အခန်း ၁၈၇၅

အပိုင်း ( 1875 ) တိုးတက်လာခြင်း။

လုမင်က တောင်ကြားထဲကို လှမ်းဝင်လိုက်သည်နှင့် ပတ်ဝန်းကျင် မြင်ကွင်းများ ပြောင်းလဲသွားသည်။ သူက ကျွန်းတစ်ခုသို့ ရောက်နေသည်ကို တွေ့လိုက်ရ၏။ ပတ်ဝန်းကျင်မှာတော့ မည်သူမျှမရှိဘဲ ပူဖောင်းလေးကိုပင် မတွေ့ရတော့ပေ။

ရုတ်တရက်၊ သူ့​ရှေ့တွင်​ လူရိပ်တချို့ ပေါ်လာသည်။ သူတို့က မှုန်ဝါးနေပြီး သူတို့၏မျက်နှာများကိုလည်း ရှင်းရှင်းလင်းလင်း မမြင်နိုင်ပေ။

"ဝှစ်... ဝှစ်..."

ဤလူရိပ်များက လုမင်ကို တစ်ဦးပြီးတစ်ဦး တိုက်ခိုက်လိုက်ကြသည်။ သူတို့က လျှပ်စီးလက်သကဲ့သို့ မြန်ဆန်ကြ၏။

လုမင်လည်း သူ၏ မျက်လုံးများကို မှိတ်လိုက်သည်။ ကစဉ့်ကလျားနိယာမက သူ့ခန္ဓာကိုယ်အနှံ့ ပျံ့နှံ့သွား၏။ သူက အတားအဆီးမဲ့သော ကောင်းကင်သိုင်းဖြင့် လက်သီးချက်များကို အဆက်မပြတ် ထုတ်ဖော်လိုက်တော့သည်။

ထိုအချိန်တွင်၊ လူရိပ်များကလည်း အမျိုးမျိုးသော တိုက်ခိုက်မှုများကို ထုတ်ဖော်လိုက်ကြသည်။ ၎င်းတို့က လက်သီးထိုးခြင်း၊ လက်ဝါးရိုက်ချက် ထုတ်ဖော်ခြင်း သို့မဟုတ် လက်ချောင်းများဖြင့် ထိုးခြင်းတို့ ဖြစ်၏။ သို့သော်လည်း သူတို့အားလုံးတွင် တူညီသောအရာတစ်ခုရှိသည်။ ယင်းမှာ၊ သူတို့အားလုံးက ကစဉ့်ကလျားနိယာမကို အသုံးပြုနေခြင်းပင်။

"ဝုန်း... ဝုန်း"

အတက်မပြတ် တိုက်မိပြီးနောက် လူရိပ်များက လွင့်သွားကြသည်။

"သူတို့က ကစဉ့်ကလျားနိယာမကို တကယ် အသုံးပြုနိုင်တယ်"

လုမင်၏ မျက်လုံးများက အံ့အားသင့်မှုတို့ ပေါ်လာသည်။

ဟွမ်လင်၊ လုံချန်နှင့် အခြားသူများထံမှ နတ်ဘုရားစွမ်းရည်သန့်စင်ခြင်းတောင်ကြားသည် အလွန်လျှို့ဝှက်ဆန်းကြယ်ကြောင်းကို သူကြားဖူးသည်။ အတွင်းမှ ဖွဲ့စည်းထားသော လူရိပ်များက ဝင်ရောက်လာသူများနှင့် တူညီသော နိယာမကို အသုံးပြုနိုင်ပေသည်။ ထို့ပြင် တောင်ကြားထဲသို့ နက်နဲလေလေ၊ လူရိပ်များ၏ နိယာမကျွမ်းကျင်မှုက ပို၍ သန်မာလာလေ ဖြစ်သည်။

"ဝုန်း"

လုမင်က ရှေ့သို့ ခြေတစ်လှမ်းတိုးပြီး လူရိပ်များကို တိုက်ခိုက်လိုက်သည်။ သူက ခွန်အားကို အနည်းငယ် တိုးမြှင့်လိုက်၏။

လက်သီးချက်များ ဆက်တိုက် ထုတ်ဖော်ပြီးနောက် လူရိပ်များက ပေါက်ကွဲသွားတော့သည်။

ဤလူရိပ်များက ကစဉ့်ကလျားနိယာမကို သုံးနိုင်သော်လည်း ၎င်းတို့၏စွမ်းအားမှာ အလွန်အားနည်းသည်။ သူတို့က လုမင်ထက် ပိုအားနည်းပေသည်။ သူတို့က လုမင်၏ တိုက်ခိုက်မှုတစ်ခုကိုပင် မခံနိုင်ပေ။

