အခန်း ၁၄၃၂

အပိုင်း ( 1432 ) သတ်ဖြတ်ချင်စိတ်။

"ဝှစ်၊ ဝှစ်"

တစ်စုံတစ်ယောက်က လှုပ်ရှားလိုက်သည်နှင့် အခြားသူများလည်း မထိန်းနိုင်တော့ဘဲ လင်းယုန်ပါးစပ်ဆီသို့ ပြေးသွားကြသည်။

"ဝှစ်၊ ဝှစ်..."

လူအုပ်ကြီးက ပျားတစ်သိုက်ကဲ့သို့ လင်းယုန်ပါးစပ်ထဲကို ပြေးဝင်သွား၏။ လုမင်၊ ချိုးဟောက်နှင့် ချိုးရင်ရင်လည်း လူအုပ်ကြီးနှင့် ရောနှောကာ လင်းယုန်၏ ပါးစပ်ဆီသို့ ပြေးသွားကြတော့သည်။

ရှေ့မှလူများကတော့ လင်းယုန်ပါးစပ်ထဲကို ပြေးဝင်သွားကြသည့်တိုင် အန္တရာယ်မရှိပေ။

ယင်းကိုမြင်တော့ နောက်လူများလည်း မတုံ့ဆိုင်းတော့ဘဲ အလျင်စလို လှုပ်ရှားလိုက်ကြသည်။

အရင်ဝင်သူက ထိပ်တန်းရတနာများကို ရနိုင်မလားဆိုတာ မည်သူသိမည်နည်း။ သဘာဝအတိုင်း လူအုပ်ကြီးမှာ ရူးသွပ်သွားကြသည်။

"ဝှစ်"

လုမင် ပျံသန်းနေခဲ့သည်။ ရုတ်တရက်၊ သူ့နောက်မှ ကြောက်မက်ဖွယ်ကောင်းသော လက်ဝါးပုံရိပ်တစ်ခုက လုမင်ဆီသို့ ကျရောက်လာ၏။

လုမင် မျက်ခုံးပင့်ပြီး လှည့်မကြည့်ဘဲ လက်ဝါးတစ်ချက် ရိုက်ထုတ်လိုက်သည်။

"ဝုန်း"

နှစ်ဖက် ထိပ်တိုက်တွေ့ဆုံသွား၏။ လုမင်က သူ့ခန္ဓာကိုယ်ကို လှည့်ကာ နောက်သို့ လှမ်းကြည့်လိုက်သည်။

ယင်းမှာ အဖြူရောင်ဝတ် လူငယ်တစ်ယောက် ဖြစ်သည်။ သူက အေးစက်စက်ဖြင့် လုမင်ကိုကြည့်ပြီး ပျံသန်းသွား၏။

'ကောင်းကင်နတ်ဘုရားဂိုဏ်းကလူ'

လုမင်၏ မျက်လုံးများက သတ်ဖြတ်ချင်စိတ်များ ပြည့်နှက်သွားသည်။

ကောင်းကင်နတ်ဘုရားဂိုဏ်းမှ လူငယ်က သူ့ကို ခိုးကြောင်ခိုးဝှက် တိုက်ခိုက်သတ်ဖြတ်လိုကြောင်း ထင်ရှားသည်။

"ကောင်းကင်နတ်ဘုရားဂိုဏ်း၊ ရှဲ့နျန်ကျွင်း"

လုမင် အေးစက်စက်လေသံဖြင့် ခပ်တိုးတိုးပြောလိုက်သည်။

ထို့နောက် ဆက်လက်ပျံသန်းသွားရာ မကြာမီ လင်းယုန်ပါးစပ် လမ်းကြောင်းအတွင်းသို့ ပြေးဝင်သွားတော့သည်။

လင်းယုန်က အလွန်ကြီးမားသောကြောင့် လမ်းကြောင်းမှာ ကြီးမားသည်။ လူအုပ်ကြီးက တပြိုင်နက်တည်း ပြေးလာသော်လည်း ပြည့်နှက်ခြင်းမျိုး မရှိပါ။

"အား၊ အား"

ထိုအခိုက်တွင် သူတို့ရှေ့မှ စူးစူးဝါးဝါးအော်သံများ ထွက်ပေါ်လာသည်။

"ဘာတွေဖြစ်နေတာလဲဟေ့"

"ရှေ့မှာ အန္တရာယ်ရှိတယ်"

