အခန်း ၁၇၇၆

အပိုင်း ( 1776 ) အားလုံးကို သတ်ခြင်း။

လုမင်က သူ့သွေးများ ဆူပွက်လာပြီး သူ့ခန္ဓာကိုယ်ရှိ သံကြိုးများ ပြတ်တောက်သွားသလို ခံစားလိုက်ရသည်။ သူ့အရှိန်အဝါက တဟုန်ထိုး တိုးတက်လာသည်။

ပထမတော့ တောက်ပသော သူတော်စင်နယ်ပယ် အဆင့်နိမ့်အဆင့်သာ ဖြစ်သေးသည်။ သို့ရာတွင်၊ ချက်ချင်းဆိုသလို တောက်ပသော သူတော်စင်နယ်ပယ်၏ အဆင့်မြင့်အဆင့်သို့ ရောက်ရှိသွားခဲ့သည်။ ထို့နောက် တောက်ပသော သူတော်စင်နယ်ပယ် အထွတ်အထိပ်နှင့် ပြီးပြည့်စုံခြင်းအဆင့်သို့ ရောက်ရှိသွား၏။

လုမင်၏ ခန္ဓာကိုယ်ရှိ အတားအဆီးအားလုံး‌ ပျောက်ကွယ်သွားပြီ။ သူ၏ တိုက်ခိုက်ရေးစွမ်းအားက တခဏချင်း ပြန်ကောင်းလာခဲ့သည်။

သူ့ရှေ့မှ မျက်လုံးသုံးလုံး နတ်မျိုးနွယ်ဝင်နှစ်ဦး၏ အမူအရာများ ပြောင်းလဲသွားကြသည်။ ထို့နောက် သူတို့က ဟိန်းဟောက်ပြီး လုမင်ကို တိုက်ခိုက်လိုက်သည်။

"သေစမ်း"

လုမင်က ဟိန်းဟောက်လိုက်၏။ နတ်ဘုရားဓားကျင့်စဉ်က အသံလှိုင်းများနှင့်အတူ ဖြန့်ကျက်ပြီး မိစ္ဆာနတ်ဆိုးနှစ်ဦး၏ ခန္ဓာကိုယ်ထဲသို့ ကျရောက်သွားတော့သည်။

တောက်ပသော သူတော်စင်နယ်ပယ် မျက်လုံးသုံးလုံး နတ်မျိုးနွယ်ဝင်နှစ်ဦးက ရုတ်တရက် တောင့်တင်းသွားသည်။ သူတို့၏ မျက်လုံးများက မယုံနိုင်ခြင်းများ ပြည့်နှက်နေ၏။ ထို့နောက်မှာတော့ သူတို့၏ မျက်လုံးများမှ အလင်းရောင်မှိန်ဖျော့လာကာ သူတို့၏ ခန္ဓာကိုယ်များသည်လည်း မြေပြင်ပေါ်သို့ ဖြည်းညှင်းစွာ ပြုတ်ကျသွားတော့သည်။

လုမင်က သူတို့၏ ဝိညာဉ်များကို ဖျက်ဆီးပစ်လိုက်ခြင်း ဖြစ်သည်။

ကျယ်လောင်သော ဟိန်းဟောက်သံနှင့်အတူ တောက်ပသူတော်စင်နယ်ပယ် မျက်လုံးသုံးလုံး နတ်မျိုးနွယ်ဝင်နှစ်ဦး သေဆုံးသွားခြင်းက အခြားသော မျက်လုံးသုံးလုံး နတ်မျိုးနွယ်ဝင်များ၏ အာရုံကို ဆွဲဆောင်ခဲ့သည်။

"သူ့ကိုသတ်"

မဟာသူတော်စင်နယ်ပယ်မှ မျက်လုံးသုံးလုံး နတ်မျိုးနွယ်ဝင်က အော်လိုက်သည်။ ရုတ်တရက်၊ မျက်လုံးသုံးလုံး နတ်မျိုးနွယ်ဝင် တစ်ဒါဇင်ကျော်က လုမင်ဆီသို့ ပြေးလာကြ၏။

"သတ်"

