အခန်း ၁၇၀၉

အပိုင်း ( 1709 ) တိမ်နဂါးတောင်ကြားသခင်၏ အင်အား။

တိမ်နဂါးတောင်ကြားသခင်က သူ့ဓားကို လွှဲခုတ်လိုက်သောအခါ အစစ်အမှန်နဂါးသုံးကောင် ပေါ်လာသည်။ အစစ်အမှန်နဂါး တစ်ကောင်စီက အလွန်ကြောက်စရာကောင်းပြီး ကောင်းကင်နတ်ဘုရားဂိုဏ်းကို တိုက်ခိုက်လိုက်၏။

ကောင်းကင်နတ်ဘုရားဂိုဏ်း၏ မျက်နှာက လေးနက်လာသည်။ သူက နိယာမစွမ်းအားကို ဖြန့်ကျက်ရင်း တိမ်နဂါးတောင်ကြားသခင်ကို ရင်ဆိုင်လိုက်သည်။

နဂါးဟိန်းသံများ ထွက်ပေါ်လာသလို လှံရှည်များကလည်း လေထုထဲသို့ ထိုးဖောက်သွားသည်။ တိုက်ပွဲက ပိုပြီး ပြင်းထန်လာ၏။

တုန်လှုပ်စရာကောင်းသည်မှာ ဆယ်ကြိမ်တိုင်တိုင် ထိပ်တိုက်ရင်ဆိုင်ပြီးနောက်၊ ကောင်းကင်နတ်ဘုရားဂိုဏ်း၏ ဂိုဏ်းချုပ်မှာ အားနည်းချက်ရှိလာခြင်း ဖြစ်သည်။

ယင်းက လူတိုင်းကို ထိတ်လန့်စေခဲ့ပေသည်။

"မင်းလည်း လာခဲ့"

တိမ်နဂါး‌တောင်ကြားသခင်၏ အသံကို အဆုံးမဲ့ဓားအလင်းမှ ကြားလိုက်ရသည်။ အစစ်အမှန်နဂါးကြီးတစ်ကောင်က ဟိန်းဟောက်ပြီး ကောင်းကင်နတ်ဆိုးဂိုဏ်းချုပ်ထံသို့ ဦးတည်သွား၏။

တိမ်နဂါးတောင်ကြားသခင်က ကောင်းကင်နတ်ဘုရားဂိုဏ်းချုပ်နှင့် ကောင်းကင်နတ်ဆိုးဂိုဏ်းဂိုဏ်းချုပ်တို့ကို တစ်ပြိုင်နက်တည်း တိုက်ခိုက်လိုသည်။

"နင့်ရဲ့ ဆန္ဒအတိုင်းပဲ"

ကောင်းကင်နတ်ဆိုးဂိုဏ်းချုပ်က အေးစက်စက် ပြောလိုက်၏။ နတ်ဆိုးအလင်းက ကောင်းကင်သို့ ဖြာတက်သွားပြီး နတ်ဆိုးအလင်းရောင်ဖြင့် ကောင်းကင်တစ်ဝက်ကို ဖုံးလွှမ်းသွားတော့သည်။

သူမက သူ့လက်ကို ဝှေ့ယမ်းလိုက်သောအခါ အဆုံးမဲ့ အနက်ရောင်နတ်ဆိုးကြာပန်းများ ပေါ်လာသည်။ သူက တိမ်နဂါးတောင်ကြားသခင်ကို တိုက်ခိုက်လိုက်၏။

"တိမ်နဂါး ကိုးကောင် ဖော်ဆောင်ခြင်း"

တိမ်နဂါးတောင်ကြားသခင်၏ စကားသံအဆုံးတွင် အစစ်အမှန်နဂါးကိုးကောင် ပေါ်လာတော့သည်။

ဤအစစ်အမှန်နဂါး တစ်ကောင်စီကို အဆုံးမဲ့ဓားအလင်းများဖြင့် ဖွဲ့စည်းထားသည်။ ၎င်းတို့ တစ်ကောင်ချင်းစီက အလွန်ကြောက်စရာကောင်းပြီး မိုးနှင့်မြေကို ဖြိုချနိုင်ပုံရ၏။