တချို့က အော်ပြောကြသည်။

"ဝမ်"

ထိုအချိန်တွင် သူတို့ရှေ့မှ နားစူးစူးရှရှ အသံတစ်ခု ထွက်ပေါ်လာသည်။ ထို့အပြင် ဤအသံက အဝေးမှ ထွက်ပေါ်လာခြင်း ဖြစ်၏။

"ဝှစ်၊ ဝှစ်"

ရုတ်တရက်၊ လမ်း၏ တစ်ဖက်တစ်ချပ်စီရှိ နံရံများပေါ်တွင် အနက်ရောင်အလင်းများ ထွက်ပေါ်လာတော့သည်။

အလင်းတန်းက လူတစ်ယောက်ကို ထိုးဖောက်သွားရာ ချက်ချင်း သေဆုံးသွားခဲ့သည်။

"ဖောင်း"

လုမင်က လက်သီးအနည်းငယ် အဆက်မပြတ်ထုတ်ဖော်ပြီး အနက်ရောင်အလင်းတန်းများစွာကို ဖျက်ဆီးပစ်လိုက်သည်။

ဤအနက်ရောင်အလင်းက မသန်မာသော်လည်း ၎င်း၏စွမ်းအားက အံ့မခန်းပင်။ ၎င်း၏ ထိုးဖောက်နိုင်စွမ်းက အလွန် ကြောက်စရာကောင်းသည်။ လူတော်တော်များများက ယွမ်ချီစွမ်းအင်နှင့် သူတို့ကိုယ်ကို ခုခံကာကွယ်ရန် ကြိုးစားသော်လည်း အသုံးမဝင်ပေ။ အနက်ရောင် အလင်းတန်းများက ၎င်းတို့ကို ဖောက်ထွက်သွားကြသည်။

"သိုင်းအုပ်ချုပ်သူ နယ်ပယ်အောက်က လူတွေ ထွက်သွားကြဟေ့။ သိုင်းအုပ်ချုပ်သူနယ်ပယ်‌အောက်ကလူတွေ ထွက်ခွာသွားကြပါ"

တစ်ယောက်က အော်ပြောလိုက်သည်။

သိုင်းအုပ်ချုပ်သူနယ်ပယ်အောက်မှ လူများက ဤအလင်းများကို လုံးဝ မပိတ်ဆို့နိုင်ပေ။

အလင်းများ၏ ထိုးဖောက်ခံရပြီး အော်ဟစ်သံများ အဆက်မပြတ် ထွက်ပေါ်လာခဲ့သည်။

လမ်းအတွင်း၌ တာအိုနယ်မြေများ ချက်ချင်း ထွက်ပေါ်လာ၏။

သိုင်းအုပ်ချုပ်သူများက ယွမ်ချီစွမ်းအင်နှင့် တာအိုနယ်မြေများကို အသုံးပြုကာ ၎င်းတို့၏ အဓိကနေရာများကို ကာကွယ်ထားခဲ့ကြပေသည်။

ချိုးရင်ရင်ကို သူ့ခန္ဓာကိုယ်ပေါ်ရှိ ငှက်မွှေးဝတ်ရုံက တောက်ပသောအလင်းများဖြင့် လွှမ်းခြုံပြီး အနက်ရောင်အလင်းများဖြင့် ပိတ်ဆို့ထားခဲ့သည်။

ချိုးဟောက်အတွက်တော့ ရွှေခေါင်းလောင်းကြီးတစ်လုံးက သူ့ဦးခေါင်းထက်မှာ လွင့်မျောနေ၏။ ၎င်းကလည်း အလင်းမျက်နှာပြင်တစ်ခုဖြင့် အနက်ရောင်အလင်းများကို ပိတ်ဆို့ထားတော့သည်။

လုမင်ကတော့ ကစဉ့်ကလျားတာအိုနယ်မြေ တစ်ခုတည်းဖြင့် အလွယ်တကူ ပိတ်ဆို့နိုင်ခဲ့သည်။

ဤနေရာတွင် လူတိုင်းက သတိထားပြီး အလောတကြီး မသွားကြပေ။

လမ်းတစ်လျှောက်မှာ အလောင်းများစွာကို တွေ့လာခဲ့ရသည်။

အလောင်းအများစုကတော့ အဓိပဓိနယ်ပယ်များ ဖြစ်၏။ သတိပေါ့လျော့မိသော သိုင်းအုပ်ချုပ်သူတချို့သာ ဤနေရာတွင် ကျဆုံးခဲ့ကြသည်။

