အခန်း ၁၈၂၇

အပိုင်း ( 1827 ) ချင်ယွဲ့ဟု ခေါ်ခြင်း။

လုမင်က အတားအဆီးမဲ့သော ကောင်းကင်သိုင်းကို အသုံးပြုခဲ့သည်။ ကစဉ့်ကလျား နိယာမက ပျံ့နှံ့သွား၏။ ကြောက်မက်ဖွယ်ကောင်းသော လက်သီးအင်အားက ပြိုင်ဘက်၏ ဧရာမလက်ကြီးကို ဖျက်ဆီးပစ်လိုက်တော့သည်။

တစ်ခုတည်းသော နတ်နန်းတော်မှ ပါရမီရှင်၏ မျက်နှာက မည်းမှောင်သွားသည်။ သူက အေးစက်စက် အော်ပြောလိုက်၏။

"မင်းက အရည်အချင်း နည်းနည်းတော့ ရှိသားပဲ။ မင်း ဘယ်လောက်ထိ လှုပ်ရှားနိုင်မလဲဆိုတာ ကြည့်ရအောင်"

လူငယ်က သူ့လက်ကို ဝှေ့ယမ်းလိုက်တယ်။ မြေနိယာမက ပျံ့နှံ့သွားပြီး လုမင်ကို ဖိနှိပ်လိုသော တောင်များ ဖြစ်ပေါ်လာသည်။

"မင်းနဲ့ ကစားရတာ ပျင်းစရာကောင်းလွန်းတယ်"

လုမင်က လျစ်လျူရှုစွာ ပြောလိုက်သည်။ သူက ရှေ့သို့ ခြေတစ်လှမ်းတိုးပြီး လျှပ်စီးလက်သကဲ့သို့ အရှိန်ဖြင့် ပြေးသွား၏။ တစ်ချိန်တည်းမှာပင် သူက လက်သီးတစ်ချက်ကို ထိုးနှက်လိုက်သည်။ လက်သီးအင်အားက လေထဲသို့ ထိုးဖောက်ဝင်ရောက်ကာ တောင်တန်းများအားလုံးကို ကွဲကြေသွားစေတော့သည်။ ကြောက်စရာကောင်းသော လက်သီးအင်အားက ထိုမျှနှင့်မရပ်ဘဲ တစ်ခုတည်းသောနတ်နန်းတော်မှ ပါရမီရှင်ဆီသို့ ဆက်လက် ပေါက်ကွဲသွားခဲ့သည်။

ထိုလက်သီးအင်အားက မရပ်တန့်နိုင်ဘဲ ကမ္ဘာတစ်ခုလုံး ပေါက်ကွဲသွားခဲ့သလိုပင်။

တစ်ဖက်လူ၏ မျက်နှာအမူအရာက သိသိသာသာ ပြောင်းလဲသွားသည်။ မြေနိယာမက ပျံ့နှံ့သွားပြီး သူ့ရှေ့တွင် ကာကွယ်ရေးအလွှာများ ပေါ်လာကြ၏။

သို့သော်လည်း အသုံးမဝင်ပေ။ လုမင်၏ လက်သီးအင်အားက အကာအကွယ်အားလုံးကို ချေမှုန်းပစ်လိုက်သည်။

တစ်ခုတည်းသောနတ်နန်းတော်မှ ပါရမီရှင်က သွေးတစ်လုတ်ကို အန်ထုတ်လိုက်ရသည်။ သူ့ခန္ဓာကိုယ်ကလည်း လွင့်စဉ်ပြီး တိုက်ပွဲစင်မြင့်မှ ပြုတ်ကျသွားတော့သည်။

နေရာတစ်ခုလုံး တိတ်ဆိတ်သွားခဲ့သည်။

မဟာသူတော်စင်နယ်ပယ် အထွတ်အထိပ် ကျင့်ကြံမှုအခြေခံရှိသော တစ်ခုတည်းသောနတ်နန်းတော်၏ ပါရမီရှင်ကို လုမင်က အလွယ်တကူ အနိုင်ယူသွားခဲ့သည်။ ဒါက အပြတ်သတ် ချေမှုန်းခြင်းဖြစ်ပြီး အနည်းငယ်မျှပင် ခုခံနိုင်စွမ်း မရှိခဲ့ပေ။