ထိုလူရိပ်များကို အနိုင်ယူပြီးနောက် လုမင်က ရှေ့သို့ တိုးလာသည်။ မကြာမီ၊ နောက်ထပ် လူရိပ်တချို့ ပေါ်လာ၏။ ဤပုံရိပ်များကလည်း ကစဉ့်ကလျားနိယာမကို အသုံးပြုနိုင်သည်။ ထို့ပြင်၊ သူတို့က ပို၍ပင် အားကောင်းသေးသည်။ သို့သော်လည်း လုမင်ထက် များစွာ အားနည်းနေဆဲ ဖြစ်သည်။ တိုက်ခိုက်မှု အနည်းငယ်ဖြင့် သူတို့အားလုံး ပျက်သုဉ်းသွားပေသည်။

လုမင်က ရှေ့ကို ဆက်လျှောက်သွားသည်။

ယခင်အတိုင်း၊ လုမင်က ပုံရိပ်များစွာကို အနိုင်ယူခဲ့ပေသည်။ သူ ရင်ဆိုင်ရသော လူရိပ်များကလည်း ပို၍ အားကောင်းလာကြသည်။ ၎င်းတို့၏ ကစဉ့်ကလျား နိယာမစွမ်းအားက လုမင်ကိုပင် မီတော့မည်။ သူတို့ကလည်း လုမင်ကဲ့သို့ ကစဉ့်ကလျား ကပ်ဘေးလက်ချောင်းကိုပင် အသုံးပြုနိုင်သည်။

လုမင်က နောက်ဆုံးတွင် ဖိအားကို ခံစားလာခဲ့ရသည်။ လုမင်လည်း ကစဉ့်ကလျားနိယာမကို အစွမ်းကုန် ဖြန့်ကျက်၍ ပြိုင်ဘက်များကို တိုက်ခိုက်ခဲ့ပေသည်။

"ဝုန်း... ဝုန်း... ဝုန်း"

တစ်ချိန်တည်းတွင် လူရိပ်သုံးခုက လက်ညှိုးညွန်ပြလိုက်ကြသည်။ မတူညီသော လမ်းကြောင်းသုံးခုမှ ဧရာမလက်ချောင်းကြီးသုံးခုက လုမင်ဆီသို့ ဝင်ရောက်လာ၏။

လုမင်၏ မျက်လုံးအိမ်များက ကျဉ်းမြောင်းသွားသည်။ သူက လျင်မြန်စွာလှုပ်ရှားပြီး လက်ညှိုးသုံးကြိမ်ညွှန်ပြလိုက်၏။

ဧရာမ လက်ချောင်းကြီးသုံးချောင်းက တစ်ဖက်လူများထံသို့ ဖြတ်သန်းသွားတော့သည်။

ဧရာမ လက်ချောင်းကြီး ခြောက်ချောင်းက လေထဲတွင် အချင်းချင်း ထိပ်တိုက် တွေ့ဆုံသွားကြသည်။

သို့သော်လည်း အဆုံးတွင် လုမင်က အရေးသာနေဆဲပင်။ တစ်ဖက်လူများ၏ ကစဉ့်ကလျား ကပ်ဘေးလက်ချောင်းများက ဖျက်ဆီးခံခဲ့ရပြီး သူတို့၏ ခန္ဓာကိုယ်များလည်း ပျက်သုဉ်းသွားကြသည်။

'သူတို့ရဲ့ ကစဉ့်ကလျား ကပ်ဘေးလက်ချောင်း စွမ်းအားက ငါ့နီးနီး အစွမ်းထက်နေပြီ။ သူတို့သာ နည်းနည်း ပိုအားကောင်းလာရင် ငါ ရင်ဆိုင်ဖို့ မလွယ်တော့ဘူး။ ဒါပေမဲ့ ဒါကလည်း ကောင်းပါတယ်။ ဒီနည်းနဲ့ ငါက ပိုပြီး တိုးတက်လာနိုင်လိမ့်မယ်'

