အခန်း ၁၀၅၁

ထာဝရနဂါးတန်ခိုးရှင် ( လုမင် )

မူရင်း စာရေးဆရာ - Mu Tong Ting Zhu၊ 牧童听竹

ဘာသာပြန်သူ - ထာဝရ

အပိုင်း ( 1051 ) အလယ်ပိုင်းတိုက်ကြီးတွင် ပါရမီရှင်များစုဝေးခြင်း။

"ဒီတစ်ခါတော့ အမြတ်များတာပဲ"

လုမင်၏ နှုတ်ခမ်းများက တွန့်ကွေးသွားကာ ပြုံးလိုက်သည်။

နတ်လောင်မြေမီးလျှံတွင် လုမင်က ဉာဏ်အလင်းပွင့်ခြင်း အခြေအနေသို့ ရောက်ရှိသွားခဲ့သည်။ ဤသို့ဖြင့် တစ်နှစ်ကုန်လွန်သွားခဲ့၏။ ယခုနှစ်အတွင်း သူသည် တာအိုနှင့် အမျိုးမျိုးသော သိုင်းပညာများကို နားလည်ခဲ့ပေသည်။

ထိုအခြေအနေတွင်၊ တာအိုနှင့် သိုင်းပညာအမျိုးမျိုးကို နားလည်သဘောပေါက်ခြင်းက ပုံမှန်ထက် များစွာပိုမြန်သည်။ လုမင်၏ လက်ရှိနားလည်နိုင်စွမ်းနှင့် အတူ သူ၏တိုးတက်မှုက သဘာဝအတိုင်း ကြောက်စရာကောင်းအောင် မြင့်မားသွားတော့သည်။

မသိလိုက်ခင်မှာပဲ သူ၏ တာအိုငါးခုက စတုတ္ထအဆင့်သို့ ရောက်သွားခဲ့ပြီဖြစ်သည်။ ထို့ကြောင့်၊ တတိယသွေးမျိုးဆက် နိုးထလာသောအခါ သူ့ကို ဖိနှိပ်ထားသော မျှော်စင်ကို တရှိန်ထိုး ချိုးဖြတ်လိုက်၏။ တာအိုငါးခုက စတုတ္ထအဆင့် ဝင်ရောက်ခြင်း၏ အထွတ်အထိပ်သို့ ထပ်မံချိုးဖြတ်သွားပြီး တစ်ချိန်တည်းမှာပင်၊ ဝိညာဉ်နတ်ဘုရားနယ်ပယ်ကို စတင်ဝင်ရောက်သွားတော့သည်။

ယခုအခါ၊ သူ၏ တာအိုငါးခုစလုံးက စတုတ္ထအဆင့် အထွတ်အထိပ်သို့ ရောက်ရှိသွားပြီဖြစ်ကြောင်း ရှင်းရှင်းလင်းလင်း သဘောပေါက်ခဲ့သည်။ ၎င်းက စတုတ္ထအဆင့် သေးငယ်သောအောင်မြင်ခြင်းသို့ ခြေတစ်လှမ်းသာ လိုတော့သည်။

ထို့အပြင်၊ သူက နဝမနဂါးခြေလှမ်းကို သတ္တမခြေလှမ်းသို့ လေ့ကျင့်နိုင်ခဲ့သည်။ ၎င်း၏ စွမ်းအားက နတ်ဘုရားအဆင့်နိမ့်သိုင်းပညာ အမြင့်ဆုံးအဆင့်နှင့် ညီမျှသည်။

နောက်အခိုက်တွင် အတွေးတစ်ခုဖြင့် ငရဲဖိနှိပ်ကျောက်စာချပ် ပေါ်လာသည်။ ၎င်းပေါ်တွင် ရွှေရောင် ချက္ကရခြောက်ခု ရှိ၏။

ကျိုးမိသားစု၏ သွေးအနှစ်သာရများကို သန့်စင်ပြီးနောက် ငရဲဖိနှိပ်ကျောက်စာချပ်သည်လည်း နတ်ဘုရားအဆင့်ခြောက်သို့ ရောက်ရှိသွားတော့သည်။

"ငါ့ရဲ့ ဖင်းဂေါ့ခန္ဓာက နတ်လောင်မြေမီးလျှံရဲ့ လောင်ကျွမ်းမှုအောက်မှာ အဆင့်ကိုးအထိ ရောက်ရှိသွားခဲ့ပြီ"

