အခန်း ၁၇၄၄

အပိုင်း ( 1744 ) ယှဉ်ပြိုင်ကြခြင်း။

အနီရောင်ဆံပင်ဖြင့် လူငယ်လေး၏ တိုက်ခိုက်မှုစွမ်းရည်က ကြောက်စရာကောင်းသည်။ သူ့တွင် ကောင်းကင်အဆင့်နိမ့် ဝိညာဉ်ခန္ဓာ ရှိ၏။ သူ၏ ကျင့်ကြံမှုကလည်း တောက်ပသော သူတော်စင်နယ်ပယ် အဆင့်မြင့်သို့ ရောက်နေပြီ။

လုမင်ကို ပို၍ အံ့ဩစေသည်မှာ ထိုလူငယ်က နတ်ဘုရားစွမ်းရည်ကို အသုံးပြုခဲ့ခြင်း ဖြစ်သည်။

ဧကရာဇ်အဆင့် အင်အားစုမှ ပါရမီရှင်များက တကယ်ကို ကြောက်မက်ဖွယ်ကောင်းသည်။ ထိုလူငယ်က တောက်ပသော သူတော်စင်နယ်ပယ်သာ ရှိသေးသော်လည်း နတ်ဘုရားစွမ်းရည်ကို နားလည်နေပြီ။ စန်းပြည်နယ်တွင် နှစ်ပေါင်းထောင်သောင်းချီ ကျင့်ကြံခဲ့သည့် တောက်ပသော သူတော်စင်နယ်ပယ် ဘီလူးအိုကြီးအများစုပင်လျှင် နတ်ဘုရားစွမ်းရည်ကို နားမလည်နိုင်သေးကြောင်း သိထားကြရမည် ဖြစ်သည်။

ထိုသို့သော ပါရမီရှင်တစ်ဦးက နတ်ဘုရားသားတော်နှင့် ကျင့်ကြံခြင်းအဆင့် တူညီလျှင်ပင်၊ နတ်ဘုရားသားတော်ကို တစ်ချက်တည်းဖြင့် သတ်ပစ်နိုင်စွမ်းရှိသည်။

"ဝုန်း"

ဝမ်ထျန်းလုံ၏ ဓားက မီးတောက်တိုင်လုံးကို ထိုးခုတ်လိုက်သောအခါ ကြောက်မက်ဖွယ်ကောင်းသော တုန်ခါမှုလှိုင်းတစ်ခု ဖြစ်ပေါ်လာခဲ့သည်။ အနီရောင်ဆံပင်ဖြင့် လူငယ်လေးလည်း သူ့ခန္ဓာကိုယ်က တုန်ခါကာ နောက်သို့ဆုတ်သွားရတော့သည်။

"နတ်ဘုရားစွမ်းရည် တစ်ဆယ်ရာခိုင်နှုန်းရဲ့ စွမ်းအားနဲ့ ငါ့ကို ရင်ဆိုင်ချင်နေတယ်။ မင်းက ကိုယ့်ကိုယ်ကိုယ် အထင်ကြီးနေတာပဲ"

ဝမ်ထျန်းလုံက အေးစက်စက် ပြောလိုက်သည်။ သူ့ခန္ဓာကိုယ်ပေါ်တွင် တောက်ပသော အလင်းအစက်များ ထွန်းလင်းလာသည်။ စုစုပေါင်းအလင်းစက် သုံးဆယ့်ခြောက်ခုရှိပြီး သူတော်စင်လက်နက်များက အလင်းစက်တစ်ခုစီမှ ပျံထွက်လာ၏။ သို့သော်လည်း ၎င်းတို့အားလုံးက တောက်ပသောသူတော်စင်ရတနာများ ဖြစ်သည်။

သူ၏ ယခင်က မဟာသူတော်စင်နက်အပါအဝင် စုစုပေါင်း သူတော်စင်လက်နက် သုံးဆယ့်ခုနစ်ခု ရှိပေသည်။ တိုက်ပွဲလက်နက်များ၏ စွမ်းအင်များက စုစည်းပြီး ကြောက်မက်ဖွယ်ကောင်းသော ဓားချီတစ်ခုအဖြစ် ပြောင်းလဲသွားသည်။ ထို့နောက် အနီရောင်ဆံပင်နှင့် လူငယ်လေးဆီသို့ ခုတ်ချလိုက်၏။

