အခန်း ၁၉၀၄

အပိုင်း ( 1904 ) မင်းရဲ့ ယုံကြည်မှုက ဘယ်ကလာတာလဲ။

သိမ်းယူပယ်ဖျက်ခြင်း နတ်ဘုရား‌တံဆိပ်တော်မှာ လော့စန်းချုံး၏ နတ်ဘုရားစွမ်းရည် ဖြစ်သည်။ ၎င်းက အခြား နိယာမများ၏ စွမ်းအားအပါအဝင် ကမ္ဘာပေါ်ရှိ စွမ်းအင်အားလုံးကို သိမ်းယူဖယ်ရှားနိုင်စွမ်း ရှိပေသည်။ ‌၎င်းတို့ကို ပေါင်းစပ်လိုက်ပါက ကြောက်မက်ဖွယ်ကောင်းသော တိုက်ခိုက်မှုတစ်ခုကို ဖြစ်လာစေနိုင်သည်။

သိမ်းယူပယ်ဖျက်ခြင်း နတ်ဘုရား‌တံဆိပ်တော်၏ ဝန်းကျင်ရှိ စွမ်းအင်အားလုံးက ဖယ်ထုတ်ခံလိုက်ဟန်ဖြင့် ဟာလာဟင်းလင်း ဖြစ်လာတော့သည်။

"ဝူ..."

စွမ်းအင်မျိုးစုံက သိမ်းယူပယ်ဖျက်ခြင်း နတ်ဘုရား‌တံဆိပ်တော်တွင် စုဝေးလာပြီး စူးရှသော အသံများ ထွက်ပေါ်လာခဲ့သည်။ ထို့နောက် တောင်လုံးတမျှ ကြီးမားလာပြီး လုမင်ဆီသို့ ပေါက်ကွဲသွားသည်။

"သေစမ်း"

လော့စန်းချုံးက သတ်ဖြတ်ချင်စိတ်အပြည့်ဖြင့် အော်ဟစ်လိုက်၏။

လုမင်၏ ကစဉ့်ကလျားနိယာမကို မဖယ်ရှားနိုင်သောကြောင့် အကြွင်းမဲ့အင်အားဖြင့်သာ ဖိနှိပ်နိုင်သည်။

သူ၏ နတ်ဘုရားစွမ်းရည်က ကိုးဆယ်ရာခိုင်နှုန်းအထိ ကျွမ်းကျင်နေပြီ။ ၎င်း၏ စွမ်းအားက ကမ္ဘာကို ဖျက်ဆီးနိုင်လောက်အောင် ကြောက်မက်ဖွယ်ကောင်းသည်။

ထို့ပြင်၊ ၎င်းက သိမ်းယူပယ်ဖျက်ခြင်း နိယာမ၏ နတ်ဘုရားစွမ်းရည်ဖြစ်သောကြောင့် ၎င်း၏စွမ်းအားမှာ သာမန်နိယာမများထက် များစွာ ကျော်လွန်သည်။

လော့စန်းချုံးက သူ၏ နတ်ဘုရားစွမ်းရည်ကို ယုံကြည်မှုအပြည့်ရှိပေသည်။ သူ့အသက်အရွယ်တွင်၊ နတ်ဘုရားစွမ်းရည်ကို ကိုးဆယ်ရာခိုင်နှုန်းအထိ ကျွမ်းကျင်အောင် လေ့ကျင့်နိုင်သူက အလွန်နည်းပါးသည်။

လုမင်၏ ကစဉ့်ကလျားနိယာမက သန်မာလျှင်ပင် ဘာဖြစ်သေးသနည်း။ လော့စန်းချုံး၏ နတ်ဘုရားစွမ်းရည်က သူ့ထက် အဆများစွာ သန်မာပြီး ဖိနှိပ်နိုင်နေဆဲ ဖြစ်သည်။

