အခန်း ၁၁၃၀

အပိုင်း ( 1130 ) လုမင်... လုမင်။

"လုရှောက်ချင်း၊ ရှုံးတော့၊ သေမင်းနတ်ဘုရား ရိတ်သိမ်းခြင်း"

အေးစက်ပြီး စိတ်မသက်မသာ ဖြစ်စေသော အသံတစ်သံကို ကြားလိုက်ကြရသည်။ သေမင်း ဆယ့်နှစ်ပါး၏ လက်ထဲရှိ သေမင်းတံစဉ်များက လျှို့ဝှက်ဆန်းကြယ်ပြီး ထူးဆန်းသော မျဉ်းကွေးတစ်ခုကဲ့သို့ လုမင်ကို ဝိုင်းခုတ်လိုက်၏။

သေမင်းနတ်ဘုရား တံစဉ်ဆယ့်နှစ်ခုက ဦးတည်ရာအနှံ့မှ လုမင်ကို လွှမ်းခြုံသွားတော့သည်။

"မင်ကျစ်၊ ဒီနေ့ ရှုံးရမဲ့သူက မင်းပဲ"

လုမင်က ဟိန်းဟောက်လိုက်သည်။

"ဂါး"

နောက်အခိုက်တွင် နဂါးဟိန်းဟောက်သံက မိုးနှင့်မြေကို ကွဲအက်စေကာ ထွက်လာခဲ့၏။ လုမင်၏ ဦးခေါင်းထက်တွင် နဝမနဂါးက ထွက်ပေါ်လာပြီး ကြီးမားသော နဂါး အရှိန်အဝါများကို ထုတ်ဖော်လာတော့သည်။

လုမင်က အလင်းတန်းတစ်ခုကဲ့သို့ နဝမနဂါး၏ ခန္ဓာထဲကို ဝင်ရောက်သွားခဲ့သည်။

"နဝမနဂါး ခြေလှမ်း"

"ဝုန်း ဝုန်း"

နဝမနဂါးက ခြေခုနစ်လှမ်း ဆက်တိုက်လှမ်းလိုက်သည်။ ခြေတစ်လှမ်းစီတွင် အင်အားက ယခင်ကထက် ပိုအားကောင်းလာခဲ့၏။ အားကြီးသော စွမ်းအင်များက သေမင်း ဆယ့်နှစ်ပါးကို နောက်သို့ ပြန်တွန်းပို့လိုက်တော့သည်။

"နဝမနဂါး... လုမင်၊ အဲဒါက လုမင်ပဲ"

"သူက လုမင်"

ထိုအချိန်တွင် လူတချို့က မယုံကြည်နိုင်စွာ အော်ဟစ်လိုက်ကြသည်။

တိရှန်၊ ဝမ့်ဘိုးဘေးနှင့် ကျန်းဘိုးဘေးက အော်ဟစ်လိုက်၏။ ၎င်းတို့၏ မျက်လုံးများက မယုံနိုင်ဘဲ ပြူးကျယ်နေတော့သည်။

သူတို့က နဝမနဂါး သွေးမျိုးဆက်နှင့် အလွန်ရင်းနှီးသည်။ နဝမနဂါးသွေးမျိုးဆက်ကို ပိုင်ဆိုင်သူက တစ်ဦးသာရှိနိုင်ပြီး ၎င်းကလည်း လုမင်သာ ဖြစ်သည်။

"ဒါက ဘယ်လိုဖြစ်နိုင်မှာလဲ။ လုမင်က ဒီမှာ ဘယ်လိုလုပ်ပြီး ပေါ်လာနိုင်တာလဲ"

