အခန်း ၁၇၂၉

အပိုင်း ( 1729 ) ဝိညာဉ်များကြားမှ အားပြိုင်ခြင်း။

ဤမြင်ကွင်းကို ပတ်ဝန်းကျင်ရှိ လူတိုင်း မြင်တွေ့ခဲ့ရသည်။ အထူးသဖြင့်၊ ကောင်းကင်နတ်ဆိုးဂိုဏ်းချုပ်နှင့် ကောင်းကင်အဆိပ်ဂိုဏ်းတို့မှ လူတိုင်း တုန်လှုပ်သွား၏။ သူတို့အားလုံး လိပ်ပြာလွင့်မတတ် လန့်ဖျပ်သွားကြသည်။

အန္တိမသူတော်စင်တစ်ဦးကို လုမင်က လှံပုဆိန်တစ်ချက်ဖြင့် သတ်ဖြတ်ခဲ့သည်။

လုမင်က အဘယ်ကြောင့် ဤမျှအစွမ်းထက်နိုင်သနည်း။

'သေစမ်း...သေစမ်း၊ ဒီကောင်လေးက ဒီလောက်ကြောက်စရာကောင်းတဲ့ စွမ်းအားကို ဘယ်လိုထိန်းချုပ်နိုင်တာလဲ'

ကောင်းကင်နတ်ဆိုးဂိုဏ်းချုပ်မှာ အလွန်တုန်လှုပ်သွားခဲ့သည်။ သူ့စိတ်ထဲမှ အော်ဟစ်ကျိန်ဆဲရင်း မျက်စိမျက်နှာပျက်သွား၏။

"ဟားဟားဟား၊ ကောင်းတယ်။ မိစ္ဆာဝိညာဉ်ဂိုဏ်းရဲ့ အကြွင်းအကျန်တွေကို တစ်ခါတည်း ဖျက်ဆီးလိုက်ကြစို့"

တိမ်နဂါးတောင်ကြားသခင်က အားပါးတရ ရယ်မောလိုက်သည်။ သူ၏ ဓားအလင်းက နဂါးတစ်ကောင်ကဲ့သို့ ကခုန်နေပြီး မိစ္ဆာဝိညာဉ်ဂိုဏ်းမှ အန္တိမသူတော်စင်ကို နောက်ဆုတ်စေရန် ဖိအားပေးခဲ့သည်။

"ဒါက ဘယ်လိုဖြစ်နိုင်မှာလဲ"

သွေးနတ်ဆိုးဘုရင်၏ မျက်နှာကြီးကလည်း အော်ဟစ်လိုက်သည်။

"သွေးနတ်ဆိုးဘုရင်၊ ငါမင်းကို အခုသတ်မယ်"

လုမင်က ဆမ်ဆာရာလှံပုဆိန်ကို ကိုင်ဆောင်ပြီး သွေးနတ်ဆိုးဘုရင်ကို တိုက်ခိုက်လိုက်၏။

ဆမ်ဆာရာလှံပုဆိန်က ဧကရာဇ်အဆင့်အောက်တွင် မည်သူ့ကိုမဆို သတ်နိုင်သည်။ သွေးနတ်ဆိုးဘုရင်က သူ၏အထွတ်အထိပ်တွင် ဧကရာဇ်အဆင့် အကျော်အမော်တစ်ပါး ဖြစ်ခဲ့သည်။ သို့သော်လည်း ယခုအခါမှာတော့ အကြွင်းအကျန်ဝိညာဉ်တစ်ချပ်မျှသာ ကျန်ရှိတော့သောကြောင့် သူ့ကိုသတ်ရန် အခက်အခဲ မရှိတော့ပေ။

"အသုံးမကျတဲ့ အမှိုက်တွေ... ငါ သူ့ခန္ဓာကိုယ်ကိုပဲ အရင်သိမ်းပိုက်ရတော့မယ်"

