အခန်း ၁၇၁၄

အပိုင်း ( 1714 ) အစွမ်းထက်သော ရန်သူကို သတ်ခြင်း။

တိမ်နဂါးတောင်ကြားသခင်၊ ရေခဲနဂါးတောင်ကြားသခင်၊ ကောင်းကင်နတ်ဘုရားဂိုဏ်း၏ ဂိုဏ်းချုပ်နှင့် အခြားသူများက လုမင်တို့ တိုက်ပွဲအတွက် နေရာအလုံအလောက် ရရှိရန် ဆုတ်ခွာသွားကြသည်။

"သတ်"

ကောင်းကင်အဆိပ်ဂိုဏ်းမှ လူလတ်ပိုင်း အမျိုးသားက အော်လိုက်သည်။ သူ့လက်ကိုဝှေ့ယမ်းကာ အဆိပ်ငွေ့လှံတစ်လက်ဖြင့် လုမင်ဆီသို့ ပစ်လွှတ်လိုက်၏။

လုမင်၏ ညာဘက်လက်က အရောင်လက်သွားပြီး နဂါးနက်လှံ ပေါ်လာသည်။ သူက လှံချက်ထုတ်ဖော်ပြီး တစ်ဖက်လူ၏ အဆိပ်ငွေ့လှံကို ချေဖျက်လိုက်သည်။ သို့သော်လည်း အဆိပ်လှံ ပျက်စီးသွားပြီးနောက် အဆိပ်ပြင်းသော အင်းဆက်ပိုးမွှားများ ပေါ်လာကာ လုမင်ထံသို့ ပျံသန်းလာတော့သည်။

"ဖျက်ဆီးစမ်း"

လုမင်က ဟိန်းဟောက်လိုက်သည်။ နဂါးလှံက မီတာတစ်သောင်း ရှည်လျားလာပြီး ရိုက်ချလိုက်၏။ ကြောက်မက်ဖွယ်ကောင်းသော အင်အားတစ်ခုက ကျဆင်းလာပြီး အဆိပ်ပိုးကောင်များကို ပြာအဖြစ်သို့ ချေမွလိုက်တော့သည်။

"ဝှစ်"

လုမင်က ရှေ့သို့ ခြေတစ်လှမ်းတိုးပြီး သက်လတ်ပိုင်း အမျိုးသား၏ရှေ့တွင် ချက်ချင်း ပေါ်လာသည်။ သူ့လှံရှည်က လျှပ်စီးလက်သကဲ့သို့ ပြေးထွက်သွား၏။ ၎င်းက မယုံနိုင်လောက်အောင် မြန်ဆန်ပြီး သာမန်မျက်စိ၏ တုံ့ပြန်မှုကို ကျော်လွန်သွားခဲ့ပြီ ဖြစ်သည်။

"ဝုန်း"

သက်လတ်ပိုင်း အမျိုးသား၏ ခန္ဓာကိုယ်က လှံရှည်ဖြင့် ထိုးဖောက်ခံရကာ ပေါက်ကွဲသွားခဲ့သည်။ သို့သော်လည်း ပေါက်ကွဲပြီးနောက်တွင် အဆိပ်ငွေ့များဖြင့် တိမ်တိုက်တစ်ခုအဖြစ်သို့ ပြောင်းလဲသွားပေသည်။

"လုမင်၊ မင်းရဲ့ တိုက်ခိုက်နိုင်စွမ်းက အရမ်းသန်မာပါတယ်။ ဒါပေမဲ့ ငါ့မှာလည်း မြေကမ္ဘာအဆင့်မြင့် ဝိညာဉ်ခန္ဓာ ရှိတယ်။ မင်းရဲ့ နည်းလမ်းတွေက ငါ့ကို ရင်ဆိုင်ရင် အသုံးဝင်မှာမဟုတ်ဘူး"

သက်လတ်ပိုင်း အမျိုးသား၏ အေးစက်စက် စကားသံက အဆိပ်ငွေ့များအတွင်းမှ ထွက်ပေါ်လာသည်။

ဤလူလတ်ပိုင်းအမျိုးသားသည် မြေကမ္ဘာအဆင့်မြင့် ဝိညာဉ်ခန္ဓာရှိပြီး ငယ်ရွယ်စဉ်က ပါရမီရှင်တစ်ဦးဖြစ်ခဲ့ကြောင်း ထင်ရှားသည်။

