အခန်း ၁၃၂၇

အပိုင်း ( 1327 ) သုံးကွက်တည်းဖြင့် သိုင်းအုပ်ချုပ်သူကို အနိုင်ယူခြင်း။

လုမင်၏ ခွန်အားက အဆင့်နှစ် သိုင်းအုပ်ချုပ်သူနယ်ပယ် အထွတ်အထိပ်မှ ကျွမ်းကျင်သူကို တိုက်ခိုက်နိုင်သည်ဟု ကောလဟာလများ ထွက်ပေါ်နေသော်လည်း သူတို့စိတ်ထဲမှာတော့ မယုံပေ။

အထူးသဖြင့်၊ လုမင်၏ ကျင့်ကြံခြင်းအခြေခံက ပြီးပြည့်စုံသော ဝိညာဉ်နတ်ဘုရားနယ်ပယ်၌သာ ရှိနေသေးသည်ကို မြင်တွေ့ရချိန်မှာ ဖြစ်သည်။ သူ့အဆင့်နှင့် အဆင့်နှစ် သိုင်းအုပ်ချုပ်သူနယ်ပယ် အထွတ်အထိပ်မှ ကျွမ်းကျင်သူကို တိုက်ခိုက်နိုင်သည်ဟုဆိုခြင်းမှာ ရယ်စရာကောင်းပေသည်။ သူတို့အမြင်မှာတော့ ကောလဟာလများက ချဲ့ကားလွန်းသည်။

နောက်ဆုံးတွင်၊ ဤမျှ ကြီးမားသော အခြေ‌အနေကို ကိုယ့်မျက်စိနှင့်မမြင်ရပါက ဘယ်သူယုံမှာလဲ။

"ဒါဆိုရင် ခင်ဗျားက စမ်းကြည့်ချင်လို့လား"

လုမင်က အပြုံးမပျက်ဘဲ သံချပ်ကာဝတ် သိုင်းအုပ်ချုပ်သူကို စိုက်ကြည့်လိုက်သည်။

"အမှန်ပဲ၊ ဒါက ငါစဉ်းစားနေတာ။ ဝိညာဉ်နတ်ဘုရားတစ်ပါးက သိုင်းအုပ်ချုပ်သူကို အနိုင်ယူနိုင်မယ်လို့ ငါ မယုံဘူး"

သံချပ်ကာဝတ် သိုင်းအုပ်ချုပ်သူက ပြောလိုက်သည်။ သူ့ထံမှ အားကောင်းသော တိုက်ခိုက်ချင်စိတ်တို့ ထွက်ပေါ်လာခဲ့၏။

သူက တိုက်ပွဲကို ဆာလောင်သူ ဖြစ်သည်။

ကောင်းကင်နတ်ဘုရားတပ်မဟာမှ လူအများစုက တိုက်ပွဲကို ဆာလောင်ရူးသွပ်ကြပေသည်။

"ကောင်းပြီ၊ အပြင်ထွက်ပြီး တိုက်ရအောင်"

လုမင်က ခြေတစ်ချက်လှမ်းပြီး ခန်းမအပြင်ဘက်တွင် လေထဲတွင် ပေါ်လာခဲ့သည်။

တိုက်ပွဲက ဤမျှ မရိုးရှင်းနိုင်မှန်း သူသိပြီးသားပင်။ သူ့အင်အားကို မပြလျှင် ကောင်းကင်နတ်ဘုရားတပ်မဟာက သူ့အပေါ် လောင်းကြေးထပ်ဝံ့မှာ မဟုတ်ပါ။

သံချပ်ကာဝတ် သိုင်းအုပ်ချုပ်သူလည်း ခန်းမထဲမှ ပြေးထွက်လာပြီး လုမင်နှင့် မျက်နှာချင်းဆိုင် လေထဲတွင် ရပ်လိုက်သည်။

"လာ၊ သွားကြည့်ရအောင်"

