အခန်း ၁၁၆၂

အပိုင်း ( 1162 ) ဝိညာဉ်နတ်ဘုရားကို အနိုင်ယူခြင်း။

"လူငယ်တွေက တကယ်မာနကြီးတာပဲ၊ ငယ်ငယ်ရွယ်ရွယ်နဲ့ မာနကြီးရင် စောစောသေလိမ့်မယ်"

အသျှင်ရွီ၏ မျက်လုံးများက အေးစက်သွားခဲ့သည်။ သူက ရှေ့သို့ ခြေလှမ်းအနည်းငယ်လှမ်းကာ လုမင်အနီးကို လျင်မြန်စွာ ချဉ်းကပ်ခဲ့၏။ သူ၏ အရှိန်အဝါက ပို၍ ရုန့်ရင်းကြမ်းတမ်းလာခဲ့သည်။

"ရွှစ်"

ပျော့ပျောင်းသော ကြာပွတ်တစ်ခုက သူ့လက်ထဲတွင် ပေါ်လာခဲ့သည်။ ကြာပွတ်တစ်ခုလုံးကို ဆူးချွန်များက ဖုံးအုပ်ထား၏။ နေအလင်းအောက်တွင် ကြာပွတ်ဆူးများက အေးစက်စက်ဖြင့် တောက်ပလျက်ရှိသည်။ ၎င်းက ပျော့ပျောင်းသောကြာပွတ်ကို ဝှေ့ယမ်းလိုက်ရာ လျင်မြန်စွာ ကြီးထွားလာခဲ့၏။ နောက်ဆုံးမှာတော့ ဆယ်မိုင်ကျော်အထိ ရှည်လျားလာကာ အဆိပ်မြွေတစ်ကောင်ကဲ့သို့ လုမင်ဆီကို တိုးဝင်လာတော့သည်။

ကြာပွတ်က လေကို ဖြတ်သွားသောအခါ စူးရှသော အသံတစ်ခုနှင့်အတူ ဟင်းလင်းပြင်အား ခွဲထွက်သွားခဲ့သည်။

ထိုသို့သောတိုက်ခိုက်မှုနှင့် ရင်ဆိုင်ရသော်လည်း လုမင်၏ မျက်နှာမှာ အေးဆေးတည်ငြိမ်နေဆဲပင်။ သူ့ခန္ဓာကိုယ်ကို အနည်းငယ် လှုပ်ရှားကာ တိုက်ခိုက်မှုကို ရှောင်လိုက်သည်။ သူက ရှေ့‌ခြေတစ်လှမ်းတိုးပြီး အသျှင်ရွှီကို တိုက်ခိုက်လိုက်၏။

"မင်းမလွတ်နိုင်ဘူး။ ရှောင်မရတဲ့ကွန်ရက်၊ သတ်ဖြတ်ခြင်းအလွှာတစ်သောင်း"

အသျှင်ရွှီက အော်လိုက်သည်။ ပျော့ပျောင်းသော ကြာပွတ်က အစစ်အမှန်အမှန်နဂါးတစ်ကောင်ကဲ့သို့ လေထဲတွင် ဖြတ်သန်းသွား၏။ ကြာပွတ်ရိုက်ချက် အလွှာများက လေထဲတွင် ပြည့်နှက်လာတော့သည်။ ၎င်းက ရှောင်တိမ်းမရနိုင်သော ပိုက်ကွန်တစ်ခုကဲ့သို့ လုမင်ကိုရစ်ပတ်ကာ ဆုတ်ခွာရန် လမ်းကြောင်းအားလုံးကို ပိတ်ဆို့ထားလိုက်သည်။

"ငါက ဘာလို့ ထွက်ပြေးရမှာလဲ။ ချိုးဖြတ်လိုက်ရင် ပြီးပြီ"

တည်ငြိမ်သော အသံတစ်ခု ထွက်ပေါ်လာခဲ့သည်။ လုမင်၏ ခန္ဓာကိုယ်အတွင်းတွင် အစစ်အမှန်နဂါး ဟိန်းဟောက်သံများ ပြည့်လာခဲ့၏။ သူ၏ စွမ်းအင်များက ဆူပွက်လာကာ လက်သီးတစ်ချက် ထုတ်ဖော်လိုက်တော့သည်။

