အခန်း ၂၀၀၆

အပိုင်း ( 2006 ) အားလုံးကို သတ်ခြင်း။

"ရွံစရာကောင်းလိုက်တာကွာ၊ နှိုင်းစရာတောင်မရှိဘူး"

ဟွမ်လီက ဒေါသတကြီးဖြင့် ပြောလိုက်သည်။

တခြားသူများ၏ မျက်လုံးများမှာလည်း ဒေါသတို့ ပြည့်နှက်ခဲ့၏။

အင်အားစုတချို့က ခုခံလိုကြသော်လည်း အားလုံး သတ်ဖြတ်ခံခဲ့ရသည်။ သူတို့၏အင်အားက အကန့်အသတ်ရှိသောကြောင့် ဘာမျှ မတတ်နိုင်ခဲ့ကြပေ။

"မကောင်းတော့ဘူး၊ ဝေ့မျိုးနွယ်က အန္တရာယ်ကျရောက်နေပြီ"

လုမင်၏ မျက်နှာအမူအရာက ရုတ်တရက် ပြောင်းလဲသွားသည်။

ဝေ့မျိုးနွယ်စု၏ အကျော်အမော်များက အားလုံးနီးပါး သေဆုံးခဲ့ကြပြီ။ ဝေ့မျိုးနွယ်စုကို ပြန်လည်တည်ထောင်ရန် လူအနည်းငယ်သာ ကျန်ရှိသည်။ ဤအခြေအနေတွင်၊ ဝေ့မျိုးနွယ်၏ နယ်မြေနှင့် အခြား အရင်းအမြစ်များကို ဟန်မိသားစုနှင့် ဟဲမိသားစုက သေချာပေါက် ပစ်မှတ်ထားလိမ့်မည်။

ဝေ့ရှန်းက ပြန်သွားခဲ့ပြီမို့ သူ အန္တရာယ်ကျရောက်နေနိုင်သည်။ ဒါကို စဉ်းစားမိတော့ တခြားသူများ၏ မျက်နှာအမူအရာများလည်း ပြောင်းလဲသွားတော့သည်။

"ဝေ့မျိုးနွယ်ကို သွားကြစို့"

လုမင်က ဦးဆောင်ပြီး ဝေ့မျိုးနွယ်စုသို့ ပြေးထွက်သွားသည်။

ဤအချိန်တွင် ဝေ့မျိုးနွယ်စုက အမှန်တကယ် အန္တရာယ်ကျရောက်နေပြီ ဖြစ်သည်။ ဟဲမျိုးနွယ်စုက ဤနေရာကို မျက်စိကျနေကြ၏။

"ဝုန်း"

ဝေ့မျိုးနွယ်စုဝင် အန္တိမသူတော်စင်တစ်ပါးကို ဟဲမိသားစုမှ ဧကရာဇ်တစ်ပိုင်း ကျင့်ကြံသူတစ်ဦးက တစ်ချက်တည်းဖြင့် သတ်ခဲ့သည်။ သူ့အလောင်းက မြေပြင်ပေါ်ကို ပြုတ်ကျသွား၏။

"ဒီနေ့ မင်းတို့ သဘောမတူရင်တောင် သဘောတူရလိမ့်မယ်။ မဟုတ်ရင် သေရမယ်"

ဟဲမိသားစုဝင် ဧကရာဇ်တစ်ပိုင်းက ဝေ့မျိုးနွယ်ဝင်များကိုငုံ့ကြည့်ကာ လှောင်ပြောင်ပြောဆိုလိုက်သည်။

ဝေ့မျိုးနွယ်စုတွင် လူတစ်ရာခန့်သာ ကျန်ရှိပြီး အသန်မာဆုံးက ဧကရာဇ်တစ်ပိုင်းမျှသာ ဖြစ်သည်။ သူတို့အဖို့ ဟဲမိသားစုကို ရင်ဆိုင်ရန် မဖြစ်နိုင်ပေ။