"ကြောက်စရာကောင်းလိုက်တဲ့ နတ်ဘုရားစွမ်းရည်၊ လော့စန်းချုံးရဲ့ နတ်ဘုရားစွမ်းရည် ကျွမ်းကျင်မှုက ကိုးဆယ်ရာခိုင်နှုန်းအထိ ရောက်နေပြီထင်တယ်"

"ဒီလောက်ငယ်ငယ်နဲ့ နတ်ဘုရားစွမ်းရည်ကို ကိုးဆယ်ရာခိုင်နှုန်းအထိ လေ့ကျင့်နိုင်တာက တကယ်တော်တာပဲ။ သူတော်စင်ဘုရင်စာရင်းက သူ့ရဲ့ အဆင့်သတ်မှတ်ချက်က မထိုက်တန်ဘူး"

လော့စန်းချုံး၏ နတ်ဘုရားစွမ်းရည် အင်အားက ပါရမီရှင်များစွာကို ထိတ်လန့်စေခဲ့သည်။ ပြင်းထန်သော ဖိအားကြောင့် လူများမှာ ပို၍ လေးနက်လာတော့သည်။

"ကစဉ့်ကလျား ကပ်ဘေးလက်ချောင်း"

လုမင်က အပြောင်းအလဲမရှိသော အမူအရာဖြင့် လက်ညှိုးတစ်ချက်ညွှန်လိုက်သည်။

ကြီးမားသော လက်ချောင်းတစ်ချောင်းက သိမ်းယူပယ်ဖျက်ခြင်း နတ်ဘုရား‌တံဆိပ်တော်ထံသို့ ပစ်လိုက်၏။

"ဝုန်း"

ကစဉ့်ကလျား ကပ်ဘေးလက်ချောင်းနှင့် သိမ်းယူပယ်ဖျက်ခြင်း နတ်ဘုရား‌တံဆိပ်တော်က လေထဲတွင် တိုက်မိပြီးနောက် ပြင်းထန်သော ပေါက်ကွဲအားတို့ ထွက်ပေါ်လာတော့သည်။

"ဝုန်း"

ကြောက်မက်ဖွယ်ကောင်းသော တိုက်ခိုက်မှု စွမ်းအင်လှိုင်းများက အရပ်ရပ်သို့ ဖြာထွက်သွားသည်။ အားနည်းသော ပါရမီရှင်အချို့က ကောင်းစွာမရပ်တည်နိုင်ဘဲ ဆုတ်သွားရ၏။

သိမ်းယူပယ်ဖျက်ခြင်း နတ်ဘုရား‌တံဆိပ်တော်နှင့် ကစဉ့်ကလျား ကပ်ဘေးလက်ချောင်းတို့က ရှေ့မတိုး၊ နောက်မဆုတ် တွန်းတိုက်နေကြသည်။

"သိမ်းယူပယ်ဖျက်ခြင်း"

လော့စန်းချုံးက သူ့ခန္ဓာကိုယ်တွင်းရှိ စွမ်းအားအားလုံးကို လှုံ့ဆော်ရင်း ဟိန်းဟောက်လိုက်၏။ သူက သိမ်းယူပယ်ဖျက်ခြင်း နတ်ဘုရား‌တံဆိပ်တော်ကို ရူးသွပ်စွာ ထောက်ပံ့လိုက်သည်။

"လော့စန်းချုံး၊ မင်းရဲ့ခွန်အားက ဒါအကုန်ပဲလား။ ကြည့်ရတာ ဘာမှလည်း မဟုတ်ပါလား"

လုမင်က လှောင်ပြောင်လိုက်သည်။ သူက ကစဉ့်ကလျားနိယာမကို အသက်သွင်းကာ သူတော်စင်စွမ်းအင်နှင့် ပေါင်းစပ်ပြီး ကစဉ့်ကလျား ကပ်ဘေးလက်ချောင်းသို့ ပို့လွှတ်လိုက်၏။

