အခန်း ၁၂၃၅
Vol. 83 Ch. 1235
အပိုင်း ( 1235 ) လုမင်ကို အကူအညီတောင်းခြင်း။
ခြင်္သေ့မင်းနှင့် အခြားလူငယ်တချို့မှာ ကံကောင်းထောက်မ၍ မသေသေးသော်လည်း အာခေါင်ခြစ်ကာအော်ဟစ်ရင်း အသည်းအသန် ခုခံလိုက်ကြသည်။
သူတို့က ဝိညာဉ်တတ်ဘုရားနယ်ပယ် သတ္တမအဆင့်မှ အပြာရောင်ဝတ် လူငယ်နှစ်ဦးနှင့် လုံးဝ မယှဉ်နိုင်ပေ။ ထိုလူငယ်နှစ်ဦးက အလွန်သန်မာပြီး သူတို့ကို အလွယ်တကူ ချေမှုန်းပစ်နိုင်သည်။
"မဟုတ်ဘူး၊ ငါမသေချင်သေးဘူး"
ခြင်္သေ့မင်းက သူ့နှလုံးသားထဲမှ ရူးသွပ်စွာ ဟိန်းဟောက်လိုက်သည်။ သူ့စိတ်ထဲတွင် အလွန်အမင်း စိုးရိမ်လာပြီး တန်ပြန်လှုပ်ရှားရန်နည်းလမ်းများကိုလည်း စဉ်းစားလိုက်၏။
ရုတ်တရက် သူ၏ မျက်လုံးများက တောက်ပလာတော့သည်။
လုမင်...
လွန်ခဲ့သော ခုနစ်ရက်က လုမင်သည် ငွေတောင်ပံနှင့် မန်ဖုန်း၏ ဝန်းရံခံရကြောင်း ထင်ရှားသော်လည်း ယခုထိ အသက်ရှင်နေဆဲ ဖြစ်သည်။ ဖြစ်ကောင်းဖြစ်နိုင်သည်က လုမင်ဟာ သူတို့ကို ကယ်တင်နိုင်လိမ့်မည်။
သူက လုမင်ဆီသို့ ပြေးလွှားသွားကာ အော်လိုက်သည်။
"လုမင်၊ ကယ်ပါ... ငါ့ကို ကယ်ပါဦး"
"မင်းကို ဘာဖြစ်လို့ ကယ်ရမှာလဲ"
လုမင်က လှောင်ပြောင်လိုက်၏။
"ဝှစ်"
ဤအခိုက်တွင်၊ ဝိညာဉ်နတ်ဘုရားနယ်ပယ် သတ္တမအဆင့်မှ လူငယ်တစ်ဦးက လုမင်ဆီသို့ ဓားအလင်းတစ်ခု ထုတ်ဖော်လာသည်။
လုမင်က ဓားအလင်းကို လက်သီးနှင့် ထိုးခွဲလိုက်၏။ ၎င်းက လူငယ်ကို မျက်မှောင်ကြုတ်သွားစေပြီး ခြင်္သေ့မင်းမှာတော့ မျက်လုံးများ တောက်ပလာတော့သည်။
လုမင်က ဝိညာဉ်နတ်ဘုရားနယ်ပယ် သတ္တမအဆင့် ကျွမ်းကျင်သူ၏ တိုက်ခိုက်မှုကို တားဆီးနိုင်ခဲ့သည်။
ဤအခိုက်တွင်၊ ခြင်္သေ့မင်းက အသက်ကယ် ကောက်ရိုးတစ်မျှင်ကို ဆွဲကိုင်လိုက်မိသကဲ့သို့ စိတ်လှုပ်ရှားသွားခဲ့လေသည်။
"ငါတို့က တိုက်ကြီးတစ်ခုတည်းကနေ အတူတူလာခဲ့တာ မဟုတ်ဘူးလား။ ဒီအချိန်မျိုးမှာ ငါတို့အတူတူ လုပ်ကြရမယ်"
ခြင်္သေ့မင်းက အော်ပြောသည်။
