အခန်း ၁၈၀၈

အပိုင်း ( 1808 ) အစစ်အမှန်ဧကရာဇ်။

"လုမင်၊ မင်း ငါတို့ရဲ့ သားရဲဧကရာဇ်ကို သတ်လိုက်တာပဲ။ ငါ့ ကောင်းကင်ဝံပုလွေမျှော်စင်က မင်းကို ဘယ်တော့မှ အလွတ်မပေးဘူး။ မင်း ထမင်းဝအောင်စားထား"

ကောင်းကင်ဝံပုလွေမျှော်စင်၏ အကျော်အမော်တစ်ဦးက ဟိန်းဟောက်ပြီး ဧရာမဝံပုလွေကြီးတစ်ကောင်အဖြစ် ပြောင်းလဲသွားသည်။ သူ့မျက်လုံးများက အေးစက်သွား၏။

"ပြောပုံက သူ့ကိုမသတ်ရင် ငါ့ကို အလွတ်ပေးမှာကျနေတာပဲ"

လုမင်က မထီမဲ့မြင်ဟန်ဖြင့် လျစ်လျူရှုစွာ ပြောလိုက်သည်။

တစ်ဖက်လူများက သူ့ကို တစ်ဆင့်ပြီးတစ်ဆင့် ဖိအားပေးခဲ့သည်။ တစ်ဖက်လူကို မသတ်ခဲ့လျှင်ပင် သူ့ကို အလွတ်ပေးမည် မဟုတ်ပေ။ ထို့ကြောင့် သူစိတ်ကျေနပ်သည်အထိ သတ်ပစ်နိုင်သည်။

တစ်ဖက်လူများ၏ ဧကရာဇ်တစ်ပါးကို သတ်နိုင်ခြင်းက သူ့အတွက် အကျိုးအမြတ်တစ်ခုပင်။

"အူဝူး..."

ထိုအချိန်တွင် ဝေးကွာသောအရပ် ကောင်းကင်ယံမှ ကျယ်လောင်သော ဟိန်းဟောက်သံတစ်ခု ထွက်ပေါ်လာသည်။ ဤဟိန်းဟောက်သံက တောင်များနှင့် မြစ်များကို တုန်လှုပ်စေခဲ့၏။ ကောင်းကင်ယံမှ နေမင်းကြီးတောင် ကြွေကျလုနီး ဖြစ်လာသကဲ့သို့ပင်။

"မကောင်းတော့ဘူး"

ကောင်းကင်ယံတွင်၊ သိုင်းဧကရာဇ်များ၏ အမူအရာများ သိသိသာသာ ပြောင်းလဲသွားသည်။ သူတို့၏ အရှိန်အဝါများ ထွက်ပေါ်လာပြီး ကမ္ဘာ့စွမ်းအားများလည်း ပျံ့နှံ့သွား၏။ ၎င်းတို့၏ သက်ဆိုင်ရာ အင်အားစုများမှ ကျွမ်းကျင်သူများကို လွှမ်းခြုံလိုက်တော့သည်။

ကြောက်မက်ဖွယ်ကောင်းသော အသံလှိုင်းက သိုင်းဧကရာဇ်များ၏ အကာကွယ်စွမ်းအင်များကိုပင် ပြင်းထန်စွာ တုန်လှုပ်စေခဲ့သည်။

သိုင်းဧကရာဇ်၏ အကာအကွယ်မရှိသော လူအချို့ဆိုပါက မီးရှူးမီးပန်းများကဲ့သို့ လေထဲတွင် ပေါက်ကွဲသွား၏။

သူတို့က လုံးဝ မတုံ့ပြန်နိုင်ဘဲ ချက်ချင်း သေဆုံးသွားတော့သည်။

ကံကောင်းထောက်မစွာဖြင့် အသက်ရှင်ကျန်ရစ်သူများမှာလည်း ကြောက်ရွံ့တုန်လှုပ်စွာဖြင့် မျက်နှာများ ဖြူဖျော့သွားကြသည်။

