အခန်း ၁၃၁၀

အပိုင်း ( 1310 ) အခြေအနေများ ပြောင်းလဲသွားခဲ့ပြီ။

"လုမင်၊ ဟန်ချင်းတောင်ဂိုဏ်းက သားရဲတစ်ရာမျိုးနွယ်ကို ပြောင်းရွှေ့သွားပါပြီ"

ဧကရီယွဲ့ရှင်းက ပြောလိုက်သည်။ သူမက လှပသော်လည်း ဤအခိုက်တွင် အထီးကျန်မှုအပြည့်ဖြင့် သက်ပြင်းချလိုက်လေသည်။

"ဘာဖြစ်လို့လဲ၊ နောက်ပြီးတော့ ရှန်းရွှီတိုက်ကြီးမှာ ကျွန်တော်သေဆုံးသွားပြီလို့ ဘာဖြစ်လို့ ပြောနေကြတာလဲ"

လုမင် သံသယတွေအပြည့်ဖြင့် မေးလိုက်သည်။

"လုမင်၊ အဲဒါက ဇာတ်လမ်းရှည်ကြီးပဲ။ သားရဲတစ်ရာမျိုးနွယ်ကို အရင်ပြန်ကြရအောင်၊ အဲဒီအခါကျမှ အသေးစိတ်ပြောပြမယ်"

ရှဲ့လွမ်က ပြော၏။

"ကောင်းပြီ"

လုမင်လည်း ခေါင်းညိတ်ပြပြီး သူတို့နှင့်အတူ သားရဲတစ်ရာမျိုးနွယ်ဆီသို့ ဦးတည်သွားတော့သည်။

သားရဲတစ်ရာမျိုးနွယ်သို့ ရောက်လာပြီးနောက်၊ လုမင်ဟာ လေထုက မူမမှန်ကြောင်း ခံစားလိုက်ရသည်။

သားရဲတစ်ရာမျိုးနွယ်တွင် ကမ္ပည်းအမျိုးမျိုးဖြင့် ပြည့်နေသည်။ ထောင့်စွန်းတိုင်းကို ကျွမ်းကျင်ပညာရှင်များနှင့် သံချပ်ကာဝတ် တပ်သားများက ကင်းလှည့်စောင့်ကြပ်ထားကြ၏။ ပြင်းထန်သော တိုက်ပွဲကြီးတစ်ခု စတင်တော့မည်ကဲ့သို့ပင် လေထုက တင်းမာနေတော့သည်။

လုမင် ရှမ်းဟွမ်တိုက်ကြီးမှ ထွက်သွားကတည်းက ရှမ်းဟွမ်တိုက်ကြီးဟာ စစ်ပွဲများ စတင်နေခဲ့ပြီ ဖြစ်သည်။ သို့သော်လည်း ထိုစဉ်က မြောက်ပိုင်းလွင်ပြင်မှာ စစ်ပွဲတစ်ခု ဖြစ်ခဲ့သည့်တိုင် ဤမျှမပြင်းထန်သေးပေ။

ယခုတော့ သေခြင်းရှင်ခြင်း စစ်ပွဲကြီးက အချိန်မရွေး ကျရောက်တော့မည်ဟု ခံစားခဲ့ရသည်။

လုမင်ဟာ ပို၍ စူးစမ်းလိုစိတ် ရှိလာသော်လည်း သူ့သံသယများကို ဖိနှိပ်ကာ နောက်မှ လိုက်သွားခဲ့လေသည်။

သားရဲတစ်ရာမျိုးနွယ်တွင် လုမင်ပြန်ရောက်လာသောသတင်းက လျင်မြန်စွာပျံ့နှံ့သွား၍ ရုတ်ရုတ်သဲသဲ ဖြစ်ခဲ့သည်။

လုမင်နှင့် အခြားသူများလည်း သားရဲတစ်ရာမျိုးနွယ်၏ အစည်းအဝေးခန်းမသို့ ရောက်ရှိလာခဲ့ကြပေသည်။

အားလုံးက ခန်းမ၏ တစ်ဖက်စီတွင် ထိုင်ခဲ့ကြသည်။ ထိပ်ဆုံးမှာတော့ ခုံနှစ်လုံးရှိ၏။ ထိုအထဲမှ တစ်နေရာတွင် ရှဲ့လွမ် ထိုင်လိုက်သည်။

"လုမင်၊ ကျေးဇူးပြုပြီး..."