အနီရောင်ဆံပင်နှင့် လူငယ်လေးက ဟိန်းဟောက်ပြီး နတ်ဘုရားစွမ်းရည်ကို ထပ်မံအသုံးပြုကာ ‌မီးတိုင်လုံးကို ထုတ်ဖော်လိုက်သည်။

သို့သော် ဤတစ်ကြိမ်တွင်၊ ဓားအလင်းက မီးတိုင်လုံးကို ခွဲထွက်သွားခဲ့သည်။ ဓားအလင်းက ထိုမျှနှင့်မရပ်ဘဲ အနီရောင်ဆံပင်နှင့် လူငယ်လေးကို ဆက်လက်ခုတ်ချလိုက်၏။ အနီရောင်ဆံပင်နှင့် လူငယ်လေးလည်း ထိတ်လန့်တကြားဖြင့် နောက်ကို အမြန်ပြန်ဆုတ်သွားသည်။ သို့သော်၊ များစွာ နောက်ကျသွားပြီ။ သူ့ခန္ဓာကိုယ်ကို ဓားအလင်းက ထက်ခြမ်းခွဲချလိုက်ပြီး မီးလုံးနှစ်ခုအဖြစ် ပြောင်းလဲသွားသည်။ မီးလုံးနှစ်ခုက လျင်မြန်စွာ ဆုတ်ခွာသွားပြီး သူ၏ လူသားပုံစံသို့ ပြန်လည် ပေါင်းစည်းခဲ့၏။ သို့သော်လည်း သူ့မျက်နှာက ဖြူဖျော့နေပြီး ရောင်ဝါမှာလည်း လွန်စွာ အားနည်းသွားတော့သည်။

သူ၏ ဝိညာဉ်ခန္ဓာက မီးဝိညာဉ်ခန္ဓာဖြစ်သော်လည်း ဓားစွမ်းအင်ကြောင့် ပြင်းထန်စွာဒဏ်ရာရရှိနေဆဲ ဖြစ်သည်။

ဝမ်ထျန်းလုံက ရယ်မောပြီး သူတော်စင်လက်နက်များကို ဝန်းရံကာ ကျောက်စိမ်းလှေကားအတိုင်း ဆက်လျှောက်သွားလေသည်။

ဝမ်ထျန်းလုံနှင့် ယှဉ်ပြိုင်ရန် မည်သူမျှ ရှေ့မထွက်လာတော့ပေ။

ဝမ်ထျန်းလုံက အလွန်အစွမ်းထက်သည်။ အနီရောင်ဆံပင်နှင့် လူငယ်လေးက အစွမ်းထက်သော်လည်း ဝမ်ထျန်းလုံ၏ဓားကို မခုခံနိုင်ဘဲ ပြင်းထန်စွာ ဒဏ်ရာရရှိခဲ့သေးသည်။

ထို့ပြင်၊ ဝမ်ထျန်းလုံက သူ့အင်အားကို မည်မျှအသုံးပြုခဲ့သည်မှန်း မည်သူမျှ မသိခဲ့ကြပါ။

မည်သို့ပင်ဆိုစေ၊ အဆောင်ရှစ်ခုကျန်နေဆဲ ဖြစ်သည်။ ဝမ်ထျန်းလုံနှင့် အကြိတ်အနယ် ယှဉ်ပြိုင်နေရန် မလိုပေ။

ဝမ်ထျန်းလုံက အဆောင်ပေါ်သို့ အောင်မြင်စွာ လှမ်းတက်ခဲ့ပြီးနောက် အဆောင်အောက်ရှိ ကျောက်စိမ်းလှေကားမှာ အလိုအလျောက် ပျောက်ကွယ်သွားခဲ့သည်။

"သခင်လေး၊ ထိုင်ပါရှင်"

အဆောင်တွင်းရှိ ယောင်ချစ်နတ်သမီးက ပြုံးရွှင်စွာဖြင့် ကြိုဆိုရင်း ဝမ်ထျန်းလုံအတွက် ကိုယ်တိုင်ကိုယ်ကျ အရက်တစ်ခွက်ငှဲ့ပေးလိုက်သည်။ ယင်းက လူအများကို မနာလိုဖြစ်စေခဲ့ပေသည်။

"နတ်သမီး၊ ကျေးဇူးပြုပြီး..."

