အခန်း ၁၆၇၆

အပိုင်း ( 1676 ) လုမင်၏ အစီအစဉ်။

ချိုးရင်ရင်ကို တွေ့သောအခါ လုမင်၏ စိတ်ထဲတွင် အကြံတစ်ခုရခဲ့သည်။ သူက ချိုးရင်ရင်၏ စိတ်ဝိညာဉ်စွမ်းအားကို တိုးမြှင့်ပြီး နတ်ဘုရားဓားပညာရပ်ကို သင်ပေးလို၏။ ဤနည်းဖြင့် ချိုးရင်ရင်က ဆဋ္ဌမအဆင့် သိုင်းအုပ်ချုပ်သူနယ်ပယ်မှ အခြားသော ပါရမီရှင်များကို အနိုင်ယူနိုင်မည် ဖြစ်သည်။

ထိုအချိန်တွင် ချိုးရင်ရင်ကို တင်းပေါင်ညီလာခံသို့ စေလွှတ်လိုက်ပါက၊ သူမသည် အခြားသူများကို သေချာပေါက် အံ့သြသွားစေလိမ့်မည်။

"ရင်ရင်၊ မင်းရဲ့ အခန်းထဲကို သွားရအောင်။ မင်းရဲ့ စိတ်ဝိညာဉ်စွမ်းအားကို တိုးတက်လာအောင် ငါကူညီပေးမယ်"

လုမင်က ပြောလိုက်သည်။

"ကောင်းပြီ"

ချိုးရင်ရင် ခေါင်းညိတ်လိုက်၏။

လုမင်နှင့် ချိုးရင်ရင်လည်း သူမ၏အခန်းသို့ သွားခဲ့ကြလေသည်။ လုမင်က မိစ္ဆာနတ်ဆိုးကျောက်တစ်ခုကို ထုတ်ယူပြီး ချိုးရင်ရင် သန့်စင်နိုင်‌အောင် ကူညီပေးခဲ့သည်။

လုမင်၏ အကူအညီနှင့် ချိုးရင်ရင်၏ ကိုယ်ပိုင်အားထုတ်မှုများကြောင့် မိစ္ဆာနတ်ဆိုးကျောက်ကို သန့်စင်ခြင်းအရှိန်မှာ အလွန်တိုးတက်ခဲ့ပေသည်။

တစ်ခုကို သန့်စင်ပြီးနောက်၊ နောက်တစ်ခုကို ဆက်လက် သန့်စင်လိုက်သည်။ ဤသို့ဖြင့် သူမ၏ စိတ်ဝိညာဉ်စွမ်းအားက အလွန်လျင်မြန်စွာ တိုးတက်လာနေတော့သည်။

နာရီအနည်းငယ်ကြာပြီးနောက်၊ ချိုးရင်ရင်၏ စိတ်ဝိညာဉ်စွမ်းအားက အဋ္ဌမအဆင့် သိုင်းအုပ်ချုပ်သူနယ်ပယ်သို့ ရောက်ရှိခဲ့ပြီး ဆက်လက် တိုးတက်လာနေဆဲ ဖြစ်သည်။

သုံးရက်အကြာတွင် သူမ၏ စိတ်ဝိညာဉ်စွမ်းအားက နဝမအဆင့် သိုင်းအုပ်ချုပ်သူနယ်ပယ်သို့ ရောက်ရှိသွားခဲ့သည်။

ထိုအချိန်တွင်၊ လုမင်က ချိုးရင်ရင်အတွက် မိစ္ဆာနတ်ဆိုးကျောက် သန့်စင်ပေးခြင်းကို ရပ်လိုက်သည်။

ချိုးရင်ရင်အတွက် ရုတ်တရက် တိုးမြင့်လာသော စိတ်ဝိညာဉ်စွမ်းအားနှင့် လိုက်လျောညီထွေဖြစ်အောင် အချိန်တစ်ခု လိုအပ်ပေသည်။