လုမင် ပြုံးလိုက်သည်။

"အနာဂတ်မှာ ငါ ပိုပြီးသတိထားရမယ်။ တောင်နဲ့မြစ်ပန်းချီကားလို ရတနာတစ်ခုကို ငါမယုံတဲ့လူတွေကို လွယ်လွယ်ပြလို့မရဘူး"

ဤအဖြစ်အပျက်က လုမင်ကို သင်ခန်းစာတစ်ခုပေးခဲ့သည်။

တောင်နှင့်မြစ် ပန်းချီကားကဲ့သို့ ရတနာတစ်ခုကို အလွယ်တကူ မဖော်ပြသင့်ပေ။ အခြားသူများမှ လောဘဇောတက်လာရန် လွယ်သည်။ အကယ်၍ ကျိုးမိသားစုသာ သူ့ကို တောင်နှင့်မြစ်မျဉ်းကို လွှဲပြောင်းပေးရန် အတင်းအကြပ် မကြိုးစားခဲ့ပါက၊ တိုက်ရိုက် သတ်ဖြတ်ခဲ့၍ သူ သေဆုံးသွားသည်မှာ ကြာခဲ့ပြီ ဖြစ်သည်။

သူ၏ တတိယသွေးမျိုးဆက်သာ အံ့ဖွယ်ကောင်းပြီး ကြောက်စရာကောင်းသည့် စွမ်းအားများဖြင့် မနိုးထခဲ့ပါက သူ လွတ်မြောက်နိုင်မည် မဟုတ်ပေ။

ဤအခြေအနေက အလွန်ထူးကဲသော်လည်း လုမင်သည် နောက်တစ်ကြိမ် မလိုချင်တော့ပါ။

"ဟားဟားဟား၊ ကောင်းတယ်"

တစ်ဖက်တွင်၊ တန်တန်၏ တစ်ကိုယ်လုံးက လျှပ်စီးတဖျတ်ဖျတ်လက်နေပြီး အားပါးတရ ရယ်မောလိုက်သည်။

ဤလိပ်ကလေးက ကပ်ဘေးမိုးကြိုး စွမ်းအင် အများအပြားကို စုပ်ယူခဲ့ကာ ယခုထိ ချေဖျက်နေဆဲပင်။ ယင်းက ဘယ်လိုသတ္တဝါမျိုးနည်း။

နဝမနဂါးသွေးမျိုးဆက်သည်ပင် ကပ်ဘေးမိုးကြိုး၏ စွမ်းအားကို ဝါးမျိုနိုင်မည်မဟုတ်ပေ။

"လုမင်၊ ငါမင်းကို အမြင် မမှားခဲ့ဘူး"

တန်တန်က ရယ်မောရင်း ပျံသန်းလာသည်။

"မင်းကိုလည်း တစ်နှစ်လောက်နေနိုင်မယ်လို့ ငါမမျှော်လင့်ထားဘူး"

လုမင် ပြောလိုက်၏။

"ငါဘယ်သူလဲဆိုတာ မင်းမသိဘူးလား။ ငါ့ရဲ့ ခုခံကာကွယ်မှုဟာ ပြိုင်ဘက်ကင်းတယ်။ အဲဒီကောင်လေးက ငါ့ကို တစ်နှစ်လောက် သန့်စင်ဖို့ ကြိုးစားခဲ့ပေမယ့် နောက်ဆုံးမှာတော့ ငါ့ခန္ဓာကိုယ်ပေါ်က ဆံပင်တစ်ပင်ကိုတောင် မထိခိုက်နိုင်ခဲ့ဘူး"

တန်တန်က ဂုဏ်ယူဝံ့ကြွားစွာဖြင့် ပြောလိုက်သည်။

"မင်းမှာ ဆံပင်ရှိလား။"

လုမင်က အထင်အမြင်သေးစွာဖြင့် ပြောလိုက်၏။

"ဟ၊ ငါက မင်းကို ဥပမာတစ်ခုပေးတာပါ၊ ဒါပေမဲ့ မင်းရဲ့သွေးမျိုးဆက်က တကယ်ကို ထိတ်လန့်စရာကောင်းတယ်။ အဲဒါကိုကြည့်မိတဲ့အခါ ငါတောင် လန့်သွားတယ်"

တန်တန်က ပြောသည်။

"ဒီသွေးအကြောင်းကို မင်းသိလား"