သို့သော်လည်း သူတို့ ရှေ့ကို ဆက်လာသည်နှင့်အမျှ အနက်ရောင်အလင်း၏ စွမ်းအားက တဖြည်းဖြည်း အားကောင်းလာသည်။

အစပိုင်းတွင်၊ ဘယ်ညာနှစ်ဖက်မှ ပစ်ခတ်သော်လည်း နောက်ပိုင်းတွင် အဆုံးမရှိသော အနက်ရောင်အလင်းများက ဘက်ပေါင်းစုံမှ ထွက်လာတော့သည်။ ၎င်း၏စွမ်းအားမှာလည်း အံ့မခန်း ဖြစ်သည်။

တဖြည်းဖြည်းနှင့် သိုင်းအုပ်ချုပ်သူတချို့ပင် မခံနိုင်သော အရိပ်အယောင်များ ပြသလာခဲ့သည်။

ထို့အပြင် ဤလမ်းမှာ အလွန်ရှည်လျား၏။

သူတို့က မိုင်ထောင်ပေါင်းများစွာ ပျံသန်းခဲ့ကြသော်လည်း အဆုံးထိ မရောက်နိုင်ကြသေးပေ။

"ချီးပဲ၊ ငါ မရတော့ဘူး"

တစ်စုံတစ်ယောက်က တောင့်မခံနိုင်တော့ဘဲ အော်ဟစ်လိုက်သည်။ ရှေ့ဆက်လျှောက်နေပါက‌ သေဖို့သာရှိမည်။

ထို့ကြောင့် နောက်ဆုတ်သွားရန်သာ တတ်နိုင်သည်။

ရှေ့ကို ဆက်လျှောက်လာသည်နှင့်အမျှ ခရီးဆက်ရန် ပို၍ခက်ခဲလာခဲ့သည်။

သို့ရာတွင် လုမင်၊ ချိုးရင်ရင်နှင့် ချိုးဟောက်ကတော့ သက်တောင့်သက်သာရှိပြီး အခြေအနေမပျက်ကြပေ။

ချိုးရင်ရင်နှင့် ချိုးဟောက်တို့၏ ရတနာများက သူတော်စင်ရတနာများ ဖြစ်သည်။ သူတို့၏ ခံစစ်စွမ်းအားက အံ့အခန်းဖြစ်ပြီး နားမလည်နိုင်အောင်ပင်။

ယင်းက အခြားသူများ၏ အာရုံကို သဘာဝအတိုင်း ဆွဲဆောင်ခဲ့သည်။

"ထူးခြားလိုက်တဲ့ ရတနာပဲ၊ ဒါကိုရနိုင်ရင် စန်းဧကရာဇ်ရဲ့ နန်းတော်ထဲကို ဝင်လို့ရပြီ"

တစ်စုံတစ်ယောက်၏ မျက်လုံးများက လောဘအရိပ်အယောင်များ ပေါ်လာသည်။

လူတော်တော်များများက သူတို့ သုံးယောက်ကို ချက်ချင်း ဝိုင်းလာကြ၏။

"ဒီလိုရတနာကောင်းတွေက မင်းတို့နဲ့ မတန်ဘူး။ ငါ့ကိုပေးစမ်း"

လူငယ်တစ်ယောက်က အေးစက်စက်ဖြင့် ငေါက်ငမ်းပြီး ချိုးဟောက်ကို လက်ဝါးဖြင့်ရိုက်လိုက်သည်။

"ဒေါင်"

ချိုးဟောက်၏ ဦးခေါင်းထက်မှ ရွှေခေါင်းလောင်းက တုန်ခါသွားသည်။ မမြင်နိုင်သော လှိုင်းလုံးကြီး ထွက်လာပြီး လူငယ်လေးဆီကို ပြေးဝင်သွား၏။ လူငယ်လည်း မျက်နှာအမူအရာ ပြောင်းသွားပြီး ချက်ချင်း ပြန်ဆုတ်သွားရတော့သည်။

"ဆန်းကြယ်လိုက်တဲ့ ရတနာ၊ အဲဒါက သူတော်စင်ရတနာပဲ ဖြစ်ရမယ်။ ပေးစမ်း"

"သတ်"