မဟာသူတော်စင်နယ်ပယ် အဆင့်နိမ့်အဆင့်မှ လူတစ်ဦးက ဤမျှကြောက်စရာကောင်းသော တိုက်ခိုက်ရေးစွမ်းအားကို မည်သို့ပိုင်ဆိုင်နိုင်မည်နည်း။

တစ်ခုတည်းသောနတ်နန်းတော်မှ အခြား ပါရမီရှင်များလည်း မျက်နှာများ မှုန်ကုပ်သွားကြသည်။

မော့လန်၊ ရွှေကျီးကန်း ဒုတိယမင်းသားနှင့် ရှေးဟောင်းလ မြင့်မြတ်နယ်မြေမှ ပါရမီရှင်များနှင့် ခရမ်းရောင်မီးလျှံအိမ်တော်မှ အခြား ပါရမီရှင်များမှာတော့ ခံစားချက်အမျိုးမျိုး ဖြစ်ပေါ်နေကြလေသည်။

သို့ရာတွင်၊ သူတို့က လုမင်၏ တိုက်ခိုက်နိုင်စွမ်းကို ယခင်ကပင် သိနှင့်ခဲ့ကြပြီး ဖြစ်သည်။ ဤရလဒ်ကြောင့် သူတို့က အံ့ဩခြင်း မဖြစ်မိတော့ပေ။

"ဒါက ဘယ်လိုဖြစ်နိုင်မှာလဲ"

လမ်းမပေါ်တွင် လုမင်ကို လက်ဝါးတစ်ချက်ဖြင့် နောက်ဆုတ်စေခဲ့သော လူငယ်က ဤမြင်ကွင်းကြောင့် မျက်လုံးများ ပြူးကျယ်သွားရသည်။

သူကိုယ်တိုင် လုမင်ကို လက်ဝါးတစ်ချက်ဖြင့် လွင့်စဉ်စေခဲ့သေးသည် မဟုတ်လော။ သူ၏ တိုက်ခိုက်နိုင်စွမ်းက ယခုအခါ အဘယ်ကြောင့် ဤမျှကြောက်စရာကောင်းလာသနည်း။

"ဟားဟားဟား... ဆဌမမြောက် အစ်ကို၊ ငါမင်းကို အရင်က ပြောဖူးတယ်။ ကျင့်ကြံမှုအခြေခံက လူတစ်ယောက်ရဲ့ တိုက်ပွဲခွန်အားကို အမြဲတမ်း ကိုယ်စားမပြုဘူး"

အိုးရန်ဝူရွှမ့်က ရယ်မောလိုက်သည်။

အိုးရန်ဝူကျိ၏ မျက်နှာကတော့ မည်းမှောင်နေပြီး ဘာစကားမျှ မပြောတော့ပေ။

ဟွမ်လင်နှင့် လုံချန်တို့က တစ်ခုတည်းသောနတ်နန်းတော်မှ ပါရမီရှင်များကို အနိုင်ယူနိုင်ခဲ့သည်။ ယခုမူ လုမင်ကလည်း တစ်ခုတည်းသောနတ်နန်းတော်မှ ပါရမီရှင်ကို အနိုင်ယူခဲ့ပြီ။ အိုးရန်ဝူကျိပင်လျှင် မယုံနိုင်သလို ခံစားခဲ့ရသည်။

"မဟာသူတော်စင်နယ်ပယ် ကျင့်ကြံမှုအခြေခံရှိရင် ဘယ်သူမဆို လာပြီးတော့ တိုက်ခိုက်နိုင်တယ်"

လုမင်က တိုက်ပွဲစင်မြင့်ပေါ်တွင်ရပ်ပြီး ပြောလိုက်သည်။ သူ့အသံက နေရာအနှံ့ ပျံ့နှံ့သွား၏။

