အခန်း ၁၈၂၈

အပိုင်း ( 1828 ) ယုကျစ်ကို အနိုင်ယူခြင်း။

"သခင်ကြီး၊ သခင်မ၊ သခင်လေး..."

ချင်ယွဲ့က တစ်ယောက်တည်း ရေရွတ်နေသည်။ သူမ၏ မျက်လုံးအကြည့်များက ပို၍ စူးရှလာ၏။

တစ်ခုခုကို ခက်ခက်ခဲခဲ တွေးနေသကဲ့သို့ မျက်မှောင်ကြုတ်လိုက်တော့သည်။

"သတ်"

ယုကျစ်က ဟိန်းဟောက်ပြီး လုမင်ကို တိုက်ခိုက်လိုက်သည်။ ကောင်းကင်တွင် မီးတောက်များက ပြည့်လျှံနေပြီး မီးလျှံဓား မုန်တိုင်းကဲ့သို့ လုမင်ထံသို့ ဖြတ်သန်းသွား၏။

ဤလှုပ်ရှားမှုက ယုကျစ်၏ အသန်မာဆုံး တိုက်ခိုက်မှုဖြစ်ပြီး နတ်ဘုရားစွမ်းရည်ကို အစွမ်းကုန် ထုတ်ဖော်ပြခဲ့သည်။

"ဆင်းစမ်း"

လုမင်က လှည့်မကြည့်ဘဲ လက်ညှိုးတစ်ချက်ထိုးလိုက်သည်။

ဤတစ်ကြိမ်တွင် လုမင်က ကစဉ့်ကလျားကပ်ဘေးလက်ချောင်း၏ စွမ်းအားကို လွန်ကဲစွာ မြှင့်တင်လိုက်၏။

လုမင်သည် ယခင် လက်ချောင်းတွင် သူ၏ခွန်အားကို အပြည့်အဝ အသုံးမချခဲ့ပေ။

ကစဉ့်ကလျားနိယာမက ပေါက်ကွဲထွက်လာပြီးနောက် ကစဉ့်ကလျား လက်ချောင်းကြီးအဖြစ် ပြောင်းလဲသွားပြီး အတားအဆီး အားလုံးကို ဖြိုချပစ်လိုက်သည်။

မီးတောက်များမှ ပေါင်းစပ်ထားသော လက်နက်အားလုံးက တခဏချင်း ပေါက်ကွဲသွားသည်။ ယုကျစ်၏ မျက်နှာအမူအရာက သိသိသာသာ ပြောင်းလဲသွား၏။ နာကျင်စွာ အော်သံနှင့်အတူ သူ့ခန္ဓာကိုယ်က အမြောက်ဆံတစ်ခုကဲ့သို့ လွင့်စဉ်သွားတော့သည်။ သူသည် မြေပြင်ပေါ်သို့ လဲကျသွားပြီးနောက် တိုက်ပွဲစင်မြင့်မှ ပြုတ်ကျပြီး သွေးများ တပွက်ပွက် အန်ထုတ်လိုက်ရသည်။

ဤလှုပ်ရှားမှုကြောင့် သူ ဒဏ်ရာအပြင်းအထန် ရရှိခဲ့ပေသည်။ အကယ်၍ သူ၏ မီးတောက်ဝိညာဉ်ခန္ဓာဖြင့် သန်မာသော ရှင်သန်နိုင်စွမ်းကြောင့် မဟုတ်ပါက သူ၏ ခန္ဓာကိုယ် ပေါက်ကွဲသွားနိုင်သည်။

ယုကျစ် ရှုံးနိမ့်သွားခဲ့ပြီ။ သူက အပြတ်အသတ် ရှုံးနိမ့်ခဲ့သည်။

လူအများက နှုတ်ဆိတ်နေပြီး စကားသံ မထွက်လာကြတော့ပေ။ ဤကဲ့သို့ တိုက်ခိုက်နိုင်စွမ်းက သူတို့၏ စိတ်ကူးနိုင်စွမ်းထက် ကျော်လွန်သည်။

မဟာသူတော်စင်နယ်ပယ် ပြီးပြည့်စုံခြင်းအဆင့်မှ ယုကျစ်က မဟာသူတော်စင်နယ်ပယ် အဆင့်နိမ့်အဆင့် ကျင့်ကြံသူကို အမှန်တကယ် ရှုံးနိမ့်ခဲ့သည်။ ထို့ပြင် ယုကျစ်က ပါရမီရှင်ဖြစ်၏။ ဤကဲ့သို့သော တိုက်ခိုက်နိုင်စွမ်းမျိုးကို ကြားပင်မကြားခဲ့ဖူးပေ။

