အခန်း ၁၅၈၃

အပိုင်း ( 1583 ) သူတော်စင်များ ကျဆုံးခြင်း။

မိစ္ဆာဝိညာဉ်ဂိုဏ်း၏ ဓမ္မဘုရင်များက ဧကရာဇ်အဆင့် အကျော်အမော်များ ဖြစ်ကြသည်။ ဤနေရာတွင်၊ မိစ္ဆာဝိညာဉ်ဂိုဏ်း၏ ဓမ္မဘုရင်တစ်ပါး အမှန်တကယ် ရှိနေပါသလော။

"ဝမ်"

ဤအခိုက်တွင် ဝိညာဉ်ဝါးမျိုခြင်း ဓမ္မဘုရင် သူ့ခန္ဓာကိုယ်ကို ပြန်ဖော်လိုက်သည်။ သူ့လက်တစ်ဖက်က ဓားတစ်လက်ကဲ့သို့ လေထုကို ထိုးဖောက်သွားသည်။

ကောင်းကင်နတ်ဘုရားဂိုဏ်း၏ သူတော်စင်မှာ လွန်စွာတုန်လှုပ်ပြီး နောက်ဆုတ်ရန်ပင် မေ့လျော့သွား၏။ သူ့နှလုံးသားကို ဝိညာဉ်ဝါးမျိုခြင်း ဓမ္မဘုရင်၏ လက်က ထိုးဖောက်သွားတော့သည်။ ကြောက်မက်ဖွယ်ကောင်းသော ဝါးမျိုခြင်းစွမ်းအားက ကောင်းကင်နတ်ဘုရားဂိုဏ်းဝင် သူတော်စင်၏ သွေးများကို ရူးသွပ်စွာ ဝါးမြိုနေတော့သည်။

"မဟုတ်ဘူး..."

ကောင်းကင်နတ်ဘုရားဂိုဏ်း၏ သူတော်စင်က ရူးသွပ်စွာရုန်းကန်ခဲ့သော်လည်း အသုံးမဝင်ခဲ့ပေ။ ဝိညာဉ်ဝါးမျိုခြင်း ဓမ္မဘုရင်၏ ကြောက်မက်ဖွယ် စွမ်းအားက သူ့ခန္ဓာကိုယ်ထဲသို့ တိုးဝင်လာပြီး ပေါက်ကွဲထွက်ခဲ့သည်။ သူ၏ သူတော်စင်နှလုံးသားလည်း တိုက်ရိုက်ပေါက်ကွဲသွားတော့သည်။

ကောင်းကင်နတ်ဘုရားဂိုဏ်း၏ သူတော်စင်တစ်ပါး ကျဆုံးသွားခဲ့ပြီ ဖြစ်သည်။

သူတော်စင်တစ်ပါးမှာ ထိုကဲ့သို့ အသတ်ခံလိုက်ရပြီ။ ဝိညာဉ်ဝါးမျိုခြင်း ဓမ္မဘုရင်မှာ နှစ်ပေါင်းများစွာ တံဆိပ်ခတ်ခံရခြင်းကြောင့် သူ၏ ခွန်အားများ အလွန်အမင်း လျော့ကျသွားခဲ့သည်။ မဟုတ်ပါက၊ ဧကရာဇ်အဆင့် အကျော်အမော်၏ စွမ်းအားဖြင့် ကောင်းကင်နတ်ဘုရားဂိုဏ်းမှ သူတော်စင်ကို လက်ဖျစ်တစ်ချက်တီးရုံဖြင့် သတ်နိုင်လိမ့်မည်။

"သွား... သွားကြစို့"

"အဲဒါက ‌မိစ္ဆာဝိညာဉ်ဂိုဏ်းရဲ့ ဓမ္မဘုရင်... ဧကရာဇ်အဆင့် အကျော်အမော်ကွ"

ပတ်ဝန်းကျင်ရှိ လူတိုင်း ထိတ်လန့်သွားကြသည်။ သူတို့အားလုံး ထျန်းဖုန်းလွင်ပြင်မှ အသည်းအသန် ပြေးထွက်ကြတော့သည်။