"ဟဲမိသားစုက တကယ်ကို ရွံစရာကောင်းတာပဲ။ မဟာဧကရာဇ်အဆင့် အင်အားစုတစ်ခုဖြစ်ပြီး အရင်ကတိုက်ပွဲမှာ အရိပ်အယောင်တောင် မပြဝံ့ခဲ့ဘူး။ အခုမှ အင်အားလာပြနေတယ်။ မင်းတို့က အမှိုက်ထက်တောင် ပိုဆိုးရွားကြတယ်"

ဝေ့ရှန်းက ဝေ့မျိုးနွယ်ကို ပြန်ရောက်နေပြီ ဖြစ်သည်။ ဤအခိုက်တွင် သူက ဒေါသတကြီးဖြင့် အော်ဟစ်လိုက်၏။

"ခွေးကောင်လေး၊ မင်းကများ ဟဲမိသားစုနဲ့ ဟဲမိသားစုရဲ့ မဟာဧကရာဇ်ကို စော်ကားဝံ့တယ်။ မင်း သေပြီပဲ"

ဟဲမိသားစု၏ ဧကရာဇ်တစ်ပိုင်း တစ်ဦးက အေးစက်စက်ဖြင့်ကြည့်ရင်း ဝေ့ရှန်းဆီသို့ လျှောက်လာသည်။

"ငါက ယွမ်တောင်မြင့်မြတ်သောကျောင်းတော်ရဲ့ တပည့်တစ်ဦးပဲ။ မင်း ငါ့ကို ထိဝံ့လား"

ဝေ့ရှန်းက ပြောသည်။

"မင်းက ယွမ်တောင်မြင့်မြတ်သောကျောင်းတော်ကဆိုရင်တောင် ဘာဖြစ်သေးလဲ။ သူ့ကိုသတ်လိုက်တော့"

ဟဲမိသားစု၏ ဧကရာဇ်တစ်ပိုင်းက အေးစက်စွာ ပြောလိုက်၏။

"ဝေ့ရှန်း၊ မြန်မြန်သွားတော့။ ငါ သူတို့ကို တားဆီးထားလိုက်မယ်"

ဝေ့မျိုးနွယ်၏ ဆံပင်ဖြူ အဘိုးအိုတစ်ဦးက အော်ဟစ်ပြီး ဟဲမိသားစု၏ ဧကရာဇ်တစ်ပိုင်းထံသို့ ပြေးသွားသည်။

"ခွေးအိုကြီး၊ မင်း ဘယ်လိုတောင်ခုခံဝံ့တာလဲ။ ဒီလိုဆိုမှတော့ ဝေ့မျိုးနွယ်က ဒီလောကမှာ ဆက်နေစရာမလိုတော့ဘူး။ သူတို့အားလုံးကို သတ်ပစ်လိုက်ကြ"

ဟဲမိသားစု၏ ဧကရာဇ်တစ်ပိုင်းတစ်ဦးက အမိန့်ပေးလိုက်သည်။

ဟဲမိသားစုတွင် ဧကရာဇ်တစ်ပိုင်း ဆယ်ဦးကျော်နှင့် ဆယ်နှင့်ချီသော အန္တိမသူတော်စင်များ ရှိကြသည်။ သူတို့၏အင်အားက ဝေ့မျိုးနွယ်၏ ကျန်ရှိသော အဖွဲ့ဝင်အင်အားထက် အပြတ်အသတ် သာလွန်ပေသည်။

"ဝှစ်... ဝှစ်..."