ရှဲ့လွမ်က သူ့လက်ကိုမြှောက်ပြီး လုမင်ကိုထိုင်ရန် အချက်ပြလိုက်သည်။

လုမင်လည်း မယဉ်ကျေးဘဲ ရှဲ့လွမ်အနားတွင် ဝင်ထိုင်လိုက်၏။ သို့ရာတွင် ချွီလော့၊ မိုရဲ့နှင့် အခြားသော သိုင်းအုပ်ချုပ်သူများ၏ မျက်လုံးများမှ မကျေမနပ် ဖြစ်နေသည်ကို သူ သတိမပြုမိခဲ့ပေ။

အားလုံးထိုင်ပြီးနောက်တွင် ခန်းမထဲမှာ လူပိုများလာသည်။ သူတို့အားလုံးက အဆင့်မြင့်ပုဂ္ဂိုလ်များဖြစ်ပြီး အဓိပဓိများ ဖြစ်ချေသည်။ နောက်ဆုံးတွင်၊ ခန်းမထဲမှာ လူ ဒါဇင်ချီပြီး ရှိလာခဲ့သည်။

"အကြီးအကဲရှဲ့၊ ကျုပ် ပြန်လာတာကို တပ်သားတွေက ရှန်းရွှီတိုက်ကြီးမှာ ကျုပ်သေသွားပြီလို့ ဘာဖြစ်လို့ ပြောကြတာလဲ"

လုမင် မနေနိုင်တော့ဘဲ မေးလိုက်သည်။

"လုမင်၊ မကြာခင်က မင်းတို့ကို ရှန်းရွှီတိုက်ကြီးဆီ ခေါ်ဆောင်သွားတဲ့ ပင်လယ်ဖြတ်သင်္ဘော ပြန်ရောက်လာခဲ့သည်။ ရှန်းရွှီတိုက်ကြီးရဲ့ တမန်တော်ပြောတာ မင်း ကောင်းကင်နတ်ဘုရားဂိုဏ်းရဲ့ ပါရမီရှင်ကို စော်ကားခဲ့တယ်တဲ့။ ဒါကြောင့် ဒေါသထွက်သွားပြီး မင်းကို ကောင်းကင်နတ်ဘုရားဂိုဏ်းရဲ့ ပါရမီရှင်က သတ်ခဲ့တယ်"

ရှဲ့လွမ်က ပြောလိုက်သည်။

လုမင် မျက်မှောင်ကြုတ်လိုက်၏။

‌ထိုကျွမ်းကျင်သူဆိုသည်မှာ လုံချန်နှင့် မင်ကျစ်တို့ကို ပြန်ပို့ခဲ့သော တောင်ပိုင်းနတ်နန်းတော်မှ ကျွမ်းကျင်သူများဖြစ်သည်မှာ ထင်ရှားသည်။ သို့ရာတွင် တောင်ပိုင်းနတ်နန်းတော်မှ လူများက ဘာကြောင့် ထိုသို့ပြောသနည်း။

တောင်ပိုင်းနတ်နန်းတော်မှ ထိုလူများက မုမိသားစုမှ ကျွမ်းကျင်သူများဖြစ်နိုင်မလား။

လုမင်၏ နှလုံးသား လှုပ်ခတ်သွားခဲ့သည်။

လုံချန်၊ မင်ကျစ်၊ ရဟန်းဝူလျန့်နှင့် အခြားသူများ ထွက်သွားကြချိန်တွင် လုမင်တို့မှာ မုမိသားစုဘိုးဘေး၏ လိုက်လံသတ်ဖြတ်ခြင်း ခံနေကြရချိန် ဖြစ်နိုင်သည်။ ထို့ကြောင့်ပင် တောင်ပိုင်းနတ်နန်းတော်မှလူများက လုမင်သေပြီဟု ထင်မှတ်သွားလိမ့်မည်။ ဤသို့ဖြင့် ရှမ်းဟွမ်တိုက်ကြီးသို့ ရောက်သောအခါ၊ လုမင် အသတ်ခံရပြီဟု ဆိုခဲ့ကြခြင်း ဖြစ်တန်ရာသည်။

လုမင် မှန်းဆလိုက်လေသည်။

"လုံချန်၊ မင်ကျစ်နဲ့ အနောက်တိုင်းက ရဟန်းကရော... ဘယ်သူကမှ ဘာမှ မပြောကြဘူးလား"

