အခန်း ၁၇၁၇
Vol. 115 Ch. 1717
အပိုင်း ( 1717 ) ရေခဲနဂါးဘိုးဘေးကြီး။
ကောင်းကင်နတ်ဘုရားဂိုဏ်းကမူ အစီရင်ကြီးဖြင့် မီတာသောင်းနှင့်ချီကာ ရှည်လျားသော လှံရှည်တစ်လက်ကို စုဖွဲ့လိုက်သည်။ လှံရှည်က နေအလင်းရောင်ထက်ပင် ပို၍ တောက်ပသော အလင်းများကို ထုတ်လွှတ်လိုက်၏။
"ဝုန်း"
လှံရှည်က လေထဲသို့ ဖြတ်သန်းသွားသည်နှင့် ဟင်းလင်းပြင်မှာ လှိုင်းဂယက်များ ဖြစ်ပေါ်လာတော့သည်။
လှံရှည်က နဂါးနတ်ဘုရားတောင်ကြား၏ ဂိုဏ်းအကာအကွယ် အစီရင်ကြီးကို ထိုးသွင်းလိုက်သည်။ ထိုနေရာရှိ အလင်းအတားအဆီးက ချိုင့်ဝင်လာပြီး ပြိုကျလုနီး ဖြစ်သွားပေသည်။
"နဂါးနတ်ဘုရားတောင်ကြား၊ အစီရင် ဖွဲ့စည်းပြီး ရန်သူကို ရင်ဆိုင်ဖို့ ပြင်ဆင်ကြ"
ရေခဲနဂါးတောင်ကြားသခင်က အမိန့်ပေးလိုက်သည်။
နဂါးနတ်ဘုရားတောင်ကြား တစ်ခုလုံးတွင် အလင်းတန်းများ တောက်ပလာ၏။ တောင်ကြားအသီးသီးမှ တပည့်များက စုဝေး၍ ကြီးကျယ်ခမ်းနားသော အစီရင်ကြီးများကို ထူထောင်လိုက်ကြတော့သည်။
သို့သော်လည်း ရင်ကျန်းက ငွေနဂါးတောင်ကြား၏ လူများကို နောက်ကွယ်မှာ ပုန်းအောင်းခိုင်းလိုက်သည်။
"မင်းတို့က ငွေနဂါးတောင်ကြားကို လုမင်အတွက် အလုပ်လုပ်စေချင်တာလား။ အိပ်မက်မက်နေလိုက်"
ရင်ကျန်းက တိတ်တဆိတ် လှောင်ပြောင်လိုက်သည်။ သူက ငွေနဂါးတောင်ကြား၏ အကြီးအကဲများနှင့် တပည့်များအား တိုက်ပွဲတွင် ၀င်ရောက်စွက်ဖက်ခြင်းမပြုရန် လျှို့ဝှက်ညွှန်ကြားလိုက်၏။ သူတို့လုပ်စရာရှိတာက နောက်ကွယ်မှာ ပုန်းအောင်းနေခြင်းပင်။
"ဝုန်း... ဝုန်း"
ဂိုဏ်းအကာအကွယ် အစီရင်ကြီးက အဆက်မပြတ် တုန်ခါလာခဲ့သည်။ ဂိုဏ်းကြီးသုံးခုမှ ကျွမ်းကျင်သူများ ဖွဲ့စည်းထားသော အစီရင်များသည် အလွန်အစွမ်းထက်၏။ နဂါးနတ်ဘုရားတောင်ကြား၏ ဂိုဏ်းအကာအကွယ် အစီရင်က ကြာရှည်စွာ မခံနိုင်တော့ပေ။
"သေစမ်း"
လုမင်က နဂါးနတ်ဘုရားတောင်ကြားကို ပြင်းထန်စွာ တိုက်ခိုက်နေသော ဂိုဏ်းကြီးသုံးခုကိုကြည့်ရင်း လက်သီးကို တင်းတင်းဆုပ်လိုက်သည်။