ဝိညာဉ်ဝါးမျိုခြင်း ဓမ္မဘုရင်အတွက်မူ၊ သူတော်စင်၏သွေးများကို ဝါးမျိုပြီးနောက် သူ့အရှိန်အဝါက ပို၍ အားကောင်းလာခဲ့သည်။

"ဟားဟားဟား၊ သူတော်စင်တစ်ပါးရဲ့ သွေးက တကယ်ကို အံ့ဩစရာကောင်းတယ်။ နောက်ပြီးတော့ ဒီမှာ အများကြီးရှိသေးတယ်"

ဝိညာဉ်ဝါးမျိုခြင်း ဓမ္မဘုရင်က ကောင်းကင်ကို မော့ကြည့်လိုက်သည်။ ထိုနေရာတွင် သူတော်စင် တစ်ဒါဇင်ကျော် ရှိသေးသည်။

"ဝှစ်"

ဝိညာဉ်ဝါးမျိုခြင်း ဓမ္မဘုရင်က လေထဲသို့ ပျံတက်သွားသည်။

ကောင်းကင်မှ သူတော်စင်များ မျက်မှောင်ကြုတ်သွားကြ၏။

ယခုလေးတင် ကောင်းကင်နတ်ဘုရားဂိုဏ်း၏ သူတော်စင် အသတ်ခံခဲ့ရသည်။ ထို့အပြင်၊ ကောင်းကင်နတ်ဘုရားဂိုဏ်းမှ သူတော်စင်၏ အော်သံကိုလည်း ကြားလိုက်ရသေးသည်။ ယခုဆိုလျှင် ဝိညာဉ်ဝါးမျိုခြင်း ဓမ္မဘုရင်က သူတို့ဆီသို့ ပျံသန်းလာနေကြောင်း မြင်လိုက်ရသဖြင့် အလွန် တုန်လှုပ်သွားကြသည်။

"လူတိုင်း... သူက ဧကရာဇ်အဆင့် အကျော်အမော်တစ်ယောက်ပဲ။ သူက နှစ်ပေါင်းများစွာ တံဆိပ်ခတ်ခံထားရပေမဲ့ အရမ်းကြောက်စရာကောင်းနေသေးတယ်။ ငါတို့အတူတူ လုပ်မယ်ထင်ရင် ပိုကောင်းမယ်"

ကောင်းကင်နတ်ဘုရားဂိုဏ်းမှ သူတော်စင်တစ်ဦးက ဦးစွာ ပြောလိုက်သည်။

"ကောင်းပြီ၊ ငါသဘောတူတယ်"

"ငါလည်းသဘောတူတယ်"

ဝိညာဉ်ဝါးမျိုခြင်း ဓမ္မဘုရင်နှင့် ရင်ဆိုင်ရခြင်းကြောင့် သူတို့ပူးပေါင်းရုံသာ တတ်နိုင်သည်။ မဟုတ်ပါက၊ အားလုံး သေကြရလိမ့်မည်။

"ဂီး..."

ထိုအချိန်တွင် ရှေးဟောင်းဖီးနစ်ကြေးမုံက ပြင်းထန်စွာ အော်ဟစ်လိုက်သည်။ ၎င်းက စစ်မှန်သော နတ်ဖီးနစ်တစ်ကောင်ကဲ့သို့ တောက်ပသော အလင်းများက ထုတ်လွှတ်ပြီး ဝိုင်းရံမှုမှ ပြေးထွက်ရန် ကြိုးစားလိုက်၏။

"မင်းက ငါ့ကို နှစ်ပေါင်းများစွာ ချည်နှောင်ထားပြီး အခု ထွက်သွားချင်လား"

ဝိညာဉ်ဝါးမျိုခြင်း ဓမ္မဘုရင်က အေးစက်စက် ပြောလိုက်သည်။ သူ့လက်ကို ဝှေ့ယမ်းလိုက်ရာ ဧရာမလက်ဝါးကြီးတစ်ဖက်က ရှေးဟောင်းဖီးနစ်ကြေးမုံကို ဖမ်းဆီးဆုပ်ကိုင်လိုက်သည်။