"အတူတူအလုပ်လုပ်မှာလား။ လွန်ခဲ့တဲ့ ခုနစ်ရက်လောက်က ငါ ပိတ်မိနေတဲ့အချိန်မှာ မင်း ဘာဖြစ်လို့ အတူတူ အလုပ်မလုပ်တာလဲ"
လုမင် လှောင်ပြောင်လိုက်၏။
လွန်ခဲ့သော ခုနစ်ရက်က လုမင်သည် တိုက်ခိုက်နေရသော်လည်း ခြင်္သေ့မင်းကို သတိပြုမိခဲ့သည်။ ထိုအချိန်က ခြင်္သေ့မင်းသည် အခြားသူများထက် ပို၍လျင်မြန်စွာ ပြေးသွားခဲ့၏။ ၎င်းက တစ်ပါးသူ၏ကံဆိုးမှုအတွက်ပင် ကျေနပ်နေပုံရသေးသည်။ ယခုမှ ခြင်္သေ့မင်းက သူ့ကို ကယ်တင်စေချင်နေသည်။ ယင်းက ရယ်စရာပဲ မဟုတ်လား။
"ငါ အားနည်းလို့ပါ"
ခြင်္သေ့မင်းက အော်လိုက်သည်။
"မင်းက အားနည်းတာလား။ ဒါဆိုရင် မင်းလိုအမှိုက်တစ်စကို ဒီကမ္ဘာကြီးထဲမှာ ဘာဖြစ်လို့ ချန်ထားရဦးမှာလဲ"
လုမင်က အနည်းငယ်ပြုံးလိုက်သည်။ သူ့ပုံရိပ်က တစ်ချက်လှုပ်ရှားပြီး ခြင်္သေ့မင်းအနီးမှ ထွက်ခွာသွား၏။
"မဟုတ်ဘူး၊ ငါ့ကိုကယ်ပါဦး"
လုမင် ထွက်သွားသည်ကို မြင်ရပြီးနောက် ခြင်္သေ့မင်း သေးတဖြန်းဖြန်းပါကျသည်အထိ ကြောက်လန့်တကြားဖြင့် အော်ဟစ်လိုက်သည်။
"လုမင်၊ ငါ့ကိုကယ်ပါ။ ငါ့ကို ကယ်တင်ပေးသရွေ့ မင်းရဲ့ စီးတော်ဖြစ်ဖို့ ငါ ဆန္ဒရှိပါတယ်"
"မင်းလို အမှိုက်စီးတော်ကို ငါစိတ်မဝင်စားဘူး"
လုမင် ပြောလိုက်သည်။
"သေ"
ဤအခိုက်တွင်၊ ဝိညာဉ်နတ်ဘုရားနယ်ပယ် သတ္တမအဆင့်ရှိ အပြာရောင်ဝတ်လူငယ်တစ်ဦးက ခြင်္သေ့မင်းကို ဓားဖြင့် ခုတ်ချလိုက်၏။
"မဟုတ်ဘူး"
ခြင်္သေ့မင်း လက်မခံနိုင်ဘဲ ဟိန်းဟောက်ပြီး အစွမ်းကုန် ခုခံခဲ့သည်။ သို့သော်လည်း အသုံးမဝင်ဘဲ သူ၏ဦးခေါင်းက လေထဲကို လွင့်စဉ်သွားတော့သည်။
ခြင်္သေ့မင်းသေပြီ။
ယခုအချိန်တွင် ခြင်္သေ့မင်း သေဆုံးပြီးနောက် လုမင်တစ်ဦးသာ ကျန်ခဲ့သည်။
"အတူတူ ပူးပေါင်းလိုက်ကြရအောင်၊ ဒီလူကိုကြည့်ရတာ တိုက်ခိုက်နိုင်စွမ်း သန်မာပုံရတယ်"
ဝိညာဥ်နတ်ဘုရားနယ်ပယ် သတ္တမအဆင့်ရှိ အပြာရောင်ဝတ်လူငယ်တစ်ဦးက ပြောလိုက်သည်။
"ထွက်သွား၊ ငါ မင်းတို့ကို မသတ်ချင်ဘူး"