ကစဉ့်ကလျား ကပ်ဘေးလက်ချောင်းက တုန်ခါလာပြီး ၎င်း၏စွမ်းအားက ပို၍ပင် အားကောင်းလာသည်။ ကြောက်မက်ဖွယ်ကောင်းသော စွမ်းအားကြောင့် သိမ်းယူပယ်ဖျက်ခြင်း နတ်ဘုရား‌တံဆိပ်တော်မှာ ပြင်းထန်စွာ တုန်ခါလာတော့သည်။

လော့စန်းချုံးက မျက်နှာပျက်သွားသည်။ သိမ်းယူပယ်ဖျက်ခြင်း နတ်ဘုရား‌တံဆိပ်တော်က ပြိုကျတော့မည်ဟု သူခံစားမိနေပြီ။

ဒါက အဘယ်သို့ ဖြစ်နိုင်မည်နည်း။

သူ၏ နတ်ဘုရားစွမ်းရည်က သိမ်းယူပယ်ဖျက်ခြင်း နိယာမမှ ဖွဲ့စည်းထားခြင်းဖြစ်ပြီး ကိုးဆယ်ရာခိုင်နှုန်းအထိ အောင်‌မြင်ထားပြီးပြီ ဖြစ်သည်။ လုမင်၏ နတ်ဘုရားစွမ်းရည်က မည်ကဲ့သို့ သူ့ထက် ပိုအားကောင်းမည်နည်း။

လုမင်က ကစဉ့်ကလျားနိယာမကို လေ့ကျင့်ထားသော်လည်း အန္တိမသူတော်စင်နယ်ပယ်ကို ချိုးဖြတ်ရုံမျှသာ ဖြစ်သည်။ လုမင်၏ နတ်ဘုရားစွမ်းရည်က သူ့ကို မည်ကဲ့သို့ နှိုင်းယှဉ်နိုင်မည်နည်း။

သူတစ်ယောက်တည်းမဟုတ်ဘဲ ပတ်ဝန်းကျင်မှ လူများမှာလည်း ယုံရခက်ခက် ဖြစ်ကြသည်။

လော့စန်းချုံး၏ နတ်ဘုရားစွမ်းရည်က အားကောင်းသော်လည်း နတ်ဘုရားစွမ်းရည်ခြင်း ထိပ်တိုက်ရင်ဆိုင်ရာတွင် အားနည်းချက် ရှိသေးသည်။

လုမင်၏ ခွန်အားက လူတိုင်း၏ စိတ်ကူးထက် ကျော်လွန်နေပြီ ဖြစ်သည်။

"လော့စန်းချုံး၊ ငါ တကယ်ကို နားမလည်နိုင်ဘူး။ ဒီလိုအင်အားနဲ့ ဘာဖြစ်လို့ ဟိတ်ကြီးဟန်ကြီး ပြုမူနေရသေးတာလဲ။ မင်းရဲ့ယုံကြည်မှုက ဘယ်ကလာတာလဲ"

လုမင်က ဆက်ပြောလိုက်သည်။ ကစဉ့်ကလျား ကပ်ဘေးလက်ချောင်း၏ စွမ်းအားက အပြည့်အဝ ထွက်ပေါ်လာ၏။

"ဝုန်း"

သိမ်းယူပယ်ဖျက်ခြင်း နတ်ဘုရား‌တံဆိပ်တော်က အက်ကွဲလာပြီး နောက်ဆုံးတွင် အသံကျယ်တစ်ချက်နှင့်အတူ ပေါက်ကွဲသွားသည်။ လော့စန်းချုံးလည်း ညည်းညူရင်း သွေးများ အန်ထွက်လာကာ ဒယီးဒယိုင်ဖြင့် ဆုတ်သွားရတော့သည်။

လော့စန်းချုံး၏ နတ်ဘုရားစွမ်းရည်က ကိုးဆယ်ရာခိုင်နှုန်းအထိ ပြီးမြောက်ခဲ့သလို လုမင်၏ ကစဉ့်ကလျား ကပ်ဘေးလက်ချောင်းကလည်း ကိုးဆယ်ရာခိုင်နှုန်းအထိ ပေါက်မြောက်နေပြီ ဖြစ်သည်။