ဖြစ်နိုင်လျှင်၊ ဤစစ်ပွဲကို အဆုံးသတ်ရန်အတွက် စန်းဧကရာဇ်၏ သိုလှောင်လက်စွပ်ကို လွှဲပြောင်းပေးလိုသည်။
သို့ရာတွင်၊ စန်းဧကရာဇ်၏ သိုလှောင်လက်စွပ်ကို လွှဲပေးလျှင်ပင် ဤတိုက်ပွဲက ရှောင်လွှဲ၍မရသည်မှာ ထင်ရှားသည်။
အကြောင်းမူ၊ တစ်ဖက်လူများက သူ့အား စန်းဧကရာဇ်၏ အမွေကိုပါ လွှဲပြောင်းပေးစေလိုသောကြောင့်ပင်။
သူ့ဝိညာဉ်ကို ရှာဖွေပြီး အခြားလျှို့ဝှက်ချက်များကိုပင် ယူဆောင်သွားလိုနေကြသည်။
သာမန်လူတွင် အပြစ်မရှိသော်လည်း ရတနာကို ပိုင်ဆိုင်ထားပါက အပြစ်ရှိသည်။ အရာအားလုံးက အားနည်းလွန်းသောကြောင့်ပင်။ စန်းဧကရာဇ်ကဲ့သို့ စန်းပြည်နယ်တွင် အတားအဆီးမရှိ သွားလာနိုင်သော ခွန်အားရှိလျှင် ကောင်းကင်နတ်ဘုရားဂိုဏ်းနှင့် အခြားဂိုဏ်းများသည် အနည်းငယ်မျှ ခွန်းတုံ့ပြန်ဝံ့ကြမည် မဟုတ်ပါ။ သူတို့က သူ၏ခြေဖဝါးအောက်တွင် တွားသွားကြရမည် ဖြစ်သည်။
"ဝုန်း... ဝုန်း"
နဂါးနတ်ဘုရားတောင်ကြား၏ ဂိုဏ်းအကာကွယ် အစီရင်ကြီးက ပို၍ ပို၍ ပြင်းထန်စွာ တုန်လှုပ်သွားသည်။
"ဝုန်း... ဒုန်း"
နဂါးနတ်ဘုရားတောင်ကြား၏ နှင်းထူထပ်သော တောင်ကြီးအချို့တွင် ပြင်းထန်သော ပေါက်ကွဲသံများ ထွက်ပေါ်လာ၏။ ဖိအားများလွန်းသဖြင့် အစီရင်အခြေခံများ ပေါက်ကွဲကုန်ကြခြင်း ဖြစ်သည်။
အစီရင်၏ အခြေခံတချို့ ပေါက်ကွဲသွားသည်နှင့်၊ အစီရင်ကြီး၏ စွမ်းအားမှာ ပို၍ အားနည်းသွားလိမ့်မည်။
"ခလွမ်... ခလွမ်"
အစီရင်၏ အစိတ်အပိုင်းတချို့က ထပ်မံ ပြိုကျလာသည်။ အကာကွယ် အစီရင်ပေါ်တွင် အက်ကြောင်းများက ပိုများလာ၏။ နောက်ဆုံးတွင် ကျယ်လောင်သော ပေါက်ကွဲသံနှင့်အတူ အစီရင်က လုံးဝ ပေါက်ကွဲသွားတော့သည်။
"သတ်"
"သတ်"
"သတ်"
ဂိုဏ်းသုံးခုမှ ကျွမ်းကျင်သူများက အစီရင်များ တည်ဆောက်ပြီး နဂါးနတ်ဘုရားတောင်ကြားကို တိုက်ခိုက်လိုက်ကြသည်။