ဒါက ဘယ်လိုတည်ရှိမှုမျိုး ဖြစ်သနည်း။ ကျယ်လောင်သော ဟိန်း‌ဟောက်သံတစ်ခုက ကျွမ်းကျင်သူ အများအပြားကို သေစေနိုင်သည်။ သိုင်းဧကရာဇ်များ၏ အမူအရာများပင် သိသိသာသာ ပြောင်းလဲသွားပေသည်။

ထို့နောက်တွင် လူတိုင်းက အလင်းတန်းတစ်ခုကို မြင်လိုက်ကြပြီး၊ ဧရာမဝံပုလွေကြီးတစ်ကောင်က နေရာတွင် ပေါ်ခာခဲ့သည်။

ဤဝံပုလွေကြီးက ငွေရောင်ဖြစ်ပြီး အမွေများကလည်း ငွေရောင်တောက်ပနေ၏။ ၎င်းက ပေတစ်သောင်းမြင့်မားပြီး တုနှိုင်းမရလောက်အောင် ကြီးမားသည်။ သူ၏ အေးစက်စက်နိုင်သော မျက်လုံးများကတော့ လုမင်ကို ကြည့်နေ၏။

ယခုအချိန်တွင် ထူးဆန်းသော အလင်းအလွှာများက သူ့ခန္ဓာကိုယ်ကို နတ်အလင်းစက်ဝိုင်းများသဖွယ် ဝိုင်းရံထားသောကြောင့် ဒဏ္ဍာရီလာနတ်ဘုရားတစ်ပါးသဖွယ် ဖြစ်နေတော့သည်။

"ကမ္ဘာ့အလင်း၊ အစစ်အမှန်ဧကရာဇ်"

ဖီးနစ်နန်းတော်၏ သိုင်းဧကရာဇ်က လေးနက်စွာ ပြောလိုက်သည်။

လူတိုင်း၏ နှလုံးသားက တုန်လှုပ်သွား၏။

ဤအစစ်အမှန်ဧကရာဇ်ကြီးက ကောင်းကင်ဝံပုလွေမျှော်စင်မှ ဖြစ်တာကိုတော့ အထူးပြောနေရန် လိုမည်မထင်ပေ။ ယခုအခါ အစစ်အမှန်ဧကရာဇ်တစ်ပါးက အမှန်တကယ် ပေါ်လာပြီ ဖြစ်သည်။

သိုင်းဧကရာဇ်နယ်ပယ်ကို ဧကရာဇ်ငယ်နယ်ပယ်၊ အလယ်အလတ်ဧကရာဇ်နယ်ပယ်၊ မဟာဧကရာဇ်နယ်ပယ်နှင့် ကောင်းကင်ဧကရာဇ်နယ်ပယ်ဟု ပိုင်းခြားထားသည်။

ဧကရာဇ်ငယ်နယ်ပယ်တွင် ကမ္ဘာငယ်လေးတစ်ခုကို စတင်ဖွဲ့စည်းနိုင်ပေသည်။ သို့သော်လည်း ဤအချိန်တွင်၊ ကမ္ဘာငယ်လေးက ဆင့်ကဲဖြစ်စဉ်သို့ ရောက်နေသည်။ ၎င်းက ဖရိုဖရဲဖြစ်နေပြီး သက်ရှိသတ္တဝါများ ဝင်ရောက်ရန် မဖြစ်နိုင်သေးပေ။ ဝင်လိုက်သည်နှင့်၊ အပိုင်းပိုင်း ကြေမွသွားမည် ဖြစ်သည်။

