အခန်း ၁၈၂၆

အပိုင်း ( 1826 ) ငါလည်း ပျော်ရမယ်။

ပထမဦးစွာ လုံချန်ဖြစ်ပြီး ယခုအခါတွင် ဟွမ်လင်ကလည်း ဘုရင်နိယာမကို ကျွမ်းကျင်နေသည်။ သူမ၏ တိုက်ခိုက်နိုင်စွမ်းက အံ့မခန်း ဖြစ်၏။ သူကလည်း အဆင့်ဖြတ်ကျော်ပြီး သူ့ထက် တစ်ဆင့်မြင့်သော ပြိုင်ဘက်ကို အနိုင်ယူခဲ့ပေသည်။

အိုးရန်ဝူကျိ၏ မျက်နှာက ပိုပိုပြီး အကြည့်ရဆိုးလာခဲ့သည်။

ယနေ့တွင် သူက အိုးရန်ဝူရွှမ့်နှင့် လုမင်တို့ကို ဖိတ်ခေါ်ခဲ့ခြင်းမှာ အိုးရန်ဝူရွှမ့်ကို အနိုင်ပိုင်းပြရန် ဖြစ်သည်။ သူက အကြွင်းမဲ့အင်အားဖြင့် အိုးရန်ဝူရွှမ့်၏ ယုံကြည်မှုကို ဖျက်ဆီးရန် ရည်ရွယ်ထား၏။ နောက်ဆုံးတွင်၊ သူ့ကိုကူညီပြီး အိုးရန်ဝူတောက်ကို တိုက်ခိုက်ရန် အိုးရန်ဝူရွှမ့်ကို ဖိအားပေးလိမ့်မည်။

ယခုမူ၊ ဟွမ်လင်နှင့် လုံချန်တို့က ထွန်းတောက်လာပြီး သူတို့ထက် တစ်ဆင့်မြင့်သော ပြိုင်ဘက်များကို ဆက်တိုက် အနိုင်ယူလိုက်ကြပြီ ဖြစ်သည်။ ယခင်က သူ၏ အောင်နိုင်မှု အရှိန်အဟုန်က ချက်ချင်း ပျောက်ကွယ်သွားရတော့သည်။

ဟွမ်လင်က စင်ပေါ်မှ ဆင်းသက်ပြီးနောက် သူမ၏ထိုင်ခုံဆီသို့ ပြန်သွားခဲ့သည်။

"ဆဋ္ဌမမြောက် အစ်ကို၊ မြင့်မားတဲ့ ကျင့်ကြံမှုအခြေခံက မြင့်မားတဲ့ တိုက်ခိုက်ရေး စွမ်းအားကို ကိုယ်စားမပြုနိုင်ပါဘူး။ ကျင့်ကြံမှုအဆင့်က တိုက်ခိုက်ရေး အင်အားကို ဆုံးဖြတ်တဲ့ အကြောင်းရင်းတွေထဲကမှ တစ်ခုပဲ။ လူတစ်‌ယောက်ရဲ့ တိုက်ခိုက်ရေးအင်အားကို ဆုံးဖြတ်နိုင်တဲ့ အချက်တွေက အများကြီးရှိတယ်"

အိုးရန်ဝူရွှမ့်က လျစ်လျူရှုစွာ ပြုံးလိုက်သည်။

"ဟမ့်၊ နဝမမြောက် ညီလေး... သူတို့က ဘယ်လောက်ပဲ သန်မာနေပါစေ... နောက်ဆုံးမှာတော့ အဆင့်မြင့် မဟာသူတော်စင်နယ်ပယ်မှာ ရှိနေတုန်းပဲ။ သူတို့က မဟာသူတော်စင်နယ်ပယ် အထွတ်အထိပ်ကို အနိုင်ယူနိုင်ပေမဲ့ မဟာသူတော်စင်နယ်ပယ် ပြီးပြည့်စုံခြင်းအဆင့်ကို အနိုင်ယူနိုင်ပါ့မလား။ ဒီစမ်းသပ်မှုမှာ သူတို့နှစ်ဦးကို အားကိုးတာက အသုံးဝင်မှာတဲ့လား"

