အခန်း ၁၁၄၅

အပိုင်း ( 1145 ) မိုပိုင်တောင်သို့ ဝင်ရောက်ခြင်း။

သူတို့နှစ်ဦးက ၎င်းတို့၏ အရှိန်အဝါများကို ဖုံးကွယ်ကာ မိုပိုင်တောင်သို့ ချဉ်းကပ်ခဲ့ကြသည်။

လမ်းတစ်လျှောက်တွင် သူတို့က မိစ္ဆာနတ်ဆိုးများကို အာရုံခံပြီး ရှောင်ရှားသွားခဲ့၏။

သူတို့နှစ်ဦးက မိုပိုင်နှင့် တစ်စထက်တစ်စ နီးကပ်လာတော့သည်။ သူတို့ နီးကပ်လာလေလေ၊ လုမင်၏ ခန္ဓာကိုယ်တွင်းရှိ ငရဲဖိနှိပ်သွေးမျိုးဆက်က လှုပ်ရှားလာလေလေဖြစ်သည်။

မကြာခင်မှာပဲ သူတို့နှစ်ယောက်ဟာ မိုပိုင်တောင်နှင့် မိုင်တစ်ရာအကွာသို့ ရောက်လာခဲ့ကြသည်။

ဤနေရာသို့ရောက်သောအခါ မြူတိမ်မည်းများ မြင်လာခဲ့ရပြီ။

သူတို့နှစ်ယောက်က နောက်မဆုတ်ဘဲ ရှေ့ကို ဆက်သွားခဲ့ကြသည်။ မျက်စိတစ်မှိတ်အတွင်း မိုင်တစ်ရာကို ကျော်ဖြတ်ကာ မိုပိုင်တောင်သို့ ရောက်ရှိသွားခဲ့ကြလေသည်။

"နတ်ဆိုး… နတ်ဆိုး... နတ်ဆိုး…"

ရုတ်တရက်၊ လုမင်၏ စိတ်ထဲမှာ ကျယ်လောင်သော ဟိန်းဟောက်သံတစ်ခု ထွက်ပေါ်လာခဲ့သည်။

ဤအသံတွင်၊ သဘာဝဂုဏ်သိက္ခာနှင့် ဥပဒေသ ခံစားချက်များ ပြည့်နေသော်လည်း အကူအညီမဲ့မှုနှင့် လက်မခံလိုသော ခံစားချက်တို့ ပြည့်နှက်နေလေသည်။

အနက်ရောင် မြူခိုးများက ဧရိယာတစ်ခုလုံးကယကို လွှမ်းခြုံထားသည်။ သူတို့၏ ကျင့်ကြံခြင်းအခြေခံအရ သူတို့ပတ်ဝန်းကျင်ကို မီတာနှစ်ဆယ်ထက် ပိုမမြင်နိုင်ကြပေ။

ထို့အပြင်၊ သူတို့၏ ခန္ဓာကိုယ်ပေါ်တွင် ကြောက်မက်ဖွယ်ကောင်းသော ဖိအားများ ရှိနေခဲ့၍ ပျံသန်းနိုင်ရန် ခက်ခဲစေသည်။ ထိုအတွက် မြေပြင်ပေါ်သို့ဆင်းကာ လျှောက်သွားရန်သာ ရှိတော့သည်။

"ရှောင်ချင်း၊ သတိထားပါ"

လုမင်က ရှဲ့နျန်ချင်း၏ လက်ကလေးတစ်ဖက်ကို ဆုပ်ကိုင်ကာ ရှေ့သို့ ဂရုတစိုက် လှမ်းကြည့်လိုက်သည်။

"ဝမ်"

လုမင်၏ ကျောရိုးတွင် သွေးနီရောင်အလင်းတန်းများ ပြည့်နှက်လာခဲ့၏။ ငရဲဖိနှိပ်ကျောက်စာတိုင်ကလည်း ပို၍ ပို၍ ပြင်းထန်လာခဲ့ပြီ။