ထို့ကြောင့် ဧကရာဇ်ငယ်နယ်ပယ်ကို ဗလာနယ်ဧကရာဇ်ဟု ခေါ်သည်။

တစ်နည်းဆိုရသော် ကမ္ဘာငယ်လေးက ပုံသဏ္ဍာန်မပေါ်သေးသဖြင့် သတ္တဝါများ မဝင်နိုင်ကြသေးပေ။ ၎င်းတို့က စစ်မှန်သော ဧကရာဇ်များ မဟုတ်ဘဲ ဗလာနယ်ဧကရာဇ်များအဖြစ် သတ်မှတ်ခံရသည်။

အလယ်အလတ်ဧကရာဇ်များတွင်တော့ ကမ္ဘာငယ်လေးက သက်ရှိသတ္တဝါများ ဝင်ရောက်နိုင်ပြီ ဖြစ်သည်။ ဤအဆင့်ကို အစစ်အမှန်ဧကရာဇ်ဟု ခေါ်ပေသည်။

ဆိုလိုသည်မှာ သူက စစ်မှန်သော ဧကရာဇ်တစ်ပါး ဖြစ်သည်။

မဟာဧကရာဇ်များကမူ၊ ၎င်းတို့က မဟာတာအိုကို ထိန်းချုပ်ထား၏။ သူတို့၏ ကမ္ဘာငယ်လေးများက သက်ရှိသတ္တဝါများကိုပင် မွေးထုတ်ပေးနိုင်သည်။ ဒါက ပို၍ပင် လျှို့ဝှက်ဆန်းကြယ်ပြီး နားမလည်နိုင်လောက်အောင်ပင်။ ဤနယ်ပယ်တွင် သူတို့က ကမ္ဘာ၏ အထွတ်အထိပ်ကို ရောက်နေပြီ ဖြစ်သည်။

ကောင်းကင်ဧကရာဇ်များကတော့ လက်ရှိကမ္ဘာတွင် ဒဏ္ဍာရီတစ်ခုကဲ့သို့ပင်။

ယခင်က ပေါ်ထွန်းခဲ့သော ဧကရာဇ်များအားလုံးက ဧကရာဇ်ငယ် တစ်နည်း ဗလာနယ်ဧကရာဇ်များ ဖြစ်ကြသည်။

ယခုမူ၊ အစစ်အမှန်ဧကရာဇ်တစ်ပါးကို ကောင်းကင်ဝံပုလွေမျှော်စင်က စေလွှတ်လိုက်ပြီ။

အစစ်အမှန်ဧကရာဇ်များက ကမ္ဘာငယ်လေးကို အပြည့်အဝ ဖွဲ့စည်းနိုင်သဖြင့် ကမ္ဘာ့အလင်းကို ထုတ်လွှတ်နိုင်ကြသည်။

"ကောင်လေး၊ မင်းက ငါ့ကောင်းကင်ဝံပုလွေမျှော်စင်ရဲ့ သားရဲဧကရာဇ်ကို သတ်ခဲ့တဲ့သူလား"

အစစ်အမှန်ဧကရာဇ်အဆင့် ဧရာမဝံပုလွေကြီး၏ မျက်လုံးများက နေနှစ်စင်းကဲ့သို့ တောက်ပနေသည်။ ၎င်းက လုမင်ကိုကြည့်ကာ အေးစက်သောလေသံဖြင့် ပြောလိုက်၏။

"ဟုတ်တယ်"

လုမင်က ပြောသည်။ အစစ်အမှန်ဧကရာဇ်ကို ရင်ဆိုင်နေရသော်လည်း သူက ကြောက်ရွံ့မှုမရှိပေ။

တိုက်ခိုက်မည်ဆိုမှတော့ အစွမ်းကုန် တိုက်ခိုက်ရမည်။ ဤအင်အားစုကြီးများက သူ့ကို တစ်ဆင့်တစ်ဆင့် ဖိနှိပ်နေသောကြောင့် အဆုံးအထိ တိုက်ခိုက်သွားရန်သာ ရှိသည်။

"ကောင်းပြီ၊ မင်းရဲ့ဝိညာဉ်ကို ငါထုတ်ယူပြီး ငရဲမီးလျှံထဲမှာ မီးရှို့မယ်။ မင်းကို သတ်ဖို့အတွက်တောင် တောင်းဆိုလာရစေမယ်"