လုမင်၏ မျက်လုံးများကလည်း သတ်ဖြတ်လိုစိတ်များဖြင့် ပြည့်နှက်နေပြီ ဖြစ်သည်။ သူက နတ်ဘုရားဓားကျင့်စဉ်ကို အသုံးပြုပြီး ကြောက်စရာကောင်းသော စိတ်ဝိညာဉ်တိုက်ခိုက်မှုများကို ထုတ်ဖော်လိုက်သည်။

ယခုအခါ လုမင်၏ ကျင့်ကြံမှုက တောက်ပသော သူတော်စင်နယ်ပယ် ပြီးပြည့်စုံခြင်းသို့ ပြန်လည်ရောက်ရှိနေခဲ့ပြီ။ သူ၏ ဝိညာဉ်စွမ်းအားကလည်း သဘာဝအတိုင်း တိုးတက်လာသည်။ ထို့ကြောင့် နတ်ဘုရားဓားကျင့်စဉ်၏ စွမ်းအားကလည်း အံ့မခန်း ဖြစ်ခဲ့သည်။

လုမင်ဆီသို့ ပြေးလာကြသော မျက်လုံးသုံးလုံး နတ်မျိုးနွယ်ဝင် တစ်ဒါဇင်ခန့်မှာ ယခင် မျက်လုံးသုံးလုံး နတ်မျိုးနွယ်ဝင်နှစ်ဦးနှင့် မခြားပေ။ သူတို့၏ ခန္ဓာကိုယ်များ တောင့်တင်းလာကာ သူတို့ ဝိညာဉ်များ ပျက်စီးသွားကြသည်။ အသက်မဲ့သွားသော အလောင်းများက မြေပေါ်ပြုတ်ကျသွားတော့သည်။

မဟာသူတော်စင်နယ်ပယ်မှ မျက်လုံးသုံးလုံး နတ်မျိုးနွယ်ဝင်၏ မျက်နှာက သိသိသာသာ ပြောင်းလဲသွားသည်။

"သတ်"

သူက လေထဲသို့ ခြေတစ်လှမ်း လှမ်းလိုက်သည်။ သူ၏ မျက်ခုံးနှစ်ခုကြားရှိ တတိယမျက်လုံးမှ ပျက်စီးခြင်း အလင်းတန်းတစ်ခု ထွက်ပေါ်လာ၏။ ကြောက်စရာကောင်းသော စွမ်းအင် အတက်အကျများဖြင့် လုမင်ကို ပစ်လွှတ်လာတော့သည်။

"ကစဉ့်ကလျား ကပ်ဘေးလက်ချောင်း"

ကစဉ့်ကလျားနိယာမက ပျံ့နှံ့သွားသည်။ လုမင်က လက်ညှိုးတစ်ချက်ညွှန်ပြလိုက်၏။ ကစဉ့်ကလျား ကပ်ဘေးလက်ချောင်း စွမ်းအား ငါးဆယ်ရာခိုင်နှုန်းက စိတ်ကူးယဉ်နိုင်ရန် ခက်သည်။

နတ်ဘုရား၏ လက်ညှိုးနှင့်တူသော ဧရာမ လက်ချောင်းကြီးက မဟာသူတော်စင်နယ်ပယ် မျက်လုံးသုံးလုံး နတ်မျိုးနွယ်ဝင်ကို ညွှန်ပြလိုက်သည်။ မဟာသူတော်စင်နယ်ပယ် မျက်လုံးသုံးလုံး နတ်မျိုးနွယ်ဝင်၏ ဖျက်ဆီးခြင်းအလင်းက ကစဉ့်ကလျား ကပ်ဘေးလက်ချောင်းနှင့် တိုက်မိပြီး ပျက်စီးသွား၏။ သို့သော်လည်း ကစဉ့်ကလျား ကပ်ဘေးလက်ချောင်းက မရပ်တန့်ခဲ့ပေ။ ၎င်းက လျှပ်စီးလက်သကဲ့သို့ ရွေ့လျားသွားပြီး မဟာသူတော်စင်နယ်ပယ် မျက်လုံးသုံးလုံး နတ်မျိုးနွယ်ဝင်၏ရှေ့တွင် ချက်ချင်း ပေါ်လာခဲ့သည်။

