အခန်း ၁၆၉၉

အပိုင်း ( 1699 ) နတ်ဘုရားသားတော်ကို သတ်ခြင်း။

လုမင်၏ မျက်လုံးများမှ အနက်ရောင် အလင်းတန်းနှစ်ခုကို ပစ်လွှတ်လိုက်ပြီး နတ်ဘုရားသားတော်၏ ခန္ဓာကိုယ်ထဲသို့ ထိုးဖောက်ဝင်ရောက်သွားသည်။ နတ်ဘုရားသားတော်မှာ သူ၏နတ်ဘုရားဝိညာဉ် ကွဲအက်သွားသလို ခံစားလိုက်ရ၏။ သူ၏ ခန္ဓာကိုယ်ရှိ ယွမ်ချီစွမ်းအင်များလည်း လည်ပတ်မှု ရပ်တန့်သွားတော့သည်။

"ရွှပ်"

လုမင်၏ ဓားက နတ်ဘုရားသားတော်၏ ဒန်တျန်ကို ထိုးဖောက်သွားကာ သူတော်စင်နှလုံးသားကို ကွဲကြေစေခဲ့သည်။ နတ်ဘုရားသား‌တော်၏ နိယာမစွမ်းအားက အလင်းတန်းတစ်ခုကဲ့သို့ ကောင်ကင်ကို ထိုးဖောက်သွားလေသည်။

"မဟုတ်ဘူး"

ကောင်းကင်နတ်ဘုရားဂိုဏ်း၏ မဟာသူတော်စင်က ဟိန်းဟောက်လိုက်သည်။

နတ်ဘုရားသားတော်၏ မျက်လုံးများက ပြူးကျယ်ကာ ဒေါသနှင့် ပြည့်နှက်နေ၏။

သူ၏ အရည်အချင်းဖြင့် အနာဂတ်တွင် စန်းပြည်နယ်၏အုပ်စိုးရှင် ဖြစ်လာမည်မှာ သေချာသည်။ သို့သော်လည်း ကံမကောင်းချင်တော့ လုမင်နှင့် တွေ့ခဲ့ရလေသည်။

လွန်ခဲ့သည့်သုံးနှစ်က လုမင်သည် စတုတ္ထအဆင့် သိုင်းအုပ်ချုပ်သူနယ်ပယ် ကျင့်ကြံသူတစ်ဦးသာ ဖြစ်သည်။ နတ်ဘုရားသားတော်ကတော့ သူတော်စင်တစ်ပိုင်းအဆင့်သို့ ရောက်ရှိနေခဲ့၏။ ထိုစဉ်က သူသည် လုမင်ကို လုံးဝ အလေးအနက်မထားခဲ့ပေ။ သူ့အမြင်တွင် လုမင်က အလွယ်တကူ နင်းချေပြီး သတ်ပစ်နိုင်သော ပုရွက်ဆိတ် ဖြစ်သည်။

ချီလုံနဂါးရေကန်တွင် သူက လုမင်နှင့် အခြားသူများကို ရှုတ်ချထားခဲ့သည်။ နောက်ပိုင်းတွင်၊ လုမင်နှင့် အခြားသူများက နဂါးနန်းတော်၏ ရတနာများကို ရရှိခဲ့သောအခါ သူ မျက်နှာပျက်သွားသည်ဟု ခံစားလိုက်ရလေသည်။ ထို့ကြောင့် သူက လုမင်ကို တင်းပေါင်ညီလာခံငယ်တွင် သတ်ပစ်ချင်ခဲ့သည်။

ထိုအချိန်တွင် လုမင်က သူ့ကို စိန်ခေါ်ခဲ့သော်လည်း သူကတော့ အလေးအနက်မထားခဲ့ပေ။ ရန်ထျန်းကျုံးအတွက်သာမဟုတ်လျှင် လုမင်ကို တစ်ခါတည်း သတ်လိုက်ပြီး ဖြစ်သည်။ ထို့နောက်တွင် စိန်ခေါ်မှုကို သူ သဘောတူခဲ့သော်လည်း စိတ်ထဲမှာတော့ အလေးအနက်မထားခဲ့ပေ။

