အခန်း ၁၄၄၀

အပိုင်း ( 1440 ) ပါရမီရှင် ခေါင်းဆောင်ကို သတ်ခြင်း။

"ဖျက်ဆီးလော့"

လုမင်က လက်ဝါးတစ်ဖက်ဖြင့် ဖိချဟန်ပြုလိုက်သည်။ ရှေးဦးကစဉ့်ကလျားတာအိုနယ်မြေက အစိမ်းရောင်ဝတ်လူငယ်ကို လွှမ်းခြုံပြီး သန့်စင်လိုက်၏။

"ငါ့ကိုကယ်ကြပါဦး"

အစိမ်းရောင်ဝတ် လူငယ်က ကြောက်လန့်တကြား အော်ဟစ်လိုက်သည်။ ဟုတ်ပေသည်၊ သူ့အသံက စွမ်းအင်တုန်ခါမှုများနှင့် ထုတ်လွှတ်ခြင်း ဖြစ်၏။

"သူ့ကိုလွှတ်စမ်း"

ကျယ်လောင်သော ဟိန်းဟောက်သံကိုကြားရပြီး နတ်ဆိုးအငွေ့အသက်များ ထွက်ပေါ်လာခဲ့သည်။ နတ်ဆိုးရောင်ဝတ်ဖြင့် လူငယ်၏ဦးခေါင်းမှ မျှော်စင်လေးတစ်ခု ထွက်လာ၏။ မျှော်စင်လေးက လျင်မြန်စွာ အရွယ်အစားကြီးလာကာ လုမင်ကို ဖိနှိပ်လာတော့သည်။

သူတော်စင်ရတနာ၊ ယင်းကလည်း သူတော်စင်ရတနာတစ်ခုဖြစ်သည်မှာ သံသယဖြစ်စရာ မလိုပေ။

ဤလူငယ်များက သက်ဆိုင်ရာ အင်အားစုများမှ ခေါင်းဆောင်များ ဖြစ်သည်။ ဤအထိ ရောက်လာနိုင်သူများအနေဖြင့် ရတနာများကိုလည်း သဘာဝအတိုင်း ရရှိခဲ့၏။ သူတို့တစ်ဦးစီက သူတော်စင်ရတနာများကို ရရှိခဲ့ပေသည်။

နတ်ဆိုးရောင်ဝတ်ဖြင့် ထိုလူငယ်က ကောင်းကင်နတ်ဆိုးဂိုဏ်းမှ မော့ကျယ် ဖြစ်သည်။ ဤမျှော်စင်လေးကတော့ မဟာဧကရာဇ် လျှိုဝှက်နယ်မြေသို့ ဝင်ရောက်ပြီးမှ သူရရှိခဲ့သော သူတော်စင်ရတနာ ဖြစ်၏။

သူ၏ လက်ရှိအင်အားဖြင့် သူတော်စင်ရတနာတစ်ခု၏ စွမ်းအားကို ကောင်းစွာမထုတ်နိုင်သော်လည်း၊ အုပ်ချုပ်သူအဆင့် ဝိညာဉ်ရတနာထက် ပိုမိုအားကောင်းနေဆဲပင်။

မျှော်စင်လေးက တောင်ငယ်တစ်လုံး အရွယ်အစားအထိ ကြီးထွားလာပြီး လုမင်အပေါ်သို့ ဖိချလိုက်သည်။ မျှော်စင်အောက်တွင် စုပ်ယူမှု စွမ်းအားတစ်ခုလည်း ရှိနေပြီး လုမင်ကို စုပ်ယူလိုက်၏။

"ထန်၊ ထန်"

လုမင်၏ နောက်ကျောရှိ အနက်ရောင်တောင်ပံက လွင့်ထွက်သွားပြီး အရွယ်အစား လျင်မြန်စွာကြီးထွားလာသည်။ ယင်းက ဓားသွားကဲ့သို့ မျှော်စင်ကို ခုတ်ထစ်လိုက်၏။

"ဒုန်း"

မျှော်စင်လေးက တုန်ခါသွားပြီး နတ်ဆိုးအငွေ့အသက်များ လွင့်ပျံလာခဲ့သည်။ သို့သော်လည်း အနက်ရောင်တောင်ပံက မျှော်စင်ကို ပြန်လွင့်သွားစေနိုင်ခဲ့၏။

"ဝုန်း၊ ဝုန်း..."

