အခန်း ၁၇၃၂

အပိုင်း ( 1732 ) မိစ္ဆာဝိညာဉ်ဂိုဏ်းကို ချေမှုန်းရန်။

လဝက်ခန့်ကြာပြီးနောက် နောက်ဆုံးတွင်၊ ရှဲ့နျန်ချင်းက သူတော်စင်နယ်ပယ်သို့ အောင်မြင်စွာ ဖြတ်ကျော်နိုင်ခဲ့သည်။

ထို့နောက် လုမင်၊ ရှဲ့နျန်ချင်း၊ ရေခဲနဂါးဘိုးဘေးနှင့် တိမ်နဂါးတောင်ကြားသခင်တို့က နဂါးနတ်ဘုရားတောင်ကြားသို့ ပြန်သွားကြ၏။

နဂါးနတ်ဘုရားတောင်ကြားသို့ ပြန်ရောက်သောအခါ လုမင်က သတင်းများစွာကို ကြားလိုက်ရသည်။

လွန်ခဲ့သည့်လဝက်တွင်၊ ကောင်းကင်နတ်ဆိုးဂိုဏ်းမှ တိုက်ပွဲသတင်းက စန်းပြည်နယ်တစ်ခွင်သို့ ပျံ့နှံ့သွားပြီး ကမ္ဘာကို တုန်လှုပ်စေခဲ့ပေသည်။

ထို့နောက်တွင် နဂါးနတ်ဘုရားတောင်ကြား၊ သေခြင်းရှင်ခြင်းဓားဂိုဏ်း၊ နတ်ဆိုးရဲတိုက်နှင့် အခြား ဂိုဏ်းများက မိစ္ဆာဝိညာဉ်ဂိုဏ်းကို ချေမှုန်းရန် စန်းပြည်နယ်ရှိ အဓိက အင်အားစုများအားလုံးကို စုစည်းခဲ့ပြီး တခဏအတွင်းမှာပင် လူတော်တော်များများ တုံ့ပြန်လာခဲ့ကြသည်။

ကောင်းကင်နတ်ဘုရားဂိုဏ်း၊ ကောင်းကင်ကိုးဆင့်ဓားဂိုဏ်းနှင့် မိစ္ဆာလမင်းဂိုဏ်းတို့က အချင်းချင်း တုံ့ပြန်ကြပြီး မိစ္ဆာဝိညာဉ်ဂိုဏ်းကို နှိမ်နင်းရန် မဟာမိတ်ဖွဲ့ခဲ့သည်။

ထို့နောက်တွင် ကြားနေခဲ့ကြသော ကောင်းကင်ဘုရင်နန်းတော်၊ လင်လုံနန်းတော်နှင့် ပိုယွမ်မိသားစုတို့သည်လည်း မဟာမိတ်အဖွဲ့သို့ ဝင်ရောက်ခဲ့၏။

ထိုအချိန်တွင်၊ စန်းပြည်နယ်၏ ထိပ်တန်းအင်အားစုကြီး ကိုးခုစလုံးက ပူးပေါင်းခဲ့ကြသည်။ အခြား အင်အားစုကြီး၊ငယ်များကလည်း ပါဝင်လာကြပေရာ ၎င်းတို့၏ အင်အားမှာ မယှဉ်နိုင်လောက်အောင် ကြီးမားလာတော့သည်။

ဤကာလအတွင်းတွင်၊ အင်အားစုကြီး အသီးသီးတို့က မိစ္ဆာဝိညာဉ်ဂိုဏ်း၏ ပုန်းအောင်းရာအရပ်ကို စုံစမ်းစစ်ဆေးရန် အစွမ်းထက်သော ကျင့်ကြံသူများကို အဆက်မပြတ် စေလွှတ်ခဲ့ကြသည်။ ၎င်းတို့ကို တစ်ရှိန်ထိုး သုတ်သင်ရန် ပြင်ဆင်နေကြပေသည်။

နောက်ထပ် လဝက်ကြာပြီးနောက်တွင် မိစ္ဆာဝိညာဉ်ဂိုဏ်း၏ ပုန်းအောင်းရာနေရာကို တွေ့ရှိခဲ့ကြသည်။ ၎င်းက စန်းပြည်နယ်မြောက်ဘက်ရှိ မြေရိုင်းဒေသတွင် ရှိ၏။ အချိန်အတိုင်းအတာတစ်ခုအတွင်း၊ စန်းပြည်နယ်ရှိ အင်အားစုပေါင်းစုံမှ အကျော်အမော်များက မြောက်ဘက်တွင် စုရုံးလာကြတော့သည်။

