အခန်း ၁၂၉၁

အပိုင်း ( 1291 ) ဟွင်းယွမ်တာအိုနှင့် သတ်ဖြတ်ခြင်း စမ်းသပ်မှု။

"မြေတာအို၊ လေတာအို၊ မီးတာအို၊ မိုးကြိုးတာအိုနဲ့ ရေတာအို... မတူညီတဲ့ တာအိုငါးမျိုးကို အမှန်တကယ် ပေါင်းစပ်ထားတာပဲ။ မင်းက စမ်းသပ်မှု ဖြေဆိုဖို့အတွက် အရည်အချင်းပြည့်မီပါတယ်။ ဒါပေမဲ့ ဟွင်းယွမ်ကျမ်းကို ရယူချင်ရင်တော့... နောင်လာမဲ့ စမ်းသပ်မှုတွေကို မင်း အောင်မြင်အောင် ဖြတ်ကျော်ရလိမ့်မယ်"

ထူယီက လုမင်၏ ပတ်ဝန်းကျင်မှ တာအိုငါးခုကိုကြည့်ကာ အနည်းငယ် ခေါင်းညိတ်သည်။ သူ့မျက်လုံးထဲမှာတော့ မျှော်လင့်ချက် အရိပ်အယောင်များ တလက်လက်တောက်ပလာတော့သည်။

လုမင်လည်း တိတ်တဆိတ် တုန်လှုပ်သွားမိသည်။ ဟွင်းယွမ်ကျမ်းကို လေ့ကျင့်ရန် လိုအပ်ချက်များက ရူးသွပ်ဖွယ်ကောင်း၍ သူ အံ့ဩသွား၏။

ပထမဦးစွာ လူတစ်ဦးက လုံးဝကွဲပြားသော တာအိုငါးခုကို နားလည်သဘောပေါက်ရမည်။

ဥပမာအားဖြင့်၊ လုမင်၏ မြေ၊ ရေ၊ မီး၊ လေ၊ မိုးကြိုး တာအိုတို့က လုံးဝကွဲပြားသော တာအိုငါးမျိုး ဖြစ်သည်။

အကယ်၍ လုမင်က မြေတာအိုကို လေ့ကျင့်ထားပြီး တောင် တာအို သို့မဟုတ် မြေဆီတာအိုကို လေ့ကျင့်ထားပါက မဖြစ်နိုင်တော့ပေ။

အကြောင်းမှာ တောင်တာအို သို့မဟုတ် မြေဆီတာအိုတို့က မြေတာအိုနှင့် အမျိုးအစားတူသောကြောင့် ဖြစ်သည်။

တစ်နည်း၊ ရေတာအိုကို လေ့ကျင့်ထားပြီး ရေခဲတာအိုနှင့် အလားတူတာအိုကို လေ့ကျင့်ထားပါက မူလစွမ်းရည်များ တူညီသောကြောင့် မဖြစ်နိုင်တော့ချေ။

လုံးဝမတူညီ‌သော တာအိုငါးခုကို စတုတ္ထအဆင့်၏ ပြီးပြည့်စုံခြင်းအထိ လေ့ကျင့်ခြင်းက ပါရမီရှင် တစ်သန်းတွင် တစ်ဦးဖြစ်ခဲသည်။

ထို့ထက် ထိုတာအိုငါးခုစလုံးကို အောင်မြင်စွာ ပေါင်းစပ်ရန်က ပို၍ပင် ခက်ခဲလှပေသည်။

လုမင်ပင်လျှင် နဝနနဂါးသွေးမျိူးဆက်ကြောင့် မဟုတ်ပါက အောင်မြင်ရန် မဖြစ်နိုင်ချေ။

လုမင်မှလွဲ၍ ကမ္ဘာပေါ်တွင် ထိုသို့သောလိုအပ်ချက်ကို အောင်မြင်နိုင်သူက စိတ်ကူးကြည့်ရန် ခက်ခဲသည်။

ထို့အပြင်၊ ဤသည်က စမ်းသပ်မှု၏ ကနဦးလိုအပ်ချက်သာ ဖြစ်သေးသည်။ ဟွင်းယွမ်ကျမ်းကို အောင်မြင်စွာ လေ့ကျင့်လိုပါက အခြားစမ်းသပ်မှုတစ်ခုကို ဖြတ်သန်းရဦးမည် ဖြစ်သည်။

