အခန်း ၁၅၉၅

အပိုင်း ( 1595 ) မိစ္ဆာနတ်ဆိုးကျောက်။

ဤနတ်ဆိုးများမှာ သဘာဝဝိညာဉ်ခန္ဓာများကို လေ့ကျင့်ထားသည့် ကျင့်ကြံသူများထက်ပင် ကိုင်တွယ်ရန် ပို၍ ခက်ခဲသည်။

သဘာဝဝိညာဉ်ခန္ဓာများကို လေ့ကျင့်ထားသော ကျင့်ကြံသူများက တိုက်ခိုက်ခံရသောအခါ သူတို့၏ခန္ဓာကိုယ်များသည် ထိခိုက်မှုနည်းပါးစေရန်အတွက် သဘာဝဒြပ်စင်များအဖြစ်သို့ ပြောင်းလဲနိုင်ကြသည်။ သို့သော်လည်း ၎င်းတို့၏ ပြိုင်ဘက်က လုံလောက်အောင် သန်မာသရွေ့ သူတို့၏ဝိညာဉ်ခန္ဓာကို အင်အားသုံးကာ ဖျက်ဆီးနိုင်သေးသည်။

သို့ပေသော်ငြား၊ ဤနတ်ဆိုးကတော့ သန့်စင်သောခွန်အားသက်သက်ဖြင့် ဖျက်ဆီးနိုင်ပုံ မရပေ။ ကစဉ့်ကလျားတာအိုနယ်မြေပင်လျှင် သူတို့အပေါ် အနည်းငယ်မျှသာ သက်ရောက်မှုရှိသည်။

"မဟုတ်သေးဘူး... ဒီနတ်ဆိုးမှာ အမြုတေရှိတယ်။ ဟုတ်တယ်... ဒါက သူ့ရဲ့ မျက်ခုံးနှစ်ခုကြားမှာပဲ"

ရုတ်တရက်၊ လုမင်၏ မျက်လုံးများ တောက်ပလာသည်။

သူက နတ်ဆိုးကို ထပ်မံ တိုက်ခိုက်လိုက်၏။ ထိုအချိန်တွင် နတ်ဆိုး၏ မျက်ခုံးနှစ်ခုကြားမှာ အနက်ရောင် သလင်းကျောက်တစ်ခု ရှိနေသည်ကို တွေ့လိုက်ရသည်။ ၎င်းကို နတ်ဆိုးစွမ်းအင်ဖြင့် ဝန်းရံထားခြင်းကြောင့် သူ ယခင်က မတွေ့ခဲ့ရခြင်းပင်။

ထို့အပြင်၊ နတ်ဆိုးစွမ်းအင်များအဖြစ် ပြန့်ကျဲသွားပြီးနောက် ထိုအမြုတေမှတဆင့် နတ်ဆိုး၏ခန္ဓာကိုယ်ကို ပြန်လည်ဖွဲ့စည်းလာခဲ့ခြင်း ဖြစ်သည်။

"ဝုန်း"

လုမင်က ရှေ့သို့ ခြေတစ်လှမ်းတိုးလိုက်သည်။ သူ့လက်က နဂါးလက်သည်းကဲ့သို့ နတ်ဆိုး၏ မျက်ခုံးနှစ်ခုကြားကို ကုပ်ဆွဲလိုက်၏။ ထို့နောက် သလင်းကျောက်ကို ဆွဲယူလိုက်တော့သည်။

ထို့နောက်တွင်၊ လုမင်က သလင်းကျောက်ကို ဆုပ်ကိုင်ပြီး နောက်ဆုတ်သွားသည်။

လုမင် ကြည့်လိုက်တော့ သူ့လက်ထဲတွင် အနက်ရောင် သလင်းကျောက်တစ်ခု ရှိနေတာကို တွေ့လိုက်ရသည်။ သလင်းကျောက်ပေါ်တွင် အနက်ရောင် နတ်ဆိုးမီးတောက် အလွှာတစ်ခုရှိနေသည်။

"သလင်းကျောက်ပေါ်မှာ ဝိညာဉ်အသိ အရိပ်အယောင်တစ်ခု ရှိနေတာပဲ။ စိတ်ဝင်စားစရာပဲ၊ ပျက်စီးလိုက်"