အိုးရန်ဝူကျိက အေးစက်စက်ဖြင့် နှာခေါင်းရှုံ့လိုက်၏။

လုံချန်နှင့် ဟွမ်လင်တို့က မည်မျှပင် အားကောင်းနေပါစေ၊ အထွတ်အထိပ် မဟာသူတော်စင်နယ်ပယ် ကျင့်ကြံသူနှစ်ဦးနှင့်သာ ညီမျှသည်။ သူတို့က အခြေအနေတစ်ခုလုံးကို မည်သို့အကျိုးသက်ရောက်နိုင်မည်နည်း။

ဤတစ်ကြိမ် စမ်းသပ်မှုက အဆင့်တူတိုက်ပွဲတွင် မည်သူက ပိုသန်မာသလဲဆိုတာကို စမ်းသပ်ခြင်း မဟုတ်ပေ။

"ဘာတွေအလျင်လိုနေတာလဲ၊ ယှဉ်ပြိုင်မှုက မပြီးသေးဘူး"

အိုးရန်ဝူရွှမ့်က နှုတ်ခမ်းတွန့်ရုံ ပြုံးလိုက်သည်။

"ယှဉ်ပြိုင်မှုက မပြီးသေးဘူးလား။ မဟာသူတော်စင်နယ်ပယ် အဆင့်မြင့်အဆင့်တွေတောင် ယှဉ်ပြိုင်ပြီးပြီ။ ငါတို့က အဆင့်နိမ့် မဟာသူတော်စင်နဲ့ ယှဉ်ပြိုင်ရတော့မှာလား။ ဟားဟားဟား... နဝမမြောက်ညီလေး၊ ဒီစမ်းသပ်မှုမှာ အဆင့်နိမ့် မဟာသူတော်စင်တစ်ပါးကို ဘာကြောင့် ခေါ်လာရမှာလဲ။ မင်းက ဒီလောက်တောင် အခြေပျက်နေပြီလား"

"နဝမမြောက်ညီလေး... မင်းက အဆင့်နိမ့် မဟာသူတော်စင်တစ်ပါးကို တကယ် ဖိတ်ကြားထားတယ်လို့တော့ မပြောနဲ့"

အိုးရန်ဝူကျိက အဆက်မပြတ် ပြောလိုက်သည်။ သူ၏ စကားလုံးတိုင်းက လှောင်ပြောင်သရော်မှုတို့ ပြည့်နေပေသည်။

တစ်ချိန်တည်းမှာပင် သူ၏အကြည့်က လူအုပ်ကြားတွင် ပျံ့နှံ့သွားကာ နောက်ဆုံးတွင် လုမင်အပေါ်သို့ ကျရောက်သွားသည်။

အိုးရန်ဝူရွှမ့်က ဖိတ်ခေါ်ထားသော ခရမ်းရောင်မီးလျှံအိမ်တော်မှ လူအားလုံးမှာ မဟာသူတော်စင်နယ်ပယ် အထွတ်အထိပ်အဆင့်နှင့် ပြီးပြည့်စုံခြင်းအဆင့်များ ဖြစ်ကြသည်။ လုံချန်နှင့် ဟွမ်လင်ကလည်း ၎င်းတို့၏ ကျင့်ကြံမှုအခြေခံများကို ထုတ်ပြခဲ့ပြီးပြီ။ ဤနေရာတွင် မိမိ၏ ကျင့်ကြံမှုအခြေခံကို မပြသရသေးသူက လုမင် တစ်ဦးတည်းသာ ရှိသည်။