ကြောက်မက်ဖွယ်ကောင်းသော စွမ်းအားကြောင့် မျက်လုံးသုံးလုံး နတ်မျိုးနွယ်ဝင်၏ အမူအရာမှာ သိသိသာသာ ပြောင်းလဲသွားခဲ့သည်။ ၎င်းက ဟိန်းဟောက်ပြီး သူ့လက်ထဲမှ ပုဆိန်ဖြင့် အဆက်မပြတ် ခုတ်ထစ်လိုက်၏။ တစ်ချိန်တည်းမှာပင်၊ သူက သူ့ခန္ဓာကိုယ်တစ်ဝိုက်တွင် အကာအကွယ်အလွှာများစွာကို ထုတ်ဖော်လိုက်တော့သည်။

သို့သော်... အသုံးမဝင်ခဲ့ပါ။ ကစဉ့်ကလျား ကပ်ဘေးလက်ချောင်းက ကျရောက်လာသည်နှင့် သူ့လက်ထဲမှ ပုဆိန်က ပေါက်ကွဲသွားသည်။ သူ၏ ခံစစ်များမှာလည်း တို့ဟူးကဲ့သို့ ကွဲအက်သွား၏။

"မဟုတ်ဘူး..."

မဟာသူတော်စင်နယ်ပယ်မှ မျက်လုံးသုံးလုံး နတ်မျိုးနွယ်ဝင်မှာ တစ်ချက်သာ အော်ဟစ်နိုင်ပြီး ပြာအဖြစ်သို့ ပြောင်းလဲသွားတော့သည်။

"ခေါင်းဆောင်"

အခြားသော မျက်လုံးသုံးလုံး နတ်မျိုးနွယ်ဝင်များ ထိတ်လန့်တုန်လှုပ်သွားကြသည်။ သူတို့၏ ခေါင်းဆောင်က မဟာသူတော်စင်တစ်ပါးဖြစ်သော်လည်း တစ်ချက်တည်းဖြင့် အသတ်ခံခဲ့ရသေးသည်။

"သတ်"

လုမင်က ဟိန်းဟောက်လိုက်သည်။ သူ၏ သတ်ဖြတ်ချင်စိတ်ကလည်း ဒီရေတက်သကဲ့သို့ တဟုန်ထိုး တက်လာ၏။ သူ့ခန္ဓာကိုယ်က အလင်းစက်များ တောက်ပနေပြီး အလင်းစက်တစ်ခုစီမှ သူတော်စင်လက်နက်တစ်ခုစီ ထွက်ပေါ်လာတော့သည်။

ဤသူတော်စင်လက်နက်များက ပျံထွက်လာသည်နှင့် တပြိုင်နက်၊ သေမင်းလက်နက်များအဖြစ် ပြောင်းလဲသွားကြသည်။ ၎င်းတို့က မျက်လုံးသုံးလုံး နတ်မျိုးနွယ်ဝင်များဆီသို့ ဦးတည်သွား၏။

လုမင်က ဤမျက်လုံးသုံးလုံး နတ်မျိုးနွယ်ဝင်များအပေါ် သနားညှာတာစိတ် လုံးဝ မရှိပေ။ သူ ပြောစရာ စကားတစ်ခွန်းသာ ရှိသည်။

အားလုံးကို သတ်။

လုမင်၏ လက်ရှိ ကျင့်ကြံမှုဖြင့် မဟာသူတော်စင်နယ်ပယ်အောက်တွင် မည်သူမျှ တိုက်ခိုက်မှုတစ်ခုထက် ပို၍မခံနိုင်ကြပေ။ ၎င်းတို့အားလုံး အလွယ်တကူ အသတ်ခံခဲ့ကြရသည်။

သူတော်စင်လက်နက် တစ်ရာကျော်က အလင်းတန်းတစ်ရာကျော်အဖြစ်သို့ ပြောင်းလဲသွားကြသည်။ ခဏချင်းမှာပင် မျက်လုံးသုံးလုံး နတ်မျိုးနွယ်ဝင် အများအပြား သေဆုံးသွား၏။

"ဆုတ်...ဆုတ်ကြ"

"သွားကြစို့၊ ဒီလူကိုသတ်ဖို့ စစ်သူကြီးကို အမြန်ပြေးခေါ်ကြမယ်"

