အခန်း ၂၅၄

အခန်း (၂၅၄) - ကောင်းကင်ဘုံကို အံတုပြီး ရှင်သန်လာခြင်းလား

ရွှမ်ယွမ် လျှို့ဝှက်နယ်မြေ။

ရွှမ်ယွမ် နတ်ဘုရား နန်းတော် တွင်၊ နန်ကုန်းယွီ သည် ဆေးဖော်စပ်ခန်း မှ ရတနာများကို ယူဆောင်ပြီး တတိယမြောက် ခန်းမဆောင်သို့ သွားရောက်ခဲ့ပေ၏။

အခန်းကြီးက အလွတ်ဖြစ်နေသည်။

တိတိကျကျပြောရလျှင် အဝင်ပေါက်ရှိ အလင်းတံခါးနှင့် ဘယ်ဘက်နောက်ကျောနံရံရှိ အလင်းတံခါးများမှလွဲ၍ ခန်းမထဲတွင် နောက်ထပ် အလင်းတံခါး သုံးဆယ့်ခုနစ်ပေါက် ရှိနေသေးပေ၏။

ထိုအရာများမှလွဲပြီး တခြား ဘာမှ မရှိပေ။

အလင်းတံခါးများစွာကို မြင်ချိန်၌ နန်ကုန်းယွီ ၏ နှုတ်ခမ်းများ အနည်းငယ် တွန့်ကွေးသွားသည်။

"ဒီရွှမ်ယွမ် နတ်ဘုရား နန်းတော် ထဲမှာ ခန်းမတွေ ဘယ်လောက်တောင် ရှိနေတာလဲ"

သူက ခေါင်းအနည်းငယ် ခါယမ်းလိုက်ပြီး တာအိုယန်နတ်ဆိုးမျက်လုံးဖြင့် နန်းတော်အတွင်းရှိ အခြေအနေများကို တိုက်ရိုက် စုံစမ်းရန် စတင် လှုပ်ရှားလာပေ၏။

တာအိုယန်နတ်ဆိုးမျက်လုံးက အမှန်တကယ် အသုံးဝင်ပြီး မျက်စိတစ်မှိတ်အတွင်းမှာပင် သူ သတင်းအချက်အလက် အများအပြားကို ရရှိခဲ့သည်။

ရွှမ်ယွမ် နတ်ဘုရား နန်းတော် သည် ရှေးခေတ်ကာလမှ ရွှမ်ယွမ် တာအိုသခင် ၏ တာအိုနန်းတော် ဖြစ်ပြီး နေရာတစ်ခုလုံးက ထူးခြားသော သန့်စင်သည့် ရတနာ တစ်ခု ဖြစ်ပေ၏။

ရှေးခေတ်ကာလတွင် ရွှမ်ယွမ် တာအိုသခင် သေဆုံးသွားပြီး သူ၏ တာအိုလမ်းစဉ် လည်း ပျောက်ကွယ်သွားခဲ့သည်။ သူ၏ ခန္ဓာကိုယ်အတွင်းရှိ ကမ္ဘာငယ် သည် ဤ လျှို့ဝှက်နယ်မြေ အဖြစ် ပြောင်းလဲသွားပြီး ဟင်းလင်းပြင် နယ်ပယ် သို့ ဝင်ရောက်သွားကာ ရှေးခေတ်ကာလ ပြီးဆုံးပြီးမှသာ ထွက်ပေါ်လာခဲ့ခြင်း ဖြစ်၏။

တောင်ခြေရှိ နန်းတော် အဆောက်အအုံများသည် ရွှမ်ယွမ် တာအိုသခင် ၏ အစေခံ ၃၆၅ ဦး၏ နန်းတော်များ ဖြစ်ပေသည်။

နန်းတော်များတွင် အစေခံ ၃၆၅ ဦး၏ ဝိညာဉ် သန္ဓေသားများ ရှိနေပြီး အမွေအနှစ် ပြတ်တောက်မသွားစေရန် ကိုယ်ပိုင် အမွေအနှစ် ကို တစ်ဦးစီ ထိန်းသိမ်းထားကြ၏။