ရှေးဟောင်းဖီးနစ်က သူ့အတောင်များကို ဖြန့်လိုက်သောအခါ ပြိုးပြိုးပြက်ပြက် တောက်ပသော အလင်းတန်းတစ်ခု ထွက်ပေါ်လာ၏။ ၎င်းက ဝိညာဉ်ဝါးမျိုခြင်း ဓမ္မဘုရင်၏ ဧရာမလက်ကြီးကို ထိုးဖောက်ဝင်ရောက်ပြီးနောက် အဝေးသို့ ပြေးထွက်သွားတော့သည်။

ဝိညာဉ်ဝါးမျိုခြင်း ဓမ္မဘုရင် မျက်မှောင်ကြုတ်လိုက်သည်။ သို့ရာတွင်၊ သူက မလိုက်သွားပေ။ အခြားသော သူတော်စင်မျာကလည်း ဝိညာဉ်ဝါးမျိုခြင်း ဓမ္မဘုရင်ကို ကြောက်ရွံ့သောကြောင့် မလိုက်ဝံ့ကြပါ။

မျက်စိတစ်မှိတ်အတွင်းမှာပင် ရှေးဟောင်းဖီးနစ်ကြေးမုံက လူတိုင်း၏ မြင်ကွင်းမှ ပျောက်ကွယ်သွားခဲ့သည်။

ထိုအချိန်၊ ထျန်းဖုန်းလွင်ပြင်တွင် လူငယ်တစ်ယောက်က ထျန်းဖုန်းလွင်ပြင် အပြင်ဘက်သို့ အရှိန်အဟုန်ဖြင့် ပြေးထွက်သွားနေသည်။

ထိုလူက ရီတျန်ပင်။

သူဟာ အစကတည်းက တောင်ပေါ်မတက်ဘဲ နေခဲ့သည်။ ထို့နောက် ရှေးဟောင်းဖီးနစ်ကြေးမုံ ပျံထွက်လာပြီး သူတော်စင်တစ်ဒါဇင်ကျော်တို့ တိုက်ခိုက်နေသည်ကို တွေ့ခဲ့ရ၏။ ထို့ကြောင့် ဤနေရာတွင် သူဆက်နေခြင်းက အဓိပ္ပာယ်မရှိကြောင်း သိလိုက်သည်။ ထိုအစား အလွန်အန္တရာယ်များပြီး တိုက်ပွဲလှိုင်းလုံးတစ်ခုဖြင့် ရိုက်ခတ်ခံရလျှင်ပင် သူ သေလိမ့်မည်။

ထို့ကြောင့်၊ သူဟာ ထျန်းဖုန်းလွင်ပြင်မှ ထွက်ခွာပြီးနောက် လျှို့ဝှက်စွာ စောင့်ကြည့်ရန် ဆုံးဖြတ်ခဲ့သည်။

သူ ပြေးနေစဉ် ဖီးနစ်တစ်ကောင်၏ အော်ဟစ်သံ ထွက်ပေါ်လာသည်။ ထို့နောက် သက်တန့်အလင်းတန်းတစ်ခုက သူ့ခန္ဓာကိုယ်ထဲသို့ ထိုးဖောက်ဝင်ရောက်ကာ ပျောက်ကွယ်သွား၏။

ပထမတော့ ရီတျန်မှာ တုန်လှုပ်သွားသည်။ သို့သော်လည်း ဂရုတစိုက် သတိပြုမိပြီးနောက် သူ ဝမ်းသာသွား၏။

"ဧကရာဇ်လက်နက်၊ ရှေးဟောင်းဖီးနစ်ကြေးမုံ"

ရီတျန်က ခပ်တိုးတိုး ရေရွတ်လိုက်သည်။ ထို့နောက်မှာတော့ သူ၏ လှုပ်ရှားမှုနည်းကို အသုံးပြုကာ မျက်စိတစ်မှိတ်အတွင်း ပျောက်ကွယ်သွားတော့သည်။

တစ်ဖက်တွင်၊ ဝိညာဉ်ဝါးမျိုခြင်း ဓမ္မဘုရင်က တောက်ပသော မျက်လုံးများဖြင့် သူတော်စင်များကို ကြည့်နေသည်။

သူ့မျက်လုံးထဲတွင် ဤသူတော်စင်များက ဧကရာဇ်လက်နက်ထက် ပို၍ ဆွဲဆောင်မှုရှိပုံရသည်။

"သတ်"