နတ်ဘုရားစွမ်းရည် ပေါက်မြောက်မှုက အဆင့်ချင်းတူလျှင် ဘုရင်နိယာမက အသန်မာဆုံး နိယာမများကို မယှဉ်နိုင်ပါ။

လူများစွာတို့ တုန်လှုပ်သွားကြသည်။

လော့စန်းချုံးက ဒဏ်ရာရရှိသွားပြီး လုမင်ကို မယှဉ်နိုင်ပေ။

လုမင်က လေထဲသို့ တစ်ချက်လှမ်းပြီး လော့စန်းချုံးထံသို့ လျှောက်သွားသည်။ သူ့အသံက ကျယ်လောင်စွာ ထွက်ပေါ်လာ၏။

"မင်းက ငါ့ရဲ့ ကျင့်ကြံမှုကို ဖျက်ဆီးချင်တယ်ဆို၊ လာပါ... ဒါပေမဲ့ ဒီမဖြစ်စလောက် အင်အားနဲ့တော့ မရဘူး"

ထိုသို့ ပြောဆိုပြီးနောက် လုမင်က လက်ညှိုးဖြင့် ထပ်မံညွှန်ပြလိုက်သည်။

ကစဉ့်ကလျား ကပ်ဘေးလက်ချောင်းက လော့စန်းချုံးထံသို့ ကျရောက်လာတော့သည်။

လော့စန်းချုံး မျက်နှာပျက်သွားသည်။ သူက ဟိန်းဟောက်ပြီး သိမ်းယူပယ်ဖျက်ခြင်း နတ်ဘုရား‌တံဆိပ်တော်ကို ထပ်မံအသုံးပြုလိုက်၏။ သို့သော်လည်း သူ့ဒဏ်ရာကြောင့် လုမင်၏ တိုက်ခိုက်မှုကို ခုခံနိုင်ရန် ပိုခက်ခဲလာသည်။ တခဏချင်းမှာပင်၊ သိမ်းယူပယ်ဖျက်ခြင်း နတ်ဘုရား‌တံဆိပ်တော်က ပျက်စီးသွားခဲ့သည်။ လော့စန်းချုံးက နာကျင်စွာ အော်ဟစ်ရင်း မီတာတစ်သောင်းကျော်အထိ လွင့်စဉ်သွားတော့သည်။ သူ့ပါးစပ်ထဲမှ သွေးများက တပွက်ပွက် အန်ထွက်လာခဲ့သည်။

သူ့ဒဏ်ရာများကလည်း ပို၍ ဆိုးရွားလာတော့သည်။

မနီးမဝေးတွင်၊ လော့ဖိုခုန်းနှင့် တာ့လော့ကောင်းကင်ဂိုဏ်း၏ အခြား ပါရမီရှင်များက မျက်စိမျက်နှာပျက်ကုန်သည်။

လော့စန်းချုံးက လုမင်ကို မယှဉ်နိုင်ပါ။ သူတို့က ကူညီချင်သော်လည်း လုမင်မှ ရိုက်နှက်ခံရမည်ကို ကြောက်ရွံ့သဖြင့် ရှေ့မတိုးဝံ့‌ကြချေ။

လုမင်က ထိုမျှနှင့်မရပ်ပါ။ သူက လေထဲသို့ ခြေလှမ်းရင်း လော့စန်းချုံးထံသို့ လျှောက်သွားသည်။

"လုမင်၊ အနှေးနဲ့အမြန် မင်းကို အလောင်းချစရာ နေရာမရှိအောင် သေစေမယ်လို့ ငါကျိန်ဆိုတယ်"

