အခန်း ၁၅၄၂

အပိုင်း ( 1542 ) ဓားတစ်ချက်ဖြင့် သေခြင်းရှင်ခြင်းကို ဆုံးဖြတ်မည်။

လော့ရှန်းက လုမင်ကို စိန်ခေါ်ချင်သလော။

လူတော်တော်များများလည်း အံ့အားသင့်သွားပြီးနောက် တိုက်ပွဲကို ပို၍ မျှော်လင့်သွားမိသည်။

ဤတစ်ကြိမ်တွင် လုမင်က အကြီးဆုံး ဖျက်မြင်းဖြစ်သည်မှာ သေချာလှပေသည်။ သူသည် စတုတ္ထအဆင့် သိုင်းအုပ်ချုပ်သူနယ်ပယ် ကျင့်ကြံသူတစ်ဦးသာဖြစ်သော်လည်း၊‌ မြေကမ္ဘာအဆင့်မြင့် ဝိညာဉ်ခန္ဓာနှင့် ထိပ်တန်း ပါရမီရှင်အချို့ကိုပင် သတ်ခဲ့သူ ဖြစ်သည်။ ထို့ပြင် ကောင်းကင်နတ်ဘုရားဂိုဏ်း၊ ကောင်းကင်အဆိပ်ဂိုဏ်းနှင့် အခြားဂိုဏ်းများကို စိန်ခေါ်ပြီး အရှုံးပေးသွားစေခဲ့သေးသည်။

သို့ရာတွင်၊ လော့ရှန်းကလည်း အားနည်းသူ မဟုတ်ပါ။

လော့ရှန်းကို သိကြသူတိုင်း သူဟာ အလွန်ကြောက်စရာကောင်းသော လူတစ်ဦးဖြစ်ကြောင်း သိကြသည်။ သူဟာ သူ၏ဓားဝိညာဉ်ကို လေ့ကျင့်ရန် အဓိပဓိနယ်ပယ် အထွတ်အထိပ်တွင် ဆယ့်ငါးနှစ်ကြာ ရပ်နားနိုင်ခဲ့သူ ဖြစ်ချေသည်။

ယခုအခါ သူက ပဉ္စမအဆင့် သိုင်းအုပ်ချုပ်သူနယ်ပယ်သို့ ရောက်ရှိနေပြီး ဆဋ္ဌမအဆင့် သိုင်းအုပ်ချုပ်သူနယ်ပယ်မှ ပါရမီရှင်များကိုပင် သတ်နိုင်နေပြီ။ သူ၏ ခွန်အားမှာလည်း နားမလည်နိုင်အောင် ဖြစ်သည်။

ထို့အပြင်၊ သူ၏ သေခြင်းရှင်ခြင်းဓားသိုင်းက အလွန် ကြောက်စရာကောင်း၏။ လော့ရှန်းနှင့် လုမင်သာ တိုက်ခိုက်ကြလျှင် မည်သို့ဖြစ်မည်နည်း။

လုမင်လည်း တိုက်ပွဲကွင်းပြင်သို့ ဆင်းသက်လာပြီး လော့ရှန်းနှင့် မျက်နှာချင်းဆိုင်တွင် ရပ်လိုက်သည်။

"လုမင်၊ ငါတို့ တစ်ကွက်တည်းနဲ့ ဖြေရှင်းကြရအောင်"

လော့ရှန်းက ပြောသည်။

"ကောင်းပြီ"