ထိုအချိန်တွင် ဟဲယွိ၊ ဝမ့်ရှောင်၊ ရှစ်ထျန်းနှင့် ကျန်လူငယ်တို့ထံမှ အားကောင်းသော ရောင်ဝါတစ်ခု ထွက်ပေါ်လာခဲ့သည်။ သူတို့တစ်ဉီးစီက ရတနာတစ်ခုစီကို ထုတ်ယူလိုက်၏။

ရတနာအားလုံးကလည်း သူတော်စင်အဆင့်များ ဖြစ်တော့သည်။

သူတို့အားလုံးက သူတော်စင်လက်နက်များဖြင့် လုမင်ကိုသတ်ရန် ကြိုးစားခဲ့ကြသည်။

လုမင်၏ မျက်နှာက လေးနက်လာသည်။

သူတော်စင်ရတနာများကို အသုံးမပြုဘဲ ကိုယ်ပိုင်အစွမ်းအစဖြင့် တိုက်ခိုက်ပါက၊ ဤပါရမီရှင်ခြောက်ဦး ဝန်းရံထားလျှင်ပင် လုမင် ကြောက်နေမည် မဟုတ်ပေ။ သူက အနိုင်ရရှိရန်ပင် ဖြစ်နိုင်သည်။

သို့ရာတွင်၊ သူတို့အားလုံးက သူတော်စင်လက်နက်များကို အသုံးပြုခဲ့ကြသောကြောင့် စွမ်းအားအချိုးက ပြောင်းလဲသွားခဲ့သည်။ သူတော်စင်လက်နက်များကြားမှ ရင်ဆိုင်ခြင်း ဖြစ်လာပါက လုမင်အတွက် မကောင်းပေ။

"ဝမ်"

လုမင်၏ မျက်ခုံးနှစ်ခုကြားမှ လဲ့တင်း ထွက်ပေါ်လာခဲ့သည်။

"ဝမ်"

ထိုအချိန်တွင် ကောင်းကင်၌ ဓားအလင်း တောက်ပလာပြီး ကျောက်စိမ်းသေတ္တာတစ်လုံး ကွဲအက်သွား၏။

ကျောက်စိမ်းသေတ္တာထဲမှ ကျောက်စိမ်းအဆောင်တစ်ခု ထွက်လာတော့သည်။

ဟဲယွိနှင့် အခြားသူများက လုမင်ကို ဝိုင်းထားသော်လည်း ကျန်လူများမှာ ပွဲကြည့်မနေပေ။ ကောင်းကင်တွင် ကျန်သော သေတ္တာနှစ်လုံးကို လိုက်နေခဲ့ကြသည်။

ယခင်ကလည်း ကျောက်စိမ်းသေတ္တာထဲမှ ကျောက်စိမ်း ချပ်ဝတ်တန်ဆာ ထွက်ပေါ်လာခဲ့သည်။ ထို့ကြောင့် ကျောက်စိမ်းသေတ္တာထဲမှ ရတနာများ ပိုလို့တောင် အဖိုးတန်ကြောင်း သိသာထင်ရှား၏။

ကျောက်စိမ်းအဆောင် ပေါ်လာသည်နှင့် တပြိုင်နက် ကျန်လူများမှာ ထိုကျောက်စိမ်းအဆောင်အတွက် စတင် တိုက်ခိုက်ကြတော့သည်။

ဟဲယွိ၊ ရှစ်ထျန်းနှင့် အခြားသူများလည်း မျက်နှာအမူအရာပြောင်းသွားသည်။

"ဟမ့်၊ ဒီတစ်ခါတော့ မင်းကို လွှတ်ပေးလိုက်မယ်"