ထိုအရာတွေကို ထားလိုက်ပါတော့မည်။

နန်ကုန်းယွီ ၏ ရှေ့ရှိ အလင်းတံခါးနှင့် ဘယ်ဘက်အနောက်နံရံရှိ အလင်းတံခါးသည် နန်ကုန်းယွီက ယခုလေးတင် ဖြတ်သန်းလာခဲ့သော ဧည့်ခန်းမဆောင်နှင့် ချိတ်ဆက်ထားပေသည်။

ကျန်ရှိနေသော အလင်းတံခါး သုံးဆယ့်ခြောက်ပေါက်က အိပ်ခန်း သုံးဆယ့်ခြောက်ခန်းဆီသို့ မျက်နှာမူထား၏။

မူလက ရွှမ်ယွမ် တာအိုသခင် သည် တာအို လက်တွဲဖော် များနှင့် လက်ထပ်ရန် ပြင်ဆင်သည့်အနေဖြင့် လက်အောက်ခံများအား ဤတာအိုနန်းတော်ကို သန့်စင်ဖန်တီးစေခဲ့သော်လည်း ကံမကောင်းစွာဖြင့် သူက မိန်းမကံ သိပ်မကောင်းသဖြင့် အခန်းသုံးခန်းကိုသာ အသုံးပြုခဲ့ရပေသည်။

ကျန်သည့် အခန်းများကိုတော့ တစ်ခါမှ အသုံးမပြုခဲ့ရပေ။

အသုံးပြုခဲ့သော အခန်းသုံးခန်းမှာ သူ၏ တာအို လက်တွဲဖော်၊ သမီးဖြစ်သူနှင့် သူ့ကိုယ်ပိုင် အခန်းများ ဖြစ်ပေ၏။

နန်ကုန်းယွီ သည် အလင်းတံခါးတစ်ခုကို ဖြတ်သွားလိုက်ရာ နန်းတော်တစ်ခုအတွင်း အိပ်ခန်း (ဘေးအခန်းတစ်ခု ပါဝင်သည်)၊ ကျင့်ကြံခြင်း အခန်း နှင့် ရေချိုးခန်း တစ်ခုတို့ ရှိနေသည်ကို တွေ့လိုက်ရသော်လည်း ဧရိယာတစ်ခုလုံးက လုံးဝ အလွတ်ဖြစ်နေပေသည်။

ဘာမှ မရှိပေ။

ထို့နောက် နန်ကုန်းယွီသည် အလင်းတံခါး သုံးဆယ့်သုံးပေါက်လုံးကို ၁၅ မိနစ်အတွင်း စိတ်ရှည်လက်ရှည် ဖြတ်လျှောက်သွားခဲ့ပေမဲ့ အကုန်လုံးက အလွတ်ဖြစ်နေပြီး ဘာမှ မရခဲ့ပေ။

သူ့မှာ မျှော်လင့်ချက် တစ်စွန်းတစ်စ ရှိနေတုန်းပါပဲ။

သူ အလင်းတံခါးရှိရာနေရာသို့ ပြန်သွားပြီး ကျန်ရှိနေသော အလင်းတံခါး သုံးခုကို ကြည့်လိုက်ရာ အခြားတံခါးများနှင့် မတူဘဲ အပို စွမ်းအင်တစ်စွန်းတစ်စ ရှိနေသည်ကို တွေ့လိုက်ရပေ၏။

အကယ်၍ သူ မမှားဘူးဆိုရင် ဤစွမ်းအင် သုံးခုက ရွှမ်ယွမ် တာအိုသခင် ၏ မိသားစု သုံးယောက်၏ စွမ်းအင်တွေ ဖြစ်ရမည်။

နန်ကုန်းယွီ က ခေါင်းအနည်းငယ် ခါယမ်းလိုက်ပြီး ပထမဆုံး အလင်းတံခါးထဲသို့ ပေါ့ပေါ့ပါးပါး ဝင်သွားလိုက်ရာ နန်းတော်တစ်ခုသို့ ရောက်ရှိသွားပေသည်။