မျက်လုံးသုံးလုံး နတ်မျိုးနွယ်ဝင်များက ကြောက်ရွံ့တုန်လှုပ်စွာဖြင့် အသည်းအသန် ဆုတ်သွားကြသည်။

"ဒီ​နေ့ မင်းတို့ဘယ်​သူမှ မလွတ်မြောက်နိုင်ဘူး"

လုမင်က အေးစက်စက် ပြောလိုက်သည်။ သူက သေခြင်းတရား၏ နတ်ဘုရားအဖြစ်သို့ ပြောင်းလဲသွားပုံရ၏။ လေထဲတွင် ရပ်နေစဉ် သူ့ခန္ဓာကိုယ်မှ နဂါးဟိန်းသံကို ကြားလိုက်ရသည်။ ဝါးမျိုခြင်း စွမ်းအားများ ထွက်ပေါ်လာပြီး မျက်လုံးသုံးလုံး နတ်မျိုးနွယ်ဝင်တစ်ခုလုံးကို ဖုံးလွှမ်းသွား၏။

သူတော်စင်နယ်ပယ်အောက်ရှိ မျက်လုံးသုံးလုံး နတ်မျိုးနွယ်ဝင်များက ထိတ်လန့်တုန်လှုပ်စွာ အော်ဟစ်လိုက်ကြသည်။ သူတို့၏ ခန္ဓာကိုယ်များက သာမန်မျက်စိဖြင့် မြင်နိုင်သော အရှိန်အဟုန်ဖြင့် ညှိုးနွမ်းသွား၏။ အဆုံးတွင် သွေ့ခြောက်သော အလောင်းများအဖြစ်သို့ ပြောင်းလဲသွားတော့သည်။

သူတော်စင်နယ်ပယ် ကျွမ်းကျင်သူများအတွက်မူ ၎င်းတို့က သွေ့ခြောက်နေသော အလောင်းများအဖြစ် မပြောင်းလဲခဲ့ပါ။ သို့သော်လည်း ဝါးမျိုခြင်းစွမ်းအားကြောင့် အကြီးအကျယ် ထိခိုက်ပြီး မလှုပ်ရှားနိုင်တော့ပေ။ ထိုအခါ သူတို့ကို စောင့်ကြိုနေသော အရာက လုမင်၏ အညှာတာမဲ့ သတ်ဖြတ်ခြင်း ဖြစ်သည်။

သူတော်စင်လက်နက်များက ကခုန်နေပြီး မျက်လုံးသုံးလုံး နတ်မျိုးနွယ်ဝင်များကို တစ်ယောက်ပြီးတစ်ယောက် သတ်ဖြတ်ခဲ့ပေသည်။ မကြာမီ၊ ဤနေရာကိုရောက်လာသော မျက်လုံးသုံးလုံး နတ်မျိုးနွယ်ဝင်များ အားလုံးနီးပါး သေဆုံးသွားကြသည်။ သူတို့၏ အလောင်းများက မျိုးနွယ်စု၏ မြေပြင်ကို ဖုံးလွှမ်းသွား၏။ လုမင်က မျက်လုံးသုံးလုံး နတ်မျိုးနွယ်ဝင်တစ်ဦးကိုသာ ချန်ရစ်ခဲ့ကာ တောင်နှင့်မြစ် ပန်းချီကားအတွင်းသို့ ပစ်ထည့်လိုက်သည်။

မျိုးနွယ်စုတစ်ခုလုံးမှာတော့ မှင်တက်စွာ ရပ်နေသော လူဒါဇင်အနည်းငယ်ခန့် ရှိသေးသည်။

၎င်းတို့သည် မျိုးနွယ်စု၏ အသက်ရှင်ကျန်ရစ်သူ အနည်းစု ဖြစ်သည်။

လုမင်က လက်သီးကို တင်းတင်းဆုပ်ထားသည်။ ဒါက ကြေကွဲစရာကောင်းလွန်း၏။ သူ၏ အချုပ်အနှောင်များကို ချိုးဖောက်နိုင်တာ နောက်ကျသောကြောင့် သူမုန်းတီးမိသည်။ အကယ်၍ သူသာ ယခုထက်မြန်ဆန်ခဲ့လျှင် ရှားဟူ၊ ရှားဟွာ၊ ဦးလေးလီနှင့် အခြားသူများ သေခဲ့လိမ့်မည် မဟုတ်ပေ။

"ဟင်း..."