ရှစ်ထျန်း ပြောလိုက်သည်။ သူက ပထမဆုံး ဆုတ်ခွာပြီး ကျောက်စိမ်းအဆောင်အတွက် တိုက်ခိုက်လိုက်၏။ ယင်းကိုမြင်တော့ အခြားသူများလည်း ကျောက်စိမ်းအဆောင်ဘက်ကို လှည့်သွားကြတော့သည်။

လုမင်က အပြောင်းအလဲမရှိသော အမူအရာဖြင့် ရပ်လိုက်သည်။ သူက တိုက်ပွဲတွင် မပါဝင်ဘဲ နောက်ဆုံး ကျောက်စိမ်းသေတ္တာကို ကြည့်လိုက်၏။

ဤကျောက်စိမ်းသေတ္တာက လျှပ်စီးလက်သကဲ့သို့ အလျင်မြန်ဆုံး ဖြစ်သည်။

"ဝှစ်"

လုမင် ရုတ်တရက် လှုပ်ရှားလိုက်သည်။ သူက စွမ်းအင်လက်ဝါးကြီးတစ်ဖက်ဖြင့် ကျောက်စိမ်းသေတ္တာကို ဖမ်းဆီးရန် ကြိုးစားလိုက်၏။

သို့သော်လည်း ကျောက်စိမ်းသေတ္တာက အလွန်လျင်မြန်ပြီး ဖျတ်ခနဲ လုမင်၏ လက်ဖဝါးကို ရှောင်သွားတော့သည်။

လုမင်လည်း လေဓာတ်စွမ်းအင်တာအိုသိုင်းဖြင့် လိုက်လံဖမ်းဆီးလိုက်သည်။ သို့တိုင်၊ ကျောက်စိမ်းသေတ္တာက တောက်ပသော အလင်းရောင်များ ထုတ်လွှတ်လိုက်ပြီး ပို၍လျင်မြန်သောအရှိန်ဖြင့် ပျံသန်းကာ လုမင်ကို ချန်ထားခဲ့တော့သည်။

"ချီးပဲ"

လုမင် တိတ်တဆိတ် ကျိန်ဆဲလိုက်မိသည်။ ကျောက်စိမ်းသေတ္တာတစ်လုံးက သူ့ထက် မည်သို့ မြန်ဆန်နေသနည်း။ ဤကမ္ဘာကြီးမှာ တရားမျှတမှု ရှိသေးပါသလော။

လုမင် အံကြိတ်ပြီး ကျောက်စိမ်းသေတ္တာနောက်သို့ လိုက်သွားသည်။ တစ်ဖက်တွင်လည်း ကျောက်စိမ်းအဆောင်က ဆုံးဖြတ်ထားပြီးပြီ။

အဆုံးတွင်၊ ‌လှပသော မိန်းကလေးတစ်ယောက်က ကျောက်စိမ်းအဆောင်ကို ရရှိခဲ့သည်။

ရှစ်ထျန်းနှင့် အခြားသူများ၏ မျက်လုံးများက အရောင်လက်သော်လည်း ကျောက်စိမ်းအဆောင်အတွက် ဆက်လက် မတိုက်ခိုက်တော့ပေ။ သူတို့က ထိုမိန်းကလေးကို သတိထားနေကြကြောင်း ထင်ရှားသည်။

ထိုအချိန်တွင် လူတိုင်း၏ အာရုံက နောက်ဆုံး ကျောက်စိမ်းသေတ္တာပေါ်သို့ စုပြုံလာခဲ့သည်။

နောက်တော့ အားလုံး လှုပ်ရှားကြ၏။ သူတို့က လျင်မြန်စွာဖြင့် ကျောက်စိမ်းသေတ္တာဆီသို့ ပြေးသွားသော်လည်း ကျောက်စိမ်းသေတ္တာမှာ မယုံနိုင်လောက်အောင် လျင်မြန်သည်။ ယင်းက လေထဲမှာ တဖျပ်ဖျပ်ခတ်ပြီး လူတိုင်း၏ တိုက်ခိုက်မှုကို ရှောင်တိမ်းခဲ့ပေသည်။