အခြားနန်းတော်များနှင့် မတူဘဲ ဤနန်းတော်တွင် ဘေးအခန်းများ မရှိချေ။ ယင်းအစား အလျားနှင့် အနံ မီတာဆယ်ကျော်ရှိသော ဧရာမ ကုတင်ကြီးတစ်ခုကို ပင်မအခန်းတွင် ထားရှိထား၏။

အိပ်ခန်းထဲတွင် အဝတ်ဗီရို၊ မှန်တင်ခုံ၊ ခုတင်ဘေး စားပွဲငယ်တို့ အပြည့်အစုံ ပါရှိပြီး နန်ကုန်းယွီ သည် တော်တော်လေး ထူးဆန်းသော ပစ္စည်းအချို့ကိုပင် တွေ့ခဲ့ရပေသည်။

နန်ကုန်းယွီ က ပတ်ပတ်လည်ကို တစ်ချက်ကြည့်လိုက်သော်လည်း ကောင်းမွန်သည့်အရာ ဘာမှ မတွေ့ရသဖြင့် လှည့်ကာ ညာဘက်ရှိ ရေချိုးခန်းသို့ သွားလိုက်၏။

ရေချိုးခန်းတွင် ကျန်းပေ့မင်းသား စံအိမ် ၏ ပင်မစံအိမ်ရှိ ရေချိုးကန်နှင့် အနည်းငယ် ဆင်တူသော ရေကူးကန်ကြီးတစ်ခု ရှိပေသည်။

သို့သော် ဤနေရာရှိ ရေကန်က အများကြီး ပိုကြီး၏။ ရေကန်ကြီး တစ်ခုလို့ ခေါ်ရင်တောင် ချဲ့ကားပြောရာ ရောက်မှာ မဟုတ်ပါဘူး။

နန်ကုန်းယွီ က ခေါင်းအနည်းငယ် ခါယမ်းလိုက်ပြီး ဘယ်ဘက်ရှိ ကျင့်ကြံခြင်း အခန်း သို့ လျှောက်သွားလိုက်သည်။ ထိုအခန်းထဲတွင် ပွက်ပွက်ဆူနေသော ဝိညာဉ်အရည်များဖြင့် ပြည့်နှက်နေသည့် ဧရာမ ဝိညာဉ်ရေကန်ကြီး တစ်ခု ရှိနေပြီး ပြင်းပြသော ဝိညာဉ်စွမ်းအင် များကို ထုတ်လွှတ်နေပေ၏။

ပတ်လည်ရှိ နံရံများကို မရေမတွက်နိုင်သော ဝင်္ကပါပုံစံများဖြင့် ရေးထွင်းထားပြီး စိတ်ကို ငြိမ်သက်စေခြင်း၊ ကာကွယ်ခြင်းနှင့် ဝိညာဉ်စွမ်းအင်များကို စုစည်းပေးခြင်း အစရှိသည့် လုပ်ဆောင်ချက်များ ပါဝင်သော ဝင်္ကပါ အချို့ ဖြစ်ပုံရပေသည်။

ဤဝိညာဉ်ရေကန်သည် မရေမတွက်နိုင်သော နှစ်ပေါင်းများစွာအတွင်း လျှို့ဝှက်နယ်မြေ မှ ဝိညာဉ်စွမ်းအင် များကို ဝိညာဉ်စုစည်းခြင်း ဝင်္ကပါ ဖြင့် စုစည်းမှုမှတစ်ဆင့် ဖြစ်ပေါ်လာခြင်း ဖြစ်၏။

နန်ကုန်းယွီ က ဝိညာဉ်ရေကန်ကို တစ်ချက်လှမ်းကြည့်လိုက်ပြီး အထူးကျောက်စိမ်းပုလင်း တစ်လုံးကို ထုတ်ယူကာ ဝိညာဉ်အရည် အားလုံးကို ထည့်သွင်း၍ သူ၏ ကိုယ်ပိုင် လိုဏ်ဂူ အတွင်း သိမ်းဆည်းလိုက်ပေသည်။