စင်စစ်တွင်၊ သူတော်စင်နယ်ပယ်သို့ ဖြတ်ကျော်နိုင်သူ အများစုသည် ၎င်းတို့ ငယ်စဉ်အခါက အလွန်ထက်မြက်ကြသူများ ဖြစ်သည်။ ၎င်းတို့၏ ဝိညာဉ်ခန္ဓာများကလည်း အဆင့်နိမ့်မည် မဟုတ်ပေ။

ကောင်းကင်ကို ဆန့်ကျင်နိုင်သော အခွင့်အလမ်းမရှိလျှင် သာမန် ဝိညာဉ်ခန္ဓာ ပိုင်ရှင်များက သူတော်စင်နယ်ပယ်သို့ဖြတ်ကျော်နိုင်ရန် အလွန်တရာ ခက်ခဲသည်။

သူတော်စင်နယ်ပယ်ကို ဖြတ်ကျော်နိုင်သူများက အများအားဖြင့် မြေကမ္ဘာအဆင့်နှင့် အထက် ဝိညာဉ်ခန္ဓာပိုင်ရှင်များ ဖြစ်သည်။ ဟုတ်ပေသည်၊ ဝိညာဉ်ခန္ဓာ၏ အဆင့်မြင့်လေ၊ ဖြတ်ကျော်ရန် အခွင့်အလမ်း ပိုများလေ ဖြစ်သည်။

"အဆိပ်တစ်ထောင် သုတ်သင်ခြင်း"

သက်လတ်ပိုင်း အမျိုးသား၏ အသံက ထပ်မံထွက်ပေါ်လာသည်။ အဆုံးမဲ့ အဆိပ်ငွေ့များက လုမင်ဆီသို့ တိုးဝင်လာ၏။ ဆိုးရွားသော အနံ့သက်များက လုမင်၏ နှာခေါင်းထဲသို့ တိုးဝင်လာတော့သည်။

ဤအဆိပ်ငွေ့များတွင် အဆိပ်နိယာမများ ပါဝင်ပြီး အလွန်ကြောက်စရာကောင်းသည်။ အဆိပ်ကြိုးမျှင် တစ်မျှင်မျှက သတ္တဝါပေါင်း ထောင်ပေါင်းများစွာကို အဆိပ်သင့်စေနိုင်ပေသည်။

"ငါ အရင်ကလည်း အဆိပ်ခန္ဓာကို မသတ်ဖူးတာ မဟုတ်ပါဘူး"

လုမင်က အေးစက်စက် ပြောလိုက်သည်။ ကြီးမားသော ကစဉ့်ကလျား ကောင်းကင်မှောက်လှန် တံဆိပ်တော်တစ်ခုက သူ့လက်ထဲတွင် ပေါ်လာသည်။

ကစဉ့်ကလျား ကောင်းကင်မှောက်လှန် တံဆိပ်တော်က တောင်တစ်လုံးကဲ့သို့ ကြီးမားပြီး အဆုံးမဲ့အဆိပ်ငွေ့များပေါ်သို့ ဖိချလိုက်၏။

ယခုအခါ လုမင်က သူတော်စင်နယ်ပယ်သို့ ဖြတ်ကျော်သွားခဲ့ပြီ ဖြစ်သည်။ ကြွယ်ဝသော သူတော်စင်စွမ်းအားတို့ဖြင့် ကစဉ့်ကလျား ကောင်းကင်မှောက်လှန် တံဆိပ်တော်ကို သူ အလိုရှိသလို အသုံးပြုနိုင်ပေပြီ။

ဤမတိုင်မီက လုမင်သည် ကစဉ့်ကလျား ကောင်းကင်မှောက်လှန် တံဆိပ်တော်၏ အင်အားအပြည့်ကို အသုံးပြုပါက ယွမ်ချီစွမ်းအင် ခဏချင်းကုန်သွားမည် ဖြစ်သည်။ သို့ရာတွင်၊ ယခုချိန်မှာတော့ ထိုပြဿနာမျိုး မရှိတော့ပေ။