လုမင်သည် ဤနေရာ၌ ရှဲ့နျန်ချင်းကို မမြင်ခဲ့ပေ။ ထို့ကြောင့် သူ အနည်းငယ် စိတ်ပျက်ပြီး ထွက်သွားချင်ခဲ့သည်။
"မင်းက ငါတို့ လှုပ်ရှားပုံကို မြင်ရပြီးမှ ထွက်သွားချင်သေးတာလား။ ဉာဏ်နည်းလိုက်တာ"
ဝိညာဉ်နတ်ဘုရားနယ်ပယ် သတ္တမအဆင့်ရှိ အပြာရောင်ဝတ် လူငယ်တစ်ဦးက လှောင်ပြောင်လိုက်၏။
သူတို့အားလုံးက နာမည် ကျော်ကြားသော တိုက်ကြီးတစ်ခုမှ လာကြခြင်း ဖြစ်သည်။ သို့ရာတွင်၊ ၎င်းတို့က အခြားပါရမီရှင်များကို ဤသို့သတ်ဖြတ်ခဲ့ကြောင်း ပျံ့နှံ့သွားပါက ၎င်းတို့၏ဂုဏ်သိက္ခာအတွက် ကောင်းမွန်လိမ့်မည် မဟုတ်ပေ။ ထို့ကြောင့် လုမင် သေရမည် ဖြစ်သည်။
"သူနဲ့ အပိုစကားတွေ ဘာဖြစ်လို့ ပြောကြရမှာလဲ။ အတူတူတိုက်ခိုက်ပြီး ဒီလူကိုသတ်လိုက်မယ်။ ပြီးရင် ဒီနေရာကနေ အမြန်ထွက်သွားကြစို့"
အခြားတစ်ယောက်ကလည်း အေးစက်စက်ဖြင့် ပြောလိုက်၏။
"ဝှစ် ဝှစ် ဝှစ်"
ဓားအလင်းရှစ်ခုက ပေါက်ကွဲထွက်လာကာ လုမင်၏ တကိုယ်လုံးကို လွှမ်းခြုံသွားတော့သည်။
"ဝေါင်း ဝေါင်း"
လုမင်၏ ခန္ဓာကိုယ်အတွင်းမှ နဂါးစွမ်းအားရှစ်ခု ပေါက်ကွဲထွက်လာခဲ့သည်။ သူက လက်သီးချက်ရှစ်ခုကို ဆက်တိုက် ထုတ်ဖော်လိုက်၏။
ဓားအလင်းရှစ်ခုက ချက်ချင်း ပေါက်ကွဲသွားခဲ့သည်။ သို့ရာတွင် လက်သီးအင်အားများက မရပ်တန့်ဘဲ ရှေ့သို့ ဆက်လက်ပေါက်ကွဲသွား၏။
အားနည်းသော လူငယ်နှစ်ဦးမှာ လက်သီးချက်ကြောင့် သေဆုံးသွားတော့သည်။
နောက်လေးဦးမှာလည်း သွေးအန်ကာ ချောင်းတဟွတ်ဟွတ်ဆိုးရင်း ဒဏ်ရာအပြင်းအထန်ရကာ ဆုတ်ခွာသွားရသည်။ သတ္တမအဆင့် ဝိညာဉ်နတ်ဘုရားနယ်ပယ် ပါရမီရှင်နှစ်ဦးပင်လျှင် ဒယီးဒယိုင်ဖြင့် ဆုတ်သွားခဲ့ရသည်။ သူတို့၏ အမူအရာများကလည်း သိသိသာသာ ပြောင်းလဲသွားလေသည်။
"မကောင်းတော့ဘူး၊ ဒီလူက သန်မာလွန်းတယ်။ နောက်ဆုတ်ကြ"
သတ္တမအဆင့် ဝိညာဉ်နတ်ဘုရားနယ်ပယ်မှ ပါရမီရှင်တစ်ယောက်က ကြောက်လန့်တကြားဖြင့် အော်ဟစ်ကာ ထွက်ပြေးရန် ကြိုးစားလိုက်သည်။
"သတ်"