"ဝုန်း"

ဤလက်သီးချက်က ဟင်းလင်းပြင်ကို တွန်းထုတ်လိုက်သလို ဟင်းလင်းပြင်ကို ပေါက်ကွဲသွားစေခဲ့သည်။ ကြောက်မက်ဖွယ်ကောင်းသော လက်သီးအင်အားတစ်ခုက ကြာပွတ်အလွှာများဆီကို ဝင်ရောက်သွား၏။ ထိုကြာပွတ်အလွှာများက ခဏချင်း ပြိုကျသွားကာ အပိုင်းအစများအဖြစ် လွင့်ပါးပျောက်ကွယ်သွားတော့သည်။

ကြောက်မက်ဖွယ်ကောင်းသော အင်အားက ပျော့ပျောင်းသော ကြာပွတ်နှင့် အသျှင်ရွှီထံကို ဆက်လက် တိုးဝင်သွားခဲ့သည်။ အသျှင်ရွှီ မျက်နှာပျက်သွားသည်။ သူ့ခန္ဓာက တုန်ခါသွားကာ နောက်သို့ ဆုတ်လိုက်သည်။

"ဝှစ်"

ပုံရိပ်တစ်ခုက တဖျတ်ဖျတ်ခတ်ကာ သူ့အရှေ့တွင် ပေါ်လာခဲ့သည်။

"မကောင်းတော့ဘူး"

အသျှင်ရွှီ တုန်လှုပ်သွား၏။ သူ၏ မသိစိတ်မှ တုန်လှုပ်ချောက်ချားစွာဖြင့် ပြန်ဆုတ်ရန် ကြိုးစားခဲ့သော်လည်း အချိန်နှောင်းသွားပြီ။

"ဝုန်း"

လုမင်က နောက်ထပ် လက်သီးတစ်ချက် ထုတ်ဖော်လိုက်သည်။ လက်သီးချက်က လျှပ်စီးကဲ့သို့ လျင်မြန်စွာ ထွက်ပေါ်လာခဲ့၏။ လက်သီးချက်က အသျှင်ရွှီ၏ ရင်ဝကို ထိမှန်သွားတော့သည်။

အသံနက်ကြီးဖြင့် အော်လိုက်သံနှင့်အတူ အသျှင်ရွှီ၏တကိုယ်လုံး ပေါက်ကွဲသွားခဲ့သည်။ သူ၏ ဝိညာဉ်နတ်ဘုရားသည်ပင် မလွတ်မြောက်ခဲ့ပေ။

ဝါးမျိုခြင်းစွမ်းအားက ပေါက်ကွဲထွက်လာပြီးနောက် အသျှင်ရွှီကို ဖုံးလွှမ်းသွားခဲ့သည်။ သူ၏ သွေးအနှစ်သာရ၊ သွေးနှင့် စွမ်းအင်အားလုံးကို လုမင်က ဝါးမျိုခဲ့ပေသည်။

"မင်းရဲ့လက်ပါးစေတော့ သေသွားပြီ။ အခု မင်း ကိုယ်တိုင်ကိုယ်ကျ စမ်းမကြည့်ချင်ဘူးလား"

လုမင်က ရှဲ့ကျန်းကို အထင်အမြင်သေးစွာဖြင့် ကြည့်လိုက်သည်။

ယင်းက ရှဲ့ကျန်းကို အံကြိတ်သွားစေခဲ့၏။ တချိန်တည်းမှာပင် သူ့စိတ်ထဲမှာ အကြီးအကျယ် တုန်လှုပ်သွားတော့သည်။

အဆင့်ခုနစ် ဝိညာဉ်နတ်ဘုရားနယ်ပယ် ကျွမ်းကျင်သူတစ်ဦးသည်ပင် လုမင်၏ အလွယ်တကူ အသတ်ခံခဲ့ရသည်။ လုမင်၏ ဤတိုက်ခိုက်နိုင်စွမ်းက ကြောက်စရာကောင်းလွန်းလှသည် မဟုတ်လော။

