အခန်း ၁၈၅၈

အပိုင်း ( 1858 ) ပြိုင်ဘက်ကင်း။

ထို့နောက်တွင် လုမင်က အကြွင်းမဲ့ချေမှုန်းခြင်းကို စတင်ခဲ့သည်။ ရက်စက်ကြမ်းကြုတ်သော သားရဲများ သို့မဟုတ် ဟွမ်မျိုးနွယ်မှ ကျွမ်းကျင်သူများပင်ဖြစ်စေ... တိုက်ခိုက်သူတိုင်းက လုမင်၏ရှေ့တွင် တစ်ချက်တည်းဖြင့် ရှုံးနိမ့်ခဲ့ရပေသည်။

တူညီသောအဆင့်ရှိသူကို တိုက်ခိုက်ခြင်းက လုမင်အတွက် ဖိအားမရှိပါ။ ဒါက စိန်ခေါ်မှု လုံးဝမရှိခဲ့ပါချေ။

အချိန်တိုလေးအတွင်းမှာ လုမင်က ဆယ့်ကိုးပွဲဆက်တိုက် အနိုင်ရခဲ့သည်။

"အရမ်းသန်မာတယ်။ ဒီလူရဲ့ တိုက်ခိုက်ရေးစွမ်းအားက အံ့မခန်းပါပဲလား"

"အမှန်ပဲ"

ဟွမ်မျိုးနွယ်မှ ကျွမ်းကျင်သူများ ရှုံးနိမ့်ရသော်လည်း ပတ်ဝန်းကျင်ရှိ ဟွမ်မျိုးနွယ်ဝင်များမှာ စိတ်ဓာတ်ကျခြင်း သို့မဟုတ် ဒေါသထွက်ခြင်း မရှိခဲ့ကြပေ။ ထိုအစား သူတို့က ပိုပိုပြီး စိတ်လှုပ်ရှားလာသည်။

အမြင့်ဆုံး ပွဲကြည့်စင်တွင် အစွမ်းထက် ဟွမ်မျိုးနွယ်ဝင်အချို့က ခေါင်းညိတ်လိုက်ကြသည်။

"ဒီအပြင်လူရဲ့ တိုက်ခိုက်ရေးအင်အားက မဆိုးဘူး"

"ဟွမ်ရန်ကို စေလွှတ်ကြည့်လိုက်ရအောင်"

တစ်ယောက်က ပြောလိုက်၏။

မကြာမီ၊ လူတစ်ဦးက တိုက်ပွဲကွင်းအတွင်းသို့ ဝင်ရောက်လာသည်။

ထိုလူက ငယ်ရွယ်ပုံရပြီး လုမင်နှင့် အသက်တူလောက် ရှိ၏။ သို့သော်လည်း သူက အလွန်ထွားကျိုင်းပြီး အနည်းဆုံး အရပ် နှစ်မီတာခွဲ ရှိသည်။ သူက လုမင်ထက် အများကြီး အရပ်ပိုမြင့်ပေသည်။

သူ၏ ကြွက်သားများကလည်း အဆုံးမဲ့ခွန်အားတို့နှင့် ပြည့်နေသကဲ့သို့ ဖောင်းကြွနေသည်။

"ဟွမ်ရန်၊ ဟွမ်ရန် လှုပ်ရှားပြီ"

"ဟွမ်ရန်က ပွဲသုံးဆယ်ဆက်တိုက် အနိုင်ရထားပြီးပြီ။ သူက ဒီအပြင်လူရဲ့ ခြေလှမ်းကို ရပ်တန့်နိုင်မလား မသိဘူး"

"ဟွမ်ရန်မှာ အဆင့်နိမ့် ကောင်းကင်ဝိညာဉ်ခန္ဓာရှိတယ်။ ဒါကြောင့် သူက တိုက်ပွဲတိုင်းကို အနိုင်ရခဲ့တာ"