လုမင်က ရှေ့သို့တိုးလိုက်သည်။ သူက လက်သီးချက်ထုတ်ဖော်လိုက်ရာ ကျန်ခြောက်ဦးကို ဖုံးအုပ်သွား၏။
အခြား အပြာရောင်ဝတ် လူငယ်လေးဦး အော်ဟစ်ကာ သေဆုံးသွားပြန်တော့သည်။ ဝိညာဉ်နတ်ဘုရားနယ်ပယ် သတ္တမအဆင့်မှ တည်ရှိမှုနှစ်ခုရှိလျှင်ပင် အနည်းငယ်မျှသာ တွန်းလှန်နိုင်ပြီး မကြာမီ သေဆုံးသွားကြရသည်။
ခဏလေးအတွင်းမှာပင် ဤဧရိယာ၌ ပါရမီရှင် တစ်ဒါဇင်ကျော် သေဆုံးသွားခဲ့ရလေသည်။
ဤပါရမီရှင်များက သက်ဆိုင်ရာ တိုက်ကြီးများ၏ အထွတ်အထိပ်တွင် ရပ်နေသူများ ဖြစ်သည်။ သူတို့က ၎င်းတို့၏ ရွယ်တူမျိုးဆက်သစ်များကို ဖိနှိပ်ကာ တုနှိုင်းမရသူများ ဖြစ်ခဲ့သည်။ ၎င်းတို့အားလုံးက နတ်ဘုရားအဆင့်ကိုး သွေးမျိုးဆက်ကို နိုးထစေခဲ့သူများဖြစ်၍ အနာဂတ်တွင် သိုင်းအုပ်ချုပ်သူများဖြစ်လာမည်မှာ သေချာလှပေသည်။
သို့သော်လည်း ဤနေရာတွင် သူတို့အသက်များက မြတ်ပင်ရိတ်လှီးသကဲ့သို့ အဆက်မပြတ် ရိတ်သိမ်းခံခဲ့ကြသည်။
ဤအခြေအနေကြောင့်ပင် လုမင်ဟာ ရှဲ့နျန်ချင်း၏ လုံခြုံရေးအတွက် ပို၍ပင် စိုးရိမ်လာတော့သည်။
"ဝမ်"
သွေးနီရောင်သော့ကိုးခုက လုမင်၏ ဦးခေါင်းထက်တွင် ပေါ်လာခဲ့သည်။ သွေးအလင်းတစ်ခုကလည်း ကောင်းကင်ကို ထိုးတက်သွား၏။
သို့သော်လည်း လုမင်တွင် ၎င်းကိုအာရုံစိုက်ရန် အချိန်မရှိသလို နန်းတော်ကိုဖွင့်ရန်နှင့် အခွင့်အလမ်းများကို ရယူရန်လည်း အချိန်လည်းမရှိပေ။ သူ့စိတ်ထဲတွင် ရှဲ့နျန်ချင်းကိုသာ ပထမဆုံး ရှာဖွေချင်ခဲ့သည်။
"ဝှစ်"
သူက ရှေ့သို့ ခြေတစ်ချက်တိုးကာ နဝမနဂါးခြေလှမ်းကိုသုံးပြီး ပြေးထွက်သွားတော့သည်။
သူ့အရှိန်က အလွန်မြန်ပြီး လျှပ်စီးကဲ့သို့ ဖြစ်နေခဲ့သည်။
"အဲဒါဘာကြီးလဲ"
"သွေးနီရောင်အလင်းတန်းတစ်ခုနဲ့တော့ တူတယ်"
လုမင်၏ ဦးခေါင်းထက်တွင် သွေးနီရောင်အလင်းက တောက်ပနေဆဲပင်။ လုမင်၏ မြင့်မားသော အမြန်နှုန်းကြောင့် သွေးအလင်းမှာ ရွေ့လျားနေသော သွေးနီရောင်အလင်းနှင့်တူပြီး လူအများ၏ အာရုံကို ဖမ်းစားနိုင်ခဲ့သည်။