တခြား စောင့်ကြည့်နေကြသူများလည်း မျက်နှာအမူအရာ ပြောင်းလဲသွားခဲ့သည်။

"အနှစ်တစ်သန်းပြည့် အခမ်းအနားပြီးနောက် လုမင်ရဲ့ခွန်အားက အရမ်းတိုးတက်လာတာပဲ။ ဒီလို အံ့ဩဖွယ်ကောင်းတဲ့ စွမ်းရည်မျိုးက ကမ္ဘာမှာ တွေ့ရခဲလှတယ်"

"သူ့ရဲ့ လက်ရှိ တိုက်ခိုက်နိုင်စွမ်းအရ ရှဲ့နျန်ကျွင်းတောင် သူ့ရဲ့ပြိုင်ဘက် မဖြစ်နိုင်တော့ဘူးပဲ။ လုံချန်နဲ့ဆိုရင်တော့ ဘယ်လိုအခြေအနေရှိမယ်ဆိုတာ ငါသိချင်မိတယ်"

"ငါလည်းမသိဘူး၊ ဒါပေမဲ့ စိတ်မကောင်းစရာက... လုမင် ဘယ်လောက်ပဲ အရည်အချင်းရှိနေပါစေ ဒီနေ့မှာ ရလဒ်က ဆုံးဖြတ်ထားပြီးပြီ။ ဒါက သူတော်စင်မြို့တော်ပဲလေ၊ ဒီမှာ လာရှုပ်ဝံ့ရင် လုမင်မပြောနဲ့၊ သိုင်းအုပ်ချုပ်သူဆိုရင်တောင် ဖြစ်ကောင်းဖြစ်နိုင်တာက ထွက်ခွာသွားဖို့ ခက်လိမ့်မယ်"

လုမင်၏ တိုက်ခိုက်နိုင်စွမ်းနှင့် အရည်အချင်းကြောင့် လူများစွာတို့ ထိတ်လန့်သွားရသည်။ တချိန်တည်းမှာပင် လုမင်ကိုလည်း သနားစိတ်တို့ ပေါ်လာခဲ့လေသည်။ ဤသည်မှာ သူတော်စင်မြို့တော် ဖြစ်သည်။ လုမင် ဘယ်လောက်ထိ သန်မာပါစေ၊ ရလဒ်က ဆုံးဖြတ်ပြီးသားပင်။

"မင်းအသက်အရွယ်နဲ့ ဒီလိုကျင့်ကြံခြင်းအခြေခံ၊ ခွန်အားမျိုးရှိဖို့ဆိုတာ တကယ်ရှားပါတယ်။ ဒီအဘိုးကြီးတောင်မှ မင်းကို လေးစားတယ်။ တကယ်လို့ မင်းသာ ငါ့ တော်ဝင်ရှဲ့မိသားစုကို သွေးသစ္စာကျိန်ဆိုပြီး အညံ့ခံရင် ဒီအဘိုးကြီးက မင်းအသက်ကို ချမ်းသာပေးဖို့ သူတော်စင်ဧကရာဇ်ကို အသနားခံပေးနိုင်တယ်"

ဆံဖြူအဘိုးကြီးတစ်ယောက်က ဟင်းလင်းပြင်တွင်းမှ ထွက်လာကာ လုမင်ဆီသို့ လျှောက်လာခဲ့သည်။ ၎င်းက ဉာဏ်ပညာအမြောအမြင်ကြီးသော နတ်တစ်ပါးကဲ့သို့ အမူအရာမျိုးဖြင့် ကြည့်လိုက်သည်။

သူ့ခန္ဓာကိုယ်မှာတော့ ကြောက်မက်ဖွယ်ကောင်းသော အရှိန်အဝါများ ပြည့်နေခဲ့၏။ ၎င်းက အသျှင်ရွှီထက် အဆများစွာ အားကောင်းသည်။

အဆင့်ရှစ် ဝိညာဉ်နတ်ဘုရားနယ်ပယ် အထွတ်အထိပ်။

လုမင်၏ မျက်လုံးများက အရောင်လက်သွားသည်။ ဤဆံဖြူအဘိုးကြီးက သူ၏ ကျင့်ကြံခြင်းအခြေခံကို လုံးဝ ဖုံးကွယ်မထားပေ။ လုမင်လည်း တစ်ချက်ကြည့်ရုံဖြင့် မြင်လိုက်သည်။