ဝမ်ထျန်းလုံက သူ့လက်ကိုဝှေ့ယမ်းပြကာ ယောင်ချစ်နတ်သမီးနှင့်အတူ ကျောက်စိမ်းစားပွဲ၌ ထိုင်နေလိုက်သည်။

ထိုအချိန်တွင်၊ ဒုတိယအဆောင်ရှိ ယောင်ချစ်နတ်သမီးက မတ်တပ်ထရပ်လိုက်သည်။ သူမက လက်ကိုဝှေ့ယမ်းလိုက်သောအခါ ကျောက်စိမ်းလှေကားတစ်ခု ပေါ်လာ၏။

"ဒီညီမလေးနဲ့အတူ ဘယ်သူရဲကောင်းက လာပြီးသောက်ချင်လဲ"

သာယာသော အသံတစ်ခု ထွက်ပေါ်လာသည်။

"နတ်သမီးကို ကျုပ် အဖော်ပြုပေးပါရစေ"

မိုးကြိုးနတ်ဘုရားဂိုဏ်း၏ ပါရမီရှင်က ပြုံးလိုက်သည်။ သူ့ပုံရိပ်က လျှပ်စီးလက်သလို လှုပ်ရှားသွား၏။ နောက်အခိုက်အတန့်တွင် သူက ကျောက်စိမ်းလှေကားပေါ်တွင် ပေါ်လာတော့သည်။ ထို့နောက် သူက ပတ်ဝန်းကျင်သို့ တစ်ချက်ဝေ့ကြည့်ကာ ပြောလိုက်သည်။

"ကျုပ်နဲ့ ယှဉ်ပြိုင်ချင်တဲ့သူရှိလား။ မရှိရင်တော့ ဒီအရက်တစ်ခွက်က ကျုပ်အတွက်ဖြစ်လိမ့်မယ်"

"ကျုပ် ခင်ဗျားနဲ့ အဖော်ပြုပေးမယ်"

စကားသံနှင့်အတူ ကျောက်စိမ်းလှေကားထစ်ပေါ်သို့ လူငယ်တစ်ယောက် ဆင်းသက်လာခဲ့သည်။ တစ်ချိန်တည်းမှာပင် လှံအလင်းတစ်ခုက လေထဲသို့ ထိုးဖောက်ဝင်ရောက်ပြီး မိုးကြိုးနတ်ဘုရားဂိုဏ်း၏ ပါရမီရှင်ဆီသို့ ထိုးသွင်းလိုက်၏။

ထိုလူငယ်၏ တိုက်ခိုက်နိုင်စွမ်းက ယခင် အနီရောင်ဆံပင်နှင့် လူငယ်လေးထက် အားမနည်းသည်မှာ သေချာသည်။

"မိုးကြိုးအပြစ်ဒဏ်လက်ဝါး"

မိုးကြိုးနတ်ဘုရားဂိုဏ်း၏ ပါရမီရှင်က လက်ဝါးတစ်ချက် ရိုက်ထုတ်လိုက်သည်။ မိုးကြိုးလျှပ်စီးများ စီးဆင်းနေသကဲ့သို့ ဧရာမလက်ဝါးပုံရိပ်ကြီးက တစ်ဖက်လူငယ်ဆီသို့ ကျရောက်သွားသည်။

"ဝုန်း"

လှံအလင်းက ပေါက်ကွဲသွား၏။ လူငယ်လေးဘည်း ကျောက်စိမ်းလှေကားမှ တိုက်ရိုက် ပြုတ်ကျသွားတော့သည်။ သူ့တစ်ကိုယ်လုံး မည်းနက်နေပြီး သွေးများ အန်ထွက်လာခဲ့သည်။

တစ်ချက်တည်းဖြင့် ဒဏ်ရာအပြင်းအထန်ရခဲ့ပြီ။

"ဘယ်လောက်တောင် ကြောက်စရာကောင်းတဲ့ တိုက်ခိုက်နိုင်စွမ်းလဲ"