"ဝုန်း"

ကစဉ့်ကလျား ကောင်းကင်မှောက်လှန် တံဆိပ်တော်၏ ဖိအားအောက်တွင် အဆိပ်ငွေ့များက တုန်လှုပ်လာသည်။ ကစဉ့်ကလျားနိယာမက အဆိပ်များကို အဆက်မပြတ် ချေဖျက်လိုက်၏။

"အား၊ ဘယ်လိုဖြစ်တာလဲ။ သွားစမ်း"

အဆိပ်ငွေ့အတွင်းမှ တုန်လှုပ်စွာဖြင့် အော်သံ ထွက်ပေါ်လာခဲ့သည်။ အဆိပ်များက လွတ်မြောက်ရန် ကြိုးစားနေသကဲ့သို့ တုန်လှုပ်နေ၏။ သို့သော်လည်း ကစဉ့်ကလျား ကောင်းကင်မှောက်လှန် တံဆိပ်တော်၏ ပိတ်လှောင်မှုအောက်တွင် သူ မည်ကဲ့သို့ လွတ်မြောက်နိုင်မည်နည်း။

ကြောက်စရာကောင်းသော စွမ်းအားများက အဆိပ်များကို အဆက်မပြတ် ဖျက်ဆီးနေခဲ့သည်။

"မဟုတ်... မဟုတ်... မဟုတ်ဘူး..."

တစ်ဖက်လူက သွေးပျက်ချောက်ချားစွာ အော်ဟစ်လိုက်သည်။ သို့သော်၊ အသုံးမဝင်ပေ။ အဆိပ်ချီများက အားနည်းသည်ထက် အားနည်းလာသည်။ နောက်ဆုံး အော်ဟစ်သံအဆုံးမှာတော့ အဆိပ်ချီအားလုံး ပျောက်ကွယ်သွားတော့သည်။

ပိန်ပိန်ပါးပါး လူလတ်ပိုင်း အမျိုးသားမှာ လေထုထဲတွင် ပျောက်ကွယ်သွားခဲ့ပြီ ဖြစ်သည်။

"ဟမ့်"

ကောင်းကင်အဆိပ်ဂိုဏ်းချုပ်၏ မျက်နှာက မှုန်ကုပ်သွားပြီး နှာခေါင်းရှုံ့လိုက်သည်။

"ဒီကောင်လေးရဲ့ တိုက်ခိုက်နိုင်စွမ်းက တကယ့်ကို အံ့မခန်းပဲ"

ကောင်းကင်နတ်ဆိုးဂိုဏ်းချုပ်ကလည်း မျက်နှာမသာမယာဖြင့် ပြောလေသည်။

သူသည် သူတော်စင်နယ်ပယ်သို့ ချိုးဖြတ်ရုံသာဖြစ်သော်လည်း တောက်ပသော သူတော်စင်နယ်ပယ် အထွတ်အထိပ်မှ ကျွမ်းကျင်သူကို သတ်နိုင်ခဲ့သည်။ ယင်းက တကယ်ကို တုန်လှုပ်စရာပင်။

"ဘယ်​သူ​တွေ တိုက်​ခိုက်ချင်​လဲ"

လုမင်က စူးရှသော မျက်လုံးများဖြင့် ဂိုဏ်းကြီးသုံးခုမှ လူများကို အကဲခတ်လိုက်သည်။

"ငါမင်းကိုသတ်မယ်"

အနက်ရောင်ဝတ်စုံဝတ် အဘိုးအိုတစ်ဦးက ကောင်းကင်နတ်ဆိုးဂိုဏ်းဘက်မှ ထွက်လာသည်။ ခြေတစ်လှမ်း လှမ်းလိုက်သည်နှင့် သူ့အရှိန်အဝါက ပိုအားကောင်းလာ၏။ လုမင်၏ရှေ့ကိုရောက်တော့ သူ့အရှိန်အဝါက မိုးနှင့်မြေကို ဖြိုချနိုင်လောက်အောင် အားကောင်းနေပြီ ဖြစ်သည်။