"မင်းက အဆင့်ရှစ် ဝိညာဉ်နတ်ဘုရားတစ်ပါးပါပဲလေ။ မင်းက ငါ့အသက်ကို ချမ်းသာပေးဖို့ သူတော်စင်ဧကရာဇ်ကို တောင်းဆိုပေးရအောင် အရည်အချင်းရှိလို့လား။ မင်း ကိုယ့်ကိုယ်ကိုယ် ပိုတွက်နေတာပဲ"

လုမင်က နှုတ်ခမ်းကို တွန့်ကွေးကာ အထင်မြင်သေးဟန်ဖြင့် ပြောလိုက်သည်။

"အနည်းဆုံးတော့ ဒါက အခွင့်အရေးတစ်ခုရှိသေးတယ် မဟုတ်လား။ မင်း ငြင်းလိုက်ရင်... အခွင့်အရေးတောင် ရှိမှာ မဟုတ်ဘူး"

လုမင်၏ အထင်မြင်သေးသောအကြည့်ကို မြင်ရသောအခါ ဆံဖြူအဘိုးကြီး၏ မျက်လုံးအကြည့်များက စူးရှလာပြီး လေးလေးနက်နက် ပြောလိုက်သည်။

"ဟားဟားဟား၊ မင်း တစ်ယောက်တည်းနဲ့လား။ မင်းက အရည်အချင်းမရှိမှာကို ငါကြောက်တယ်"

လုမင်က ပို၍ပင် အထင်မြင်သေးသော အပြုံးမျိုးဖြင့် ပြုံးလိုက်၏။

"မောက်မာလိုက်တာ၊ ဒီအဘိုးကြီးသာ တိုက်ခိုက်ရင် မင်းမှာ အခွင့်အရေးရှိမှာ မဟုတ်ဘူးကွ"

ဆံဖြူအဘိုးကြီး၏ မျက်လုံးများက ဒေါသတို့ ထွက်ပေါ်လာခဲ့သည်။ သိပ်သည်းသော အဖြူရောင်အလင်းများက သူ့ခန္ဓာကိုယ်မှ ထွက်လာကာ မျက်လုံးအကြည့်များလည်း အေးစက်သွား၏။

လုမင်က အဆင့်ခုနစ် ဝိညာဉ်နတ်ဘုရားနယ်ပယ် ကျွမ်းကျင်သူကို အလွယ်တကူ သတ်နိုင်သော်လည်း သူသည်ကား အဆင့်ရှစ် ဝိညာဉ်နတ်ဘုရားနယ်ပယ် အထွတ်အထိပ်တွင် ရှိသည်။ သူ့ခွန်အားက အဆင့်ခုနစ် ဝိညာဉ်နတ်ဘုရားထက် များစွာ အားကောင်းကာ ထိုအဆင့် ကျွမ်းကျင်သူကို အလွယ်တကူ သတ်နိုင်စွမ်းရှိ၏။ ထို့ကြောင့်ပင်၊ လုမင်ကို ဖိနှိပ်နိုင်မည်ဟု သူယုံကြည်မှုရှိသည်။

နောက်ဆုံးတွင်၊ လုမင်၏အသက်က ငယ်ရွယ်လွန်းဆဲပင်။ သူက မည်မျှပင် သန်မာနေစေကာမူ လွန်စွာ ကြမ်းရမ်းနိုင်မည်မဟုတ်ချေ။

"ဝှစ်"

ဆံဖြူအဘိုးကြီး၏လက်မှ အဖြူရောင်ဓားအလင်းတစ်ခု ပေါ်လာခဲ့သည်။ ဓားအလင်းက အကန့်အသတ်မဲ့ကောင်းကင်ကို ထိုးဖောက်ကာ လုမင်ဆီသို့ ကျရောက်သွား၏။

ဤဓားအလင်းက ထက်ရှကာ ရက်စက်ကြမ်းကြုတ်သည်။ ၎င်းက ရင်သပ်ရှုမောဖွယ်ကောင်းပြီး ကြောက်စရာကောင်းလွန်းလှပေသည်။