ကျန်လူများပါ ခန်းမထဲမှထွက်ပြီး လေထဲတွင် ရပ်လိုက်ကြလေသည်။

ကောင်းကင်နတ်ဘုရားတပ်မဟာမှ အခြား ကျွမ်းကျင်သူများလည်း အခြေအနေကို ခံစားသိရှိပြီး လေထဲသို့ ပျံတက်လာခဲ့ကြသည်။

"လုမင်၊ တိုက်ကွက်ထုတ်ပါ။ မင်း ဘာလုပ်နိုင်မလဲ ငါ မြင်ချင်တယ်"

သံချပ်ကာဝတ် သိုင်းအုပ်ချုပ်သူ၏ တိုက်ခိုက်ချင်စိတ်က ပို၍ အားကောင်းလာခဲ့သည်။

"ကျုပ် အရင်လှုပ်ရှားရမှာလား။ ကောင်းပြီ၊ သုံးကွက်ပဲ"

လုမင်က လက်သုံးချောင်းကို ထောင်ပြပြီး ပြောလိုက်သည်။

"ခင်ဗျား ကျုပ်ရဲ့ တိုက်ခိုက်မှုသုံးခုကို ခံနိုင်ရည်ရှိမယ်ဆိုရင် အရှုံးပေးလိုက်မယ်"

"ဘာ၊ သုံးကွက်တည်းပဲလား။ လုမင်က မောက်မာလွန်းတယ်"

"သူက အဆင့်နှစ် သိုင်းအုပ်ချုပ်သူနယ်ပယ် အထွတ်အထိပ် ကျွမ်းကျင်သူရဲ့ ခွန်အားကို အမှန်တကယ် ပိုင်ဆိုင်ထားတာလား"

"ငါတော့ မယုံဘူး"

လုမင်၏ စကားကြောင့် လူအုပ်ကြားတွင် ဆူညံပွက်လောရိုက်ပြီး ဆွေးနွေးမှုများ ပြင်းထန်လာခဲ့သည်။

ပိုင်ကျန်းဧကရာဇ်က ရှဲ့လွမ်ကို မသိမသာ အကဲခတ်လိုက်၏။ ထိုအခါ ရှဲ့လွမ်က ရလဒ်ကို သူသိပြီးဖြစ်သည့်အတိုင်း တည်တည်ငြိမ်ငြိမ် အပြုံးဖြင့် ရပ်နေသည်ကို တွေ့လိုက်ရလေသည်။

'ဒီလုမင်က ကောလဟာလတွေအတိုင်း ကြောက်စရာကောင်းတာ ဖြစ်နိုင်မလား'

သို့သော်လည်း ပိုင်ကျန်းဧကရာဇ်မှာ ယုံရခက်နေဆဲ ဖြစ်သည်။

"ကောင်းပြီ၊ မင်းငါ့ကို သုံးကွက်တည်းနဲ့ ဘယ်လိုအနိုင်ယူမလဲ ကြည့်ရသေးတာပေါ့"

သံချပ်ကာဝတ် သိုင်းအုပ်ချုပ်သူ၏ မျက်လုံးများက ဒေါသတို့ဖြင့် တဖျပ်ဖျပ်‌ လက်သွားသည်။

"ဝုန်း"

သူ့ခန္ဓာကိုယ်မှ ပြင်းထန်သော အငွေ့အသက်တစ်ခု ထွက်ပေါ်လာသည်။ သူ၏စွမ်းအင်က မီးတောက်ကဲ့သို့ တောက်လောင်လျက်ရှိ၏။ သူ၏ ရင်အုပ်က ပြန့်ကားပြီး သူ့ကြွက်သားများ ဖောင်းကြွလာတော့သည်။ ချက်ခြင်းပင်၊ သူ့ခွန်အားက တဟုန်ထိုး တိုးတက်လာခဲ့သည်။

လုမင်ကို ကောလဟာလများအတိုင်း သန်မာမည်ဟု သူမယုံသော်လည်း အမှန်တကယ် ရင်ဆိုင်ရသည့်အခါ သူ သတိလက်လွတ် မနေဝံ့သေးပေ။