လုမင် ခပ်တိုးတိုးရေရွတ်လိုက်သည်။ သူက ယွမ်ချီစွမ်းအင်ကို သလင်းကျောက်ထဲသို့ သွန်းလောင်းလိုက်၏။ သလင်းကျောက်ပေါ်ရှိ နတ်ဆိုးမီးတောက်များလည်း ငြိမ်းသွားတော့သည်။

"ဒုန်း"

သလင်းကျောက်ပေါ်ရှိ နတ်ဆိုးမီးတောက် ငြိမ်းသွားသောအခါ၊ နတ်ဆိုး၏ ခန္ဓာကိုယ်သည်လည်း ပေါက်ကွဲသွားပြီး နတ်ဆိုးစွမ်းအင်အဖြစ်သို့ ပြောင်းလဲသွားသည်။ ထိုနတ်ဆိုးစွမ်းအင်များက ကောင်းကင်နှင့်မြေပြင်ကြားတွင် လွင့်ပျယ်သွားကာ ပြန်လည်ဖွဲ့စည်းခြင်း မပြုနိုင်တော့ပေ။

ဤသလင်းကျောက်က အမှန်တကယ်ပင် အမြုတေ ဖြစ်သည်။

"ဒါ...ဒါက ဒဏ္ဍာရီလာ မိစ္ဆာနတ်ဆိုးကျောက်များ ဖြစ်နိုင်မလား"

သူ့လက်ထဲမှ သလင်းကျောက်ကို ကြည့်လိုက်ရင်း လုမင်၏ မျက်လုံးများက တောက်ပလာသည်။

မိစ္ဆာနတ်ဆိုးကျောက်သည် အလွန်အဖိုးတန်သောရတနာ ဖြစ်၏။ ၎င်းက အလွန်သိပ်သည်းသည့် နတ်ဆိုးစွမ်းအင်များရှိသော နေရာများတွင်သာ မွေးဖွားလာနိုင်သည်။

မိစ္ဆာနတ်ဆိုးကျောက်၏ အကြီးမားဆုံးလုပ်ဆောင်ချက်က စိတ်ဝိညာဉ်ကို သန့်စင်နိုင်ခြင်း ဖြစ်ချေသည်။

မိစ္ဆာနတ်ဆိုးကျောက်ဖြင့် သန့်စင်ပါက ကျင့်ကြံသူ၏ စိတ်စွမ်းအားကို တိုးတက်လာစေနိုင်သည်။

"တကယ်ကို ဒီနေရာမှာ မိစ္ဆာနတ်ဆိုးကျောက်တွေ ရှိနေတာပဲ"

လုမင်၏ မျက်လုံးများက တလက်လက် တောက်ပလာတော့သည်။

လုမင်က နတ်ဘုရားဓားကျင့်စဉ်ကို လေ့ကျင့်ထားသည်။ မိစ္ဆာနတ်ဆိုးကျောက်က သူ့အတွက် အလွန် အသုံးဝင်ပေသည်။

ကမ္ဘာသန့်စင်ခြင်း ကပ်ဘေးခေါင်းလောင်းကြောင့် လုမင်၏ စိတ်ဝိညာဉ်စွမ်းအားမှာ တူညီသောအဆင့်ရှိ အခြား ကျင့်ကြံသူများထက် အဆများစွာ အားကောင်းသည်။

လုမင်၏ လက်ရှိ စိတ်ဝိညာဉ်စွမ်းအားက နဝမအဆင့် သိုင်းအုပ်ချုပ်သူနယ်ပယ် အထွတ်အထိပ်ရှိ ကျင့်ကြံသူများထက်ပင် ပို၍ အားကောင်းသေးသည်။ သူ၏ စိတ်ဝိညာဉ်စွမ်းအားက သူတော်စင်တစ်ပိုင်းနှင့်ပင် နီးစပ်နေပြီ ဖြစ်သည်။

ထိုမျှ အားကောင်းသော စိတ်ဝိညာဉ်စွမ်းအားဖြင့် နတ်ဘုရားဓားကျင့်စဉ်ကို အသုံးပြုပါက၊ တူညီသောအဆင့်ရှိ ကျင့်ကြံသူတစ်ဦး၏ နတ်ဘုရားဝိညာဉ်ကို တိုက်ရိုက် ဖျက်ဆီးနိုင်ပေမည်။