ထိုလူငယ်ကိုမြင်တော့ ဟွမ်မျိုးနွယ်ဝင်များမှာ စိတ်လှုပ်ရှားသွားသည်။ သူတို့က လာမည့်တိုက်ပွဲကို ပို၍ စောင့်မျှော်နေကြတော့သည်။

"ကောင်လေး၊ မင်းက အရမ်းသန်မာပါတယ်။ ဒါပေမဲ့ ငါနဲ့တွေ့ရမှတော့ မင်းရဲ့ နိုင်ပွဲတွေက ဒီမှာတင် အဆုံးသတ်ပြီ"

ဟွမ်ရန်က လုမင်ကို တိုက်ခိုက်ချင်စိတ်အပြည့်ဖြင့် ကြည့်လိုက်သည်။ သူ့လက်ထဲမှာလည်း ပုဆိန်ကြီးတစ်လက်ကို ကိုင်ထားသေးသည်။

"မင်း လှုပ်ရှားပါ"

လုမင်ကမူ အေးအေးဆေးဆေးသာ ပြောလိုက်သည်။ သူက သူတော်စင်စွမ်းအားမှ ဖွဲ့စည်းထားသော လှံရှည်ကို ကိုင်ဆောင်ထားသေးသည်။

"မောက်မာတယ်၊ ဒါကိုမြည်းကြည့်စမ်း"

ဟွမ်ရန်က ဟိန်းဟောက်ပြီး သူ့ပုဆိန်ကြီးဖြင့် ဝံ့လိုက်သည်။

သူက ‌ဧရာမသတ္တဝါကြီးကဲ့သို့‌ မြေပြင်ကိုနင်းသွားပြီး လုမင်ကို တိုက်ခိုက်လိုက်၏။ လုမင်နှင့် မနီးမဝေးသို့ ရောက်လာပြီးနောက် ကောင်းကင်သို့ ခုန်တက်သွားကာ အပေါ်စီးမှ ငုံ့ကြည့်လိုက်သည်။ ထို့နောက်မှာတော့ ဧရာမ ပုဆိန်ကြီးက အံ့မခန်း အငွေ့အသက်များကို သယ်ဆောင်ရင်း လုမင်ကို ခုတ်ပိုင်းလာတော့သည်။

'အဆင့်နိမ့် ကောင်းကင်ဝိညာဉ်ခန္ဓာလား။ ဒါပေမဲ့ နိယာမကတော့ သာမန်ခွန်အားနိယာမတစ်ခုပဲ'

သူ့စိတ်ထဲမှတွေးရင်း လုမင်က လှံရှည်ဖြင့် ပစ်ထိုးလိုက်သည်။

"ဝုန်း"

ကျယ်လောင်သော ပေါက်ကွဲသံနှင့်အတူ၊ ဟွမ်ရန်က လုမင်၏ ယခင်ပြိုင်ဘက်များကဲ့သို့ လွင့်သွား၏။ သူက ရပ်တန့်ခြင်းမပြုမီ လှောင်အိမ်တိုက်ပွဲကွင်း၏ အစွန်းထိ လွင့်စဉ်သွားရသည်။ ထို့နောက် သွေးများအန်ထွက်လာပြီး လုမင်ကို တုန်လှုပ်စွာဖြင့် ကြည့်လိုက်လေသည်။

လုမင်၏ ခွန်အားက ရိုးရိုးရှင်းရှင်း နားမလည်နိုင်ဘဲ လုံးဝ ပြိုင်ဘက်ကင်းသကဲ့သို့ သူ ခံစားမိသည်။

"သက်ညှာပေးလို့ ကျေးဇူးတင်ပါတယ်"

ဟွမ်ရန်က လက်ယှက်ပြလိုက်သည်။ ထို့နောက်မှာတော့ တိုက်ပွဲကွင်းမှ ပြန်ထွက်သွားတော့သည်။

