အခန်း ၁၉၀၆

အပိုင်း ( 1906 ) ဘုရင်ခန္ဓာ ခြောက်ပါးနှင့် ကောင်းကင်သားတော် တစ်ပါး။

"မကောင်းတောဘူး"

လုမင် မျက်နှာပျက်သွားသည်။

ချင်ယွဲ့နှင့် ဟွမ်လင်တို့က အလျင်စလို ထွက်လာမည်ဟု သူ မမျှော်လင့်ထားပေ။

ချင်ယွဲ့နှင့် ဟွမ်လင်တို့၏ တိုက်ခိုက်ရေးအင်အားဖြင့် သူတို့တွင် ဧကရာဇ်လက်နက်များ ရှိနေလျှင်ပင် ဟန်ရှင်းဟဲကို မယှဉ်နိုင်ပါ။

မျှော်လင့်ထားသည့်အတိုင်း ဧရာမခြေဖဝါးကြီး ဆင်းသက်လာသောအခါ ချင်ယွဲ့နှင့် ဟွမ်လင်တို့၏ ခန္ဓာကိုယ်များ တုန်လှုပ်သွားသည်။ သူတို့က နာကျင်စွာ ညည်းညူရင်း လုမင်အနားသို့ ပြန်လွင့်သွားကြ၏။ သူတို့မျက်နှာများက ဖြူဖျော့ပြီး နှုတ်ခမ်းထောင့်မှ သွေးများပင် စီးကျနေတော့သည်။

"ချင်ယွဲ့... ဟွမ်လင်၊ မင်းတို့ အဆင်ပြေရဲ့လား"

လုမင်က စိုးရိမ်တကြီး မေးလိုက်သည်။

"ကျွန်မ အဆင်ပြေပါတယ် သခင်လေး၊ ရှင်နဲ့အတူ တိုက်ခိုက်ချင်ပါတယ်"

ချင်ယွဲ့က သူမ၏ နှုတ်ခမ်းထောင့်မှ သွေးများကိုသုတ်လိုက်သည်။ သူက ခိုင်မာပြတ်သားသော အကြည့်တို့ဖြင့် လုမင်၏အနားတွင် ရပ်လိုက်၏။

တစ်ဖက်မှာတော့ ဟွမ်လင်က စကားမပြောပေ။ သို့ရာတွင်၊ သူ့ခန္ဓာကိုယ်ပေါ်ရှိ အင်မော်တယ်မီးလျှံက ပို၍ပြင်းထန်စွာ လောင်ကျွမ်းလာခဲ့သည်။

"ဟားဟားဟား၊ မိန်းမ နှစ်ယောက်က ငါ့ကို ဘယ်လိုတားနိုင်မှာလဲ"

ဟန်ရှင်းဟဲက လှောင်ရယ်ပြီး ရှေ့ကို ဆက်လျှောက်လာခဲ့သည်။ သူ့အငွေ့အသက်များက ပိုကြောက်စရာကောင်းလာတော့သည်။

"ဟေ့ လေထန်ကုန်း၊ ငါ့ကိုပါ ထည့်တွက်လိုက်ရင်ကော"

ဟွမ်လင်၏ အနားတွင် ထွားကျိုင်းသော လူရိပ်တစ်ခု ပေါ်လာသည်။ ဒါက ဟွမ်လီ။

ခွန်အားနိယာမကို ဖြန့်ကျက်ရင်း သူ၏ကြွက်သားများက ဖုထစ်လာသည်။ သူ့လက်နှစ်ဖက်မှာတော့ အနက်ရောင် လက်အိတ်တစ်စုံကို ၀တ်ထား၏။ ထိုလက်အိတ်များက ဧကရာဇ်လက်နက်များ ဖြစ်သည်။

"ဝှစ်"

လေတိုးသံနှင့်အတူ လုံချန်က ချင်ယွဲ့၏ဘေးတွင် ပေါ်လာခဲ့သည်။ သူ့လက်များက ပို၍ တုပ်ခိုင်လာပြီး သူ့အငွေ့အသက်များကလည်း ကြောက်စရာကောင်းလာ၏။

ချင်ယွဲ့၊ ဟွမ်လင်၊ လုံချန်၊ ဟွမ်လီနှင့် လုမင်... ဘုရင်ခန္ဓာလေးပါးနှင့် ကောင်းကင်သားတော် တစ်ပါးတို့က ပခုံးချင်းယှဉ် ရပ်နေပြီ။ သူတို့အားလုံးက အန္တိမသူတော်စင်နယ်ပယ် ကျင့်ကြံမှုရှိကြသည်။ သူတို့၏ အရှိန်အဝါများက ပေါင်းစည်းပြီး ဟန်ရှင်းဟဲ၏ အရှိန်အဝါကို တွန်းလှန်လိုက်ကြပေသည်။