တောက်ပသော သူတော်စင်နယ်ပယ် ပြီးပြည့်စုံခြင်း။

ဤအဘိုးအိုက တောက်ပသော သူတော်စင်နယ်ပယ် ပြီးပြည့်စုံခြင်းသို့ ရောက်နေပြီ။ ယင်းက တောက်ပသော သူတော်စင်နယ်ပယ်၏ အကန့်အသတ် ဖြစ်သည်။ နောက်တစ်ဆင့်ကတော့ မဟာသူတော်စင်နယ်ပယ်ပင်။

သူ၏ ဝိညာဉ်ခန္ဓာကလည်း မြေကမ္ဘာအဆင့်မြင့် ဝိညာဉ်ခန္ဓာ ဖြစ်မည်မှာ သေချာသည်။

သူက တိုက်ခိုက်ရန် ဆန္ဒရှိသောကြောင့် အလွန်သန်မာသူဖြစ်ရမည်။

အားလုံးက လုမင်နှင့် ကောင်းကင်နတ်ဆိုးဂိုဏ်းမှ အဘိုးအိုကို စိုက်ကြည့်နေကြသည်။

ဤအဘိုးအို၏ ကျင့်ကြံခြင်းအခြေခံက တောက်ပသော သူတော်စင်နယ်ပယ် ပြီးပြည့်စုံခြင်းဖြစ်သည်။ သူက တောက်ပသော သူတော်စင်နယ်ပယ် အထွတ်အထိပ်ထက် အများစွာ ပိုသန်မာ၏။ လုမင်က သူ၏ပြိုင်ဘက် ဖြစ်နိုင်ပါမည်လော။

လုမင်က တောက်ပသော သူတော်စင်နယ်ပယ် ကနဦးအဆင့်သာ ဖြစ်သည်။ သူက ဤအဆင့်များစွာကို ဖြတ်ကျော်ပြီး တောက်ပသော သူတော်စင်နယ်ပယ် ပြီးပြည့်စုံခြင်းအဆင့် ပညာရှင်နှင့် တိုက်ခိုက်နိုင်မည်လော။

"ဝုန်း"

ကောင်းကင်နတ်ဆိုးဂိုဏ်းမှ အဘိုးအို၏ လက်ထဲတွင် နတ်ဆိုးစွမ်းအင်တို့ ပြည့်ဝသော နတ်ဆိုးဓားတစ်လက် ပေါ်လာသည်။

"သတ်ဖြတ်ခြင်းခြောက်ပါး နတ်ဆိုးဓား"

ကြောက်မက်ဖွယ်ကောင်းသော နတ်ဆိုးဓားအလင်းက ပေါက်ကွဲထွက်လာပြီး လုမင်ဆီသို့ ခုတ်ပိုင်းလိုက်၏။

လုမင်က နဂါးနက်လှံကိုကိုင်ပြီး ထိုးသွင်းလိုက်သည်။ ကြီးမားသောလှံအလင်းတစ်ခုက နတ်ဆိုးဓားနှင့် တိုက်မိသွားတော့သည်။

"ဝုန်း"

ကျယ်လောင်သော ပေါက်ကွဲသံ ထွက်ပေါ်လာခဲ့သည်။ လှံအလင်းနှင့် ဓားအလင်းတို့သည် တစ်ပြိုင်နက်တည်း ပြိုကျသွား၏။

သို့သော်လည်း အဘိုးအိုက နတ်ဆိုးဓားဖြင့် ထပ်မံခုတ်လိုက်ပြန်သည်။ ဤတစ်ကြိမ်တွင် ခြောက်ကြိမ်ဆက်တိုက် ခုတ်ချလိုက်၏။ ဓားတစ်ချက်စီက ပေတစ်သောင်းမြင့်မားသော ဧရာမ နတ်ဆိုးနတ်ဘုရားအဖြစ်သို့ ပြောင်းလဲသွားကာ လုမင်အား တိုက်ခိုက်လိုက်တော့သည်။

လုမင်က နဂါးနက်လှံကိုဖယ်ရှားပြီး ကစဉ့်ကလျား ကောင်းကင်မှောက်လှန် တံဆိပ်တော်ကို အသုံးပြုလိုက်သည်။