အကျော်အမော် သုံးဦးက ပြင်းပြင်းထန်ထန် တိုက်ခိုက်နေကြပြီး အနိုင်ရသူကို ခဏချင်း ဆုံးဖြတ်ရန် ခက်ခဲသည်။

လူတော်တော်များများက အသက်ပြင်းပြင်းရှူလိုက်ကြလေသည်။ တိမ်နဂါးတောင်ကြားသခင်က အလွန်အစွမ်းထက်သည်။ သူသည် ဂိုဏ်းချုပ်နှစ်ဦးကို တစ်ယောက်တည်း တိုက်ခိုက်နေသော်လည်း လက်ရည်ညီနေဆဲပင်။

စန်းပြည်နယ်တွင် ဤသို့သော တိုက်ခိုက်နိုင်စွမ်းရှိသူက ဘယ်လောက်များများရှိလို့လဲ။

လူအများကြားတွင် ရေခဲနဂါးတောင်ကြားသခင်၏ မျက်နှာကတော့ သုန်မှုန်နေသည်။

လက်သီးကို တင်းတင်းဆုပ်ထားရင်း သူ့ခန္ဓာကိုယ်က တုန်လှုပ်နေ၏။ သူ့မျက်နှာမှာလည်း ဖြူဖျော့နေပြီး မျက်လုံးများမှာ မယုံနိုင်မှုတို့ ပြည့်နေတော့သည်။

တိမ်နဂါးတောင်ကြားသခင်ကို ထိုအဆင့်သို့ ရောက်နေပြီဟု သူဘယ်တုန်းကမှ မထင်ထားခဲ့ပေ။ ယခင်က တိမ်နဂါးတောင်ကြားသခင်သည် သူ့ကိုတိုက်ခိုက်ခဲ့ချိန်တွင် အင်အားများစွာ အသုံးမပြုခဲ့ကြောင်း ထင်ရှားသည်။ မဟုတ်ပါက၊ သူ့ကို ဓားတစ်ချက်တည်းဖြင့် သတ်ခဲ့လိမ့်မည်။

'ချီးပဲ၊ ဒီလူက သက်သက်မဲ့ နှိမ့်ချနေခဲ့တာပဲ။ နှစ်ပေါင်းများစွာကြာပြီးနောက် သူ့ရဲ့ခွန်အားက ကြောက်စရာကောင်းတဲ့ အဆင့်ကို ရောက်သွားပြီ'

ငွေနဂါးတောင်ကြားသခင်က သူ့စိတ်ထဲမှ အော်ဟစ်လိုက်သည်။

ကောင်းကင်နတ်ဘုရားဂိုဏ်းနှင့် ကောင်းကင်နတ်ဆိုးဂိုဏ်း၏ ကျွမ်းကျင်သူများမှာလည်း ထိတ်လန့်သွားကြလေသည်။

လုမင်သည်ပင် တုန်လှုပ်သွားရသည်။

တိမ်နဂါးတောင်ကြားသခင်ကို အန္တိမသူတော်စင်နယ်ပယ် ပညာရှင်ဖြစ်ရမည်ဟု သူ ခန့်မှန်းထားသော်လည်း၊ တိမ်နဂါးတောင်ကြားသခင်၏ အစစ်အမှန်ခွန်အားက သူမျှော်လင့်ထားတာထက် သာလွန်နေသေးသည်။

တိုက်ပွဲက ဆက်လက်ဖြစ်ပွားခဲ့သည်။ သုံးယောက်သား ကောင်းကင်ယံတွင် ထိပ်တိုက်တွေ့ဆုံကြ၏။ အဆုံးမရှိသော အလင်းတန်းများကို မြင်ရသော်လည်း ၎င်းတို့ သုံးဦးကို လုံးဝ မမြင်နိုင်တော့ပေ။

အပြင်းအထန် တိုက်ခိုက်ပြီးနောက် ကြောက်မက်ဖွယ်ရာ ပေါက်ကွဲသံတစ်ခု ထွက်ပေါ်လာသည်။ အလင်းရောင်များ ပျောက်ကွယ်သွားပြီး လူရိပ်သုံးခု ပေါ်လာ၏။