အကယ်၍ အဆင့်နိမ့် မဟာသူတော်စင်တစ်ပါးရှိလျှင် လုမင်သာ ဖြစ်လိမ့်မည်။

အခြားသူများကလည်း လုမင်ကို ကြည့်လိုက်ကြသည်။

"ဆဋ္ဌမမြောက် အစ်ကို၊ မြင့်မားတဲ့ ကျင့်ကြံမှုအခြေခံက မြင့်မားတဲ့ တိုက်ခိုက်ရေး အင်အားကို ကိုယ်စားမပြုဘူးလို့ ငါ အကြိမ်ကြိမ်ပြောပြီးပြီ"

အိုးရန်ဝူရွှမ့်က ပြောလိုက်သည်။

"ဒါကို ငါသိပါတယ်၊ ဒါပေမဲ့ ကျင့်ကြံမှုအဆင့်က အားနည်းရင်တောင် အကန့်အသတ် ရှိရမယ်။ သူက အဆင့်နိမ့် မဟာသူတော်စင်တစ်ပါးပဲလေ၊ သူက အရင်နှစ်ဦးလို အဆင့်တစ်ဆင့် ကျော်ဖြတ်ပြီး တိုက်ခိုက်နိုင်ရင်တောင် ဘာများထူးခြားဦးမှာလဲ။ သူက အဆင့်မြင့် မဟာသူတော်စင်တစ်ပါးနဲ့ပဲ ယှဉ်နိုင်လိမ့်မယ်။ ဒီနေရာက ဘယ်သူမဆို သူ့ကို အနိုင်ယူနိုင်မှာကိုတောင် ငါကြောက်တယ်"

"နဝမမြောက် ညီလေး၊ မင်းရဲ့အင်အားက သိပ်ပြီးတော့ မခိုင်မာဘူး။ မင်းငါ့ကို ပထမမင်းသားနဲ့ ရင်ဆိုင်ဖို့ ကူညီပေးသင့်တယ်။ ဒါဆိုရင် ငါ မင်းကို ကောင်းကောင်းမြှောက်စားနိုင်တယ်"

အိုးရန်ဝူကျိက ဆက်လက် ပြောလိုက်သည်။

သို့ရာတွင်၊ မော့လန်၊ ရွှေကျီးကန်း ဆဋ္ဌမမင်းသားနှင့် ရှေးဟောင်းလမြင့်မြတ်နယ်မြေမှ လူများ၏ အမူအရာများကို မမြင်ခဲ့ရသလို ခရမ်းရောင်မီးလျှံအိမ်တော်မှ လူများ၏ အမူအရာများ ပြောင်းလဲလာတာကိုတော့ သူ သတိမပြုမိပေ။

အဆင့်နိမ့် မဟာသူတော်စင်တစ်ပါးက အလွန်ဆုံး အဆင့်မြင့် မဟာသူတော်စင်တစ်ပါးကိုသာ ယှဉ်ပြိုင်နိုင်မည်လော။ ဒါက လုမင်အတွက် မဖြစ်နိုင်ပေ။

အိုးရန်ဝူရွှမ့်က အိုးရန်ဝူကျိကို လျစ်လျူရှုပြီး လုမင်ကိုကြည့်ကာ ပြောလိုက်သည်။

"လုမင်၊ ၊ မင်းကစားချင်လား"

"ကောင်းပြီ၊ ငါလည်း ပျော်ရအောင်"

လုမင်က မတ်တပ်ထရပ်လိုက်၏။

"အစ်ကိုကြီး လုမင်၊ သူတို့ကို ရိုက်... တွိ... တွိ"

ပူဖောင်းလေးက လက်သီးဆုပ်သေးသေးလေးများကို ဝှေ့ယမ်းပြီး လုမင်ကို အားပေးလိုက်သည်။

'ဒီမကောင်းဆိုးရွားကောင် လှုပ်ရှားတော့မယ်'