"ကောင်းပြီလေ၊ ငါပြောစရာတွေ အကုန်ပြောပြီးပြီ။ အခု စမ်းသပ်မှုကို ကြည့်လိုက်ရအောင်။ အဲဒီလျှောက်လမ်းထဲကိုဝင်ပြီး ရှေ့တည့်တည့်ကို လျှောက်သွားလိုက်ပါ။ အဆုံးထိရောက်နိုင်ရင် ဟွင်းယွမ်ကျမ်းကို ရရှိပြီး ဟွင်းယွမ်တာအိုကိုလည်း လေ့ကျင့်နိုင်လိမ့်မယ်။ မင်း ကျရှုံးသွားရင်တော့ ပြန်ပို့ခံရမယ်"

"ဒါ့အပြင်၊ ဒီနေရာမှာ အချိန်စီးဆင်းမှုက အပြင်လောကထက် အဆပေါင်းများစွာ မြန်ဆန်တယ်။ မင်းဒီမှာ နှစ်အနည်းငယ်ကြာနေရင်တောင် ပြင်ပကမ္ဘာမှာတော့ ခဏလေးပဲ ဖြစ်နိုင်တယ်။ ဒါကြောင့် မင်း စိတ်အေးအေးထားပြီး စမ်းသပ်မှုကို ဖြေဆိုနိုင်ပါတယ်"

ထူယီက ပြောလိုက်သည်။

"ဒီမှာ နှစ်အနည်းငယ်က ပြင်ပကမ္ဘာမှာ ခဏလေးပဲလား"

လုမင်၏ မျက်လုံးများ တောက်ပလာခဲ့သည်။ သူ အလွန် ဝမ်းသာသွား၏။

မူလက၊ သူ ဤနေရာတွင် အချိန်ကြာနေပါက ပြင်ပကမ္ဘာတွင် အပြောင်းအလဲများ ဖြစ်လာမည်ကို စိုးရိမ်မိခဲ့သည်။ ဥပမာအားဖြင့်၊ တန်တန်နှင့် ပူဖောင်းလေး သို့မဟုတ် ရှမ်းဟွမ်တိုက်ကြီးမှ အခြေအနေ။

သို့ရာတွင်၊ ယခုတော့ လုမင် စိတ်ပူစရာမလိုတော့ပေ။

ဤနေရာတွင် နှစ်အနည်းငယ်က ပြင်ပလောက၌ ခဏတာမျှသာဖြစ်သည်။ သို့ဖြစ်ပေရာ ဘာများ စိတ်ပူစရာရှိမည်နည်း။

တစ်ချိန်တည်းမှာပင် ဟွင်းယွမ်ဂိုဏ်း၏ အင်အားက သူ့ကို အံ့အားသင့်စေခဲ့သည်။

ဟွင်းယွမ်ဂိုဏ်းက ဘယ်လိုအင်အားမျိုး ဖြစ်သနည်း။ ၎င်းတို့က အမှန်တကယ် နားမလည်နိုင်လောက်အောင် အစွမ်းထက်လွန်းသည်။

"ငါ ဟွင်းယွမ်ကျမ်းကို ရရမယ်"

စိုးရိမ်စရာများ ပယ်သတ်ပြီးနောက်၊ လုမင်၏ မျက်လုံးများက တိုက်ခိုက်ချင်စိတ်များ တောက်ပလာကာ လက်သီးကို ဆုပ်လိုက်သည်။

ဟွင်းယွမ်တာအိုက ဒဏ္ဍာရီဆန်ဆန် တာအိုတစ်ခု ဖြစ်သည်။ ၎င်းကို အောင်မြင်စွာ လေ့ကျင့်နိုင်ခဲ့ပါက၊ သူ၏ တိုက်ခိုက်နိုင်စွမ်းများ ကြီးမားစွာ တိုးတက်လာမည်ဖြစ်ပြီး သူ့အတွက် အစွမ်းထက်ဆုံး ဝှက်ဖဲတစ်ခုလည်း ဖြစ်လာပေလိမ့်မည်။

အရေးအကြီးဆုံးက၊ အနာဂတ်တွင် ရရှိလာမည့် အကူအညီများက စိတ်ကူးမယဉ်နိုင်ပေ။

လုမင်၏ မျက်လုံးများသည် တဖြည်းဖြည်း ခိုင်မာပြတ်လာခဲ့သည်။

"အကြီးအကဲထူယိ၊ ကျုပ် သွားတော့မယ်!"