ဝမ့်ဘိုးဘေးက မယုံကြည်နိုင်စွာ ညည်းတွားလိုက်သည်။

"ငါတို့ အလယ်ပိုင်းကို မလာခင်ကတောင် ဖူရုပ်သေးဂိုဏ်းမှာ လုမင်ကို တွေ့ခဲ့ရသေးတယ်။ လုမင်က တည်နေရာရွှေ့ပြောင်းခြင်း ဝင်္ကပါကနေ အလယ်ပိုင်းတိုက်ကြီးကို လာခဲ့တာလား။ ဒါက ဘယ်လိုလုပ်ပြီး ဖြစ်နိုင်မှာလဲ၊ အလယ်ပိုင်းတိုက်ကြီးရဲ့ အင်အားစုတွေက ဖူရုပ်သေးဂိုဏ်းနဲ့ အဆက်အသွယ်ဖြတ်ထားကြတာ မဟုတ်ဘူးလား"

ကျန်းမိသားစု၏ ဘိုးဘေးလည်း ညည်းညူလိုက်သည်။

သူတို့ မယုံချင်သော်လည်း နဝမနဂါး သွေးမျိုးဆက်ကြောင့် ဤလူငယ်မှ လုမင်ဖြစ်ကြောင်း သေချာနေခဲ့ပြီ။

"လုမင်၊ အဲဒါ သူပဲ။ သူ့ကို ရင်းနှီးတယ်လို့ ခံစားခဲ့ရတာ မဆန်းတော့ပါဘူး"

တိရှန်က အော်လိုက်သည်။ သူ၏ မျက်လုံးများက အေးစက်နေကာ သတ်ဖြတ်ချင်စိတ်များလည်း ပြည့်နှက်သွားတော့သည်။

သူ့ရှေ့မှ လူက လုမင်ဆိုတာကို သူလက်မခံနိုင်ပေ။ သူ့ကို လွယ်လွယ်နှင့် အနိုင်ယူခဲ့သူက လုမင် ဖြစ်နေသည်။

မူလက သူသည် ယုံကြည်မှုအပြည့် ရှိခဲ့သည်။ သူ၏ ဟင်းလင်းပြင်တာအိုကလည်း စတုတ္ထအဆင့်သို့ ရောက်ရှိခဲ့သည်မှာ ကြာမြင့်နေပြီဖြစ်၍ ပို၍ ကြောက်စရာကောင်းခဲ့ပြီ။ သူ၏ ကျင့်ကြံခြင်းအခြေခံသည်ပင် ဝိညာဉ်နတ် ဘုရားနယ်ပယ်သို့ ချိုးဖြတ်သွားခဲ့ပြီ ဖြစ်သည်။ ယခုအခါ၊ လုမင်ကို ပြန်တွေ့ရပါက အလွယ်တကူအနိုင်ယူနိုင်ပြီး ကမ္မတိုက်ပွဲတွင် သူကြုံတွေ့ခဲ့ရသော အရှက်တရားအား လက်စားချေနိုင်မည်ဟု အပြည့်အဝ ယုံကြည်ခဲ့ပေသည်။

သို့ရာတွင် အမှန်တရားက ရက်စက်သည်။ လုမင်က ပို၍ပင် အားကောင်းလာပြီး သူ့ကို အလွယ်တကူ အနိုင်ယူနိုင်ခဲ့ပြီ။

ယခုအခါ လုမင်က သူ့ရှေ့မှ တောင်ကြီးတစ်လုံးကဲ့သို့ပင်။

အခင်းဖြစ်ပွားရာနေရာတွင် တုန်လှုပ်ခြောက်ခြားနေသော အခြားလူတစ်ဦးလည်း ရှိသည်။ ၎င်းက ရှဲ့ကျန်း ဖြစ်ချေသည်။

"လုမင်၊ လုရှောက်ချင်းက လုမင်လား"

ကြောက်မက်ဖွယ်ကောင်းသော သတ်ဖြတ်ချင်စိတ်များက သူ့မျက်လုံးများမှ ထွက်ပေါ်လာကာ မယုံကြည်နိုင်စွာ အော်ဟစ်လိုက်သည်။