သွေးနတ်ဆိုးဘုရင်က အော်ဟစ်ပြီး သွေးအလင်းတစ်ခုအဖြစ် ပြောင်းလဲကာ ရှဲ့နျန်ချင်း၏ မျက်ခုံးနှစ်ခုကြားသို့ ပြေးဝင်သွားခဲ့သည်။

"မဟုတ်ဘူး"

လုမင် မျက်နှာပျက်သွားသည်။ သူက ရှဲ့နျန်ချင်းဆီသို့ ချက်ချင်း ပြေးသွား၏။

"ရှောင်ချင်း၊ နိုးထတော့"

လုမင်က ကျယ်လောင်စွာ အော်လိုက်သည်။ သူ့အသံက မိုးကြိုးထစ်ချုန်းသကဲ့သို့ ကျယ်လောင်သော်လည်း အသုံးမဝင်ပေ။ ရှဲ့နျန်ချင်းက မနိုးလာသေးပါ။

ထို့ပြင်၊ ရှဲ့နျန်ချင်း၏ ခန္ဓာကိုယ်ကို သွေးရောင်အလင်းလွှာတစ်ခုက လွှမ်းခြုံသွားသည်။ သူမ၏ ခန္ဓာကိုယ်က အနည်းငယ် တုန်ခါသွားပြီး နာကျင်သော အမူအရာတို့ ပေါ်လာတော့သည်။

လုမင် အလွန်စိုးရိမ်သွားသည်။ သွေးနတ်ဆိုးဘုရင်က ရှဲ့နျန်ချင်း၏ခန္ဓာကိုယ်ကို သိမ်းပိုက်ရန် ကြိုးပမ်းနေပြီ။ သူက ရှဲ့နျန်ချင်း၏ ဝိညာဉ်ဆန္ဒကို ဖျက်ဆီးပြီး အစားထိုးလိုခြင်းဖြစ်ကြောင်း ထင်ရှားသည်။

ဤအဖြစ်မျိုးကို လုမင် လက်မခံနိုင်ပေ။

"ငါ မင်းနဲ့ လိုက်ခဲ့မယ်"

လုမင်၏ မျက်လုံးများက ခိုင်မာသော ဆုံးဖြတ်ချက်တစ်ခု‌ ပေါ်လာသည်။ ထို့နောက် ရှေ့တစ်လှမ်းတိုးကာ အစီရင်နိယာမကို အသက်သွင်းလိုက်၏။ မြေပြင်ပေါ်တွင် မရေမတွက်နိုင်သော ရွန်းများ ပေါ်လာတော့သည်။

ရွန်းများက ကမ္ပည်းများထက် ပိုအဆင့်မြင့်သည်။ နိယာမကို နားလည်ထားသူများသာ ထုတ်ဖော်နိုင်ပေသည်။

လုမင်က အစီရင်ကြီးတစ်ခုကို တည်ဆောက်လိုက်သည်။ ထို့နောက် တင်ပျဉ်ခွေထိုင်လိုက်၏။ သူ့မျက်ခုံးနှစ်ခုကြားမှ တောက်ပပြီး လူရိပ်သေးသေးလေးတစ်ခု ပေါ်လာတော့သည်။ လုမင်၏ ဝိညာဉ် ဖြစ်သည်။

လုမင်၏ စိတ်ဝိညာဉ်က ရှဲ့နျန်ချင်း၏ မျက်ခုံးနှစ်ခုကြားသို့ ပြေးဝင်သွားခဲ့သည်။

နောက်အခိုက်အတန့်တွင်၊ လုမင်၏ ဝိညာဉ်က အကန့်အသတ်မဲ့သော နေရာလွတ်တစ်ခုတွင် ပေါ်လာ၏။ ဤနေရာကား ရှဲ့နျန်ချင်း၏ အသိစိတ်ပင်လယ် ဖြစ်တော့သည်။

လုမင်က အသိစိတ်ပင်လယ်အတွင်းသို့ ပြေးဝင်လာပြီးသည်နှင့် ရှဲ့နျန်ချင်း၏ရုပ်သွင်ကို မြင်လိုက်ရသည်။