ကောင်းကင်နတ်ဘုရားဂိုဏ်းနှင့် ကောင်းကင်နတ်ဆိုးဂိုဏ်းတို့၏ ဂိုဏ်းချုပ်များက ဘေးချင်းယှဉ်လျက် ရပ်နေကြသည်။ သူတို့၏ အမူအရာများကတော့ မကောင်းတော့ပေ။

တိမ်နဂါးတောင်ကြားသခင်က ဓားရှည်တစ်လက်ကို ကိုင်ဆောင်ကာ လေထဲတွင် တည်ငြိမ်စွာ ရပ်နေသည်။ သူ့ထံမှ အဆုံးမဲ့ တိုက်ခိုက်ချင်စိတ်တို့ ထွက်ပေါ်နေ၏။

ထိုအချိန်တွင် တိမ်နဂါးတောင်ကြားသခင်က နူးညံ့သိမ်မွေ့သော အဖိုးအိုတစ်ဦး မဟုတ်တော့ပေ။ ထိုအစား၊ သူသည် ကမ္ဘာကို လွှမ်းမိုးထားသော တန်ခိုးရှင်တစ်ဦး ဖြစ်သည်။ သူ့ဓားကလည်း အေးစက်သော အလင်းရောင်ဖြင့် တောက်ပနေတော့သည်။

"လူတစ်ယောက်ကို ငါ သတ်ချင်ရင် ငါ့ကို ဘယ်သူမှ တားလို့မရဘူး"

တိမ်နဂါးတောင်ကြားသခင်က ယုံကြည်မှုအပြည့်ဖြင့် ပြောလိုက်သည်။

ကောင်းကင်နတ်ဘုရားဂိုဏ်းချုပ်၏ မျက်နှာက ပို၍ မှုန်ကုပ်သွားပေသည်။

နဂါးနတ်ဘုရားတောင်ကြားမှ တပည့်များ၏ မိသားစုဝင်များကို တိုက်ခိုက်ရန် အမိန့်ပေးခဲ့လျှင်၊ တိမ်နဂါးတောင်ကြားသခင်က ကောင်းကင်နတ်ဘုရားဂိုဏ်း၏ တခြားတပည့်တွေကို သတ်ပစ်နိုင်သည်။

သူ့ကို မည်သူမျှ တားဆီးနိုင်မည် မဟုတ်ပေ။ တိမ်နဂါးတောင်ကြားသခင်က အစွမ်းထက်လွန်းသည်။

"ဝုန်း"

ထိုအခိုက်တွင်၊ ဝေးကွာသော ကောင်းကင်ယံမှ နောက်ထပ် ကျယ်လောင်သော အသံတစ်ခု ထွက်ပေါ်လာသည်။ ဧရာမ စစ်သင်္ဘောကြီးတစ်စင်းက လျင်မြန်စွာ ပျံသန်းလာပြီး မနီးမဝေးတွင် ရပ်တန့်သွား၏။ ထို့နောက် စစ်သင်္ဘောပေါ်မှ ပုံရိပ်အများအပြား ထွက်လာတော့သည်။

သူတို့အားလုံးက အစိမ်းရောင်ဝတ်စုံများကို ဝတ်ဆင်ထားကြသည်။ သူတို့တစ်ဦးစီမှ ပြင်းထန်သော အဆိပ်အငွေ့အသက်များ ထွက်ပေါ်နေ၏။

ကောင်းကင်နတ်ဘုရားဂိုဏ်းနှင့် ကောင်းကင်နတ်ဆိုးဂိုဏ်းချုပ်တို့၏ မျက်နှာများက ဝင်းလက်သွားသည်။ ကောင်းကင်အဆိပ်ဂိုဏ်းမှ ကျွမ်းကျင်သူများ ရောက်ရှိလာပြီ။

ကောင်းကင်အဆိပ်ဂိုဏ်းကို ဦးဆောင်လာသူမှာ အဘိုးကြီးတစ်ဦး ဖြစ်သည်။ သူက ကောင်းကင်အဆိပ်ဂိုဏ်း၏ ဂိုဏ်းချုပ်လည်း ဖြစ်ချေသည်။