ဧရာမ ဝံပုလွေကြီးက သတ်ဖြတ်ချင်စိတ်အပြည့်ဖြင့် ပြောလိုက်သည်။

"သူ့ရဲ့လျှို့ဝှက်ချက်တွေကို အရင်မေးပါ"

ထိုအချိန်တွင် နောက်ထပ် အသံတစ်ခု ထွက်ပေါ်လာသည်။ ထို့နောက် ဟင်းလင်းပြင်က တုန်ခါပြီး အက်ကွဲသွား၏။ ပုံရိပ်တစ်ခုက အက်ကြောင်းအတွင်းမှ ထွက်လာတော့သည်။

၎င်းက အေးစက်စက်နှင့် မြင့်မြတ်သော အသွင်အပြင်ရှိသည့် လူလတ်ပိုင်းတစ်ဦး ဖြစ်သည်။

သူ့ခန္ဓာကိုယ်ကိုလည်း နတ်အလင်းများက ဝန်းရံထား၏။

လူတိုင်းက အသက်ပြင်းပြင်းရှူလိုက်ကြသည်။ နောက်ထပ် အစစ်အမှန်ဧကရာဇ်တစ်ပါး ပေါ်လာပြီ။

"ဘိုးဘေးကို နှုတ်ခွန်းဆက်ပါတယ်"

ဝမ်မျိုးနွယ်၏ ဧကရာဇ်က ထိုလူကိုမြင်သောအခါ ရိုသေစွာ ဦးညွတ်လိုက်သည်။

ဤသည်မှာ ဝမ်မျိုးနွယ်မှ အစစ်အမှန်ဧကရာဇ်ကြီးပင်။

"ဂီး"

ကြောက်မက်ဖွယ်ကောင်းသော ငှက်အော်သံတစ်ခု ကြားလိုက်ရသည်။ ထို့နောက်၊ အဝေးမှလာသော ရွှေရောင်အလင်းတန်းတစ်ခုကို လူတိုင်း တွေ့လိုက်ရ၏။ ရွှေရောင်အလင်းတန်း ဖြတ်ကျော်သွားတိုင်း ဟင်းလင်းပြင်က ရေကဲ့သို့ လှိုင်းထပြီး ကြောက်စရာကောင်းသော အက်ကြောင်းများ ပေါ်လာခဲ့ရသည်။

ထို့နောက် ရွှေရောင်အလင်းများ ပျောက်ကွယ်သွားပြီး ကြီးမားသော ခြေသုံးချောင်း ရွှေကျီးကန်းတစ်ကောင်က ကောင်းကင်ယံ၌ ပေါ်လာတော့သည်။ ၎င်းက စူးရှသော မျက်လုံးတို့ဖြင့် ပတ်ဝန်းကျင်ကို ဝေ့ကြည့်လိုက်၏။

ခြေသုံးချောင်း ရွှေကျီးကန်းမျိုးနွယ်၏ အစစ်အမှန်ဧကရာဇ်ကြီး ဖြစ်သည်။

ပုံမှန်အားဖြင့်၊ ရှေးဟောင်းလ မြင့်မြတ်နယ်မြေ၌ ကြီးကြီးမားမား တစ်စုံတစ်ရာ မဖြစ်ခဲ့ပါက အစစ်အမှန်ဧကရာဇ်များ ပေါ်လာကြမည် မဟုတ်ပေ။ သူတို့က အနှစ်သုံးသိန်းတွင် တစ်ကြိမ်ဖြစ်ပွားသော ကပ်ဘေးဒုက္ခကို ရင်ဆိုင်ရန်အတွက် ပို၍ အစွမ်းထက်လာရန် တံခါးပိတ်ကျင့်ကြံခြင်း သို့မဟုတ် ရတနာများ ရှာဖွေရန် ခရီးသွားခြင်းအပေါ် အာရုံစိုက်ကြမည် ဖြစ်သည်။