အန္တိမသူတော်စင်လေးယောက်က ဦးဆောင်ပြီး လုမင်ကို ပစ်မှတ်ထားကာ တိုက်ခိုက်လိုက်၏။
တိမ်နဂါးတောင်ကြားသခင်နှင့် ရေခဲနဂါးတောင်ကြားသခင်က လေထဲသို့ပျံတက်ပြီး အန္တိမသူတော်စင်လေးဦးနှင့် ရင်ဆိုင်လိုက်ကြသည်။
ထိပ်သီး အကျော်အမော်များက ကောင်းကင်အမြင့်သို့ ပျံတက်သွားကာ ပြင်းထန်စွာ တိုက်ခိုက်လိုက်တော့သည်။
ဂိုဏ်းသုံးခု၏ အခြား ကျွမ်းကျင်သူများကလည်း အစီရင်ကြီးများ ဖွဲ့စည်းပြီး ဆက်လက် တိုက်ခိုက်လိုက်ကြသည်။ ဧရာမ နတ်ဆိုးနတ်ဘုရား၊ ဖားကြီးနှင့် လှံရှည်တို့က နဂါးနတ်ဘုရားတောင်ကြားကို ဝင်ရောက် တိုက်ခိုက်လိုက်၏။
"ဂါး... ဂါး"
နဂါးနတ်ဘုရားတောင်ကြားတွင် နဂါးဟိန်းသံများ ထွက်ပေါ်လာတော့သညါ။
နဂါးနတ်ဘုရားတောင်ကြား၏ တောင်ကြားခုနစ်ခုမှ ကျွမ်းကျင်သူများက အစီရင်ကြီးများကို တည်ဆောက်လိုက်ကြသည်။ ချက်ချင်းဆိုသလိုပင် ရေခဲနဂါး၊ ခရမ်းရောင်နဂါးနှင့် သွေးနဂါးတို့ တစ်ကောင်စီက ကောင်းကင်တွင် ပေါ်လာ၏။
စုစုပေါင်း ဧရာမ အစစ်အမှန်နဂါးငါးကောင်က ကောင်းကင်သို့ ပျံတက်သွားပြီး ဧရာမ နတ်ဆိုးနတ်ဘုရားနှင့် အခြား အစီရင်နှစ်ခုဆီသို့ ဦးတည်သွားတော့သည်။
ငွေနဂါးတောင်ကြားကတော့ နောက်ကျောတွင်သာ ကျန်ရစ်ခဲ့ပြီး တိုက်ခိုက်ခြင်းမပြုပေ။
တိမ်နဂါးတောင်ကြားကလည်း လူဦးရေ နည်းလွန်းသောကြောင့်၊ ဤမျှကြီးမားသော အစီရင်ကို ဖွဲ့စည်းရန်ခက်သည်။
"ဝုန်း... ဝုန်း"
နှစ်ဘက်ကြားတွင် ကြောက်စရာကောင်းသော တိုက်ခိုက်မှုများ ဖြစ်ပေါ်လာခဲ့သည်။ ကြောက်မက်ဖွယ်ကောင်းသော အားလှိုင်းများက မြေပြင်ကို အက်ကွဲသွားစေခဲ့၏။ နဂါးနတ်ဘုရားတောင်ကြား၏ အပြင်ဘက်စွန်းရှိ ရေခဲတောင်ကြားက ဤတိုက်မိမှုတွင် တိုက်ရိုက်ပြိုကျသွားတော့သည်။
တိုက်ပွဲစတင်ပြီး ခဏချင်းမှာပင် မရေမတွက်နိုင်သော ဂူများ ဖျက်ဆီးခံခဲ့ရသည်။
ကံကောင်းစွာဖြင့်၊ အားနည်းသော တပည့်များစွာက နဂါးနတ်ဘုရားတောင်ကြား၏ နက်နဲရာသို့ ဆုတ်ခွာသွားခဲ့ကြပြီ။
