အခန်း ၄၇၁

အခန်း(၄၇၁) အဆင်သင့်ဖြစ်ပြီ

"ဒါပေမဲ့ တစ်ခုခုတော့ လွဲနေတယ်လို့ ငါ ခံစားရတုန်းပဲ။"

ကျန်းယိပိုင်က ချင်းယွန်ဘုံM4ကို ကလိနေရင်း မျက်မှောင်ကြုတ်ကာ ထပ်မံတွန့်ဆုတ်သွား၏။

"ညီလေး။ ပွင့်ပွင့်လင်းလင်း ပြောရရင် ချင်းယွန်ဘုံM4ကို ပုံတူကူးဖို့ သိပ်မခက်လောက်ဘူး မဟုတ်လား။ တက်လှမ်းသူတွေရဲ့ ကျင့်ကြံခြင်းယဉ်ကျေးမှုက ချင်းယွန်ဘုံလောက် မမြင့်မားဘူးဆိုပေမယ့် အဆင့်နိမ့်ဗားရှင်း တစ်ခုကိုတော့ ပြဿနာမရှိဘဲ လုပ်နိုင်မှာ။ အဲဒါက မင်းနဲ့ငါ့အတွက် ခြိမ်းခြောက်မှုတစ်ခု ဖြစ်လာနိုင်တယ်။"

ဤစကားကို ကြားသောအခါ ချန်ဟွိုက်အန်က လှောင်ပြောင်လိုက်သည်။ "အစ်ကိုကြီးကျန်း၊ သူတို့သာ လုပ်နိုင်ရင် အခုလောက်ဆို လုပ်ပြီးလောက်ပြီပေါ့။ သူတို့ရဲ့ နည်းပညာက အဆင့်မမီလို့ဆိုတာ သေချာတယ်။ ပြီးတော့... ချင်းယွန်ဘုံM4ရဲ့ စွမ်းအင်အရင်းအမြစ်က ဝိညာဉ်ကျောက်တုံးတွေလေ။ ကမ္ဘာမြေမှာ ဝိညာဉ်ကျောက်တုံးမှ မရှိတာ။ ဝိညာဉ်ကျောက်စိမ်းကြောပဲ ရှိတာ။"

သူက ဝိညာဉ်ကျောက်စိမ်းပုတီးစေ့ တစ်လုံးကို ထုတ်ယူကာ ကျန်းယိပိုင်ကို ပြသလိုက်သည်။

"ဒီပစ္စည်းက ဝိညာဉ်ကျောက်စိမ်းကြောကနေ လုပ်ထားတဲ့ ပုတီးစေ့ တစ်လုံးပဲ။ ဒါက တက်လှမ်းသူတွေရဲ့ ငွေကြေးဖြစ်ပြီးတော့ ဝိညာဉ်ကျောက်တုံးတွေနဲ့ ဆင်တူတဲ့အာနိသင် ရှိပေမယ့် ဝိညာဉ်ကျောက်တုံးတွေနဲ့ လုံးဝ ကွဲပြားတဲ့ စွမ်းအင်အမျိုးအစား တစ်ခုပဲ။"

ကျန်းယိပိုင်က ဝိညာဉ်ကျောက်စိမ်း ပုတီးစေ့ကို ယူ၍ခံစားကြည့်ရာ အမှန်တကယ် ကွဲပြားနေကြောင်း တွေ့ရှိလိုက်သည်။

ဝိညာဉ်ကျောက်စိမ်းပုတီးစေ့ထဲရှိ စွမ်းအင်က စိတ်ဝိညာဉ်ချီစွမ်းအင် မဟုတ်သော်လည်း စုပ်ယူပြီးနောက် စိတ်ဝိညာဉ်ချီစွမ်းအင်အဖြစ် ပြောင်းလဲနိုင်သည်။ ဝိညာဉ်ကျောက်တုံးကဲ့သို့ တိုက်ရိုက်တော့ မဟုတ်ပေ။