လုမင် ခေါင်းညိတ်လိုက်၏။

အမှန်အတိုင်း ပြောရလျှင်၊ လုမင်ဟာ လော့ရှန်းအပေါ်မှာ အထင်မြင်ကောင်း ရှိသည်။

လော့ရှန်းသည် စစ်မှန်သော ဓားသမား ဖြစ်ပြီး ပြတ်သားကာ ဖြောင့်မတ်၏။

ယခင် ကောင်းကင်နတ်ဘုရားဂိုဏ်း၊ ကောင်းကင်နတ်ဆိုးဂိုဏ်းနှင့် ကောင်းကင်အဆိပ်ဂိုဏ်းတို့က နဂါးနတ်ဘုရားတောင်ကြားကို အမဲလိုက်သောအခါမှာလည်း၊ လော့ရှန်းက မခံမရပ်နိုင်ဖြစ်ပြီး ကောင်းကင်နတ်ဘုရားဂိုဏ်း၏ ကျွမ်းကျင်သူများကို သတ်ပစ်ခဲ့သေးသည်။

သူဟာ ဓားတာအိုအတွက် မွေးဖွားလာခဲ့သူ ဖြစ်သည်။

"လုမင်၊ မင်းသတိထားပါ။ ငါ့ရဲ့ သေခြင်းရှင်ခြင်းဓားသိုင်းက တစ်ချက်တည်းနဲ့ သေဆုံးခြင်းနဲ့ရှင်သန်ခြင်းကို ဆုံးဖြတ်နိုင်တယ်။ အဲဒါက 'ငါ အသက်ရှင်ရင် မင်းသေမယ်' ဆိုတဲ့ အဓိပ္ပာယ်ပဲ။ ငါ့ရဲ့ ဒီတိုက်ခိုက်မှုကို တားဆီးနိုင်ရင် မင်းနိုင်ပြီ"

လော့ရှန်းက သတိပေးလိုက်သည်။

"မင်း အစွမ်းကုန် ထုတ်လိုက်ပါ။ မင်းရဲ့ဓားအောက်မှာ ငါသေရင် ငါ့ရဲ့စွမ်းရည် မလုံလောက်မှုကိုပဲ အပြစ်တင်ရမယ်"

လုမင် ပြောလိုက်၏။ သူ့မျက်လုံးထဲတွင် ပြင်းထန်သော တိုက်ခိုက်ချင်စိတ်များ ပေါ်လာတော့သည်။

စန်းပြည်နယ်တွင် နာမည်ကျော်ကြားသော သေခြင်းရှင်ခြင်းဓားသိုင်း၏ စွမ်းရည်ကို သူကြည့်ချင်မိသည်။

"ဝမ်"

ဓားကို ဓားအိမ်မှ မထုတ်ရသေးသော်လည်း ကြောက်မက်ဖွယ်ကောင်းအောင် ထက်ရှသည့် အရှိန်အဝါတစ်ခုက လော့ရှန်း၏ခန္ဓာကိုယ်မှ ကောင်းကင်သို့ ထိုးတက်သွားသည်။

ဤအခိုက်တွင် လော့ရှန်းက ပြိုင်စံရှားသော ဓားဓားအဖြစ်သို့ ပြောင်းလဲသွားပုံရ၏။

သူက လူသား မဟုတ်တော့ဘဲ ဓားဖြစ်သည်။ သို့ရာတွင်၊ သူ့လက်ထဲတွင်ရှိသောဓားက ဓားမဟုတ်ဘဲ လူသားတစ်ဦးကဲ့သို့ ဖြစ်လာပြီ။

ဤအခိုက်တွင် လော့ရှန်း၏ဓားက အသက်ဝိညာဉ်ရှိပြီး ရှင်သန်လာခဲ့ပုံ ရသည်။

‌လုမင်၏ မျက်လုံးများက အရောင်ပြောင်းသွားသည်။ လော့ရှန်းထံမှ ပြင်းထန်သော ဖိအားကို သူ ခံစားရ၏။

ပဉ္စမအဆင့် သိုင်းအုပ်ချုပ်သူနယ်ပယ် ကျင့်ကြံသူတစ်ဦးထံမှ ထိုသို့သောဖိအားမျိုးကို သူ ခံစားရခဲသည်။