"ငါတို့ကို ထည့်တွက်လိုက်ဦး"

ဟွမ်မျိုးနွယ်မှ အခြား ပါရမီရှင်များအပြင် မုချင်ရွယ်နှင့် အခြားသူများကလည်း ရှေ့သို့ တိုးလာရန် ဟန်ပြင်ကြသည်။

"ရပ်လိုက်ကြ"

လုမင်က သူ့လက်ကို ဝှေ့ယမ်းလိုက်ပြီး ဟွမ်လီနှင့် အခြားလူများကို ဟန့်တားလိုက်သည်။

ဟန်ရှင်းဟဲကဲ့သို့ ပြိုင်ဘက်နှင့် ရင်ဆိုင်ရပါက အရေအတွက်များခြင်းသည် အရေးမပါတော့ပေ။ သူတို့က လုံလောက်အောင် မသန်မာလျှင် လူဘယ်လောက်များများ အသုံးမဝင်ပါ။

"မင်းတို့က လူအင်အားနဲ့ အနိုင်ကျင့်ဖို့ ကြိုးစားနေတာလား။ ငါတို့မှာ ဘယ်သူမှမရှိဘူးလို့ မင်းတို့ တကယ်ထင်နေတာလား"

ဟန်မိသားစုမှ အခြား ပါရမီရှင်တစ်ယောက်က ငေါက်ငမ်းရင်း ရှေ့သို့ လှမ်းလာသည်။ ဟန်မိသားစုမှ အခြားသော ပါရမီရှင်များကလည်း ရှေ့သို့ တိုးလာကြ၏။

"နောက်ဆုတ်လိုက်ပါ။ မင်းတို့ ဝင်စွက်ဖက်စရာ မလိုဘူး"

ဟန်ရှင်းဟဲက သူ့လက်ကို ဝှေ့ယမ်းပြီး ဟန်မိသားစု၏ အခြားပါရမီရှင်များကို ပြောလိုက်သည်။

သူသည် အလွန်မာနကြီး၏။ သူ၏ ကျင့်ကြံမှုဖြင့် လုမင်နှင့် အခြားသူများကို ကိုင်တွယ်ရန် အခြားသူများ၏ အကူအညီကို အဘယ်ကြောင့် လိုအပ်မည်နည်း။

သူက လုမင်နှင့် အခြားသူများကို အထက်စီးမှကြည့်ကာ ပြောလိုက်သည်။

"မင်းတို့ငါးယောက်နဲ့ ငါ့ကို ယှဉ်နိုင်မယ်လို့ ထင်နေတာလား။ မိုက်မဲလိုက်တာ"

သူတို့ပတ်ဝန်းကျင်မှာတော့ အခြားသူများက သက်ပြင်းချလိုက်ကြလေသည်။

လုမင်ဘက်မှ အနေအထားက အလွန်အထင်ကြီးဖွယ်ကောင်းသည်။

ဘုရင်ခန္ဓာလေးနှင့် ကောင်းကင်သားတော် တစ်ပါးဖြစ်ပြီး အားလုံးက အန္တိမသူတော်စင်နယ်ပယ်သို့ ရောက်နေပြီ။

သို့သော်လည်း သူတို့က ထာဝရ၏သားတော် ဟန်ရှင်းဟဲကို ရင်ဆိုင်ခဲ့ကြရသည်။ ဟန်ရှင်းဟဲက သူတော်စင်ဘုရင်စာရင်းတွင် အငြင်းပွားဖွယ်မရှိသော နံပါတ်တစ်ပင်။

ယွမ်တောင်၏ မျိုးဆက်သစ်လူငယ်များတွင် အသန်မာဆုံးသူအဖြစ် အားလုံးက အသိအမှတ်ပြုခံရသူ ဖြစ်သည်။

သေမင်း၏သားတော် မရဏဓားပင်လျှင် ဟန်ရှင်းဟဲ၏ အနေအထားကို မကိုင်လှုပ်နိုင်ပေ။

လုမင်တို့ ငါးယောက်အဖွဲ့က အရှိန်အဝါကြီးသော်လည်း သူတို့၏ ကျင့်ကြံမှုအခြေခံမှာ အနည်းငယ်အားနည်းနေသေးသည်။ သူတို့က ဟန်ရှင်းဟဲကို တကယ် ရင်ဆိုင်နိုင်ပါ့မလား။

"ဒီအထဲမှာ ငါ့ကို ထည့်တွက်လိုက်ရင် ဘယ်လိုဖြစ်မလဲ"