"ဝုန်း"

လုမင်က လေဓာတ်စွမ်းအင်တာအိုသိုင်းကို အသုံးပြုပြီး လှုပ်ရှားလိုက်သည်။ တစ်ချိန်တည်းမှာပင် နဂါးစွမ်းအင်ကိုးခု ပေါက်ကွဲထွက်လာပြီး လေထဲတွင် နဂါးဟိန်းသံများ ထွက်ပေါ်လာခဲ့၏။

"ဝုန်း"

လုမင်က လက်သီးချက် ထုတ်ဖော်လိုက်သည်နှင့် ငရဲဖိနှိပ်ကျောက်စာချပ်ပုံရိပ်က သူ့လက်သီးပေါ်တွင် ပေါ်လာတော့သည်။

'သန်မာလိုက်တာ'

လုမင်၏ လက်သီးအင်အားကို ခံစားမိပြီးနောက် သံချပ်ကာဝတ် သိုင်းအုပ်ချုပ်သူ၏ မျက်နှာအမူအရာ ပြောင်းလဲသွားခဲ့သည်။ ဤလက်သီး၏ စွမ်းအားက သူ့ကို ထိတ်လန့်တုန်လှုပ်ကာ ကြီးမားသော ဖိအားကို ခံစားရစေသည်။

တိုက်ပွဲကို စောင့်ကြည့်နေသည့် ကောင်းကင်နတ်ဘုရားတပ်မဟာမှ လူများလည်း မျက်နှာအမူအရာများ သိသိသာသာ ပြောင်းလဲသွားတော့သည်။

ဤလက်သီးချက်၏ အင်အားက ကြောက်စရာကောင်းလွန်းသည်။ ယင်းက ဝိညာဉ်နတ်ဘုရားများ ထုတ်ဖော်နိုင်သောအရာ လုံးဝ မဟုတ်တော့ပါ။ ယင်းမှာ သိုင်းအုပ်ချုပ်သူနယ်ပယ်သို့ ရောက်ရှိသွားခဲ့ပြီ ဖြစ်သည်။

"တားဆီးလော့"

သံချပ်ကာဝတ် သိုင်းအုပ်ချုပ်သူက ဟိန်းဟောက်ပြီး ပြန်လည် ထိုးနှက်လိုက်သည်။

လက်သီးနှစ်လုံးက လေထဲတွင် တိုက်မိသွား၏။

"ဝုန်း"

လှိုင်းလုံးများက နေရာအနှံ့ ပျံ့နှံ့သွားတော့သည်။

သံချပ်ကာဝတ် သိုင်းအုပ်ချုပ်သူ၏ ခန္ဓာကိုယ်ကို ဖုံးအုပ်ထားသည့် တာအိုနယ်မြေက အချိန်မရွေး ပြိုကျသွားတော့မလို ပြင်းထန်စွာ တုန်လှုပ်သွားသည်။ ထို့နောက် သံချပ်ကာဝတ် သိုင်းအုပ်ချုပ်သူ၏မျက်နှာက ဖြူဖျော့ကာ ပေါက်ကွဲသံနှင့်အတူ နောက်သို့ လွင့်စဉ်သွား၏။

သံချပ်ကာဝတ် သိုင်းအုပ်ချုပ်သူကို လက်သီးတစ်ချက်ဖြင့် လွင့်သွားစေသည်အား တွေ့လိုက်ရသောအခါ ကောင်းကင်နတ်ဘုရားတပ်မဟာမှ လူတိုင်း တုန်လှုပ်ချောက်ချားသွားတော့သည်။

သံချပ်ကာဝတ် သိုင်းအုပ်ချုပ်သူမှာ သူ၏ခန္ဓာကိုယ်ကို တည်ငြိမ်အောင် မထိန်းနိုင်မီ မိုင်တာတစ်ရာကျော် လွင့်စဉ်သွားခဲ့သည်။

"ဒုတိယအကွက်"