ခရမ်းရောင်မီးလျှံအိမ်တော်မှ လူများက လုမင်အား ကြောက်ရွံ့သော မျက်လုံးများဖြင့် ကြည့်လိုက်ကြသည်။ သို့ရာတွင်၊ ၎င်းတို့က သဘာဝအားဖြင့် တစ်ခုတည်းသောနတ်နန်းတော် သတိပေးမည် မဟုတ်ပါ။ တစ်ခုတည်းသောနတ်နန်းတော်က အစောပိုင်းတွင် သူတို့ကို အရှက်ရစေခဲ့သောကြောင့် ၎င်းတို့၏ ကံဆိုးခြင်းအတွက် ကြိုပြီးဝမ်းသာအားရ ဖြစ်ခဲ့သည်။

"ကောင်းပြီ"

လုမင်က ပူဖောင်းလေး၏ ဦးခေါင်းလေးကိုပုတ်ပြီး တိုက်ပွဲကွင်းပြင်ပေါ်သို့ ဆင်းသက်လိုက်လေသည်။

"အဲဒါက ဟိုနှာဘူးကောင်ပဲ၊ သူက အမှိုက်တစ်စထက် မပိုဘူးလေ။ အရင်က ဂိုဏ်းတူညီမလေး ချင်ယွဲ့ကို ပရောပရည်လာလုပ်နေလို့ ငါ့လက်ဝါးတစ်ချက်နဲ့ လွင့်စဉ်စေခဲ့သေးတယ်။ အခုတော့ သူက ဟန်ဆောင်နေပြန်ပြီ"

တစ်ခုတည်းသောနတ်နန်းတော်မှ လူငယ်တစ်ဦးက မထီမဲ့မြင်ဟန်ဖြင့် လှောင်ပြောင်လိုက်သည်။

"ဒါဆို ဒီကောင်က တကယ်သတ္တိရှိတာပဲ"

တစ်ခုတည်းသောနတ်နန်းတော်မှ အခြားသူတစ်ဦးကလည်း လှောင်ပြောင်လိုက်၏။

"လူတိုင်းပဲ၊ ဒီကောင်က မရိုးဘူး..."

ကောင်းကင်ဝံပုလွေမျှော်စင်မှ မော့လန်က တစ်ခုတည်းသောနတ်နန်းတော်၏ ပါရမီရှင်များကို သတိပေးလိုသည်။

"သူက မရိုးရှင်းဘူးဆိုတာ ဘာကိုဆိုလိုတာလဲ။ သူက အဆင့်နိမ့် မဟာသူတော်စင်နယ်ပယ်မှာပဲ ရှိသေးတာ... ငါတို့က နှစ်ကျော့ဆက်တိုက် ရှုံးနိမ့်ခဲ့လို့ မင်း ငါတို့ကို အထင်သေးတာလား"

ယုကျစ်၏ မကြည်ကြည့်က မော့လန်ကို တုန်လှုပ်သွားစေသည်။ ထို့နောက်မှာတော့ ခေါင်းကိုခါယမ်းကာ ဘာမျှထပ်မပြောတော့ပေ။

တစ်ခုတည်းသောနတ်နန်းတော်မှ ဤလူများက အလွန်မောက်မာပြီး မော့လန်နှင့် အခြားသူများကို အထင်မြင်သေးကြသည်။ ထိုကာလအတွင်း၌ မော့လန်နှင့် အခြားသူများမှာ နှိမ့်ချပြောဆိုမှုများစွာကို ခံခဲ့ရပေသည်။ ယခုတော့ ဤလူများက သူ့စကားကို နားမထောင်သောကြောင့် ရှေ့ဆက်ပြောရန် ပျင်းရိသည်။

"ကောင်လေး၊ မင်းသိအောင် ပြောရဦးမယ်။ မင်းက အဆင့်နိမ့် မဟာသူတော်စင်တစ်ယောက်ဆိုပေနဲ့ ဒီမှာက အဆင့်နိမ့် မဟာသူတော်စင် တစ်ပါးမှမရှိဘူး။ ဒါကြောင့် မင်း စိန်ခေါ်ချင်ရင် နှစ်ရက်စောင့်ပါ၊ နောက်နှစ်ရက်နေရင် မင်းနဲ့ကစားဖို့ ဂိုဏ်းတူညီလေးတချို့ကို ငါခေါ်လိုက်မယ်"