သူက ရှုံးသွားပြီဖြစ်၍ ဆက်လက်တိုက်ခိုက်ရန် မလိုတော့ပေ။

"နောက်ထပ် တစ်ကွက်တည်းပဲ"

"ဒီလူမှာလည်း ကောင်းကင်ဝိညာဉ်ခန္ဓာ ရှိနိုင်တယ်၊ နောက်ပြီးတော့ အဆင့်ပိုမြင့်နိုင်သေးတယ်"

"ဒီလူက တိုက်ပွဲတစ်ရာ ဆက်တိုက်အောင်မြင်နိုင်ပါ့မလား"

လုမင်က ဟွမ်ရန်ကို တစ်ချက်တည်း အနိုင်ယူခဲ့သည်။ လူတိုင်းက လုမင်ကို လျှော့တွက်မိမှန်း သဘောပေါက်သွားပေသည်။ လူတော်တော်များများက လုမင်ကို တိုက်ပွဲတစ်ရာ ဆက်တိုက် အနိုင်ရရှိမလား သိချင်မိခဲ့သည်။

သို့သော်လည်း တိုက်ပွဲတစ်ရာကို ဆက်တိုက် အနိုင်ရရှိရန် မလွယ်ပေ။ အောင်မြင်နိုင်သူများက ဟွမ်မျိုးနွယ်၏ ရှားရှားပါးပါး ပါရမီရှင်များ ဖြစ်သည်။

"ထပ်လာမယ်"

လှံရှည်ကို လက်ထဲမှာကိုင်ထားရင်း သူ၏ တိုက်ခိုက်ချင်စိတ်က မြင့်တက်လာသည်။ လုမင်၏အသံက တိုက်ပွဲကွင်းတစ်ခုလုံးသို့ ပဲ့တင်ထပ်သွား၏။

နောက်ထပ် ယှဉ်ပြိုင်ရသူက ဟွမ်ရန်လောက်ပင် မသန်မာသောကြောင့် လုမင်က သဘာဝအတိုင်း လွယ်ကူစွာ အနိုင်ရသွားသည်။

လုမင်က အကြွင်းမဲ့ အနိုင်ပွဲများကို ရယူသွားပေသည်။ ထို့ပြင်၊ တိုက်ပွဲတိုင်းတွင် သူက လှုပ်ရှားမှုတစ်ခုသာ လိုအပ်သည်။ ဒါက လူများကို နားမလည်နိုင်သော ခံစားချက်မျိုး ပေးအပ်လေသည်။ လုမင်၏ တိုက်ခိုက်နိုင်စွမ်းက မည်မျှအားကောင်းသည်ကို မည်သူမျှ မသိခဲ့ပေ။

ပွဲသုံးဆယ် ဆက်တိုက်အောင်ပွဲ၊ ပွဲလေးဆယ် ဆက်တိုက်အောင်ပွဲ၊ ပွဲငါးဆယ် ဆက်တိုက်အောင်ပွဲ...

မကြာမီတွင် လုမင်က ပွဲကိုးဆယ်အထိ ဆက်တိုက် အနိုင်ရလာသည်။

ထိုအချိန်တွင် အကျော်အမော်တစ်ဦးက ကောင်းကင်မှဆင်းလာပြီး လုမင်ကိုကြည့်ကာ မေးလေသည်။

"ကောင်လေး၊ မင်းနာမည် ဘယ်လိုခေါ်လဲ"

"လုမင်ပါ"

လုမင်က ပြန်ဖြေလိုက်သည်။

"လုမင်၊ သိပ်ကောင်းတယ်။ မင်းရဲ့ တိုက်ခိုက်နိုင်စွမ်းကလည်း အရမ်းသန်မာတယ်။ ဒါက ဟွမ်မျိုးနွယ်ရဲ့ လေးစားမှုကိုရဖို့ လုံလောက်ပါတယ်။ ဒါပေမဲ့ ဒီနေ့တိုက်ပွဲကို ဒီမှာအဆုံးသတ်လိုက်ကြရအောင်။ ဒီနေရာမှာ အဆင့်မြင့် မဟာသူတော်စင် အရေအတွက်က အကန့်အသတ်ရှိတယ်၊ ဒါကြောင့် ချိန်ညှိဖို့လိုတယ်။ ကျန်တဲ့ တိုက်ပွဲဆယ်ခုကို နှစ်ရက်အတွင်း တိုက်ခိုက်ရမယ်"