လုမင်၏ ယွမ်ချီစွမ်းအင်က လျင်မြန်စွာ လည်ပတ်လာခဲ့သည်။ အုပ်ချုပ်သူ ဝိညာဥ်ရတနာ လှံရှည်က သူ့လက်ထဲတွင် ပေါ်လာပြီး ကစဉ့်ကလျားတာအိုနယ်မြေကလည်း ပျံ့နှံ့သွား၏။

တစ်ချိန်တည်းမှာပင်၊ လုမင်၏ ကြွက်သားများနှင့် အရိုးများက အနည်းငယ် တုန်ခါနေပြီး ကြောက်မက်ဖွယ်ကောင်းသော တိုက်ခိုက်မှုကို အချိန်မရွေး စတင်ရန် အသင့်ဖြစ်နေတော့သည်။

"ဝှစ်"

ထိုအချိန်တွင်၊ လော့ရှန်းက လှုပ်ရှားလိုက်သည်။

ဓားတစ်လက်က လေဟာပြင်ကိုဖြတ်ပြီး လုမင်ဆီသို့ ထိုးဖောက်သွား၏။

ဤဓားအလင်းအောက်တွင် ကမ္ဘာပေါ်ရှိ အရာအားလုံးသည် အရောင်ပျောက်ကွယ်သွားခဲ့ပုံ ရသည်။ ဤဓားအလင်းက ကမ္ဘာပေါ်တွင် တစ်ခုတည်းသော အလင်းရောင်ကဲ့သို့ပင်။

ကြောက်စရာကောင်းသည်၊ ထက်မြက်ပြီး တိကျ၏။

ဤအခိုက်အတန့်တွင်၊ လုမင်ဟာ သူ့ခန္ဓာကိုယ်ပေါ်တွင် ကြောက်မက်ဖွယ်ကောင်းသော ဓားအလင်းတစ်ခု ရှိနေပြီး လှုပ်ရှားရန် ခက်ခဲသကဲ့သို့ ခံစားလိုက်ရသည်။ ဤဓားအလင်း၏ရှေ့တွင် သူ ချက်ချင်း အသတ်ခံလိုက်ရတော့မည်ကဲ့သို့ပင်။

"ဂါး"

ထိုအချိန်တွင်၊ လုမင်၏ ခန္ဓာကိုယ်မှ မြေပြင်ကွဲအက်စေသော နဂါးဟိန်းဟောက်သံ ထွက်ပေါ်လာခဲ့သည်။ နဂါးဟိန်းဟောက်သံက အားမန်ပါပြီး အစစ်အမှန်နဂါးတစ်ကောင် ကောင်းကင်ကိုးဘုံသို့ တက်သွားသကဲ့သို့ ဖြစ်၏။

လုမင်၏ ယွမ်ချီစွမ်းအင်က အရူးအမူး လှည့်ပတ်လာခဲ့သည်။ သူက လှံနှင့်လူ တစ်သားတည်းဖြစ်သွားဟန်ဖြင့် ဓားအလင်းကို ထိုးချလိုက်၏။

သူက အစွန်းရောက်လှံ ဆယ့်သုံးချက်ကို အသုံးပြုထားပြီး ကစဉ့်ကလျားတာအိုနယ်မြေကလည်း လှံကို ဖုံးအုပ်ထားတော့သည်။

ဤအခိုက်တွင် ဓားနှင့်လှံသာ ကမ္ဘာပေါ်တွင် ကျန်ရှိတော့ပုံ ရသည်။

"ထန်"

လှံနှင့်ဓားက ကောင်းကင်ယံ၌ ဥက္ကာပျံနှစ်စင်းကဲ့သို့ တိုက်မိသွားသည်။

မျက်စိကျိမ်းစက်လောက်အောင် တောက်ပသော အလင်းရောင်တစ်ခု ထွက်ပေါ်လာ၏။ ဤအခိုက်တွင် နေတစ်စင်း ရုတ်တရက် ပေါက်ကွဲသွားသကဲ့သို့ ကောင်းကင်နှင့် မြေပြင်ကြားတွင် အဖြူရောင် အလင်းများသာ ပြည့်နှက်နေတော့သည်။