သူ့လက်ကိုဝှေ့ယမ်းလိုက်ရုံဖြင့် ကစဉ့်ကလျား ကောင်းကင်မှောက်လှန် တံဆိပ်တော်များက ကောင်းကင်ယံ၌ တစ်ခုပြီးတစ်ခု ဖြစ်ပေါ်လာ၏။ စုစုပေါင်း ကစဉ့်ကလျား ကောင်းကင်မှောက်လှန် တံဆိပ်တော် ခြောက်ခုက နတ်ဆိုးနတ်ဘုရားကြီး ခြောက်ဦးကို ဖိနှိပ်လိုက်တော့သည်။

နတ်ဆိုးနတ်ဘုရားများက ဟိန်းဟောက်လိုက်ကြသည်။ ကြောက်မက်ဖွယ်ကောင်းသော ဖိအားတစ်ခုက ကောင်းကင်ယံကို လွှမ်းခြုံသွား၏။ စစ်မှန်သော နတ်ဆိုးနတ်ဘုရားက ကမ္ဘာကိုဆင်းသက်လာပြီး သက်ရှိအားလုံးကို သတ်ရန်ကြိုးစားနေသကဲ့သို့ပင်။ နတ်ဆိုးနတ်ဘုရားကြီးများက ကစဉ့်ကလျား ကောင်းကင်မှောက်လှန် တံဆိပ်တော်များကို အဆက်မပြတ် ထိုးနှက်လိုက်ကြသည်။

"ဝုန်း... ဝုန်း... ဝုန်း"

နတ်ဆိုးစွမ်းအင်လှိုင်းများက ဖြာထွက်သွားသည်။ နတ်ဆိုးလက်သီးများက ကစဉ့်ကလျား ကောင်းကင်မှောက်လှန် တံဆိပ်တော်ကို ထိုးနှက်လိုက်တိုင်း ဗုံတီးသကဲ့သို့ မြည်ဟီးသံများ ထွက်ပေါ်လာ၏။

အဆုံးတွင် ကစဉ့်ကလျား ကောင်းကင်မှောက်လှန် တံဆိပ်တော်များ ပေါက်ကွဲသွားသလို နတ်ဆိုးနတ်ဘုရား ခြောက်ပါးလည်း ပြိုကျသွားတော့သည်။

"သတ်"

ကစဉ့်ကလျားနိယာမက လုမင်၏ ပတ်ဝန်းကျင်တွင် စီးဆင်းသွားသည်။ သူက အလင်းတန်းတစ်ခုကဲ့သို့ ကောင်းကင်နတ်ဆိုးဂိုဏ်းမှ အဘိုးအိုထံ ပျံသန်းသွား၏။ တစ်ချိန်တည်းမှာပင်၊ သူ့မျက်လုံးများမှ ဓားအလင်းနှစ်ခု ထွက်ပေါ်လာပြီး အဖိုးအို၏ ခန္ဓာကိုယ်ထဲသို့ ပြေးဝင်သွားတော့သည်။

ကောင်းကင်နတ်ဆိုးဂိုဏ်းမှ အဘိုးအိုက နာကျင်စွာ အော်ဟစ်လိုက်သည်။ သူ့မျက်လုံးများက ပြူးထွက်သွားပြီး အရှိန်အဝါများ ဖရိုဖရဲဖြစ်သွား၏။

"ဝှစ်"

လုမင်က ကောင်းကင်နတ်ဆိုးဂိုဏ်းမှ အဘိုးအို၏အနားတွင် ချက်ချင်းဆိုသလို ပေါ်လာသည်။ သူက လက်ဝါးဖြင့်ရိုက်ပြီး တစ်ဖက်လူ၏ စွမ်းအင်အကာကွယ်ကို ဖြတ်ကျော်ကာ သူ့လည်ချောင်းကို ဆုပ်ကိုင်လိုက်တော့သည်။

လူတိုင်းက အသက်ပြင်းပြင်းရှူလိုက်ကြသည်။ ဒါက တကယ်ကို မယုံနိုင်စရာပင်။

တောက်ပသော သူတော်စင်နယ်ပယ် ပြီးပြည့်စုံခြင်းအဆင့် ကျွမ်းကျင်သူကို လုမင်က လွယ်ကူစွာ အနိုင်ယူခဲ့သည်။ မယုံနိုင်စရာကောင်းလွန်း၏။