စတုတ္ထအဆင့် သိုင်းအုပ်ချုပ်သူတစ်ပါးက သုံးနှစ်အတွင်းမည်မျှအားကောင်းနိုင်မည်နည်း။ သူက ပုရွက်ဆိတ်တစ်ကောင်သာ ဖြစ်နေသေးပြီး အလွယ်တကူ သတ်နိုင်သည်။

သို့သော်လည်း တင်းပေါင်ညီလာခံ စတင်သောအခါ လုမင်၏ တိုက်ခိုက်နိုင်စွမ်းက သူ၏ မျှော်လင့်ချက်များကို ကျော်လွန်သွားခဲ့သည်။ သူက လော့ရွှေဟန်ကို အလွယ်တကူ သတ်ပစ်လိုက်၏။

သို့တိုင်၊ ထိုအချိန်ထိ သူက အလေးအနက်မထားသေးပါ။ သူက တောက်ပသော သူတော်စင်နယ်ပယ် အဆင့်မြင့်အဆင့်သို့ ရောက်နေပြီး ဝှက်ဖဲများလည်း များစွာ ရှိသည်။ လုမင်က မည်မျှပင် သန်မာနေစေကာမူ သူတော်စင်တစ်ပိုင်းသာဖြစ်ကာ သူ၏ပြိုင်ဘက် မဖြစ်နိုင်ပေ။

သို့သော်လည်း လက်တွေ့ တိုက်ခိုက်ရသောအခါမှ သူမှားမှန်းသိလိုက်ရသည်။

အမှားတစ်ခုအတွက် ပေးဆပ်ရတာကတော့ သူ၏ အသက်ပင်။

"ရှန်းကျစ်၊ မင်းက လော့ရွှေဟန်ထက် သန်မာပါတယ်။ ငါ မင်းကို မြန်မြန်သေစေမယ်"

လုမင်က အေးစက်စက် ပြောလိုက်သည်။ သူ၏ဓားက တုန်ခါသွားပြီးနောက် အားကောင်းသော အဖျက်စွမ်းအားက နတ်ဘုရားသားတော် ခန္ဓာကိုယ်ထဲသို့ တိုးဝင်လာ၏။ နတ်ဘုရားသားတော်မှာ ဒေါသတကြီး အော်ဟစ်ရင်းမှပင် ပြာမှုန်အဖြစ်သို့ ပြောင်းလဲသွားတော့သည်။

နတ်ဘုရားသားတော် သေသွားပြီ။

ထိုအချိန်တွင် လူအားလုံး စိတ်ရှုပ်ထွေးသွားကြသည်။ သူတို့၏စိတ်ထဲတွင် ခံစားချက်များက ရှုပ်ထွေးနေ၏။

စန်းပြည်နယ်တွင် ပါရမီရှင်များစွာကို ဆယ်စုနှစ်တစ်ခုကျော် ဖိနှိပ်ထားခဲ့သော နတ်ဘုရားသားတော်သည် သူ့ထက်အားနည်းသော ကျင့်ကြံမှုဖြင့် လူငယ်တစ်ဦး၏ သတ်ဖြတ်ခြင်းကို ခံခဲ့ရပြီ ဖြစ်သည်။

နတ်ဘုရားသားတော်၏ သေဆုံးခြင်းက ပို၍ပင် ကြောက်စရာကောင်းသော ပါရမီရှင်တစ်ဦး မွေးဖွားလာခဲ့သည့် အဓိပ္ပာယ်ပင်။

အနာဂတ်တွင်၊ မည်သူက လုမင်၏ပြိုင်ဘက် ဖြစ်မည်နည်း။

စန်းဧကရာဇ်ပြီးနောက် နောက်ထပ် ဧကရာဇ်ကြီးတစ်ပါးက စန်းပြည်နယ်တွင် မွေးဖွားလာတော့မည်လော။

"ဒါက ဘယ်လိုဖြစ်ရတာလဲ"