အခြားလူငယ်တချို့က ရှေ့သို့ ခြေတစ်လှမ်းတိုးကာ ချိုးဟောက်ကို တိုက်ခိုက်လိုက်သည်။

အခြား လူငယ်တချို့ကလည်း ချိုးရင်ရင်ကို တိုက်ခိုက်လိုက်၏။

"ထွက်သွား"

လုမင် အေးစက်စက် အော်ဟစ်ပြီး ထိုလူငယ်များကို ထိုးကြိတ်လိုက်တော့သည်။

"ကောင်စုတ်လေး၊ ငါက မင်းကို ဂရုမစိုက်တာတောင် မင်းကံကောင်းနေပြီ။ ဒါကို အခြားသူတွေရဲ့ကိစ္စမှာ ဝင်စွတ်ဖတ်ဝံ့တယ်ပေါ့။ သေစမ်း"

လူငယ်တစ်ယောက်က အေးစက်စက်ပြောပြီး လုမင်ကို ထိုးနှက်လိုက်သည်။

သို့ရာတွင်၊ လုမင်၏လက်သီးက ထိုလူငယ်ကို အပြတ် ချေမှုန်းပစ်လိုက်သည်။ လူငယ်လေး အော်ဟစ်ပြီး လွင့်စဉ်သွားသည်။ လုမင်၏လက်သီးက သူ့အကာအကွယ်စွမ်းအင်နှင့် တာအိုနယ်မြေကို ဖျက်ဆီးသွား၏။ ထိုအခါမှာတော့ အနက်ရောင်အလင်းများ၏ ထိုးဖောက်ခံရကာ ချက်ချင်း သေဆုံးသွားတော့သည်။

ထို့နောက် လုမင်က လက်သီးချက်ထုတ်ဖော်ရင်း နောက်ထပ် လူငယ်အချို့ကို လွင့်စဉ်စေခဲ့သည်။ ၎င်းတို့၏ အကာအကွယ်စွမ်းအင်နှင့် တာအိုနယ်မြေကို လုမင်က ဖျက်ဆီးလိုက်သောအခါ သူတို့အားလုံး အနက်ရောင်အလင်းတန်းအောက်တွင် သေဆုံးသွားကြတော့သည်။

ကျန်လူငယ်များလည်း မျက်နှာပျက်သွားခဲ့ကြသည်။

လုမင်၏ တိုက်ခိုက်နိုင်စွမ်းက အလွန်တရာ အားကောင်း၏။ သူက သူတို့ကို လုံးလုံးလျားလျား ချေမှုန်းပစ်နိုင်သည်။

ဤအခိုက်အတန့်တွင် အလွန်ထက်သော စွမ်းအားတစ်ခုက နောက်ကွယ်မှ လုမင်ကို တိုက်ခိုက်လာသည်။

လုမင်၏ အားကောင်းသော ဝိညာဉ်အသိအရ ဓားအလင်းတစ်ခုဖြစ်ကြောင်း သူသိလိုက်၏။ ဤတိုက်ခိုက်မှုမှာ အလွန်ပြင်းထန်သည်။

"ဝှစ်"

လုမင်က လေဓာတ်စွမ်းအင် တာအိုသိုင်းကို အသက်သွင်းလိုက်သည်။ အရေးကြီးသောအခိုက်အတန့်တွင် သူက ဘေးတစ်ဖက်သို့ တစ်မီတာခန့်ရွှေ့ပြီး ဓားအလင်းကို ရှောင်ထွက်သွား၏။

"မင်းပဲ ထပ်ဖြစ်ပြန်ပြီ"

ထိုလူကို မြင်တွေ့ပြီးနောက် လုမင်ထံမှ သတ်ဖြတ်ချင်စိတ်များ ထွက်ပေါ်လာခဲ့သည်။

ဤလူမှာ လမ်းကြောင်းအပြင်ဘက်တွင် လုမင်ကို တိုက်ခိုက်ခဲ့သော ကောင်းကင်နတ်ဘုရားဂိုဏ်းမှ ဝတ်ရုံဖြူဝတ်လူငယ် ဖြစ်သည်။

"မင်း ကံကောင်းသွားတယ်"

တိုက်ခိုက်မှု မအောင်မြင်သောအခါ ဝတ်ရုံဖြူဝတ် လူငယ်က ချက်ချင်း ဆုတ်သွားရန် ဟန်ပြင်လိုက်သည်။

