အခန်း ၁၈၈၆

အပိုင်း ( 1886 ) ဓား၏ရင်းမြစ်၊ ဓားမိစ္ဆာ။

ထိုက်ယီဓားသင်္ချိုင်းက ဓားများမြှုပ်နှံရာနေရာ တစ်ခု ဖြစ်သည်။

ဝေးကွာသောအတိတ်က ဤနေရာတွင် အလွန်အစွမ်းထက်သော ဓားတန်ခိုးရှင်တစ်ဦး ကျဆုံးခဲ့သည်ဟု ပြောစကားများ ရှိပေသည်။ နောက်ပိုင်းတွင် ဤနေရာက ထောင်သောင်းချီသော ဓားများ၏ သင်္ချိုင်းနယ်မြေ ဖြစ်လာခဲ့သည်။ မရေမတွက်နိုင်သော ပိုင်ရှင်မဲ့ဓားများက ဤနေရာသို့ ပျံသန်းလာပြီး ကြောက်မက်ဖွယ်ကောင်းသော ထိုဓားတန်ခိုးရှင်နှင့်အတူ မြှုပ်နှံထားခဲ့ပေသည်။

နောက်ပိုင်းတွင် မရေမတွက်နိုင်သော ဓားသမားများက ထိုဓားတန်ခိုးရှင်ကြီး၏ အမွေကို ရရှိရန် ကြိုးစားလာကြသည်။ ဤအတွက် ပြင်းထန်သော တိုက်ပွဲတစ်ခုပင် ဖြစ်ပွားခဲ့သေးသည်။

မရေမတွက်နိုင်သော ဓားသမားများက ထိုတိုက်ပွဲတွင် ကျဆုံးခဲ့ပြီး ဤနေရာတွင် မြှုပ်နှံထားခဲ့ရသည်။

ဤသို့ဖြင့် မရေမတွက်နိုင်သော ဓားများ၏ မြှုပ်နှံရာနေရာ ဓားသင်္ချိုင်းတစ်ခု ဖြစ်လာခဲ့ပေသည်။

နောက်ပိုင်းတွင်၊ သူတို့၏သက်တမ်းကုန်ဆုံးပြီး သေဆုံးခါနီး ဓားသမားများကလည်း ဤနေရာသို့ လာရောက်ကာ သူတို့၏ဘဝကို အဆုံးသတ်ခဲ့သည်။

အချိန်ကြာလာသည်နှင့်အမျှ၊ ဤနေရာတွင် မြှုပ်နှံထားသော ကျွမ်းကျင်သူနှင့် ဓားအရေအတွက်က မရေမတွက်နိုင်အောင် များပြားလာခဲ့ရသည်။ ဤနေရာတွင် ဓားများ မည်မျှမြှုပ်နှံထားသည်ကိုပင် မပြောနိုင်တော့ပေ။

ဤသို့ဖြင့် အချိန်ကြာလာသည်နှင့်အမျှ အံ့ဖွယ်ရတနာအချို့သည်လည်း ထိုက်ယီဓားသင်္ချိုင်းတွင် မွေးဖွားလာခဲ့သည်။

ဥပမာအားဖြင့်၊ ဓား၏ရင်းမြစ်ကဲ့သို့ ရှားပါးရတနာ ဖြစ်သည်။ ဓားရင်းမြစ်ကို သန့်စင်ခြင်းက လူတစ်ဦး၏ ကျင့်ကြံမှုကို တိုးတက်စေပြီး လူတစ်ဦး၏ အရင်းအမြစ်နှင့် သူတော်စင်စွမ်းအင်ကို သန့်စင်စေနိုင်ပေသည်။

တချို့လူများကလည်း ဓားများကို ရှာဖွေရန် ဤနေရာသို့ လာတတ်ကြသည်။

ရှေးခေတ်ကတည်းက ဓားသမား အများအပြားကို ဤနေရာတွင် မြှုပ်နှံထားခဲ့ပေသည်။ ဧကရာဇ်အဆင့် ဓားသမား အများအပြားပင် ရှိသည်ဟု ဆိုကြသည်။ ထို့ကြောင့် ၎င်းတို့ထံမှ ကျန်ရစ်ခဲ့သော ဓားအချို့က တကယ့်ရတနာများပင်။ ကံကောင်းပါက တစ်ချီတည်းဖြင့် ချမ်းသာနိုင်သည်။

ထို့ကြောင့် ထိုက်ယီဓားသင်္ချိုင်းက လူများစွာကို စူးစမ်းလေ့လာရန် ဆွဲဆောင်နိုင်ခဲ့သည်။

အထူးသဖြင့် ဓားသမားများက နှစ်စဉ်နှစ်တိုင်း ဤနေရာကို လာကြပေသည်။

ထိုက်စွေ့ရတနာကြာပန်းကို ရှာဖွေလိုသူများလည်း ရှိကြသည်။

လုမင်က ပတ်ဝန်းကျင်ကို အကဲခတ်လိုက်သည်။ မျှော်လင့်ထားသည့်အတိုင်း၊ ဂူအနီးတွင် ရုပ်ပုံအချို့ကို သူတွေ့လိုက်ရ၏။

"မင်းတို့နှစ်ယောက်က..."