ကောင်းကင်နတ်ဆိုးဂိုဏ်းဘက်တွင်‌ မော့ယန်က တုန်လှုပ်စွာဖြင့် ရေရွတ်လိုက်မိသည်။

"လုမင်၊ နင် ငါ့ကို စိတ်မပျက်စေခဲ့ဘူး"

ကောင်းကင်နတ်ဘုရားဂိုဏ်းဘက်တွင် ရှဲ့နျန်ကျွင်းက ခပ်တိုးတိုး ပြောလိုက်၏။ သူမ၏ မျက်လုံးများက တောက်ပနေသည်။ နတ်ဘုရားသားတော် ကျဆုံးသွားပြီးနောက် ကောင်းကင်နတ်ဘုရားဂိုဏ်းက သူမ၏လက်ကို ကျရောက်လာလိမ့်မည်။ သူမကို မည်သူမျှ ယှဉ်နိုင်မည် မဟုတ်ပေ။

"လုမင်၊ ငါ မင်းကို မင်းရဲ့အသက်နဲ့ ပြန်ပြီး ပေးဆပ်ရစေမယ်ကွ"

ကောင်းကင်နတ်ဘုရားဂိုဏ်း၏ မဟာသူတော်စင်က ဟိန်းဟောက်လိုက်သည်။ သူသည် လုမင်ကို အပိုင်းပိုင်း ခုတ်ထစ်ပစ်ချင်စိတ်များပင် ဖြစ်နေ၏။

သို့သော်လည်း ခရမ်းရောင်နဂါး တောင်ကြားသခင်က သူ့ကို တားဆီးထားကာ မလွတ်မြောက်နိုင်ပေ။

အခြားဂိုဏ်းများမှ လူများကလည်း အေးစက်စက်ဖြင့် ကြည့်ရုံသာ ကြည့်နေကြသည်။ မည်သူမျှ ဝင်မစွက်ဖက်ပေ။

ဤသည်မှာ တင်းပေါင်ညီလာခံ မဟုတ်ပါ။ လုမင်နှင့် နတ်ဘုရားသားတော်တို့ကြားမှ ပုဂ္ဂိုလ်ရေးရန်ငြိုးတစ်ခုသာဖြစ်သည်။ သူတို့က ဝင်စွက်ဖက်စရာ အကြောင်းမရှိပေ။

ထို့ပြင်၊ ကောင်းကင်နတ်ဘုရားဂိုဏ်းက နှစ်များအတွင်း လျင်မြန်စွာ တိုးတက်လာခဲ့သည်။ သူတို့က စန်းပြည်နယ်တွင် နံပါတ်တစ်ဂိုဏ်း ဖြစ်လာခဲ့၏။ နတ်ဘုရားသားတော်သာ အနာဂတ်တွင် ကြီးပြင်းလာပါက၊ ကြီးမားသော ရန်သူတော်ကြီး ဖြစ်လိမ့်မည်။

သို့သော်…

ဂိုဏ်းပေါင်းစုံမှ ကျွမ်းကျင်သူများက လုမင်ကို ကြည့်လိုက်ကြသည်။

လုမင်က ​​အနာဂတ်တွင် ကြီးပြင်းလာသောအခါ ဘယ်သူက ယှဉ်နိုင်ဦးမည်နည်း။

ကောင်းကင်နတ်ဘုရားဂိုဏ်းနှင့် ကောင်းကင်နတ်ဆိုးဂိုဏ်းနှင့် ကောင်းကင်အဆိပ်ဂိုဏ်းကဲ့သို့ ဂိုဏ်းများမှ ပညာရှင်များ၏ မျက်လုံးများမှာ အရောင်လက်နေကြသည်။ သူတို့၏စိတ်ထဲတွင် ဘာတွေတွေးနေသလဲတော့ မသိရပေ။

"ဝုန်း... ဝုန်း"

ခရမ်းရောင်နဂါး တောင်ကြားသခင်နှင့် ကောင်းကင်နတ်ဘုရားဂိုဏ်း၏ မဟာသူတော်စင်က တိုက်ခိုက်မှု ဒါဇင်အနည်းငယ်ခန့် အပြန်အလှန် ရင်ဆိုင်ပြီးနောက် ဆုတ်ခွာသွားကြသည်။