လုမင်က ထူယီကို လက်ယှက်ပြပြီး လျှောက်လမ်းဆီသို့ လျှောက်သွားသည်။ သူ့ရုပ်သွင်က လျှောက်လမ်းထဲသို့ ဝင်ရောက်ကာ တဖြည်းဖြည်း ပျောက်ကွယ်သွားတော့သည်။

"ဘယ်နှစ်နှစ်တောင် ရှိပြီလဲ။ နောက်ဆုံးတော့ တစ်ယောက်ယောက်ရောက်လာပြီ။ ဒီတစ်ခါတော့ ငါတို့အောင်မြင်ရမယ်"

ပျောက်ကွယ်သွားသော လုမင်၏ရုပ်သွင်ကို ကြည့်ကာ ထူယီ၏ မျက်လုံးများက မျှော်လင့်ချက်တို့ ပြည့်နှက်နေခဲ့သည်။

သူဟာ အဆုံးမဲ့နှစ်ပေါင်းများစွာကို စောင့်မျှော်နေခဲ့သည်။ နှစ်ရှည်လများအတွင်း လိုအပ်ချက်များနှင့် ကိုက်ညီ၍ ဤနေရာသို့ ခေါ်ဆောင်လာခဲ့ကြသော ထူးချွန်သူများလည်း ရှိခဲ့၏။

ကံမကောင်းစွာဖြင့်၊ သူတို့ထဲတွင် တစ်ဦးတစ်ယောက်မျှ အဆုံးစွန်ထိ မရောက်နိုင်၊ စမ်းသပ်မှုများအားလုံးကို ကျော်ဖြတ်ကာ ဟွင်းယွမ်တာအိုကို မလေ့ကျင့်နိုင်ခဲ့ပေ။

ထို့ကြောင့်၊ ဆက်လက် စောင့်ဆိုင်းရုံသာ တတ်နိုင်ခဲ့သည်။

တစ်စုံတစ်ယောက် ရောက်ရှိလာတိုင်း မျှော်လင့်ချက်ရောင်ခြည်လေးဖြင့် အောင်မြင်ရန် မျှော်လင့်ခဲ့ပေသည်။

ထူယီလည်း ပင်မခန်းမဆောင်တွင် ငြိမ်သက်စွာ ရပ်ပြီး စောင့်နေခဲ့သည်။

.............

လုမင်က လျှောက်လမ်းထဲသို့ ဝင်လာခဲ့သည်။ အစပိုင်းတွင် အရာအားလုံးက ပုံမှန်ဖြစ်သော်လည်း ခဏလောက် လမ်းလျှောက်လာပြီးနောက် ပတ်ဝန်းကျင်က ရုတ်တရက် ပြောင်းလဲသွားသည်။

"သတ်၊ သတ်၊ သတ်"

ရုတ်တရက်၊ သတ်ဖြတ်လိုစိတ်အပြည့်ဖြင့် ဟိန်းဟောက်သံများ ထွက်ပေါ်လာသည်။ အဆုံးမဲ့ သတ်ဖြတ်ချင်စိတ်များက လုမင်၏ ခန္ဓာကိုယ်ကို ရုတ်တရက် ဖုံးလွှမ်းသွား၏။

ထိုအချိန်တွင်၊ သူ့နှလုံးသားထဲမှာ မရေမတွက်နိုင်သော သားရဲကြီးများ နိုးကြားလာကဲ့သို့ လုမင်၏မျက်လုံးများ ရုတ်တရက် နီရဲလာတော့သည်။ လုမင်၏ နှလုံးသားက အဆုံးမဲ့ သတ်ဖြတ်ချင်စိတ်များဖြင့် ပြည့်နှက်သွားသည်။

ဤသတ်ဖြတ်ချင်စိတ်က အေးစက်လွန်းပြီး ပြင်းထန်လွန်းပေသည်။ သာမာန်လူတစ်ဦးသာ ဤကဲ့သို့ သတ်ဖြတ်ချင်စိတ်များဖြင့် မြှုပ်ခံရပါက ရူးသွပ်သွားနိုင်သည်။

သို့သော်လည်း၊ လုမင်၏ မျက်လုံးများကတော့ အစပိုင်း ခဏမျှသာ ပြောင်းလဲသွားပြီးနောက် ချက်ချင်း ငြိမ်သက်သွားတော့သည်။