သူ့ရှေ့မှ နဝမနဂါး သွေးမျိုးဆက်ကိုကြည့်ရင်း နဂါးကိုးကောင်မြို့မှ မြင်ကွင်းများကလည်း သူ့စိတ်ထဲတွင် ပေါ်လာတော့သည်။

"ဘာ၊ လုမင်.… သူက လုမင်လား"

"အရှေ့တိုင်းရဲ့ နံပါတ်တစ် ပါရမီရှင်က လုမင်လို့ ကြားဖူးတယ်။ အဲဒါက သူများ ဖြစ်နိုင်မလား"

"မဖြစ်နိုင်တာ၊ သူက အရှေ့ပိုင်းက ပါရမီရှင် ဟုတ်ရဲ့လား"

ပတ်ဝန်းကျင်မှ ကြည့်ရှုသူများလည်း တုန်လှုပ်ချောက်ချားသွားကာ မထင်မှတ်သော ခံစားချက်ဖြင့် ဆွေးနွေးလိုက်ကြသည်။

သူ့တွင် အထောက်အထား ဘယ်လောက်များသနည်း။

ပထမ သူသည် ရှေးဟောင်း သူတော်စင်မင်းဆက်၏ တရားစီရင်ရေးခန်းမမှ တပ်မှူးဖြစ်သည်။ ထို့နောက်တွင်၊ သူ့ကို နာမည်ကြီး လုရှောက်ချင်းအဖြစ် အသိအမှတ်ပြုခံရ၏။ ယခုအခါ သူက လုမင် ထပ်မံဖြစ်ခဲ့ပြီ။

လူတော်တော်များများက ရုတ်ရုတ်သဲသဲ ဖြစ်သွားသည်။

"မင်း ဘယ်သူပဲဖြစ်ဖြစ် ငါဂရုမစိုက်ဘူး။ သတ်"

သေမင်းနတ်ဘုရား ဆယ့်နှစ်ယောက်က လုမင်ကိုကြည့်ကာ အော်လိုက်သည်။

"ဂါး"

နဝမနဂါးက ဟိန်းဟောက်လိုက်သည်။ သူက ကြောက်မက်ဖွယ်ကောင်းသော ဝါးမျိုခြင်းစွမ်းရည်များကို ထုတ်ဖော်ကာ သေမင်းနတ်ဘုရားဆယ့်နှစ်ပါးကို ဖုံးအုပ်လိုက်၏။

'စွမ်းအား ငှားယူမယ်'

အတွေးတစ်ခုဖြင့် တတိယသွေးမျိုးဆက်မှ သွေးနီရောင်စွမ်းအင် အရိပ်အမြွက်တစ်ခုက နဝမနဂါး၏ ခန္ဓာကိုယ်ထဲကို စီးဆင်းသွားခဲ့သည်။ နဝမနဂါး၏ ခန္ဓာကိုယ်ပေါ်တွင် သွေးနီရောင်အလင်းအလွှာတစ်ခု ပေါ်လာသည်။

"ဝုန်း ဝုန်း"

နဝမနဂါးက ရှေ့သို့ခြေလှမ်းကာ သေမင်းနတ်ဘုရားတစ်ပါးကို ချိန်ရွယ်လိုက်၏။ ခြေခုနစ်လှမ်း လှမ်းပြီးနောက် သေမင်းနတ်ဘုရားတစ်ပါးက ပေါက်ကွဲသွားတော့သည်။

နဝမနဂါးက ၎င်း၏အမြီးနှင့် အတားအဆီးမဲ့သော ကောင်းကင်သိုင်းကို ထုတ်ဖော်ကာ ရိုက်ချလိုက်သည်။ အခြား သေမင်းနတ်ဘုရားတစ်ပါး ထပ်မံ သေဆုံးသွား၏။

နဝမနဂါးက လိမ်တွန့်လှုပ်ရှားကာ အခြား သေမင်းနတ်ဘုရားနှစ်ပါးပေါ်ကို တက်လှမ်းလိုက်သည်။