ခရမ်းရောင်နဂါး တောင်ကြားသခင်က လုမင်ကိုကာကွယ်ရန် လုမင်ဘက်သို့ ဆုတ်သွား၏။

ကောင်းကင်နတ်ဘုရားဂိုဏ်း၏ မဟာသူတော်စင်မှာ လက်မခံလိုသော အမူအရာဖြင့် အံတကြိတ်ကြိတ် ဖြစ်နေသည်။ ယနေ့တွင် လုမင်ကို မသတ်နိုင်တော့ကြောင်း သူသိသည်။

ကောင်းကင်နတ်ဘုရားဂိုဏ်းက ဤတင်းပေါင်ညီလာခံတွင် လုံးဝ ရှုံးနိမ့်သွားခဲ့ပြီ။ သူတို့၏ အထူးချွန်ဆုံး ပါရမီရှင် နှစ်ယောက်စလုံး သေဆုံးသွားခဲ့သည်။ ဆုံးရှုံးမှုက ကြီးမားလွန်း၏။ သူ ပြန်သွားလျှင် မည်သို့ရှင်းပြရမည်မှန်း မသိတော့ပေ။

"လုမင်... နဂါးနတ်ဘုရားတောင်ကြား၊ ငါ့ရဲ့ ကောင်းကင်နတ်ဘုရားဂိုဏ်းက ဒီအကြွေးကို မှတ်ထားတယ်။ မင်းတို့တွေ အနှေးနဲ့အမြန် ပြန်ပြီးပေးဆပ်ရလိမ့်မယ်"

ကောင်းကင်နတ်ဘုရားဂိုဏ်း၏ မဟာသူတော်စင်က လုမင်ကို ကြည့်လိုက်သည်။ သူက ပြင်းထန်သော သတ်ဖြတ်ချင်စိတ်တို့ကို ဖုံးကွယ်မထားပေ။ ထို့နောက် သူ့လက်ကိုဝှေ့ယမ်းကာ အော်ပြောလိုက်သည်။

"ကောင်းကင်နတ်ဘုရားဂိုဏ်းရဲ့ တပည့်တွေ၊ သွားကြစို့"

ထို့နောက် သူက လေထဲသို့ပျံတက်ကာ ထွက်သွား၏။ ကောင်းကင်နတ်ဘုရားဂိုဏ်း၏ အကြီးအကဲများနှင့် တပည့်များအားလုံး သူ့နောက်သို့ လိုက်သွားကြတော့သည်။

"ဟားဟားဟား၊ လုမင် တော်တယ်"

ခရမ်းရောင်နဂါး တောင်ကြားသခင်က လုမင်၏ အနားသို့ ရောက်လာပြီး ပြုံးလိုက်သည်။

သို့သော်လည်း စကားအဆုံးတွင် သူ့မျက်နှာအမူအရာက ပြောင်းလဲသွား၏။ သူက ကောင်းကင်နတ်ဘုရားဂိုဏ်း၏ ဦးတည်ရာသို့ လှမ်းကြည့်လိုက်သည်။ လုမင်မှာလည်း အလားတူပင်။

"ဝုန်း"

အနက်ရောင် လက်ကြီးတစ်စုံက မဝေးသော ကောင်းကင်ယံ၌ ရုတ်တရက် ပေါ်လာသည်။ လက်ကြီးက တောင်တစ်လုံးထက်တောင် ပိုကြီးပြီး ကောင်းကင်နတ်ဘုရားဂိုဏ်းမှ လူများကို ဖမ်းဆီးလိုက်၏။

"ဘယ်သူလဲကွ၊ သေချင်နေတာလား"

ကောင်းကင်နတ်ဘုရားဂိုဏ်း၏ မဟာသူတော်စင်မှာ ဒေါသတကြီး ဖြစ်သွားသည်။ သူ့လက်ထဲတွင် လှံရှည်တစ်လက်ပေါ်လာပြီး ဧရာမလက်ကြီးကို ထိုးသွင်းလိုက်တော့သည်။