သို့သော် ဝိညာဉ်ကျောက်စိမ်းပုတီးစေ့ထဲတွင် ပါရှိသော စွမ်းအင်မှာ ပိုမို သန့်စင်သည်။ သူ့လက်ထဲရှိ အနိမ့်ဆုံးအဆင့် ဝိညာဉ်ကျောက်စိမ်းပုတီးစေ့သည်ပင်လျှင် အလယ်အလတ်အဆင့် ဝိညာဉ်ကျောက်တုံး တစ်ခု၏ စွမ်းအင်သန့်စင်မှုကို ပိုင်ဆိုင်ထားပြီး ဖြစ်သည်။

မည်သို့ဆိုစေ ဤစွမ်းအင်အရင်းအမြစ် နှစ်ခုသည် လုံးဝကွဲပြားပြီး ဝိညာဉ်ကျောက်စိမ်းပုတီးစေ့ကို ချင်းယွန်ဘုံM4တွင် အသုံးပြု၍ မရနိုင်ပေ။

ချင်းယွန်ဘုံM4ကို နောက်ထပ် အဆင့်မြှင့်တင်မှုများ မလုပ်သရွေ့ပေါ့။

သို့သော် ချန်ဟွိုက်အန် ပြောသကဲ့သို့ပင် ကမ္ဘာမြေမှ အင်မော်တယ်များသည် သူတို့၏ သေနတ်များကို အင်မော်တယ်ဗားရှင်းအဖြစ် မပြုပြင်နိုင်ခဲ့ပါက မည်သည်ကြောင့် ချင်းယွန်ဘုံM4ကို ပြုပြင်နိုင်ရမည်နည်း။

"ကောင်းပြီ။ ငါ နားလည်ပါပြီ။"

ကျန်းယိပိုင်က စိတ်သက်သာရာ ရသွားပြီး အနည်းငယ် မှေးကျဉ်းနေသော မျက်လုံးအိုများတွင် စိတ်လှုပ်ရှားမှု အရိပ်အယောင်တစ်ခု တောက်ပသွား၏။

"စိတ်မပူပါနဲ့ ညီလေး။ ထိပ်တန်းအဆင့် ကောင်းကင်အနှစ်သာရကျောက်စိမ်းခြင်ဆီကိုတော့ ငါ အာမမခံနိုင်ဘူး။ ဒါပေမဲ့ အလယ်အလတ်အဆင့်နဲ့ အနိမ့်ဆုံးအဆင့်တွေကိုတော့ တတ်နိုင်သမျှ အများကြီး ရအောင် သေချာပေါက် ယူနိုင်တယ်။ ဟီးဟီး။"

ချင်းယွန်ဘုံM4ကို မရခင်ကဆိုလျှင် သူ ထိုသို့ ပြောရဲမည် မဟုတ်သော်လည်း ယခုမူ သူ အတော်လေး ယုံကြည်ချက် ရှိနေပြီဖြစ်သည်။

"သိပ်ပြီးတော့ ပြင်းပြင်းထန်ထန် မလုပ်ပါနဲ့။" ချန်ဟွိုက်အန်က သတိပေးလိုက်သည်။

"ဒီချင်းယွန်ဘုံM4ကို သုံးတာက တခြားဂိုဏ်းတွေနဲ့ အင်အားစုတွေရဲ့ အာရုံစိုက်မှုကို သေချာပေါက် ဆွဲဆောင်နိုင်လိမ့်မယ်။ ဒါကြောင့် ကျွန်တော်တို့ အခြေအနေကောင်းနေတုန်းမှာ ရပ်တန့်လိုက်သင့်တယ်။"

"ကောင်းပြီ။" ကျန်းယိပိုင်က ချန်ဟွိုက်အန်ကို အသင့်အနေအထားဖြင့် လက်ဟန်ပြလိုက်သည်။

...