သို့သော်လည်း ယခုတစ်ကြိမ်တွင် မည်သူကမျှ သူ့ကို မထီမဲ့မြင်ပြုခြင်း မရှိတော့ပေ။

အကြောင်းမူ၊ ယခုလေးတင် လုမင် ပြသခဲ့သော ခွန်အားက ထိုသို့လုပ်ရန် ခွန်အားရှိကြောင်း သက်သေပြနိုင်သောကြောင့်ပင်။

"ငါလာပါရစေ"

စကားသံတစ်ခုကို ကြားလိုက်ရသည်။ ထို့နောက်တွင် လူတစ်ဦးက လေထဲသို့ ခုန်လွှားပြီး တိုက်ပွဲစင်မြင့်ပေါ်သို့ ဆင်းသက်လိုက်၏။

'ယုကျစ်'

လူများစွာ၏ နှလုံးသားများ တုန်လှုပ်သွားကြသည်။

ယုကျစ်က မဟာသူတော်စင်နယ်ပယ် ပြီးပြည့်စုံခြင်းအဆင့်မှ ပညာရှင်တစ်ဦး ဖြစ်သည်။ ယခင်က သူသည် ပြင်းထန်သော တိုက်ခိုက်ရေးစွမ်းအားဖြင့် ခရမ်းရောင်မီးလျှံအိမ်တော်၏ ပါရမီရှင်ကို အနိုင်ယူဖူးပေသည်။

မဟာသူတော်စင်နယ်ပယ် ပြီးပြည့်စုံခြင်းအဆင့်တွင် သူ၏ တိုက်ခိုက်နိုင်စွမ်းက ထိပ်တန်းအဆင့်သို့ ရောက်နေပြီဟု ဆိုနိုင်သည်။ ဘုရင်ခန္ဓာ မဟုတ်ပါက၊ အဆင့်တူတွင် သူသည် ပြိုင်ဘက်ကင်းသလောက် ဖြစ်နေပြီ။

ယခုမူ သူဟာ မဟာသူတော်စင်နယ်ပယ် အဆင့်နိမ့်အဆင့်မှ လုမင်ကို တိုက်ခိုက်တော့မည် ဖြစ်သည်။

လူတော်တော်များများက အလွန်သိချင်မိသည်။ လုမင်က ယုကျစ်ကို တိုက်ခိုက်နိုင်မည်လော။

"လုမင်က သန်မာပေမဲ့ ယုကျစ်ကိုတော့ ယှဉ်လို့မရဘူး။ မဟာသူတော်စင်နယ်ပယ် အဆင့်နိမ့်အဆင့်နဲ့ ပြီးပြည့်စုံခြင်းအဆင့် မဟာသူတော်စင်တစ်ပါးကို အနိုင်ယူနိုင်တဲ့သူရှိကြောင်း ငါကြားဖူးပါတယ်။ ဒါပေမဲ့ ယုကျစ်လို ထိပ်တန်း ပါရမီရှင်တစ်ယောက်ကို အနိုင်ယူနိုင်သူကိုတော့ မကြားဖူးဘူး"

"အမှန်ပဲ၊ ကောင်းကင်သားတော်တွေတောင် ဒီလိုလုပ်ဖို့ အခက်တွေ့လိမ့်မယ်။ ကျင့်ကြံမှုအဆင့် ကွာခြားချက်က ကြီးမားလွန်းတယ်လေ"

တစ်ခုတည်းသောနတ်နန်းတော်၏ ပါရမီရှင်များက ဆွေးနွေးလိုက်ကြသည်။

ယခုတစ်ကြိမ်တွင် မော့လန်၊ ရွှေကျီးကန်း ဒုတိယမင်းသားနှင့် ခရမ်းရောင်မီးလျှံအိမ်တော်၏ ပါရမီရှင်များသည်ပင် လုမင်အတွက် အနိုင်ရရှိရန် အခွင့်အလမ်း မမြင့်မားဟု ထင်မြင်ခဲ့ကြသည်။