နဝမအဆင့် သိုင်းအုပ်ချုပ်သူနယ်ပယ် အထွတ်အထိပ်တွင်ရှိသော ကျင့်ကြံသူတစ်ဦးပင်လျှင် ပြင်းထန်စွာ ထိခိုက်နိုင်မည်ဖြစ်ပြီး၊ ၎င်းတို့၏ တိုက်ခိုက်ရေးစွမ်းရည်မှာလည်း အလွန်လျော့ကျသွားမည် ဖြစ်သည်။

သူတော်စင်တစ်ပိုင်းပင်လျှင် လုမင်၏ စိတ်ဝိညာဉ်တိုက်ခိုက်ခြင်းကို ခံရပါက၊ သူတို့၏ လှုပ်ရှားမှုများ အနည်းငယ် အားနည်းသွားလိမ့်မည်။

လုမင်၏ စိတ်ဝိညာဉ်စွမ်းအားသာ ဆက်လက် တိုးတက်လာပြီး သူတော်စင်တစ်ပိုင်းအဆင့်သို့ရောက်ရှိပါက... သို့မဟုတ်... ပို၍ပင် အားကောင်းလာပါက... နတ်ဘုရားဓားကျင့်စဉ်ဖြင့် သူတော်စင်တစ်ပိုင်း၏ နတ်ဘုရားဝိညာဉ်ကို တိုက်ရိုက် ဖျက်ဆီးပစ်နိုင်မည် ဖြစ်သည်။ ဤအရာက လုမင်၏ တိုက်ခိုက်မှုစွမ်းရည်ကို များစွာ တိုးတက်စေလိမ့်မည်။

ထို့အပြင်၊ ကျင့်ကြံသူက ပို၍ အားကောင်းလေလေလေ... သူတို့၏ နတ်ဘုရားဝိညာဉ်ကို ပို၍ ဂရုစိုက်ရလေလေဟု ဆိုသည်။

တစ်ဦးတစ်ယောက်၏ ကျင့်ကြံခြင်းက အဆင့်တစ်ခုသို့ ရောက်လာပြီးနောက် နတ်ဘုရားဝိညာဉ်မှာ အလွန်အရေးကြီးသည်ဟု ဆိုနိုင်ပေသည်။

ထို့ကြောင့်၊ စျေးကွက်တွင် မိစ္ဆာနတ်ဆိုးကျောက်များ၏ တန်ဖိုးမှာ အံ့မခန်း မြင့်မားနေခဲ့သည်။

"ဒီနေရာမှာ နောက်ထပ် မိစ္ဆာနတ်ဆိုးကျောက်တွေ ရှိနေဦးမလား မသိဘူး"

လုမင်လည်း မိစ္ဆာနတ်ဆိုးကျောက်ကို သိမ်းလိုက်သည်။ ထို့နောက်တွင် သူက တောင်ပေါ်သို့ ပြေးဆင်းသွားပြီး ထူးဆန်းသည့် ကျောက်တုံးများထူထပ်သော နေရာတစ်ခုပေါ်သို့ ဆင်းသက်လာခဲ့သည်။

"ဝေါင်း"

လုမင် ဆင်းသက်လာသည်နှင့် တပြိုင်နက်၊ ကျယ်လောင်သော ဟိန်းဟောက်သံကို ကြားလိုက်ရသည်။ ထို့နောက် ကျားကြီးတစ်ကောင် ပေါ်လာပြီး လုမင်ကို ခုန်အုပ်လိုက်တော့သည်။

ဤကျားကြီးက အနက်ရောင် ဖြစ်သည်။ နတ်ဆိုးအငွေ့အသက်များလည်း ဖြာထွက်နေ၏။ ၎င်းက ဆဋ္ဌမအဆင့် သိုင်းအုပ်ချုပ်သူနယ်ပယ် ဖြစ်သည်။

"ဝုန်း"

လုမင်က လက်သီးဖြင့် ထိုးချလိုက်ရာ ဧရာမကျားကြီး ပေါက်ကွဲသွားသည်။ သို့သော်... ယခင်က လူသားသဏ္ဍာန် နတ်ဆိုးကဲ့သို့ပင်၊ ပေါက်ကွဲသွားသော ဧရာမကျားကြီး၏ ခန္ဓာကိုယ်က ပြန်လည် ဖွဲ့စည်းလာပြန်တော့သည်။