"ဒီနေ့ တကယ်စည်ကားသက်ဝင်တာပဲ"

ကောင်းကင်အဆိပ်ဂိုဏ်း၏ ဂိုဏ်းချုပ်က ရှေ့သို့ တိုးလာကာ ကောင်းကင်နတ်ဘုရားဂိုဏ်းချုပ်၊ ကောင်းကင်နတ်ဆိုးဂိုဏ်းချုပ်တို့နှင့်အတူ ရပ်လိုက်သည်။

"မင်းတို့တွေ တရားလွန်သွားပြီ"

ရေခဲနဂါးတောင်ကြားသခင်က ရှေ့သို့လှမ်းလိုက်သည်။ သူက တိမ်နဂါးတောင်ကြားသခင်အနားတွင် ပြန်ပေါ်လာ၏။ သူ့ထံမှ ကြောက်မက်ဖွယ်ကောင်းသော အငွေ့အသက်များ ထွက်ပေါ်လာသည်။ သူသည်လည်း အန္တိမသူတော်စင်တစ်ပါးပင်။

အန္တိမသူတော်စင်ငါးပါးတို့က ကောင်းကင်ယံ၌ ထိပ်တိုက်တွေ့ဆုံလိုက်ကြသည်။ သူတို့၏ အရှိန်အဝါများကလည်း ကြောက်စရာကောင်းလွန်းလှပေသည်။

လူတိုင်းက ထိတ်လန့်တကြားဖြင့် ကြည့်နေကြသည်။

ကောင်းကင်နတ်ဘုရားဂိုဏ်း၏ ဂိုဏ်းချုပ်နှင့် အခြားဂိုဏ်းချုပ်နှစ်ဦးက အသံပို့လွှတ်ကာ တစ်စုံတစ်ခုကို ဆွေးနွေးနေကြပုံရ၏။ ခဏအကြာတွင်၊ ကောင်းကင်နတ်ဘုရားဂိုဏ်းချုပ်က ပြန်လှည့်ပြောလိုက်သည်။

"မင်းတို့တွေ လုမင်ကို အခုလောလောဆယ် ကာကွယ်နိုင်ပေမဲ့ အမြဲတမ်းတော့ မကာကွယ်နိုင်ပါဘူး။ ကောင်းကင်နတ်ဘုရားဂိုဏ်းရဲ့ တပည့်တွေ နားထောင်ပါ။ မိုင်တစ်ရာပြန်ဆုတ်ပြီး နဂါးနတ်ဘုရားတောင်ကြားကို ဝိုင်းထားပါ။ လုမင်နဲ့ နဂါးနတ်ဘုရားတောင်ကြားရဲ့ အခြားတပည့်တွေ ထွက်လာတာနဲ့ သူတို့ကို ဖယ်ရှားလိုက်ကြ"

"အမိန့်အတိုင်းပါ"

ကောင်းကင်နတ်ဘုရားဂိုဏ်းမှ ပညာရှင်များက ‌ပြန်ပြောလိုက်၏။

"ကောင်းကင်နတ်ဆိုးဂိုဏ်းရဲ့ တပည့်တွေ နားထောင်ပါ။ မိုင်တစ်ရာ ဆုတ်ခွာပြီး စခန်းချမယ်..."

"ကောင်းကင်အဆိပ်ဂိုဏ်းရဲ့ တပည့်တွေ နားဆင်ပါ..."