ဟဲမိသားစု၏ ကျင့်ကြံသူများက စတင်လှုပ်ရှားလိုက်ကြသည်။ ဧကရာဇ်တစ်ပိုင်းနှင့် အန္တိမသူတော်စင်များက ဝေ့မိသားစုဝင်များဆီသို့ ပြေးသွားကြ၏။

ဝေ့မျိုးနွယ်စုတွင် ဧကရာဇ်တစ်ပိုင်းအဆင့်က ငါးဦး၊ ခြောက်ဦးခန့်သာ ကျန်ရှိသည်။ ကျန်သူများက အန္တိမသူတော်စင်နှင့် သူ့အောက်မှ နိမ့်ကျသူများပင်။ သူတို့က ဟဲမိသားစု၏ တိုက်ခိုက်မှုကို လုံးဝ မခုခံနိုင်ခဲ့ကြပါ။

ခဏချင်းမှာပင်၊ နာကျင်စွာ အော်ဟစ်သံနှင့်အတူ ဝေ့မျိုးနွယ်ဝင်များ တစ်ယောက်ပြီးတစ်ယောက်‌ သေဆုံးခဲ့ကြသည်။

"အား..."

ဝေ့မျိုးနွယ်ဝင်များ တစ်ယောက်ပြီးတစ်ယောက် သတ်ဖြတ်ခံနေရသည်ကိုကြည့်ရင်း ဝေ့ရှန်း ဒေါသတကြီး အော်ဟစ်လိုက်သည်။

မျက်စိတစ်မှိတ်အတွင်းမှာပင်၊ ဝေ့မျိုးနွယ်၏ ဧကရာဇ်အနည်းငယ်သာ ကျန်ရှိတော့သည်။ သူတို့ကလည်း တိုက်ခိုက်နိုင်ခြင်းမရှိဘဲ အစွမ်းကုန် ခုခံနေရသည်။

သို့သော်လည်း ဟဲမိသားစုမှ ဧကရာဇ်တစ်ပိုင်း ဆယ်ယောက်ကျော်၏ ဝိုင်းရံမှုအောက်တွင် သူ၏ကံကြမ္မာက သတ်မှတ်ပြီးနေပြီ။

မကြာမီ၊ ဝေ့မျိုးနွယ်စု၏ ဧကရာဇ်တစ်ပိုင်းအားလုံး အသတ်ခံခဲ့ရသည်။ ဝေ့မျိုးနွယ်စု၏ လူများထဲတွင် ဝေ့ရှန်း တစ်ဦးတည်းသာ ကျန်ရှိတော့သည်။

ဒါက ရည်ရွယ်ချက်ရှိရှိ လုပ်ခဲ့ခြင်း ဖြစ်သည်။ မဟုတ်လျှင် ဝေ့ရှန်း၏ ကျင့်ကြံမှုဖြင့် သူ သေသွားတာကြာပြီ။

"မင်းတို့ ဟဲမိသားစုလည်း သေခြင်းဆိုးကို ကြုံကြရ‌လိမ့်မယ်"

ဝေ့ရှန်းက ဒေါသတကြီး အော်ဟစ်လိုက်သည်။ သူ့မျက်လုံးများက ဒေါသကြောင့် နီရဲနေပြီ။

"ဖြန်း... ဝုန်း..."

ဟဲမိသားစု၏ ဧကရာဇ်တစ်ပိုင်းတစ်ဦးက ဝေ့ရှန်း၏ မျက်နှာကို ဖြတ်ရိုက်လိုက်သည်။ ပြင်းထန်သော ရိုက်ချက်ကြောင့် ဝေ့ရှန်းက လွင့်စင်သွားပြီး ဝေ့မျိုးနွယ်စု၏ ပျက်စီးနေသော နံရံတစ်ခုနှင့် ဝင်တိုက်မိသွား၏။

"ဒုန်း"

ဟဲမိသားစု၏ ဧကရာဇ်တစ်ပိုင်းက ထပ်မံလှုပ်ရှားလျားပြီး ဝေ့ရှန်း၏ဘေးတွင် ပေါ်လာကာ သူ့အပေါ် ဆောင့်နင်းလိုက်တော့သည်။

"မင်းက ယွမ်တောင်မြင့်မြတ်သောကျောင်းတော်ကဆိုရင်တောင် ဘာဖြစ်လဲ။ ငါ့ခြေဖဝါးအောက်မှာ ခွေးသေတစ်ကောင်လို လဲကျရတုန်းပဲ။ ဟားဟားဟား"