သို့သော်လည်း သွေးနီရောင်အလင်းက အဝေးသို့ ခဏချင်းပျောက်ကွယ်သွားလေရာ လူအများမှာ မြင်ရုံမျှ မြင်ခဲ့ရပေသည်။
လုမင်က ဝိညာဉ်အသိဖြင့် ပတ်ဝန်းကျင်ကိုအကဲခတ်ကာ ရှဲ့နျန်ချင်းကိုရှာဖွေရင်း အမြန်နှုန်းမြှင့်၍ ဆက်လက် ပျံသန်းသွားခဲ့သည်။
ကံကောင်းထောက်မစွာဖြင့် ဤကမ္ဘာငယ်လေးက ကြီးမားလွန်းသည် မဟုတ်ပေ။ လုမင်၏ အမြန်နှုန်းဖြင့် နောက်ဆုံးတွင် ကမ္ဘာအဆုံး ဖရိုဖရဲနေရာသို့ ရောက်လာခဲ့သည်။ ထို့နောက်မှာတော့ လုမင်ဟာ ဦးတည်ချက်ပြောင်းရင်း ဆက်လက် ရှာဖွေပြန်တော့သည်။
...........
ရေကန်တစ်ခုအထက် ကောင်းကင်ယံတွင် တိုက်ပွဲပြင်းထန်စွာ ဖြစ်ပွားနေသည်။
သတ္တမအဆင့် ဝိညာဉ်နတ်ဘုရားနယ်ပယ် ကျွမ်းကျင်သူနှစ်ဦးက တုနှိုင်းမမီသော မိန်းမလှလေးတစ်ဦးကို အတူတိုက်ခိုက်နေခဲ့ကြ၏။ ထိုမိန်းကလေးက ရှဲ့နျန်ချင်း ဖြစ်သည်။
ထိုအချိန်တွင်၊ ရှဲ့နျန်ချင်း၏ ဦးခေါင်းထက်မှာ သွေးနီရောင် သော့ငါးခု ရှိ၏။
သတ္တမအဆင့် ဝိညာဉ်နတ်ဘုရားနယ်ပယ် လူငယ်နှစ်ဦးတွင်လည်း သွေးနီရောင်သော့ ငါးခုစီ ရှိသည်။
သတ္တမအဆင့် ဝိညာဉ်နတ်ဘုရားနယ်ပယ် ကျွမ်းကျင်သူနှစ်ဦးက အားကောင်းသော်လည်း ရှဲ့နျန်ချင်းကို ခဏချင်း ဖိနှိပ်၍မရပေ။
ခုနစ်ရက်ကျော်ကြာပြီးနောက်၊ ရှဲ့နျန်ချင်း၏ ကျင့်ကြံခြင်းအခြေခံက တစ်ဖန်တိုးတက်လာကာ ဆဋ္ဌမအဆင့် ဝိညာဉ်နတ်ဘုရားနယ်ပယ် အထွတ်အထိပ်သို့ ရောက်ရှိသွားခဲ့သည်။ သို့သော်လည်း၊ သူမ၏ တိုက်ခိုက်နိုင်စွမ်းက အလွန်အားကောင်းကာ သတ္တမအဆင့် ဝိညာဉ်နတ်ဘုရားနယ်ပယ် ကျွမ်းကျင်သူနှစ်ဦးကို တစ်ဦးတည်း တိုက်ခိုက်နိုင်ခဲ့ပေသည်။
"ဝမ်"
ရှဲ့နျန်ချင်း၏ ခန္ဓာကိုယ်ပေါ်တွင် နတ်ဆိုးစွမ်းအင်များက ဆူပွက်နေခဲ့သည်။ ကြီးစိုးပြီး ကြောက်စရာကောင်းသော နတ်ဆိုးလမ်းစဉ် မဟာလက်ဝါးတံဆိပ်တော်များက ပြိုင်ဘက်လူကယ်နှစ်ဦးကို အဆက်မပြတ် ရိုက်ချလိုက်၏။ သူမ၏ အင်အားက အလွန်ကြီးမားကာ အချိန်အတိုင်းအတာ တစ်ခုအတွင်း အနိုင်အရှုံးကို ခွဲခြားရန် ခက်ခဲသည်။