ကြင်နာတတ်ပုံရသော အဘိုးအိုတစ်ဦးက ပျံသန်းလာပြီး လုမင်နှင့် ချင်ယွဲ့ကို အကဲခတ်သလို ကြည့်လိုက်သည်။ သူက ပြုံးပြီး ပြောလိုက်၏။

"မင်းတို့နှစ်ယောက်က ဓားသင်္ချိုင်းကို စူးစမ်းဖို့ ရောက်လာကြတာ မဟုတ်လား"

"ဟုတ်ပါတယ်"

လုမင် ခေါင်းညိတ်လိုက်သည်။

"ဓားသင်္ချိုင်းထဲမှာ အခွင့်အလမ်းတွေ ပေါများပေမဲ့ အန္တရာယ်တွေလည်း ပြည့်နေတယ်။ ဒါကြောင့် အဖွဲ့ဖွဲ့ပြီး ဝင်ရောက်တာက ပိုကောင်းပါတယ်။ လူပိုများရင် တစ်ယောက်ကိုတစ်‌ယောက် ကူညီနိုင်တာပေါ့။ ဒါကြောင့် ငါတို့က လူစုနေတာ... မင်းတို့နှစ်ယောက် ငါတို့အဖွဲ့နဲ့ ပါဝင်ချင်သလား"

အဘိုးအိုက ပြုံးပြီး ပြောလိုက်သည်။

"အဖွဲ့ ဖွဲ့ရမှာလား"

လုမင်က သူ့စိတ်ထဲမှ တွေးလိုက်၏။

ထိုက်ယီဓားသင်္ချိုင်းက အခွင့်အလမ်းများနှင့် အန္တရာယ်များ ပြည့်နှက်နေသည်။

ရှေးခေတ်ကတည်းက ဓားသမား အများအပြားကို ဤနေရာတွင် မြှုပ်နှံထားခဲ့ပြီး အန္တရာယ်နယ်မြေများလည်း သဘာဝအတိုင်း မွေးဖွားလာခဲ့သည်။ ၎င်းတို့က ဓားမိစ္ဆာများပင်။

ဓားမိစ္ဆာများက ၎င်းတို့ တွေ့မြင်သမျှ သက်ရှိမှန်သမျှကို သတ်ပစ်မည် ဖြစ်သည်။ သူတို့တွင် ဆင်ခြင်နိုင်စွမ်း လုံးဝ မရှိပေ။

အချို့သော ဓားမိစ္ဆာများက အလွန်သန်မာပြီး တစ်ဦးချင်းရင်ဆိုင်ရန် ခက်သည်။ ထို့ကြောင့် လူများစွာက အဖွဲ့များဖွဲ့ကာ ဓားသင်္ချိုင်းသို့ ဝင်ရောက်ခြင်းမှာ ပုံမှန်ပင်။

"အကြီးအကဲ၊ ကျုပ်တို့နှစ်ယောက်က သူတော်စင်ဆေးပင်တစ်မျိုးကို ရှာဖွေဖို့ ရောက်လာကြတာပါ"

လုမင်က ပြောလိုက်သည်။

"ဟားဟားဟား၊ ကောင်းတာပေါ့။ ဓားသင်္ချိုင်းက ကျယ်လွန်းတယ်။ မင်းတို့နှစ်ယောက်တည်း ရှာမယ်ဆိုရင် ဒါက ကောက်ရိုးပုံထဲ အပ်ပျောက်ရှာသလိုပဲလေ။ ငါတို့နဲ့အတူလိုက်ခဲ့ပါ၊ ဒါဆိုရင် ပိုပြီးကောင်းမွန်တဲ့ အခွင့်အလမ်းတွေကို ရရှိနိုင်လိမ့်မယ်"

အဘိုးအိုက ပြုံးပြီး ပြောလိုက်၏။

"ကောင်းပြီ၊ ကျုပ်သဘောတူတယ်"