ကောင်းကင်နတ်ဆိုးဂိုဏ်းနှင့် ကောင်းကင်အဆိပ်ဂိုဏ်းတို့၏ ဂိုဏ်းချုပ်များကလည်း မိုင်တစ်ရာ ပြန်ဆုတ်ပြီး နဂါးနတ်ဘုရားတောင်ကြားကို ဝန်းရံထားရန် အမိန့်ပေးလိုက်ကြ၏။

ဂိုဏ်းသုံးခုမှ ကျွမ်းကျင်သူများက ဖြည်းဖြည်းချင်း ဆုတ်ခွာသွားကြသည်။ ထို့နောက် ဂိုဏ်းသုံးခုမှ ဂိုဏ်းချုပ်ကြီးများကလည်း လုမင်ကို အေးစက်စက်ဖြင့် စိုက်ကြည့်ကာ ဆုတ်သွားကြတော့သည်။

တိမ်နဂါးတောင်ကြားသခင်နှင့် ရေခဲနဂါးတောင်ကြားသခင်တို့က တစ်ယောက်ကိုတစ်ယောက် ကြည့်လိုက်ကြသည်။ သူတို့နှစ်ယောက်စလုံး၏ မျက်လုံးမှာတော့ စိုးရိမ်ပူပန်မှုတို့ ရှိနေ၏။

"နဂါးနတ်ဘုရားတောင်ကြားရဲ့ တပည့်တွေ နားထောင်... ခိုးဝင်တိုက်ခိုက်မှုတွေကို တားဆီးဖို့ နဂါးနတ်ဘုရားတောင်ကြားတစ်ဝိုက်မှာ စခန်းချရအောင် ကျွမ်းကျင်သူတွေကို စေလွှတ်လိုက်ပါ"

ရေခဲနဂါးတောင်ကြားသခင်က အမိန့်ပေးလိုက်သည်။

"မင်အာ၊ ပြန်သွားပြီး အေးအေးဆေးဆေး လေ့ကျင့်ပါ။ ဒီအကြောင်းတွေကို သိပ်အများကြီး မစဉ်းစားနဲ့။ သူတို့က မင်းကို ဘာမှ မလုပ်နိုင်ဘူး"

တိမ်နဂါးတောင်ကြားသခင်က လုမင်၏အနားသို့ ရောက်လာပြီး ညင်သာစွာ ပြောလိုက်သည်။

"ဟုတ်ကဲ့ပါ ဆရာ"

လုမင်က ခေါင်းညိတ်ပြပြီး တိမ်နဂါးတောင်ကြားသို့ လျှောက်သွားသည်။ သို့သော်လည်း သူ့လက်သီးများကို တင်းတင်းကြပ်ကြပ်ဆုပ်ထား၏။ အေးစက်သောအလင်းရောင်တစ်ခုကလည်း သူ့မျက်လုံးထဲတွင် လင်းလက်လာတော့သည်။

ဤအခြေအနေက ရုန်းထွက်ရန် ခက်သည်။

စန်းဧကရာဇ်၏ သိုလှောင်လက်စွပ်ကို လွှဲပေးလိုက်လျှင်ပင် ကောင်းကင်နတ်ဘုရားဂိုဏ်းနှင့် တခြားဂိုဏ်းများက အလွတ်ပေးမည် မဟုတ်ပေ။ နောက်ဆုံးတွင်၊ သူက စန်းဧကရာဇ်၏အမွေကို ရရှိခဲ့သည်ဟူသော ကောလဟာလများမှာ ပျံ့နှံ့နေပြီ ဖြစ်သည်။

သို့သော်လည်း သူ့တွင် လုံးဝ မရှိခဲ့သောကြောင့် လွှဲပြောင်းပေးရန် နည်းလမ်းမရှိပေ။

ဤသည်မှာ မိစ္ဆာဝိညာဉ်ဂိုဏ်း၏ အကြံပင် ဖြစ်မည်။ လုမင်တွင် အမွေမရှိသောကြောင့် မလွှဲအပ်နိုင်ကြောင်း မိစ္ဆာဝိညာဉ်ဂိုဏ်းက သိ၏။ ထို့ကြောင့် စန်းပြည်နယ်ရှိ အင်အားစုကြီးများက သေချာပေါက် ထိပ်တိုက်တွေ့ဆုံကြလိမ့်မည်။

ထို့ပြင် လုမင်က ရှင်းပြလျှင်ပင် မည်သူမျှ ယုံကြည်မှာမဟုတ်ပါ။

"ငါက အရမ်းအားနည်းနေသေးတယ်၊ ငါ သူတော်စင်နယ်ပယ်ကို အမြန်ဆုံး ထိုးဖောက်ရမယ်"