သက်ပြင်းချရင်း ညည်းတွားသံက မျိုးနွယ်စုတစ်ခုလုံး ပျံ့နှံ့သွားသည်။

ယင်းက ကံကောင်းထောက်မပြီး အသက်ရှင်ကျန်ရစ်ခဲ့သော အဘိုးအိုတစ်ယောက်ပင်။ သူက မျိုးနွယ်စု၏ အကြီးအကဲတစ်ဦးလည်း ဖြစ်သည်။

"အကြီးအကဲ လျို၊ ခင်ဗျား ဘာဆက်လုပ်ဖို့ စီစဉ်ထားသလဲ"

လုမင်က အကြီးအကဲလျိုအနားသို့ ရောက်လာကာ မေးလိုက်သည်။

"အခု မျက်လုံးသုံးလုံး မိစ္ဆာနတ်ဆိုးတွေက ကောင်းကင်ကမ္ဘာကို ကျူးကျော်ဝင်ရောက်လာကြပြီ။ ကောင်းကင်ကမ္ဘာရဲ့ နေရာအတော်များများကိုတောင် ကျူးကျော်ဝင်ရောက်‌လာနေပြီလို့ ကြားတယ်။ ငါတို့ မျိုးနွယ်စုတွေကို အရင်သင်္ဂြိုလ်ပြီးတာနဲ့ မျိုးနွယ်စုကြီးတွေမှာ ခိုလှုံဖို့ ထွက်သွားကြတော့မယ်"

အကြီးအကဲလျိုက ပြောလိုက်၏။

ဤစကားများက လုမင်၏ နှလုံးသားကို လှုပ်ခတ်စေခဲ့သည်။

"အကြီးအကဲလျို၊ မျက်လုံးသုံးလုံး မိစ္ဆာနတ်ဆိုးတွေက ကောင်းကင်ကမ္ဘာကို ကျူးကျော်ဝင်ရောက်လာတာ နှစ်ပေါင်းဘယ်လောက်ရှိပြီလဲ"

လုမင်က ထပ်မေးလိုက်သည်။

"ရာစုနှစ်ချီနေပြီ၊ ကောင်းကင်ကမ္ဘာရဲ့ မရေမတွက်နိုင်တဲ့ ပညာရှင်တွေက မျက်လုံးသုံးလုံး မိစ္ဆာနတ်ဆိုးတွေနဲ့ တိုက်ပွဲမှာ သတ်ဖြတ်ခံခဲ့ရတယ်လို့ ငါကြားတယ်။ အခုဆိုရင် ကောင်းကင်ကမ္ဘာရဲ့ ကြီးမားလှတဲ့ နယ်မြေကြီးတွေကို သိမ်းပိုက်ပြီးသွားကြပြီလေ။ ဟင်း... ဒါက ဘေးဥပဒ်တစ်ခုပဲ"

အကြီးအကဲလျိုက သက်ပြင်းချလိုက်လေသည်။

လုမင်၏ စိတ်ထဲတွင် အတွေးများစွာ ပေါ်လာသည်။

သူ၏ နားလည်မှုအရ၊ မျက်လုံးသုံးလုံး နတ်မျိုးနွယ်သည် ကောင်းကင်ကမ္ဘာကို ရှေးနှစ်ပေါင်းများစွာကတည်းက ကျူးကျော်ဝင်ရောက်လာခဲ့သော်လည်း ယခုတော့ နှစ်ရာဂဏန်းမျှသာ ရှိသေးသည်။ ဒါတွေအားလုံးက အတုအယောင်ဖြစ်ပြီး ရှေးခေတ်မှ ပုံရိပ်တစ်ခုသာ ဖြစ်နိုင်သည်။

'ဒါက အစစ်လား အတုလားဆိုတာ ငါဂရုမစိုက်ဘူး။ ငါ့စိတ်ထဲမှာတော့ ဒါတွေအားလုံးက အစစ်ပဲ'