လုမင်က ခဏလောက်စဉ်းစားပြီး ခေါင်းညိတ်လိုက်သည်။

အဘိုးအို၏ စကားက အဓိပ္ပာယ်ရှိပေသည်။ ထိုက်စွေ့ရတနာကြာပန်းကို သူတို့နှစ်ဦးတည်း ရှာဖွေမည်ဆိုလျှင် တက်ကို ခက်ခဲသည်။ လူများများနှင့် ပူးပေါင်းလျှင်တော့ အောင်မြင်ဖို့ အခွင့်အလမ်း ပိုများပေမည်။

ထို့ပြင်၊ ဤလူများထဲမှ အချို့က ဤနေရာတွင် ရောက်ရှိနေသည်မှာ ကြာပြီဖြစ်သည်။ ၎င်းတို့ထံမှ အသုံးဝင်သော အချက်အလက်အချို့ကို ရရှိနိုင်လိမ့်မည်။

"ဟားဟားဟား... ကောင်းတယ်၊ လာ လာ... ငါ မင်းကို တခြားသူတွေနဲ့ မိတ်ဆက်ပေးမယ်"

အဘိုးအိုက ပြုံးပြီး လုမင်နှင့် ချင်ယွဲ့ကို အခြားသူများထံ ခေါ်ဆောင်သွားသည်။

ဂူအဝင်ဝတွင် လူရှစ်ယောက် ရှိ၏။ အဘိုးအိုက သူတို့ကို မိတ်ဆက်ပေးလေသည်။

အဘိုးအိုမှ မိတ်ဆက်ပေးပြီးနောက် လုမင်သည် အဘိုးအို၏ နာမည်မှာ ဝူချူဖြစ်ကြောင်း သိလိုက်ရသည်။ သူက အန္တိမသူတော်စင်နယ်ပယ် ပြီးပြည့်စုံမှုအဆင့် ကျင့်ကြံမှုရှိပြီး ဤလူများထဲတွင် သူ၏ ကျင့်ကြံမှုက အမြင့်မားဆုံးပင်။

"မိတ်ဆွေတို့၊ ငါတို့ နောက်ထပ် နည်းနည်းတော့စောင့်ရဦးမယ်။ လူပိုများလာတော့မှ ဝင်ကြတာပေါ့"

ဝူချူက ပြောလိုက်သည်။ သူ့မျက်နှာပေါ်တွင် နူးညံ့သိမ်မွေ့သော အပြုံးတစ်ခု ရှိနေပြီး ပေါင်းသင်းရန် လွယ်ကူပုံရပေသည်။

"နည်းနည်း​စောင့်​ရတာ​ ကိစ္စမရှိပါဘူး"

လုမင်က ခေါင်းညိတ်လိုက်သည်။

ထိုက်စွေ့ရတနာကြာပန်းက နေ့ချင်းညချင်း ရှာတွေ့နိုင်တာ မဟုတ်ပေ။ နောက်ထပ် ရက်အနည်းငယ် စောင့်ရတာက ကိစ္စမရှိပါ။

ထိုက်ယီဓားသင်္ချိုင်းကို စူးစမ်းလေ့လာရန် လာရောက်သူက အများအပြား ရှိခဲ့သည်။ ရက်အနည်းငယ်ကြာတိုင်း လူတချို့ ရောက်လာကြပြီး သူတို့ကို ဝူချူက အဖွဲ့ထဲသို့ ခေါ်ထည့်ခဲ့ပေသည်။

ဆယ်ရက်ကျော်အကြာတွင် အဖွဲ့ထဲမှာ လူနှစ်ဆယ်ကျော်ရှိလာခဲ့သည်။

"ကိုင်း၊ အချိန်ကျပြီ။ သွားရအောင်"

ဝူချူက ပြောလိုက်သည်။ ထို့နောက် သူကပင် ဦးဆောင်ပြီး ဂူတွင်းသို့ ပြေးသွား၏။ အခြားသူများကလည်း သူ့နောက်မှ လိုက်သွားကြတော့သည်။

ဂူက အလွန်ကြီးမားပြီး မြေအောက်သို့ စီးဆင်းသွားသည်။ ၎င်းက အလွန်နက်နဲပြီး နားမလည်နိုင်အောင်ပင်။

လုမင်နှင့် အခြားသူများက နောက်ဆုံးတွင် အောက်ခြေသို့မရောက်မီ ပေတစ်သောင်းခန့် ပျံသန်းဆင်းသက်ခဲ့ကြသည်။

"ဒါက... တကယ်ကို မြေအောက်ကမ္ဘာနဲ့တူတယ်"