လုမင်က ငရဲဖိနှိပ်ကျောက်စာတိုင် သွေးမျိုးဆက်ကို အတင်းအကြပ် ဖိနှိပ်ထားခဲ့သည်။

နေ့တစ်ဝက်ခန့် ‌လျှောက်လှမ်းလာပြီးနောက် သူတို့နှစ်ယောက်ဟာ တောင်ပေါ်ကို တစ်ဝက်ရောက်နေပြီဟု ခံစားလိုက်ရသည်။ သူတို့နှစ်ဦးက တောင်ထိပ်သို့ နီးကပ်လာခဲ့ကြလေသည်။

တောင်ထိပ်သို့ နီးစပ်လာလေလေ၊ ခံစားချက်များကလည်း ပို၍ ပြင်းထန်လာလေလေ ဖြစ်သည်။

ရှဲ့နျန်ချင်းသည်လည်း ဤနေရာမှ ပြင်းထန်သော ဆွဲဆောင်မှုကို ခံစားခဲ့ရသည်။ သူမ၏ သွေးမျိုးဆက်များလည်း တုန်ခါနေခဲ့ပြီ။

"ဟမ်၊ အရိုးစုတွေ ရှိနေတယ်"

ရုတ်တရက် လုမင်ဟာ မြေပြင်ပေါ်တွင် အရိုးစုများစွာကို တွေ့လိုက်ရသည်။

အရိုးစုများက မကြီးမားဘဲ မိစ္ဆာနတ်ဆိုးမျိုးနွယ်ဝင် အရိုးစုများဖြစ်ကြောင်း သိသာထင်ရှားလှပေသည်။

မိစ္ဆာနတ်ဆိုးမျိုးနွယ်ဝင်များ ဤနေရာတွင် သေဆုံးရခြင်း ကောလဟာလများမှာ အမှန်တကယ် ဖြစ်နေပုံရသည်။

ထို့အပြင် အရိုးစုများအားလုံး၏ လက်ချောင်းများ၌ သိုလှောင်လက်စွပ်များ ရှိသည်။

ရှဲ့နျန်ချင်းက လေထဲသို့ ဖမ်းဆုပ်ဟန်ပြုလိုက်ရာ သူမ၏လက်ထဲတွင် သိုလှောင်လက်စွပ်တစ်ခု ပေါ်လာသည်။ နောက်အခိုက်အတန့်တွင် ရှဲ့နျန်ချင်းက သိုလှောင်လက်စွပ်အတွင်းမှ ကျောက်တုံးနက်များကို ထုတ်ယူလိုက်၏။ ထိုကျောက်တုံးများက သိပ်သည်းသော နဆ်ဆိုးစွမ်းအင်များနှင့် ပြည့်နှက်နေလေသည်။

"ဒါက နတ်ဆိုးကျောက် လေ၊ နတ်ဆိုးတာအိုကို လေ့ကျင့်တဲ့သူတွေအတွက် အရမ်းအသုံးဝင်တယ်။ ငါ့အတွက်တော့ ကျောက်ကြမ်းထက်တောင် ပိုပြီး အသုံးဝင်သေးတယ်"

ရှဲ့နျန်ချင်းက ရှင်းပြလိုက်သည်။

"ဒီမှာ သိုလှောင်လက်စွပ် နည်းနည်းရှိတယ်။ ဒါတွေအားလုံးမှာ နတ်ဆိုးကျောက်တွေ ရှိကောင်းရှိနိုင်တယ်လေ။ အဲဒါတွေကို ယူထားလိုက်ပါ။ နောင်တစ်ချိန်မှာ ဒီနေရာ‌ကနေ ထွက်သွားတဲ့အခါ မင်းအတွက် အသုံးဝင်လိမ့်မယ်"

လုမင်က ပြောလိုက်သည်။ သူက သိုလှောင်လက်စွပ်အားလုံးကို ဆွဲယူကာ ရှဲ့နျန်ချင်းထံသို့ လွှဲပြောင်းပေးလိုက်သည်။