နဝမနဂါး၏ ဝါးမျိုခြင်းစွမ်းရည်ကြောင့်လည်း မင်ကျစ်သည် သူ၏ သွေးအနှစ်သာရ၊ ယွမ်ချီစွမ်းအင်နှင့် သွေးမျိုးဆက်စွမ်းအားများက မတည်မငြိမ်ဖြစ်လာသည်အား ခံစားခဲ့ရသည်။ ၎င်းက သူ့ခွန်အားကို များစွာ ထိခိုက်စေခဲ့သည်။

တစ်ဖက်တွင်၊ လုမင်က သူ၏စွမ်းအားအပြည့်ကို ထုတ်လွှတ်ပြီး သွေးမျိုးဆက်ပေါင်းစပ်ခြင်းကိုပင် အသုံးပြုခဲ့၏။ ထိုအခါ သူ့ခွန်အားက ယခင်ကထက် ပိုအားကောင်းလာကာ အခြေအနေက ပြောင်းပြန်ဖြစ်သွားတော့သည်။ လုမင်က အသာစီးရခဲ့သည်။

သို့သော်လည်း၊ မင်ကျစ်သည် အရှုံးပေးရန် ဆန္ဒမရှိသောကြောင့် လုမင်ကို တိုက်ခိုက်ရန် ခွန်အားရှိသမျှ အသုံးပြုခဲ့သည်။

သို့သော်လည်း တိုက်ကွက်အနည်းငယ် လှုပ်ရှားပြီးနောက် အခြား သေမင်းနတ်ဘုရားတချို့ ထပ်မံ ရှုံးနိမ့်ခဲ့၏။ အချိန်ကြာလာသည်နှင့်အမျှ သေမင်းနတ်ဘုရားများမှာ ပို၍ ရှုံးနိမ့်လာတော့သည်။

တိုက်ကွက်များစွာ ရင်ဆိုင်ပြီးနောက် စင်မြင့်ပေါ်တွင် သေမင်းနတ်ဘုရား တစ်ပါးသာ ကျန်ခဲ့သည်။

"ဝုန်း"

နဝမနဂါး လက်သည်းများ ထိမှန်ပြီးနောက် သေမင်းနတ်ဘုရားလည်း နောက်ကို ဆုတ်လာရတော့သည်။

"အရမ်းအစွမ်းထက်တယ်"

လူတိုင်း တုန်လှုပ်သွားကြသည်။

သွေးမျိုးဆက်ကို ထုတ်ဖော်ပြီးနောက် လုမင်၏ တိုက်ခိုက်နိုင်စွမ်းက အဆင့်သစ်တစ်ခုသို့ တိုးလာကာ မင်ကျစ်အား လုံးဝကျော်လွန်သွားခဲ့သည်။

"နဝမနဂါး၊ ထိပ်တန်း စစ်သားရဲဆယ်ကောင်ထဲက တစ်ကောင်ပဲ။ စိတ်ဝင်စားဖို့ကောင်းတယ်"

စင်မြင့်ဘေးတွင် မတုန်မလှုပ်ရပ်နေသော လုံချန်၏ မျက်လုံးများက အရောင်လက်သွားသည်။ သို့သော်လည်း၊ သူ့စကားသံသည် တိုးညှင်းလွန်း၍ မည်သူမျှ မကြားလိုက်ကြပေ။

"ဝုန်း ဝုန်း"

နဝမနဂါး‌က လေထဲသို့ လှမ်းတက်ကာ နောက်ဆုံး သေမင်းနတ်ဘုရားကို တိုက်ခိုက်လိုက်သည်။

"ဝုန်း"

