဝယ်ချင်နေပြီ...

သူ့ကိုယ်သူ ထိန်းချုပ်လိုက်ရတယ်။ အဲဒီအဆင့်မြှင့်တင်မှုက ဘယ်လောက်ပဲ အသုံးဝင်ပါစေ၊ ဒီအရည်စက်တွေနဲ့ ဝယ်လို့ရတဲ့ အဆင့်မြှင့်တင်မှုတွေ အများကြီး ရှိသေးတာကိုး။

ဥပမာအားဖြင့်၊ သူ စိတ်ထဲမှာ ထားထားတဲ့ ဝယ်ယူမှုတစ်ခုကတော့ အခြားမဟုတ်ဘဲ သဟဇာတသေနတ် အဆင့်မြှင့်တင်မှုပဲ။ သူ့ဒရုန်းအတွက် တိုက်ခိုက်ရေး စွမ်းရည်တွေ ရှိလာတာက နောက်ဆုံးမှာတော့ အဲဒါကို လက်နက်တစ်ခုလို့ ခေါ်ဖို့ ထိုက်တန်သွားစေလိမ့်မယ်။ တခြားလူတွေမှာ ပုဆိန်တွေ၊ ဓားတွေ၊ ဆူးလုံးတုတ်တွေ ရှိကြတယ်။ အခုတော့ သူ့မှာ ပျံသန်းနိုင်တဲ့ သေနတ်တစ်လက် ရှိပြီ။

သူက စနစ်မျက်နှာပြင်ပေါ်ကို အာရုံစိုက်ပြီး ဝယ်ယူမှုရွေးချယ်ခွင့်ကို နှိပ်လိုက်တယ်။

[ဒီအဆင့်မြှင့်တင်မှုကို ဝိညာဉ်ဆီ ၁ စက်နဲ့ ဝယ်ယူလိုပါသလား။]

မိုက်ကယ်က ဟုတ်ကဲ့လို့ ဖြေလိုက်တာနဲ့ ချက်ချင်းပဲ ဒရုန်းက အလင်းရောင်တွေနဲ့ တဖျတ်ဖျတ် တုန်ခါလာပါတော့တယ်။ မီသရယ် မှော်ဝင်ပစ္စည်းရဲ့ အသွင်ပြောင်းလဲမှုကို သူ့မျက်စိရှေ့တင် မြင်ရတော့မယ်ဆိုတာ သိလိုက်ရလို့ သူ့မျက်လုံးတွေ ပြူးကျယ်သွားတယ်။ အရင်ကတော့ သူ အခွင့်အရေး လွတ်သွားခဲ့ပေမဲ့ အခုတော့ အနီးကပ် ကိုယ်တိုင်မြင်တွေ့ရတာက ဝိညာဉ်ဆီနဲ့ မီသရယ်တို့ရဲ့ ဆက်စပ်မှုကို ပိုပြီး နားလည်သဘောပေါက်စေလိမ့်မယ်။

ဒရုန်းရဲ့ ကိုယ်ထည်ပေါ်မှာ အနီရောင် သွေးကြောတွေ ပြန်ပေါ်လာတယ်၊ စက်ရဲ့ အတွင်းပိုင်း ဝါယာကြိုးတွေ အပြင်ဘက်ကို ပေါ်ထွက်လာသလိုမျိုးပါပဲ။

ဒရုန်းရဲ့ သေနတ်ပြောင်းတွေ ဖြစ်လာမယ့် ပြောင်းနှစ်ခုကို စတင်ပုံဖော်လာတာနဲ့အမျှ ဒရုန်းရဲ့ ကိုယ်ထည်ထဲကနေ နာနိုမှုန်အသေးစားလေးတွေ လျှံထွက်လာတယ်။

ဒါက တကယ်ကြီး ကြီးထွားလာတာပဲ။ ဝိညာဉ်ဆီဆိုတာ မီသရယ် မှော်ဝင်ပစ္စည်းတွေကို ပုံစံပြောင်းလဲပြီး ဆင့်ကဲပြောင်းလဲစေနိုင်တဲ့ မြေဩဇာတစ်မျိုးမျိုးပဲ။

သူက ဒရုန်းရဲ့ အဆင့်မြှင့်တင်မှုကို သဘောကျလွန်းလို့ အစကနေ အဆုံးအထိ တစ်လျှောက်လုံးကိုပဲ ငေးကြည့်နေမိတော့တယ်။

မိနစ်သုံးဆယ်လောက် ကြာပြီးတဲ့နောက်မှာတော့ ဒရုန်းရဲ့ အနီရောင် သွေးကြောလိုင်းတွေက မီသရယ် သတ္တုရဲ့ အနက်ပိုင်းထဲကို ပြန်လည်ငုပ်လျှိုးသွားခဲ့ပြီ။

အခုတော့ ဒရုန်းရဲ့ ဘေးဘက်မှာ အင်တင်နာလိုမျိုး ပြောင်းနှစ်ခု တပ်ဆင်ထားတာ တွေ့ရတယ်။ သူ့ရဲ့ အဆင့်မြင့်စွမ်းရည်ကို သုံးပြီး အဲဒီအင်တင်နာတွေရဲ့ လှုပ်ရှားမှုအကွာအဝေးကို သိရအောင် စိတ်နဲ့ လှမ်းလှုပ်ရှားကြည့်လိုက်တယ်။ ကံကောင်းထောက်မစွာပဲ အဲဒီနောက်ကွယ်မှာ လည်ပတ်နိုင်တဲ့ ပတ္တာတစ်ခု ရှိနေလို့ လှုပ်ရှားမှုအပိုင်းမှာ လွတ်လပ်မှု အပြည့်အဝ ရှိနေခဲ့တာပါ။