ရှဲ့နျန်ချင်းက နတ်ဆိုးစွမ်းအင်ကို လေ့ကျင့်ခဲ့ပေသည်။ ဤနတ်ဆိုးကျောက်များက ရှဲ့နျန်ချင်းအတွက် အသင့်တော်ဆုံး ဖြစ်သည်။

ရှဲ့နျန်ချင်းလည်း အားလုံးကို သိမ်းဆည်းလိုက်လေသည်။

ထို့နောက်တွင် သူတို့နှစ်ဦးက အနီးတစ်ဝိုက်ကို ရှာဖွေခဲ့ရာ မိစ္ဆာနတ်ဆိုးမျိုးနွယ်စု၏ အရိုးစုများစွာကို တွေ့ရှိခဲ့သည်။ ဟုတ်ပေသည်၊ လူသားမျိုးနွယ်စု၏ အရိုးစုများလည်း ရှိသည်။ သို့သော်လည်း ၎င်းတို့မှာ အရေအတွက် အလွန်နည်းပေသည်။

"နတ်ဆိုး၊ နတ်ဆိုး၊ နတ်ဆိုး"

ထိုအချိန်တွင် လုမင်၏ နားထဲမှအသံက ပိုကျယ်လောင်လာသည်။ ဤအသံများက လူတို့၏စိတ်ကို တိုက်ရိုက်ထိခိုက်စေပေသည်။

၎င်းမှာ နတ်ဆိုးဧကရာဇ်တစ်ပါးမှ ဟိန်းဟောက်နေသကဲ့သို့ ဖြစ်သည်။

သူတို့နှစ်ယောက်က ရှေ့ကို ဆက်လျှောက်သွားခဲ့သည်။ လမ်းတစ်လျှောက်တွင် မိစ္ဆာနတ်ဆိုးမျိုးနွယ်ဝင် အရိုးစုများထံမှ သိုလှောင်ကွင်းများကိုလည်း သိမ်းဆည်းခဲ့၏။ သိုလှောင်ကွင်းတစ်ရာကျော်နှင့် နတ်ဆိုးကျောက်တုံး အများအပြားကို စုဆောင်းနိုင်ခဲ့ကြပေသည်။

ကျန်အရာအားလုံးကို ဘေးဖယ်ထားလျှင်ပင် သိုလှောင်လက်စွပ် တစ်ခုတည်းက အတော်တန်ကြေးရှိသည်။

နောက်ထပ် နေ့တစ်ဝက်ခန့်ကြာတော့ သူတို့နှစ်ယောက်ဟာ တောင်ထိပ်ဆီသို့ ရောက်သွားခဲ့ကြသည်။

လမ်းတစ်လျှောက်တွင် သူတို့နှစ်ဦးက မည်သည့်အန္တရာယ်မှ မကြုံခဲ့ရပေ။

ဤအခြေအနေက သူတို့နှစ်ယောက်ကို တိတ်တဆိတ် အံ့သြသွားစေခဲ့သည်။

မိုပိုင်တောင်က အန္တရာယ်များလွန်းလှပေသည်။ ဝင်လာသူမှန်သမျှ သေကြရသည်။

လမ်းတစ်လျှောက်မှ မိစ္ဆာနတ်ဆိုးမျိုးနွယ်ဝင် အရိုးစုများနှင့် လူသားအရိုးစုများကို ကြည့်ခြင်းအားဖြင့် ဤအချက်ကို အတည်ပြုနိုင်သည်။ သို့သော်လည်း သူတို့၏ ခရီးစဉ်ကတော့ ငြိမ်သက်အေးချမ်းလှပေသည်။

မိုရှာမျိုးနွယ်စု၏ အော်ဟစ်သံမှလွဲ၍ အခြားအသံမရှိပါ။

"ဝမ်"