ဝိညာဉ်ကျောက်စိမ်းကြော ပေါ်ထွက်လာမည့် ခန့်မှန်းခြေအချိန်နှင့်နေရာကို ကျန်းယိပိုင်အား အသိပေးပြီးနောက် လေဝိညာဉ်ဂိုဏ်းပတ်လည်တွင် ဦးစွာ အကြိမ်အနည်းငယ် လှည့်ပတ်ကြည့်ရှုလိုက်သည်။ နောက်ယောင်ခံလိုက်သူ မရှိကြောင်း သေချာသွားသောအခါ သူ မိစ္ဆာနှိမ်နင်းသူဗျူရိုသို့ ပြန်သွားပြီး ထိုမှတစ်ဆင့် ခွန်းလွန်အင်မော်တယ်နန်းတော်သို့ ထွက်ခွာသွားခဲ့သည်။

မွန်းလွဲပိုင်းနေရောင်က ပြင်းထန်စွာ တောက်ပနေ၏။

ခွန်းလွန်အင်မော်တယ်နန်းတော်မှ တပည့်များက ပြင်ဆင်မှုများပြုလုပ်ရန် ဂိုဏ်း၏ရင်ပြင်တွင် တန်းစီနေကြပြီ ဖြစ်သည်။

"ဝမ်ရှိုယီ၊ မင်းရဲ့စီနီယာ မရောက်သေးဘူးလား။"

"ဟုတ်တယ်၊ အားလုံးက စောင့်နေကြတာ။"

"အရှင်မတောင် ထွက်လာပြီ။ သူက နေရာတောင် မယူရသေးဘူး။ ဒီနောက်လိုက်အဖွဲ့က... တော်တော်လေး ကြီးကျယ်ခမ်းနားတာပဲ။"

"အဲဒါပြောတာ။"

သူ၏ စီနီယာအစ်ကိုများ၊ စီနီယာအစ်မများနှင့် အကြီးအကဲများ၏ စကားဝိုင်းကို နားထောင်ရင်း ဝမ်ရှိုယီ၏မျက်နှာမှာ အရုပ်ဆိုးသွားသည်။

"အချိန်မရောက်သေးဘူးမဟုတ်လား။ စီနီယာက အချိန်တိကျတဲ့သူပါ။ သေချာပေါက် ရောက်လာမှာပါ။"

သူက စီနီယာအစ်ကိုများနှင့် စီနီယာအစ်မများကို ဘေးတစောင်း ကြည့်လိုက်ကယ သူ၏မျက်လုံးများ ရုတ်တရက် အေးစက်သွားသည်။ "အရှင်မက စကားတစ်ခွန်းမှ မပြောသေးဘူး။ ခင်ဗျားတို့က သူ့ကို အပြစ်တင်နေပြီလား။ ခင်ဗျားတို့ရဲ့ အဆင့်အတန်းကို ကျော်လွန်ဖို့ ကြိုးစားနေတယ်လို့ ကျွန်တော် နားလည်လို့ ရမလား။ ပြီးတော့ ဒီစီနီယာက ဆေးစံအိမ်ရဲ့ အကြီးအကဲတစ်ယောက်ပဲ။ သူ့ရဲ့ အဆင့်အတန်းနဲ့နေရာက ခင်ဗျားတို့ထက် မြင့်တယ်။ နောက်ထပ်တစ်ခွန်း ထပ်ပြောရင်၊ ခင်ဗျားတို့ကို အာဏာဖီဆန်မှုနဲ့ တိုင်ပစ်မယ်။"