ကျောက်စိမ်းပုလင်းကို သူကိုယ်တိုင် အထူး ဖန်တီးထားခြင်းဖြစ်ပြီး ဤဝိညာဉ်အရည်များကို တွေ့ရှိပါက အချိန်မရွေး စုဆောင်းနိုင်ရန် ဖြစ်၏။

ထို့အပြင် ကျောက်စိမ်းပုလင်းသည် အထူးပြုလုပ်ထားခြင်းဖြစ်ပြီး ကျင့်စဉ် ၏ လမ်းညွှန်မှုဖြင့် ဝိညာဉ် ရတနာအဆီအနှစ် နှင့် ဆင်တူသော ဝိညာဉ်စွမ်းအင် များကို ဖြည်းညင်းစွာ ထုတ်လွှတ်ပေးနိုင်ပေသည်။

သူက နန်းတော်ပတ်ပတ်လည်ကို တစ်ချက်ကြည့်လိုက်ပြီး စစ်ဆေးရန် တာအိုယန်နတ်ဆိုးမျက်လုံး ကိုပင် အသုံးပြုခဲ့ကာ အခြား ရတနာများ မရှိတော့ကြောင်း သေချာသွားသဖြင့် ထွက်ခွာသွားတော့၏။

တိတိကျကျပြောရလျှင် ကောင်းကင်အဆင့် သို့မဟုတ် ထိုထက်မြင့်သော ရတနာများ မရှိတော့ချေ။ ထိုနေ့စဉ်သုံး ပစ္စည်းများ အားလုံးမှာ အဆင့်နိမ့် ရတနာများ ဖြစ်ပေသည်။

ထို့နောက် နန်ကုန်းယွီ သည် ဒုတိယ အလင်းတံခါးထဲသို့ ဝင်သွားလိုက်၏။

ဤနန်းတော်က အခြားနန်းတော်များနှင့် မကွာခြားသော်လည်း နေ့စဉ်သုံး ပစ္စည်းများ ပိုမို များပြားနေသဖြင့် ဤနေရာသည် ရွှမ်ယွမ် တာအိုသခင် ၏ တာအို လက်တွဲဖော် ၏ နေရာဖြစ်ကြောင်း အကြံပြုနေပေသည်။

ယခင်အခန်းကဲ့သို့ပင် ကျင့်ကြံခြင်း အခန်း အတွင်းရှိ ဝိညာဉ်ရေကန်တစ်ခုမှလွဲ၍ အခြား တန်ဖိုးကြီး ရတနာများ မရှိချေ။

‘အဲ့ဒါက အဓိပ္ပာယ်ရှိပါတယ်။ ကျင့်ကြံသူ တော်တော်များများက သူတို့ရဲ့ ရတနာတွေကို သိုလှောင်လက်စွပ် ထဲ ထည့်ပြီး ကိုယ်နဲ့မကွာ သိမ်းထားကြတာလေ... ဘယ်သူက အိပ်ခန်းထဲမှာ သိမ်းထားမှာလဲ။’

နန်ကုန်းယွီ က ခေါင်းအနည်းငယ် ခါယမ်းလိုက်ပြီး ဝိညာဉ်အရည်များကို ယူဆောင်ကာ တတိယမြောက် အလင်းတံခါးထဲသို့ ဝင်ရန် လှည့်လိုက်ပေ၏။

ဒါက နောက်ဆုံး နန်းတော်ပဲ။

ဤနန်းတော်တွင် နေထိုင်ရာ နေရာတစ်ခုလုံးကို ကောင်းကင်ပြာရောင် သုတ်ချယ်ထားပြီး ကိုယ်ပိုင်ပစ္စည်းများကလည်း ထိုနည်းတူပင် ဖြစ်ပေသည်။