သေမင်းနတ်ဘုရားက အစွမ်းကုန် ခုခံရန် ကြိုးစားသော်လည်း လမ်းဆုံးသို့ ရောက်နေပြီ ဖြစ်သည်။ သူက လုမင်ကို မည်သို့ တားဆီးနိုင်မည်နည်း။ သူတို့၏ ခန္ဓာကိုယ်များက ပေါက်ကွဲသွားကာ မင်ကျစ်၏ ခန္ဓာကိုယ်အစစ်အမှန်ကို ဖော်ထုတ်ခဲ့ရသည်။ သူ့မျက်နှာက ဖြူဖျော့နေကာ အနောက်သို့ ကမန်းကျန်း ဆုတ်ခွာသွားတော့သည်။

နဝမနဂါးက သူ့အနောက်ကို လျှောက်လိုက်သွားခဲ့သည်။ မင်ကျစ်လည်း မျက်နှာအမူအရာ ပြောင်းလဲသွား၏။ နောက်ဆုံးမှာတော့ သူ သက်ပြင်းချကာ စင်မြင့်ပေါ်မှ ထွက်ခွာသွားတော့သည်။

စင်မြင့်မှ ထွက်ခွာသွားခြင်းက အရှုံးပေးခဲ့ခြင်း ဖြစ်သည်။

ဆက်လက်တိုက်ခိုက်ရန် မလိုအပ်မှန်း သူသိသောကြောင့် ရှုံးနိမ့်မှုကိုသာ ဝန်ခံနိုင်ခဲ့သည်။

မင်ကျစ်က အရှုံးပေးလိုက်သောအခါ နဝမနဂါး၏ ခန္ဓာကိုယ်က ပြန်ဆုတ်သွားခဲ့သည်။ နောက်အခိုက်မှာတော့၊ စင်မြင့်ပေါ်တွင် ချောမောသော လူငယ်တစ်ယောက် ပေါ်လာတော့သည်။

ဤသည်မှာ လုမင်၏ မူလပုံစံ ဖြစ်သည်။ လုရှောက်ချင်း နာမည်ကို သုံးခဲ့စဉ်က ထားရှိခဲ့သော အသွင်အပြင်လည်း ဖြစ်ချေသည်။

ဤအခိုက်တွင် လူတိုင်းနီးပါး၏ အကြည့်များက လုမင်ဆီသို့ ကျရောက်သွားကြသည်။

"လုမင်၊ အဲဒါက တကယ်ကို မင်းပဲ"

ဝမ့်ဘိုးဘေးက ဟိန်းဟောက်လိုက်၏။ သူ၏ သတ်ဖြတ်ချင်စိတ်က အလွန်ပြင်းထန်ကာ သူ့ခန္ဓာကိုယ်မှ အားကောင်းသော ရောင်ဝါတစ်ခုလည်း ပျံ့နှံ့သွားတော့သည်။

"မင်းဘာလုပ်နေတာလဲ"

ဝမ့်ဘိုးဘေး၏ နားထဲတွင် အေးစက်စက် ငေါက်ငမ်းသံတစ်ခု ထွက်ပေါ်လာသည်။ သူ့ခန္ဓာကိုယ်က တုန်လှုပ်သွားကာ အရှိန်အဝါများ လျင်မြန်စွာ အားနည်းသွားစေခဲ့၏။

ဧကရာဇ်၏ အသံ ဖြစ်သည်။

သိုင်းအုပ်ချုပ်သူများအားလုံးကို ဤနေရာတွင် စုဝေးခဲ့ကြ၏။ သိုင်းအုပ်ချုပ်သူများပင် စကားမပြောဘဲ ဝမ့်မိသားစု၏ ဘိုးဘေးက သတ်ဖြတ်ချင်စိတ်ကို မည်သို့ ထုတ်ဖော်နိုင်သနည်း။

"လုမင်"

တိရှန်က သွေးကြောများ ပေါက်ထွက်မတတ် ထောင်ထလာသည်အထိ သူ၏လက်သီးကို တင်းတင်းဆုပ်လိုက်သည်။