ဤစကားများက ချက်ချင်းပင် အကျိုးသက်ရောက်မှု ရှိသွားသည်။

ဝမ်ရှိုယီ၏ စီနီယာအစ်ကိုများနှင့် စီနီယာအစ်မများက ချက်ချင်း ပါးပိတ်ပိတ်သွားကြသည်။

သို့သော် အကြီးအကဲများကမူ ဂရုမစိုက်ဟန် ရှိသည်။

ခွန်းလွန်အင်မော်တယ်နန်းတော်အတွင်း၌ ရာထူးဝါအရင့်အငယ်သည် အရေးကြီးဆဲ ဖြစ်သည်။

အသစ်ရောက်လာတဲ့ အကြီးအကဲတစ်ယောက်က ဘာများ ထူးခြားနေလို့လဲ။ သူက ဂုဏ်ထူးဆောင် အကြီးအကဲ တစ်ယောက်ပဲ။ ပြီးတော့ သူ့ရဲ့ စွမ်းအားကလည်း ရွှေရောင်အနှစ်သာရ အဆင့်မှာပဲ ရှိတယ်လို့ ပြောကြတယ်။ ဒီကလူတိုင်း ရွှေရောင်အနှစ်သာရအဆင့်မှာပဲဆိုတော့ ဘယ်သူကမှ ဘယ်သူ့ထက်မှ မနိမ့်ကျဘူးလေ။

အကြီးအကဲများနှင့် တပည့်များကြား ဆွေးနွေးမှုများကို ဟွာကျင်းက အလေးအနက် မထားခဲ့ပေ။

ချန်ဟွိုက်အန်က ပါရမီရှိသူတစ်ဦး ဖြစ်သည်။

ပါရမီရှိသူများက ပါရမီနှင့်အတူ ဆက်ဆံမှုများနှင့် အခွင့်ထူးများနှင့် သဘာဝကျကျ ထိုက်တန်သည်။

ချန်ဟွိုက်အန် နောက်ကျနေလျှင်ပင် သူက သူ့ကို အပြစ်တင်မည် မဟုတ်ပေ။ သဘောတူထားသော အချိန် မရောက်သေးခြင်းကို ဆိုဖွယ်ရာပင် မရှိပေ။

ည(၉)နာရီ ထိုးပြီဖြစ်ရာ နေဝင်ဆည်းဆာအချိန်သို့ ရောက်ရှိနေပြီ ဖြစ်သည်။

ခွန်းလွန်အင်မော်တယ်နန်းတော်၏ အလံများက တောင်လေတွင် တလူလူ လွင့်နေ၏။

တစ်နေခင်းလုံး ပြင်ဆင်ပြီးနောက် ခွန်းလွန်အင်မော်တယ်နန်းတော်၏ တပည့်အားလုံး ထွက်ခွာရန် အဆင်သင့် ဖြစ်နေကြပြီ ဖြစ်သည်။

ရွှီး..

ဓားပျံတစ်လက်၏ အသံက ညကောင်းကင်ယံကို ဖောက်ထွင်းသွားသည်။ ဝမ်ရှိုယီ၏ မျက်လုံးများ အရောင်လက်သွားပြီး အသံလာရာဘက်သို့ကြည့်ကာ အလွန် ဝမ်းသာသွားသည်။ "စီနီယာ ရောက်လာပြီ။"

သူ စကားပြောပြီးသည်နှင့်တစ်ပြိုင်နက် အပြာရင့်ရောင်တာအိုဝတ်ရုံ ဝတ်ထားသော ချန်ဟွိုက်အန်က ဟွာကျင်း၏ ဇိမ်ခံရထားလုံးရှေ့တွင် တည်ငြိမ်စွာ ဆင်းသက်လာသည်။

"အရှင်မ၊ ကျွန်တော် နောက်ကျသွားပါတယ်။"

သူက ရထားလုံးထဲရှိ အမျိုးသမီးကို မလိုအပ်ဘဲ အောက်ကျို့ခြင်းမရှိ၊ မာနကြီးခြင်းလည်းမရှိဘဲ အနည်းငယ် ဦးညွှတ်လိုက်သည်။