'ဒါက နောက်ထပ် သတ်ဖြတ်ချင်စိတ် စမ်းသပ်မှု တစ်ခုဘဲ၊ ဒါပေမဲ့ တတိယသွေးမျိုးဆက်က အဆုံးမဲ့ သတ်ဖြတ်ချင်စိတ်တွေနဲ့ ယှဉ်ရင် အားနည်းလွန်းတယ်'

လုမင်က သူ့စိတ်ထဲမှ တွေးလိုက်သည်။ သူ့မျက်လုံးများက သတ်ဖြတ်လိုစိတ်ကြောင့် မထိခိုက်ဘဲ အေးဆေးတည်ငြိမ်လာခဲ့ပေသည်။

အမှန်တော့ ဘာကြောင့် သတ်ဖြတ်ချင်စိတ်များရှိသလဲ ဆိုတာကို နားလည်ခဲ့သည်။

အကြောင်းမှာ၊ ကျင့်ကြံသူတစ်ယောက်၏ ဘဝတွင် အထွတ်အထိပ်သို့ ရောက်လိုပါက အလောင်း တောင်တန်းနှင့် သွေးပင်လယ်များ ဖြစ်လာသည်အထိ လမ်းရှင်း၍ သတ်ပစ်ရသောကြောင့် ဖြစ်သည်။ ဤလမ်းကို လျှောက်လမ်းခြင်းက သတ်ဖြတ်မှုများနှင့် သွေးလမ်းဖြစ်ရန် ရည်မှန်းထားပေသည်။ မသတ်ဝံ့ဘဲ တွေဝေတုံ့ဆိုင်းသူများက ဒုက္ခရောက်နိုင်သည်။

ထို့ကြောင့်ပင် အစွမ်းထက် တန်ခိုးရှင်ကြီးများ၏ အမွေအနှစ်တချို့တွင် သတ်ဖြတ်မှု စမ်းသပ်ခြင်းများ ပါဝင်ခြင်း ဖြစ်သည်။

ကံမကောင်းစွာဖြင့်၊ လုမင်၏ သွေးမျိုးဆက်က အဆုံးမဲ့ သတ်ဖြတ်ချင်စိတ်များ ရှိပေသည်။ တတိယသွေးမျိုးဆက်နှင့် နှိုင်းယှဉ်ပါက ဤစစ်ဆေးမှုများမှာ ကလေးကစားနည်းနှင့် မခြားတော့ပေ။

သတ်ဖြတ်ချင်စိတ်များက ရှိနေသေးသော်လည်း လုမင် လျစ်လျူရှုထားဆဲ ဖြစ်သည်။ သူ့အကြည့်များက တည်ငြိမ်ပြီး တစ်လှမ်းပြီးတစ်လှမ်း လျှောက်သွားခဲ့လေသည်။

ရုတ်တရက် ပတ်ဝန်းကျင်က ပြောင်းလဲသွားပြန်သည်။

အဆုံးမဲ့ သတ်ဖြတ်ချင်စိတ်များကလည်း သဲလွန်စ မရှိဘဲ ပျောက်ကွယ်သွား၏။

"ကျလိ... ကျလိ"

လုမင်၏ နားထဲတွင် ချိုသာသော ကျေးငှက်ကလေးများ၏ တေးဆိုသံကို ကြားလိုက်ရသည်။

လေပြင်ညင်းက တိုက်ခတ်နေပြီး စိတ်ကို လန်းဆန်းစေသော ပန်းရနံ့ကိုလည်း သယ်ဆောင်လာလေသည်။

ဤနေရာမှာ အဆုံးမဲ့ သတ်ဖြတ်ချင်စိတ်များနှင့် လုံးဝ ဆန့်ကျင်ဘက် ဖြစ်သည်။ လုမင်၏ နှလုံးသားလည်း တည်ငြိမ် အေးချမ်းသွားလေသည်။

လုမင် လှမ်းကြည့်လိုက်သောအခါ သူက တောင်ရွာငယ်လေး၏ အပြင်ဘက်မှာ ရှိနေကြောင်း တွေ့လိုက်ရသည်။

သူ့ရှေ့တွင် တောင်ရွာလေးတစ်ရွာ ရှိသည်။

တောင်ရွာလေးတစ်ဝိုက်မှာတော့ မြက်ပင်များက စိမ်းစိမ်းစိုစိုရှိပြီး ရောင်စုံပန်းပွင့်များလည်း ပွင့်နေကြလေသည်။ ငှက်ကလေးများကလည်း ပျံဝဲပြီး တေးဆိုနေကာ အမှန်တကယ် အေးချမ်းလှသည်။

"ချွင်... ချွင်..."