လူများစွာမှာ သူတို့၏ မျက်လုံးများမှ စူးစူးရှရှ နာကျင်မှုကို ခံစားခဲ့ရသည်။ ကျင့်ကြံခြင်းအခြေခံ အားနည်းသူများဆိုလျှင် မျက်လုံးများကိုပင် မှိတ်ထားရတော့သည်။

"ဘယ်လောက်တောင် ကြောက်ဖို့ကောင်းလိုက်လဲ။ ဘယ်သူ အနိုင်ရမှာလဲ"

သန်မာသော ကျင့်ကြံသူများလည်း သူတို့၏ မျက်လုံးများကို ပြူးကျယ်ကာ ယွမ်ချီစွမ်းအင်ဖြင့် သူတို့ရှေ့မှ မြင်ကွင်းကို စိုက်ကြည့်နေခဲ့ကြသည်။

ထိုအချိန်တွင်၊ တောက်ပသော အလင်းတန်းများ ပျောက်ကွယ်သွားသည်။ အလင်းရောင်များ ပျောက်ကွယ်သွားသောအခါ လူရိပ်တစ်ခု နောက်သို့လွင့်သွားကြောင်း မြင်လိုက်ရ၏။ ထိုလူရိပ်မှာ ရပ်တန့်မသွားမီ ခြေလှမ်းအနည်းငယ် နောက်ပြန်ဆုတ်သွားခဲ့ရသည်။

လော့ရှန်း၊ ဆုတ်ခွာသွားရသူမှာ လော့ရှန်း ဖြစ်သည်။

ဤအခိုက်တွင် လော့ရှန်း၏မျက်နှာက အလွန်ဖြူဖျော့နေသည်။ ဓားကိုင်ထားသော သူ့လက်မှာလည်း အနည်းငယ် တုန်ယင်နေ၏။

လုမင်ကမူ မလှုပ်မယှက် ရပ်နေဆဲပင်။ သူ့ခန္ဓာကိုယ်ပေါ်မှာတော့ နဂါးအကြေးခွံများ ရှိနေခဲ့သည်။

"ကြောက်စရာကောင်းလိုက်တဲ့ ဓားချက်"

လုမင် အသက်ပြင်းပြင်းရှူလိုက်မိသည်။ သူ့မျက်လုံးများမှာပင် အံ့အားသင့်မှု အရိပ်အယောင်တစ်ခု ရှိနေသေးသည်။

ယခုလေးတင် ထိပ်တိုက်ရင်ဆိုင်ခဲ့ချိန်မှာ၊ လော့ရှန်း၏ဓားအလင်းက လုမင်၏လှံရှည်ကို ဖုံးအုပ်ထားသော ကစဉ့်ကလျားတာအိုနယ်မြေကို ဖောက်ဝင်သွားခဲ့သည်။ ကြောက်စရာကောင်းသော ဓားအလင်းက လှံရှည်အတိုင်း လိုက်လာပြီး သူ့ခန္ဓာကိုယ်ကို ဆက်လက် ဖောက်ဝင်သွား၏။

ဓားအလင်းကို တားဆီးရန်အတွက် နဂါးအကြေးခွံများ ပေါ်လာခဲ့သည့်တိုင် သူ့အရေပြားမှာ နာကျင်မှုများ ခံစားလိုက်ရသေးသည်။ ထိုမှ လော့ရှန်း၏ ဓားချက်မှာ မည်မျှကြောက်စရာကောင်းကြောင်း မြင်နိုင်သည်။

သေခြင်းရှင်ခြင်း ဓားသိုင်း၊ ဓားတစ်ချက်က သေဆုံးခြင်းနှင့် ရှင်သန်ခြင်းကို ဆုံးဖြတ်နိုင်သည်။