ဟွမ်မျိုးနွယ်၏ အကျော်အမော်က ပြောလိုက်သည်။

"ကောင်းပြီ"

လုမင်က ခေါင်းညိတ်လိုက်၏။

နောက်ပိုင်းရောက်လာလေလေ၊ ပြိုင်ဘက်များက ပိုသန်မာလေ ဖြစ်သည်။ သူ့ကိုရင်ဆိုင်ရန် အဆင့်မြင့် မဟာသူတော်စင်နယ်ပယ်မှ ပိုသန်မာသူများကို ရှာဖွေရခြင်းက ပုံမှန်ပင်။

သို့သော်လည်း လုမင်က မကြောက်ပါ။ တူညီသောအဆင့်မှာ သူ တစ်ပွဲမှ မရှုံးနိမ့်ဖူးပေ။

ထို့နောက် လုမင်က သူ့အခန်းထဲသို့ ပြန်ဝင်လာခဲ့သည်။ သူ့အတွက် ယနေ့တိုက်ပွဲက ပြီးသွားပြီ။

ဒုတိယနေ့မှာလည်း လုမင်၏ အလှည့်မကျဘဲ ပူဖောင်းလေးက တိုက်ခိုက်ရသည်။

ပူဖောင်းလေးက ကွင်းထဲသို့ ဝင်သွားသောအခါ လူတိုင်းက အနည်းငယ် အံ့အားသင့်သွားကြသည်။

ပူဖောင်းလေး၏ ခန္ဓာကိုယ်ဖွဲ့စည်းပုံက ပြဿနာရှိလို့လား သို့မဟုတ် အခြား အကြောင်းတစ်ခုခုကြောင့်လား မသိ‌ရသော်လည်း ပို၍ ကြီးမလာသေးပေ။ သူ့ခန္ဓာကိုယ်ဟာ ယခင် အသွင်ပြောင်းစအချိန်ကဲ့သို့ နှစ်နှစ်၊ သုံးနှစ်အရွယ်ခန့်သာ ရှိနေဆဲ ဖြစ်သည်။

လုမင်က ထိပ်တန်းစစ်သားရဲဆယ်ကောင်၏ ကြီးထွားမှုနှုန်း နှေးကွေးခြင်းကြောင့်ဖြစ်မည်ဟုသာ ခန့်မှန်းမိခဲ့သည်။

နှစ်နှစ်၊သုံးနှစ်အရွယ် မိန်းကလေးတစ်ဦး၏ ဝင်ရောက်လာခြင်းက လူတိုင်းကို ဆွံ့အစေသည်။ သို့သော်လည်း ပူဖောင်းလေး၏ ကျင့်ကြံမှုအဆင့်က မဟာသူတော်စင်နယ်ပယ် အဆင့်မြင့်အဆင့်သို့ ရောက်ရှိနေကြောင်း သိလိုက်ရပြီးနောက် လူတိုင်း တုန်လှုပ်သွားတော့သည်။

နှစ်နှစ်၊ သုံးနှစ်အရွယ် မိန်းကလေးက မဟာသူတော်စင်နယ်ပယ် ကျင့်ကြံမှုအဆင့်ကို အမှန်တကယ် ရရှိနေပြီလား။

"မဟုတ်သေးဘူး၊ သူက လူသားမဖြစ်နိုင်ဘူး။ သူက သားရဲပဲ"