လုမင်က ဝမ်ကျန်းရန်ကဲ့သို့ ပါရမီရှင်ကို သတ်နိုင်သည်။ သို့ရာတွင်၊ ဝမ်ကျန်းရန်၏ ကျင့်ကြံမှုက မဟာသူတော်စင်နယ်ပယ် ပြီးပြည့်စုံခြင်းအဆင့်ဖြစ်လျှင်ပင် ယုကျစ်ကို ယှဉ်ပြိုင်နိုင်မည် မဟုတ်ပါ။

"မင်း လှုပ်ရှားလိုက်စမ်း"

လုမင်က ဂရုမစိုက်သလို ပြောလိုက်သည်။

"သတ်"

ယုကျစ်၏ ခန္ဓာကိုယ်မှ အဖြူရောင်မီးတောက်များ တောက်လောင်လာသည်။ အပူချိန်ကလည်း ကြောက်ခမန်းလိလိ မြင့်မားလာ၏။ မီးတောက်များက ဓားတစ်လက်အဖြစ် ဖွဲ့စည်းကာ လုမင်ကို ခုတ်ချလိုက်တော့သည်။

လုမင်က ကစဉ့်ကလျားနိယာမကို အသက်သွင်းပြီး အတားအဆီးမဲ့သော ကောင်းကင်သိုင်းကို အသုံးပြုလိုက်သည်။ သူက သူ့လက်ကို ဓားတစ်လက်အဖြစ် အသုံးပြုပြီး တိုက်ခိုက်လိုက်၏။

"ဝုန်း"

ပြင်းထန်သော ပေါက်ကွဲသံတစ်ခု ထွက်ပေါ်လာပြီး မီး‌စွမ်းအားက တိုက်ပွဲစင်မြင့်တစ်ဝက်ခန့်တွင် ပြည့်နှက်သွားသည်။ ထို့နောက်မှာတော့ လူရိပ်တစ်ခုက သူ့ကိုယ်သူ တည်ငြိမ်အောင် မထိန်းနိုင်မီ ခြေလှမ်း ခုနစ်လှမ်း၊ ရှစ်လှမ်းခန့် နောက်ပြန်ဆုတ်သွားသည်ကို မြင်လိုက်ရတော့သည်။

ထိုပုံရိပ်က အမှန်တကယ်ပင် ယုကျစ် ဖြစ်သည်။ တစ်ဖက်မှာတော့ လုမင်က တည်ငြိမ်စွာရပ်နေပြီး လုံးဝ မတုန်လှုပ်ပေ။

"ယုကျစ် ရှုံးသွားပြီ"

လူတော်တော်များများ အံ့အားသင့်သွားကြသည်။

ယုကျစ်က လုမင်ကို မယှဉ်နိုင်ဘူးလား။

"သူထိန်းချုပ်ထားတဲ့ နိယာမက ကစဉ့်ကလျားနိယာမ ဖြစ်ပုံရတယ်"

တစ်စုံတစ်ယောက်က ရုတ်တရက် အော်လိုက်သည်။

"ဟုတ်တယ်ဟ၊ ဒါက ဒဏ္ဍာရီလာ ကစဉ့်ကလျားနိယာမနဲ့ အလွန်ဆင်တူတယ်။ ဒီလူက ကောင်းကင်သားတော်တွေထဲက တစ်ယောက်ဖြစ်တဲ့ ကစဉ့်ကလျားရဲ့သားတော် ဖြစ်နိုင်မလား"

"ဒါဖြစ်သင့်တယ်၊ မဟုတ်ရင် သူက ဒီလောက် အစွမ်းထက်မှာ မဟုတ်ဘူး"

"ကစဉ့်ကလျားရဲ့သားတော်က ဒီမှာပေါ်လာဖို့ ငါမမျှော်လင့်ထားဘူး"