ရုတ်တရက်၊ ဝိညာဉ်ဝါးမျိုခြင်း ဓမ္မဘုရင်က စတင်လှုပ်ရှားပြီး သူတော်စင်တစ်​ဦးကို တိုက်​ခိုက်​လိုက်​သည်​။

"တိုက်ခိုက်ကြ"

သူတော်စင်များကလည်း တပြိုင်နက်တည်း တိုက်ခိုက်လိုက်၏။ ကြောက်မက်ဖွယ်ကောင်းသော တိုက်ခိုက်မှုများက ဝိညာဉ်ဝါးမျိုခြင်း ဓမ္မဘုရင်အပေါ်သို့ ကျရောက်လာတော့သည်။ သို့ရာတွင်၊ ဝိညာဉ်ဝါးမျိုခြင်း ဓမ္မဘုရင်၏ ခန္ဓာကိုယ်က ငှက်မွေးကဲ့သို့ ပေါ့ပါးသည်။ သူက တိုက်ခိုက်မှုများကို ရှောင်တိမ်းပြီး ၎င်းတို့ထဲမှ တစ်ဦးကို ဆက်လက်တိုက်ခိုက်လိုက်၏။

"ဓမ္မဘုရင်ကို ကူညီကြ"

ထိုအချိန်တွင် ဝတ်ရုံနက်ဝတ် လူရိပ်တချို့ ပြေးထွက်လာပြီး တိုက်ပွဲတွင် ပါဝင်လာတော့သည်။

သူတို့က မိစ္ဆာဝိညာဉ်ဂိုဏ်း၏ သူတော်စင်များ ဖြစ်ကြသည်။

သူတို့က ဝိညာဉ်ဝါးမျိုခြင်း ဓမ္မဘုရင်၏ ရန်သူများကို ထိန်းချုပ်ကာ၊ ဝိညာဉ်ဝါးမျိုခြင်း ဓမ္မဘုရင်အား ပို၍ လှုပ်ရှားရလွယ်ကူစေခဲ့ပေသည်။

"ဝှစ်... ဝှစ်"

ဝိညာဉ်ဝါးမျိုခြင်း ဓမ္မဘုရင်၏ ခန္ဓာကိုယ်က လျင်မြန်စွာ လှုပ်ရှားနေခဲ့သည်။ သူက လက်ဝါးရိုက်ချက်ထုတ်ဖော်လိုက်ရာ အနက်ရောင် မြူခိုးများက ပျံ့နှံ့သွားပြီး သူတော်စင်များဆီသို့ ပျံ့လွင့်သွား၏။

ယခင်၊ ကောင်းကင်နတ်ဘုရားဂိုဏ်း၏ သူတော်စင်ကို ဝါးမျိုပြီးနောက် ဝိညာဉ်ဝါးမျိုခြင်း ဓမ္မဘုရင်က ပို၍ သန်မာလာကြောင်း ထင်ရှားသည်။

ထိုသူတော်စင်များက ဝိညာဉ်ဝါးမျိုခြင်း ဓမ္မဘုရင်၏ အနက်ရောင် မြူခိုးများကို အလွန်ကြောက်ပုံရသည်။ အနက်ရောင်မြူခိုးများနှင့် မထိတွေ့ဝံ့ကြဘဲ ချေဖျက်ပစ်ရန် တိုက်ခိုက်မှုအမျိုးမျိုးကို ထုတ်ဖော်ခဲ့ပေသည်။

သူတို့၏ တိုက်ခိုက်မှုတချို့က ဝိညာဉ်ဝါးမျိုခြင်း ဓမ္မဘုရင်ကို ထိမှန်သော်လည်း အသုံးဝင်ပုံမရပေ။ သူ့ခန္ဓာကိုယ်က ပြိုကျသွားပြီး အနက်ရောင် မြူခိုးများအသွင် ပြောင်းသွားသည်။

"သေ"

ဝိညာဉ်ဝါးမျိုခြင်း ဓမ္မဘုရင်က သူတော်စင်တစ်ဦးကို စိုက်ကြည့်ပြီး ဆက်လက်တိုက်ခိုက်လိုက်၏။

ထိုသူတော်စင်မှာ အင်အားစုငယ်မှ သူတော်စင်တစ်ဦးဖြစ်ပြီး အတော်လေး အားနည်းခဲ့သည်။

ဤအခိုက်တွင် သူ့မျက်နှာက မသာမယာဖြစ်ပြီး ချက်ချင်း နောက်ဆုတ်သွား၏။

"လင်ယန် ခြေလှမ်း"

