အခန်း ၁၄၇၆

အပိုင်း ( 1476 ) ကြားဖြတ် တိုက်ခိုက်ကြခြင်း။

လူရိပ်ခြောက်ခုက ကြောက်မက်ဖွယ်ကောင်းသော အရှိန်အဝါများကိုထုတ်ဖော်ရင်း လုမင်၏ လွတ်မြောက်ရာလမ်းကြောင်းတိုင်းကို ပိတ်ဆိုလိုက်ကြသည်။

"သတ္တမအဆင့် သိုင်းအုပ်ချုပ်သူ ငါးဦးနဲ့ ဆဋ္ဌမအဆင့် သိုင်းအုပ်ချုပ်သူ တစ်ဦး"

လုမင်၏ မျက်လုံးများက ကျဉ်းမြောင်းသွားသည်။

သူတို့ထဲတွင် တစ်ယောက်က ဆံပင်ရှည်နှင့် သူ့နောက်ကျောတွင် နတ်ဆိုးဓားတစ်လက် လွယ်ပိုးထားသော လူငယ်တစ်ယောက် ဖြစ်သည်။ သူ့ထံမှ နတ်ဆိုးနတ်ဘုရားငယ်တစ်ပါးကဲ့သို့ ပြင်းထန်သော ရောင်ဝါများ ထွက်ပေါ်နေ၏။

သူက ဆဋ္ဌမအဆင့် သိုင်းအုပ်ချုပ်သူ ဖြစ်သည်။

ကျန်ငါးယောက်ကတော့ အနက်ရောင် နတ်ဆိုးအလင်းများ ဖုံးလွှမ်းထားသောကြောင့် သူတို့၏အသွင်အပြင်ကို ရှင်းရှင်းလင်းလင်း မမြင်ရပေ။ သို့ရာတွင် သူတို့ထံမှ ကြောက်မက်ဖွယ်ကောင်းသော အရှိန်အဝါများ ထွက်ပေါ်နေသည်။

ဤလူငါးဦးစလုံးက သတ္တမအဆင့် သိုင်းအုပ်ချုပ်သူများ ဖြစ်၏။

"ကောင်းကင်နတ်ဆိုးဂိုဏ်းက ငါ့ကို တကယ် အထင်ကြီးနေတာပဲ"

လုမင်က စူးရှသော မျက်လုံးများဖြင့် လူငယ်လေးကို စိုက်ကြည့်လိုက်သည်။

ယခုလေးတင် ဓားချက်ထုတ်ဖော်လိုက်သူက ထိုလူငယ် ဖြစ်၏။

သူက ကြောက်စရာကောင်းသော ပါရမီရှင်တစ်ဦး ဖြစ်သည်။

"ကောင်းကင်နတ်ဆိုးဂိုဏ်းရဲ့ ပါရမီရှင်တစ်ဦးကို ဒဏ်ရာရစေတဲ့အပြင် ငါတို့ရဲ့ သူတော်စင်ငယ်ကို စော်ကားပြီး ဒီအတိုင်း လွယ်လွယ်နဲ့ မင်းထွက်သွားနိုင်မယ် ထင်တာလား။ မင်း တကယ်ကို နုံအလွန်းတာပဲ"

လူငယ်က အေးစက်စက် သတ်ဖြတ်ချင်စိတ်ဖြင့် ပြောလိုက်သည်။

"အဟက်၊ ကောင်းကင်နတ်ဆိုးဂိုဏ်းက စန်းပြည်နယ်ရဲ့ ထိပ်တန်းအင်အားစုကြီး ဆယ့်သုံးခုထဲက တစ်ခုပါပဲ။ ဒါပေမဲ့ မင်းတို့ရဲ့စရိုက်က ဒီလိုလား။ အငယ်တွေ ရှုံးသွားတာနဲ့ ငါ့ကိုဖမ်းဖို့ ကျွမ်းကျင်သူတွေကို စေလွှတ်လိုက်တယ်ပေါ့"

လုမင် လှောင်ပြောင်လိုက်သည်။

"မင်းသေသွားပြီဆိုရင် ဒီအကြောင်းကို ဘယ်သူသိမှာလဲ"

လူငယ်၏ မျက်နှာက အေးစက်ပြီး တည်ငြိမ်နေဆဲပင်။

သူက လုမင်ဆီသို့ ခြေတစ်လှမ်းတိုးလိုက်သည်။ သူလှမ်းလိုက်သည့်ခြေလှမ်းတိုင်းက လုမင်၏ခန္ဓာကိုယ်ကို ဖိစီးသွားစေသည့် ပြင်းထန်သောဖိအားတစ်ခု ဖြစ်လာခဲ့၏။