ဂုဏ်ထူးဆောင် အကြီးအကဲတစ်ဦး အနေဖြင့် ဟွာကျင်းအပေါ် အလွန်အမင်း ရိုသေမှု ပြသရန် မလိုအပ်ပေ။ အခြေခံ ယဉ်ကျေးမှုကို ထိန်းသိမ်းထားလျှင် လုံလောက်ပြီ ဖြစ်သည်။

၎င်းမှာ သူက ဂိုဏ်းနှစ်ခု၏ ဘိုးဘေးကြီးဖြစ်ပြီး မဟာတက်လှမ်းခြင်းအဆင့် ကျင့်ကြံသူတစ်ယောက် ဖြစ်နေ၍လည်း ပါပေသည်။ သူ၏ သရုပ်မှန်ကို ဖုံးကွယ်ထားရန် မလိုအပ်ဘူးဆိုလျှင် သူက ဟွာကျင်းကို တစ်ချက်တောင် လှည့်ကြည့်ရန် စိတ်ကူးမည် မဟုတ်ပေ။

"အဆင်ပြေပါတယ်။ ရောက်လာတာပဲ ကောင်းပါတယ်။"

ဟွာကျင်း၏အသံတွင် ရယ်သံများ ပြည့်နှက်နေပြီး မျက်နှာဖုံးစမှတစ်ဆင့်ပင် သူ၏မျက်နှာပေါ်ရှိ နူးညံ့သောအပြုံးကို မြင်တွေ့နိုင်လုနီးပါး ဖြစ်သည်။

"ဆေးစံအိမ်ရဲ့ ဂုဏ်ထူးဆောင် အကြီးအကဲတစ်ယောက်အနေနဲ့ အကြီးအကဲချန်က ဒီပြိုင်ပွဲမှာ ပါဝင်ဖို့ မလိုအပ်ပါဘူး။ ဒီနေ့ မင်းကို တွေ့ရတာ အရမ်းဝမ်းသာပါတယ်။ အဖွဲ့ထဲ သွားလိုက်ပါ။ ငါတို့ အခုချက်ချင်း ထွက်ခွာကြမယ်။"

"ဟုတ်ကဲ့ပါ။" ချန်ဟွိုက်အန် ဦးညွှတ်လိုက်ပြီး ဝမ်ရှိုယီ၏ဘေးတွင် ရပ်ရန် ဘေးသို့ဖယ်လိုက်သည်။

မနာလိုမှု၊ သဝန်တိုမှုနှင့် နာကြည်းမှု အကြည့်များစွာ ချက်ချင်း ကျရောက်လာ၏။

ချန်ဟွိုက်အန်က ပတ်ဝန်းကျင်ကို ကြည့်လိုက်သည်။

ဝိုး၊ သူတို့အားလုံးက ရွှေရောင်အနှစ်သာရအဆင့်တွေချည်းပဲ။

အခြေတည်ဝိညာဉ်အဆင့် ကျင့်ကြံသူ တချို့လည်း ရှိသေးတယ်။

၎င်းမှာ ကျင့်ကြံမှုအဆင့်များကို ထုတ်ဖော်ပြသထားသော တက်လှမ်းသူများသာ ဖြစ်လေသည်။ လူအုပ်ထဲတွင် လျှို့ဝှက်ဆန်းကြယ်ပြီး မည်သည့်အရှိန်အဝါကိုမှ ထုတ်ဖော်မပြဘဲ စွမ်းအားမည်မျှရှိကြောင်း မသိနိုင်သောသူများလည်း ရှိနေသေးသည်။

၎င်းက ကြွယ်ဝသောအမွေအနှစ်များကို ပိုင်ဆိုင်ထားသည့် ခွန်းလွန်အင်မော်တယ်နန်းတော်ဟူသော အမည်နှင့် တကယ်ကို ထိုက်တန်သည်ဟုသာ ဆိုရပေမည်။

"ဝမ်ရှိုယီ။ မင်း ငါ့ကို အရေးပါတဲ့ ပုဂ္ဂိုလ်တချို့နဲ့ မိတ်ဆက်ပေးမယ်လို့ ပြောထားတာ မဟုတ်ဘူးလား။ ဒါတွေတော့ မဟုတ်လောက်ဘူးနော်။" ချန်ဟွိုက်အန်က အသံကို သိပ်နှိမ့်မထားဘဲ ပြောလိုက်သည်။ "သူတို့က သိပ်ဖော်ရွေတဲ့ပုံ မပေါ်ဘူး..."