"သားရဲတစ်ကောင်လား၊ သူက သားရဲဆိုရင်တောင် အသွင်ပြောင်းပြီးနောက် ငယ်ငယ်လေးပဲ ရှိသေးတယ်။ သူက သိပ်ပြီးတော့ အသက်မကြီးနိုင်သေးဘူး မဟုတ်လား"

"ဒါကတော့ အမှန်ပဲ၊ သူ့မှာ ဘယ်လိုတိုက်ခိုက်နိုင်စွမ်းမျိုး ရှိမလဲဆိုတာ ငါသိချင်မိတယ်"

ဆွေးနွေးမှုကြားတွင် တိုက်ပွဲစတင်ခဲ့သည်။ သို့သော်လည်း တိုက်ပွဲက နောက်အခိုက်အတန့်တွင် ပြီးဆုံးသွား၏။

လူတိုင်းက တိတ်ဆိတ်သွားလေသည်။

လူတော်တော်များများက တိုက်ပွဲကို ဘယ်လိုပြီးဆုံးသွားမှန်းတောင် မသိလိုက်ကြပေ။ ပူဖောင်းလေးက ကြည်လင်သော ပူဖောင်းတစ်ခုကို ထွေးထုတ်လိုက်ပြီး သူမ၏ပြိုင်ဘက် ဒဏ်ရာအပြင်းအထန်ရခဲ့သည်။

"ဆက်​ပြီး တိုက်ခိုက်မယ်"

ပူဖောင်းလေး၏ ကလေးဆန်သော အသံက ပျံ့နှံ့သွားသည်။

ပရိသတ်အားလုံးမှာလည်း အသံမထွက်နိုင်ကြတော့ပေ။

ယမန်နေ့က လုမင်ကဲ့သို့ပင် ပူဖောင်းလေးကလည်း အကြွင်းမဲ့ချေမှုန်းသည်။ သူ့အရှိန်က လုမင်ထက်ပင် ပိုမြန်သေးသည်။

ပြိုင်ဘက်က မည်သူပင်ဖြစ်ပါစေ၊ ပူဖောင်းလေးက သူ့လက်လေးကို ဝှေ့ယမ်းနေသရွေ့ ပြိုင်ဘက်မှာ ဒဏ်ရာအပြင်းအထန်ရကာ လွင့်စဉ်သွားရမည် ဖြစ်သည်။

မကြာမီတွင်၊ ပူဖောင်းလေးကလည်း ကိုးဆယ်ဆက်တိုက်အောင်ပွဲများ ရရှိခဲ့ပေသည်။

ထိုအချိန်တွင် သူက ရပ်တန့်သွားရသည်။ နောက်ရက်မှ ထပ်မံတိုက်ခိုက်ရလိမ့်မည်။

ပူဖောင်းလေး၏ တိုက်ပွဲများက အချိန်သိပ်မယူရသောကြောင့် ယနေ့တွင် တိုက်ပွဲများက ဆက်လက်ဖြစ်နေသည်။

ထို့နောက် ချင်ယွဲ့ပေါ်လာသည်။

ချင်ယွဲ့က ငယ်ရွယ်သေးသော်လည်း အံ့ဩစရာကောင်းအောင် မဟာသူတော်စင်နယ်ပယ် ပြီးပြည့်စုံမှုအဆင့်သို့ ရောက်နေပြီ။ နောက်ပိုင်း တိုက်ပွဲများမှာလည်း အံ့ဩစရာဖြစ်သည်။

နောက်ထပ် အကြွင်းမဲ့ ချေမှုန်းခြင်း...