လုမင်၏ မျက်လုံးများက အနည်းငယ် ကျဉ်းမြောင်းသွားသည်။ လွတ်မြောက်ရန် နည်းလမ်းကိုတွေးရင်း သူ့စိတ်ထဲတွင် လျင်မြန်စွာ အလုပ်လုပ်လိုက်သည်။

"လုမင်၊ ငါ မင်းကို အခွင့်အရေးပေးမယ်။ မင်းရဲ့ ကျင့်ကြံခြင်းနည်းလမ်းတွေကို ပေးပါ။ ဒါဆို မင်းရဲ့အသက်ကို ချမ်းသာပေးလိုက်မယ်"

လူငယ်၏ မျက်လုံးများက လောဘအရိပ်အမြွက်တို့ ပေါ်လာခဲ့သည်။

ကောင်းကင်နတ်ဆိုးဂိုဏ်းတွင် လုမင်နှင့် ကျင်းယွိကြားမှ တိုက်ပွဲကို သူ တွေ့ခဲ့ရ၏။

လုမင်က ကျင်းယွိ၏ ပဉ္စမအဆင့် တာအိုနယ်မြေကို ဒုတိယအဆင့် တာအိုနယ်မြေဖြင့် အနိုင်ယူခဲ့သည်။ ဤမျှကြောက်စရာကောင်းသော တာအိုနယ်မြေကိုရရှိရန် မည်သည့်နည်းလမ်းဖြင့် လုမင် လေ့ကျင့်ခဲ့ကြောင်း သူ သိလိုပေသည်။

"အိုး၊ မင်းက ငါ့ရဲ့ကျင့်စဉ်ကို လိုချင်တာလား။ ရပါတယ်၊ ဒါပေမဲ့ ငါ့ရဲ့မေးခွန်းတစ်ခုကို အရင်ဖြေရမယ်။ မင်းကို ဘယ်သူ လွှတ်လိုက်တာလဲ"

လုမင် မေးလိုက်သည်။

လူငယ်၏ မျက်လုံးများက အရောင်တစ်ချက်လက်သွားသည်။ ထို့နောက် သူက လှောင်ပြောင်ပြောဆိုလိုက်၏။

"မင်းကို သတ်ချင်တာက ငါပဲ။ ဒါဆိုရပြီလား"

"သတ်"

ထိုအချိန်တွင် လုမင်က ရုတ်တရက် ဟိန်းဟောက်ဟိန်းပြီး လူငယ်ကို တိုက်ခိုက်လိုက်သည်။ သူ၏ အနက်ရောင် အတောင်ပံများက လေပြင်းတိုက်ခတ်သကဲ့သို့ လူငယ်ထံ တိုးဝင်သွား၏။ သူ၏ အတောင်နှစ်ချောင်းက ကောင်းကင်ဓားနှစ်လက်ကဲ့သို့ လူငယ်ကို ခုတ်ပိုင်းလိုက်တော့သည်။

"မင်း သေချင်နေတာပဲ"

လူငယ်က အေးစက်စက် ပြောလိုက်သည်။ သူက နောက်ကျောမှ ဓားကိုပင်မယူဘဲ သူ့လက်ဝါးကို ဓားအဖြစ်သုံးကာ တစ်ချက်ခုတ်လိုက်၏။

ကောင်းကင်နတ်ဆိုးဓားအလင်းတစ်ခု ထွက်ပေါ်လာတော့သည်။

"ထန်"

နတ်ဆိုးဓားက အနက်ရောင်တောင်ပံများကို ခုတ်ထစ်ကာ ပြင်းထန်စွာ တုန်ခါသွားစေသည်။ လုမင်၏ ခန္ဓာကိုယ်လည်း အမြောက်ဆံကဲ့သို့ လွင့်သွား၏။ သူ၏သွေးနှင့် စွမ်းအင်များက ကမောက်ကမဖြစ်ကာ နှုတ်ခမ်းထောင့်မှ သွေးများ စီးကျလာတော့သည်။

ဤလူငယ်က ကြောက်စရာကောင်းသော တိုက်ခိုက်နိုင်စွမ်းရှိသည့် ပါရမီရှင်ဖြစ်ကြောင်း ထင်ရှားသည်။