လုမင်က ဆုံးဖြတ်ချက်ချလိုက်သည်။

သို့သော်လည်း သူတော်စင်နယ်ပယ်သို့ ဝင်ရောက်ခြင်းသည် ကြီးမားသော အခက်အခဲ ဖြစ်သည်။ သူ့တွင် အတွေ့အကြုံ လုံလုံလောက်လောက် မရှိပါက အချိန်တိုတိုအတွင်း ဖြတ်ကျော်ရန် ခက်ခဲလိမ့်မည်။

တိမ်နဂါးတောင်ကြားသို့ ပြန်ရောက်ပြီးနောက် လုမင်က လေးလေးနက်နက် တွေးလိုက်သည်။

"ငါကြိုးစားကြည့်ရမှာပဲ"

လုမင် ရေရွတ်လိုက်သည်။ သူသည် သူတော်စင်နယ်ပယ်သို့ အချိန်တိုအတွင်း ဝင်ရောက်ရန် နည်းလမ်းတစ်ခုကို စဉ်းစားမိ၏။

ယင်းက မူလခန္ဓာနှင့် ဒုတိယခန္ဓာကို တစ်ခုတည်းအဖြစ် ပြန်ပေါင်းစပ်ရန်ပင်။

အမွှာအသက်တားမြစ်ကျင့်စဉ်တွင် မူလခန္ဓာနှင့် ဒုတိယခန္ဓာကို ထပ်မံပေါင်းစပ်နိုင်သည်ဟု ဖော်ပြထားသည်။ သို့သော်လည်း ထိုသို့ပေါင်းစည်းလိုက်ပါက အနာဂတ်တွင် ဒုတိယခန္ဓာကို လေ့ကျင့်ရန် မဖြစ်နိုင်တော့ပေ။

ယင်းက ဆုံးရှုံးမှုကြီးတစ်ခု ဖြစ်သည်။ ဒုတိယခန္ဓာဖြင့် သူသည် များစွာသော အရာများကို လုပ်ဆောင်နိုင်သည်။ ထို့ပြင်၊ ဒုတိယခန္ဓာက အသက်အပိုတစ်ချောင်းပင်။ မူလခန္ဓာကို သတ်လိုက်လျှင် ဒုတိယခန္ဓာဖြင့် ရှင်သန်နိုင်သည်။

ယခုမူ၊ သူက သူတော်စင်နယ်ပယ်သို့ အချိန်တိုအတွင်း ဝင်ရောက်လိုလျှင် မူလခန္ဓာနှင့် ဒုတိယခန္ဓာကို ပေါင်းစည်းရတော့မည် ဖြစ်သည်။

မူလလန္ဓာနှင့် ဒုတိယခန္ဓာတို့ ပေါင်းစည်းမှုက သူတော်စင်နယ်ပယ်သို့ ဖြတ်ကျော်ရန် လုံလောက်ပေလိမ့်မည်။

လက်ရှိအခြေအနေတွင် သူတော်စင်နယ်ပယ် ကျင့်ကြံမှုအခြေခံ မရှိပါက သူ့ကိုယ်သူ ကာကွယ်နိုင်ရန်ပင် ခက်သည်။

သူတော်စင်နယ်ပယ်ကို ရောက်ရှိလျှင်တော့ သူ၏ တိုက်ခိုက်နိုင်စွမ်းက တဟုန်ထိုး တိုးလာလိမ့်မည်။

"လုပ်လိုက်ကြတာပေါ့"

လုမင်က အတွေးတစ်ခုဖြင့် တောင်နှင့်ပန်းချီကားသို့ ဝင်ရောက်သွားသည်။ သူက ရှေးဟောင်းဉာဏ်အလင်းသစ်ပင်အောက်တွင် တင်ပျဉ်ခွေထိုင်နေ၏။ မူလခန္ဓာနှင့် ဒုတိယခန္ဓာက မျက်နှာချင်းဆိုင်ထိုင်နေပြီး အမွှာအသက်တားမြစ်ကျင့်စဉ်၏ ပေါင်းစည်းခြင်းပညာရပ်ကို အသုံးပြုလိုက်တော့သည်။