ဒီအချိန်မှာပဲ သူ အလိုလို သိလိုက်တာက ဘယ်အချိန်ပဲဖြစ်ဖြစ် သူအလိုရှိတဲ့အချိန်မှာ အဲဒီအမြောက်တွေကို ပစ်ခတ်နိုင်တယ်ဆိုတာပဲ။ ဒီနှစ်ခုနဲ့ဆိုရင် ပိုပြီး ပြင်းထန်တဲ့ တိုက်ခိုက်မှုစွမ်းအားအတွက် သေနတ်နှစ်လက်ကို တစ်ပြိုင်နက်တည်း ပစ်ခတ်နိုင်သလို၊ ပစ်မှတ်နှစ်ခုကို ခွဲပြီး ထိမှန်အောင်လည်း လုပ်နိုင်တယ်။

သူက ဒရုန်းအမြင်အာရုံကို မသုံးဘဲ ပုံမှန်အတိုင်းပဲ ဒရုန်းကို ထိန်းချုပ်မယ်ဆိုရင် သူ့ရဲ့ ပစ်မှတ်ကန့်သတ်ချက်က ရှိနေမှာပါ။ အဓိကကတော့ သူ့ရှေ့မှာ မြင်နေရသရွေ့ပဲ ပစ်မှတ်ထားနိုင်မှာ ဖြစ်တယ်။

ဒါပေမဲ့ အဲဒီမျက်မှန်ကို တပ်ဆင်လိုက်ရင်တော့ ဒီသေနတ်တွေနဲ့ တိကျမှုအပိုင်းမှာ အများကြီး ပိုကောင်းလာမှာကို သူကျိန်းသေ သိနေတယ်။ ဒါက ၃၆၀ ဒီဂရီ ပတ်လည်မြင်ကွင်းကြောင့် ပိုပြီးတော့တောင် ထူးခြားနေဦးမှာပါ။

သူ တကယ်ကြီး စမ်းသပ်ကြည့်ချင်ပေမဲ့ နောက်မှလုပ်ဖို့ပဲ ဆုံးဖြတ်လိုက်တယ်။ ဘာပဲဖြစ်ဖြစ် သူက အစည်းအရုံး အဆောက်အအုံထဲမှာ ရှိနေသေးတာဖြစ်ပြီး ပစ်ခတ်မှုကြားထဲမှာ ပိတ်မိသွားနိုင်တဲ့ အရပ်သားတွေ အများကြီး ရှိနေတာကိုး။

ဒရုန်းအတွက် အဆင့်မြှင့်တင်မှုတွေ အကုန်လုံး ဝယ်ပြီးမှပဲ သူ စမ်းသပ်ကြည့်တော့မယ်။

ဒါနဲ့ပတ်သက်ပြီး သူက ရွေးချယ်စရာတွေကို နောက်တစ်ကြိမ် ထပ်ကြည့်လိုက်တယ်။ ဝိညာဉ်ဆီ နှစ်စက်ပဲ ကျန်တော့တာမို့ သူ သေသေချာချာ ရွေးချယ်ရမှာပါ။

ပြီးတော့ အသစ်ဝယ်ယူထားတဲ့ သဟဇာတသေနတ်ရဲ့ ဘေးနားမှာတင် ရွေးချယ်စရာအသစ်တစ်ခု ထပ်ပြီး ပေါ်လာပြန်တယ်။ ဒီတစ်ကြိမ်မှာတော့ သူ ဝယ်ယူနိုင်တဲ့ အဆင့်မြှင့်တင်မှု နှစ်ခု ရှိနေတာပါ။

[သဟဇာတသေနတ် ဗားရှင်းတူး: ဒီအဆင့်မြှင့်တင်မှုက လက်ရှိဒရုန်းအတွက် သေနတ်ပြောင်းတွေကို နှစ်ဆ တိုးပေးလိမ့်မယ်။ တစ်စက္ကန့်ချင်းစီရဲ့ ပစ်မှတ်အပေါ် ထိခိုက်ပျက်စီးမှုကို ပိုများစေဖို့အတွက် ကျည်ပြန်ဖြည့်ရမယ့် အချိန်ကိုလည်း လျှော့ချပေးလိမ့်မယ်။ မင်း ဝယ်ယူထားတဲ့ ဒရုန်းအသေးစားလေးတွေမှာလည်း သဟဇာတသေနတ် တစ်လက်ချင်းစီအတွက် ကိုယ်ပိုင်သေနတ်ပြောင်းတွေ တပ်ဆင်ပေးသွားလိမ့်မယ်။]

[ကုန်ကျစရိတ်: ၂ စက်]

[သဟဇာတလက်ပစ်ဗုံး: ဒီအဆင့်မြှင့်တင်မှုက ဒရုန်းကို သဟဇာတစွမ်းအားနဲ့ ပေါက်ကွဲစေမယ့် လက်ပစ်ဗုံးတွေကို ပစ်လွှတ်နိုင်ခွင့် ပေးလိမ့်မယ်။ ဗုံးရဲ့ ဖျက်ဆီးပစ်နိုင်တဲ့ ပေါက်ကွဲမှုအပြင်၊ သဟဇာတလက်ပစ်ဗုံးက သူ့ရဲ့ ပတ်ဝန်းကျင်မှာရှိတဲ့ မှော်စွမ်းအင်အားလုံးကိုပါ ပိတ်ပစ်လိုက်မှာ ဖြစ်ပြီး စွမ်းရည်တွေကိုလည်း အချိန်အကန့်အသတ်တစ်ခုအထိ နှောင့်ယှက်ဖျက်ဆီးပစ်လိမ့်မယ်။]

[ကုန်ကျစရိတ်: ၂ စက်]

* * * * * * * *

စာစဉ်(၃၈)