"ဆရာတူညီလေး လုမင်၊ ပြန်ဆုတ်ကြစို့"
ရန်ထျန်းကျုံးနှင့် အခြားသူများက လုမင်၏အနားတွင် ပေါ်လာကာ နောက်ဆုတ်သွားကြသည်။ ဤအဆင့် တိုက်ပွဲမျိုးတွင် သူတို့က ကြားဝင်ရန်မလွယ်ပေ။
လုမင်က ရန်ထျန်းကျုံးတို့နှင့် ဆုတ်ခွာသွားရင်း တွေးနေသည်။
ဆမ်ဆာရာလှံပုဆိန်ကို သုံးသင့်သလားဟု သူ စဉ်းစားနေခြင်း ဖြစ်၏။
ဆမ်ဆာရာလှံပုဆိန်တွင် အမြင့်ဆုံးအင်အား နှစ်ခုသာ ရှိသည်။ ၎င်းက နှစ်ကြိမ်သာ အသုံးပြုနိုင်ပြီး အလွန်တန်ဖိုးကြီးပေသည်။ လုမင်သည် အခြားရွေးချယ်စရာရှိလျှင် ၎င်းကို လုံးဝ မသုံးချင်ပါ။ သို့သော်လည်း ယခုတော့ သူသုံးရတော့မည်ဟု ထင်သည်။
"မဟာအစီရင်ကြီး နိုးထလော့"
နဂါးနတ်ဘုရားတောင်ကြား၏ အကြီးအကဲတစ်ယောက်က အော်လိုက်သည်။ သူသည် မဟာသူတော်စင်နယ်ပယ် ပြီးပြည့်စုံခြင်းအဆင့်မှ အကျော်အမော်တစ်ဦးဖြစ်ပြီး ဤတိုက်ပွဲကို တာဝန်ယူထားပေသည်။
နဂါးနတ်ဘုရားတောင်ကြား၏ တောင်ကြားများနှင့် နှင်းထူထပ်သော တောင်များတွင် အလင်းရောင်များ ထွန်းလင်းတောက်ပလာခဲ့သည်။ လေနှင့် ဆီးနှင်းများ စုစည်းပြီး နှင်းနဂါးကြီး တစ်ဒါဇင် ဖြစ်ပေါ်လာ၏။ နှင်းနဂါးကြီးများက ဂိုဏ်းကြီးသုံးခု၏ အစီရင်များကို တိုက်ခိုက်လိုက်တော့သည်။
ဤသည်မှာ အိမ်ကွင်းအားသာချက် ဖြစ်သည်။ ဂိုဏ်းအကာအကွယ် အစီရင်ကြီးအပြင် နဂါးနတ်ဘုရားတောင်ကြားတွင် တိုက်ခိုက်ရေး အစီရင်များလည်း အများအပြား ရှိသေးသည်။
မဟာအစီရင်ကြီးက နဂါးနတ်ဘုရားတောင်ကြားမှ တောင်ကြားငါးခု၏ အစီရင်ကြီးများနှင့် ပေါင်းစပ်လိုက်သည်။ အချိန်တစ်ခုအတွင်းမှာတော့ နှစ်ဖက်စလုံးက ရှေ့မတိုးသာ နောက်မဆုတ်သာ ဖြစ်နေကြတော့သည်။
သို့သော်... နဂါးနတ်ဘုရားတောင်ကြားက အားနည်းချက်ရှိနေသေးကြောင်း ထင်ရှားသည်။
နောက်ဆုံးတွင်၊ ဂိုဏ်းသုံးခုစလုံးက အထက်တန်းစားများဖြစ်ကြသည်။ ဂိုဏ်းသုံးခု၏ တိုက်ခိုက်ရေး အစီရင်များသည် အလွန်အစွမ်းထက်၏။ နဂါးနတ်ဘုရားတောင်ကြားက အင်အားစုတစ်ခုတည်းသာ ဖြစ်သည်။ သူတို့က အိမ်ကွင်းအားသာချက်ရှိသော်လည်း အားနည်းချက်ကတော့ ရှိနေသေးသည်။