"မျှော်လင့်ထားတဲ့အတိုင်းပဲ"

ယခုလေးတင်၊ လုမင်ဟာ ဧရာမ ကျားကြီး၏ မျက်ခုံးကြားတွင် သလင်းကျောက်တစ်ခုကို မြင်လိုက်ရသည်။

"သတ်"

လုမင်က ရှေ့သို့ ခြေတစ်လှမ်းတိုးလိုက်သည်။ သူ့လက်သည်းက ဧရာမကျားကြီး၏ မျက်ခုံးနှစ်ခုကြားမှ သလင်းကျောက်ကို ကုပ်ဆွဲယူလိုက်၏။

မိစ္ဆာနတ်ဆိုးကျောက်၊ အမှန်တကယ်ပင် မိစ္ဆာနတ်ဆိုးကျောက် ဖြစ်သည်။ ဤမိစ္ဆာနတ်ဆိုးကျောက်တွင်လည်း နတ်ဆိုးမီးတောက်အလွှာတစ်ခု ရှိသည်။ မီးတောက်များ ငြိမ်းသွားသောအခါ ဧရာမကျားကြီးလည်း နတ်ဆိုးစွမ်းအင်များအဖြစ် ပျံ့လွင့်ကာ ပျောက်ကွယ်သွားတော့သည်။

"ဟားဟားဟား၊ ဒါက တကယ့်ကို ရတနာနယ်မြေပဲ"

လုမင် ဝမ်းသာသွားသည်။ ထို့နောက်မှာတော့ သူ့ပုံရိပ်က လှုပ်ရှားလာပြီး နတ်ဆိုးများကို လှည့်လည်ရှာဖွေတော့သည်။

မိုင်အနည်းငယ် ဖြတ်သန်းပြီးနောက် နောက်ထပ် နတ်ဆိုးတစ်ကောင် ပေါ်လာခဲ့သည်။ ၎င်းကလည်း ဆဋ္ဌမအဆင့် သိုင်းအုပ်ချုပ်သူနယ်ပယ် ဧရာမ ဝံပုလွေတစ်ကောင် ဖြစ်၏။ လုမင်လည်း ၎င်း၏ မျက်ခုံးနှစ်ခုကြားမှ မိစ္ဆာနတ်ဆိုးကျောက်ကို နှုတ်ယူကာ ရှေ့သို့ ဆက်သွားတော့သည်။

"ဝေါင်း... ဝေါင်း"

ဆယ်မိုင်ကျော် ဖြတ်သန်းလာသည်အထိ လုမင်ဟာ မည်သည့်နတ်ဆိုးသတ္တဝါကိုမျှ မတွေ့ခဲ့ရပေ။ သို့သော်လည်း ထို့နောက်တွင် အဆက်မပြတ် ဟိန်းဟောက်သံများကို ကြားလာခဲ့ရသည်။ နတ်ဆိုးခြောက်ကောင်က သူ့အပေါ်ကို ခုန်အုပ်လိုက်ကြ၏။

၎င်းတို့ထဲမှ တစ်ကောင်မှာ အဋ္ဌမအဆင့်တွင် သိုင်းအုပ်ချုပ်သူနယ်ပယ်တွင် ဖြစ်သည်။ နှစ်ကောင်က သတ္တမအဆင့် သိုင်းအုပ်ချုပ်သူနယ်ပယ် ဖြစ်၏။ ကျန်သုံးကောင်ကား ဆဋ္ဌမအဆင့် သိုင်းအုပ်ချုပ်သူနယ်ပယ်တွင် ရှိနေသည်။

နတ်ဆိုးခြောက်ကောင်က တပြိုင်နက်တည်း တိုက်ခိုက်သောအခါ အလွန် အစွမ်းထက်၏။

လုမင်က လေဓာတ်စွမ်းအင် တာအိုသိုင်းဖြင့် ရှောင်တိမ်းလိုက်သည်။ သူက ဆဋ္ဌမအဆင့် သိုင်းအုပ်ချုပ်သူနယ်ပယ် နတ်ဆိုးတစ်ကောင်ကို တစ်ချက်တည်း သတ်ပြီး မိစ္ဆာနတ်ဆိုးကျောက်ကို ဖမ်းယူလိုက်၏။တစ်ချိန်တည်းမှာပင်၊ လုမင်က အနက်ရောင်အတောင်ပံများကိုခတ်ကာ အခြား နတ်ဆိုးများကို နတ်ဆိုးစွမ်းအင်များအဖြစ်သို့ ပြောင်းလဲစေခဲ့သည်။ သို့သော်လည်း နောက်အခိုက်အတန့်တွင် ထိုနတ်ဆိုးများက ပြန်လည်ဖွဲ့စည်းလာကာ တိုက်ခိုက်ကြပြန်တော့သည်။