ထိုဟဲမိသားစု၏ ဧကရာဇ်တစ်ပိုင်းက မောက်မာစွာ ရယ်မောလိုက်သည်။

"မင်းခြေထောက်တွေကို အခုချက်ချင်း ဖယ်လိုက်သင့်တယ်။ မဟုတ်ရင် မင်း‌ သေခြင်းဆိုးနဲ့ သေရလိမ့်မယ်"

ထိုစဉ်၊ အဝေးမှ အလွန်အေးစက်သော အသံတစ်ခု ထွက်ပေါ်လာခဲ့သည်။ ထို့နောက်၊ လူရိပ်ဆယ်ခုကျော်က သူတို့အနီးတွင် ပေါ်လာကြ၏။

ဤလူများမှာ လုမင်နှင့် အခြားသူများ ဖြစ်ကြသည်။

"မဟာမိတ်ခေါင်းဆောင်"

လုမင်ကို မြင်သောအခါ ဝေ့ရှန်းက အော်ခေါ်လိုက်သည်။ သူ့မျက်လုံးများမှာလည်း မျှော်လင့်ချက်တို့ ပေါ်လာပေသည်။

"ဒါက လုမင်ပဲ"

ဟဲမိသားစုဝင်တစ်ဦးက လုမင်ကို မှတ်မိပြီး အော်ဟစ်လိုက်သည်။

အခြား ဟဲမိသားစုဝင်များ၏ မျက်နှာအမူအရာများလည်း ရုတ်တရက် ပြောင်းလဲသွား၏။

လုမင်က ကြာပန်းကမ္ဘာတွင် သူ့ကိုယ်သူ နာမည်တည်ဆောက်ခဲ့သည်။ သူသည် ဟန်ရှင်းဟဲကိုပင် အနိုင်ယူခဲ့၏။ သိုင်းဧကရာဇ်နယ်ပယ်အောက်တွင် သူက မည်သူ့ကိုမျှ မကြောက်ပေ။

"မင်းရဲ့ခြေထောက်တွေကို ဖယ်လိုက်လို့ ငါပြောနေတာ မကြားဘူးလား"

လုမင်၏ မျက်လုံးများက အေးစက်နေသည်။ သူက ဝေ့ရှန်းကို တက်နင်းထားသော ဟဲမိသားစုဝင်ထံ တစ်လှမ်းချင်း လျှောက်သွား၏။

ဟဲမိသားစု၏ ဧကရာဇ်တစ်ပိုင်းက လေးနက်သော အမူအရာဖြင့် ပြောသည်။

"လုမင်၊ ဒါက ငါ့ဟဲမိသားစုရဲ့ ကိစ္စပဲ။ မင်း ကိုယ်နဲ့မဆိုင်တဲ့ကိစ္စကို ဝင်မစွတ်ဖက်တာ ပိုကောင်းမယ်"

"မင်းက တကယ်သေချင်နေပုံပဲ"

လုမင်က အေးစက်စွာ ပြောလိုက်သည်။ လုမင်၏ စကားသံအဆုံးတွင် ဟဲမိသားစုဝင် ဧကရာဇ်တစ်ပိုင်းကို ကြည်လင်သော ပူဖောင်းတစ်ခုက ဖုံးအုပ်သွား၏။ ထိုဧကရာဇ်တစ်ပိုင်း၏ ခန္ဓာကိုယ်က ချက်ချင်း အေးခဲသွားကာ မလှုပ်ရှားနိုင်တော့ပေ။

သူတော်စင်စွမ်းအင်က မြင့်တက်လာပြီး လုမင်၏လက်ထဲတွင် လှံရှည်တစ်လက်အဖြစ် စုဖွဲ့သွားသည်။ လှံရှည်ကို ဖျက်ဆီးခြင်းကျမ်း၏ ရွန်းများဖြင့် ဖုံးအုပ်ထား၏။

"မဟုတ်ဘူး၊ ရပ်လိုက်"

ဟဲမိသားစု၏ ဧကရာဇ်တစ်ပိုင်းက တုန်လှုပ်သွားသည်။ သူက ထိတ်လန့်တကြား အော်ဟစ်လိုက်ရင်း အစွမ်းကုန် ရုန်းကန်လိုက်၏။ သို့သော်၊ များစွာ နောက်ကျသွားခဲ့ပြီ။

"ဝှစ်..."