ထိုအချိန်တွင် တည်ငြိမ်သော အသံတစ်ခု ထွက်ပေါ်လာသည်။ အရပ်ရှည်ရှည် ပိန်ပိန်ပါးပါး လူငယ်တစ်ယောက်က လူအုပ်ထဲမှ ထွက်လာ၏။

"ဒါက အိုးရန်ဝူရွှမ့်ပဲ"

တစ်ယောက်ယောက်က ထိုလူငယ်ကို အသိအမှတ်ပြုသည်။

အိုးရန်ဝူရွှမ့်က အားကောင်းသော အရှိန်အဝါများကို ထုတ်ဖော်ရင်း လုမင်အနားသို့ လျှောက်လာ၏။

အန္တိမသူတော်စင်။

အိုးရန်ဝူရွှမ့်ကလည်း အန္တိမသူတော်စင်နယ်ပယ်သို့ ဖြတ်ကျော်သွားခဲ့ပြီ ဖြစ်သည်။

"ဒါဆိုရင် ဒီမိန်းကလေးကိုလည်း ထည့်တွက်လိုက်ပါ"

ထိုအချိန်တွင် နောက်ထပ် အသံတစ်ခု ထွက်ပေါ်လာသည်။

ချောမောလှပသော ပုံရိပ်တစ်ခုက လေထဲမှ လျှောက်လှမ်းရင်း လုမင်တို့အနီးသို့ ရောက်ရှိလာ၏။

လော့ထျန်းယီ။

"အိုးရန်ဝူရွှမ့်နဲ့ လော့ထျန်းယီတို့က လုမင်ကို တကယ်ကူညီနေကြတယ်။ သူတို့အားလုံးက လုမင်နဲ့ ရင်းနှီးမှုရှိကြတာလား"

"ဘုရင်ခြောက်ပါးနဲ့ ကောင်းကင်သားတော် တစ်ပါး၊ ဒီအရှိန်အဝါက တကယ်ကို အံ့ဩစရာကောင်းတယ်"

လူအများက တုန်ယင်မောဟိုက်စွာ ရေရွတ်လိုက်ကြသည်။

လော့ထျန်းယီနှင့် အိုးရန်ဝူရွှမ့်တို့ကလည်း လုမင်နှင့် ရင်းနှီးကြ၏။ ယခုအခါ သူတို့က လုမင်တို့နှင့်အတူ ဟန်ရှင်းဟဲကို တိုက်ခိုက်ကြတော့မည်။

"ကောင်းတယ်... သိပ်ကောင်းတယ်၊ ဒီလိုဆိုမှတော့ မင်းတို့ ဘယ်လောက်သန်မာလဲဆိုတာ ကြည့်ရအောင်"

ဟန်ရှင်းဟဲ၏ မျက်လုံးများက တိုက်ခိုက်လိုစိတ်တို့ ပြည့်နှက်နေသည်။ သူက ရုတ်တရက် ရှေ့ကို ခြေတစ်လှမ်းတိုးလိုက်သည်နှင့် သူ့ခြေထောက်အောက်ရှိ လေဟာနယ်က တုန်ခါသွားသည်။

"ကောင်းကင် ပုံရိပ်ယောင်"

လော့ထျန်းယီက ရေရွတ်လိုက်၏။ သူမ၏ မျက်လုံးများက အနက်ရောင် ရေဝဲကြီးနှစ်ခုကဲ့သို့ မည်းနက်သွားတော့သည်။

သူက ကောင်းကင်ပုံရိပ်ယောင်ကျင့်စဉ်ဖြင့် ဟန်ရှင်းဟဲကို ဖုံးအုပ်ပြီး ပုံရိပ်ယောင်များထဲသို့ ဆွဲသွင်းရန် ကြိုးစားလိုက်ခြင်း ဖြစ်သည်။

ထိုအချိန်တွင် လော့ထျန်းယီ၏ စစ်မှန်သော ကျင့်ကြံမှုအခြေခံက ပေါ်လာခဲ့သည်။ သူက အန္တိမသူတော်စင်နယ်ပယ် ကျင့်ကြံမှုရှိပြီး အန္တိမသူတော်စင်နယ်ပယ်၏ အထွတ်အထိပ်နှင့်ပင် မဝေးတော့ပေ။

မျှော်လင့်ထားသည့်အတိုင်း၊ ဟန်ရှင်းဟဲ၏ ခန္ဓာကိုယ်က အနည်းငယ်တုန်ခါကာ ရပ်သွားခဲ့သည်။

လော့ထျန်းယီက တိုက်ခိုက်သည့်အခိုက်တွင် လုမင်၊ ချင်ယွဲ့၊ ဟွမ်လင်၊ ဟွမ်လီ၊ လုံချန်နှင့် အိုးရန်ဝူရွှမ့်တို့ကလည်း တပြိုင်နက်တည်း တိုက်ခိုက်ခဲ့၏။