သို့သော်၊ ကောင်းကင်နတ်ဘုရားဂိုဏ်းမှ မဟာသူတော်စင်က လှုပ်ရှားလိုက်ချိန်တွင် စန်းတောင်ဘက်မှ ကြောက်မက်ဖွယ်ကောင်းသော ဓားအလင်းအချို့ ထွက်ပေါ်လာသည်။ ဓားအလင်းများက မိုင်ရာချီ အကွာအဝေးကို ချက်ချင်း ဖြတ်ကျော်ကာ ကောင်းကင်နတ်ဘုရားဂိုဏ်း၏ လူများထံသို့ ဖြတ်သန်းသွားတော့သည်။

"ဝုန်း... ဝုန်း"

ဓားအလင်းအောက်တွင် ကောင်းကင်နတ်ဘုရားဂိုဏ်း၏ တပည့် ဒါဇင်ပေါင်းများစွာ သေဆုံးသွားကြသည်။

"ဝုန်း"

ကောင်းကင်နတ်ဘုရားဂိုဏ်းမှ မဟာသူတော်စင်၏ လှံရှည်က ဧရာမလက်ကြီးကို ထိုးဖောက်သွားသည်။ သို့သော်၊ လူရိပ်တချို့က စန်းတောင်မှ ပြေးထွက်လာပြီး လျှပ်စီးလက်သကဲ့သို့ ကောင်းကင်နတ်ဘုရားဂိုဏ်းမှလူများထံ ပြေးသွားကြ၏။ ခေါင်းဆောင်က ကြောက်စရာကောင်းသော အရှိန်အဝါများ ထွက်ပေါ်နေသည်။ သူက မဟာသူတော်စင်တစ်ပါးပင်။

အခြားလူများမှာလည်း သူတော်စင်နယ်ပယ် ကျွမ်းကျင်သူများ ဖြစ်ကြသည်။

သူတို့က မရောက်ခင်မှာပင် ကောင်းကင်နတ်ဘုရားဂိုဏ်းမှ လူများအပေါ် ကြောက်စရာကောင်းသော တိုက်ခိုက်မှု အမျိုးမျိုးကို စတင်ခဲ့ပေသည်။

"မင်းတို့ ဘယ်သူတွေလဲ"

ကောင်းကင်နတ်ဘုရားဂိုဏ်း၏ မဟာသူတော်စင်မှာ ဒေါသပေါက်ကွဲသွားသည်။ သူက ကောင်းကင်နတ်ဘုရားဂိုဏ်း၏ တပည့်များရှေ့တွင် ဝင်ရပ်လိုက်သည်။ သူတော်စင်အလင်းက လေထဲတွင် ပြည့်နေ၏။ ကောင်းကင်နတ်ဘုရားဂိုဏ်း၏ အခြားသူတော်စင်များကလည်း တိုက်ခိုက်မှုများကို တားဆီးရန် ရှေ့တွင် ပိတ်ရပ်လိုက်ကြသည်။

စန်းတောင်ထိပ်တွင် လူတိုင်းက အံ့ဩသွားကြသည်။ ကောင်းကင်နတ်ဘုရားဂိုဏ်းကို တိုက်ခိုက်နေသူများက မည်သူဖြစ်သနည်း။

အခြားဂိုဏ်းအချို့က ကောင်းကင်နတ်ဘုရားဂိုဏ်းကို ပစ်မှတ်ထားနေခြင်းဖြစ်မည်လော။

သို့သော်လည်း ထိုအခိုက်တွင် စန်းတောင်၏ ပတ်ဝန်းကျင်မှ ကြောက်မက်ဖွယ်ကောင်းသော အငွေ့အသက်များ ထွက်ပေါ်လာသည်။ ကြောက်မက်ဖွယ်ကောင်းသော ဓားအလင်းများနှင့် ဆေဘာအလင်းများက တက်လာပြီး ဂိုဏ်းပေါင်းစုံမှ လူများကို တိုက်ခိုက်လိုက်တော့သည်။

"မကောင်းတော့ဘူး၊ ရန်သူတိုက်ခိုက်နေပြီ"