အထူးသဖြင့် ခရမ်းရောင်မီးလျှံအိမ်တော်၏ ပါရမီရှင်များက လုမင်တို့ကို ပထမဆုံး မြင်သောအခါ မထီမဲ့မြင်ပြု‌ခဲ့မိကြောင်း ပြန်လည်အမှတ်ရနေသည်။ ယခုကဲ့သို့ ပြန်တွေးမိသောအခါ ရှက်ရွံ့စိတ်တို့ ဖြစ်ပေါ်နေကြတော့သည်။

တစ်ခုတည်းသောနတ်နန်းတော်မှ လူများမှာလည်း ရှက်ရွံ့နေကြသည်။

လုမင်က သူတို့ကို မဟာသူတော်စင်နယ်ပယ်တွင် ရှိနေသရွေ့ မည်သူမဆို စိန်ခေါ်နိုင်ကြောင်း ပြောခဲ့စဉ်က၊ သူတို့သည် လုမင်ကို အရူးဟုပင် လှောင်ပြောင်ခဲ့ဖူးသည်။

ယခုတော့ လုမင်က သူ့အကြောင်းကို ကောင်းစွာသိသူပင်။ ဆန့်ကျင်ဘက်အနေဖြင့် သူတို့က လူရွှင်တော်များကဲ့သို့ အနည်းငယ် ရယ်စရာကောင်းခဲ့သည်။

အိုးရန်ဝူရွှမ့်က ကျေနပ်အားရစွာ ရယ်မောလိုက်လေသည်။

"ဆဌမအစ်ကို... ဘယ်လိုလဲ၊ မင်းရဲ့လူက မဟာသူတော်စင်နယ်ပယ် ပြီးပြည့်စုံခြင်းအဆင့်မှာ ရှိနေရင်တောင် ဘာဖြစ်သေးသလဲ။ နောက်ဆုံးမှာတော့ ရှုံးနိမ့်နေတုန်းပဲ။ အခုတော့ ငါ့ဘက်က ပိုအားကောင်းနေပုံရတယ်။ ဆဌမမြောက် အစ်ကို၊ မင်းငါ့ကို အိမ်ရှေ့စံမင်းသားရာထူးရအောင် ကူညီပေးချင်သလား"

အိုးရန်ဝူရွှမ့်က အပြုံးဖြင့် ပြောလိုက်သည်။

အိုးရန်ဝူကျိ၏ မျက်နှာက အလွန်မည်းမှောင်နေသည်။ အိုးရန်ဝူရွှမ့်ကို ဖိနှိပ်ရန်နှင့် အိုးရန်ဝူရွှမ့်မှ သူ့ကိုကူညီပြီး အိုးရန်ဝူတောက်ကို တိုက်ခိုက်စေရန် အစီအစဉ်မှာ မအောင်မြင်တော့ကြောင်း သူသိသည်။

ဒါက လုမင်၊ လုံချန်နှင့် ဟွမ်လင်တို့ကြောင့်ပင်။

အိုးရန်ဝူကျိ၏ မျက်လုံးများက အေးစက်လာပြီး လက်သီးကို တင်းတင်းဆုပ်လိုက်သည်။

အစပိုင်းတွင် အရာအားလုံးက သူ့အစီအစဉ်အတိုင်း ဖြစ်ခဲ့သည်။ အရာအားလုံး ချောချောမွေ့မွေ့ ဖြစ်သွားခဲ့၏။

သို့သော်လည်း လုံချန်က စတင်လှုပ်ရှားပြီးနောက် သူ့အစီအစဉ်များအားလုံး ကပြောင်းကပြန် ဖြစ်ခဲ့ရသည်။

လုံချန်နှင့် ဟွမ်လင်တို့က အလွန်သန်မာကြပေသည်။ သူတို့က တစ်ခုတည်းသောနတ်နန်းတော်၏ ပါရမီရှင်များကိုပင် အနိုင်ယူနိုင်သည်။

သို့ရာတွင်၊ လုံချန်နှင့် ဟွမ်လင်တို့က မည်မျှပင် သန်မာနေစေကာမူ မဟာသူတော်စင်နယ်ပယ် ပြီးပြည်စုံခြင်းအဆင့်မှ ပါရမီရှင်များကို ရင်ဆိုင်ရန်တော့ ခက်ခဲနေဆဲပင်။ ၎င်းတို့က အခြေအနေတစ်ခုလုံးအပေါ် များစွာသက်ရောက်မှုရှိမည် မဟုတ်ပေ။