လုမင်က ခဏမျှ စဉ်းစားပြီးနောက် ရှေ့ကို ဆက်လျှောက်သွားသည်။

မကြာမီ၊ နောက်ထပ် လူရိပ်တစ်ခုပေါ်လာပြီး လုမင်ကို တိုက်ခိုက်လိုက်သည်။

ဤတစ်ကြိမ်တွင်၊ တစ်ဖက်လူ၏ ကစဉ့်ကလျားနိယာမကို ကျွမ်းကျင်မှုက လုမင်ထက် အားမနည်းတော့ပါ။ လုမင်က လူရိပ်သုံးခုနှင့် ပြင်းထန်စွာ တိုက်ခိုက်ခဲ့ရသည်။ ကစဉ့်ကလျား အငွေ့အသက်များက လေထဲတွင် ပြည့်နှက်သွား၏။

တူညီသော နိယာမကို အသုံးပြုသူအချင်းချင်း ထိပ်တိုက်တွေ့ခြင်းက ရှားပါးသည်။ ဤနည်းဖြင့် မိမိ၏ အားနည်းချက်များကို ပိုမြင်တွေ့နိုင်ပြီး တိုးတက်လာစေနိုင်လိမ့်မည်။

မဟာဧကရာဇ်ကြီးများက ဤကဲ့သို့သော နေရာကို ဖန်တီးရန် များစွာ အားထုတ်ရမည်ဖြစ်ကြောင်း တွေ့ကြည့်နိုင်သည်။

ဤတစ်ကြိမ်တွင်၊ လုမင်က လူရိပ်သုံးခုကို အနိုင်မယူမီ နာရီဝက်ကြာ တိုက်ခိုက်ခဲ့ရသည်။

"ငါ့ရဲ့ ကစဉ့်ကလျား ကပ်ဘေးလက်ချောင်းက ခုနစ်ဆယ်ရာခိုင်နှုန်းကို ရောက်တော့မယ်"

လုမင်၏ မျက်လုံးများ တောက်ပလာသည်။

ယခင်က လုမင်၏ ကစဉ့်ကလျား ကပ်ဘေးလက်ချောင်းသည် ခြောက်ဆယ့်ကိုး ရာခိုင်နှုန်းခန့်သာ ရှိသည်။ ယခုအခါ၊ ခုနစ်ဆယ်ရာခိုင်နှုန်းနီးပါး ရှိလာပြီ။

ဤအတိုင်း ဆက်လက်လေ့ကျင့်ပါက ခုနစ်ဆယ်ရာခိုင်နှုန်းကို မကြာမီ ရောက်ရှိမည် ဖြစ်သည်။

လုမင်က ရှေ့ကို ဆက်လျှောက်သွားသည်။ ဤတစ်ကြိမ်တွင် ပေါ်လာသော ပုံရိပ်များက ပို၍ အားကောင်း၏။ လုမင်က တစ်နာရီကျော် တိုက်ခိုက်ခဲ့သည့်တိုင် အနိုင်မရသေးပေ။ နောက်ဆုံးတွင်၊ သူ၏ သူတော်စင်စွမ်းအားက ကုန်ဆုံးသွားသောကြောင့် နောက်ကို ပြန်ဆုတ်ခဲ့ရသည်။

လုမင် ပြန်ဆုတ်သွားလျှင်တော့ လူရိပ်များက သူ့ကို မတိုက်ခိုက်တော့ပေ။

လုမင်က သူတော်စင်စွမ်းအင် ပြန်လည်ဖြည့်တင်းပြီးနောက် ဆက်လက် တိုက်ခိုက်ခဲ့သည်။

မျက်စိတစ်မှိတ်အတွင်းမှာပင် နှစ်ရက်ကြာသွားပြီ။

လူရိပ်တချို့က ပြင်းထန်သော တိုက်ခိုက်မှုများကို ထုတ်ဖော်နေကြသည်။

"ဝုန်း... ဝုန်း"

လုမင်က ကစဉ့်ကလျား ကပ်ဘေးလက်ချောင်းကို ဆက်တိုက် ထုတ်ဖော်လိုက်၏။ ကစဉ့်ကလျား ကပ်ဘေးလက်ချောင်း၏ စွမ်းအားက ရုတ်တရက် မြင့်တက်လာသည်။

လူရိပ်သုံးခုမှ ထုတ်ဖော်ခဲ့သော ကစဉ့်ကလျား ကပ်ဘေးလက်ချောင်းက လုမင်၏ရှေ့တွင် ချက်ချင်း ပျက်သုဉ်းသွားကြသည်။ ကြောက်မက်ဖွယ်ကောင်းသော စွမ်းအားက လူရိပ်သုံးခုကိုပင် ကွဲကြေသွားစေခဲ့တော့သည်။