တောင်ထိပ်သို့ရောက်သောအခါ၊ လုမင်၏ကျောရိုးက သွေးနီရောင်အလင်းတန်းများဖြင့် ပြည့်သွားသည်။ ငရဲဖိနှိပ်ကျောက်စာတိုင်က ပြင်းပြင်းထန်ထန် ခုန်ပေါက်လာခဲ့၏။ လုမင်ကိုယ်တိုင်ပင် မတားဆီးနိုင်တော့ပါ။

ကျယ်လောင်သော အသံတစ်ခုနှင့်အတူ၊ ငရဲဖိနှိပ်ကျောက်စာတိုင်က ထွက်ပေါ်လာပြီး လျင်မြန်စွာ ပြန့်ကားလာခဲ့သည်။

"ဝုန်း"

သူတို့ရှေ့မှ တောင်ထိပ်က ကြောက်မက်ဖွယ်ရာ ပေါက်ကွဲသံကို ကြားလိုက်ရ၏။ ထို့နောက်မှာတော့ အနက်ရောင် မြူခိုးများ နှစ်ခြမ်းကွဲသွားကာ သူတို့ရှေ့မှ မြင်ကွင်းများ အပြည့်အဝ ပေါ်လွင်လာတော့သည်။

"ဒါ…"

သူတို့ရှေ့မှ မြင်ကွင်းကို မြင်လိုက်ရပြီးနောက် နှစ်ဦးစလုံး တုန်လှုပ်ချောက်ချားကာ အံ့ဩသွားကြသည်။

သူတို့ရှေ့တွင် ကြီးမားသော ကျောက်စာချပ်ကြီး ရှိနေသည်။

ဤကျောက်စာချပ်သည် အလွန်တရာ ကြီးမားလွန်း၏။ ၎င်းက အရှိန်အဝါကြီးမားသော တောင်ကြီးကဲ့သို့ မိုးနှင့်မြေကို ဖိနှိပ်ထားလေသည်။

ဤကျောက်စာချပ်ကြီးတွင် နာမည်တစ်ခုသာ ရှိခဲ့သည်၊ ကျောက်စာချပ်။

ထို့ပြင် ကျောက်စာချပ်ကြီး၏ ထိပ်တွင် 'ပေ'ဟူသော စကားလုံးတစ်လုံး ရှိနေသည်။ ၎င်းက ပြီးပြည့်စုံသည့် ကျောက်စာချပ်မဟုတ်သကဲ့သို့ မညီမညာဖြစ်နေခဲ့၏။ ၎င်းမှာ ကြီးမား‌သော ကျောက်စာချပ်ကြီး၏ အစိတ်အပိုင်းတစ်ခုမျှသာ ဖြစ်ပုံရသည်။

ကျောက်စာချပ်ကြီးက ရှေးကျသော အရှိန်အဝါတို့ ပြည့်နှက်နေလေသည်။ ၎င်း၏ အရှိန်အဝါမှာ လုမင်၏ ငရဲဖိနှိပ်ကျောက်စာချပ်နှင့် အလွန်ဆင်တူသည်။

"ဝမ်"

လုမင်၏ ငရဲဖိနှိပ်ကျောက်စာချပ်က ထွက်ပေါ်လာကာ ကျောက်စာချပ်ကြီးအရှေ့တွင် ရပ်တန့်လိုက်၏။ ကျောက်စာချပ်နှစ်ခုက ပဲ့တင်ထပ်ပြီး အချင်းချင်း တုံ့ပြန်နေသကဲ့သို့ အဆက်မပြတ် တုန်ခါကာ တောက်ပသော အလင်းတန်းများ ထုတ်လွှတ်လာတော့သည်။

"လုမင်၊ နင့်ရဲ့ သွေးမျိုးဆက်နဲ့ ဒီကျောက်စာချပ်က တစ်သားတည်းဖြစ်နေတယ်လို့ ငါဘာလို့ခံစားရတာလဲ"