သို့သော်လည်း လုမင်၏ နောက်ဆက်တွဲ လုပ်ရပ်များက သူ့အကြံအစည်များကို လုံးဝ အနှောင့်အယှက် ဖြစ်စေခဲ့သည်။

လုမင်၏ တိုက်ခိုက်နိုင်စွမ်းက အလွန်သန်မာပြီး ယုကျစ်ကိုပင် အနိုင်ယူနိုင်စွမ်းရှိ၏။ ဤတိုက်ခိုက်နိုင်စွမ်းမျိုးက တိုက်ပွဲအခြေအနေကို ထိခိုက်စေနိုင်သည်။ ဤနည်းဖြင့် သူ့တွင် ကြီးကြီးမားမား အားသာချက် မရှိတော့ပေ။ အိုးရန်ဝူရွှမ့်က သူ့ကို အဘယ်ကြောင့် ကူညီမည်နည်း။

"နဝမမြောက် ညီလေး၊ ဒီစမ်းသပ်မှုက အသင်းအဖွဲ့တစ်ခုလုံးရဲ့ အလုံးစုံကြံ့ခိုင်မှုကို စမ်းသပ်မှာပါ။ လုမင်က သန်မာပေမဲ့ သူ တစ်ယောက်တည်းပဲလေ။ မင်း ငါ့ကို ကူညီဖို့ အကြံပေးချင်သေးတယ်"

အိုးရန်ဝူကျိက မှုန်ကုပ်ကုပ်ဖြင့် ပြောလိုက်သည်။

"ဪ... ဟုတ်လား၊ ဒီလိုဆိုရင် စမ်းသပ်မှုမှာ ဘယ်သူက ပိုသန်မာမလဲဆိုတာ ငါတို့ ကြည့်ရအောင်"

အိုးရန်ဝူရွှမ့်က ပြော၏။

"ကောင်းပြီ၊ ဒါဆိုရင် စမ်းသပ်ပွဲမှာ တွေ့ကြမယ်"

အိုးရန်ဝူကျိလည်း အေးစက်စက် မျက်နှာထားဖြင့် ပြောလိုက်သည်။

ယခုအချိန်တွင်၊ အမျိုးမျိုးသော အတွေးများက လူတိုင်း၏ စိတ်ထဲတွင် ဝင်လာသည်။ သို့သော်လည်း လုမင်၏ အကြည့်များကတော့ ချင်ယွဲ့အပေါ်မှာပဲ အမြဲတမ်း ရှိပေသည်။

"ချင်ယွဲ့၊ မင်း ဘာဖြစ်နေတာလဲ။ ဖန်ဟိုမြို့တော်က လုမိသားစုကို မှတ်မိသေးလား။ ရွှမ်ယွမ်ဓားဂိုဏ်းကို မှတ်မိသေးလား။ လောင်ကျွမ်းနေသောနေအင်ပါယာကို မှတ်မိသေးလား"

လုမင်၏အသံက မိုးနှင့်မြေကြားတွင် ပဲ့တင်ထပ်နေသည့် ခေါင်းလောင်းသံကဲ့သို့ပင်။ သူက ချင်ယွဲ့၏ နှလုံးသားထဲကို စိမ့်ဝင်သွားစေမည့် မေးခွန်းများကို အဆက်မပြတ် မေးလိုက်သည်။

"ဖန်ဟိုမြို့တော်က လုမိသားစု... ရွှမ်ယွမ်ဓားဂိုဏ်း... ဖန်ဟိုမြို့တော်က လုမိသားစု..."

ချင်ယွဲ့က သူ့ကိုယ်သူ ရေရွတ်နေမိသည်။ သူမ၏ မျက်လုံးများက စိတ်ရှုပ်ထွေးမှုများနှင့် ပြည့်နှက်နေသည်။ ခဏအကြာတွင် နာကျင်နေသော အမူအရာတို့ ပေါ်လာခဲ့၏။ သူက တိုးညှင်းစွာ အော်ဟစ်ပြီး ကောင်းကင်ပေါ်သို့ ပျံတက်သွားခဲ့သည်။ ထို့နောက်မှာတော့ သူက အလင်းတန်းတစ်ခုအဖြစ်သို့ ပြောင်းလဲသွားပြီး မျက်စိတစ်မှိတ်အတွင်းမှာပင် ပျောက်ကွယ်သွားတော့သည်။

“ချင်ယွဲ့..."