"ဝှစ်... ဝှစ်"

လုမင်လည်း လျင်မြန်သွက်လက်စွာ လှုပ်ရှားလိုက်သည်။ အခြား ဆဋ္ဌမအဆင့် ကိုယ်အုပ်ချုပ်သူနယ်ပယ် နတ်ဆိုးနှစ်‌ကောင်၏ နတ်ဆိုးကျောက်များကို ဆွဲနှုတ်ပြီး တောင်နှင့်မြစ်ပန်းချီကားအတွင်းသို့ ပစ်ထည့်လိုက်၏။

ထို့နောက်တွင် သူက သတ္တမအဆင့် သိုင်းအုပ်ချုပ်သူနယ်ပယ် နတ်ဆိုးကို လက်သည်းဖြင့် ကုပ်ဆွဲလိုက်သည်။

ထိုနတ်ဆိုးက ဟိန်းဟောက်ပြီး သူ့ခေါင်းကိုလှည့်ကာ လျင်မြန်စွာ ရှောင်တိမ်းသွား၏။ လုမင်၏ လက်သည်းက သူ့ခန္ဓာကိုယ်ကိုပဲ ကုပ်ဆွဲမိကာ ပေါက်ကွဲသွားတော့သည်။ သို့ရာတွင်၊ ၎င်း၏ ခန္ဓာကိုယ်က လျင်မြန်စွာ ပြန်လည်ဖွဲ့စည်းလာခဲ့သည်။

'မင်းတို့က ပါးနပ်မှုရှိသားပဲ'

လုမင်လည်း ခပ်တိုးတိုးရေရွတ်ရင်း အခြားနတ်ဆိုးနှစ်ကောင်ကို ဆက်လက် တိုက်ခိုက်လိုက်သည်။

ထိုနတ်ဆိုးနှစ်ကောင်ကလည်း အလွန် ပါးနပ်၏။ သူတို့၏ ဦးခေါင်းကို ကောင်းကောင်းကာကွယ်ထားပြီး ထိခိုက်မခံပေ။ သူတို့၏ ခန္ဓာကိုယ်များကိုတော့ လုမင်အား စိတ်ကြိုက် တိုက်ခိုက်ခွင့်ပြုခဲ့သည်။

ဤနတ်ဆိုးများက အဆင့်တူ ကျင့်ကြံသူများထက်ပင် ကိုင်တွယ်ရ ပို၍ခက်ခဲသည်။ သူတို့၏ ဦးခေါင်းကို ကာကွယ်ထားသရွေ့၊ သူတို့၏ ခန္ဓာကိုယ် အခြားအစိတ်အပိုင်းများကို တိုက်ခိုက်လျှင်ပင် ထိရောက်မှုရှိမည်မဟုတ်ပေ။

လုမင်၏ မြင့်မားသော တိုက်ခိုက်နိုင်စွမ်းကြောင့် မဟုတ်ပါက အခက်တွေ့နေပြီ ဖြစ်သည်။

"နတ်ဘုရားတံခါးရဲ့ တံဆိပ်ကိုးခု...၊ အခု မင်းတို့ ဘယ်လိုလွတ်မြောက်နိုင်ဦးမလဲဆိုတာ ကြည့်ရအောင်"

လုမင်က လက်ဟန်သင်္ကေတများ ပြုလိုက်သောအခါ တံဆိပ်တော်တံခါးခုနစ်ခု ပေါ်လာခဲ့သည်။

လုမင်က ယခုအခါ တံခါးခုနစ်ခုကို ဖန်တီးနိုင်နေပြီ။

တံဆိပ်တော်တံခါးခုနစ်ခုမှ နတ်ဆိုးသုံးကောင်ကို ချက်ချင်း အေးခဲသွားစေနိုင်သော အလင်းရောင်များ ထုတ်လွှတ်လာခဲ့သည်။