ကောင်းကင်ကိုးဆင့်ဓားဂိုဏ်းက မြောက်ဘက်တွင် တည်ရှိသည်။ ထို့ကြောင့် ကောင်းကင်ကိုးဆင့်ဓားဂိုဏ်း၏ အပြင်ဘက်တွင် အကျော်အမော်များအားလုံးက စုရုံးလာကြတော့သည်။

နဂါးနတ်ဘုရားတောင်ကြား၊ ရေခဲနဂါးဘိုးဘေးနှင့် တိမ်နဂါးတောင်ကြားသခင်တို့က တိုက်ခိုက်ရန်အတွက် ကျွမ်းကျင်သူများကို ဦးဆောင်ခဲ့ကြသည်။ ရေခဲနဂါးတောင်ကြားသခင်ကတော့ နဂါးနတ်ဘုရားတောင်ကြားကို စောင့်ကြပ်ရန် နေရစ်ခဲ့ပေသည်။

လုမင်နှင့် ရှဲ့နျန်ချင်းတို့သည်လည်း အင်အားစုများနှင့်အတူ ထွက်ခွာကာ စစ်ပွဲတွင် ပါဝင်ခဲ့ကြသည်။

တိမ်နဂါးတောင်ကြားတွင် ဒုတိယ ဆရာတူအစ်ကို လုံယွမ်ရှန်က တပည့်များကို တာဝန်ယူရန် နောက်တွင်နေခဲ့သည်။ ထျန်းချွေးနှင့် ရွယ်နင်ရှင်းတို့ကလည်း အားနည်းနေသေးသောကြောင့် မလိုက်နိုင်ခဲ့ကြပေ။ ရန်ထျန်းကျုံးအပါအဝင် လုမင်၏ စတုတ္တနှင့် ပဉ္စမ ဆရာတူများအားလုံးကတော့ သူတော်စင်များဖြစ်သောကြောင့် အတူတကွ တိုက်ပွဲဝင်ခဲ့ကြသည်။

ရက်အတော်ကြာပြီးနောက် သူတို့က ကောင်းကင်ကိုးဆင့်ဓားဂိုဏ်း၏ အပြင်ဘက်သို့ ရောက်ရှိလာကြလေသည်။

ထိုအချိန်၊ ကောင်းကင်ကိုးဆင့်ဓားဂိုဏ်း၏ အပြင်ဘက်တွင် လူအများအပြား စုဝေးခဲ့ကြသည်။ သူတို့အားလုံးက ဂိုဏ်းပေါင်းစုံမှ ကျွမ်းကျင်သူများ ဖြစ်၏။ ၎င်းတို့အနက် အားအနည်းဆုံးမှာ အဆင့်မြင့်သိုင်းအုပ်ချုပ်သူ ဖြစ်သည်။

ပူဖောင်းလေးကဝော့ လွန်ခဲ့သော ရက်အနည်းငယ်ကတည်းက တိတ်တဆိတ် လေ့ကျင့်နေခဲ့သည်။ သူ့ကို အဖြူရောင်အလင်းများဖြင့် ပိုးအိမ်သဏ္ဍာန် ဖွဲ့စည်းထား၏။

လုမင်လည်း ပူဖောင်းလေးက အဆင့်တက်တော့မည်ဖြစ်ကြောင်း သိလိုက်သည်။

လုမင်၏စိတ်ထဲတွင် တိတ်တဆိတ် ဝမ်းသာသွားလေသည်။ အကယ်၍ ပူဖောင်းလေးသာ သူတော်စင်နယ်ပယ်သို့ ဖြတ်ကျော်သွားပါက၊ အချိန်ဟင်းလင်းပြင် နိယာမဖြင့် ပို၍ပင်အံ့အားသင့်ဖွယ် ဖြစ်နိုင်သည်။

ကောင်းကင်ကိုးဆင့်ဓားဂိုဏ်း အပြင်ဘက်တွင် လူများ ပိုမိုစုဝေးလာခဲ့သည်။ စန်းပြည်နယ်ရှိ ဂိုဏ်းပေါင်းစုံမှ ပညာရှင်များကလည်း ဆက်လက်စုရုံးခဲ့ကြ၏။