လုမင်က အော်ခေါ်ပြီး သူမနောက်ကို လိုက်ခါနီးတွင် တစ်ခုတည်းသောနတ်နန်းတော်မှ ပါရမီရှင်တချို့က လုမင်၏လမ်းကြောင်းကို ပိတ်ဆို့ထားခဲ့သည်။

"ချီးပဲ၊ ချင်ယွဲ့ကို မင်းဘာပြောလိုက်တာလဲ။ မင်းက သူ့ကို ဘာလို့ ဒီလောက် ပုံမှန်မဟုတ်အောင် တုံ့ပြန်စေရတာလဲ"

"ဂိုဏ်းတူညီမလေးချင်ယွဲ့သာ တစ်ခုခုဖြစ်ခဲ့ရင် မင်း မြှုပ်နှံစရာတောင် နေရာမရှိအောင် သေရစေမယ်"

တစ်ခုတည်းသောနတ်နန်းတော်မှ ပါရမီရှင်များက ဒေါသတကြီးဖြင့် ကြိမ်းမောင်းလိုက်ကြသည်။ အားကောင်းသော အရှိန်အဝါများကလည်း လုမင်ဆီသို့ ဖိနှိပ်လာတော့သည်။

"ဘာလဲ၊ မင်းတို့က လူအင်အားနဲ့ အနိုင်ကျင့်ဖို့ ကြိုးစားနေတာလား"

လုံချန်က ရှေ့သို့ ခြေတစ်လှမ်းတိုးပြီး လုမင်အနားသို့ ရောက်လာသည်။ ထို့နောက် ဟွမ်လင်ကလည်း အလားတူ ပြုလုပ်ခဲ့၏။

"မင်းတို့ အတင့်ရဲလှချေလား"

အိုးရန်ဝူကျိက အေးစက်စက် အော်ဟစ်ပြီး ဝုန်းခနဲ ထရပ်လိုက်သည်။ လုမင်နှင့် တခြားသူများကို အေးစက်စက်ကြည့်ရင်း သူ့ထံမှ အားကောင်းသော အငွေ့အသက်များ ပေါက်ကွဲထွက်လာတော့သည်။

တစ်ချိန်တည်းမှာပင်‌ မော့လန်နှင့် ရွှေကျီးကန်း ဒုတိယမင်းသားတို့က လုမင်ကို ခက်ထန်စွာ စိုက်ကြည့်လိုက်ကြသည်။

သူတို့က ယနေ့တွင် လုမင်ကို သတ်နိုင်မည်ဆိုလျှင် ကျေနပ်စွာ အဖော်ပြုပေးလိမ့်မည်။

"ဆဋ္ဌမမြောက် အစ်ကို၊ အကဲဖြတ်မှု မစခင်မှာ မင်းက ငါ့ကို တိုက်ခိုက်တော့မှာလား။ ဒီသတင်းထွက်လာရင် ငါတို့နှစ်ယောက်လုံးရဲ့ အရည်အချင်း ပျက်ပြယ်သွားလိမ့်မယ်။ ဒါက အိုးရန်ဝူတောက်အတွက်ပဲ အကျိုးရှိစေမှာ မဟုတ်ဘူးလား"

အိုးရန်ဝူရွှမ့်ကလည်း ထရပ်ပြီး အိုးရန်ဝူကျိကို ရင်ဆိုင်လိုက်သည်။

အိုးရန်ဝူကျိ၏ အမူအရာက ပြောင်းလဲသွားပေသည်။

သူသည် ဤအခွင့်အရေးကို အသုံးချပြီး လုမင်ကို ထိခိုက်စေလိုသော်လည်း အိုးရန်ဝူရွှမ့်ပြောတာက မှန်နေသည်။ သူတို့ နှစ်ယောက် တိုက်ခိုက်ခဲ့လျှင် နောက်ဆက်တွဲ အကျိုးဆက်က မှန်းဆလို့မရပေ။ သူတို့က အနိုင်ရသည်ဖြစ်စေ၊ ရှုံးနိမ့်ခဲ့သည်ဖြစ်စေ နောက်ဆုံးမှာတော့ အိုးရန်ဝူတောက်သာ အကျိုးရှိမည် ဖြစ်သည်။

"ဟမ့်၊ နဝမမြောက်ညီလေး... စမ်းစပ်သပ်မှုမှာ တွေ့ကြမယ်"

အိုးရန်ဝူကျိက ခဏမျှစဉ်းစားပြီးနောက် သူ့လက်ကို ဝှေ့ယမ်းကာ အေးစက်စက် ပြောလိုက်သည်။

"လုမင်၊ အရင်သွားရအောင်"