ဝမ်ရှိုယီက အနေခက်စွာ ပြုံးပြလိုက်သည်။

"စီနီယာ၊ သူတို့ပဲလေ။"

"ဒါပေမဲ့ သူတို့က စီနီယာ့အပေါ် ဒီလောက် ရန်လိုလိမ့်မယ်လို့ ကျွန်တော် မထင်ထားခဲ့ဘူး။ အိမ်နဲ့ ဝေးကွာနေတာ အရမ်းကြာတော့ သာမန်လူတွေဆီကနေ အကျင့်ဆိုးတွေ ကူးစက်လာတဲ့ပုံပဲ။ သူတို့ကို ဂရုစိုက်နေဖို့ မလိုပါဘူး။ စီနီယာ့ကို စော်ကားရင် သူတို့ကို တိုက်ရိုက်ပဲ ဖြေရှင်းလိုက်ပါ။"

ဝမ်ရှိုယီလည်း သူတို့ကို တမင်သက်သက် ကြားစေရန် ရည်ရွယ်သည့်အလား အသံကို နှိမ့်မထားခဲ့ပေ။

"ဝမ်ရှိုယီ၊ မင်း ဘာပြောတာလဲ။"

ခန္ဓာကိုယ် တောင့်တင်းခိုင်မာသော အမျိုးသားတစ်ဦးက သူတို့ကို စူးစူးရဲရဲ စိုက်ကြည့်လိုက်သည်။

ဝမ်ရှိုယီက ပြန်မဖြေဘဲ ထိုအမျိုးသားကို လက်ညှိုးထိုးပြကာ ချန်ဟွိုက်အန်အား ပြောပြသည်။ "သူ့နာမည်က ဝူဝမ်ပင်း။ သူက ခွန်းလွန်လက်သီးရဲ့ တိုက်ရိုက်တပည့် တစ်ယောက်ဖြစ်ပြီးတော့ ကျွန်တော့်လိုပဲ မိစ္ဆာချိတ်ပိတ်မျှော်စင်တစ်ခုကို ဖြိုခွင်းဖို့ တာဝန်ယူထားတယ်။ ဒါပေမဲ့ သူက မိစ္ဆာချိတ်ပိတ်မျှော်စင်ရဲ့ အဝင်ဝကိုတောင် မရောက်သေးဘူး။"

ဤစကားကို ကြားသောအခါ ချန်ဟွိုက်အန်က မျက်လုံးများကို ကျဉ်းလိုက်သည်။

"ဘယ်မိစ္ဆာချိတ်ပိတ်မျှော်စင်လဲ။"

"စီချွမ် အနောက်ပိုင်းကုန်းပြင်မြင့်ဘက်မှာ ရှိတာ။"

"တောက်၊ ဘာတွေများ ဂုဏ်ယူစရာရှိလို့လဲ။" ဝူဝမ်ပင်းက မျက်မှောင်ကြုတ်ကာ မကျေမနပ် ပြောလိုက်သည်။ "ဝမ်ရှိုယီ၊ မင်းက မိစ္ဆာချိတ်ပိတ်မျှော်စင်ကို အဲဒီလောက် မြန်မြန်ဖြိုခွင်းနိုင်ခဲ့တာ ကံကောင်းသွားလို့ပဲလေ။ အဲဒါ ဘာများ ဂုဏ်ယူစရာရှိလို့လဲ။"