လုမင် မေးလိုက်သည်။

"မပြောဘူး၊ ဒါ့အပြင် လူသုံးယောက်ပဲ ပြန်လာခဲ့ကြတာ။ သူတို့က မင်ကျစ်နဲ့ အနောက်တိုင်းကန္တာရက ရဟန်းနဲ့သီလရှင်ပဲ။ လုံချန်ကိုတော့ ဘယ်မှာမှ မတွေ့ဘူး။ သူတို့ သုံးယောက်ကလည်း ပြန်ရောက်လာတော့ သူတို့ ရောက်နေပြီဆိုတဲ့ သတင်းကိုပဲ ဖြန့်တယ်။ အဲဒီနောက် တိတ်ဆိတ်သွားပြီး ပြင်ပကမ္ဘာကို စကားတစ်ခွန်းမှ မပြောခဲ့ဘူး"

ရှဲ့လွမ်က ပြောသည်။

"လုံချန် ပြန်မလာဘူးလား"

လုမင် မျက်ခုံးပင့်လိုက်၏။

လုံချန်လည်း သူတို့လို လုပ်ကြံခံခဲ့ရတာ ဖြစ်နိုင်မလား။

ထို့အပြင် အခြေအနေများအရ မင်းကျစ်နှင့် အခြားသူများဟာ တောင်ပိုင်းနန်းတော်၏ သတိပေးချက်ကြောင့် တိတ်ဆိတ်နေကြခြင်း ဖြစ်နိုင်သည်။ ထို့ကြောင့်ပင် လုမင်ကို ယွမ်လု၏ နဂါးနတ်ဘုရားတောင်ကြားမှ တပည့်အဖြစ် စုဆောင်းခဲ့သည့် သတင်းမှာ သဘာဝအတိုင်း မပေါ်ပေါက်ခဲ့ပေ။

"လုမင်၊ မင်း ယွမ်လုတိုက်ကြီးက ကောင်းကင်နတ်ဘုရားဂိုဏ်းရဲ့ ပါရမီရှင်ကို တကယ်ပဲ စော်ကားခဲ့တာလား"

ထိုအချိန်တွင် ရုတ်တရက် အသံတစ်ခု ထွက်ပေါ်လာခဲ့သည်။

လုမင်လည်း အသံလာရာကို လှမ်းကြည့်လိုက်၏။ ချွီလော့ ဖြစ်သည်၊ ဤအခိုက်တွင် သူက လုမင်ကို စူးစူးစိုက်စိုက် ကြည့်နေသည်။

လုမင် အနည်းငယ် မျက်ခုံးပင့်လိုက်၏။ ယခင်က ချွီလော့ဟာ သူ့ကို စစ်ဦးစီးချုပ်လုဆိုပြီး အမြဲပြောခဲ့သည်။ သို့သော်လည်း ယခုအခါ သူက လုမင်အား နာမည်ခေါ်၍ပင် ပြောဆိုနေခဲ့ပြီ။ ထို့အပြင်၊ သူ့လေသံက မေးခွန်းထုတ်ခြင်း၏ အရိပ်အမြွက်တို့ ရှိနေသည်။

ဤအခိုက်တွင် လူတိုင်း၏ အကြည့်များက လုမင်ဆီသို့ ရောက်လာခဲ့ကြ၏။

လုမင်၏ နှုတ်ခမ်းများက အေးစက်သော အပြုံးတစ်ခုအဖြစ် တွန့်ကွေးသွားခဲ့သည်။ သူ့အသိဥာဏ်နှင့် ဘာဖြစ်နေမှန်း သဘာဝအတိုင်း သိလိုက်ပေသည်။

ယခင်ကတော့ လုမင်၏ ပါရမီကိုစိတ်ကူးယဉ်ခဲ့သည်။ လုမင်က ယွမ်လုမှ အင်အားစုကြီးနှင့် ပူးပေါင်းပြီး အနာဂတ်မှာ သူတို့ကို ကူညီနိုင်ရန် လို့ စိတ်ကူးယဉ်ခဲ့ကြပေသည်။ သို့သော်လည်း၊ တောင်ပိုင်းနတ်နန်းတော်မှလူများက လုမင်ဟာ ယွမ်လုမှ ကောင်းကင်နတ်ဘုရားဂိုဏ်း၏ ပါရမီရှင်ကိုစော်ကားမိ၍ ၎င်းတို့လက်ချက်ဖြင့် သေဆုံးသွားပြီဟု ဆိုခဲ့ကြသည်။

ယခုမူ၊ လုမင် အသက်ရှင်နေသေးသော်လည်း ယွမ်လုတိုက်ကြီးရှိ ဂိုဏ်းကြီး၏ ပါရမီရှင်ကို စော်ကားခဲ့သဖြင့် ယွမ်လုတိုက်ကြီးမှ မဟာဂိုဏ်းကြီးများနှင့် မပူးပေါင်းနိုင်တော့ပေ။