ရက်အနည်းငယ်ကြာပြီးနောက် ထိပ်တန်း အင်အားစုကြီး ကိုးခုစလုံး ရောက်လာကြတော့သည်။

ဤတစ်ကြိမ်တွင် ထိပ်တန်းဂိုဏ်းတစ်ခုစီမှ အန္တိမသူတော်စင်နှစ်ဦးကို စေလွှတ်ခဲ့ကြသည်။

ထိပ်တန်း အင်အားစုကြီး ကိုးခုတွင် အန္တိမသူတော်စင် ဆယ့်ရှစ်ယောက် ရှိ၏။ မဟာသူတော်စင်များနှင့် တောက်ပသော သူတော်စင်များလည်း ရှိကြသေးသည်။ ထိုကဲ့သို့သော အင်အားမျိုးက စန်းပြည်နယ်ရှိ မည်သည့်အင်အားစုကိုမဆို ချေမှုန်းပစ်ရန် လုံလောက်သည်။

သူတော်စင်တစ်ပိုင်းနှင့် အဆင့်မြင့်သိုင်းအုပ်ချုပ်သူများဆိုလျှင် သောင်းနှင့်ချီကာ ရှိခဲ့သည်။ သူတို့အားလုံးက အထက်တန်းစားများ ဖြစ်၏။ စန်းပြည်နယ်ရှိ အစွမ်းထက် ပညာရှင် တစ်ဝက်ကျော်က ထိုနေရာတွင် စုရုံးခဲ့ကြချေပြီ။

"ထွက်ခွာကြစို့"

ကောင်းကင်ကိုးဆင့်ဓားဂိုဏ်း၏ ဂိုဏ်းချုပ်က အော်ပြောလိုက်ပြီးနောက် မြောက်ဘက်သို့ ပျံသန်းသွားခဲ့သည်။

ကောင်းကင်ကိုးဆင့်ဓားဂိုဏ်းက မြောက်ဘက်တွင် တည်ရှိသောကြောင့် ဤဒေသ၏ မြေအနေအထားနှင့် အရင်းနှီးဆုံး ဖြစ်သည်။ ထို့ကြောင့် သူတို့က ကောင်းကင်ကိုးဆင့်ဓားဂိုဏ်းကို လမ်းပြစေခဲ့ပေသည်။

ထောင်ပေါင်းများစွာသော ကျွမ်းကျင်သူများ ပျံသန်းသွားကြသောအခါ ၎င်းတို့၏ ကြောက်မက်ဖွယ်ကောင်းသော အရှိန်အဝါများက ‌မိုးနှင့်မြေကို တုန်ခါစေခဲ့သည်။

လုမင်လည်း တိတ်တဆိတ် တုန်လှုပ်သွားလေသည်။ ထိပ်သီး ကျွမ်းကျင်သူများ အများအပြား စုရုံးလာခြင်းက အမှန်တကယ် အံ့အားသင့်စရာကောင်းသည်။ ဤအင်အားမျိုးကို သိုင်းဧကရာဇ်များမှလွဲ၍ အခြားမည်သူမျှ တားဆီးနိုင်မည် မဟုတ်ပါ။

မကြာမီ၊ သူတို့က ကျယ်ပြောလှသော တောင်တန်းကြီးတစ်ခုသို့ ပျံသန်းသွားကြသည်။ ထိုနေရာနှင့် နီးကပ်လာလေလေ၊ မြေပြင်က ပို၍ အရိုင်းဆန်လာလေလေပင်။

တဖြည်းဖြည်းနှင့် သူတို့ရှေ့တွင် မြူခိုးများ ပေါ်လာခဲ့ကြသည်။

လူတိုင်းက သတိထားလာကြ၏။ အန္တိမသူတော်စင်များက ခိုးဝင်တိုက်ခိုက်မှုများကို တားဆီးရန် အပြင်စွန်းတွင် ရပ်နေခဲ့ကြသည်။

‌ဤသို့ဖြင့် မိုင်တစ်ထောင်ခန့် ရှေ့တည့်တည့်ကို ပျံသန်းသွားကြလေသည်။

"ရှေ့မှာ တစ်ယောက်ယောက်ရှိတယ်"