ဤအရာကို မြင်ချိန်၌ နန်ကုန်းယွီ က တိုးတိုးလေး ရေရွတ်လိုက်၏။

"ရွှမ်ယွမ် တာအိုသခင် ရဲ့ သမီးက ကောင်းကင်ပြာရောင်ကို တကယ် သဘောကျပုံရတယ်"

မြင်မြင်ချင်း ခွဲခြားသိမြင်နိုင်သည့် အကြောင်းရင်းမှာ ယခင်အခန်းနှစ်ခန်းနှင့် နှိုင်းယှဉ်ပါက ဤနန်းတော်တွင် ထိုထူးဆန်းသော ပစ္စည်းများ မရှိသောကြောင့် ဖြစ်ပေသည်။

တာအို လက်တွဲဖော် တွေကြားမှာ သုံးသည့် အထူးပစ္စည်းမျိုးကို ပြောချင်းဖြစ်သည်။

နန်ကုန်းယွီ က နေထိုင်ရာ နေရာပတ်ပတ်လည်ကို တစ်ချက်ကြည့်လိုက်သော်လည်း စိတ်ဝင်စားစရာ ဘာမှ မတွေ့ရချေ။

သူက ရေချိုးခန်းနှင့် ဘေးအခန်းကို တစ်ချက်လှမ်းကြည့်လိုက်ပြီး ခေါင်းခါယမ်းကာ ကျင့်ကြံခြင်း အခန်း ထဲသို့ ဝင်သွားလိုက်၏။

သို့သော် သူမြင်လိုက်ရသည့်အရာက သူ၏ သူငယ်အိမ်များကို အနည်းငယ် ကျဉ်းမြောင်းသွားစေပြီး သူ၏ မျက်လုံးများထဲတွင် အံ့အားသင့်မှု အရိပ်အယောင်တစ်ခု ထွက်ပေါ်လာပေသည်။

လူတစ်ယောက် ရှိနေသည်။

ကျင့်ကြံခြင်း အခန်း ၏ အလယ်ဗဟိုတွင် လျှို့ဝှက်ဆန်းကြယ်သော အငွေ့အသက်များ ထုတ်လွှတ်နေသည့် ရေခဲခေါင်းတလား တစ်ခုက ဝိညာဉ်ရေကန်ထဲတွင် နစ်မြုပ်နေပေ၏။

ရေခဲခေါင်းတလားက သဘာဝ သလင်းကျောက်တုံးကြီးတစ်ခုကဲ့သို့ ကြည်လင်တောက်ပနေပြီး အတွင်းမှ အေးစက်သော လေများ ထွက်ပေါ်လာကာ ပတ်ပတ်လည်တွင် သေးငယ်သော ရေခဲပွင့်များအဖြစ် ပြောင်းလဲသွားသည်။

မရေမတွက်နိုင်သော လျှို့ဝှက်ဆန်းကြယ်သည့် ကမ္ပည်းစာများက ရေခဲခေါင်းတလားကို လွှမ်းခြုံထားပြီး ထူးဆန်းကာ ဆန်းကြယ်သော အလင်းရောင်တစ်ခုကို ထုတ်လွှတ်နေပေ၏။

နန်ကုန်းယွီ က သတိဖြင့် တစ်ချက်ကြည့်လိုက်ပြီးနောက် ရေခဲခေါင်းတလားဆီသို့ ခြေလှမ်းအနည်းငယ် လှမ်းသွားလိုက်သည်။

ရေခဲခေါင်းတလား အတွင်းတွင် ကောင်းကင်ပြာရောင် စကတ်ဝတ်ဆင်ထားသော အလွန်လှပလှသည့် မိန်းမငယ်လေးတစ်ဦး လဲလျောင်းနေပေ၏။

မိန်းကလေး၏ အသားအရေက ဆီးနှင်းကဲ့သို့ ဖြူဖွေးနေပြီး ရေခဲအလင်းရောင်အောက်တွင် အလင်းဖျော့ဖျော့လေး ထုတ်လွှတ်နေကာ ကျောက်စိမ်းကဲ့သို့ နူးညံ့ချောမွေ့နေသည်။