"ကစဉ့်ကလျား ကပ်ဘေးလက်ချောင်း... ခုနစ်ဆယ် ရာခိုင်နှုန်း"

လုမင်က ပြုံးလိုက်သည်။

ဤနေရာတွင် နှစ်ရက်မျှသာ လေ့ကျင့်ရသေးသော်လည်း သူ၏ ကစဉ့်ကလျား ကပ်ဘေးလက်ချောင်းက အဆင့်တက်သွားပြီ။

ခြောက်ဆယ့်ကိုး ရာခိုင်နှုန်းနှင့် ခုနစ်ဆယ် ရာခိုင်နှုန်းကြား ကွာခြားချက်မှာ သေးငယ်သော်လည်း စွမ်းအားကွာခြားချက်က ကြီးမားသည်။

ခုနစ်ဆယ် ရာခိုင်နှုန်းကို ဖြတ်သွားသည်နှင့် အဆင့်သစ်တစ်ခုသို့ ရောက်ရှိသွားလိမ့်မည်။

သာမန် ကျင့်ကြံသူတစ်ယောက်အတွက်၊ နတ်ဘုရားစွမ်းရည်ကို ခုနစ်ဆယ်ရာခိုင်နှုန်းအထိ ဖြတ်ကျော်ရန် အနည်းဆုံး အန္တိမသူတော်စင်နယ်ပယ် ကျင့်ကြံမှုအခြေခံကို လိုအပ်မည် ဖြစ်သည်။ ထို့ပြင် ကစဉ့်ကလျားနိယာမကြောင့် ကစဉ့်ကလျား ကပ်ဘေးလက်ချောင်းကို လေ့ကျင့်ရန်မှာ ပို၍ပင် ခက်ခဲသေးသည်။

ဟုတ်သည်၊ ပါရမီရှင်များကတော့ ဤသဘောတရားကို ချိုးဖောက်နိုင်လိမ့်မည်။

ဤနေရာက အလွန်ကောင်းမွန်သော နေရာ ဖြစ်သည်။ ယွမ်တောင်တစ်ခုလုံးရှိ ပါရမီရှင်များက ယွမ်တောင် မြင့်မြတ်သောကျောင်းတော်တွင် စုဝေးကြတာ အံ့ဩစရာမဟုတ်တော့ပါ။

မဟာဧကရာဇ်ကြီးများ ဖန်တီးထားသော ကျင့်ကြံမှုနေရာက တကယ်ကို ထူးကဲသည်။

ထို့ပြင်၊ ပါရမီရှင်များအချင်းချင်း ရင်ဆိုင်နိုင်သည့်အပြင် မဟာဧကရာဇ်ကြီးများ၏ တာအိုတရားဟောခြင်းလည်း ရှိသေးသည်။ ဤနည်းအားဖြင့်၊ ဤပါရမီရှင်များ၏ ကျင့်ကြံမှုအရှိန်က လျင်မြန်စွာ တိုးတက်လာမည် ဖြစ်သည်။ သူတို့၏ အလားအလာကို နှိုးဆွကာ ပိုမိုမြင့်မားသော နယ်ပယ်သို့ပင် တက်လှမ်းနိုင်လိမ့်မည်။

"ဆက်မယ်"

လုမင်က စိတ်လှုပ်ရှားနေပြီး ရှေ့ကို ဆက်လျှောက်သွားသည်။

ဤသို့ဖြင့် လုမင်က နတ်ဘုရားစွမ်းရည် သန့်စင်ခြင်းတောင်ကြားတွင် ဆက်လက် လေ့ကျင့်နေခဲ့သည်။

အချိန်များက ကုန်လွန်လာပြီး မျက်စိတစ်မှိတ်အတွင်းမှာ နှစ်လကြာသွားပြီ။

လုမင်က အစာစားခြင်းနှင့် အိပ်စက်ရန်ပင် မေ့လျော့နေကာ မမောနိုင်မပန်းနိုင် လေ့ကျင့်နေခဲ့သည်။ ကစဉ့်ကလျား ကပ်ဘေးလက်ချောင်းကလည်း လျင်မြန်စွာ တိုးတက်ခဲ့၏။ နှစ်လမပြည့်မီပင်၊ ကစဉ့်ကလျား ကပ်ဘေးလက်ချောင်းက ရှစ်ဆယ်ရာခိုင်နှုန်းအထိ ရောက်ရှိခဲ့ပြီ။