လုမင်က ပတ်ဝန်းကျင်ကို လှည့်ကြည့်လိုက်ပြီးနောက် ဂူအောက်တွင် ကမ္ဘာတစ်ခုကဲ့သို့ဖြစ်ကြောင်း တွေ့လိုက်ရသည်။ တစ်ချက်ကြည့်ရုံဖြင့် အဆုံးကို မမြင်နိုင်ပေ။

ဤနေရာတွင် တောင်ထိပ်များ ရှိသော်လည်း တိတ်ဆိတ် နေဆဲ ဖြစ်သည်။ ဤနေရာတွင် ဘာမျှမရှိပေ။

ဓားများသာ ရှိခဲ့သည်။

သံချေးတက်နေသော ဓားများက မြေကြီးထဲတွင်ဖြစ်စေ၊ တောင်ထိပ်များတွင်ဖြစ်စေ ပိတ်မိနေခဲ့ပေသည်။

သို့သော်လည်း ၎င်းတို့အများစုက နှစ်ပေါင်းများစွာ ကြာမြင့်ခဲ့ပြီးနောက် အနှစ်သာရတို့ ဆုံးရှုံးကာ ပျက်စီးယိုယွင်းသွားတော့မည် ဖြစ်သည်။

"တကယ်လို့ တိုက်ခိုက်ခံရတဲ့အခါ အခြေအနေမပျက်အောင် အစီရင်ကို ကြိုတင်ဖွဲ့စည်းထားကြရအောင်"

ဝူချူက ပြောလိုက်သည်။ ထို့နောက် အစီရင်ကို ဖွဲ့စည်းရန် စီစဉ်ခဲ့၏။

လုမင်နှင့် ချင်ယွဲ့တို့က အနောက်ဘက်တွင် နေရာကျသည်။ တချို့က အလယ်မှာနေပြီး တချို့က ရှေ့မှ၊ ဘေးဘက်မှ သွားကြရပေသည်။

လုမင်၏ မျက်လုံးများက အရောင်လက်သွားသည်။ အရပ်လေးမျက်နှာတွင် နေရာချခံရသူများက နောက်မှ အဖွဲ့ထဲကို ပါဝင်လာကြသူများဖြစ်ကြောင်း သူ သတိပြုမိ၏။

ဝူချူကိုယ်တိုင်က အခြား လူငါးဦး၊ ခြောက်ဦးနှင့် အလယ်တွင် ရှိသည်။

သူ့အဆိုအရ သူ၏ ကျင့်ကြံမှုအခြေခံဟာ အမြင့်ဆုံးဖြစ်သောကြောင့် အခြားသူများကို အချိန်မရွေး ပံ့ပိုးကူညီရန် အလယ်တွင် ရှိနေရပေသည်။

ထို့ကြောင့် ကျန်သူများလည်း မကန့်ကွက်ကြတော့ဘဲ ဦးတည်ရာတစ်ခုကို ရွေးချယ်ကာ ပျံသန်းသွားကြသည်။

ထိုက်ယီဓားသင်္ချိုင်းက လူများအား တိတ်ဆိတ်ခြင်း ခံစားချက်ကိုသာ ပေးစွမ်းနေသည်။

ကောင်းကင်နှင့်မြေပြင်ကြားတွင် အရာအားလုံးက တိတ်ဆိတ်ငြိမ်သက်နေခဲ့သည်။ မြက်တစ်ပင်မျှပင် မပေါက်ရောက်ဘဲ ဖုန်းဆိုးမြေကဲ့သို့ ဖြစ်၏။ ရံဖန်ရံခါမှာတော့ လေပြင်းများ တိုက်ခတ်တတ်သည်။

သူတို့က မိုင်ပေါင်း ရာနှင့်ချီကာ ရှေ့သို့ ပျံသန်းသွားကြသော်လည်း မြင်ကွင်းများကတော့ မပြောင်းလဲပေ။

ဒါက အပြင်ပိုင်းနယ်မြေ ဖြစ်သည်။ လမ်းတစ်လျှောက်တွင် သူတို့တွေ့ရသော ဓားအကုန်လုံးက စွမ်းအင်ကုန်ခမ်းနေ၏။ ဤနယ်မြေတွင် အကျိုးအမြတ်ရှိမည် မဟုတ်ပေ။

မသိနိုင်သော အကွာအဝေးတစ်ခုသို့‌ ရောက်လာပြီးနောက် သူတို့ရှေ့တွင် ပြောင်းလဲမှုတစ်ခု ပေါ်လာသည်။