သူ၏ ကျင့်ကြံခြင်းအခြေခံက ဆဋ္ဌမအဆင့် သိုင်းအုပ်ချုပ်သူနယ်ပယ်တွင်သာ ရှိသော်လည်း၊ သူ၏ အစွမ်းသတ္တိမှာ သတ္တမအဆင့် သို့မဟုတ် အဋ္ဌမအဆင့် သိုင်းအုပ်ချုပ်သူကိုပင် အလွယ်တကူ သတ်နိုင်သည်။

လုမင်က သူ၏ပြိုင်ဘက်မဟုတ်ပေ။

"အားလုံး မတိုက်ခိုက်ကြနဲ့။ ဧရိယာကိုသာ ပိတ်ထားချေ၊ ငါသူ့ကိုသတ်မယ်"

လူငယ်က အေးစက်စက် ပြောပြီး ရှေ့သို့လှမ်းလိုက်သည်။

"ဝုန်း"

လူငယ်က လက်ဝါးတစ်ချက်ရိုက်ထုတ်ပြီး ကြောက်မက်ဖွယ်ကောင်းသော နတ်ဆိုးဓားအလင်းကို ထုတ်ဖော်လိုက်၏။

လုမင်၏ မျက်ခုံးနှစ်ခုကြားမှ အလင်းရောင်တစ်ချက်လက်ပြီး ဒိုင်းတစ်ခုပေါ်လာသည်။ ဒိုင်းက အလွန်ကြီးမားလာပြီး သူ့ရှေ့တွင် ပိတ်ဆို့သွားတော့သည်။

"ဒုန်း"

နတ်ဆိုးဓားက ဒိုင်းကို ခုတ်ထစ်ပြီး ပြင်းထန်စွာ တုန်ခါသွားစေခဲ့သည်။ ဒိုင်းနှင့် လုမင်တို့ နှစ်ဦးစလုံး လွင့်စဉ်သွား၏။

"သူတော်စင်ရတနာ၊ နောက်ထပ် သူတော်စင်ရတနာပဲ။ မင်းမှာ ရတနာတွေ အများကြီးရှိနေတယ်။ ကံမကောင်းချင်တော့ မင်းက အမှိုက်တစ်စပဲလေ၊ မင်းလိုကောင်မှာ ရတနာကောင်းတွေ ရှိနေတာက ဘယ်လောက်တောင် ဖြုန်းတီးရာကျလိုက်သလဲ။ နောင်ကို မင်းအတွက် ငါပဲ သိမ်းထားလိုက်ပါမယ်။ မှတ်ထားပါ၊ မင်းကိုသတ်ခဲ့တဲ့သူဟာ ကောင်းကင်နတ်ဆိုးဂိုဏ်းက မော့ဟဲလို့ခေါ်တယ်"

လူငယ်၏ မျက်လုံးမှ လောဘအရိပ်အယောင်တို့ ဖြစ်ပေါ်လာခဲ့သည်။ သူ့အရှိန်အဝါများကလည်း ပိုမို အားကောင်းလာသည်။ သူက သူ့လက်ကိုဝှေ့ယမ်းပြီး နောက်ကျောမှဓားကို ထုတ်ယူလိုက်၏။ ကြောက်မက်ဖွယ်ကောင်းသော ဓားစိတ်ဆန္ဒတို့ ထွက်ပေါ်လာတော့သည်။

"တိုက်ခိုက်"

လုမင်က ရုတ်တရက် ဟိန်းဟောက်လိုက်သည်။ သူက အတောင်များကိုခတ်ပြီး အနက်ရောင် လျှပ်စီးကြောင်းကဲ့သို့ မော့ဟဲထံ ပျံသန်းသွား၏။

မော့ဟဲ၏ မျက်လုံးများက အေးစက်သွားသည်။ ဤအခိုက်တွင် ကြည်လင်သော ပူဖောင်းတစ်ခု ရုတ်တရက် ပေါ်လာပြီး သူ့ကို ဖုံးအုပ်လိုက်၏။ ဓားချက်ထုတ်ဖော်ခါနီးမှ သူ့ခန္ဓာကိုယ်မှာ အေးခဲသွားတော့သည်။

"နတ်ဘုရားတံခါးရဲ့ တံဆိပ်ကိုးခု"

လုမင် ခပ်တိုးတိုးဟိန်းဟောက်လိုက်သည်။ တံဆိပ်တော်တံခါးငါးခုက မော့ဟဲ၏ ပတ်ဝန်းကျင်တွင် ပေါ်လာပြီး သူ့ကို ဖိနှိပ်လိုက်၏။

"ချိုးဖြတ်စမ်း"