"ဝှစ်... ဝှစ်... ဝှစ်"

လုမင်က လျင်မြန်စွာလှုပ်ရှားပြီး ၎င်းတို့၏ မိစ္ဆာနတ်ဆိုးကျောက်များကို ဆွဲနှုတ်လိုက်၏။ ထို့နောက် ‌မိစ္ဆာနတ်ဆိုးကျောက်အပေါ်မှ နတ်ဆိုးမီးတောက်များကို ဖျက်ဆီးလိုက်တော့သည်။

မကြာမီ နတ်ဆိုးခြောက်ကောင်က နတ်ဆိုးစွမ်းအင်များအဖြစ် ပျံ့လွင့်ကာ ပျောက်ကွယ်သွားခဲ့သည်။

"နတ်ဆိုးတွေရဲ့ ကျင့်ကြံခြင်းအဆင့်က မြင့်မားလေလေ... မိစ္ဆာနတ်ဆိုးကျောက်ရဲ့ အရည်အသွေးက ပိုပြီး ကောင်းလေလေပဲ"

လုမင်က သူ့လက်ထဲမှ သတ္တမအဆင့်နှင့် အဋ္ဌမအဆင့် သိုင်းအုပ်ချုပ်သူနယ်ပယ် နတ်ဆိုးများ၏ မိစ္ဆာနတ်ဆိုးကျောက်များကို စစ်ဆေးကြည့်လိုက်သည်။ ထိုအခါ အရည်အသွေးက ဆဋ္ဌမအဆင့် သိုင်းအုပ်ချုပ်သူနယ်ပယ် နတ်ဆိုးများထက်ပင် အမှန်တကယ် သာလွန်မှုရှိကြောင်း တွေ့ခဲ့ရပေသည်။

လုမင်လည်း ‌မိစ္ဆာနတ်ဆိုးကျောက်များကို သိမ်းဆည်းပြီး ရှေ့ကို ဆက်သွားသည်။

ဤနေရာတွင် နတ်ဆိုးသတ္တဝါများ အများအပြားရှိပုံရသည်။ လုမင် ရှေ့သို့ တိုးလာသည်နှင့်အမျှ နတ်ဆိုးများနှင့် တွေ့လာရ၏။ အမြင့်ဆုံးအဆင့် နတ်ဆိုးများက နဝမအလွှာ သိုင်းအုပ်ချုပ်သူနယ်ပယ်နှင့် ညီမျှသည်။

အဆင့်ပိုမြင့်လေ... စွမ်းအား ပိုကြီးမားလေဖြစ်ပြီး မိစ္ဆာနတ်ဆိုးကျောက်များကို ရရှိရန် ပို၍ ခက်ခဲလေလေပင်။

သို့သော်လည်း လုမင်၏ နတ်ဘုရားတံခါး တံဆိပ်ကိုးခုက ထိုနတ်ဆိုးများ၏ လှုပ်ရှားမှုများကို တားဆီးနိုင်သည်။

အဆုံးမှာတော့ လုမင်ဟာ ပူဖောင်းလေးကို အကူအညီတောင်းလိုက်ရသည်။

ပူဖောင်းလေး၏ အချိန်ဟင်းလင်းပြင် တာအိုနယ်မြေဖြင့် နတ်ဆိုးများကို ချုပ်နှောင်ရန်မှာ အခက်အခဲ မရှိတော့ပေ။ လုမင်က မိစ္ဆာနတ်ဆိုးကျောက်များကို ရိတ်သိမ်းနေသော ကောက်ရိတ်သူနှင့်ပင် တူနေပြီ ဖြစ်သည်။

နေ့ဝက်ကြာပြီးနောက် လုမင်ဟာ မိစ္ဆာနတ်ဆိုးကျောက် တစ်ရာကျော်ကို ရရှိခဲ့ပေသည်။

ဆဋ္ဌမအဆင့် သိုင်းအုပ်ချုပ်သူနယ်ပယ်မှ နဝမအဆင့် သိုင်းအုပ်ချုပ်သူနယ်ပယ်အထိ တစ်ကောင်မှ မလွတ်နိုင်ခဲ့ပေ။