၎င်းတို့က အနက်ရောင် ပုံရိပ်နှစ်ခု ဖြစ်၏။ သူတို့၏ အသွင်အပြင်က ရှင်းရှင်းလင်းလင်း မမြင်နိုင်ဘဲ သရဲတစ္ဆေများကဲ့သို့ပင်။

အနက်ရောင် ပုံရိပ်နှစ်ခုက လုမင်နှင့် အခြားသူများကို မြင်သောအခါ၊ သူတို့၏ မျက်လုံးများက စူးရှသော အလင်းများ ထွက်ပေါ်လာသည်။ သူတို့က ဓားအလင်းတန်းနှစ်ခုအဖြစ်သို့ ပြောင်းလဲသွားပြီး သူတို့လူစုကို တိုက်ခိုက်လိုက်၏။

"ဒါက ဓားမိစ္ဆာနှစ်ကောင်ပဲ၊ ဒါပေမဲ့ သူတို့ရဲ့အင်အားက တောက်ပသော သူတော်စင်နယ်ပယ်မှာပဲ ရှိသေးတယ်"

ဝူချူက ပြောလိုက်သည်။ သူ့လက်ကို ဝှေ့ရမ်းခြင်းဖြင့် စွမ်းအင်အလင်းတန်းနှစ်ခု ထွက်လာပြီး ဓားမိစ္ဆာနှစ်ကောင်ကို ချေမှုန်းနိုင်ခဲ့ပေသည်။

ဓားမိစ္ဆာနှစ်ခုက ရှုံးနိမ့်သွားပြီးနောက် စွမ်းအင်အလင်းတန်းနှစ်ခုအဖြစ် ပြောင်းလဲကာ မြေကြီးထဲသို့ နစ်မြုပ်သွားပြီး ပျောက်ကွယ်သွားခဲ့သည်။

ဤဓားမိစ္ဆာများက သတ်ရန်အလွန်ခက်ခဲသည်ဟု ဆိုကြသည်။ ၎င်းတို့ကို ဖျက်ဆီးလိုက်လျှင်လည်း ခဏပင်။ ရှုံးနိမ့်ကြပြီးနောက် မြေကြီးထဲသို့ တိုးဝင်ကာ လွတ်မြောက်သွားတတ်သည်။ အချိန်အတိုင်းအတာတစ်ခုကြာပြီးနောက် ၎င်းတို့က ပြန်လည်ပေါ်လာလိမ့်မည်။

သူတို့လူစုက ရှေ့ကို ဆက်သွားကြသည်။ သူတို့က နောက်ထပ် ဓားမိစ္ဆာတချို့ကို ကြုံတွေ့ခဲ့ရသော်လည်း ၎င်းတို့သည် သန်မာမှုမရှိ၍ အလွယ်တကူ အနိုင်ယူနိုင်ခဲ့ဆဲပင်။

ရုတ်တရက်၊ သူတို့၏ရှေ့နားမှ အားနည်း​သော ဓားအလင်းတစ်ခု ပေါ်လာခဲ့သည်။

"ရှေ့မှာ ဓားရင်းမြစ်ရှိတယ်"

ဝူချူ၏ မျက်လုံးများက တောက်ပလာသည်။

ဤအချက်မှ ဝူချူသည် ထိုက်ယီဓားသင်္ချိုင်းသို့ ပထမဆုံးအကြိမ် ဝင်ရောက်ခြင်းမဟုတ်ကြောင်း သိနိုင်သည်။ သူက အလွန်အတွေ့အကြုံရှိ၏။ အားနည်းသော ဓားစိတ်ဆန္ဒကို အခြေခံ၍ ရှေ့တွင် ဓားရင်းမြစ်ရှိကြောင်း ဆုံးဖြတ်နိုင်သည်။

သူတို့အဖွဲ့လည်း သူတို့၏ အငွေ့အသက်များကို ထိန်းချုပ်ပြီး ရှေ့ကို ဂရုတစိုက် တိုးသွားခဲ့ကြသည်။ တောင်ထိပ်တစ်ခုကို ဖြတ်ကျော်ပြီးနောက် ဓားမိစ္ဆာ ဒါဇင်များစွာကို တွေ့လိုက်ရ၏။

ကွာခြားချက်မှာ ဤဓားမိစ္ဆာများ၏ ခန္ဓာကိုယ်က အလွန်သိပ်သည်းပြီး ရုပ်တ္တုများကဲ့သို့ စစ်မှန်လွန်းခြင်း ဖြစ်သည်။ သူတို့၏ ခန္ဓာကိုယ်က နတ်ဓားတစ်လက်ကဲ့သို့ အားကောင်းသော ဓားစွမ်းအင်များပင် ထွက်ပေါ်နေတော့သည်။