"ရင်ရင်၊ ခုနစ်ရက်အကြာ တင်းပေါင်ညီလာခံကျရင် မင်း ပါဝင်ချင်သလား"

လုမင်က မေးလိုက်သည်။

"ကျွန်မ... ဟုတ်တယ်၊ ကျွန်မလည်း ပါဝင်ချင်တာ။ ကံမကောင်းချင်တော့ ရွေးချယ်မခံခဲ့ရဘူးလေ"

ချိုးရင်ရင်က မျှော်လင့်ချက်တို့ဖြင့် သက်ပြင်းချလိုက်လေသည်။

သူမ၏ ကျင့်ကြံမှုက ကောင်းမွန်သော်လည်း ခန္ဓာကိုယ်ဖွဲ့စည်းပုံမှာ အားနည်းလွန်းလှသည်။ သူ၏ ဝိညာဉ်ခန္ဓာက သာမာန်ဝိညာဉ်ခန္ဓာတစ်ခုမျှသာ ဖြစ်၏။ တင်းပေါင်ညီလာခံသို့ သူမ တက်ရောက်လိုလျှင်တောင်မှ ရွေးချယ်ခံရမည် မဟုတ်ပေ။

"ကောင်းပြီ၊ ဂိုဏ်းတူအစ်ကို ကျစ်ဖုန်းကို ငါ အသိပေးထားလိုက်မယ်။ နောက်‌ပြီးတော့ ဟောဒါက နတ်ဘုရားဓားပညာရပ်... အဲဒါက စိတ်ဝိညာဉ် လေ့ကျင့်မှုနဲ့ တိုက်ခိုက်မှုပညာရပ်ပဲ။ ယူလိုက်ပါ"

လုမင်က ကျောက်စိမ်းပြားတစ်ခုကို ချိုးရင်ရင်အား ပေးလိုက်သည်။ ၎င်းမှာ နတ်ဘုရားဓားပညာရပ်ပင်။

ချိုးရင်ရင်လည်း လက်ခံယူကာ ဝိညာဉ်အသိစိတ်ဖြင့် ကြည့်လိုက်ပြီးနောက် အလွန် ဝမ်းသာသွားသည်။

သူမ၏ ပုံရိပ်ယောင်ပညာရပ်က လျှို့ဝှက်ဆန်းကြယ်သော်လည်း တိုက်ခိုက်မှုအတွက် သိပ်ပြီး မကောင်းပေ။ နတ်ဘုရားဓားပညာရပ်၏ အကူအညီဖြင့်၊ ၎င်းက ကျားတစ်ကောင်သို့ အတောင်ပံများ တပ်ပေးလိုက်သကဲ့သို့ ဖြစ်သည်။

"လုမင်... ကျေးဇူးတင်ပါတယ်"

ချိုးရင်ရင်က ပြုံးလိုက်သည်။ ထို့နောက် တစ်ခုခုကို တွေးလိုက်မိပြီး သူ့လက်ထဲတွင် ကျောက်စိမ်းပြားတစ်ခု ပေါ်လာ၏။ သူမက လုမင်ကိုပေးလိုက်ပြီး ပြောသည်။

"လုမင်၊ ဒါက ကျွန်မ လေ့ကျင့်နေတဲ့ စိတ်ဝိညာဉ်ပညာရပ်ပဲ။ ရှင့်အတွက် အသုံးဝင်လောက်မှာပါ"

"ကောင်းပြီ၊ ဒါဆိုရင် ငါမယဉ်ကျေးတော့ဘူး"

လုမင်က တုံ့ဆိုင်းမနေတော့ဘဲ လက်ခံယူလိုက်သည်။ ချိုးရင်ရင်၏ ပုံရိပ်ယောင်နည်းလမ်းက လုမင်အတွက် အမှန်တကယ် အသုံးဝင်ပေသည်။