တစ်စုံတစ်ယောက်က သူတော်စင်ရတနာကို အသုံးပြုသည့်တိုင် အသုံးမဝင်ခဲ့ပေ။

"ငါတို့ ငါတို့ရဲ့ တာအိုနယ်မြေတွေကို ကျောက်အခန်းတစ်ခုလုံး ဖြန့်ကျက်ပြီး ဖုံးအုပ်ထားဖို့ အကြံပေးချင်တယ်။ ဒီလိုဆိုရင် ကျောက်စိမ်းသေတ္တာ ပြေးစရာ မရှိတော့ဘူး"

တစ်ယောက်က အကြံပေးလိုက်သည်။

"ကောင်းပြီ၊ ဒါက ကန့်ကွက်စရာ မရှိပါဘူး။ ကျောက်စိမ်းသေတ္တာကိုရပြီးမှ ဆက်ပြီး တိုက်ခိုက်ကြတာပေါ့"

တခြားတစ်ယောက်ကလည်း ပြော၏။

မည်သူမျှ မကန့်ကွက်တော့ဘဲ အရပ်ရပ်သို့ လူစုခွဲကာ ပျံသွားခဲ့ကြသည်။

စုစုပေါင်း ဆယ့်သုံးယောက်ရှိသည်။

မူလက လုမင်အပါအဝင် ထိပ်တန်း အင်အားစုဆယ့်သုံးခုမှ လူငယ်ပါရမီရှင်များနှင့် ဆယ့်လေးယောက် ရှိသည်။ သို့သော်လည်း အစိမ်းရောင်ဝတ်လူငယ်ကို လုမင် သတ်လိုက်သောကြောင့် ယခုအခါ လူ ဆယ့်သုံးဦးသာ ကျန်ရှိတော့သည်။

"ဝမ်"

လူဆယ့်သုံးယောက်က ကျောက်အခန်းအနှံ့သို့ နေရာယူကာ တာအိုနယ်မြေများကို စတင် ဖြန့်ကျက်လိုက်ကြသည်။

တဖြည်းဖြည်းနှင့် ကျောက်စိမ်းသေတ္တာလေးအတွက် နေရာ သေးငယ်သည်ထက် သေးငယ်လာ၏။ အဆုံးမှာတော့ တာအိုနယ်မြေထဲကို ကျရောက်သွားတော့သည်။

"ဟားဟားဟား၊ အဲဒါက ငါ့ဟာပဲ"

လူငယ်တစ်ယောက်က ဝမ်းသာအားရ ထအော်လိုက်သည်။ ရှစ်ထျန်း ဖြစ်၏။ နောက်ဆုံးတွင် ကျောက်စိမ်းသေတ္တာကို သူ၏ တာအိုနယ်မြေက ဖုံးအုပ်ခဲ့ပေသည်။

"ဒီကိုလာစမ်း"

ရှစ်ထျန်းက အော်ဟစ်ပြီး သူ၏တာအိုနယ်မြေကို လျင်မြန်စွာ ချုံ့လိုက်သည်။

ကျောက်စိမ်းသေတ္တာက တောက်ပလာပြီး ထွက်ပြေးရန် ကြိုးစားသေး၏။ ထို့နောက်တော့ အသံတစ်ချက်နှင့်အတူ ကျောက်စိမ်းသေတ္တာ ပေါက်ကွဲသွားပြီး အတွင်းမှ အရာဝတ္ထုတစ်ခု ထွက်ပေါ်လာတော့သည်။

ဆေးတစ်လုံး၊ ယင်းက တကယ်ကို ဆေးတစ်လုံး ဖြစ်သည်။ ဆေးလုံးပေါ်တွင် မဟာတာအိုအငွေ့အသက်တို့ ဝန်းရံထားပြီး ထူးဆန်းသော သဘာဝ ဖြစ်စဉ်တစ်ခုလည်း ရှိနေပေသည်။