ဝိညာဉ်ဝါးမျိုခြင်း ဓမ္မဘုရင်က စူးရှစွာ အော်ဟစ်လိုက်သည်။ သူ့ခန္ဓာကိုယ်က တုန်ခါလာပြီး နေရာမှ ရုတ်ချည်း ပျောက်ကွယ်သွား၏။

"မကောင်းတော့ဘူး"

ထိုသူတော်စင် တုန်လှုပ်သွားသည်။ သူတော်စင်စွမ်းအားဖြင့် နိယာမကိုထိန်းချုပ်ပြီး အရပ်ရပ်ကို ဖြန့်ကျက်ကာ စူးစမ်းလိုက်၏။

သို့သော်...

"ဖောက်"

ဝိညာဉ်ဝါးမျိုခြင်း ဓမ္မဘုရင်က သူ့ရှေ့တွင် ရုတ်တရက် ပေါ်လာခဲ့သည်။ သူ့လက်ဝါးက သူတော်စင်၏ သူတော်စင်နှလုံးသားကို ထိုးဖောက်သွား၏။ ကြောက်စရာကောင်းသော အဖျက်စွမ်းအားက သူတော်စင်နှလုံးသားကို တိုက်ရိုက် ဖျက်ဆီးပစ်လိုက်တော့သည်။

ထို့နောက်တွင် သူက သူတော်စင်၏ သွေးများကို အရူးအမူး စုပ်ယူလိုက်သည်။

"သူ့ကို တားဆီးကြ၊ သူ့ကို ဆက်ပြီး သွေးမစုပ်ယူစေနဲ့"

ကောင်းကင်အဆိပ်ဂိုဏ်းမှ သူတော်စင်တစ်ဦးက ဟိန်းဟောက်ပြီး ဝိညာဉ်ဝါးမျိုခြင်း ဓမ္မဘုရင်ကို တိုက်ခိုက်ခဲ့သည်။ အခြားသော သူတော်စင်များသည်လည်း ဝိညာဉ်ဝါးမျိုခြင်း ဓမ္မဘုရင်ကို တိုက်ခိုက်လိုက်၏။

ဝိညာဉ်ဝါးမျိုခြင်း ဓမ္မဘုရင်ဟာ နှစ်ပေါင်းများစွာ တံဆိပ်ခတ်ခံခဲ့ရသည်။ ထို့ကြောင့် သူ၏ ချီနှင့်သွေးများက ခန်းခြောက်လုနီးဖြစ်ပြီး သူ့ခွန်အားကလည်း လွန်စွာ အားနည်းခဲ့သည်။

သို့သော်လည်း သူတော်စင် သွေးများကို စုပ်ယူလိုက်ပါက၊ သူ၏ခွန်အားက တဟုန်ထိုး တက်လာပေလိမ့်မည်။

ကြောက်မက်ဖွယ်ကောင်းသော တိုက်ခိုက်မှုများက ဝိညာဉ်ဝါးမျိုခြင်း ဓမ္မဘုရင်၏ ခန္ဓာကိုယ်ပေါ်သို့ ကျရောက်လာခဲ့သည်။ ဝိညာဉ်ဝါးမျိုခြင်း ဓမ္မဘုရင်၏ ခန္ဓာကိုယ်က ပေါက်ကွဲသွား၏။ ထို့နောက် အနက်ရောင် မြူခိုးလုံးများအဖြစ်သို့ ပြောင်းလဲကာ သူသတ်ခဲ့သော သူတော်စင်၏ ခန္ဓာကိုယ်ထဲသို့ ဝင်ရောက်သွားတော့သည်။

"ဟားဟားဟား၊ မင်းတို့ ငါ့ကို တားဆီးလို့မရဘူး"

ဝိညာဉ်ဝါးမျိုခြင်း ဓမ္မဘုရင်၏ အသံက သူတော်စင်၏ ခန္ဓာကိုယ်မှ ထွက်ပေါ်လာခဲ့သည်။ သူတော်စင်၏ ခန္ဓာကိုယ်က သာမန်မျက်စိဖြင့် မြင်နိုင်သော အရှိန်အဟုန်ဖြင့် ကျုံ့ဝင်လာ၏။