ဝမ်ရှိုယီက ယပ်တောင်ကိုခတ်ကာ ပြုံးရုံသာပြုံးနေပြီး ဘာမှ မပြောပေ။

ဤလူများ၏ မျက်နှာပေါ်ရှိ ကွဲပြားသော အမူအရာများကို ကြည့်ရင်း ချန်ဟွိုက်အန်က အကြမ်းဖျဉ်း နားလည်သွားသည်။

ဤရင်းနှီးသော တပည့်များထဲတွင် လီပုယီနှင့် ဝမ်ရှိုယီတို့မှလွဲ၍ အတိအကျ (၇)ဦး ကျန်သေးသည်။

ဤ(၇)ဦးစီတိုင်းက မိစ္ဆာချိတ်ပိတ်မျှော်စင်တစ်ခုစီနှင့် ညီမျှသည်။

ဝမ်ရှိုယီတစ်ယောက်တည်းသာ မိစ္ဆာချိတ်ပိတ်မျှော်စင်ကို အောင်အောင်မြင်မြင် ဖြိုခွင်းနိုင်ခဲ့ပြီ ၎င်းသည် ဟွာကျင်း၏ မျက်စိထဲတွင် သူ၏အဆင့်အတန်းကို သေချာပေါက် မြင့်တက်စေသည်။ ထို့အပြင် ဟွာကျင်းသည် လီပုယီ၏ မိစ္ဆာချိတ်ပိတ်မျှော်စင်ကို သိမ်းပိုက်ရန် ဝမ်ရှိုယီအား တာဝန်ပေးထားခဲ့သည်။ ကောင်းကင်အနှစ်သာရ ကျောက်စိမ်းခြင်ဆီကို သိမ်းပိုက်ပြီးနောက် ဝမ်ရှိုယီက စစ်ဆင်ရေးကို ဦးဆောင်မည် ဖြစ်သည်။

ချန်ဟွိုက်အန်က ဝူဝမ်ပင်းကို သွားများပေါ်အောင် ပြုံးပြလိုက်ပြီး ရိုသေသော အမူအရာဖြင့် လက်ယှက်လိုက်သည်။

"ဝူဝမ်ပင်းပါလား။ ခင်ဗျားရဲ့ နာမည်ကို ကြားဖူးနေတာ ကြာပါပြီ။"

သူလည်း မိစ္ဆာချိတ်ပိတ်မျှော်စင်ဆီကို သွားချင်သည်။ ထို့ပြင် တိုက်ရိုက်တပည့်များ စာရင်းထဲ သူ မပါအောင် သေချာလုပ်ရမည် ဖြစ်သော်လည်း လျှို့ဝှက်ချက် ပေါ်သွားမည်ကိုတော့ မလိုချင်ခဲ့ပေ...

တောင်းပန်ပါတယ်။

ဒီတစ်ခါတော့ ညီလေးဝမ်ရှိုယီအတွက် ပြိုင်ဘက်တချို့ကို ဖယ်ရှားပေးဖို့ဖရိုဖရဲ အခြေအနေကို သုံးရုံပဲ ရှိတော့တယ်။

စကားပုံ ရှိတယ်လေ။ "ကိုယ့်ကိုပြုံးပြနေတဲ့သူကို ရိုက်လို့မရဘူး" တဲ့။

ချန်ဟွိုက်အန်က ထိုမျှယဉ်ကျေးနေသည်ကို မြင်သောအခါ ဝူဝမ်ပင်း ဘာမှ ထပ်မပြောတော့ပေ။

သူက အေးစက်စက် နှာမှုတ်လိုက်ပြီး ခေါင်းကို တစ်ဖက်သို့ လွှဲသွားသည်။

ဘာကြောင့်မှန်းမသိ ချန်ဟွိုက်အန်၏အပြုံးက သူ့ကို ကြက်သီးထသွားစေသည်။

"ဒါ ထင်ယောင်ထင်မှား ဖြစ်တာပဲနေမယ်။"

သူက သူ့ဘာသာ တီးတိုးရေရွတ်လိုက်၏။

...