"မင်းက ငါ့ကို အကြိမ်ကြိမ်တိုက်ခိုက်ခဲ့ပြီး အခုမှ ထွက်သွားချင်နေတယ်ပေါ့။ ငါ့ခွင့်ပြုချက်ကို တောင်းပြီးပြီလား"

လုမင် အေးစက်စက် ပြောလိုက်သည်။ သူ့ထံမှ အားကောင်းသော အရှိန်အဝါများ ထွက်ပေါ်လာ၏။ သူက ရှေ့သို့ ခြေတစ်လှမ်းတိုးကာ အဖြူရောင်ဝတ် လူငယ်လေးဆီသို့ ပြေးလိုက်သွားတော့သည်။

အနက်ရောင်အလင်းများကတော့ ပစ်ခတ်နေဆဲ ဖြစ်သည်။ သို့ရာတွင် လုမင်အတွက် ခြိမ်းခြောက်မှု သိပ်မရှိခဲ့ပေ။

သူ့ထံသို့ လုမင်ပြေးလာနေကြောင်း မြင်ရသောအခါ လူငယ် မျက်နှာအမူအရာပြောင်းသွားသည်။ သူက ရှေ့ကို ချက်ချင်း ပြေးတက်သွား၏။ သို့ရာတွင်၊ သူ့အရှိန်က လုမင်နှင့် မယှဉ်နိုင်ပေ။

အသက်ရှုချိန် အနည်းငယ်အတွင်း လုမင်က သူ့ကို လိုက်မီသွားသည်။

"ကောင်စုတ်‌လေး၊ မင်းငါ့ကို ဘယ်လိုတိုက်ခိုက်ဝံ့တာလဲ။ ငါက ကောင်းကင်နတ်ဘုရားဂိုဏ်းရဲ့ အကြီးအကဲ..."

မလွတ်မြောက်နိုင်ကြောင်း မြင်ရသောအခါ အဖြူရောင်ဝတ်လူငယ်က လှည့်အော်လိုက်သည်။

"သတ်"

လုမင်က ဂရုအစိုက်ဘဲ တိုက်ရိုက် တိုက်ခိုက်လိုက်၏။

ဤလူက တကယ်ကို မိုက်မဲသည်။ သူက လုမင်ကို အကြိမ်ကြိမ် တိုက်ခိုက်ပြီး သတ်ရန် ကြိုးစားခဲ့သည်။ ယခုမှ သူ့နောက်မှလူဖြင့် လုမင်ကိုခြိမ်းခြောက်ရန် ကြိုးစားနေ၏။ ယင်းက မိုက်မဲလွန်းသည် မဟုတ်လော။

အဖြူရောင်ဝတ်လူငယ်လည်း လုမင်၏ တိုက်ခိုက်မှုကို မြင်ရသောအခါ ပြောရမည့်စကားများကိုပင် ဆက်မပြောနိုင်တော့ပေ။ သူ့ကိုယ်သူ ကာကွယ်ရန်သာ အစွမ်းကုန် ကြိုးစားနိုင်ခဲ့သည်။

သူ့ထံမှ အားကောင်းသော ဓားအလင်းများ ထွက်ပေါ်လာ၏။

ဤလူငယ်တွင် သန္ဓေ ဝိညာဥ်ကိုယ်ခန္ဓာ ရှိသင့်သည်။ သူ၏ ကျင့်ကြံခြင်းအခြေခံကလည်း ပထမအဆင့် သိုင်းအုပ်ချုပ်သူနယ်ပယ် အထွတ်အထိပ်သို့ ရောက်နေပြီ။ သူ၏ တိုက်ခိုက်နိုင်စွမ်းကလည်း မဆိုးသည့်အထဲတွင် ပါဝင်သည်။ သို့သော်လည်း ကံမကောင်းစွာဖြင့် လုမင်ကိုတော့ မယှဉ်နိုင်ခဲ့ပါ။

"ဒုန်း"

လုမင်က ဓားအလင်းများကို ချေဖျက်ပစ်လိုက်သည်။ သူ့လက်သီးက အဖြူရောင်ဝတ်လူငယ်၏ အကာအကွယ်စွမ်းအင်နှင့် တာအိုနယ်မြေကို ထိုးနှက်လိုက်၏။ ထိုလူငယ် လွင့်စဉ်သွားကာ အနက်ရောင်အလင်းများဖြင့် ထိုးဖောက်လုနီး ဖြစ်သွားတော့သည်။