ယွမ်လုတိုက်ကြီး၏ မဟာဂိုဏ်းကြီးများနှင့် မပူးပေါင်းနိုင်သည့်အပြင် ကောင်းကင်နတ်ဘုရားဂိုဏ်း၏ ပါရမီရှင်ကိုပါ စော်ကားခဲ့သောကြောင့် လုမင်အပေါ် သူတို့၏သဘောထားက သဘာဝအတိုင်း ပြောင်းလဲသွားကြသည်။

"မှန်ပါတယ်။ ငါ ကောင်းကင်နတ်ဘုရားဂိုဏ်းရဲ့ ပါရမီရှင်ကို စော်ကားလိုက်တယ်"

လုမင် အမှန်အတိုင်းဖြေလိုက်သည်။

"လုမင်၊ မင်းကို ငါ ဝေဖန်ချင်တာတော့ မဟုတ်ပါဘူး။ မင်းမှာ အရည်အချင်းရှိပေမဲ့ မင်းရဲ့ အကန့်အသတ်ကိုတော့ သိထားရမယ်။ မင်းရဲ့ အရည်အချင်းက ရှမ်းဟွမ်တိုက်ကြီးမှာ မဆိုးပါဘူး၊ ဒါပေမဲ့ ယွမ်လုတိုက်ကြီးမှာတော့ ဘာမှ မရှိဘူး။ ဒါတောင်မှ ယွမ်လုတိုက်ကြီးက ဂိုဏ်းကြီးရဲ့ ပါရမီရှင်ကို စော်ကားခဲ့သေးတယ်လား။ လုမင်... မင်းဘာသာ သူတို့ကို စော်ကားတာက ဘာမှမဖြစ်ဘူး၊ ဒါပေမဲ့ မင်းနဲ့အတူ ငါတို့ကိုတော့ ဆွဲမချပါနဲ့"

ချွီလော့က အေးစက်စက်ဖြင့် ပြောလိုက်သည်။

"လုမင်၊ ငါလည်း သိချင်တယ်။ ယွမ်လုတိုက်ကြီးက မဟာဂိုဏ်းကြီးရဲ့လူတွေ မင်းပြန်လာတာကို သိကြလား"

မိုရဲ့ကလည်း ပြောသည်။

"ချွီလော့၊ မိုရဲ့... ဒီလောက်ဆို တော်လောက်ပြီ၊ လုမင်က ငါ့ရဲ့မဟာမိတ်ပဲ"

ဘေးနားတွင်၊ ရှဲ့လွမ်က မျက်မှောင်ကြုတ်ပြီး သူတို့ကို ကြိမ်းမောင်းလိုက်သည်။

“နတ်ဆိုးဘိုးဘေး၊ ဒါပေမဲ့…”

ချွီလော့က စောဒကတက်ရန် ကြိုးစား၏။

"တော်လောက်ပြီလို့ ငါပြောနေတယ်"

ရှဲ့လွမ်၏ အကြည့်များက အေးစက်သွားသည်။

ချီလော့လည်း ပါးစပ်ပိတ်ထားပြီး တခြားဘာမှ မပြောဝံ့တော့ပေ။ သို့သော်လည်း လုမင်ကို စူးစူးစိုက်စိုက်ကြည့်သော သူ့အကြည့်က နှိမ့်ချမှုများ ပြည့်နှက်နေခဲ့သည်။

ယွမ်လုမှ အင်အားစုကြီးတွင် ပါဝင်ရန် ပျက်ကွက်ပြီးနောက် လုမင်က ဝိညာဉ်နတ်ဘုရားနယ်ပယ်မှ ကျင့်ကြံသူ အငယ်တန်းတစ်ဦးမျှသာ ဖြစ်သည်။ သဘာဝအတိုင်း၊ လုမင်ကို အထင်မြင်သေးစွာဖြင့် နှိမ့်ချလာတော့သည်။

လုမင်လည်း ရှင်းမပြတော့ဘဲ အနည်းငယ် ပြုံးလိုက်သည်။ သူသည် ကောင်းကင်နတ်ဘုရားဂိုဏ်း၏ ပါရမီရှင်ကို အနိုင်ရသည့်အပြင် စမ်းသပ်မှုတွင်လည်း ပထမနေရာကို ရရှိခဲ့သည်။ သူက အခြားသော ယွမ်လုတိုက်ကြီး၏ မဟာဂိုဏ်းကြီးဖြစ်သည့် နဂါးနတ်ဘုရား တောင်ကြားသို့ပင် ဝင်ရောက်ခဲ့ပေသည်။