ရုတ်တရက်၊ တစ်စုံတစ်ယောက်က အော်လိုက်သည်။

"ဝုန်း... ဝုန်း"

လူတိုင်း၏ အရှိန်အဝါများ ပေါက်ကွဲထွက်လာသည်။ သူတို့က ခံစစ်ပုံစံယူကာ ရှေ့ကိုလှမ်းကြည့်လိုက်၏။

သူတို့ရှေ့တွင် ပုံရိပ်များ အများကြီးပေါ်လာသည်။

အရှေ့ဘက်တွင် ကောင်းကင်နတ်ဆိုးဂိုဏ်းချုပ်၊ ကောင်းကင်အဆိပ်ဂိုဏ်းချုပ်နှင့် အခြားသော အန္တိမသူတော်စင်များ ရှိနေပေသည်။

နောက်ဆုံးအကြိမ် ဆုတ်ခွာသွားသောအခါက သူတို့တွင် အန္တိမသူတော်စင် ဆယ်ဦးသာ ရှိသည်။ ယခုမူကား နောက်ထပ် နှစ်ယောက်တိုးလာ၍ အန္တိမသူတော်စင် ဆယ့်နှစ်ယောက် ဖြစ်နေပြီ။

ဂိုဏ်းပေါင်းစုံမဟာမိတ်၏ဘက်ခြမ်းရှိ အန္တိမသူတော်စင်များသည်လည်း တဖျပ်ဖျပ်တောက်ကာ ရှေ့တွင် ပေါ်လာခဲ့ကြသည်။

နှစ်ဘက်စလုံးက ရပ်တန့်သွားကာ မျက်နှာချင်းဆိုင်လိုက်ကြလေသည်။

ကောင်းကင်နတ်ဆိုးဂိုဏ်းက သူတို့လာနေတာကို ကြိုသိပုံရသည်။ သူတို့က သူတို့၏ ကျွမ်းကျင်သူများကို စုစည်းထားကာ ဤနေရာတွင် စောင့်ဆိုင်းနေခဲ့ကြပေသည်။

"မိစ္ဆာဝိညာဉ်ဂိုဏ်းရဲ့ အကြွင်းအကျန်တွေကို ဖျက်ဆီးပစ်ရမယ်"

သေခြင်းရှင်ခြင်းဓားဂိုဏ်းချုပ်က အေးစက်စက် ပြောလိုက်သည်။ အဖြူနှင့်အနက် စီးကြောင်များက သူ့ခန္ဓာကိုယ်အနှံ့ စီးဆင်းနေ၏။ ယင်းက ဓားစွမ်းအင်ကြိုးမျှင်များ ဖြစ်သည်။

"ဟားဟားဟား၊ မိစ္ဆာဝိညာဉ်ဂိုဏ်းက နောက်ဆုံးမှာ စန်းပြည်နယ်ကို အုပ်ချုပ်တဲ့အပြင် ပိုကျယ်ပြောတဲ့ နယ်မြေတွေကိုလည်း လွှမ်းမိုးလိမ့်မယ်။ မိစ္ဆာဝိညာဉ်ဂိုဏ်းကို ဆန့်ကျင်တဲ့သူတွေကတော့ သေရမှာပဲ"

ကောင်းကင်နတ်ဆိုးဂိုဏ်းက အေးစက်စက် ပြောလိုက်သည်။ သူ့အကြည့်များက လုမင်နှင့် ရှဲ့နျန်ချင်းအပေါ်သို့ ကျရောက်သွား၏။ ထိုအခါ သူမ၏ မျက်နှာပေါ်တွင် အေးစက်တင်းမာသော အမူအရာတစ်ခု ပေါ်လာတော့သည်။

"အရှက်မရှိဝါကြွားဝါနေလိုက်တာ၊ ဒီနေ့ပဲ ငါတို့က မိစ္ဆာဝိညာဉ်ဂိုဏ်းကို ဖျက်ဆီးပစ်မယ်"

မိစ္ဆာဝိညာဉ်ဂိုဏ်းမှ အန္တိမသူတော်စင်တစ်ယောက်က ရှေ့သို့ တိုးလာခဲ့သည်။ သူ့ခန္ဓာကိုယ်ကို အနက်ရောင် လအလင်းရောင်က ဖုံးလွှမ်းနေပြီး အလွန်ကြောက်မက်ဖွယ်ကောင်းပုံရပေသည်။