လော့စန်းချုံးက ဟိန်းဟောက်လိုက်သည်။ သူ့မျက်လုံးများမှာတော့ ရူးသွပ်သော သတ်ဖြတ်လိုစိတ်တို့ ပြည့်နေ၏။

"ဒါက မင်းရဲ့ ကိုယ်ပိုင်အင်အားနဲ့လား ဒါမှမဟုတ် ‌မင်းရဲ့နောက်ခံကို အားကိုးပြီးတော့လား။ ဪ... မေ့တော့မလို့၊ မင်းက နောက်ကွယ်က အင်အားစုကိုပဲ အားကိုးတတ်တဲ့ အမှိုက်တစ်စပဲ"

လုမင်က အထင်မြင်သေးမှုအပြည့်ဖြင့် လှောင်ပြောင်လိုက်သည်။

တစ်နည်းဆိုရသော်၊ လော့စန်းချုံးက သူ့ကိုယ်ပိုင် ခွန်အားနှင့် လုမင်ကို လုံးဝ မယှဉ်နိုင်ပါ။ သူ့နောက်ကွယ်မှ အင်အားစုကို အားကိုးရမည်သာ ဖြစ်သည်။

"နောက်ပြီးတော့ မင်း တစ်ခုမေ့နေတာက အခု ဒီနေရာမှာ မင်းရဲ့ နောက်ခံအင်အားတွေ မရှိဘူး၊ ငါက အကြွင်းမဲ့ အားသာချက်ရှိတယ်။ အခုချိန်မျိုးမှာ မင်း ငါ့ကို မခြိမ်းခြောက်သင့်ဘူး"

လုမင်က အေးစက်စွာ ပြောလိုက်၏။ သူက သတ်ဖြတ်ချင်စိတ်တို့ကို ဖုံးကွယ်မထားဘဲ လျှပ်စီးလက်သကဲ့သို့ ခြေလှမ်းကာ လော့စန်းချုံးထံ ပြေး‌သွားတော့သည်။

"သတ်"

လုမင်က နတ်ဘုရားဓားကျင့်စဉ်ဖြင့် အော်လိုက်သည်။ မမြင်နိုင်သော ဓားနှစ်လက်က သူ့မျက်လုံးများမှ ထွက်ပေါ်လာပြီး လော့စန်းချုံးဆီသို့ ပြေးထွက်သွား၏။ တစ်ချိန်တည်းမှာပင် သူ၏ ညာဘက်လက်က လက်ညှိုးညွှန်ပြလိုက်သည်။

ကြောက်မက်ဖွယ်သော လက်ချောင်းကြီး တစ်ချောင်းက လော့စန်းချုံးဆီသို့ တိုးဝင်လာတော့သည်။

"လုမင်က လော့စန်းချုံးကို သတ်ချင်နေတာလား"

"သတ္တိကောင်းလှချေလား၊ သူက အထိန်းအကွပ်မဲ့နေပြီ"

လူတော်တော်များများ အံ့အားသင့်သွားကြသည်။

ယွမ်တောင် မြင့်မြတ်သောကျောင်းတော်တွင် သတ်ဖြတ်ခြင်းကို ခွင့်မပြုပါ။ ဤသည်မှာ မဟာဧကရာဇ်ကြီးများ ချမှတ်ထားသော စည်းမျဉ်း ဖြစ်သည်။ ယခုမူ လုမင်က သူ၏ သတ်ဖြတ်ချင်စိတ်ကို ဖုံးကွယ်ထားခြင်း မရှိပေ။ သူ့မျက်လုံးများက အေးစက်နေပြီး သနားညှာတာမှု အရိပ်အယောင် လုံးဝ မပြပါ။ သူက လော့စန်းချုံးကို သတ်ပစ်တော့မည်မှာ သေချာသည်။