လုမင်က သူ့စိတ်ထဲမှ ရေရွတ်ပြီး ကျန်မျိုးနွယ်စုဝင်များနှင့်အတူ သေဆုံးသွားသူများကို ကောင်းစွာ မြှုပ်နှံသင်္ဂြိုဟ်ပေးလိုက်သည်။

"ညီလေး လု၊ ငါတို့နဲ့အတူ မျိုးနွယ်စုကြီးတွေမှာ ခိုလှုံရအောင် လိုက်ခဲ့ပါလား"

သင်္ဂြိုဟ်ပြီးနောက် အကြီးအကဲလျိုက ပြောလိုက်သည်။

လုမင်က ခေါင်းယမ်းလိုက်၏။

"မလိုက်တော့ပါဘူး... ခင်ဗျားတို့ သွားကြ၊ ကျုပ်က လုပ်စရာရှိသေးတယ်"

အကြီးအကဲလျိုလည်း ခေါင်းညိတ်လိုက်ပြီး သူ့ကို ဆွဲဆောင်ရန် မကြိုးစားတော့ပေ။ သူက နှုတ်ဆက်ပြီး ကျန်မျိုးနွယ်စုဝင်များနှင့်အတူ ထွက်သွားသည်။

လုမင်က သင်္ချိုင်းရှေ့တွင် တစ်ယောက်တည်း ရပ်နေခဲ့သည်။ အချိန်အတော်ကြာပြီးနောက် လုမင်က အရက်တစ်အိုးကိုထုတ်ပြီး မြေပြင်ပေါ်လောင်းချလိုက်၏။

"ဒါက အစစ်အမှန်ဖြစ်စေ... ရှေးခေတ်က ပုံရိပ်ယောင်တွေဖြစ်စေ...၊ မင်းတို့အားလုံးအတွက် ငါ လက်စားချေမယ်"

"လူမှန်ရင် မလုပ်သင့်တဲ့အရာရှိသလို လုပ်သင့်တဲ့အရာတွေလည်း ရှိတယ်"

ထို့နောက် လုမင်က သူ့လက်ကို ဝှေ့ယမ်းလိုက်သောအခါ တောင်နှင့်မြစ်ပန်းချီကားတွင်းမှ မျက်လုံးသုံးလုံး နတ်မျိုးနွယ်ဝင်က ဂူသင်္ချိုင်းများရှေ့တွင် ပေါ်လာခဲ့သည်။ သူက သတိဝင်လာပြီးနောက် လုမင်အား ကြောက်လန့်တကြား ကြည့်လိုက်၏။

"ပြောစမ်း၊ မင်းရဲ့ တခြားတပ်တွေ ဘယ်မှာလဲ"

လုမင်က အေးစက်စက် မေးလိုက်သည်။

"မင်းက ငါတို့ရဲ့ ရှေ့ပြေးတပ်တွေကို ရှာချင်တာလား။ မင်း သေချင်နေတာပဲ၊ ငါတို့ ရှေ့ပြေးတပ်တွေရဲ့ စစ်သူကြီးက မဟာသူတော်စင်နယ်ပယ် ပြီးပြည့်စုံခြင်းအဆင့် အကျော်အမော်ကွ"

မျက်လုံးသုံးလုံး နတ်မျိုးနွယ်ဝင်က ပြောသည်။

"ပြောစမ်း၊ သူတို့ဘယ်မှာလဲ"

လုမင်က အေးစက်ပြီး အပြောင်းအလဲမရှိသော လေသံဖြင့် ဆက်မေး၏။

"ဒီကနေ အနောက်ဘက် မိုင်ရှစ်သောင်း"

မျက်လုံးသုံးလုံး နတ်မျိုးနွယ်ဝင်လည်း မလိမ်ညာနေတော့ပေ။ သူက သေလူဖြစ်နေပြီမှန်း သိသည်။ သို့သော်လည်း၊ ရှေ့ပြေးတပ်တွင် ကျွမ်းကျင်သူများစွာ ရှိ၏။ လုမင် သွားရောက်ဝံ့ပါက သေချာပေါက် သေမည်ဟု သူထင်သည်။ ထို့ကြောင့် အမှန်အတိုင်းသာ ပြောပြလိုက်တော့သည်။