"ရင်ရင်၊ ဒီအချိန်အတွင်းမှာ မင်းရဲ့ ကျင့်ကြံမှုနဲ့ ကျွမ်းဝင်အောင် လေ့ကျင့်ထားပါ။ ခုနစ်ရက်ကြာရင် တင်းပေါင်ညီလာခံငယ်မှာ မင်း ပါဝင်ရမယ်"

လုမင်က နှုတ်ဆက်ပြီး ထွက်သွားသည်။

ထို့နောက် ဆုလဲ့ကိုရှာပြီး တင်းပေါင်ညီလာခံငယ်တွင် ပါဝင်စေလိုကြောင်း ပြောခဲ့၏။ ဆုလဲ့ကလည်း သဘာဝအတိုင်း သဘောတူခဲ့ပေသည်။

ဆုလဲ့ကလည်း တင်းပေါင်ညီလာငယ်တွင် ပါဝင်လိုခဲ့သည်။

ထို့နောက်တွင် လုမင်က သူ့အခန်းသို့ ပြန်သွားပြီး တောင်နှင့်မြစ်ပန်းချီကားအတွင်းသို့ ဝင်ရောက်ခဲ့ပေသည်။

တောင်ထိပ်တစ်ခုတွင် ကမ္ပည်းတာအို ဒုတိယခန္ဓာ ထိုင်နေသည်။ သူ့ခန္ဓာကိုယ်တွင် အစီရင်နိယာမ၏ စွမ်းအားများ စီးဆင်းနေ၏။ သူသည် ကျောက်စိမ်းအဆောင်တစ်ခုကို ကိုင်ထားကာ ရွှန်းစာလုံးများ ရေးထွင်းနေခြင်း ဖြစ်ချေသည်။

ပူဖောင်း‌လေးကလည်း ဒုတိယခန္ဓာ၏ ပခုံးပေါ်တွင်ရပ်နေသည်။ သူမက ကျောက်စိမ်းအဆောင်ကို သန့်စင်ရာတွင် ကူညီရန်အတွက် အချိန်ဟင်းလင်းပြင် နိယာမကို အသုံးပြုထား၏။

လုမင်က အချိန်ဟင်းလင်းပြင် ရွှေ့ပြောင်းခြင်း အဆောင်တစ်မျိုးကို ပြုလုပ်နေခြင်း ဖြစ်သည်။ ၎င်းတွင် အချိန်ဟင်းလင်းပြင် နိယာမကို တံဆိပ်ခတ်ထား၏။ အဆောင်ကို ချေမွလိုက်ပါက မီတာသုံးရာ အကွာသို့ ချက်ချင်း တည်နေရာရွှေ့ပြောင်းသွားနိုင်သည်။

လုမင်က ယခုတစ်ကြိမ် တင်းပေါင်ညီလာခံငယ်တွင် ပါဝင်မည့် နဂါးနတ်ဘုရားတောင်ကြားမှ တပည့်များအတွက် ဤကျောက်စိမ်းအဆောင်များကို သန့်စင်နေခြင်း ဖြစ်သည်။ နဂါးနတ်ဘုရားတောင်ကြား၏ တပည့်များကို လွန်ခဲ့သည့် သုံးနှစ်ခန့်ကကဲ့သို့ အခြားသူများ၏ သတ်ဖြတ်ခြင်းကို မခံစေလိုပေ။

ထို့နောက် မူလခန္ဓာ လုမင်က အခြားတောင်ထွတ်တစ်ခုပေါ်တွင် ပေါ်လာသည်။ သူ့လက်ကို ဝှေ့ယမ်းလိုက်သောအခါ သူ့ရှေ့မှာ နဂါးအရိုးတစ်ခု ပေါ်လာ၏။