ထိုအချိန်တွင်၊ ရှဲ့နျန်ချင်းကို သွေးအခိုးအငွေ့များက ဖုံးလွှမ်းထားပေသည်။

"ရှောင်ချင်း"

လုမင်က အော်ဟစ်ပြီး ပြေးသွားသည်။

အဆိုပါ ရှဲ့နျန်ချင်းပုံရိပ်က ရှဲ့နျန်ချင်း၏ စိတ်ဝိညာဉ်တော့ မဟုတ်ပါ။ ရှဲ့နျန်ချင်းက သူတော်စင်နယ်ပယ်သို့ မချိုးဖြတ်ရသေးသဖြင့် စိတ်ဝိညာဉ်ဖြစ်ပေါ်လာခြင်း မရှိသေးပေ။ ဤသည်မှာ ရှဲ့နျန်ချင်း၏ ဝိညာဉ်ဆန္ဒ ဖြစ်သည်။

ဝိညာဉ်ဆန္ဒက အသိစိတ်ပင်လယ်ထဲတွင် ပုံရိပ်တစ်ခုကို ဖော်ထုတ်နိုင်သည်။ လုမင်သည်လည်း ရှေးယခင်ကပင် သူ၏ အသိစိတ်ပင်လယ်ထဲတွင် ပုံစံတစ်ခုကို ပုံဖော်နိုင်ခဲ့သည်။ သို့သော်လည်း အခြားသူ၏ အသိစိတ်ပင်လယ်ထဲသို့ သူ့စိတ်ဝိညာဉ်ကို ပို့လွှတ်ရန်တော့ မဖြစ်နိုင်ပေ။

သူတော်စင်နယ်ပယ်သို့ ဖြတ်ကျော်ပြီးမှသာ ဝိညာဉ်ဆန္ဒက စိတ်ဝိညာဉ်အဖြစ်သို့ ပြောင်းလဲပြီး သွားလာနိုင်စွမ်းရှိလာမည် ဖြစ်သည်။

သွေးနတ်ဆိုးဘုရင်က ရှဲ့နျန်ချင်း၏ ဝိညာဉ်ဆန္ဒကို သန့်စင်ခဲ့လျှင်၊ ရှဲ့နျန်ချင်းက ​​ကမ္ဘာကြီးမှ ထာဝရ ပျောက်ကွယ်သွားလိမ့်မည်။

"လုမင်"

ရှဲ့နျန်ချင်းက အော်လိုက်သည်။ လုမင်ကို သူမ၏ အသိစိတ်ပင်လယ်ထဲသို့ ရောက်ရှိလာမည်ဟု မမျှော်လင့်ခဲ့ပေ။

"သွေးနတ်ဆိုးဘုရင်၊ သေစမ်း"

လုမင်က အလင်းတန်းတစ်ခုအလား ပြောင်းလဲပြီး သွေးနတ်ဆိုးဘုရင်ဆီသို့ ပြေးသွားခဲ့သည်။ သူက ကစဉ့်ကလျားနိယာမကို အသက်သွင်းပြီး သွေးနတ်ဆိုးဘုရင်၏ဝိညာဉ်ကို ရိုက်ထုတ်လိုက်၏။

နိယာမဖြင့် မိုးနှင့်မြေကို သဘာဝစွမ်းအင်များကို ဆွဲယူနိုင်စေသည်။ ၎င်းက ကိုယ်ပိုင်စွမ်းအင် မဟုတ်ပေ။ ထို့ကြောင့် စိတ်ဝိညာဉ်က နိယာမစွမ်းအားကို အသုံးပြုနိုင်သည်။

"ကောင်လေး၊ မင်း သေချင်နေတာပဲ"

သွေးနတ်ဆိုးဘုရင်က အေးစက်စက် အော်ဟစ်လိုက်ပြီး လူသားအသွင်သဏ္ဍာန် ပြောင်းလဲလာသည်။ သူ့ပုံစံက အဘွားအိုတစ်ဦးကဲ့သို့ ဖြစ်၏။ အိုမင်းရင့်ရော်နေသော လက်တစ်ဖက်ဖြင့် လုမင်ကို ဖမ်းဆုပ်လိုက်တော့သည်။