လုမင်လည်း တောက်ပသော မျက်လုံးများဖြင့် မေးလိုက်မိသည်။

"ငါမသိဘူး၊ ရိုးရိုးသားသားပြောရရင် မင်းရဲ့ ဒုတိယသွေးမျိုးဆက်ကိုတောင် ငါမသိဘူး။ မင်းက ဘီလူးတစ်ကောင်ပဲ။ တကယ်ကြီး မင်းမှာ ငါမသိတဲ့ သွေးမျိုးဆက်နှစ်ခုရှိတယ်၊ ဒါပေမဲ့ မင်းရဲ့ဒုတိယသွေးမျိုးဆက်က နည်းနည်းတော့ ရင်းနှီးသလိုပဲ။ ဒါကို အရင်က တစ်နေရာရာမှာ မြင်ဖူးပုံရတယ်"

တန်တန်က ရေရွတ်လိုက်သော်လည်း နောက်ဆုံးမှာတော့ ဘာမှ မမှတ်မိသေးပါ။

"မသိရင်လည်း မပြောစမ်းနဲ့"

လုမင် လှောင်ပြောင်လိုက်သည်။ ထို့နောက် နေရာမှထကာ ထွက်သွား၏။

"တစ်နှစ်လောက်ရှိပြီ။ အဲဒီ ပါရမီရှင်ရှင်တွေရဲ့ ကျင့်ကြံခြင်းအခြေခံက ဘယ်လောက်အထိ ရောက်နေပြီလဲ မသိဘူး"

လုမင်လည်း မျှော်လင့်ချက်များဖြင့် အမြန်ထွက်သွားသည်။

ထို့နောက် လုမင်ဟာ မိစ္ဆာသားရဲများနှင့် တိုက်ခိုက်ရန်အတွက် အစွမ်းထက်သော သားရဲများကို ရှာဖွေရန် တောင်တန်းများသို့ သွားခဲ့သည်။ သူ၏ အဓိကရည်ရွယ်ချက်မှာ တတိယမျိုးဆက်၏စွမ်းအားကို စမ်းသပ်ရန် ဖြစ်သည်။

မျှော်လင့်ထားသည့်အတိုင်းပင်၊ လုမင်က သူ၏တတိယသွေးမျိုးဆက်ကို အသက်သွင်းလိုက်တိုင်း အဆုံးမဲ့ သတ်ဖြတ်ချင်စိတ်များ တိုးလာမည် ဖြစ်သည်။ ထို့ပြင်၊ လုမင်က ထိုသွေးစက်များမှ အဆုံးမဲ့သွေးပင်လယ်ကို ခံစားနိုင်ပြီး သွေးပင်လယ်၏ စွမ်းအားကိုလည်း ငှားယူနိုင်သေးသည်။

သို့သော်လည်း လုမင်၏ လက်ရှိကျင့်ကြံမှုဖြင့် ၎င်းကို အနည်းငယ်သာ ချေးယူနိုင်သည်။ ထို့အပြင်၊ သူက တတိယသွေးမျိုးဆက်စွမ်းအားကို ငှားယူလိုက်တိုင်း ကမ္ဘာပေါ်ရှိ သက်ရှိအားလုံးကို သတ်လိုသကဲ့သို့ သတ်ဖြတ်ချင်စိတ်များနှင့် ပြည့်နှက်နေတတ်သည်။

ဤသတ်ဖြတ်ချင်စိတ်သည် လွန်စွာ အံ့သြဖို့ဖွယ်ကောင်း၏။ ၎င်းတွင် အဆုံးမဲ့ နာကြည်းမှုများဖြင့် ပြည့်နှက်နေပုံရသည်။

'ဘာဖြစ်လို့ ဒီလောက် ပြင်းထန်တဲ့ နာကြည်းစိတ်တွေ ရှိရတာလဲ။ သွေးမျိုးဆက်အားလုံးက တစ်ခုခုကနေ ဆင်းသက်လာတယ်လို့ ဆိုကြတယ်။ ဒါတွေကို ရှေးဦးသားရဲတွေ၊ ရှေးဟောင်းဝိညာဉ်၊ နတ်လက်နက်၊ မိုးနဲ့မြေရဲ့ဝိညာဉ်တွေမှာပဲ တွေ့နိုင်တာ။ ဒီသွေးစက်က ဘယ်လိုတည်ရှိမှုမျိုးလဲ'

တွေးရင်းဖြင့် လုမင်၏စိတ်ထဲတွင် သံသယများ ပို၍ များပြားလာခဲ့သည်။

ရှေ့ကို ခရီးဆက်ရင်းဖြင့် လုမင်ဟာ လေ့ကျင့်ရင်း၊ တဖြည်းဖြည်း စူးစမ်းလေ့လာခဲ့ပေသည်။ လုမင်၏ တတိယသွေးမျိုးဆက်ကို အသုံးပြုခြင်းကလည်း ပို၍ ကျွမ်းကျင်လာခဲ့၏။ သတ်ဖြတ်ချင်စိတ်များက လွှမ်းမိုးလာသည့်အခါ သူ့စိတ်ကို တည်ငြိမ်အောင် ထိန်းထားခဲ့သည်။