"အကြီးအကဲရှဲ့၊ ရှမ်းဟွမ်တိုက်ကြီးရဲ့ လက်ရှိအခြေအနေက ဘယ်လိုလဲ။ သားရဲတစ်ရာမျိုးနွယ်က ဘာဖြစ်လို့ အစောင့်အကြပ်တွေနဲ့ အရမ်း သတိထားနေကြတာလဲ။ နောက်ပြီးတော့ အကြီးအကဲအားလုံး ဘာဖြစ်လို့ စုဝေးနေကြတာလဲ"

လုမင်လည်း သူ့နှလုံးသားထဲမှ နောက်ထပ်မေးခွန်းတစ်ခုကို မေးလိုက်သည်။

ယခင်က မြောက်ပိုင်းလွင်ပြင်မှ နေရာတော်တော်များများကို ကျွမ်းကျင်သူများက စောင့်ကြပ်ကြည့်ရှုကြသည်။ သို့သော်လည်း ယခုအခါ ၎င်းတို့အားလုံး သားရဲတစ်ရာမျိုးနွယ်တွင် စုဝေးနေကြပုံရပေသည်။

"လုမင်၊ ရှမ်းဟွမ်တိုက်ကြီးရဲ့ လက်ရှိအခြေအနေက အရမ်းပြောင်းလဲသွားခဲ့ပြီ"

ရှဲ့လွမ် မျက်မှောင်ကြုတ်ပြီး ပြောလိုက်သည်။

"အခြေအနေက အရမ်းပြောင်းလဲသွားပြီလား။ ဘာဖြစ်လို့လဲ"

လုမင်က မေးသည်။

"တိရီကြောင့်ပဲ"

ရှဲ့လွမ် ပြောလိုက်သည်။

"တိရီလား"

လုမင် အံ့ဩသွား၏။ တိရီက ရှမ်းဟွမ်တိုက်ကြီး တစ်ခုလုံး၏ အခြေအနေကိုပင် ပြောင်းလဲပစ်နိုင်ပြီလား။

"ဟုတ်တယ်၊ တိရီကြောင့်ပဲ။ မင်းတို့ထွက်သွားတော့ ကောင်းကင်ဘုရင် တံဆိပ်ပြားကိုလည်း ရှန်းရွှီတိုက်ကြီးရဲ့ ကျွမ်းကျင်သူက သိမ်းယူသွားခဲ့တယ်။ ဒါပေမဲ့ ရှေးဟောင်း သူတော်စင်မင်းဆက်နဲ့ ကောင်းကင်နတ်ဘုရား တပ်မဟာကြားက ရန်ငြိုးတွေဟာ အရမ်းကြီးမားတယ်။ ဒါကြောင့် တိုက်ပွဲတွေ မရပ်တန့်ခဲ့ဘူး"

"အခြားအုပ်စိုးရှင် အင်အားစုတွေကလည်း အချင်းချင်း တိုက်ခိုက်နေကြလို့ အလယ်ပိုင်းတိုက်ကြီး ဖရိုဖရဲ ဆက်ဖြစ်နေခဲ့တယ်။ ဒါပေမဲ့ အခြေအနေက ကောင်းနေတုန်းပဲ။ ဒါပေမဲ့လည်း လွန်ခဲ့တဲ့ လအနည်းငယ်က တိရီ ရုတ်တရက် တိုက်ခိုက်လာခဲ့တယ်"

ရှဲ့လွမ်က ဤကာလအတွင်း ဖြစ်ပျက်ခဲ့သမျှကို၊ အထူးသဖြင့် တိရီအကြောင်းကို အသေးစိတ် ရှင်းပြခဲ့သည်။

လူတိုင်းက နှစ်ပေါင်းများစွာကြာအောင် တိရီ၏ လှည့်စားခြင်းကို ခံခဲ့ရပေသည်။ တိရီက ကိုယ်တိုင် အစွမ်းထက်ရုံသာမကဘဲသူ၏ အင်အားကိုလည်း လျှို့ဝှက်စွာ ချဲ့ထွင်နေခဲ့သည်။

မည်သည့်အချိန်ကမှန်း မသိသော်လည်း တောင်ပိုင်း‌ဒေသက တိရီ၏လက်အောက်ကို ခိုဝင်ခဲ့ပြီး ဖြစ်နေခဲ့ပေသည်။