ရှဲ့နျန်ချင် အလွန်အံ့သြသွားသည်။

လုမင်လည်း အတော်ပင် အံ့အားသင့်သွား၏။

အကြောင်းမှာ ဤကျောက်စာချပ်ကြီးက သူ့ကို အလွန်ရင်းနှီးသော ခံစားချက်အား ပေးစွမ်းသည်ဟု ခံစားမိသောကြောင့် ဖြစ်သည်။ ယခင်က ငရဲဖိနှိပ်ကျောက်စာချပ် တုန်လှုပ်ခြင်းမှာတော့ ဤကျောက်စာချပ်ကြီးကြောင့်မှန်း သေချာသွားခဲ့သည်။

ကျောက်စာချပ်ကြီးနှစ်ခုက ပြင်းပြင်းထန်ထန် တုန်ခါသွား၏။ မိုပိုင်တောင် ပတ်ဝန်းကျင်မှ မိစ္ဆာနတ်ဆိုးမျိုးနွယ်ဝင် ကျွမ်းကျင်သူများလည်း ၎င်းကို သတိပြုမိသွားတော့သည်။

"မိုပိုင်တောင်မှာ ထူးခြားတဲ့ လှုပ်ရှားမှုတွေ ဖြစ်လာတယ်။ ဒါက ရတနာတစ်ခု မွေးဖွားလာခဲ့လို့များလား"

"ဒီလောက် တောက်ပနေတဲ့ အလင်းရောင်၊ ဒါက ဆန်းကျယ်တဲ့ ရတနာတစ်ခုပဲ ဖြစ်ရမယ်။ သွားကြည့်ရအောင်"

နတ်ဆိုးအရှိန်အဝါများနှင့် ပုံရိပ်အများအပြားက မိုပိုင်တောင်ကို လျင်မြန်စွာ ချဉ်းကပ်လာတော့သည်။ သူတို့အားလုံးက မိစ္ဆာနတ်ဆိုးမျိုးနွယ်၏ ကျွမ်းကျင်သူများ ဖြစ်သည်။ ၎င်းတို့အထဲတွင် အားအနည်းဆုံးက အဆင့်ငါး ဝိညာဉ်နယ်ပယ်တွင်ရှိပြီး အဆင့်ခုနစ် ဝိညာဉ်နတ်ဘုရားနယ်ပယ် ကျွမ်းကျင်သူများပင် ရှိခဲ့သည်။

မိစ္ဆာနတ်ဆိုးမျိုးနွယ်ဝင်တစ်စုက မိုပိုင်တောင်နှင့် မိုင်တစ်ရာအကွာတွင် ပေါ်လာသည်။

ယခုအချိန်တွင်၊ မိုပိုင်တောင်ပေါ်ရှိ အနက်ရောင် မြူများပ အလွန်ပါးလွှာလာခဲ့၏။ တောက်ပသော အလင်းတန်းများ ထုတ်လွှတ်နေသော ကျောက်စာချပ်ကြီးကိုပင် ရှင်းရှင်းလင်းလင်း မြင်နေကြရပြီ ဖြစ်သည်။

သို့သော်လည်း မိစ္ဆာနတ်ဆိုးမျိုးနွယ်ဝင်များက ထိုနေရာတွင်ရပ်နေကာ အနီးသို့ မသွားရဲကြပေ။ မိုပိုင်တောင်၏ ဝင်လာသူမှန်သမျှ သေဆုံးရသောသတင်းမှာ နာမည်သက်သက် မဟုတ်ပါချေ။

သို့သော်လည်း အလင်းရောင်များ တောက်ပနေသော ကျောက်စာချပ်ကြီးက သူတို့ကို စိတ်ထိန်းမရအောင် ဖြစ်စေသည်။

"အခု မိုပိုင်တောင်က ပြောင်းလဲသွားပြီဆိုတော့ အန္တရာယ်ရှိမှာ မဟုတ်တော့ဘူး"

"မှန်တယ်။ ဟိုလူသားမိန်းကလေးက ဂိုလမ်ကို ထုတ်ယူသွားတာ မြင်လိုက်ရတယ်။ သူတောင်မှ ဘာမှမဖြစ်ဘူး မဟုတ်လား။ မိုပိုင်တောင် ပေါ်ထွန်းလာဖို့ အချိန်တန်ပြီ"