သို့သော်လည်း ယနေ့မှာတော့ လုမင်အတွက် အစစ်အမှန်ဧကရာဇ်များ တစ်ပါးပြီးတစ်ပါး ပေါ်လာပြီ။

"မကောင်းတော့ဘူး"

ဟွမ်လင်၊ လုံချန်နှင့် လုမင်နှင့်ရင်းနှီးသော လူများအားလုံး စိုးရိမ်ပူပန်လာကြသည်။

'အကြီးအကဲ၊ ကျွန်မတို့ ဘာလုပ်ကြမလဲ'

ဟွမ်လင်က စိုးရိမ်ပူပန်စွာဖြင့် ဖီးနစ်နန်းတော်၏ ဧကရာဇ်ကြီးထံ အသံပို့လွှတ်ကာ မေးလိုက်သည်။

"ဒီကိစ္စက ခက်တယ်။ ငါတို့ ဖီးနစ်နန်းတော်က ဒီအခြေအနေမှာ ဝင်စွက်ဖက်လို့ မရဘူး။ ငါတို့ရဲ့ အစစ်အမှန်ဧကရာဇ်တွေ ဝင်စွက်ဖက်ခဲ့မယ်ဆိုရင် စစ်ပွဲကြီး ဖြစ်သွားလိမ့်မယ်။ အဲဒါကြောင့် ငါတို့ရဲ့ အစစ်အမှန်ဧကရာဇ်တွေက လက်ရှောင်နေမှာ ကြောက်ရတယ်"

ဖီးနစ်နန်းတော်၏ ဧကရာဇ်က ပြော၏။

သူ့စကားကြောင့် ဟွမ်လင်မှာ ပို၍ပင် စိုးရိမ်လာမိသည်။

တာ့ယန်ဆေးအစီရင်၏ အကူအညီရှိလျှင်ပင် လုမင်က အစစ်အမှန်ဧကရာဇ်သုံးပါးကို ရင်ဆိုင်နိုင်မည်လော။

အစစ်အမှန်ဧကရာဇ်များ၏ စွမ်းအားက ဧကရာဇ်ငယ်များ နှိုင်းယှဉ်နိုင်သော အရာမဟုတ်ပေ။ မဟာဧကရာဇ်မရှိလျှင် ၎င်းတို့ကို မည်သူမျှ ယှဉ်ပြိုင်နိုင်မည် မဟုတ်ပါ။

လုမင်၏ မျက်လုံးများမှာလည်း လေးနက်လာသည်။ အတွေးတစ်ခုဖြင့်၊ တာ့ယန်ဆေးမီးဖိုက လျင်မြန်စွာ ကျုံ့သွားပြီး သူ့ဦးခေါင်းထက်တွင် လွင့်မျောနေ၏။ တစ်ချိန်တည်းမှာပင် ဆေးမီးဖိုတောင်အနီးတွင် အဆုံးမရှိသော အလင်းတန်းများ တောက်ပလာပြီး အလင်းစက်ဝိုင်းများ ပေါ်လာတော့သည်။

"အစီရင်တစ်ခုက ငါ့ကိုတားဆီးနိုင်မယ်လို့ ထင်တာလား"

ကောင်းကင်ဝံပုလွေမျှော်စင်၏ အစစ်အမှန်ဧကရာဇ်က အေးစက်စက် ပြောလိုက်သည်။ သူက လေထဲမှ လျှောက်လှမ်းပြီး လုမင်ဆီသို့ တိုးလာသည်။

"ဝှစ်... ဝှစ်"