လုမင်၏ လှံရှည်က မိုးကြိုးလျှပ်စီးကဲ့သို့ လျင်မြန်စွာ ပြေးထွက်သွားသည်။ ၎င်းက ထိုဧကရာဇ်တစ်ပိုင်း၏ ဦးခေါင်းကိုထိုးဖောက်ပြီး မီတာထောင်ချီအကွာသို့ သယ်ဆောင်သွားကာ မြေပြင်ပေါ် ထိုးစိုက်ဝင်သွားတော့သည်။

"သူတို့ထဲက ဘယ်သူ့ကိုမှ မလွတ်စေနဲ့"

လုမင်၏ အသံက ကျယ်လောင်စွာ ထွက်ပေါ်လာသည်။

"ဟားဟားဟား၊ ငါ ဒါကိုစောင့်နေတာကြာပြီ"

ဟွမ်လီက အေးစက်စက်ဖြင့် ဟဲမိသားစုဝင်များကို ကြည့်လိုက်သည်။

ဟွမ်လင်၊ လုံချန်နှင့် အခြားသူများကလည်း ဟဲမိသားစုဝင်များကို စတင်တိုက်ခိုက်လိုက်ကြ၏။

"လုမင်၊ မင်းက ဟန်မိသားစုကို စော်ကားပြီးပြီ။ ဒီအချိန်မှာ ငါ့ရဲ့ ဟဲမိသားစုကို စော်ကားတာက မင်းအတွက် ဘာမှ အကျိုးရှိမှာ မဟုတ်ဘူး"

ဟဲမိသားစုဝင်တစ်ဦးက အော်ဟစ်လိုက်သည်။

"သတ်"

လုမင်က အပိုစကားမပြောဘဲ ရှေ့သို့ ခြေတစ်လှမ်းတိုးပြီး လက်သီးတစ်ချက် ထုတ်ဖော်လိုက်သည်။ လက်သီးအင်အားက အလွန်ပြင်းထန်ပြီး ဟဲမိသားစုဝင် ဧကရာဇ်တစ်ပိုင်းတစ်ဦးမှာ အပိုင်းပိုင်း ပေါက်ကွဲသွား၏။

လုမင်၏အမြင်တွင် ဟဲမိသားစုဝင်အားလုံးက အမှိုက်များဖြစ်ပြီး သေသင့်သည်။

"သွားကြစို့"

ဟဲမိသားစုဝင်များက အော်ဟစ်လိုက်ကြသည်။ သူတို့က လုမင်နှင့် အခြားသူများကို မယှဉ်နိုင်မှန်း ကောင်းကောင်းသိ၏။ သူတို့၏ပုံရိပ်များက လှုပ်ရှားလာပြီး အရပ်မျက်နှာအနှံ့သို့ လူစုခွဲကာ ပြေးတော့သည်။

သို့သော်လည်း သူတို့က ဝေးဝေးမရောက်မီတွင် မမြင်ရသော နံရံတစ်ခုနှင့် တိုက်မိပြီး အားလုံး ရပ်တန့်သွားကြသည်။