ဒီဓားအလင်းက ယခင် အဆင့်ခုနစ် ဝိညာဉ်နတ်ဘုရားနယ်ပယ် အသျှင်ရွှီထက် အဆများစွာ အင်အားကြီးမားသည်။

လုမင်၏ ခန္ဓာကိုယ်တွင်းမှ နဂါးဟိန်းသံများ ထွက်ပေါ်လာခဲ့သည်။ သူ့ဦးခေါင်းထက်တွင် တတိယသွေးမျိုးဆက် ပေါ်ထွက်လာခဲ့၏။ စွမ်းအားများက လှိမ့်ဝင်လာကာ လုမင်၏ ခွန်အား တစ်ဖန်တိုးလာပြန်လာတော့သည်။

"ဝုန်း"

လုမင်က ရှေ့သို့ ခြေတစ်လှမ်းတိုးကာ လက်ဝါးဖြင့် ရိုက်ချလိုက်သည်။

လက်ဝါးအင်အားက ကောင်းကင်ကို တုန်ခါစေခဲ့သည်။ လက်ဝါးအင်အားက ဆံဖြူအဘိုးကြီး၏ ဓားအလင်းကို ထိပ်တိုက်တွေ့ဆုံခဲ့ကြသည်။

"ဝုန်း"

ကျယ်လောင်သော ပေါက်ကွဲသံတစ်ခု ထွက်ပေါ်လာကာ အဖြူရောင်ဓားအလင်း ကွယ်ပျောက်သွား၏။ လုမင်၏ လက်ဝါးအင်အားက ဆံဖြူအဘိုးကြီးဆီကို ဆက်လက် တိုးဝင်သွားတော့သည်။

ဆံဖြူအဘိုးကြီး၏ မျက်နှာအမူအရာက အနည်းငယ် ပြောင်းလဲသွားခဲ့သည်။ သူ့လက်ထဲမှဓားကို လွှဲခုတ်လိုက်ရာ နှင်းဖြူဓားအလင်းများ ထွက်လာခဲ့၏။ ဓားအလင်းများက လုမင်ဆီကို အဆက်မပြတ် တိုးဝင်သွားကြသည်။

"ဝုန်း ဝုန်း ဝုန်း"

လုမင်က နောက်မတွန့်ဘဲ လက်သီးချက်များ ထုတ်ဖော်လိုက်သည်။

ဝေဝါးဝါးဖြင့်၊ လုမင်၏လက်သီးက အရာအားလုံးကို ဖိနှိပ်နေသော ငရဲဖိနှိပ်ကျောက်စာချပ်အဖြစ် ပြောင်းလဲသွားခဲ့ပုံရသည်။

ပြင်းထန်သော ပေါက်ကွဲသံများ ကောင်းကင်ယံတွင် ထွက်ပေါ်လာခဲ့သည်။ ဆံဖြူအဘိုးကြီး၏ ဓားအလင်းများက အဆက်မပြတ် ပြိုကျသွားသည်။ လုမင်က ဓားအလင်းများကို ဖျက်စီးကာ ဆံဖြူအဘိုးကြီးကို ထိုးကြိတ်လိုက်၏။

ဆံဖြူအဘိုးကြီး၏ အမူအရာက တစ်ဖန် ပြောင်းလဲသွားခဲ့သည်။ သူ့မျက်နှာက အကြည့်ရဆိုးကာ လေးနက်လာခဲ့၏။ ၎င်းက အသံကျယ်ကျယ်ဖြင့် ဟိန်းဟောက်လိုက်ကာ သွေးမျိုးဆက် ပေါင်းစပ်ခြင်းဖြင့် ဓားတစ်လက်အသွင် ပြောင်းလဲသွားတော့သည်။

ဓားက တုန်ခါသွားကာ ပို၍ကြောက်စရာကောင်းသော စွမ်းအားမျိုးဖြင့် လုမင်အား ခုတ်ပိုင်းချလိုက်သည်။

"ဂါး"

နဂါးဟိန်းသံနှင့် နဝမနဂါး ထွက်ပေါ်လာခဲ့သည်။ လုမင်က နဝမနဂါးအသွင် ပြောင်းလဲကာ လှမ်းတက်လိုက်၏။ နဝမနဂါး လက်သည်းများက ဓားအလင်းအားလုံးကိုဖြတ်ကျော်ကာ ဓားကြီးဆီသို့ ကုပ်ဆွဲလိုက်တော့သည်။