လူတော်တော်များများ အံ့အားသင့်သွားကြသည်။

ဤသည်မှာ ရှေးဟောင်းလ မြင့်မြတ်နယ်မြေမှ ပါရမီရှင်၏ ခွန်အားဖြစ်သလော။ သူတို့၏ တိုက်ခိုက်နိုင်စွမ်းက သန်မာလွန်းလှသည်။ သူတို့က အခြားသော ဧကရာဇ်အဆင့် အင်အားစုများ၏ ပါရမီရှင်များကို အလွယ်တကူ ချေမှုန်းနိုင်ပေသည်။

'သူတို့ရဲ့ ဝိညာဉ်ခန္ဓာတွေက အဆင့်တူပေမဲ့ ကျင့်ကြံမှုအခြေခံက ပိုကောင်းမွန်ကြတယ်။ နတ်ဘုရားစွမ်းရည်ကို နားလည်နိုင်စွမ်းကလည်း ပိုပြီးတော့ နက်နဲတယ်'

လုမင်၏ မျက်လုံးများက တောက်ပနေသည်။

ဝမ်ထျန်းလုံ သို့မဟုတ် မိုးကြိုးနတ်ဘုရားဂိုဏ်း၏ ပါရမီရှင်ဖြစ်စေ... သူတို့၏ ကျင့်ကြံမှုက တောက်ပသော သူတော်စင်နယ်ပယ် အထွတ်အထိပ်ကို ရောက်ရှိနေပြီဖြစ်ကြောင်း သူ မြင်နိုင်သည်။ သူတို့၏ ဝိညာဉ်ခန္ဓာများက ကောင်းကင်အဆင့်နိမ့် ဝိညာဉ်ခန္ဓာများ ဖြစ်ကြသော်လည်း စွမ်းရည်များက ပိုအဆင့်မြင့်ပေသည်။

ပိုမြင့်မားသော ကျင့်ကြံမှုအခြေခံ၊ နတ်ဘုရားစွမ်းရည်တို့ဖြင့် သူတို့က အခြားသော ပါရမီရှင်များကို အလွယ်တကူ ချေမှုန်းနိုင်ကြသည်။

အခြားသော ဧကရာဇ်အဆင့် အင်အားစုများမှ ပါရမီရှင်များ မျက်နှာပျက်သွားကြသည်။ ရှေးဟောင်းလ မြင့်မြတ်နယ်မြေ၏ ပါရမီရှင်များအားလုံး အစွမ်းထက်ပါက၊ ၎င်းတို့တွင် အဘယ်အခွင့်အရေးရှိမည်နည်း။

မိုးကြိုးနတ်ဘုရားဂိုဏ်း၏ ပါရမီရှင်က သူ၏အစွမ်းထက် ခွန်အားကို ပြသခဲ့သောကြောင့် မည်သူမျှ သူနှင့်မယှဉ်ပြိုင်ဝံ့တော့ပေ။ သူက အဆောင်ပေါ်သို့ အလွယ်တကူ တက်လှမ်းကာ ယောင်ချစ်နတ်သမီးနှင့်အတူ အရက်သောက်နိုင်ခဲ့သည်။

ထို့နောက် တတိယအဆောင်၏ နတ်သမီးက ယခင်ကဲ့သို့ ကျောက်စိမ်းလှေကားကို ထုတ်ဖော်လိုက်သည်။

ဤတစ်ကြိမ်တွင် ရွှေရောင်အလင်းတန်းဖြင့် ရွှေကျီးကန်းနဝမမင်းသားက ကျောက်စိမ်းလှေခါးပေါ်သို့ တက်လာသည်။

ရွှေကျီးကန်း နဝမမင်းသားက အလွန်မာနကြီးသည်။ သူက ပတ်ဝန်းကျင်ကို လှည့်ပတ်ကြည့်လိုက်သော်လည်း မည်သူမျှ သူ့ကို စိန်မခေါ်ဝံ့ပေ။

ရွှေကျီးကန်းမျိုးနွယ်က အလွန်အစွမ်းထက်သည်။ ထို့ပြင် ရွှေကျီးကန်းနဝမမင်းသား၏ အရှိန်အဝါက အလွန်အားကောင်း၏။ သူ့ကို မည်သူမျှ စိန်မခေါ်ဝံ့ဘဲ တတိယအဆောင်ပေါ်သို့ လွယ်လွယ်ကူကူ တက်လှမ်းနိုင်ခဲ့ပေသည်။