ဤနဂါးအရိုးကို ကုစူးမြို့တော်၏ ဘိုးဘွားမြေမှ ရရှိလာခဲ့ခြင်း ဖြစ်သည်။

လုမင်က သူ၏ ဝါးမျိုခြင်းစွမ်းအားကို ထုတ်လွှတ်ပြီး နဂါးအရိုး၏ အနှစ်သာရကို စတင် သန့်စင်ခဲ့လေသည်။

အချိန်များ ကုန်လွန်သွားသည်။ မျက်စိတစ်မှိတ်အတွင်းမှာပင်၊ တင်းပေါင်ညီလာခံငယ် စတင်မည့်နေ့သို့ ရောက်လာပြီ။ ထိုအချိန်တွင်၊ လုမင်က နဂါးအရိုးကို သန့်စင်ပြီးသလောက်ဖြစ်သော်လည်း သူ၏ ဝိညာဉ်ခန္ဓာကတော့ မတိုးတက်ခဲ့ပေ။ သူက ကောင်းကင်အဆင့်နိမ့် ဝိညာဉ်ခန္ဓာ ဖြစ်နေဆဲပင်။

'မျှော်လင့်ထားတဲ့အတိုင်းပဲ... ကောင်းကင်ဝိညာဉ်ခန္ဓာ ဖြစ်လာပြီးနောက် ငါ့ရဲ့ ဝိညာဉ်ခန္ဓာက ဆင့်ကဲပြောင်းလဲဖို့ ခက်ခဲလွန်းလှတယ်။ အန္တိမသူတော်စင်အဆင့် အစစ်အမှန်နဂါးအရိုး ကီလိုဂရမ် တစ်ထောင့်ငါးရာကတော့ ငါ့ရဲ့ ဝိညာဉ်ခန္ဓာကို တိုးတက်စေကောင်းပါရဲ့'

လုမင် တွေးလိုက်သည်။

ထို့နောက် တောင်နှင့်မြစ်ပန်းချီကားအတွင်းမှ ထွက်ခဲ့လေသည်။

"ဂိုဏ်းတူ... ဂိုဏ်းတူအစ်ကိုလုမင်"

"လုမင်"

လုမင် ခြံဝင်းထဲတွင် ပေါ်လာသောအခါ ဆုလဲ့နှင့် ချိုးရင်ရင်တို့ ရောက်နေကြ‌ကြောင်း မြင်လိုက်ရသည်။

"ဆုလဲ့... ရင်ရင်၊ ငါနဲ့လိုက်ခဲ့ပါ"

လုမင်က ပြုံးပြီး ဆုလဲ့နှင့် ချိုးရင်ရင်ကို နဂါးနတ်ဘုရားတောင်ကြား၏ စခန်းရှိ နေရာလွတ်သို့ ခေါ်ဆောင်သွားခဲ့သည်။

ထိုနေရာတွင် လူဒါဇင်နှင့်ချီပြီး စုရုံးနေကြ၏။ သူတို့က တင်းပေါင်ညီလာခံငယ်တွင် ပါဝင်မည့် နဂါးနတ်ဘုရားတောင်ကြား၏ တပည့်များ ဖြစ်သည်။

သူတို့ရှေ့မှာလည်း လူနှစ်ယောက်ရှိ၏။ တစ်ယောက်က ထွားကျိုင်းသော လူကြီးတစ်ယောက်ဖြစ်ပြီး သူတော်စင်နယ်ပယ် အကြီးအကဲလည်း ဖြစ်သည်။ နောက်တစ်ယောက်ကတော့ ကျစ်ဖုန်းပင်။

လုမင်တို့ ရောက်လာသည်နှင့် အားလုံးက လုမင်ကို ကြည့်လိုက်ကြသည်။

အထူးသဖြင့် တင်းပေါင်ညီလာခံငယ်တွင် ပါဝင်မည့် တပည့်များက လုမင်အား လေးစားစွာဖြင့် ကြည့်လိုက်ကြလေသည်။