.....……

အရှေ့ပိုင်းကန္တာရ…

နဂါးကိုးကောင်မြို့မှ ခန်းမတစ်ခုထဲတွင် တိရှန်(နတ်ဧကရာဇ်)နှင့် တုန်ဖန့်ယုက ဧကရာဇ်တိရီအရှေ့တွင် ရိုကျိုးစွာ ရပ်နေခဲ့ကြသည်။ ခန်းမ၏ တစ်ဖက်တစ်ချက်စီတွင်လည်း ရှေးဟောင်း မိသားစုခြောက်စု၏ ဘိုးဘေးများ ရှိနေကြသေးသည်။

"ဂုဏ်ယူပါတယ် အရှင်မင်းကြီး။ တိရှန်က ဝိညာဉ်နတ်ဘုရား နယ်ပယ်ကို အောင်မြင်စွာ ဖြတ်ကျော်သွားခဲ့ပါပြီ။ လုမင်ကို နောက်တစ်ကြိမ်တွေ့ရင် သူ့ကို အလွယ်တကူ သတ်နိုင်မှာ သေချာပါတယ်"

ဝမ့်မိသားစု၏ ဘိုးဘေးက အပြုံးဖြင့် ချီးကျုးလိုက်သည်။

"ဟုတ်တာပေါ့၊ တိရှန်ရဲ့ ပါရမီနဲ့ ဝိညာဉ်နတ်ဘုရား နယ်ပယ်ထဲကို ချိုးဖြတ်ပြီးရင် ဟင်းလင်းပြင်တာအိုရဲ့ ကြောက်စရာကောင်းတဲ့ စွမ်းအားကို ပိုပြီး အသုံးချနိုင်မှာ၊ ဒါဆိုရင် လုမင်ကို သတ်ဖို့က ပိုပြီး လွယ်ပါလိမ့်မယ်"

ကျန်းမိသားစု၏ ဘိုးဘေးကလည်း မြှောက်ပင့်ပေးရန် အခွင့်အရေးကို လက်လွတ်မခံပေ။

"အင်း"

နတ်ဧကရာဇ်က ခေါင်းညိတ်ပြပြီး ပြောလိုက်သည်။

"ရှန်အာက တကယ်တော်ပါတယ်။ သူက အရှေ့ပိုင်းကန္တာရမှာတော့ ထိပ်သီး ပါရမီရှင်တစ်ယောက်ပဲ၊ ဒါပေမယ့် ကမ္ဘာ့သူရဲကောင်းတွေကို လျှော့တွက်လို့မရဘူး။ ဗဟိုတိုက်ကြီးဟာ အမြဲတမ်း ပါရမီရှင်အများအပြား ထွက်ပေါ်လာတဲ့ နေရာပဲ။ ဒီခေတ်မှာ ရှန်အာထက် အားမနည်းတဲ့ ပါရမီရှင်တွေ အများကြီးရှိကြတယ်။ ဘီလူးကြီးငါးကောင်လို ပိုပြီး အစွမ်းထက်တဲ့ တည်ရှိမှုတွေလည်း ရှိသေးတယ်။ ဒါကြောင့် ကိုယ့်ကိုယ်ကိုယ် သိပ်ပြီး မဝံ့ကြွားပါနဲ့"

"ရှန်အာ နားလည်ပါပြီ"

တိရှန်က ဦးညွှတ်ကာ ပြောသည်။

"ကောင်းပြီလေ၊ ဗဟိုတိုက်ကြီးရဲ့ ထျန်းရှအကယ်ဒမီက ကျောက်စိမ်းကန်ကို အများပိုင်အတွက် ဖွင့်လှစ်ပေးတော့မယ်လို့ သတင်းရတယ်။ ကမ္ဘာအရပ်ရပ်က ပါရမီရှင်တွေ အဲဒီကို သွားရောက်ကြမှာ၊ မင်းတို့နှစ်ယောက်လည်း ဗဟိုတိုက်ကြီးကို အတူတူသွားသင့်တယ်။ အဲဒီမှာ ကမ္ဘာ့ပါရမီရှင်တွေနဲ့ တွေ့ဆုံပြီး ကိုယ့်ကိုယ်ကို လေ့ကျင့်ပါ"