နတ်ဘုရားစွမ်းရည်က မြင့်မားလေလေ၊ တိုးတက်ရန် ပို၍ခက်ခဲလေဖြစ်ကြောင်း သိထားကြရမည် ဖြစ်သည်။ ပြီးပြည့်စုံခြင်းအဆင့်သို့ နီးကပ်လာပြီးနောက် တိုးတက်မှုတိုင်းက အလွန်ခက်ခဲပေသည်။

ယခုတော့ နှစ်လမပြည့်မီတွင် ရှစ်ဆယ်ရာခိုင်နှုန်းအထိ မြှင့်တင်နိုင်ခဲ့သည်။ ဤအရှိန်က အလွန်ကြောက်စရာကောင်းနေပြီ။

ပုံမှန်အတိုင်း လေ့ကျင့်ခဲ့လျှင် နှစ်အနည်းငယ်ကြာပြီးသည့်တိုင် အောင်မြင်နိုင်မည် မဟုတ်ပေ။

ထို့ပြင်၊ ပုံရိပ်များနှင့် တိုက်ခိုက်ခဲ့ပြီးနောက် လုမင်၏ သူတော်စင်စွမ်းအင်က အဆက်မပြတ် စုစည်းလာကာ ပို၍ သန့်စင်လာခဲ့သည်။ သူက မဟာသူတော်စင်နယ်ပယ် ပြီးပြည့်စုံခြင်းအဆင့်သို့ လျင်မြန်စွာ ချဉ်းကပ်လာနေပြီ။

ယနေ့တွင်၊ ပုံရိပ်သုံးခုနှင့် တိုက်ခိုက်ပြီးနောက် သူ့ခန္ဓာကိုယ်တွင်းရှိ သူတော်စင်စွမ်းအင်က ဆူပွက်လာသလို ခံစားလိုက်ရသည်။

"ငါ အဆင့်တက်တော့မယ်"

လုမင် အလွန်ဝမ်းသာသွားသည်။

နှစ်လနီးပါး အဆက်မပြတ် တိုက်ပွဲများ အပြီးတွင်၊ သူ၏ ကျင့်ကြံမှုအခြေခံက မြင့်တက်လာပြီး မဟာသူတော်စင်နယ်ပယ် ပြီးပြည့်စုံမှုအဆင့်သို့ ချိုးဖြတ်သွားတော့မည်။

လုမင်က ချက်ချင်း ပြန်ဆုတ်သွားပြီး တင်ပျဉ်ခွေထိုင်လိုက်သည်။ သူက ကျောက်ကြမ်း အပုံလိုက်ကြီးကို ထုတ်ယူကာ အဆင့်တက်ရန် ပြင်ဆင်လိုက်တော့သည်။

............

ယွမ်တောင် မြင့်မြတ်သောကျောင်းတော်၏ ကောင်းမွန်သော ခြံဝင်းတစ်ခုတွင်...

ရွှေကျီးကန်း ဒုတိယမင်းသား၊ မော့လန်နှင့် အခြားသူများက ဝတ်စုံစိမ်းဝတ် လူငယ်တစ်ဦး၏ရှေ့တွင် တလေးတစား ရပ်နေသည်။

"ရွှေကျီးကန်း ပထမမင်းသား ကွယ်လွန်သွားပြီလား။ ဟမ်... ဒီကောင်က တကယ်အတင့်ရဲတာပဲ"

၀တ်စုံစိမ်းဝတ် လူငယ်က ပြောလိုက်၏။ သူ့အသံက အလွန်တည်ငြိမ်သော်လည်း အေးစက်သော သတ်ဖြတ်လိုစိတ်ကို လူတိုင်း ခံစားရနိုင်သည်။

မော့လန်၊ ရွှေကျီးကန်း ဒုတိယမင်းသားနှင့် အခြားသူများ တုန်လှုပ်သွားကြလေသည်။

ဤလူငယ်က ဖုန်းမျိုးနွယ်၏ ပြိုင်စံရှား ပါရမီရှင် ဖုန်းဝူချန် ဖြစ်သည်။

သူက အန္တိမသူတော်စင်နယ်ပယ်ကို ရှေးယခင်ကတည်းက ရောက်ရှိနေသော ထိပ်တန်း ပါရမီရှင်တစ်ဦးပင်။ ယွမ်တောင် မြင့်မြတ်သောကျောင်းတော်ရှိ ပါရမီရှင်များကြားမှာပင် သူက အလွန်ကျော်ကြားသော တည်ရှိမှုတစ်ခု ဖြစ်သည်။