တစ်ခုတည်းသောနတ်နန်းတော်မှ ပါရမီရှင်က လုမင်အား လှောင်ပြောင်သရော်ဟန်ဖြင့် ကြည့်လိုက်သည်။

"အဆင့်တူသူတွေကို စိန်ခေါ်တာက ပါရမီရှင်တစ်ယောက်လို့ ဘယ်လိုလုပ်ပြီး သတ်မှတ်နိုင်မှာလဲ။ အမှိုက်တစ်စလို့ပဲ ပြောရမယ်။ ပါရမီရှင်ဆိုတာ ကိုယ့်ထက် အဆင့်မြင့်သူတွေကို စိန်ခေါ်နိုင်ရတယ်။ အခု မင်းတို့ထဲမှာ မဟာသူတော်စင်နယ်ပယ်က ဘယ်သူပဲဖြစ်ဖြစ်... ကြိုက်တဲ့သူလာနိုင်တယ်"

လုမင်က လျစ်လျူရှုစွာ ပြောလိုက်သည်။

"ဘာ"

အိုးရန်ဝူကျိအပါအဝင် တစ်ခုတည်းသောနတ်နန်းတော်မှ ပါရမီရှင်များ အားလုံး အံ့ဩသွားကြသည်။

လုမင်က ဘာပြောလိုက်သနည်း။

မဟာသူတော်စင်နယ်ပယ်တွင် ရှိနေသရွေ့ သူ့ကို စိန်ခေါ်နိုင်မည်လော။ ရူးနေခြင်းသာ ဖြစ်မည်။

သူက မဟာသူတော်စင်နယ်ပယ် အဆင့်နိမ့်အဆင့်သာ ရှိသေးသည်။ မဟာသူတော်စင်နယ်ပယ်တွင် မည်သူမဆို စိန်ခေါ်နိုင်သည်ဟု သူက မည်သို့ပြောဆိုဝံ့သနည်း။

ဤနေရာမှ လူတိုင်းကို အမှိုက်များဟု သူက တကယ်ထင်မှတ်နေသလော။

ဤနေရာရှိလူတိုင်းက ပါရမီရှင်များ ဖြစ်ကြသည်။ သာမန်ကျင့်ကြံသူများက မဟာသူတော်စင်နယ်ပယ် ပြီးပြည့်စုံခြင်းအဆင့်ကို မဆိုထားဘိ၊ အဆင့်နိမ့် မဟာသူတော်စင်နယ်ပယ်ဖြင့် မဟာသူတော်စင်နယ်ပယ် အဆင့်မြင့်အဆင့်ကိုပင် စိန်ခေါ်နိုင်မည် မဟုတ်ပေ။

ဤအကောင်က ရူးသွပ်နေတာ ဖြစ်ရမည်။

"ဟားဟားဟား၊ ဒီကောင် နောက်ဆုံးအကြိမ်က ငါ့လက်ဝါးရိုက်ချက် တစ်ချက်မြည်းပြီး ရူးသွားတာလား မသိဘူး"

နောက်ဆုံးအကြိမ်က လုမင်ကို လက်ဝါးတစ်ချက်ဖြင့် နောက်ဆုတ်စေခဲ့သော လူငယ်က အသံကျယ်ကျယ်ဖြင့် ရယ်မောလိုက်သည်။

မဟာသူတော်စင်နယ်ပယ် မည်သူမဆို စိန်ခေါ်နိုင်သည်ဟု ပြောဆိုနေမှတော့ သူကမှမရူးလျှင် မည်သူက ရူးသွပ်ဦးမည်နည်း။

"နဝမမြောက် ညီလေး၊ မင်း ဒီလူကို တကယ်ဖိတ်ခေါ်ခဲ့တာလား။ သူက တကယ့်ကမ္ဘာကြီးကို မမြင်ဖူးသေးမှာ ကြောက်ရတယ်"