ချင်ယွဲ့သည်လည်း ပွဲကိုးဆယ်ဆက်တိုက် အနိုင်ရရှိခဲ့ပေသည်။

နောက်နှစ်ရက်မှာတော့ လုမင်၊ ချင်ယွဲ့နှင့် ပူဖောင်းလေးတို့၏ အလှည့်မကျခဲ့ပါ။ ထိုအစား တခြားသူများ၏ တိုက်ပွဲများသာ ဖြစ်ခဲ့သည်။

နှစ်ရက်ကြာပြီးနောက်တွင် လုမင်က ပထမဆုံး တိုက်ခိုက်ခဲ့ရသည်။

ဟွမ်မျိုးနွယ်က ရက်အနည်းငယ်ကြာအောင် ပြင်ဆင်ခဲ့ပြီး၊ ၎င်းတို့စေလွှတ်သော ကျွမ်းကျင်သူများကလည်း အမှန်တကယ်ပင် အားကောင်းခဲ့ပေသည်။

သို့သော်လည်း လုမင်အတွက် သာမန်သာ ဖြစ်သည်။ ကောင်းကင်သားတော်များမှလွဲ၍ တူညီသောအဆင့်တွင် သူ့အတွက် စိတ်လှုပ်ရှားစရာ မရှိပါ။

အကြွင်းမဲ့ချေမှုန်းနေဆဲ ဖြစ်သည်။

ကိုးဆယ့်တစ်ပွဲ ဆက်တိုက်အောင်ပွဲ၊ ကိုးဆယ့်နှစ်ပွဲ ဆက်တိုက်အောင်ပွဲ၊ ကိုးဆယ့်သုံးပွဲ ဆက်တိုက်အောင်ပွဲ...

မကြာမီ၊ ကိုးဆယ့်ကိုးပွဲအထိ ဆက်တိုက် အနိုင်ရရှိခဲ့သည်။

ပွဲစဉ်တစ်ရာပြည့်တွင် ဟွမ်မျိုးနွယ်က နောက်ဆုံး အသန်မာဆုံးသူကို စေလွှတ်ခဲ့ပေသည်။

ဤလူက ဟွမ်မျိုးနွယ်၏ ပါရမီရှင် ဖြစ်သည်။ သူ၏ ဝိညာဉ်ခန္ဓာက အဆင့်မြင့် ကောင်းကင်ဝိညာဉ်ခန္ဓာအဆင့်သို့ ရောက်ရှိခဲ့ပြီး သူ၏ ခွန်အားကလည်း အလွန်ကြောက်စရာကောင်း၏။

လုမင်သည် ဟွမ်မျိုးနွယ်၏ တိုက်ခိုက်နိင်စွမ်းက ဝိညာဉ်ခန္ဓာအဆင့် တူညီချိန်တွင် အပြင်လူများထက် ပိုသန်မာကြောင်း သဘောပေါက်ခဲ့သည်။

ဥပမာအားဖြင့်၊ ဤပါရမီရှင်သည် အဆင့်မြင့် ကောင်းကင်ဝိညာဉ်ခန္ဓာရှိသော်လည်း သူ၏နိယာမက ဘုရင်နိယာမ မဟုတ်ပါ။ သူ၏ အရည်အချင်းက ရှန်းယွမ်အင်ပါယာမှ အိုးရန်ဝူတောက်နှင့် တန်းတူဖြစ်သည်။ သို့သော်လည်း သူတို့နှစ်ဦးက တူညီသောနယ်ပယ်တွင်ရှိလျှင် ဟွမ်မျိုးနွယ်ဝင် ပါရမီရှင်က အနိုင်ရလိမ့်မည်။

သို့သော်လည်း လုမင်အတွက်တော့ အပြောင်းအလဲမရှိပါ။ လုမင်က သူ့ကို လွယ်ကူစွာ အနိုင်ယူခဲ့သည်။

ပွဲစဉ်တစ်ရာ ဆက်တိုက် အနိုင်ရခဲ့ပြီ။

ပရိသတ်က အော်ဟစ်အားပေးလိုက်ကြသည်။

ပွဲစဉ်တစ်ရာအထိ ဆက်တိုက် အနိုင်ရရှိရန်က မလွယ်ပေ။ ယခုတော့ မမျှော်လင့်ဘဲ အပြင်လူတစ်ဦးမှ အောင်မြင်သွားခဲ့ပြီ ဖြစ်သည်။