အစီရင်ဖြင့် ဖွဲ့စည်းထားသော အစစ်အမှန်နဂါးကြီးများက အဆက်မပြတ် ဆုတ်သွားကြရသည်။
ကောင်းကင်မှာလည်း တိမ်နဂါးတောင်ကြားသခင်နှင့် ရေခဲနဂါးတောင်ကြားသခင်က အန္တိမသူတော်စင်လေးဦးကို ဆန့်ကျင်တိုက်ခိုက်နေရ၏။ သူတို့မှာလည်း အားနည်းချက်ရှိနေကြသည်။
နဂါးနတ်ဘုရားတောင်ကြား၏ အခြေအနေက ပိုဆိုးလာသည်။
ဆမ်ဆာရာလှံပုဆိန်ကလည်း လုမင်၏လက်ထဲတွင် ပေါ်လာပြီ။
ဆမ်ဆာရာလှံပုဆိန်၏ အင်အားနှစ်ခုက အဖိုးတန်သော်လည်း ယခုအချိန်တွင် ၎င်းကို အသုံးပြုရန် လိုအပ်သည်။
ထိုစဉ်... နဂါးနတ်ဘုရားတောင်ကြား၏ နက်နဲရာမှ မိုးပြိုခမန်း နဂါးဟိန်းသံကြီး ထွက်ပေါ်လာသည်။
ဤနဂါးဟိန်းသံသည် တိမ်များကိုဖြတ်၍ မိုင်ပေါင်းသိန်းချီကာ ပျံ့နှံ့သွား၏။ ရှေးဦး နတ်နဂါးကြီး၏ ဟိန်းဟောက်သံကဲ့သို့ဖြစ်ပြီး အလွန်ကြောက်စရာကောင်းသည်။
ဂိုဏ်းသုံးဂိုဏ်းမှ လူတိုင်းမှာလည်း ထိတ်လန့်သွားကာ နဂါးနတ်ဘုရားတောင်ကြား၏ နက်နဲရာဆီသို့ မျှော်ကြည့်လိုက်တော့သည်။
"ဂါး"
နောက်ထပ် နဂါးဟိန်းဟောက်သံ ထွက်ပေါ်လာပြီးနောက် အဆုံးမရှိသော နှင်းတောင်တန်းကြီးထဲမှ ဧရာမ အစစ်အမှန်နဂါးကြီးတစ်ကောင် ပေါ်လာခဲ့သည်။ ၎င်း၏ ခန္ဓာကိုယ်တစ်ခုလုံးက နှင်းဖြူရောင်ဖြစ်ပြီး ကြည်လင်တောက်ပနေ၏။ ၎င်းက မီတာတစ်သောင်းကျော် ရှည်လျားကာ ခြေတစ်လှမ်းဖြင့် စစ်မြေပြင်တွင် ချက်ချင်း ပေါ်လာတော့သည်။
"ရေခဲနဂါးဘိုးဘေးကြီး... အဲဒါ ရေခဲနဂါးဘိုးဘေးကြီးပဲ"
နဂါးနတ်ဘုရားတောင်ကြား၏ တပည့်များက ဝမ်းမြောက်ဝမ်းသာ ဖြစ်သွားကြသည်။
လုမင်၊ ရန်ထျန်းကျုံး၊ ထျန်းချွေးနှင့် အခြားသူများလည်း အံ့ဩသွားကြလေသည်။
ဒဏ္ဍာရီအရ နဂါးနတ်ဘုရားတောင်ကြား၏ အနက်ရှိုင်းဆုံးအရပ်မှာ ရေခဲနဂါးကြီးတစ်ကောင် နေထိုင်သည်ဟု ဆိုသည်။ ၎င်းက နှစ်ပေါင်းများစွာကတည်းက ရှင်သန်နေပြီး နဂါးနတ်ဘုရားတောင်ကြား၏ အစောင့်အရှောက် နတ်သားရဲကြီး ဖြစ်၏။ နဂါးနတ်ဘုရားတောင်ကြားရှိ နှင်းများသည်လည်း ဤရေခဲနဂါးကြီးကြောင့် ဖြစ်သည်။