အလင်းတန်းများက‌ ကောင်းကင်ဝံပုလွေမျှော်စင်၏ အစစ်အမှန်ဧကရာဇ်ဆီသို့ ထိုးဖောက်သွားကြသည်။ ကောင်းကင်ဝံပုလွေမျှော်စင်မှ အစစ်အမှန်ဧကရာဇ်၏ မျက်လုံးများမှလည်း ငွေရောင်အလင်းတန်းနှစ်ခု ထွက်လာ၏။ ၎င်းက အလင်းစက်ဝိုင်းအားလုံးကို ဖျက်ဆီးပစ်လိုက်သည်။ သူ့ကို တားဆီးမရပေ။

အစစ်အမှန် ဧကရာဇ်များက ဧကရာဇ်ငယ်များထက် များစွာ တန်ခိုးကြီးသည်။

"ဖွဲ့စည်း"

လုမင်က ဟိန်းဟောက်ပြီး တာ့ယန်ဆေးအစီရင်ကို အာရုံစိုက်ကာ ထိန်းချုပ်လိုက်သည်။ တစ်ချိန်တည်းမှာပင် ဆေးမီးဖိုက တုန်ခါပြီး အစီရင်နှင့်အတူ ပဲ့တင်ထပ်နေ၏။ ဧရာမအိုးကြီးတစ်လုံးက ကောင်းကင်တွင် ဖွဲ့စည်းလာပြီးနောက် ပြိုးပြိုးပြက်ပြက် အလင်းရောင်များကို ထုတ်လွှတ်ကာ ကောင်းကင်ဝံပုလွေမျှော်စင်၏ အစစ်အမှန်ဧကရာဇ်ကို ဝင်တိုက်လိုက်တော့သည်။

"ကွဲစမ်း"

ကောင်းကင်ဝံပုလွေမျှော်စင်၏ အစစ်အမှန်ဧကရာဇ်က ဟိန်းဟောက်ပြီး ဝံပုလွေခြေသည်းကုပ်ချက်ကို ထုတ်လွှတ်လိုက်သည်။

"ဒုန်း"

ခြေသည်းက ဆေးမီးဖိုကို ထိမှန်သောအခါ ကြောက်စရာကောင်းသော ပေါက်ကွဲသံတစ်ခု ဖြစ်ပေါ်စေခဲ့သည်။ သို့သော်လည်း ဆေးမီးဖိုက မပျက်စီးဘဲ တိုက်ခိုက်မှုကို တားဆီးနိုင်ခဲ့၏။

"ဟမ်"

ယင်းကိုမြင်ပြီးနောက် ကောင်းကင်ဝံပုလွေမျှော်စင်၏ အစစ်အမှန်ဧကရာဇ်၏မျက်လုံးများက အေးစက်သွားသည်။ ၎င်းက နောက်ထပ် ခြေသည်းကုပ်ချက်ကို ထုတ်ဖော်လိုက်တော့သည်။

လုမင်က အာရုံစိုက်ပြီး ဆေးမီးဖိုကိုထိန်းချုပ်ကာ ကောင်းကင်ဝံပုလွေမျှော်စင်၏ အစစ်အမှန်ဧကရာဇ်ကို ရင်ဆိုင်လိုက်သည်။

ဤဆေးမီးဖိုတွင် တာ့ယန်ဆေးမီးဖိုနှင့် တာ့ယန်ဆေးအစီရင်၏ စွမ်းအားအပြည့် ပါဝင်သည်။ ၎င်းက ဧကရာဇ်ငယ်သုံးပါးကို ဖိနှိပ်ခဲ့၏။ သားရဲဧကရာဇ်တစ်ပါးကိုပင် သတ်နိုင်ခဲ့သေးသည်။

"ဒုန်း"

ကောင်းကင်ဝံပုလွေမျှော်စင်၏ အစစ်အမှန်ဧကရာဇ်က ဆေးမီးဖိုကို ပြင်းထန်စွာ တိုက်ခိုက်လိုက်သည်။ သို့ရာတွင်၊ ‌ဆေးမီးဖိုက တုန်ခါသွားသော်လည်း မပျက်စီးဘဲ တိုက်ခိုက်မှုကို တားဆီးနိုင်ခဲ့ပေသည်။