"သူ့ခန္ဓာကိုယ်ကို ဖျက်ဆီးကြ"

တစ်စုံတစ်ယောက်က အော်ဟစ်လိုက်သည်။ ကြောက်မက်ဖွယ်ကောင်းသော တိုက်ခိုက်မှုများက ထိုသူတော်စင်၏ ခန္ဓာကိုယ်ပေါ်သို့ ကျရောက်လာသည်။ ထိုသူတော်စင်၏ ခန္ဓာကိုယ်က ချက်ချင်း ကွဲအက်သွား၏။ သို့သော်လည်း သွေးအနည်းငယ်သာ ထွက်လာပြီး အနက်ရောင် မြူခိုးငွေ့များ၏ စုပ်ယူခံလိုက်ရတော့သည်။

"ဟားဟားဟား"

ဝိညာဉ်ဝါးမျိုခြင်း ဓမ္မဘုရင်၏ ရယ်သံကြီးက ဆက်လက် ထွက်ပေါ်လာခဲ့သည်။ သူက လူသားအဖြစ်သို့ ပြန်ပြောင်းသွား၏။ ဤအခိုက်တွင် သူ့ခန္ဓာကိုယ်က ပိုပြည့်ဝလာပြီး အရှိန်အဝါကလည်း ပို၍ အားကောင်းလာတော့သည်။

"ဝိညာဉ်ဝါးမျိုခြင်း လက်ဝါး၊ သတ်"

ဝိညာဉ်ဝါးမျိုခြင်း ဓမ္မဘုရင်က ဟိန်းဟောက်လိုက်သည်။ ဤတစ်ကြိမ်တွင်၊ သူက တိုက်ရိုက် တိုက်ခိုက်လိုက်၏။

သူတော်စင်နှစ်ယောက်၏ သွေးများကို ဆက်တိုက်စုပ်ယူခဲ့နောက် သူ့ခွန်အားက အလွန်တိုးတက်လာပြီး ကြောက်မက်ဖွယ်ကောင်းသော နည်းလမ်းများကိုပင် အသုံးပြုလာနိုင်ပြီ ဖြစ်သည်။

ကြောက်မက်ဖွယ်ကောင်းသော လက်ဝါးပုံရိပ်တစ်ခု ဖြစ်ပေါ်လာပြီး သူတော်စင်တစ်ဦးထံ ကျရောက်သွားသည်။

"ဝုန်း"

ထိုသူတော်စင်က လက်ဝါးပုံရိပ်ကြီးကို ဖျက်ဆီးရန် ကြိုးစားလိုက်၏။ သို့‌သော်လည်း သူတော်စင်၏ ခန္ဓာကိုယ်က ပြင်းထန်စွာ တုန်လှုပ်သွားပြီး သွေးများ ရွှဲနစ်ကာ နောက်ပြန်ဆုတ်သွားရတော့သည်။

"ဝုန်း... ဝုန်း"

ဝိညာဉ်ဝါးမျိုခြင်း ဓမ္မဘုရင်က လက်ဝါးရိုက်ချက် တစ်ဒါဇင်ကျော်ကို ဆက်တိုက် ထုတ်ဖော်လိုက်သည်။ ကြောက်စရာကောင်းသော လက်ဝါးပုံရိပ် တစ်ဒါဇင်ကျော် ပေါ်လာ၏။ သူတော်စင်များလည်း မျက်နှာမကောင်းကြတော့ပေ။

သူတော်စင် တစ်ဒါဇင်ကျော်က မာန်သွင်းပြီး တိုက်ခိုက်ခဲ့သော်လည်း နောက်ဆုံးတွင် သူတို့အားလုံး သွေးများရွှဲကာ နောက်ဆုတ်ခဲ့ရသည်။

ဧကရာဇ်အဆင့် အကျော်အမော်များ၏ စွမ်းအားက ကြီးမားလွန်းလှသည်။ သူတို့၏အင်အား အနည်းငယ်ကိုသာ ပြန်လည်ရယူနိုင်လျှင်ပင်၊ သာမန်သူတော်စင်များ ခုခံနိုင်သည့်အရာ မဟုတ်ပေ။