ထိုဒဏ္ဍာရီကို အမှန်ဖြစ်မည်ဟု သူတို့ မမျှော်လင့်ခဲ့ကြပေ။
"ကျူးကျော်သူတွေ... ထွက်သွားစမ်း"
ရေခဲနဂါးဘိုးဘေးက ဟိန်းဟောက်လိုက်သည်။ သူ့ခန္ဓာကိုယ်ကြီးကလည်း ပိုကြီးလာ၏။ သူက လက်သည်းတစ်ဖက်ဖြင့် ကောင်းကင်နတ်ဆိုးဂိုဏ်း၏ ဧရာမ နတ်ဆိုးနတ်ဘုရားကို ဖမ်းဆုပ်လိုက်တော့သည်။
"ဝုန်း"
ဧရာမ နတ်ဆိုးနတ်ဘုရားကြီးမှာ ရေခဲနဂါးကြီး၏ လက်သည်းဖြင့် နောက်သို့ ဆုတ်သွားရသည်။ ၎င်း၏ ရင်ဘတ်တွင်လည်း အပေါက်ကြီးတစ်ခု ပေါ်လာပေသည်။
ထို့နောက် ရေခဲနဂါးကြီးက ၎င်း၏အမြီးဖြင့် ဧရာမ လှံရှည်ကို ရိုက်ထုတ်လိုက်သည်။ အစီရင်ကို ဖွဲ့စည်းထားသော ကျွမ်းကျင်သူများက ကြောက်မက်ဖွယ်ကောင်းသော ဖိအားအောက်တွင် ရှိနေပုံရ၏။ သူတို့၏မျက်နှာများက ဖြူဖျော့ပြီး သွေးများ အန်ထွက်လာတော့သည်။
ရေခဲနဂါးကြီးက ဟိန်စဟောက်ပြီး ကြောက်စရာကောင်းသော အအေးဓာတ်ကို မှုတ်ထုတ်လိုက်သည်။ ၎င်းက ဧရာမဖားကြီးကို အေးခဲစေပြီး ကောင်းကင်အဆိပ်ဂိုဏ်းမှ ကျွမ်းကျင်သူများကို သွေးအန်စေခဲ့ပေသည်။
ရေခဲနဂါးဘိုးဘေးကြီးက အလွန်အစွမ်းထက်သည်။ သူက ပေါ်လာသည်နှင့်တပြိုင်နက် ဂိုဏ်းကြီးသုံးခု၏ အစီရင်များကို ဖိနှိပ်လိုက်၏။
ထို့နောက် ရေခဲနဂါးကြီးက နောက်ထပ် ခြေတစ်လှမ်း လှမ်းပြီး ဖားကြီးကို ကုတ်ဆွဲလိုက်သည်။ ဖားကြီးက ပေါက်ကွဲသွားသည်။ ကောင်းကင်အဆိပ်ဂိုဏ်းမှ ကျွမ်းကျင်သူများ ဒဏ်ရာပြင်းပြင်းထန်ထန်ရကာ ဆုတ်သွားကြတော့သည်။
"ဆုတ်၊ ဆုတ်"
ကောင်းကင်နတ်ဘုရားဂိုဏ်းနှင့် ကောင်းကင်နတ်ဆိုးဂိုဏ်းမှ လူများလည်း မတိုက်ခိုက်ဝံ့တော့ဘဲ အလောတကြီး ဆုတ်ခွာသွားကြသည်။
ထိုအခါ ရေခဲနဂါးကြီးက ဟိန်းဟောက်ပြီး ကောင်းကင်ယံမှ အန္တိမသူတော်စင်များ၏ တိုက်ပွဲဆီသို့ ပျံသန်းသွားပြန်တော့သည်။