ထို့နောက် ရှေးဟောင်းလ မြင့်မြတ်နယ်မြေ၏ ပါရမီရှင်တစ်ဦးက စတုတ္ထမဏ္ဍပ်ပေါ်သို့ တက်လာသည်။ ဤလူငယ်၏ အင်အားစုကို ခရမ်းရောင်အဆုံးစွန်ဂိုဏ်းဟု ခေါ်သည်။

ခရမ်းရောင်အစွန်းရောက်ဂိုဏ်း၏ ပါရမီသည်လည်း အလွန်အစွမ်းထက်ပေသည်။ သူနှင့် ယှဉ်ပြိုင်ရန် တက်လှမ်းလာသော ပါရမီရှင်တစ်ဦးအား ပြင်းထန်စွာ ဒဏ်ရာရစေပြီး အဆောင်ထဲသို့ ဝင်ရောက်သွားခဲ့သည်။

ထို့နောက် ပဉ္စမအဆောင်အလှည့်သို့ ကျရောက်သောအခါ နောက်ကျောတွင် ဓားတစ်ချောင်းလွယ်ထားသော လူငယ်တစ်ဦး တက်လာသည်။ ထိုလူငယ်ကား ကန္တာရဓားဂိုဏ်းမှ ပါရမီရှင်တစ်ဦးပင်။

"ရှေးဟောင်းလမြင့်မြတ်နယ်မြေရဲ့ ပါရမီရှင်တွေက ဒီလောက်အစွမ်းထက်မယ်လို့ ငါမထင်ဘူး။ ဒီအဆောင်က ငါ့အတွက်ပဲ"

လူငယ်တစ်ယောက်က အော်ပြောပြီး ကျောက်စိမ်းလှေကားပေါ်သို့ ပြေးတက်သွားခဲ့သည်။ သူက ကန္တာရဓားဂိုဏ်းမှ ပါရမီရှင်နှင့် ယှဉ်ပြိုင်လိုသည်။

"ရွှမ်"

ဓားသွားသံ ထွက်ပေါ်လာသည်။ ထို့နောက်တွင် လူတိုင်းက ဓားအလင်းတစ်ခု ဖြာထွက်လာသည်ကို တွေ့လိုက်ရ၏။ ထို့နောက်မှာတော့ ယှဉ်ပြိုင်ရန် တက်သွားသော လူငယ်မှာ မီတာထောင်ချီအကွာအထိ ဆုတ်ခွာသွားခဲ့ပြီး လေထဲတွင် တောင့်တောင့်ကြီးရပ်နေတော့သည်။

နောက်အခိုက်အတန့်တွင် လူငယ်၏ မျက်ခုံးနှစ်ခုကြားမှ သွေးစွန်းနေသော အမှတ်အသားတစ်ခု ပေါ်လာသည်။ ထို့နောက် သူ၏ခန္ဓာကိုယ်က နှစ်ခြမ်းကွဲသွားပြီး အောက်ရေကန်ထဲသို့ ပြုတ်ကျသွားတော့သည်။

သေပြီ။ ကောင်းကင်ဝိညာဉ်ခန္ဓာရှိသော ပါရမီရှင်တစ်ဦးသည် ထိုကဲ့သို့ အသတ်ခံခဲ့ရသည်။

အစမှအဆုံးထိ လူတိုင်းက ဓားအလင်းတစ်ခုကိုသာ မြင်လိုက်ရသည်။ ယင်းက မည်မျှ ကြောက်စရာကောင်းလိုက်ပါသနည်း။

ကန္တာရဓားဂိုဏ်း၏ ပါရမီရှင်က အမူအရာမပြောင်းပေ။ သူက အဆောင်ပေါ်သို့ တည်ငြိမ်စွာပင် တက်လှမ်းသွားသည်။ မည်သူမျှ သူနှင့် မယှဉ်ပြိုင်ဝံ့သောကြောင့် အဆောင်ပေါ်သို့ အောင်မြင်စွာ တက်လှမ်းနိုင်ခဲ့ပေသည်။