လွန်ခဲ့သည့်သုံးနှစ်က လုမင်သည် တင်းပေါင်ညီလာခံငယ်တွင် နဂါးနတ်ဘုရားတောင်ကြားကို ပထမနေရာရရှိအောင် ကူညီပေးခဲ့သည်။

"ဂိုဏ်းတူညီလေး လု၊ နောက်ဆုံးတော့ မင်း ရောက်လာပြီ"

လုမင်ကို တွေ့သောအခါ ကျစ်ဖုန်း၏ မျက်လုံးများက တောက်ပလာသည်။ သူက ပြုံးပြလိုက်၏။

"ဂိုဏ်းတူအစ်ကို ကျစ်ဖုန်း၊ အကြီးအကဲ"

လုမင်က ကျစ်ဖုန်းနှင့် သူတော်စင်နယ်ပယ် အကြီးအကဲကို လက်ယှက်ပြလိုက်သည်။

"လုမင်၊ မင်းက တင်းပေါင်ညီလာခံမှာ ပါဝင်ဖို့ လူတချို့ကို အကြံပြုချင်တယ်လို့ ကျစ်ဖုန်းဆီကနေ ငါကြားတယ်"

ဆုလဲ့နှင့် ချိုးရင်ရင်ကိုကြည့်ရင်း သူတော်စင်နယ်ပယ် အကြီးအကဲက မေးလိုက်သည်။

"ဟုတ်ပါတယ်၊ အဲဒါက သူတို့ပဲ"

လုမင်က ချိုးရင်ရင်နှင့် ဆုလဲ့ကို ညွှန်ပြလိုက်၏။

ဆုလဲ့နှင့် ချိုးရင်ရင်ကိုကြည့်ရင်း သူတော်စင်နယ်ပယ် အကြီးအကဲ၏ မျက်လုံးများက ထူးခြားသော အလင်းရောင်တစ်ခု လက်သွားသည်။

သူက ဆုလဲ့ကို စိုက်ကြည့်ရင်း ခေါင်းညိတ်ပြီး ပြောလိုက်၏။

"သူ့ရဲ့ ခန္ဓာကိုယ်က အားကောင်းတဲ့ စွမ်းအင်တွေ စီးဆင်းနေပြီး အသက်ဓာတ်က ပြင်းထန်တယ်။ ‌ဒါက မြေကမ္ဘာအဆင့်မြင့် ဝိညာဉ်ခန္ဓာတစ်ခုပဲ။ သူ့ရဲ့ ကျင့်ကြံမှုကလည်း ဆဋ္ဌမအဆင့် သိုင်းအုပ်ချုပ်သူနယ်ပယ်ရဲ့ အထွတ်အထိပ်ကို ရောက်ရှိနေပြီ။ နဂါးနတ်ဘုရားတောင်ကြားမှာ ဒီလိုမျိုး ပါရမီရှင်တစ်ယောက် ရှိတယ်ဆိုတာ ငါမသိခဲ့ဘူး"

"ဒါပေမဲ့... ဒီမိန်းကလေးမှာ သာမာန်ဝိညာဉ်ခန္ဓာပဲ ရှိပုံရတယ်။ လုမင်... မင်း သူ့ကို ပါဝင်စေချင်တာ သေချာလား"

သူတော်စင်နယ်ပယ် အကြီးအကဲက ချိုးရင်ရင်ကို သံသယစိတ်ဖြင့် ကြည့်လိုက်သည်။

"စိတ်မပူပါနဲ့ အကြီးအကဲ၊ အချိန်ကျရင် သူက အားလုံးကို အံ့သြစေလိမ့်မယ်"

လုမင် ပြုံးလိုက်၏။

"ကောင်းပြီ၊ လူပြောင်းလိုက်ရအောင်"