"တားဆီးကြ"

လူများစွာ၏ မျက်နှာအမူအရာ ပြောင်းလဲသွားကြသည်။ ဂိုဏ်းပေါင်းစုံမှ သူတော်စင်များက တိုက်ခိုက်မှုများကို တားဆီးရန် ချက်ချင်း လှုပ်ရှားကြ‌တော့သည်။

"ဝှစ်... ဝှစ်... ဝှစ်"

ထိုအခိုက်တွင်၊ လူအများအပြားက စန်းတောင်၏ ပတ်ဝန်းကျင်မှ ပြေးထွက်လာကြသည်။ အနက်ရောင် ၀တ်ရုံများ ခြုံထားသော်လည်း ၎င်းတို့ထံမှ ထွက်ပေါ်လာသည့် ရောင်ဝါများက အလွန်ကြောက်စရာကောင်း၏။ သူတို့၏ အရှိန်အဝါများက ကျယ်ပြောပြီး တန်ခိုးကြီးကာ ကောင်းကင်ကို ဖြိုခွင်းလိုက်သည်။

လူအရေအတွက်ကလည်း အံ့ဩစရာပင်။ အနည်းဆုံး လူငါးဆယ်မှ ခြောက်ဆယ်အထိ ရှိပြီး ၎င်းတို့အားလုံးက သူတော်စင်များ ဖြစ်ကြသည်။ ပင်လယ်ကဲ့သို့ နက်ရှိုင်းပြီး နားမလည်နိုင်သော အငွေ့အသက်များဖြင့် လူဆယ်ယောက်ကျော်ပင် ရှိသေးသည်။ ၎င်းတို့က ခရမ်းရောင်နဂါး တောင်ကြားသခင်နှင့် ကောင်းကင်နတ်ဘုရားဂိုဏ်း၏ မဟာသူတော်စင်များထက် အားမနည်းကြပေ။

ရုတ်တရက် ပေါ်လာကြသော လူများထဲတွင် တစ်ဒါဇင်ခန့်က မဟာသူတော်စင်နယ်ပယ်တွင် ရှိကြသည်။

"သတ်... အားလုံးကိုသတ်ကြ၊ ဘယ်သူမှ အသက်မရှင်စေနဲ့"

ဝတ်စုံနက်ဝတ် လူတစ်ဦးက အေးစက်စက် ပြောလိုက်သည်။

"သတ်"

ဒါဇင်ချီသော သူတော်စင်များက လမ်းကြောင်းမျိုးစုံမှ စန်းတောင်ထိပ်ကို ပြေးတက်သွားကြ၏။

"တိုက်ခိုက်ကြ"

ထိုအချိန်တွင် စန်းတောင်ထိပ်ရှိ ကျွမ်းကျင်သူများက ပေါက်ကွဲသွားကြသည်။ ထိပ်တန်းအင်အားစု ဆယ့်နှစ်ခုမှ တောက်ပသော သူတော်စင်များနှင့် မဟာသူတော်စင်များအားလုံးကို တစ်ပြိုင်နက်တည်း တိုက်ခိုက်လိုက်၏။

ကောင်းကင်နှင့်မြေပြင်ကြားတွင် ကြောက်မက်ဖွယ်ကောင်းသော ပေါက်ကွဲသံတစ်ခု ထွက်ပေါ်လာတော့သည်။

ခရမ်းရောင်နဂါး တောင်ကြားသခင်က ဝတ်စုံနက်ဝတ် လူတစ်ဦးကို တိုက်ခိုက်လိုက်သည်။ ထိုလူက မဟာသူတော်စင်ဖြစ်ပြီး ခရမ်းရောင်နဂါး တောင်ကြားသခင်ထက် အားမနည်းပေ။ နှစ်ယောက်သား အပြင်းအထန် တိုက်ခိုက်လိုက်ကြသည်။

အခြားဂိုဏ်းကြီးများ၏ မဟာသူတော်စင်များကလည်း ပြိုင်ဘက်များကို အသီးသီး တိုက်ခိုက်လိုက်တော့သည်။