အိုးရန်ဝူရွှမ့်က လုမင်ကိုကြည့်ကာ ပြောသည်။

လုမင်က ချင်ယွဲ့ ထွက်ခွာသွားသော ဦးတည်ရာဆီသို့ လှမ်းကြည့်လိုက်ပြီး မျက်မှောင်ကြုတ်လိုက်သည်။

ချင်ယွဲ့က တစ်ခုခု ဖြစ်နေတာတော့ သေချာပြီ။

သို့ရာတွင်၊ သေချာတာတစ်ခုတော့ ရှိသည်။ ချင်ယွဲ့ဟာ ခန္ဓာကိုယ်သိမ်းပိုက်ခံထားရခြင်း မဟုတ်ပေ။

သူမ၏ ခန္ဓာကိုယ်ကို သိမ်းပိုက်ခံထားရပါက လုမင်၏ မေးခွန်းများကို ရင်ဆိုင်ရချိန်တွင် ဤကဲ့သို့ တုံ့ပြန်လာမည် မဟုတ်ပါ။

'ချင်ယွဲ၊ မင်း ဘာတွေကို ကြုံတွေ့ခဲ့ရသလဲဆိုတာ ငါ သေချာပေါက်သိအောင် ကြိုးစားမယ်'

လုမင်၏ မျက်လုံးအကြည့်များက အေးစက်သွားသည်။ ယခုအချိန်တွင် သူလုပ်နိုင်တာက ချင်ယွဲ့၏ အတွေ့အကြုံများကို သိရှိရန်ကြိုးစားခြင်းပင်။ သို့မှသာ မှန်ကန်သော အဖြေကို ရှာတွေ့နိုင်မည် ဖြစ်သည်။

ထို့နောက်မှာတော့ လုမင်က မလိုက်သွားတော့ပေ။ သူက ပြန်လှည့်ပြီး အိုးရန်ဝူရွှမ့်နှင့် အခြားသူများနှင့်အတူ ထွက်ခွာသွားခဲ့သည်။

............

အိုးရန်ဝူရွှမ့်၏ နေအိမ်တွင်...

လုမင်နှင့် အိုးရန်ဝူရွှမ့်တို့က ခြံဝင်းအတွင်းရှိ ကျောက်စားပွဲတစ်ခုတွင် မျက်နှာချင်းဆိုင် ထိုင်နေကြသည်။

"လုမင်၊ မင်းက မိန်းကလေးချင်ယွဲ့အကြောင်းကို မေးနေတာ... သူ့ကို သိလို့လား။ မင်းက တကယ်ပဲ သူ့ရဲ့ သခင်လေးလား"

အိုးရန်ဝူရွှမ့်က စိတ်ဝင်တစား‌ မေးလိုက်သည်။

"ဟုတ်တယ်"

လုမင်က ခေါင်းညိတ်ပြီး ဆက်ပြောလေသည်။

"ချင်ယွဲ့နဲ့ ငါက တစ်နေရာတည်းကနေ လာခဲ့တာပါ။ ယွမ်လုကို မရောက်ခင်က သူဟာ ငါ့ရဲ့ အစေခံပဲ..."

လုမင်က ချင်ယွဲ့နှင့် သူ့အကြားမှ ဆက်ဆံရေးကို အတိုချုံး ရှင်းပြလိုက်သည်။

"တစ်ခုတည်းသောနတ်နန်းတော်ရဲ့ ပါရမီရှင်သမီးတော်က တကယ်ကို မင်းရဲ့ အစေခံပဲ"

ထိုစကားကို ကြားရပြီးနောက် အိုးရန်ဝူရွှမ့်က အံ့သြသွားသည်။

"ဒါပေမဲ့ ချင်ယွဲ့က ငါ့ကိုတွေ့တော့ သူက ငါ့ကို မှတ်မိပုံမရဘူး။ အိုးရန်၊ မင်း ဒီအကြောင်းကို တစ်ခုခုများ ကြားဖူးသလား"

လုမင်က မေးလိုက်သည်။

လုမင်က ဤအကြောင်းကို မေးလိုသောကြောင့် အိုးရန်ဝူရွှမ့်ကို သီးသန့် လာရောက်တွေ့ဆုံခြင်း ဖြစ်ပေသည်။

အိုးရန်ဝူရွှမ့်က ရှန်းယွမ်အင်ပါယာ၏ မင်းသားတစ်ပါး ဖြစ်သည်။ တစ်ခုတည်းသောနတ်နန်းတော်ကလည်း ရှေးဟောင်းနေမင်းမြင့်မြတ်နယ်မြေတွင် ရှိ၏။ သူက အကြောင်းအရာတချို့ကို သိထားရပေမည်။