ထိုအကျော်အမော်သည် ယခင်က ကောင်းကင်နတ်ဆိုးဂိုဏ်း၏ အလစ်အငိုက် တိုက်ခိုက်မှုကြောင့် ပြင်းထန်စွာ ဒဏ်ရာရခဲ့သည်။ ဤကာလအတွင်း ပြန်လည်ကောင်းမွန်လာခဲ့သော်လည်း ကောင်းကင်နတ်ဆိုးဂိုဏ်းနှင့် ကောင်းကင်အဆိပ်ဂိုဏ်းတို့အပေါ် တူးတူးခါးခါး မုန်းတီးခဲ့၏။ ဤအခိုက်တွင်၊ သူက ချက်ချင်း ပြေးဝင်တိုက်ခိုက်ချင်စိတ်ပင် ဖြစ်ပေါ်နေတော့သည်။

"ဝုန်း... ဝုန်း"

အခြားသော အန္တိမသူတော်စင်များကလည်း ရှေ့သို့ တိုးလာကာ အားကောင်းသော အရှိန်အဝါများကို ထုတ်ဖော်လိုက်ကြသည်။

"အန္တိမသူတော်စင်နယ်ပယ် အစောပိုင်းအဆင့်လေးပါပဲ။ သတ်လိုက်ရုံပေါ့"

ထိုအချိန်တွင် ကျယ်လောင်သော စကားသံတစ်ခု ထွက်ပေါ်လာသည်။ သို့သော် သူတို့ထဲမှ မဟုတ်ပေ။ ယင်းအစား၊ ၎င်းက မိစ္ဆာဝိညာဉ်ဂိုဏ်းဝင်များ၏ နောက်ကွယ်မှ ထွက်လာခြင်း ဖြစ်သည်။ ထို့နောက် ခရမ်းရွှေရောင် ၀တ်စုံဝတ်ထားသည့် လူလတ်ပိုင်းအရွယ် အမျိုးသားတစ်ဦးက လေထဲမှ လျှောက်လှမ်းလာတော့သည်။

ထိုလူက ဦးခေါင်းထက်တွင် ကျောက်စိမ်းသရဖူကို ဆောင်းထားသည်။ သူ့ထံမှ မြင့်မြတ်သော အရှိန်အဝါတို့ ထွက်ပေါ်နေ၏။ သူက လူ့လောက၏ ဧကရာဇ်တစ်ပါးကဲ့သို့ပင်။

သူ့လက်ထဲမှာတော့ ဧကရာဇ်၏ဓားကဲ့သို့ ရွှေရောင်ဓားတစ်ချောင်းကို ကိုင်ထားသည်။ သူက ဓားချက်ထုတ်ဖော်လိုက်သောအခါ ရွှေရောင်ဓားအလင်းတစ်ခုက မိစ္ဆာလမင်းဂိုဏ်းမှ အကျော်အမော်ဆီသို့ ဖြတ်သန်းသွားတော့သည်။

ဤဓားအလင်းက ကြောက်မက်ဖွယ်ကောင်းလွန်းသည်။ အကန့်အသတ်မဲ့ ကြီးကျယ်သော အငွေ့အသက်က လူများစွာကို ကိုးကွယ်လိုစိတ် ဖြစ်စေခဲ့၏။ သူတို့က ခုခံရန်ပင် မစဉ်းစားနိုင်ကြပေ။

"အန္တိမသူတော်စင်နယ်ပယ် ပြီးပြည့်စုံခြင်းအဆင့်"

မိစ္ဆာလမင်းဂိုဏ်း၏ အန္တိမသူတော်စင်က မယုံနိုင်စွာ အော်ဟစ်လိုက်သည်။ ထို့နောက် ပိတ်ဆို့ရန် အတတ်နိုင်ဆုံး ကြိုးစားခဲ့၏။ အဆုံးမဲ့ လအလင်းရောင် ထွက်ပေါ်လာပြီး ပိတ်ဆို့ရန် ကြိုးစားတော့သည်။

သို့သော်လည်း အရာအားလုံးက အချည်းနှီးဖြစ်သာ ဖြစ်သည်။ ဓားအလင်းက ဖြတ်သွားသည်နှင့် လအလင်းရောင် ကွဲထွက်သွားသည်။ ကြောက်မက်ဖွယ်ကောင်းသော ဓားအလင်းက မိစ္ဆာလမင်းဂိုဏ်းမှ အန္တိမသူတော်စင်အပေါ် ကျရောက်သွား၏။