လုမင်က လျစ်လျူရှုစွာ ပြောလိုက်သည်။ သူက ရှေ့သို့ ခြေတစ်လှမ်း လှမ်းပြီး မိုင်တစ်ရာ ခရီးကို တခဏချင်း ဖြတ်သန်းသွားသည်။ တစ်ချိန်တည်းမှာပဲ တတိယသွေးမျိုးဆက်က သူ့ခေါင်းပေါ်မှာ ပေါ်လာခဲ့၏။ လုမင်၏ ခန္ဓာကိုယ်ထဲသို့ စွမ်းအင်စီးကြောင်းတစ်ခုက စီးဆင်းသွားရာ လုမင်၏ခွန်အားများ ထပ်မံတိုးပွားလာတော့သည်။

"ဝုန်း"

ဒုတိယမြောက် လက်သီးကို ထုတ်ဖော်လိုက်သည်။

"ဖောက်ခွဲခြင်း တပ်မဟာလက်သီး"

သံချပ်ကာဝတ် သိုင်းအုပ်ချုပ်သူက ဟိန်းဟောက်လိုက်သည်။ သူ့ဆံပင်များပလည်း လေထဲတွင် တလူလူဖြစ်နေခဲ့၏။ သူက ခွန်အားရှိသမျှ အားစိုက်ထုတ်ကာ ထိုးနှက်လိုက်ခြင်း ဖြစ်တော့သည်။

လက်သီးနှစ်လုံးက ဒုတိယ အကြိမ် တိုက်မိသွားသည်။

သို့သော်လည်း ယခုတစ်ကြိမ်တွင် သံချပ်ကာဝတ် သိုင်းအုပ်ချုပ်သူက ပို၍ သနားစရာကောင်းသော အခြေအနေတွင် ရှိသည်။ သူ၏ တာအိုနယ်မြေက ချက်ခြင်း ပျက်စီးသွားပြီး သူ့ခန္ဓာကိုယ်နှင့် လက်အရိုးကျိုးသံများ ထွက်ပေါ်လာခဲ့၏။ အဝေးသို့ လွင့်စဉ်သွားချိန်တွင် သူ့ပါးစပ်မှ သွေးများ အန်ထွက်လာတော့သည်။

ဒုတိယလှုပ်ရှားမှုက သံချပ်ကာဝတ် သိုင်းအုပ်ချုပ်သူကို ပြင်းပြင်းထန်ထန် ဒဏ်ရာရစေခဲ့သည်။

"ခင်ဗျား ထပ်လာချင်လား"

လုမင်၏ အေးစက်သော စကားသံကို ကြားလိုက်ရသည်။

"လာခဲ့စမ်းပါ"

သံချပ်ကာဝတ် သိုင်းအုပ်ချုပ်သူ အော်ဟစ်လိုက်၏။ သူသည် သိုင်းအုပ်ချုပ်သူတစ်ဦးဖြစ်၍ လုမင်မှ သုံးကွက်တည်းဖြင့် အနိုင်ယူခွင့် မပြုနိုင်ပေ။

တိုက်ခိုက်မှု သုံးခုစလုံးကို ရင်ဆိုင်နိုင်ချင်ခဲ့သည်။

"ဝုန်း"

သံချပ်ကာဝတ် သိုင်းအုပ်ချုပ်သူ၏ ခန္ဓာကိုယ်က ဖောင်းကြွလာသည်။ တစ်ချိန်တည်းမှာပင် သူ့လက်ထဲတွင် ကြီးမားသော ဒိုင်းတစ်ခုပေါ်လာခဲ့၏။ တာအိုနယ်မြေကလည်း ဖုံးအုပ်ထားကာ ဖျက်ဆီး၍မရပုံပေါ်သည်။

သူဟာ ဤတစ်ခါတော့ ခံစစ်ပိုင်းမှ အပြည့်အဝ ရပ်တည်ထားခဲ့သည်။

"တတိယအကွက်"