သူမ၏ မျက်နှာက အလွန် ချောမောလှပပြီး လိပ်ပြာတောင်ပံများကဲ့သို့ ရှည်လျားသော မျက်တောင်များက သူမ၏ ဖြူဖွေးသော ပါးပြင်များပေါ်တွင် တိတ်ဆိတ်စွာ ဖုံးအုပ်ထားကာ ဖြောင့်တန်းပြီး သေးသွယ်သော နှာတံလေးတစ်ခု ရှိနေပေ၏။

အပြာရောင်သန်းနေသော အဖြူရောင် အရိပ်အယောင်တစ်ခုက သူမ၏ ချယ်ရီသီးကဲ့သို့ နီမြန်းသော နှုတ်ခမ်းများကြားမှ ထွက်ပေါ်လာပြီး သူမ၏ အလွန်လှပသော မျက်နှာလေးကို ထူးဆန်းသော အလှတရားတစ်ခု ပေါင်းထည့်ပေးနေသည်။

သူမက ရေခဲခေါင်းတလားထဲတွင် ငြိမ်းချမ်းစွာ အိပ်ပျော်နေပြီး နှုတ်ခမ်းများတွင် အပြုံးတစ်ခုရှိကာ လက်များကို ဝမ်းဗိုက်ပေါ်တွင် ယှက်ထားလျက် ချိုမြိန်သော အိပ်မက်တစ်ခုထဲတွင် နစ်မျောနေသကဲ့သို့ပင်။

သူမ၏ ဝတ်ရုံရှည်က ကောင်းကင်အစွန်းရှိ အသန့်စင်ဆုံး တိမ်တိုက်များဖြင့် ယက်လုပ်ထားသည့်အလား ပေါ့ပါးလွင့်မျောနေပြီး အေးစက်သော လေ၏ အနည်းငယ် လှုပ်ရှားမှုနှင့်အတူ ညင်သာစွာ နိမ့်ချည်မြင့်ချည် ဖြစ်နေပေ၏။

တစ်ခါတစ်ရံတွင် ရေခဲမှုန်များက သူမအတွက် ရက်လုပ်ထားသော သလင်းကျောက် ဇာပဝါတစ်ချပ်ကဲ့သို့ ဖြည်းညင်းစွာ ကျဆင်းလာတတ်သည်။

နန်ကုန်းယွီ သည် မိန်းကလေးနှင့် ရေခဲခေါင်းတလားပေါ်ရှိ လျှို့ဝှက်ဆန်းကြယ်သော ကမ္ပည်းစာများကို တစ်ချက်လှမ်းကြည့်လိုက်ရာ သူ၏ မျက်လုံးများ အနည်းငယ် တဖျပ်ဖျပ် လက်သွားပေ၏။

"ဝိညာဉ် တွေကို စုစည်းတာလား"

"ရှင်သန်လာတာလား"

သူက တိုးတိုးလေး ရေရွတ်လိုက်ပြီး ကျင့်ကြံခြင်း အခန်း ကို နောက်ထပ်တစ်ကြိမ် လှမ်းကြည့်လိုက်ရာ အခြား ကျင့်ကြံခြင်း အခန်း များနှင့် မတူဘဲ ဤအခန်းတွင် နောက်ထပ် တာအို အဆင့် ဝင်္ကပါ တစ်ခု ပါဝင်နေကြောင်း တွေ့ရှိလိုက်ရပေသည်။

‘ဝိညာဉ် များကို စုစည်းပြီး ကောင်းကင်ဘုံသို့ ပြန်သွားသော အစီအရင်’

"ကောင်းကင်ဘုံကို အံတုပြီး တက်လှမ်းတာလား"

နန်ကုန်းယွီ က မျက်လုံးများကို အနည်းငယ် မှေးကျဉ်းလိုက်ပြီး တိုးညှင်းစွာ ပြောလိုက်၏။

"သူ အောင်မြင်ဖို့ နီးစပ်နေပြီ ထင်တယ်"