မော့ဟဲ ဟိန်းဟောက်လိုက်သည်။ သူ့ထံမှ နတ်ဆိုးအငွေ့အသက်များလည်း ထွက်ပေါ်လာသည်။ နတ်ဆိုးဓားမှ ကြောက်မက်ဖွယ်ကောင်းသော ဓားအလင်းတစ်ခု ထွက်ပေါ်လာ၏။ ကြည်လင်သော ပူဖောင်းက ပြင်းထန်စွာ တုန်ခါသွားသည်။ ‌ယင်းက မပြိုကွဲမီ အသက်တစ်ရှိုက်စာသာ ကြာမြင့်၏။

ဖောက်ထွင်းမြင်ရသော ပူဖောင်းက ကွဲအက်သွားပြီး တံဆိပ်တော်တံခါးငါးခုကိုပါ ဖိအားပေးလာတော့သည်။

"ဖြတ်တောက်လော့"

မော့ဟဲက ဟိန်းဟောက်ပြီး ဓားချက်ထုတ်ဖော်လိုက်သည်။ တံဆိပ်တော်တံခါးငါးခုလည်း လေထဲတွင် တစ်ခုပြီးတစ်ခုပြိုကျသွားတော့သည်။

သို့သော်၊ ထိုအချိန်တွင် လုမင်က မော့ဟဲနှင့် သိပ်မဝေးတော့ပေ။

နတ်ဘုရားဓားကျင့်စဉ်။

လုမင်၏ မျက်လုံးအစုံမှ နတ်ဓားနှစ်လက်ကဲ့သို့ အနက်ရောင်အလင်းတန်းနှစ်ခု ထွက်ပေါ်လာခဲ့သည်။ ယင်းက မော့ဟဲ၏ ခန္ဓာကိုယ်ကို ထိုးဖောက်ကာ နတ်ဘုရားဝိညာဉ်ထံ တိုက်ရိုက်တိုးဝင်သွားတော့သည်။

မော့ဟဲ၏ နတ်ဘုရားဝိညာဉ်က တုန်ခါသွားပြီး သူ၏အရှိန်အဝါများပင် အနည်းငယ် မတည်မငြိမ်ဖြစ်လာခဲ့ရသည်။

"ကစဉ့်ကလျားမှောက်လှန်ကောင်းကင်တံဆိပ်တော်"

လုမင် ဟိန်းဟောက်လိုက်သည်။ ကောင်းကင်တွင် ရှေးဦးမြင့်မြတ်သောတောင်ကဲ့သို့ ကစဉ့်ကလျားတံဆိပ်တော်ကြီးတစ်ခု ဖြစ်ပေါ်လာ၏။ ယင်းက ကြောက်ခမန်းလိလိ အင်အားမျိုးဖြင့် မော့ဟဲကို ဖိနှိပ်လာတော့သည်။

ထိုစွမ်းအားက ကြီးမားလွန်းသဖြင့် မော့ဟဲလည်း လျစ်လျူမရှုဝံ့တော့ဘဲ မျက်လုံးများကျဉ်းမြောင်းသွားခဲ့သည်။

"ချိုးဖြတ်လော့"

မော့ဟဲ ဟိန်းဟောက်လိုက်သည်။ သူ့တစ်ကိုယ်လုံးက ကောင်းကင်သို့ပျံတက်သွားသော နတ်ဆိုးဓားအဖြစ်သို့ ပြောင်းလဲသွားပုံရ၏။

"ဝုန်း"

ကစဉ့်ကလျားမှောက်လှန်ကောင်းကင်တံဆိပ်တော်က နတ်ဆိုးဓားနှင့် ပြင်းထန်စွာ တိုက်မိပြီး ကြောက်မက်ဖွယ်ကောင်းသောလှိုင်းများ ဖြစ်ပေါ်လာစေခဲ့သည်။ ထိုအခိုက်တွင် အချိန်သည်ပင် အေးခဲသွားပုံရသည်။

"ဒီကိုယ်တော်ကိုကြည့်ထား"

တန်တန်က အော်ဟစ်ပြီး ပြေးထွက်လာခဲ့သည်။ သူက ကစဉ့်ကလျားမှောက်လှန် ကောင်းကင်တံဆိပ်တော်အထက်သို့ ပျံသန်းသွား၏။ သူ့ခန္ဓာက လျင်မြန်စွာကြီးထွားလာပြီး ခန္ဓာကိုယ်ပေါ်တွင်လည်း ထူထပ်သော ကမ္ပည်းစာများ ပေါ်လာတော့သည်။ သူက ကစဉ့်ကလျားမှောက်လှန် ကောင်းကင်တံဆိပ်တော်အပေါ်တွင် လမ်းလျှောက်နေသော ဧရာမလိပ်ကြီးအဖြစ်သို့ ပြောင်းလဲသွားပုံရသည်။