ဆေးလုံးကိုမြင်တော့ အားလုံး၏ မျက်လုံးများ ပြူးကျယ်သွားကြသည်။

"သူတော်စင်ချိုးဖြတ်ခြင်း ဆေးလုံး၊ အဲဒါ သူတော်စင်ချိုးဖြတ်ခြင်းဆေးလုံးပဲ။ ဒီဆေးလုံးက ငါ့အတွက်ပဲ"

မော့ကျယ်က ပထမဆုံး အော်လိုက်သည်။

အခြားသူများ၏ မျက်လုံးများလည်း အရောင်တဖိတ်ဖိတ်တောက်ပြီး လိုချင်တပ်မက်မှု အရိပ်အယောင်များ ပေါ်လာတော့သည်။

ယင်းက တကယ်ကို သူတော်စင်ချိုးဖြတ်ခြင်း ဆေးလုံး ဖြစ်သည်။

လုမင်၏ နှလုံးသားမှာပင် စိတ်လှုပ်ရှားမှုဖြင့် ပူလောင်လာခဲ့သည်။

သူတော်စင်ချိုးဖြတ်ခြင်းဆေးလုံးက လူတစ်ယောက်ကို သိုင်းသူတော်စင်နယ်ပယ်သို့ ဖြတ်ကျော်ရန် ကူညီပေးနိုင်သည်။

သိုင်းအုပ်ချုပ်သူနယ်ပယ်မှ သိုင်းသူတော်စင်နယ်ပယ်သို့ ဖြတ်ကျော်ရန်မှာ အလွန်ခက်ခဲသည်။

ယွမ်လုတွင် သိုင်းအုပ်ချုပ်သူနယ်ပယ် အထွတ်အထိပ်မှ ကျွမ်းကျင်သူများစွာ ရှိသည်။ ဥပမာအားဖြင့်၊ စန်းပြည်နယ်ရှိ ထိပ်တန်းအင်အားစု ဆယ့်သုံးခုမှာပင် သိုင်းအုပ်ချုပ်သူနယ်ပယ် အထွတ်အထိပ်မှ ကျွမ်းကျင်သူများစွာ ရှိ၏။ သို့သော်လည်း သိုင်းသူတော်စင်များက အလွန်နည်းပါးသည်။

သိုင်းသူတော်စင်များကိုသာ ယွမ်လု၏ စစ်မှန်သော ကျွမ်းကျင်သူအဖြစ် သတ်မှတ်နိုင်ပေသည်။

သို့သော်လည်း ရှစ်ထျန်းနှင့် ဟဲယွိကဲ့သို့ ထိပ်တန်း ပါရမီရှင်များပင်လျှင် သိုင်းသူတော်စင်နယ်ပယ်သို့ ဖြတ်ကျော်နိုင်ပါမည်ဟု အပြည့်အဝ ယုံကြည်ချက်မရှိပေ။

သမိုင်းတွင်၊ ငယ်ငယ်ရွယ်ရွယ်နှင့် သိုင်းအုပ်ချုပ်သူနယ်ပယ် အထွတ်အထိပ်သို့ ရောက်ရှိခဲ့သော ပါရမီရှင်များစွာ ရှိခဲ့သော်လည်း သိုင်းသူတော်စင်နယ်ပယ်ကို လူတိုင်း မဖြတ်ကျော်နိုင်ခဲ့ပါ။ သူတို့အများစုက သိုင်းအုပ်ချုပ်သူနယ်ပယ် အထွတ်အထိပ်တွင် တစ်သက်လုံး ပိတ်မိနေခဲ့ကာ သက်တမ်းကုန်ဆုံးပြီး သေဆုံးခဲ့ရသည်။