ဧကရာဇ်ရီက ပြောလိုက်၏။

တိရှန်နှင့် တုန်ဖန့်ယု၏ မျက်လုံးများလည်း တောက်ပသွား၍ မျှော်လင့်ထားသည့် အကြည့်များကို လှစ်ဟလာတော့သည်။

ဗဟိုတိုက်ကြီးကို ရှန်းဟွမ်တိုက်ကြီး၏ အလယ်ဗဟိုဟု လူသိများသည်။ ၎င်း၏ ပါရမီရှင်များက မည်မျှကြွယ်ဝက တန်ခိုးကြီးမားကြမည်နည်း။ သူတို့က ယင်းကို စောင့်မျှော်နေခဲ့သည်။

………

အလားတူ မြင်ကွင်းက ကောင်းကင်အလောင်းကောင်ဂိုဏ်းနှင့် ကောင်းကင်နတ်ဆိုးချိုင့်ဝှမ်းတွင်လည်း ဖြစ်ပွားနေပေသည်။

ကောင်းကင်အလောင်းဂိုဏ်းရှိ ကြီးမားသော ရှေးဟောင်းသင်္ချိုင်းတစ်ခုတွင်၊ ရွယ်ကျန့်ရီနှင့် ရှီကျန့်က အလောင်းဧကရာဇ်၏ရှေ့တွင် ရိုသေလေးစားစွာ ရပ်နေခဲ့သည်။

"အခုဆိုရင် ဗဟိုတိုက်ကြီးက ထျန်းရှအကယ်ဒမီဟာ ကျောက်စိမ်းတံတိုင်းကို အများသူငှာအတွက် ဖွင့်လှစ်တော့မှာမို့ မင်းနှစ်ယောက်လည်း ကံစမ်းဖို့ ဗဟိုတိုက်ကြီးကို သွားသင့်တယ်။ ငါ့အထင်ပြောရရင် မြောက်ပိုင်းလွင်ပြင်၊ အနောက်ပိုင်းကန္တာရနဲ့ တောင်ပိုင်းက ပါရမီရှင်တွေလည်း ဗဟိုတိုက်ကြီးကို သွားလိမ့်မယ်။ ဗဟိုတိုက်ကြီးက ပါရမီရှင်တွေရဲ့ စုဝေးရာနေရာ ဖြစ်လာတော့မှာလေ၊ မင်းတို့နှစ်ယောက်လည်း သွားပြီး လေ့ကျင့်သင့်တယ်"

အလောင်းဧကရာဇ်က ပြောသည်။

"ကောင်းပါပြီ"

ရွယ်ကျန့်ရီနှင့် ရှီကျန့်လည်း ဦးညွှတ်ပြီး ပြောလိုက်ကြလေသည်။

ကောင်းကင်ဘုံနတ်ဆိုးတောင်ကြားတွင်၊ အိုတုနှင့် ဖုန်းရွယ်တို့လည်း နတ်ဆိုးဧကရီ၏ အမိန့်ဖြင့် ဗဟိုတိုက်ကြီးသို့သွားရန် တည်နေရာရွှေ့ပြောင်းခြင်း ဝင်္ကပါပေါ်သို့ တက်လှမ်းခဲ့ကြသည်။

.....

"ဝေါင်း ဝေါင်း ဝေါင်း"

လူဆိတ်ညံသော တောင်တန်းတစ်ခုတွင် ခေါင်းသုံးလုံးရှိသော ကျားနက်တစ်ကောင်က ဟိန်းဟောက်ကာ လုမင်ဆီသို့ ခုန်ဝင်လာသည်။

ကြမ်းကြုတ်သော အငွေ့အသက်များကလည်း တောအုပ်ကို လွှမ်းခြုံထား၏။ ခေါင်းသုံးလုံး တပြိုင်နက်တည်း ဟိန်းဟောက်လိုက်သည်တွင် ကောင်းကင်မှ တိမ်များလွင့်ပါးကာ တောတစ်ခုလုံး ဖရိုဖရဲ ဖြစ်သွားရသည်။

ဦးခေါင်းသုံးလုံးက မီး၊ လျှပ်စီးနှင့် ရေခဲများကို အသီးသီး မှုတ်ထုတ်ကြကာ အလွန် ကြောက်စရာကောင်း၏။

ဤသည်မှာ စိတ်ဝိဥာဉ်နှစ်ထပ်ရှိသော မိစ္ဆာသားရဲကြီး ဖြစ်သည်။

--------