သူတော်စင်နယ်ပယ် အကြီးအကဲက ပြောလိုက်သည်။ ထို့နောက် သူက အားအနည်းဆုံး တပည့်နှစ်ယောက်နေရာတွင် ချိုးရင်ရင်နှင့် ဆုလဲ့ကို ထည့်သွင်းလိုက်၏။

ထိုအချိန်တွင်၊ လုမင်က သူ့လက်ကို ဝှေ့ယမ်းလိုက်သောအခါ ကျောက်စိမ်းအဆောင်များ လေထဲတွင် ပေါ်လာသည်။ စုစုပေါင်း သုံးဆယ့်ခြောက်ခု ရှိ၏။

"ဂိုဏ်းတူတို့... ဒီတစ်ခေါက် တင်းပေါင်ညီလာခံမှာ ကောင်းကင်နတ်ဘုရားဂိုဏ်း၊ ကောင်းကင်နတ်ဆိုးဂိုဏ်းနဲ့ ကောင်းကင်အဆိပ်ဂိုဏ်းတို့က ငါတို့ကို ပစ်မှတ်ထားနိုင်တယ်။ ဒါက လွန်ခဲ့တဲ့ သုံးနှစ်ကလို အင်မတန် အန္တရာယ်များဦးမှာပဲ"

လုမင် ပြောလိုက်သည်။ လူများစွာ၏ မျက်နှာအမူအရာများ ပြောင်းလဲသွားပြီး အကြောက်တရားများ ပေါ်လာ၏။

အမှန်ပင်၊ သူတို့ကို လွန်ခဲ့သော သုံးနှစ်ကကဲ့သို့ ကောင်းကင်နတ်ဘုရားဂိုဏ်းနှင့် အခြားဂိုဏ်းများက ပစ်မှတ်ထားလျှင် အားနည်းသော တပည့်အချို့ အန္တရာယ်ရှိလိမ့်မည်။

သို့သော်လည်း နဂါးနတ်ဘုရားတောင်ကြားက သူတို့ကို ပါဝင်ရန် အမိန့်ပေးသည့်အတွက် ပါဝင်ကြရမည် ဖြစ်သည်။ သူတို့ အသက်ရှင်ရန်အတွက် အစွမ်းကုန်ကြိုးစားရန်သာ တတ်နိုင်လေသည်။

"ဒါပေမဲ့ ဒီတစ်ခါတော့ မင်းတို့ကို လွန်ခဲ့တဲ့ သုံးနှစ်လောက်ကလို အမှားလုပ်ခွင့်မပေးဘူး။ မင်းတို့ တစ်ယောက်စီမှာ ကျောက်စိမ်းအဆောင် တစ်ခုစီ ရှိမယ်။ အန္တရာယ်ကြုံပြီရင် ကျောက်စိမ်းအဆောင်ကို ချေမွပြီး မီတာသုံးရာ အကွာအဝေးကို ရွှေ့ပြောင်းသွားလို့ရတယ်"

လုမင် ပြောလိုက်၏။

ဤစကားများသည် သူတော်စင်နယ်ပယ် အကြီးအကဲနှင့် ကျစ်ဖုန်း အပါအဝင် လက်ရှိ တပည့်များအားလုံး၏ မျက်လုံးများကို စိတ်အားထက်သန်မှုဖြင့် ပူလောင်စေခဲ့သည်။

အရေးကြီးသောအခိုက်အတန့်တွင် ၎င်းတို့၏ အသက်များကို ကယ်တင်နိုင်သည့် ဤကဲ့သို့သော ရတနာမျိုးရှိမည်ဟု သူတို့ မမျှော်လင့်ခဲ့ပေ။

လုမင်က သူ့လက်ကို ဝှေ့ယမ်းလိုက်သောအခါ ကျောက်စိမ်းအဆောင် သုံးဆယ့်ခြောက်ခုက ပါဝင်သူတပည့် သုံးဆယ့်ခြောက်ယောက်ဆီသို့ တစ်ခုစီ လွင့်မျောသွားကြသည်။