အဆောင်ငါးခုက နေရာယူပြီးနေကြပြီ ဖြစ်သည်။

ထို့နောက် ဆဋ္ဌမနှင့် သတ္တမ အဆောင်အားလုံးကိုလည်း ရှေးဟောင်းလမြင့်မြတ်နယ်မြေ၏ ပါရမီရှင်များက သိမ်းပိုက်ခဲ့ကြသည်။ ရှေးဟောင်းလ မြင့်မြတ်နယ်မြေ၏ အပြင်ဘက်ရှိ ဧကရာဇ်အဆင့် အင်အားစုများ၏ မည်သည့်ပါရမီရှင်မျှ အဆောင်ပေါ်ကို မတက်လှမ်းနိုင်သေးပေ။

ထိုအချိန်တွင် လူတိုင်း၏အကြည့်များက နောက်ဆုံးအဆောင်နှစ်ခုဆီသို့ ဦးတည်သွားကြသည်။

နှစ်ခုသာကျန်တော့သည်။ ထို့ပြင် ရှေးဟောင်းလ မြင့်မြတ်နယ်မြေ၏ ထိပ်သီး ပါရမီရှင်များ အားလုံးနီးပါးက အဆောင်ပေါ်သို့ တက်လှမ်းသွားကြပြီ ဖြစ်သည်။

ကျန်သော ပါရမီရှင်များကတော့ ထိုမျှသန်မာပုံမရပေ။ ဥပမာအားဖြင့် ရွှေကျီးကျန်းဒသမမင်းသား ဖြစ်သည်။

အဋ္ဌမအဆောင်ပေါ်မှ ကျောက်စိမ်းလှေကား ပေါ်လာသောအခါ၊ လူအချို့က တပြိုင်နက်တည်း ပြေးတက်သွားကြသည်။

သူတို့ထဲမှ တစ်ယောက်က ရွှေကျီးကန်း ဒသမမင်းသား ဖြစ်၏။

"ထွက်သွား"

ရွှေကျီးကန်း ဒသမမင်းသားက အလွန်လွှမ်းမိုးပြီး ကြီးစိုးသည်။ သူ့ခန္ဓာကိုယ်ကို နေအလင်းရောင်က ဖုံးလွှမ်းထား၏။ သူက လက်သည်းဖြင့် ကုပ်ဆွဲ‌လိုက်သောအခါ မီးလျှံများက ကောင်းကင်တွင် ပြည့်သွားတော့သည်။

ရွှေကျီးကန်း ဒသမမင်းသားက တောက်ပသော သူတော်စင်နယ်ပယ် အဆင့်မြင့်အဆင့်တွင် ရှိသည်။

"ထွက်သွားသင့်တာက မင်း"

တခြားသူများကလည်း အားမနည်းကြပေ။ ၎င်းတို့က အရှိန်အဝါများကို ဖောက်ခွဲကာ ရွှေကျီးကန်း၏ ဒသမမင်းသားနှင့် တိုက်ပွဲဝင်ခဲ့ကြသည်။

တခဏချင်းတော့ သူတို့က လက်ရည်ညီနေခဲ့ပေသည်။

"ဝှစ်... ဝှစ်... ဝှစ်"

ထို့နောက်တွင် နောက်ထပ်လူရိပ် ငါးခု၊ ခြောက်ခုက ကျောက်စိမ်းလှေကားပေါ် ပြေးတက်လာကြသည်။ ထို့ကြောင့် တိုက်ပွဲက ပို၍ ပြင်းထန်လာတော့သည်။

ဒါက အပြင်းထန်ဆုံး တိုက်ပွဲဖြစ်သည်။ ကျောက်စိမ်းလှေကားပေါ်သို့ တက်လှမ်းခဲ့သော ပါရမီရှင်တိုင်းသည် အလွန် အစွမ်းထက်၏။ ယခင်က ကျောက်စိမ်းလှေကားပေါ်သို့ တက်လှမ်းခဲ့သူတိုင်းမှာ မယှဉ်သာအောင် စွမ်းအားကြီးလွန်းသည်။

ယခုမူ၊ အားလုံး၏ အရည်အချင်းက မတိမ်းမယိမ်းဖြစ်သောကြောင့် တိုက်ပွဲမှာလည်း သဘာဝအတိုင်း အလွန်ပြင်းထန်နေတော့သည်။ လူတိုင်းက နောက်ဆုံး အဆောင်နှစ်ခုအတွက် ယှဉ်ပြိုင်လိုကြသည်။