စစ်မြေပြင်နဲ့ မနီးမဝေးမှာ ရုပ်ပုံသုံးပုံရှိတယ်။
တိုက်ပွဲနှင့် မနီးမဝေးမှာတော့ လူငယ်သုံးယောက် ရှိနေသည်။
တစ်ယောက်က အရပ်ရှည်ကာ ခန္ဓာကိုယ် ကြံ့ခိုင်သန်စွမ်းပုံရှိ၏။ ၎င်းက သူ့နှာခေါင်းပေါက်တွင် ရွှေရောင် လက်စွပ်ကွင်းတစ်ခုကို ဖောက်ဆွဲထားခဲ့သည်။ ထိုသူက လက်နှစ်ဖက်ကိုနောက်ပစ်ပြီး တိုက်ပွဲကို တည်ငြိမ်သောအမူအရာဖြင့် ကြည့်နေပေသည်။
သူ့ဘေးနားမှာတော့ ကျန်လူငယ်နှစ်ဦးက လေးလေးစားစား မတ်တပ်ရပ်နေခဲ့ကြသည်။
"တာအိုသိုင်းပညာကို မဆုပ်ကိုင်နိုင်သေးတဲ့ မိန်းမတစ်ယောက်မှာ ဒီလိုတိုက်ခိုက်နိုင်စွမ်း တကယ်ရှိလိမ့်မယ်လို့ မမျှော်လင့်ထားဘူး။ ဒါက တကယ့်ကို ရှားတယ်"
နှာခေါင်းတွင် လက်စွပ်နှင့် လူငယ်က ရှဲ့နျန်ချင်း၏ လှုပ်ရှားမှုများကို စောင့်ကြည့်နေခဲ့သည်။ ရံဖန်ရံခါကျလျှင်တော့ လျစ်လျူရှုထားသော သူ့မျက်လုံးများက မီးတောက်များဖြင့် လင်းလက်သွားပေသည်။
"ဒီမိန်းမက တကယ်ကို အစွမ်းထက်တာပဲ။ သခင်လေးနျို သူ့ကို ဖိနှိပ်ပြီးရင် ကိုယ်လုပ်တော်အဖြစ် ခေါ်သွားလို့ရတယ်"
သူ့အနားမှ လူငယ်တစ်ဦးက မြှောက်ပင့်ပြောဆိုလိုက်သည်။
နှာခေါင်းမှာလက်စွပ်နှင့် လူငယ်ကလည်း စိတ်ဝင်စားဟန်ဖြင့် ခေါင်းညိတ်လိုက်ပေသည်။
"အိမ်း၊ စောင့်ကြည့်ကြသေးတာပေါ့"
'သေစမ်း၊ ဒီမိန်းမက ဘယ်သူလဲ။ သူ့မှာ တကယ်ကြီး ဒီလို တိုက်ခိုက်နိုင်စွမ်းတွေ ရှိတယ်။ ငါတို့ သူ့ကို တတ်နိုင်သမျှ အမြန်ဆုံး ဖယ်ရှားရမယ်၊ ငါတို့ကို သခင်လေးနျို အထင်မြင်သေးလို့ မရဘူး'
ရှဲ့နျန်ချင်းကို တိုက်ခိုက်နေသော လူငယ်တစ်ယောက်က စိတ်ထဲမှ ဟိန်းဟောက်လိုက်သည်။
သူတို့နှစ်ယောက်စလုံး အံကြိတ်ကာ ရှဲ့နျန်ချင်းကို အစွမ်းကုန် တိုက်ခိုက်လိုက်၏။
ခဏကြာတော့ ရှဲ့နျန်ချင်း၏ ခန္ဓာကိုယ်မှ နတ်ဆိုးစွမ်းအင်များက ဖိနှိပ်ခံရပြီး အားနည်းသည့်ဘက်ကို ကျရောက်လာတော့သည်။