အဖြူရောင်ဓားကြီးက ပြင်းပြင်းထန်ထန် တုန်ခါသွားကာ တစ်ခါတည်းပြိုကျပြီး ဆံဖြူအဘိုးကြီး၏ မူလခန္ဓာ ထွက်ပေါ်လာခဲ့သည်။

ဤအခိုက်တွင်၊ ဆံဖြူအဘိုးကြီးက ယခင်ကကဲ့သို့ ဉာဏ်ပညာကြီးသော ဟန်အမူအရာမျိုး မရှိတော့ပေ။ သူ၏ဆံပင်များက ရှုပ်ပွပြီး အဝတ်အစားများ ဆုပ်ပြဲကာ သွေးအလူးလူး ဖြစ်သွားသည်။ သူ၏ မျက်လုံးများက ကြောက်ရွံ့မှုတို့ ပြည့်နှက်သွားကာ မြို့ရိုးဆီသို့ အသည်းအသန် ထွက်ပြေးတော့သည်။

ဤအခြေအနေကို မြင်တွေ့ပြီးနောက် မရေမတွက်နိုင်သော မြို့နေလူများ ပင့်သက်ရှိုက်လိုက်သည်။ ယင်းက လူတိုင်းကို တုန်လှုပ်သွားစေခဲ့လေသည်။

အဆင့်ရှစ် ဝိညာဉ်နတ်ဘုရားနယ်ပယ် အထွတ်အထိပ်မှ ကျွမ်းကျင်သူတစ်ဦး ရှုံးနိမ့်သွားခဲ့သည်။ လုမင်ကြောင့် ဒဏ်ရာအပြင်းအထန်ရကာ ရုပ်ပျက်ဆင်းပျက် ထွက်ပြေးသွားခဲ့ရပေသည်။

ဤသည်က မယုံနိုင်စရာကောင်းလွန်းသည်။ ကိုယ့်မျက်စိနှင့် မမြင်ရလျှင် မည်သူမျှ ယုံနိုင်ကြမည်မဟုတ်ပေ။

အသက်သုံးဆယ်ပင် မပြည့်သေးသော လူငယ်တစ်ဦးက ဝါရင့် အဆင့်ရှစ် ဝိညာဉ်နတ်ဘုရားနယ်ပယ် အထွတ်အထိပ်မှ ကျွမ်းကျင်သူတစ်ဦးကို ဒဏ်ရာအပြင်းအထန် ရရှိစေခဲ့သည်။ ဤသို့သော မှတ်တမ်းမျိုးက ရှမ်းဟွမ်တိုက်ကြီး၏ ခေတ်များတစ်လျှောက်တွင် မှတ်တမ်းတင်ခဲလှပေသည်။

ဤသည်က သာမာန်အသိအမြင်ကို ကျော်လွန်သွားကာ ကြောက်စရာကောင်းလွန်းသည်။

ယခု‌တော့၊ ကမ္ဘာပေါ်တွင် နံပါတ်တစ်ပါရမီရှင်ဟု လူသိများသော လုံချန်သည်ပင် လုမင်၏ပြိုင်ဘက် ဖြစ်ဦးမလားဟု လူအများက သံသယဖြစ်သွားခဲ့ကြသည်။

ကောင်းကင်အမြင့်တွင် ရှဲ့နျန်ချင်းနှင့် တိုက်ခိုက်နေသော ရှဲ့နျန်ကျွင်းလည်း ဤအခြေအနေကို သဘာဝအတိုင်း ခံစားခဲ့ရသည်။ သူ့နှလုံးသားက တုန်ခါသွားသည်။ သူမ မျက်လုံးများမှာလည်း မယုံကြည်နိုင်မှုတို့ ပြည့်သွား၏။

လုမင်၏ တိုက်ခိုက်နိုင်စွမ်းက သူ့ထက် များစွာကျော်လွန်သွားခဲ့ပြီ ဖြစ်သည်။

သူမ၏ မာနကြီးသောစရိုက်ဖြင့် ဤအချက်ကို လုံးဝ လက်မခံနိုင်ပေ။