လုမင် ပြောလိုက်သည်။ သူက လေထဲသို့ တိုးဝင်ကာ တတိယအကြိမ် ထိုးနှက်လိုက်၏။

လုမင်က ဤလက်သီးချက်တွင် အတားအဆီးမဲ့သော ကောင်းကင်သိုင်းကို အသုံးမပြုခဲ့ပေ။ ထိုအစား တာအိုသိုင်းပညာကို အသုံးပြုခဲ့သည်။

တာအိုသိုင်းပညာငါးခု ပေါင်းစပ်ခြင်း။

ယခုအချိန်တွင် တာအိုသိုင်းပညာငါးခု၏ ပေါင်းစပ်မှုက အတားအဆီးမဲ့သော ကောင်းကင်သိုင်းထက် ပိုမိုအားကောင်းသည်။

ဤတွင် အဓိကအကြောင်းအရင်းက၊ ငရဲဖိနှိပ်ကျောက်စာချပ် သွေးမျိုးဆက်၏ တိုးတက်မှုနှင့်အတူ၊ အတားအဆီးမဲ့သော ကောင်းကင်သိုင်းက နတ်ဘုရားအဆင့်နိမ့် သိုင်းပညာထက် ကျော်လွန်သွားသောကြောင့် ဖြစ်သည်။ လုမင်၏ လက်ရှိ ကျင့်ကြံခြင်းအခြေခံဖြင့် အတားအဆီးမဲ့သောကောင်းကင်သိုင်း၏ စွမ်းအားကို အပြည့်အဝ မထုတ်ဖော်နိုင်သေးပေ။

လုမင်၏ ကျင့်ကြံခြင်းက သိုင်းအုပ်ချုပ်သူနယ်ပယ်သို့ ဖြတ်ကျော်သွားသောအခါ၊ သူ၏ ယွမ်ချီစွမ်းအင်က ပိုကြွယ်ဝလာပြီး အတားအဆီးမဲ့သောကောင်းကင်သိုင်း၏ စွမ်းအားကိုလည်း သဘာဝအတိုင်း ပို၍ ထုတ်ဖော်လာနိုင်မည် ဖြစ်သည်။

လက်သီးက သံချပ်ကာဝတ် သိုင်းအုပ်ချုပ်သူ၏ ဒိုင်းပေါ်သို့ ကျရောက်သွားခဲ့သည်။

ဒိုင်းကို တာအိုနယ်မြေဖြင့် ဖုံးအုပ်ထားသော်လည်း လက်သီးချက်အောက်မှာ တာအိုနယ်မြေက ပူဖောင်းတစ်ခုကဲ့သို့ ချက်ချင်း ပြိုကျသွားရသည်။ ဒိုင်းက ကျယ်လောင်သောပေါက်ကွဲသံတစ်ခု ထွက်ပေါ်လာပြီး ဟင်းလင်းပြင်ကိုခွဲထုတ်သော အသံလှိုင်းတစ်ခု ထွက်လာခဲ့၏။

ထို့နောက်မှာတော့ ထိတ်လန့်ဖွယ်ရာ မြင်ကွင်းတစ်ခု ပေါ်လာတော့သည်။ ဒိုင်းက တွန့်လိပ်ပြီး ပုံပျက်သွားခဲ့သည်။ သံချပ်ကာဝတ် သိုင်းအုပ်ချုပ်သူလည်း မျက်နှာပျက်သွား၏။

"ဝုန်း"

သံချပ်ကာဝတ် သိုင်းအုပ်ချုပ်သူမှာ ဒိုင်းကို လုံးဝ မကိုင်နိုင်တော့ပေ။ တောင်ကြီးတစ်လုံးကဲ့သို့ လေးလံသော ဒိုင်းက သံချပ်ကာဝတ် သိုင်းအုပ်ချုပ်သူ၏ ခန္ဓာကိုယ်ကို ပြန်ဆောင့်လိုက်မိသည်။

"ဂျွတ်..."