ငြိမ့်ညောင်းသော အသံတစ်ခုကို ကြားလိုက်ရသည်။ အတော်ချစ်ရာကောင်းသော ခြောက်နှစ်၊ ခုနစ်နှစ် အရွယ် ကောင်လေးတစ်ယောက်ကို မြင်လိုက်ရ၏။ သူမ၏ လက်ကောက်ဝတ်နှင့် ခြေကျင်းဝတ်များတွင် ခေါင်းလောင်းဆွဲထား‌သော ကြိုးတစ်ချောင်းစီ ရှိသည်။ သူမ လမ်းလျှောက်လာသောအခါ ငြိမ့်ညောင်းသော အသံများ ထွက်ပေါ်လာလေသည်။

ကောင်မလေးက လုမင်၏နံဘေးသို့ ပြေးလာပြီး လုမင်ကို စူးစမ်းဟန်ဖြင့် ကြည့်လိုက်သည်။

"အစ်ကိုကြီး၊ ရှင်က အပြင်လူလား၊ လမ်းပျောက်လာတာလား။ အဲဒါဆိုရင် သမီးရဲ့အိမ်ကို လိုက်ခဲ့ပါ... လင်လင်က အစ်ကိုကြီးကို နို့လက်ဖက်ရည်နဲ့ ဧည့်ခံပေးမယ်"

ထိုစကားကို ပြောဆိုပြီးနောက် ကလေးမလေးက လုမင်၏လက်ကိုဆွဲကာ ရွာဆီသို့ လျှောက်သွားသည်။ သူမက အပြစ်ကင်းစင်ပြီး ချစ်ဖို့ကောင်းလွန်းသဖြင့် လုမင်လည်း မငြင်းနိုင်တော့ဘဲ လိုက်သွားခဲ့လေသည်။

"မင်္ဂလာပါ ကောင်လေး"

ရိုးရှင်းသော အဝတ်အစားများနှင့် ထင်းတစ်စီးကို ထမ်းလာသော လူတစ်ယောက်က လုမင်ကို မြင်တဲ့အခါ ရိုးရိုးသားသားပြုံးပြီး နှုတ်ဆက်လိုက်သည်။

လုမင်သည် ဤအရာက ပုံရိပ်ယောင်များဖြစ်မှန်း သိသော်လည်း ထိုလူ၏ ရိုးသားမှုမှ ကူးစက်ခံရခြင်းကို မဆန့်ကျင်နိုင်ပေ။ သူ ပြုံးပြီး ခေါင်းညိတ်ပြလိုက်သည်။

"မေမေ၊ ဒီအစ်ကိုကြီးက လမ်းပျောက်နေလို့ သမီး သူ့ကိုခေါ်လာခဲ့တာပါ။ နို့လက်ဖက်ရည်နဲ့ ဧည့်ခံရအောင်"

ကလေးမလေးက လုမင်ကို ရွာထဲသို့ ဆွဲခေါ်လာပြီး သစ်သားအိမ်လေးဆီ ရောက်လာခဲ့သည်။

သစ်သားအိမ်ရှေ့မှာတော့ အသက်သုံးဆယ်ဝန်းကျင် အမျိုးသမီးတစ်ဦး ရှိပေသည်။ လုမင်ကို တွေ့သောအခါ ဖြူစင်သောအပြုံးနှင့် နှုတ်ဆက်သည်။ သူမက ကလေးမလေး၏ ဦးခေါင်းကို ခပ်ဖွဖွပုတ်ပြီး ပြောလေသည်။

"သူက လင်လင်ရဲ့ သူငယ်ချင်းဆိုတော့ မေမေ့ရဲ့ သူငယ်ချင်းပဲပေါ့။ ဒီမှာ ခဏစောင့်ပါဦး။ မေမေ နို့လက်ဖက်ရည် သွားယူလိုက်မယ်"

အမျိုးသမီးက အိမ်ထဲသို့ဝင်သွားကာ လုမင်အတွက် နို့လက်ဖက်ရည် ပြင်ဆင်လိုက်သည်။ မကြာမီ၊ နို့လက်ဖက်ရည်နံ့ သင်းသင်းလေးက သစ်သားအိမ်လေးရှေ့ကို ပျံ့လွင့်လာခဲ့လေသည်။