လုမင်က ကစဉ့်ကလျားနိယာမကို ထိန်းချုပ်ထားကြောင်း မြင်လိုက်ရပြီးနောက် ၎င်းတို့က ချက်ချင်းပင် ဆွေးနွေးပြောဆိုလိုက်ကြသည်။

အိုးရန်ဝူကျိ၏ မျက်နှာက ပို၍ပင် အေးစက်လာသည်။ အိုးရန်ဝူရွှမ့်က ကစဉ့်ကလျား၏သားတော်ကိုသိရန် မမျှော်လင့်ခဲ့ပေ။

"နဝမမြောက် ညီလေး၊ မင်းရဲ့ အဆက်အသွယ်တွေက တကယ်ကို ကျယ်ပြန့်တာပဲ။ မင်းက ကစဉ့်ကလျားရဲ့သားတော်ကိုတောင် သိတယ်"

အိုးရန်ဝူကျိက မနာလိုစိတ်အပြည့်ဖြင့် ပြောလိုက်သည်။

အမှန်ပင် မနာလိုမိ၏။ အိုးရန်ဝူရွှမ့် ဖိတ်ခေါ်ခဲ့သည့် ဟွမ်လင်နှင့် လုံချန်တို့က ဘုရင်နိယာမများကို ထိန်းချုပ်ထားသည်။ လုမင်ဆိုပါက အသန်မာဆုံး နိယာမဆယ်ခုထဲမှ တစ်ခုဖြစ်သည့် ကစဉ့်ကလျားနိယာမကိုပင် ထိန်းချုပ်ထားသေးသည်။ ထိုသို့သော ပါရမီရှင်တစ်ဦး၏ ကျင့်ကြံမှုအခြေခံက ယခုအချိန်တွင် အားနည်းနေသေးသော်လည်း အနာဂတ်တွင် သေချာပေါက် ကြောက်စရာကောင်းနေပေလိမ့်မည်။

ဤမျှအစွမ်းထက်သော ပါရမီရှင်ကို သူက အဘယ်ကြောင့် မသိခဲ့ရသနည်း။

"ချီးပဲ"

ယုကျစ်က မျက်နှာမသာမယာဖြင့် အော်ဟစ်ပြီး နောက်ဆုတ်သွားသည်။

တစ်ခုတည်းသောနတ်နန်းတော်မှ လူများသည် ကမ္ဘာပေါ်တွင် တစ်ဦးတည်းသောသူဟု လူသိများသော်လည်း ယခုအခါတွင် သူ၏ကျင့်ကြံမှုအဆင့်ထက် များစွာနိမ့်ကျသော လုမင်၏ ဖိနှိပ်ခြင်းကို ခံခဲ့ရသည်။ ဒါကို သူ လုံးဝ သည်းမခံနိုင်ပေ။

သူ့ခန္ဓာကိုယ်ပေါ်မှ မီးတောက်များက ပို၍ပင် ပြင်းထန်လာသည်။ အဖြူရောင်မီးတောက်များက ကခုန်နေပြီး သူ့ပတ်ဝန်းကျင် လေဟာနယ်က အက်ကြောင်းထလာခဲ့၏။

သို့သော်လည်း ထိုအချိန်တွင် လုမင်အကြည့်က ယုကျစ်ထံမှ ဖယ်ရှားပြီး တစ်ခုတည်းသောနတ်နန်းတော်အဖွဲ့မှ ချင်ယွဲ့ထံသို့ ကျရောက်သွားသည်။

တစ်ချိန်တည်းမှာပင်၊ ချင်ယွဲ့ကလည်း လုမင်ကို လုံးဝ မသိသကဲ့သို့ စူးစမ်းလိုစိတ်ဖြင့် စူးစိုက်ကြည့်နေပေသည်။

"ချင်ယွဲ့၊ ငါက လုမင်ပါ။ ငါက မင်းရဲ့ သခင်လေးလေ... မင်း ငါ့ကို မှတ်မိသေးလား"

လုမင်က အသံကျယ်ကျယ်ဖြင့် အော်ပြောလိုက်သည်။

"လုမင်လား... သခင်လေးလား"