ဓားချက်တိုင်းသည် သေစေနိုင်၏။

လော့ရှန်းက စန်းဧကရာဇ်၏ လျှို့ဝှက်နယ်မြေတွင် ရှိစဉ်ကထက် များစွာ အားကောင်းလာခဲ့ပြီ။

ဤတိုးတက်မှုက ကျင့်ကြံခြင်းအခြေခံ တိုးတက်ခြင်းမျိုးမဟုတ်ဘဲ အဆင့်တူ ကျင့်ကြံသူများကြားမှ အားကောင်းသော တိုက်ခိုက်နိုင်စွမ်းကို ရည်ညွှန်းသည်။

ထိုစဉ်က လော့ရှန်းဟာ ဝမ့်ကျန်း၊ ရှစ်ထျန်းတို့နှင့် အဆင့်တူဖြစ်သည်။ ယခုမူ၊ လော့ရှန်းက ဝမ့်ကျန်းနှင့် ရှစ်ထျန်းတို့ကို အလွယ်တကူ သတ်နိုင်နေပြီ။

'ဝိညာဥ်ခန္ဓာက အလယ်အလတ်တန်းစား မြေကမ္ဘာဝိညာဉ်ခန္ဓာဖြစ်နေသေးပေမဲ့ ဒီလောက်ကြောင်စရာကောင်းတဲ့ ဓားချက်မျိုးကို ထုတ်ဖော်နိုင်တာ မယုံနိုင်စရာပဲ'

လုမင် တွေးလိုက်မိသည်။

"ငါရှုံးသွားပြီ"

လော့ရှန်းက သူ့ဓားကိုသိမ်းပြီး လုမင်အား လက်ယှက်ပြလိုက်သည်။

ထိုဓားချက်က လော့ရှန်း၏ အသန်မာဆုံး တိုက်ခိုက်မှု ဖြစ်သည်။ ထိုဓားချက်ဖြင့် လုမင်ကို အနိုင်မယူနိုင်ပါက သူရှုံးပေလိမ့်မည်။

ထိုသို့ပြောပြီးနောက် လော့ရှန်းက နောက်လှည့်ပြီး တိုက်ပွဲစင်မြင့်ပေါ်မှ ခုန်ဆင်းသွားသည်။ လုမင်လည်း သူ့နောက်ကို မလိုက်သွားခဲ့ပေ။

သူနှင့် လော့ရှန်းဟာ မူလကတည်းက ပညာဖလှယ်ခဲ့ခြင်း ဖြစ်သည်။

လော့ရှန်း ထွက်သွားပြီးနောက် လုမင်လည်း ပါဝင်သူစင်မြင့်ပေါ်သို့ ပြန်တက်ခဲ့ပေသည်။

စိန်ခေါ်မှုများက ဆက်လက်ဖြစ်ပွားနေခဲ့သည်။

တိုက်ပွဲများစွာ ပြီးသွားသော်လည်း ရေစီးကြောင်းများက မြင့်တက်လာသည်။ တိုက်ပွဲ အချီသုံးဆယ်ကျော် ပြီးသွားပြီဖြစ်သောကြောင့် စင်မြင့်တစ်ခုစီတွင် လူအနည်းငယ်သာ ကျန်တော့သည်။ တိုက်ပွဲက ပြီးဆုံးချိန်သို့ နီးကပ်လာခဲ့ပြီ ဖြစ်သည်။

ကျန်လူများ အားလုံးကလည်း ထိပ်သီး ကျွမ်းကျင်သူများချည်း ဖြစ်ချေသည်။

နောက်ထပ် အချီအနည်းငယ်ပြီးနောက်၊ စင်မြင့် ဆယ့်သုံးခုပေါ်တွင် လူဆယ်ဦးခန့်သာ ကျန်တော့သည်။

သို့သော်လည်း ကျန်လူများ အားလုံးမှာ ထိပ်တန်း ကျွမ်းကျင်သူများ ဖြစ်ကြသည်။ အများစုက ပုမော့၊ ဟန်ရွှင်းနှင့် မော့ဟဲတို့၏ အဆင့်တွင်ရှိပေသည်။