"ဒုန်း"

လုမင်၏ လက်ဝါးက သွေးနတ်ဆိုးဘုရင်၏ လက်သည်းကို ထိမှန်သွားသည်။ ချက်ချင်းဆိုသလို၊ လုမင်က သူ့လက်ကို ဆွဲဖြဲတော့မလို​ ​ကြောက်​မက်​ဖွယ်​စွမ်းအားများ တိုးလာသည်​ကို ခံစားလိုက်​ရတော့သည်။

လုမင်၏ ပုံရိပ်က လျင်မြန်စွာ ဆုတ်ခွာသွားသည်။ ကစဉ့်ကလျားနိယာမဖြင့် ထိုစွမ်းအားကို ချေဖျက်လိုက်ရပေသည်။

သွေးနတ်ဆိုးဘုရင်က အကြွင်းအကျန်ဝိညာဉ်တစ်ခုသာဖြစ်သော်လည်း၊ သူမ၏ အထွတ်အထိပ်ကာလတွင် ဧကရာဇ်အဆင့် တည်ရှိမှုတစ်ခု ဖြစ်ခဲ့သည်။ သူမ၏ အခြေခံအုတ်မြစ်သည် ခိုင်မာလွန်း၏။ ယခုအချိန်တွင် လုမင်က သူမနှင့် မယှဉ်နိုင်သေးပေ။

လုမင်၏ စိတ်ဝိညာဉ်စွမ်းအားက မဟာသူတော်စင်နယ်ပယ်နှင့် ညီမျှနေလျှင်ပင် အသုံးမဝင်သေးပါ။

"ကောင်လေး၊ ဒီနေ့ မင်း ဒီကောင်မလေးကို မကယ်နိုင်ရုံတင်မကဘဲ မင်းကိုယ်တိုင် ဒီမှာနေခဲ့ရလိမ့်မယ်"

သွေးနတ်ဆိုးဘုရင်က လှောင်ပြောင်ပြီး လုမင်ဆီသို့ လွင့်မျောလာသည်။ သူက လက်သည်းများဖြင့် လုမင်ကို ဆက်လက်ကုပ်ဆွဲလိုက်၏။

"နတ်ဘုရားဓားကျင့်စဉ်"

လုမင်က အတွေးတစ်ခုဖြင့် နတ်ဘုရားဓားကျင့်စဉ်ကို အသက်သွင်းလိုက်သည်။ သူ့တစ်ကိုယ်လုံးက ဓားတစ်လက်အဖြစ် ပြောင်းလဲသွားပြီး သွေးနတ်ဆိုးဘုရင်ကို ခုတ်ထစ်လိုက်တော့သည်။

"နတ်ဘုရားဓားကျင့်စဉ်က ဝိညာဉ်တွေအတွက်တော့ တကယ်ကို ရန်ဘက်ပါပဲ။ ကံမကောင်းချင်တော့ မင်းရဲ့ ဝိညာဉ်စွမ်းအားက အားနည်းလွန်းတယ်"

သွေးနတ်ဆိုးဘုရင်က လှောင်ပြောင်လိုက်သည်။ သူ့လက်သည်းများက လုမင်မှ အသွင်ပြောင်းထားသော ဓားကို ဖမ်းဆုပ်လိုက်၏။ သံသံချင်း ပွတ်တိုက်သံ ထွက်ပေါ်လာပြီး လုမင် အသွင်ပြောင်းထားသော စိတ်ဝိညာဉ်ဓားက လွင့်စဉ်သွားတော့သည်။

ဝိညာဉ်ဓားက လုမင်အဖြစ်သို့ ပြန်ပြောင်းသွားသည်။ ထို့နောက် လုမင်၏ပုံရိပ်က လှုပ်ရှားပြီး ရှဲ့နျန်ချင်း၏အနားတွင် ပြန်ပေါ်လာခဲ့လေသည်။

"ရှောင်ချင်း၊ မင်းအဆင်ပြေရဲ့လား"