လော့စန်းချုံးက အထိန်းအကွပ်မဲ့ပြီး ရမ်းကားသူဟု လူသိများသော်လည်း မဟာဧကရာဇ်ကြီး၏ အမိန့်ကို မလွန်ဆန်ဝံ့ပေ။ သို့ရာတွင်၊ လုမင်က ယွမ်တောင် မြင့်မြတ်သောကျောင်းတော်တွင်းမှာ လော့စန်းချုံးကို သတ်ပစ်ချင်ခဲ့သည်။

ဒါက အမှန်တကယ် အထိန်းအကွပ်မဲ့ခြင်းပင်။

"မင်းလုပ်ရဲလား"

လော့စန်းချုံးက အော်ဟစ်လိုက်သည်။ လုမင်က သူ့ကို ဤနေရာတွင် သတ်ဝံ့မည်ဟု သူ မမျှော်လင့်ထားပေ။

သူက ပြန်ခုခံလိုက်သော်လည်း နောက်တစ်ကြိမ်ဆိုလျှင် ရှင်သန်နိုင်မည် မဟုတ်တော့ပါ။ သူ့ခန္ဓာကိုယ် တစ်ဝက်လောက်က ကွဲအက်လုနီးပါး ဖြစ်နေပြီ ဖြစ်သည်။ သူ့အငွေ့အသက်များက အားနည်းနေပြီး ဒဏ်ရာများကလည်း အလွန်ပြင်းထန်ပေသည်။

"ဟား"

လုမင်က အေးစက်စွာ မာန်သွင်းပြီး ကစဉ့်ကလျား ကပ်ဘေးလက်ချောင်းကို ထပ်မံအသုံးပြုလိုက်သည်။

"မင်း..."

လော့စန်းချုံး၏ မျက်လုံးများက နောက်ဆုံးတွင် ကြောက်ရွံ့မှုကို ပြသလာခဲ့သည်။

လုမင်က ရူးသွပ်နေပြီ။ သူ့ကို အမှန်တကယ် သတ်ချင်နေသည်။ မဟာဧကရာဇ်ကြီး၏ အပြစ်ပေးခံရမှာကို သူ မကြောက်တော့ဘူးလား။

သူက သွေးရူးသွေးတန်းဖြင့် ဆုတ်ခွာသွားသော်လည်း လုမင်၏ လက်မှ မလွတ်မြောက်နိုင်ပေ။ ကစဉ့်ကလျား ကပ်ဘေးလက်ချောင်း၏ ကြောက်မက်ဖွယ်ကောင်းသော ဖိအားက သူ့ကို အခိုင်အမာ ဖုံးအုပ်ထားသည်။

"မလုပ်နဲ့၊ ကယ်ကြပါဦး"

လော့စန်းချုံးက သွေးပျက်ချောက်ချားစွာ အော်ဟစ်လိုက်သည်။ ယခင်က မောက်မာခဲ့သော အသွင်အပြင်နှင့်လုံးဝ မတူတော့ပေ။

"ဝုန်း"

ဤအခိုက်အတန့်တွင်၊ လက်ဖဝါးပုံရိပ်တစ်ခုက ကောင်းကင်မှ ဆင်းသက်ကာ လုမင်၏ ကစဉ့်ကလျား ကပ်ဘေးလက်ချောင်းဆီသို့ အံ့မခန်းအရှိန်ဖြင့် ကျရောက်သွားသည်။

ကျယ်လောင်သော ပေါက်ကွဲသံနှင့်အတူ ကစဉ့်ကလျား ကပ်ဘေးလက်ချောင်းက ပေါက်ကွဲသွား၏။ ထိုမျှသာမကဘဲ လက်ဖဝါးပုံရိပ်၏ လက်ကျန်စွမ်းအားက လုမင်ဆီသို့ ဆက်လက်ပေါက်ကွဲသွားခဲ့သည်။

လုမင်၏ အမူအရာက ပြောင်းလဲသွားခဲ့သည်။ သူက အတားအဆီးမဲ့သော ကောင်းကင်သိုင်းဖြင့် ပြန်လည်ထိုးနှက်လိုက်တော့သည်။