ထိုအချိန်တွင် ကောင်းကင်နတ်ဘုရားဂိုဏ်းနှင့် ကောင်းကင်နတ်ဆိုးဂိုဏ်းမှ လူများအားလုံး ဖယ်ရှားခံခဲ့ရပြီးပြီ ဖြစ်သည်။

အချီအသစ်ကို စတင်ခဲ့၏။ ကောင်းကင်ဘုရင်နန်းတော်၏ စိန်ခေါ်ရန် အလှည့် ဖြစ်သည်။

ကောင်းကင်ဘုရင်နန်းတော်က အလွန်အားကောင်းပြီး ကောင်းကင်နတ်ဆိုးဂိုဏ်းနှင့် ကောင်းကင်အဆိပ်ဂိုဏ်းတို့ထက် အားမနည်းပေ။ ယခုအခါ သူတို့တွင် လူနှစ်ယောက် ကျန်သည်။ သူတို့နှစ်ယောက်လုံးစကလည်း ထိပ်တန်းကျွမ်းကျင်သူများချည်း ဖြစ်ချေသည်။

မိစ္ဆာလမင်းဂိုဏ်းမှာတော့ လူတစ်ဦးသာ ကျန်ရှိတော့သည်။ ထိုသူက မိစ္ဆာလမင်းဂိုဏ်း၏ လူငယ်ခေါင်းဆောင် ဖြစ်ပေသည်။

ကောင်းကင်ကိုးဆင့်ဓားဂိုဏ်းမှာလည်း ထိပ်တန်းကျွမ်းကျင်သူတစ်ဦးသာ ကျန်ရှိသည်။

လင်လုံနန်းတော်သည်လည်း ထိပ်တန်းကျွမ်းကျင်သူတစ်ဦးသာ ကျန်ရှိ၏။

သေခြင်းရှင်ခြင်းဓားဂိုဏ်းနှင့် နတ်ဆိုးဂိုဏ်းတို့မှာလည်း ထို့အတူပင်။ သူတို့တွင် ထိပ်တန်းကျွမ်းကျင်သူ လူတစ်ဦးစီသာ ကျန်ခဲ့သည်။

လုမင် အပါအဝင် စုစုပေါင်း လူရှစ်ဦး ရှိသည်။

လူရှစ်ယောက်သာ ကျန်တော့သည်။ အပေါ်ယံကြည့်ပါက ကောင်းကင်ဘုရင်နန်းတော်သည် လူနှစ်ယောက်ကျန်သောကြောင့် အသန်မာဆုံး ဖြစ်သည်။

သို့သော်လည်း ယခုအချိန်တွင် စင်မြင့်အားလုံးက တိတ်ဆိတ်နေ၏။

ကောင်းကင်ဘုရင်နန်းတော်မှ ထိပ်တန်းကျွမ်းကျင်သူနှစ်ဦးက အခြားလူများကို တစ်ချက်ဝေ့ကြည့်လိုက်သော်လည်း အဓိကကျဆုံးမှာ လုမင် ဖြစ်သည်။

အခြားဂိုဏ်းများမှ ကျွမ်းကျင်သူများကလည်း လုမင်ကို ကြည့်နေကြ၏။ သူတို့၏ အကြည့်များမှာ အလွန် လေးနက်နေတော့သည်။

တင်းပေါင်ညီလာခံငယ်က နောက်ဆုံးအချိန်သို့ ရောက်ရှိနေပြီဖြစ်ပြီး ပထမနေရာကို မကြာမီ ဆုံးဖြတ်တော့မည်။ ထို့အပြင်၊ ပထမနေရာကို ဆုလာဘ်အဖြစ် အုပ်ချုပ်သူ တာအိုနယ်မြေ ဆေးလုံးခုနစ်လုံးအား ပေးမည်ဖြစ်၍ လူတိုင်းလိုချင်ကြသည်။