လုမင်က ရှဲ့နျန်ချင်းကို စိုးရိမ်ပူပန်စွာဖြင့် ကြည့်လိုက်သည်။

"ငါအဆင်ပြေပါတယ်။ လုမင်... နင်က ဘာဖြစ်လို့ ဒီနေရာကို ရောက်နေတာလဲ။ မြန်မြန်ထွက်သွားပါ"

ရှဲ့နျန်ချင်းကလည်း စိုးရိမ်တကြီး ပြော၏။

"ငတုံးမလေး၊ မင်း ဘာတွေပြောနေတာလဲ။ မင်းအန္တရာယ်ကြုံနေချိန်မှာ ငါက ဘယ်လိုလုပ်ပြီး ထွက်သွားနိုင်မှာလဲ။ ငါတို့အတူတူ ဖြတ်ကျော်ကြမယ်၊ ဒီနေ့သေရင်လည်း ငါတို့အတူတူသေမယ်"

လုမင်က ကြင်နာစွာ ပြောလိုက်လေသည်။

"အေး၊ ဒီလိုဆိုမှတော့ မင်းတို့နှစ်ယောက်စလုံးကို အတူတူ လိုက်ပို့ပေးလိုက်မယ်"

သွေးနတ်ဆိုးဘုရင်က လှောင်ပြောင်ကာ သူတို့နှစ်ဦးကို တိုက်ခိုက်လိုက်သည်။ သူ့လက်သည်းများဖြင့် သူတို့နှစ်ယောက်ကို လှမ်းဆွဲလိုက်၏။

"ဒါက ငါ့ရဲ့ အသိစိတ်ပင်လယ်... ထွက်သွားစမ်း"

ရှဲ့နျန်ချင်းက အော်လိုက်သည်။ သူမ၏ ဝိညာဉ်ဆန္ဒက တောက်ပလာပြီးနောက် ကြောက်မက်ဖွယ်ကောင်းသော အတက်အကျတစ်ခုက သွေးနတ်ဆိုးဘုရင်ထံ ပျံ့နှံ့သွားတော့သည်။

သွေးနတ်ဆိုးဘုရင်၏ မျက်လုံးများက လေးနက်လာခဲ့သည်။ သူက လက်သည်းများဖြင့် မမြင်နိုင်သော အတက်အကျလှိုင်းများကို ချိုးဖျက်ရန် ကုတ်ခြစ်လိုက်၏။

ရှဲ့နျန်ချင်းပြောတာက မမှားပေ၊ ဤသည်မှာ သူမ၏ အသိစိတ်ပင်လယ် ဖြစ်သည်။ ခန္ဓာကိုယ် သိမ်းပိုက်ရန်က ထိုမျှမလွယ်ပေ။

သူမ၏ အသိစိတ်ပင်လယ်ထဲတွင် ရှဲ့နျန်ချင်းက ပြင်ပကမ္ဘာမှ ဝိညာဉ်များကို ချေမှုန်းပစ်ရန် ကြောက်မက်ဖွယ်စွမ်းအားများကို ထုတ်လွှတ်နိုင်သည်။

ထို့ကြောင့် သွေးနတ်ဆိုးဘုရင်က သူ၏စိတ်ဝိညာဉ်ကို ပိုအားကောင်းလာစေရန် သူတော်စင် ဝိညာဉ်များကို ဦးစွာ ဝါးမျိုသန့်စင်လိုခဲ့ခြင်းပင်။ ထို့နောက် အားလုံးသေချာမှ ရှဲ့နျန်ချင်းကို စတင်သိမ်းပိုက်မည် ဖြစ်သည်။

ယခုတော့ အပြောင်းအလဲများကြောင့် ကြိုတင်၍ လှုပ်ရှားခဲ့ရပြီ။

"သတ်"

လုမင်က နတ်ဘုရားဓားကျင့်စဉ်ကို ဆက်လက်အသုံးပြုပြီး ဝိညာဉ်ဓားအဖြစ် ပြောင်းလဲခဲ့သည်။ သူသည် ရှဲ့နျန်ချင်းနှင့် ပူးပေါင်းပြီး သွေးနတ်ဆိုးဘုရင်ကို တိုက်ခိုက်လိုက်၏။