လုမင်က အဘယ်ကြောင့် ဤမျှသန်မာနိုင်သနည်း။

သူက တောက်ပသော သူတော်စင်နယ်ပယ် ကနဦးအဆင့်သာ ဖြစ်သေးသော်လည်း တောက်ပသော သူတော်စင်နယ်ပယ် ပြီးပြည့်စုံခြင်းအဆင့် ကျွမ်းကျင်သူကို အလွယ်တကူ အနိုင်ယူနိုင်ခဲ့သည်။

လုမင်က ကောင်းကင်နတ်ဆိုးဂိုဏ်း၏ ဂိုဏ်းချုပ်ကို အေးစက်စက်ဖြင့်ကြည့်ကာ ပြောလိုက်သည်။

"ကောင်းကင်နတ်ဆိုးဂိုဏ်းကို ငါသည်းခံလာခဲ့တာ ကြာပြီ။ ဒါပေမဲ့ မင်းတို့တွေက တဖြည်းဖြည်းနဲ့ လွန်လွန်းလာကြတယ်။ ဒီနေ့ကစပြီး ငါက 'သတ်'ပြီ"

'သတ်' ဟူသော စကားလုံးကို သူပြောပြီးသည်နှင့် ကြောက်မက်ဖွယ်ရာ စွမ်းအားတစ်ခု ထွက်ပေါ်လာသည်။ အဘိုးအို၏ ခန္ဓာကိုယ်က ကွဲအက်သွားပြီး သူ၏ဝိညာဉ်လည်း ပျက်စီးသွား၏။ သူ၏ သူတော်စင်နှလုံးသားက လုမင်၏ လက်ထဲသို့ ကျရောက်သွားပေသည်။

ယခုမှစ၍ သူသည် ကောင်းကင်နတ်ဆိုးဂိုဏ်းကို သည်းခံနေတော့မည် မဟုတ်ပေ။

ကောင်းကင်နတ်ဆိုးဂိုဏ်းမှ ဂိုဏ်းချုပ်၏ မျက်လုံးများက‌ အေးစက်သွားသည်။

ကောင်းကင်နတ်ဘုရားဂိုဏ်းနှင့် ကောင်းကင်အဆိပ်ဂိုဏ်းတို့၏ ဂိုဏ်းချုပ်များလည်း အလားတူပင်။

ဂိုဏ်းသုံးခုစလုံး တိတ်ဆိတ်သွားကြသည်။

တစ်ဖက်တွင် နဂါးဘုရားတောင်ကြားမှာလည်း တိတ်ဆိတ်နေ၏။

လုမင်က အလွန်ငယ်သေးသော်လည်း တောက်ပသော သူတော်စင်နယ်ပယ် ပြီးပြည့်စုံခြင်းအဆင့် ကျွမ်းကျင်သူကို သတ်နိုင်စွမ်း ရှိသည်။ သူက ပြိုင်ဘက်ကင်းသော စစ်နတ်ဘုရားကဲ့သို့ပင်။

စန်းဧကရာဇ်၏ အမွေနှင့် ရတနာများကို အားကိုးခြင်းဖြင့် ဤနယ်ပယ်နှင့် စွမ်းရည်မျိုး အမှန်တကယ် ရှိနိုင်ပါမည်လော။

စန်းဧကရာဇ်ပင်လျှင် သူငယ်ရွယ်စဉ်က ဤမျှအစွမ်းမထက်နိုင်ဘူး မဟုတ်လား။

"ဒီကောင်လေးက စန်းဧကရာဇ်ရဲ့ ရတနာတွေထက် ပိုကြီးမားတဲ့ အခွင့်အလမ်းတွေကို ရရှိထားနိုင်တယ်"

ကောင်းကင်နတ်ဆိုးဂိုဏ်း၏ ဂိုဏ်းချုပ်က ခပ်တိုးတိုး ရေရွတ်လိုက်သည်။ ထို့နောက်တော့ သူက အခြား ဂိုဏ်းချုပ်နှစ်ဦးကို အသံပို့လွှတ်ကာ တစ်စုံတစ်ခု ပြောလိုက်လေတော့သည်။