အိုးရန်ဝူကျိက လှောင်ပြောင်လိုက်သည်။

အဆင့်နိမ့် မဟာသူတော်စင်တစ်ပါးက ပြီးပြည့်စုံခြင်းအဆင့်မှ မဟာသူတော်စင်ကို တိုက်ခိုက်နိုင်လျှင် ထိပ်တန်းမှ ထိပ်ဆုံးအဆင့် ပါရမီရှင် ဖြစ်နေပြီ ဖြစ်သည်။ သူ့ကိုထရိုက်လျှင်ပင် ဤကမ္ဘာမှာ ထိုသို့သောပါရမီရှင်မျိုး ရှိနေမည်ဟု သူ မယုံပေ။

"တော်တော်စကားများတာပဲ၊ မင်းတို့ ငါ့ကို စိန်ခေါ်ဝံ့လား... စိန်မခေါ်ဝံ့ဘူးလား"

လုမင်က မော့လန်တို့နှင့် တစ်ခုတည်းသောနတ်နန်းတော်မှ ပါရမီရှင်များကိုကြည့်ပြီး ကြိမ်းမောင်းလိုက်သည်။

မော့လန်နှင့် အခြားလူများသည် လုမင်က သူတို့ကို စိုက်ကြည့်နေကြောင်း မြင်ရပြီးနောက် ထိတ်လန့်တုန်လှုပ်သွားကြသည်။ သူတို့က ခေါင်းငုံ့သွားပြီး လုမင်ကို မကြည့်ဝံ့တော့ပေ။

သူတို့က လုမင်ကို မယှဉ်နိုင်မှန်း ကောင်းစွာသိသည်။

"ငါ ဒီကောင်လေးကို ဖျက်ဆီးပစ်မယ်။ သူကများ ဂိုဏ်းတူညီမလေး ချင်ယွဲ့ကို စိတ်ကူးဝံ့တယ်။ သူက ဘယ်လိုအမှိုက်မျိုးလဲဆိုတာ သိစေမယ်"

တစ်ခုတည်းသောနတ်နန်းတော်မှ လူငယ်တစ်ဦးက အေးစက်စက် အော်ဟစ်ပြီး တိုက်ပွဲစင်မြင့်သို့ ပြေးတက်သွားခဲ့သည်။

သူ့ထံမှ အားကောင်းသော အရှိန်အဝါက ပေါက်ကွဲထွက်လာခဲ့၏။ သူက အထွတ်အထိပ် မဟာသူတော်စင် ဖြစ်သည်။

"ဂိုဏ်းတူအစ်ကို၊ သူ့ကို လွယ်လွယ်နဲ့ မသတ်လိုက်ပါနဲ့။ အဲဒါက ပျင်းစရာကောင်းလိမ့်မယ်"

လမ်းမပေါ်တွင် လုမင်ကို တိုက်ခိုက်ခဲ့ဖူးသော လူငယ်က မောက်မာစွာ အော်ပြောလိုက်သည်။

"မင်း လှုပ်ရှားစမ်း"

လုမင်က လျစ်လျူရှုစွာ ကြည့်နေသည်။

"ဒူးထောက်"

လူငယ်က အော်ဟစ်ပြီး လက်ဝါးဖြင့် ရိုက်ချလိုက်၏။ ကြီးမားသော မြေဝါရောင် လက်ဖဝါးကြီးက လုမင်ကို ဖမ်းဆုပ်လာတော့သည်။

ဤလူငယ်က မြေနိယာမကို ထိန်းချုပ်ထားပြီး ထူးထူးကဲကဲ အားကောင်းသူ ဖြစ်သည်။

"ဝုန်း"

လုမင်ကလည်း တုံ့ပြန်လှုပ်ရှားလိုက်သည်။ ဒါကတော့ လွန်စွာမှ ရိုးရှင်းသော လက်သီးတစ်ချက်ပင်။