မိစ္ဆာလမင်းဂိုဏ်းမှ အန္တိမသူတော်စင်၏ ခန္ဓာကိုယ်က အေးစက်တောင့်တင်းသွားတော့သည်။ ကြောက်ရွံ့တုန်လှုပ်စွာဖြင့် သူ့မျက်လုံးများ ပြူးကျယ်သွားသည်။

ထို့နောက်တွင်၊ သူ့မျက်ခုံးနှစ်ခုကြားမှာ သွေးစီးကြောင်းတစ်ခု ပေါ်လာ၏။ ထို့နောက်မှာတော့ သူ့ခန္ဓာကိုယ်က အလယ်မှ ထက်ခြမ်းကွဲထွက်သွားတော့သည်။

လူတိုင်း၏ နှလုံးသားများ တုန်လှုပ်သွားကြသည်။

အန္တိမသူတော်စင်တစ်ပါးက ထိုကဲ့သို့ ကျဆုံးသွားခဲ့ပြီ။ ဓားတစ်ချက်တည်းဖြင့် သေဆုံးသွားပြီ ဖြစ်သည်။

အထူးသဖြင့် တိမ်နဂါးတောင်ကြားသခင်နှင့် အခြားသော အန္တိမသူတော်စင်များ၏ မျက်လုံးများက ကျဉ်းမြောင်းလာပြီး မယုံကြည်မှုများနှင့် ပြည့်နှက်နေတော့သည်။

ပြီးပြည့်စုံခြင်းအဆင့် အန္တိမသူတော်စင်။

ဧကရာဇ်တစ်ပါး၏ အရှိန်အဝါနှင့် ပြည့်နှက်နေသော လူလတ်ပိုင်းအရွယ် အမျိုးသားက အမှန်တကယ်ပင် ပြီးပြည့်စုံခြင်းအဆင့် အန္တိမသူတော်စင် ဖြစ်သည်။

တစ်ဖက်လူများတွင် ဤမျှ အစွမ်းထက်သော ကျင့်ကြံသူက မည်သို့ရှိနေပါသနည်း။

စန်းပြည်နယ်တစ်ခုလုံးမှာပင် ပြီးပြည့်စုံခြင်းအဆင့် အန္တိမသူတော်စင် တစ်ဦး မရှိပါ။ ရေခဲနဂါးဘိုးဘေးက နှစ်ပေါင်းများစွာ လေ့ကျင့်ခဲ့ပြီးပြီဖြစ်သော်လည်း အန္တိမသူတော်စင်အဆင့်သို့ ရောက်ရှိမလာသေးပေ။

တစ်ဖက်တွင်၊ လုမင်က ပို၍ အံ့ဩသွားခဲ့သည်။

ထိုလူ၏ အရှိန်အဝါကို သူ အလွန်ရင်းနှီး၏။ တိရီကို အမှတ်ရလာမိသည်။

ဟုတ်သည်၊ ထိုအမျိုးသား၏ အရှိန်အဝါက တိရီနှင့် ရှမ်းဟွမ်တိုက်ကြီးသို့ ‌ဆင်းသက်လာခဲ့သော တိရှန်းတို့၏ အငွေ့အသက်နှင့် တကယ်ကို ဆင်တူပေသည်။

"တိမိသားစု၊ မင်းက တိမိသားစုကပဲ"

တစ်စုံတစ်ယောက်က အော်လိုက်သည်။

လူများစွာ တုန်လှုပ်သွား၏။ တိမိသားစုသည် စန်းပြည်နယ် အနောက်မြောက်ဘက်ရှိ ဧကရာဇ်အဆင့် အင်အားစုတစ်ခု ဖြစ်သည်။

"ကြည့်ရတာ မင်းတို့က အမြင်နည်းနည်းရှိပုံရတယ်"

လူလတ်ပိုင်း အမျိုးသားက လျစ်လျူရှုစွာ ပြောလိုက်သည်။ သူ့ထံမှ တောက်ပသော ရွှေရောင်အလင်းများ ဖြာထွက်နေပြီး လက်အောက်ငယ်သားများကို ကြည့်နေသည့် ဧကရာဇ်တစ်ပါးကဲ့သို့ပင်။