ခပ်ဩဩအသံများနှင့် တစ်ယောက်ပြီး တစ်ယောက် ပြောဆိုခဲ့ကြသည်။ မိစ္ဆာနတ်ဆိုးမျိုးနွယ်ဝင်များ၏ မျက်လုံးများလည်း စိတ်အားထက်သန်မှုဖြင့် ပူလောင်လာတော့သည်။

"မြန်မြန်"

မိစ္ဆာနတ်ဆိုးမျိုးနွယ်ဝင်များလည်း မနေနိုင်တော့ဘဲ အော်ဟစ်ကာ မိုပိုင်တောင်ဆီသို့ ပျံသန်းသွားကြသည်။

သူတို့က မိုပိုင်တောင် နယ်နိမိတ်အတွင်းကို ဝင်လာသောအခါ သူတို့၏စိတ်ထဲတွင် အသံတစ်ခုထွက်ပေါ်လာသည်။

နတ်ဆိုး၊ နတ်ဆိုး၊ နတ်ဆိုး။

ဤနတ်ဆိုးအသံက ကြောက်မက်ဖွယ်ကောင်းသော အဖျက်စွမ်းအားဖြင့် ပြည့်နှက်နေခဲ့၏။

ဤအသံများကြောင့် အဆင့်ငါး ဝိညာဉ်နတ်ဘုရားနှင့် အဆင့်ခြောက် ဝိညာဉ်နတ်ဘုရားနယ်ပယ် မိစ္ဆာနတ်ဆိုး မျိုးနွယ်ဝင်အချို့၏ ခန္ဓာကိုယ်များမှာ စူးစူးဝါးဝါး‌အော်ဟစ်ရင်း ကောင်းကင်ပေါ်မှ ရုတ်ချည်း ပြုတ်ကျသွားတော့သည်။ သူတို့အားလုံး၏ အသက်ဓာတ်များက ကွယ်ပျောက်ကာ မြေပြင်ပေါ်သို့ ပြုတ်ကျသွားရသည်။

သူတို့အားလုံး သေသွားခဲ့ကြပြီ။ မိစ္ဆာနတ်ဆိုးမျိုးနွယ်ဝင် အနည်းဆုံး အယောက် နှစ်ဆယ်ခန့်မှာ တခဏချင်း သေဆုံးသွားရ၏။

အဆင့်ခုနစ် ဝိညာဉ်နတ်ဘုရားနယ်ပယ် မိစ္ဆာနတ်ဆိုး မျိုးနွယ်ဝင်တချို့လည်း ၎င်းတို့၏ ဒွါရခုနစ်ပေါက်မှ သွေးများ အန်ထွက်လာကာ ကသောကမျော ဆုတ်သွားရတော့သည်။

"စိတ်ဝိညာဉ်ကို တိုက်ရိုက် ဖျက်ဆီးနိုင်တယ်"

အဆင့်ခုနစ် ဝိညာဉ်နတ်ဘုရားနယ်ပယ် မိစ္ဆာနတ်ဆိုး မျိုးနွယ်ဝင်တစ်ဦးက မိုင်ရာနှင့်ချီ ဆုတ်ခွာသွားရင်း ကြောက်လန့်တကြား ဟိန်းဟောက်လိုက်သည်။

ယခုအချိန်တွင် မလှုပ်ရှားရသေးသည့် အခြား မိစ္ဆာနတ်ဆိုးမျိုးနွယ်ဝင်များလည်း ရှိနေကြသေးသည်။ သူတို့အားလုံး တိတ်တဆိတ် စိတ်သက်သာရာရသွားသည်။ မဟုတ်ပါက၊ သူတို့လည်း ဤရလဒ်မျိုးကို ရင်ဆိုင်ရမည်မှာ ကြောက်ရွံ့ရပေသည်။