သံချပ်ကာဝတ် သိုင်းအုပ်ချုပ်သူ၏ ခန္ဓာကိုယ်မှ အရိုးကျိုးသံများ ဆက်တိုက်ထွက်ပေါ်လာသည်။ သူ့ခန္ဓာကိုယ်က အဝေးသို့ လွင့်စဉ်သွားပြီး မြေပြင်ပေါ် ပြုတ်ကျသွား၏။ သွေးများ အန်ထွက်လာပြီး ခဏချင်း သူ မလှုပ်ရှားနိုင်တော့ပေ။

ရှုံးသွားပြီ၊ သံချပ်ကာဝတ် သိုင်းအုပ်ချုပ်သူ လုံးဝရှုံးနိမ့်သွားခဲ့ပြီ ဖြစ်သည်။

လုမင်ကို ရင်ဆိုင်လိုက်ရတော့ သူ့မှာ ခုခံနိုင်စွမ်း လုံးဝ မရှိခဲ့ပေ။

"ဂလု"

လူများစွာတို့ တံတွေးတစ်လုပ်မြိုချပြီး လုမင်ကို ထိတ်လန့်ကြောက်ရွံ့သော မျက်လုံးများဖြင့် ကြည့်လိုက်ကြသည်။ သူ့ကို မည်သူမှ သံသယမရှိကြတော့ပေ။

လုမင်၏ တိုက်ခိုက်နိုင်စွမ်းက သာမန် သိုင်းအုပ်ချုပ်သူများကို လုံးဝချေမှုန်းနိုင်သည်။ သံချပ်ကာဝတ် သိုင်းအုပ်ချုပ်သူကို သတ်ရန်က သူ့အတွက် သိပ်ခက်ခဲမှာ မဟုတ်ချေ။

ကောလဟာလများက ပုံကြီးချဲ့ခြင်းမဟုတ်ဘဲ အမှန်ဖြစ်ပုံရသည်။

ကောင်းကင်နတ်ဘုရားတပ်မဟာမှ လူအားလုံး စိတ်ပြောင်းသွားခဲ့ကြလေသည်။

"အံ့ဩစရာ၊ အံ့ဩစရာပဲ။ ညီလေးလုက ကမ္ဘာမှာ တကယ်ကို ပြိုင်စံရှားတဲ့ ခေတ်အဆက်ဆက်ရဲ့ နံပါတ်တစ် ပါရမီရှင်ပါပဲ"

ပိုင်ကျန်းဧကရာဇ်လည်း သဘောကျမှုအပြည့်ဖြင့် ရှေ့သို့ လျှောက်လာခဲ့သည်။

သို့သော်လည်း ပိုင်ကျန်းဧကရာဇ်က သူ့လေသံကို ချက်ချင်းပြောင်းလိုက်ပြီး ပြောလေသည်။

"ဒါပေမဲ့ ငါကိုယ်တိုင် တွေ့ကြုံခံစားချင်နေသေးတယ်။ ညီလေးလု၊ မင်းကို သံသယဖြစ်တာတော့ မဟုတ်ပါဘူး။ ဒါပေမဲ့ ကောင်းကင်နတ်ဘုရားတပ်မဟာက လူတိုင်းအတွက် ငါတာဝန်ယူရမယ်"

ပိုင်ကျန်းဧကရာဇ်က သံချပ်ကာဝတ် သိုင်းအုပ်ချုပ်သူထက် အဆများစွာ ပိုအားကောင်းသော အရှိန်အဝါများကို ထုတ်ဖော်ရင်း လုမင်ရှေ့တွင် ရပ်လိုက်သည်။

သူပြောတာက အမှားမရှိပေ။ ကောင်းကင်နတ်ဘုရားတပ်မဟာ တစ်ခုလုံးအတွက် လုမင်၏ တိုက်ခိုက်နိုင်စွမ်းကို ရှင်းရှင်းလင်းလင်း သိထားရမည် ဖြစ်သည်။

"လာပါ"

လုမင်လည်း ပိုင်ကျန်းဧကရာဇ်ကို စူးရှသော အကြည့်ဖြင့် ကြည့်လိုက်သည်။