ကောင်းကင်ဧကရာဇ်ဘုရားကျောင်းမှ လူများ တကယ်ကို အံ့သြတုန်လှုပ်သွားကြသည်။ လုမင်ကို အဘယ်ကြောင့် ဤနေရာတွင် ပေါ်လာသည်အား သူတို့ နားမလည်ခဲ့ပေ။

"သူက တကယ်ကို လုမင်ပဲ။ သူ့ကို ဒီလောက် သန်မာမယ်လို့ မမျှော်လင့်ထားဘူး"

ကောင်းကင်အလောင်းကောင်ဂိုဏ်းမှ ရွယ်ကျန့်ရီ၊ ရှီကျန်းနှင့် ကောင်းကင်နတ်ဆိုးတောင်ကြားမှ အိုတု၊ ဖုန်းရွယ်တို့လည်း မယုံကြည်နိုင်စွာ သက်ပြင်းချလိုက်ကြသည်။

ကမ္မတိုက်ပွဲ၏ နောက်ဆုံးတိုက်ပွဲ ပြီးဆုံးခဲ့တာ နှစ်နှစ်နီးပါး ရှိချေပြီ။

ဤနှစ်နှစ်တာကာလအတွင်း ၎င်းတို့က တိုးတက်လာခဲ့သော်လည်း လုမင်၏ တိုးတက်မှုမှာ ပို၍ပင် တုန်လှုပ်စရာကောင်းသည်။ သူက သူတို့ကို အဝေးကြီးတွင် ထားခဲ့ပြီ။ ရှမ်းဟွမ်တိုက်ကြီး၏ ထိပ်တန်းပါရမီရှင်များကိုပင်လျှင် လုမင်က အနိုင်ယူခဲ့ပြီး ဖြစ်သည်။

သူက ရှမ်းဟွမ်တိုက်ကြီး၏ မျိုးဆက်သစ် လူငယ်များကြား၌ အထွတ်အထိပ်တွင် ရပ်တည်နေချေပြီ။ သူတို့ကတော့ ဟိုးအဝေးကြီးတွင် ရှိနေဆဲပင်။

"သူက တကယ်ပဲ လုမင်လား။ ဒီလောက်ကြောက်စရာကောင်းတဲ့ ပါရမီရှင်က အရှေ့ပိုင်းကန္တာရမှာ ပေါ်လာမယ်လို့ မမျှော်လင့်ထားဘူး"

လူအုပ်ထဲမှ တစ်ယောက်ယောက်က စိတ်ရှုပ်ထွေးသော လေသံဖြင့် ပြောလိုက်သည်။

အရှေ့ပိုင်းကန္တာရ အမြဲတမ်း အားနည်းခဲ့ပေသည်။ ယခင်က၊ အရှေ့တိုင်းတွင် တိရှန်သာ မှတ်သားထိုက်ပြီး ကျန်လူများက ဘာမျှမဟုတ်ဘူးဟု လူတိုင်း ပြောဆိုခဲ့ကြသည်။ ယခုမူ၊ လုမင် ထွက်ပေါ်လာခဲ့ပြီ။ သူက လူအားလုံးကို ဖိနှိပ်ကာ ထိပ်တန်းသုံးဦးသို့ ဝင်ရောက်သွားခဲ့ပြီ ဖြစ်သည်။

"ဒါဆို သူက လုမင်ပေါ့"

ဤအခိုက်တွင် လျိုယွီရှင်း၊ ခြင်္သေ့်င်းနှင့် ခေါင်းသုံးလုံး ငရဲခွေးကဲ့သို့ လုမင်ကို ရှုံးနိမ့်ခဲ့သောသူများက တီးတိုး ရေရွတ်လိုက်ကြသည်။ သူတို့၏ နှလုံးသားထဲတွင် ဘာတွေတွေးနေသည်ကိုတော့ သူတို့ကိုယ်တိုင်သာ သိလိမ့်မည်။