ထိုအချိန်တွင်၊ အပြင်ဘက်မှာ တိုက်ပွဲများကလည်း ပိုပြင်းထန်လာသည်။

အကျော်အမော်များစွာတို့ ကျဆုံးသွား၏။ သူတို့၏ သွေးများကြောင့် နတ်ဆိုးတောင်မှာ အနီရောင် ဆေးဆိုးထားသလို ဖြစ်နေတော့သည်။

တစ်ဖက်တွင်၊ ကောင်းကင်နတ်ဆိုးဂိုဏ်းချုပ်မှာ လုမင်၏ စိတ်ဝိညာဉ်က ရှဲ့နျန်ချင်း၏ မျက်ခုံးနှစ်ခုကြားသို့ ဝင်ရောက်သွားကြောင်း တွေ့လိုက်ရသောကြောင့် စိုးရိမ်ပူပန်လာသည်။

"မင်းတို့အားလုံး လုမင်ကို သွားသတ်လိုက်ကြ၊ မြန်မြန်"

ကောင်းကင်နတ်ဆိုးဂိုဏ်းချုပ်က အော်လိုက်သည်။

ရုတ်တရက်၊ မဟာသူတော်စင်အချို့က လုမင်ထံ ပြေးသွားကြ၏။

"မင်းတို့ သေချင်နေတာပဲ"

ကြိမ်းမောင်းပြောဆိုသံနှင့်အတူ ဓားအလင်းတစ်ခုက ကောင်းကင်ကို ဖြတ်သန်းလာသည်။ သူတော်စင်နှစ်ယောက်က ချက်ခြင်း အသတ်ခံလိုက်ရတော့သည်။

ဓားအလင်းတစ်ခု တောက်ပပြီးနောက် တိမ်နဂါးတောင်ကြားသခင်က လုမင်၏အနားတွင် ပြန်ပေါ်လာကာ ကာကွယ်ထားလိုက်သည်။

"သတ်၊ လုမင်ကိုသတ်ကြ။ သွေးနတ်ဆိုးဘုရင်က ခန္ဓာကိုယ်သိမ်းပိုက်တာကို မနှောင့်ယှက်စေနဲ့"

ကောင်းကင်နတ်ဆိုးဂိုဏ်းချုပ်က အော်ဟစ်လိုက်သည်။

ဤအရာအားလုံးက သူမ၏ အနာဂတ်နှင့် သက်ဆိုင်ပေသည်။ သွေးနတ်ဆိုးဘုရင် အောင်မြင်ခဲ့လျှင် သူမက ဧကရာဇ်တစ်ပါးဖြစ်ရန် အခွင့်အရေးရှိနိုင်သည်။ ထို့ကြောင့်၊ လုမင်မှ ဖျက်ဆီးပစ်ရန် သူ ခွင့်မပြုနိုင်ပေ။

ကောင်းကင်နတ်ဆိုးဂိုဏ်းချုပ်က အစွမ်းကုန်သုံးပြီး သူ့ပြိုင်ဘက်ကို တွန်းလှန်ကာ တိမ်နဂါးတောင်ကြားသခင်ဆီသို့ ပြေးသွားသည်။

တစ်ချိန်တည်းမှာပင် အခြားသော အန္တိမသူတော်စင် နှစ်ဦးသည်လည်း တိမ်နဂါးတောင်ကြားသခင်ဆီသို့ ပြေးသွားကြ၏။

ဤအခိုက်တွင် မိစ္ဆာဝိညာဉ်ဂိုဏ်းဘက်မှာ နောက်ထပ် အန္တိမသူတော်စင်နှစ်ပါး ပေါ်လာသည်။ မိစ္ဆာဝိညာဉ်ဂိုဏ်းက အန္တိမသူတော်စင်များတွင် အရေအတွက် အသာစီးရခဲ့ပေသည်။