သူတော်စင်ချိုးဖြတ်ခြင်းဆေးက သိုင်းအုပ်ချုပ်သူနယ်ပယ်သို့ ဖြတ်ကျော်ရန် အခွင့်အလမ်းကို သုံးဆယ်ရာခိုင်နှုန်း တိုးစေနိုင်ပေသည်။

ယင်းက သုံးဆယ်ရာခိုင်နှုန်းသာ ဖြစ်သော်လည်း ကြောက်စရာကောင်းသော ဖြစ်နိုင်ခြေ ဖြစ်သည်။ သိုင်းအုပ်ချုပ်သူနယ်ပယ် အထွတ်အထိပ်မှ မရေမတွက်နိုင်သော ကျွမ်းကျင်သူများကို ၎င်းအတွက် တိုက်ပွဲဝင်စေနိုင်ပေသည်။

အထူးသဖြင့် သူတို့ကဲ့သို့ ထိပ်တန်း ပါရမီရှင်များအတွက် ဖြစ်သည်။ ဖြစ်နိုင်ခြေ သုံးဆယ်ရာခိုင်နှုန်း တိုးလာပါက အနာဂတ်တွင် သိုင်းသူတော်စင်နယ်ပယ်သို့ ဖြတ်ကျော်ရန် ယုံကြည်မှု ပိုမိုမြင့်မားလာလိမ့်မည်။

"စဉ်းတောင်မစဉ်းစားနဲ့၊ သူတော်စင်ချိုးဖြတ်ခြင်းဆေးက ငါ့နယ်မြေမှာရှိတာ။ အဲဒါက ငါနဲ့ ကံကြမ္မာပါပြီးသား"

ရှစ်ထျန်းက အော်ဟစ်ပြီး သူ၏ တာအိုနယ်မြေကို ခပ်မြန်မြန်ကျုံ့လိုက်သည်။ သူက ဆေးလုံးကို မြန်မြန်သိမ်းဆည်းနိုင်ရန် ကြိုးစားသည်။

သို့သော်လည်း သူတော်စင်ချိုးဖြတ်ဆေးတွင် အသိစိတ် ရှိနေပုံရ၏။ ယင်းက ရှစ်ထျန်း၏ တာအိုနယ်မြေကို ဖြတ်ကျော်ပြီး ထိန်းချုပ်မှုမှ လွတ်မြောက်သွားတော့သည်။

"အဲဒါငါ့ဟာ"

အခြားသူများလည်း ပြေးတက်လာပြီး သူတော်စင်ချိုးဖြတ်ခြင်း ဆေးလုံးကို အုပ်လိုက်ကြသည်။

အမျိုးမျိုးသော အလင်းတန်းများက လက်ဝါးကြီးများအဖြစ် စုစည်းပြီး သူတော်စင်ချိုးဖြတ်ဆေးကို ဖမ်းဆုပ်လိုက်၏။

သို့သော်လည်း သူတော်စင်ချိုးဖြတ်‌ဆေးလုံးက အလင်းတန်းများကို ထုတ်လွှတ်လာသည်။ ၎င်းက အားလုံး၏ ဝိုင်းရံမှုကြားမှ ဖြတ်ကျော်ကာ ပျံပြေးသွားတော့သည်။

"ဝှစ်"

လုမင်က လေဓာတ်စွမ်းအင်တာအိုသိုင်းကို အသုံးပြုပြီး အနက်ရောင် တောင်ပံများကိုပါ ခတ်လိုက်သည်။ သူက လျှပ်စီးကဲ့သို့ ပျံသန်းသွား၏။ ချက်ချင်းဆိုသလို သူ့ပုံရိပ်က သူတော်စင်ချိုးဖြတ်ခြင်း ဆေးလုံးနှင့် မီတာအနည်းငယ်အကွာတွင် ပေါ်လာတော့သည်။

သူက ကစဉ့်ကလျားတာအိုနယ်မြေဖြင့် လက်ကြီးတစ်ဖက် သိပ်သည်းပြီး ဆေးလုံးကို ဖမ်းဆုပ်လိုက်သည်။