ထိုစကားများက ချင်ယွဲ့ကို အတွေးဝင်သွားစေသကဲ့သို့ မျက်မှောင်ကြုတ်သွားစေသည်။

"မင်း အတင့်ရဲလှချေလား"

"ဒီကောင်က ဂိုဏ်းတူညီမလေးချင်ယွဲ့ကို အခွင့်ကောင်းယူနေပြန်ပြီ"

"ဂိုဏ်းတူအစ်ကို ယုကျစ်၊ သူ့ကို သင်ခန်းစာပေးပါ"

တစ်ခုတည်းသောနတ်နန်းတော်၏ ပါရမီရှင်များက ဒေါသတကြီးဖြင့် အော်လိုက်ကြသည်။

"တောက်လောင်နေသော မီးတောက်မုန်တိုင်းဓား"

ထိုအချိန်တွင်၊ ယုကျစ်က ဟိန်းဟောက်လိုက်သည်။ သူ့ခန္ဓာကိုယ်ပေါ်ရှိ မီးတောက်များက ကြီးမားသော ဓားသွားတစ်ခုအဖြစ်သို့ ပေါင်းစပ်သွား၏။ ဓားကြီးက တခဏချင်းမှာပင် အကြိမ်ရာနှင့်ချီ ခုတ်ထစ်ခဲ့ကာ မီးလျှံဓားအလင်းများက လုမင်ဆီသို့ ဖြတ်သန်းသွားတော့သည်။

ဤသည်မှာ ယုကျစ်၏ နတ်ဘုရားစွမ်းရည်ဖြစ်ပြီး ၎င်း၏စွမ်းအားက ကြောက်စရာကောင်းလွန်းသည်။

"ထွက်သွား"

လုမင်က အော်ငေါက်ပြီး လက်ညှိုးတစ်ချက်ညွှန်လိုက်သည်။ ကြီးမားသော ကစဉ့်ကလျားကပ်ဘေး လက်ချောင်းကြီးတစ်ခု ဖြစ်ပေါ်လာပြီး ယုကျစ်ဆီသို့ ပေါက်ကွဲသွား၏။

"ဝုန်း"

ကစဉ့်ကလျား ကပ်ဘေးလက်ချောင်းက နတ်ဘုရား၏ လက်ချောင်းကဲ့သို့ပင်။ ထိပ်တိုက် တွေ့ဆုံမိသည်နှင့် ဓားအလင်းများ အားလုံး ကွဲကြေသွားကြသည်။ ကြောက်စရာကောင်းသော အင်အားက ယုကျစ်ဆီသို့ ဆက်လက်တိုးဝင်သွား၏။ ယုကျစ်က မရပ်တန့်မီ တိုက်ပွဲကွင်းပြင်အစွန်းသို့ ဆုတ်သွားရတော့သည်။ သူ့ခန္ဓာကိုယ်က အနည်းငယ် တုန်လှုပ်သွားပြီး တိုက်ပွဲစင်မြင့်မှ လွင့်စဉ်ကျလုနီးပါး ဖြစ်သွားခဲ့ရသည်။

ထိုအချိန်ထိ၊ လုမင်၏ အကြည့်များက ချင်ယွဲ့ထံတွင် ရှိနေဆဲဖြစ်ပြီး ယုကျစ်ကို ဂရုမစိုက်သေးပေ။

"ချင်ယွဲ့၊ ငါတို့ နောက်ဆုံးတွေ့ခဲ့ရတာ ဆယ်နှစ်ကျော်ကြာသွားပြီ။ သခင်ကြီးနဲ့ သခင်မဖြစ်တဲ့ ငါ့အဖေ လုယွမ်ထျန်းနဲ့ ငါ့အမေ လီပင်းတို့ကို မှတ်မိသေးလား။ သူတို့အားလုံးက မင်းကို သိပ်ပြီးသတိရနေကြတာ"

လုမင်က ဆက်ပြောလိုက်သည်။