ပေါင်ပေါင်က လှုပ်ရှားခဲ့ပြီး ဟင်းလင်းပြင်ကို ပိတ်ဆို့လိုက်ခြင်းပင်။

"လုမင်၊ ငါ့ရဲ့ ဟဲမိသားစုက အကျော်အမော်တွေအားလုံး ကောင်းကင်ဧကရာဇ်မြို့တော်ကို ပြန်လာနေကြပြီ။ အနားမှာ ဧကရာဇ်အဆင့် အကျော်အမော်တွေလည်း အများကြီးရှိတယ်။ မင်း ငါတို့ကို သတ်ရင် မင်းလည်း သေရလိမ့်မယ်"

ဟဲမိသားစု၏ ဧကရာဇ်တစ်ပိုင်းတစ်ဦးက ဟိန်းဟောက်လိုက်သည်။

"ဒါကို မြန်မြန်အဆုံးသတ်လိုက်ရအောင်"

လုမင်၏ တုံ့ပြန်မှုက ရိုးရှင်းသည်။ သူ့လက်ကို ဝှေ့ယမ်းလိုက်သောအခါ ငရဲဖိနှိပ်ကျောက်စာတိုင်ပုံရိပ် ကိုးခု ပေါ်လာကြပြီး သူတို့ကို ဖိချလိုက်၏။ ဟဲမိသားစု၏ ကျင့်ကြံသူများက တစ်ယောက်ပြီးတစ်ယောက် သေဆုံးကုန်ကြတော့သည်။

တစ်ချိန်တည်းမှာပင်၊ ပေါင်ပေါင်နှင့် အခြားသူများကလည်း လှုပ်ရှားခဲ့ကြသည်။

ဒါက တစ်ဖက်သတ်ပင်။

မျက်စိတစ်မှိတ်အတွင်းမှာပင်၊ ဟဲမိသားစု၏ ကျင့်ကြံသူ အနည်းငယ်သာ ကျန်ရှိတော့သည်။

"လုမင်၊ ငါတို့ သတင်းပို့ပြီးပြီ။ မင်း သေချာပေါက် သေရလိမ့်မယ်"

နောက်ဆုံး ဟဲမိသားစု၏ ဧကရာဇ်တစ်ပိုင်းက လုမင်၏လက်သီးဖြင့် ထိုးသတ်ခြင်းမခံရမီ နောက်ဆုံးအနေဖြင့် အော်ဟစ်ခဲ့သည်။

"ယွမ်တောင်မြင့်မြတ်သောကျောင်းတော်ကို ပြန်သွားကြရအောင်"

လုမင်က သူ့လက်ကိုဝှေ့ယမ်းလိုက်ပြီး သူတော်စင်စွမ်းအင်ဖြင့် ဝေ့ရှန်းကို ပွေ့ချီလိုက်သည်။ ထို့နောက် ယွမ်တောင်မြင့်မြတ်သောကျောင်းတော်သို့ အမြန်ဆုံးနှုန်းဖြင့် ပျံသန်းသွား၏။

သူတို့ထွက်သွားပြီး မကြာမီတွင် ဝေ့မျိုးနွယ်စုအထက် ကောင်းကင်ယံတွင် ပုံရိပ်များစွာ ပေါ်လာကြသည်။ သူတို့ထံမှ တုနှိုင်းမယှဉ်သာအောင် ကြောက်စရာကောင်းသော အရှိန်အဝါများလည်း ထွက်ပေါ်နေတော့သည်။

သူတို့အားလုံးက သိုင်းဧကရာဇ်များ ဖြစ်ကြသည်။ ထို့ပြင် သူတို့အားလုံးက ဟဲမိသားစု၏ အကျော်အမော်များဖြစ်ကြောင်း ထင်ရှားပေသည်။

"လုမင်... ဒီကောင်က တကယ်ကို သေချင်နေတာပဲ"

"အထက်ကို သတင်းပို့လိုက်၊ ဒီတစ်ခါတော့ လုမင်ကို သတ်ရမယ်"

အေးစက်ပြီး လျစ်လျူရှုထားသော စကားသံများ ထွက်ပေါ်လာပြီးနောက် သူတို့အားလုံး ထွက်ခွာသွားတော့သည်။