ထာဝရနဂါးတန်ခိုးရှင်

အားလုံးပဲ မင်္ဂလာပါခင်ဗျ။ လက်ရှိမှာ အပိုင်း ( ၂၀၀၀ ) ကျော် ဘာသာပြန်ထားပြီး သိုင်းလောကမိတ်ဆွေ အတော်များများလည်း သိပြီးသား ဖြစ်နိုင်လောက်တဲ့ "ထာဝရနဂါးတန်ခိုးရှင်" အမည်ရှိတဲ့ စာစဉ်လေးနဲ့ မိတ်ဆက်ပေးပါရစေ။ စာရေးသူရှုထောင့်.... စာစဉ်‌အကြောင်း ပြောရမယ်ဆိုရင် တစ်ချိန်က လူကြိုက်များခဲ့သလို အခုလည်း နှစ်သက်သူအများအပြား ရှိနေဆဲဖြစ်တဲ့ Zero to Hero ပါပဲ။ ဒါပေမဲ့ ပြန်လည်မွေးဖွားသူတော့ မဟုတ်ဘူးပေါ့။ ဇာတ်ဆောင်စရိုက်က ရိုးရှင်းပါတယ်။ သူက လူကောင်းတစ်ယောက်လို့ ပြောမရပေမဲ့ လူဆိုးလည်း မဟုတ်ဘူး။ သူမှန်တယ်ထင်ရင် ဘယ်သူမှ ဂရုမစိုက်ဘူး။ ဇာတ်လမ်းအများစုမှာ ပါဝင်သလို သခင်လေးတွေကို ရိုက်၊ ဂိုဏ်းတော်ကြီးက လိုက်၊ သတ်၊ ဒီလိုဇာတ်ကွက် သိပ်မပါဘူး။ အထူးသဖြင့် ပြောရရင် မျက်နှာဖြတ်ရိုက်တာတွေ မပါသလောက် ရှိတာပါပဲ။ ကျွန်တော်တော့ သဘောကျတယ်။ နောက်ပြီးတော့ ဇာတ်နာမှာလည်း စိုးရိမ်စရာမလိုဘူး။ အစပိုင်း သုံးခန်း၊ လေးခန်းလောက်ပဲ ပါတာပါ။ အဆင့်တက်တာကလည်း မနှေးဘဲ မြန်တဲ့အထဲပါတော့ စိတ်မရှည်စရာလည်း မလိုတော့ဘူးပေါ့။ သားရဲတစ်ကောင်ရဲ့ လှုပ်ရှားဟန်နဲ့ အစစ်အမှန်နဂါးအသွင်လည်း ပြောင်းနိုင်တာကြောင့် နဂါးတစ်ကောင်ရဲ့ ဟန်အမူအရာမျိုးကိုလည်း မြင်ကြရဦးမှာပါ။ ပြောရရင် စာစဉ်က အများနဲ့တူပေမဲ့ အများနဲ့ မတူတဲ့ စာစဉ်ကောင်းတစ်ခုပါပဲ။ စလာကတည်းကကို ပျင်းစရာတစ်ချက်မှမကောင်းဘဲ တစ်ခန်းပြီးတစ်ခန်းကို ဆွဲဆောင်အားကောင်းလွန်းပါတယ်။ ဒါကြောင့် မဖတ်ရသေးရင် ဖတ်ဖြစ်အောင် ဖတ်ကြည့်ကြဖို့ တိုက်တွန်းလိုက်ပါရစေ။ ........... အကျဉ်းချုပ်... ငါးကြီးက ငါးကလေးကိုစားတဲ့ အင်အားကြီးသူ အနိုင်ရတဲ့ တောရိုင်းဆန်တဲ့ ကမ္ဘာကြီးကို ရောက်ခဲ့ပြီဆိုရင် မိတ်ဆွေတို့အနေနဲ့ ဒီအတိုင်း ထိုင်နေနိုင်မှာလား၊ ဒါမှမဟုတ် ကိုယ်တိုင်အင်အားကြီးအောင် ကြိုးစားသွားမှာလား။ အများစုကတော့ ကြိုးစားမယ်လို့ ထင်ပါတယ်။ သူလည်း ဒီလိုပဲပေါ့။ သူဆိုတာတော့ "လုမင်" ပါ။ လုမင်ဆိုတာက ရှမ်းဟွမ်တိုက်ကြီး၊ အရှေ့တိုင်းက မြို့ငယ်လေးတစ်မြို့မှာနေတဲ့ ရိုးသားတဲ့ လူငယ်လေးတစ်ယောက်။ သူက အမေတစ်ခု၊ သားတစ်ခု နှစ်ခုပါပဲ။ အဖေက လျှို့ဝှက်စွာ ပျောက်ဆုံးသွားခဲ့ပြီ။ အဲ... နှစ်ခုဆိုလို့ အစေခံလေးတစ်ယောက်လည်း ရှိတော့ သုံးခုပေါ့ဗျာ။ ဒီလို သုံးခုနေလာတဲ့သူ့မှာ ချစ်ရတဲ့ ကောင်မလေးတစ်ယောက်တော့ရှိတယ်။ သူ့ရည်ရွယ်ချက်က ရိုးရိုးလေး၊ သူချစ်ရသူတွေကို ကာကွယ်မယ်။ ကျင့်ကြံခြင်းလမ်းစဉ်ကို လျှောက်လှမ်းမယ်။ ဒါပေမဲ့ ရက်စက်တဲ့ လောကကြီးရဲ့ အမှန်တရားက သူအသင့်မဖြစ်ခင် ရိုက်ခတ်လာခဲ့တယ်။ ဒါက သူ့ရဲ့ချစ်သူ... သူ ချစ်ရတဲ့သူက သစ္စာဖောက်ပြီး သူ့ရဲ့ သွေးမျိုးဆက်ကို ယူသွားခဲ့တာပါ။ ဒီလောကမှာ ကျင့်ကြံခြင်းလမ်းစဉ်ကို လျှောက်လှမ်းချင်တယ်ဆိုရင် သွေးမျိုးဆက်ဆိုတာ ရှိရတယ်။ သွေးမျိုးဆက်က သိုင်းဝိညာဉ်နဲ့ လုပ်ဆောင်ပုံတူတယ်လို့ ပြောလို့ရပါတယ်။ သွေးမျိုးဆက်တောင်မရှိတော့တဲ့အတွက် မျိုးနွယ်စုထဲမှာ သူဟာ ဘာမှမတတ်နိုင်တော့ဘူး။ သူ့ရဲ့ မိခင်မပြောနဲ့ သူ့ကိုယ်သူ ကာကွယ်ဖို့တောင် အင်အားမရှိတော့ဘူး။ ဒီအတွက် ခံပြင်းပြီး စိတ်ပျက်နေရတဲ့အချိန်၊ သူ့ဖခင် ချန်ထားခဲ့တဲ့ ဆွဲပြားကနေ နဝမနဂါးဆိုတဲ့ အထွတ်အထိပ်သားရဲ သွေးမျိုးဆက်ကို ပြန်လည်မွေးဖွားလာရတော့တယ်။ တချိန်တည်းမှာပဲ ထိပ်သီးတန်ခိုးရှင်တစ်ဦးရဲ့ ရတနာကို လက်ခံရခဲ့တယ်။ ဒါကြောင့် သူ့ရဲ့ စွမ်းရည်ဟာ တဟုန်ထိုး တိုးတက်ခဲ့ပါတယ်။ ဒါပေမဲ့... အခွင့်အလမ်းနဲ့ အန္တရာယ်က ဒွန်တွဲနေတယ် ဆိုတဲ့အတိုင်း၊ သူ့သွေးမျိုးဆက်ကို အလိုရှိတဲ့ အထွတ်အထိပ် တန်ခိုးရှင်တစ်ပါး ရှိနေတယ်။ ဒီလို အထွတ်အထိပ် တန်ခိုးရှင်ရဲ့ လက်ကနေ တက်သစ်စလုမင် ဘယ်လိုရှောင်တိမ်းသွားရမလဲ။ သူ့ရဲ့ မူလ ရည်မှန်းချက်အတိုင်း အထွတ်အထိပ်ကို တက်လှမ်းနိုင်ပါ့မလား။ ပျောက်ဆုံးနေတဲ့ သူ့ဖခင်နဲ့ရော ပြန်တွေ့နိုင်ပါ့မလား။ စာစဉ်ထဲမှာ ကိုယ်တိုင် စီးမျောပြီး ခံစားကြည့်လိုက်ရအောင်လားဗျာ။