"ဝုန်း"

ကစဉ့်ကလျားမှောက်လှန် ကောင်းကင်တံဆိပ်တော်၏ အလေးချိန်က ချက်ချင်း တိုးလာသည်။ မော့ဟဲ ထုတ်ဖော်လိုက်သော ဓားအလင်းက ပြိုကျသွား၏။ ကစဉ့်ကလျားမှောက်လှန် ကောင်းကင်တံဆိပ်တော် မော့ဟဲကို ဆက်လက်ဖိနှိပ်လာတော့သည်။

မော့ဟဲလည်း ဟိန်းဟောက်ပြီး ကစဉ့်ကလျားမှောက်လှန် ကောင်းကင်တံဆိပ်တော်ကို လက်ဝါးရိုက်ချက်များ ထုတ်ဖော်လိုက်သည်။

"ဝုန်း"

ကစဉ့်ကလျားမှောက်လှန် ကောင်းကင်တံဆိပ်တော်ကို ထိုးဖောက်သွားသော်လည်း‌၊ မော့ဟဲမှာ ဤစွမ်းအားကြောင့် ဥက္ကာခဲကြွေသကဲ့သို့ ပြုတ်ကျသွားတော့သည်။

"တွိ..."

ထိုအချိန်တွင် ပူဖောင်းလေးက အချိန်နှင့်ဟင်းလင်းပြင် လျှောက်လမ်းတစ်ခုကို ဖန်တီးလိုက်သည်။ လုမင်၊ တန်တန်နှင့် ပူဖောင်းလေးလည်း ဟင်းလင်းပြင်လျှောက်လမ်းအတွင်းသို့ ပြေးဝင်သွားပြီး မိုင်ထောင်ပေါင်းများစွာအကွာတွင် ပြန်ပေါ်လာ၏။ ထို့နောက်တော့ လုမင်လည်း အနက်ရောင်တောင်ပံများကိုခတ်ပြီး ရှေ့သို့ လျင်မြန်စွာ ပျံသန်းသွားတော့သည်။

"ဝှစ်"

မော့ဟဲက ကောင်းကင်သို့ တစ်ဖန်ထိုးတက်လာခဲ့သည်။ ဤအခိုက်တွင် သူ့မျက်လုံးက ဒေါသဖြင့် ရဲရဲ‌နီနေတော့၏။ သူက‌ ဒေါသတကြီး ဟိန်းဟောက်လိုက်သည်။

"သူ့နောက်ကို လိုက်ကြ"

"ဝှစ်၊ ဝှစ်..."

မော့ဟဲနှင့် အခြား ကျွမ်းကျင်သူငါးဦးလည်း နတ်ဆိုးအလင်းခြောက်ခုအဖြစ် ပြောင်းလဲကာ လုမင်၏နောက်သို့ လိုက်သွားကြတော့သည်။

လုမင်က ပျံသန်းရင်း ကျောက်ကြမ်းများကို ဝါးမျိုကာ ယွမ်ချီစွမ်းအင် ပြန်လည်ဖြည့်တင်းလိုက်သည်။ တစ်ချိန်တည်းမှာပင် သူ့အမြန်နှုန်းကို အဆုံးစွန်အထိ ထုတ်ဖော်လိုက်၏။

ယခုလေးတင် သူ၏ တိုက်ခိုက်မှုက မော့ဟဲအတွက် ဘာမျှမဖြစ်စေမှန်း သူသိသည်။

မော့ဟဲ၏ တိုက်ခိုက်နိုင်စွမ်းက သန်မာလွန်းလှသည်။ အစောပိုင်းက မော့ဟဲမှာ လုမင်ကိုလျှော့တွက်ထားခဲ့သည်။ လုမင်က ထိုအခွင့်အရေးကိုဆုပ်ကိုင်ပြီး အလစ်အငိုက်ဖမ်း တိုက်ခိုက်ခဲ့ခြင်း ဖြစ်၏။

သို့သော်လည်း ယင်းက မော့ဟဲကို မထိခိုက်စေလောက်ပေ။

နောက်ဆုံးတွင်၊ မော့ဟဲက တိုက်ခိုက်နိုင်စွမ်းမြင့်မားသည့် ပါရမီရှင်တစ်ဦး ဖြစ်သည်။ လုမင်၏ လက်ရှိ ကျင့်ကြံခြင်းအခြေခံအရ ပြိုင်ဘက်နှင့် ဝေးကွာနေသေးသည်။