ကြောက်မက်ဖွယ်ကောင်းသော နတ်ဘုရားစွမ်းရည်ခြောက်ခုက တစ်ချိန်တည်းတွင် ပေါက်ကွဲပြီး ဟန်ရှင်းဟဲဆီသို့ ကျရောက်သွားတော့သည်။

သူတို့ခြောက်ယောက်က ပူးပေါင်းတိုက်ခိုက်သောအခါ ဖြစ်ပေါ်လာသော လှိုင်းလုံးများက မိုးနှင့်မြေကို ပြိုကျစေပြီး ကြောက်စရာကောင်းလှသည်။

"ပုံရိပ်ယောင်တစ်ခုက ငါ့ကို တားဆီးလို့မရဘူး၊ ချိုးဖျက်စမ်း"

ဟန်ရှင်းဟဲ၏ လျစ်လျူရှုထားသောအသံ ထွက်ပေါ်လာသည်။ သူ့မျက်လုံးများက ကြယ်များကဲ့သို့ တောက်ပနေ၏။ ကြောက်မက်ဖွယ်ကောင်းသော ဓားအလင်းနှစ်ခုက သူ့မျက်လုံးများမှ ထွက်လာပြီး လေဟာနယ်ကို ဖြတ်သွားသည်။

လော့ထျန်းယီက နာကျင်စွာ အော်ဟစ်လိုက်သည်။ သူ့ခန္ဓာကိုယ် တုန်လှုပ်သွားပြီး နောက်ပြန်ဆုတ်သွားခဲ့ရ၏။ သူ့မျက်နှာက ဖြူဖျော့ပြီး သွေးများ အန်ထွက်လာတော့သည်။

ဟန်ရှင်းဟဲက သူမ၏ ပုံရိပ်ယောင်ကို အတင်းအကြပ် ဖျက်ဆီးပစ်ခဲ့သည်။ ထိုအတွက် တန်ပြန်အားက သူ့ကို ဒဏ်ရာရစေခဲ့ပေသည်။

တစ်ချိန်တည်းမှာပင်၊ ဟန်ရှင်းဟဲ၏လက်မှ ဓားအလင်းတစ်ခုပေါ်လာပြီး ခုတ်ချလိုက်သည်။

"ဝမ်"

ဓားအလင်းက အင်မော်တယ်တစ်ပါး ပျံသန်းနေသကဲ့သို့ပင်။ ၎င်းက လေဟာနယ်ကိုဖြတ်၍ ထာဝရအဖြစ်သို့ ပြောင်းလဲသွားပုံရပြီး တုနှိုင်းမဲ့ဖြစ်ခဲ့သည်။

"ဝုန်း... ဝုန်း... ဝုန်း"

ဓားအလင်းက ဖြတ်သွားသည်နှင့်အမျှ လုမင်နှင့် အခြားသူ၏ တိုက်ခိုက်မှုအားလုံး လေထဲတွင် ပြိုကျသွားသည်။

"မကောင်းဘူး၊ နောက်ဆုတ်ကြ"

လုမင်က အော်လိုက်သည်။ သူတို့ခြောက်ယောက်က ဓားအလင်းကို ရှောင်ရှားရန် အမြန်ပြန်ဆုတ်သွားကြ၏။

"အရမ်းသန်မာတယ်"

လုမင်၏ မျက်လုံးများက‌ အေးစက်တင်းမာနေသည်။

ဟန်ရှင်းဟဲ၏ တိုက်ခိုက်ရေးစွမ်းအားက အမှန်တကယ် ကြောက်မက်ဖွယ်ကောင်းပြီး တုနှိုင်းမမီပေ။

အဓိက အကြောင်းအရင်းကတော့ သူတို့၏ ကျင့်ကြံမှုအခြေခံမှာ ဟန်ရှင်းဟဲထက် နိမ့်ကျနေသောကြောင့် ဖြစ်သည်။

"လူအင်အား ပိုများလာတော့ ဘာဖြစ်သလဲ"

ဟန်ရှင်းဟဲက လက်သီးဆုပ်လိုက်သည်။ ထာဝရနိယာမက ဓားအလင်းအဖြစ် ပြောင်းလဲပြီး လုမင်နှင့် အခြားသူ၏ဆီသို့ ဖြတ်သန်းသွား၏။

လုမင်၏ မျက်ခုံးနှစ်ခုကြားမှ အလင်းရောင် တောက်ပပြီး ထိုက်ကျိအစီရင်ဓာတ်ပြားက ပေါ်လာတော့သည်။

ချင်ယွဲ့နှင့် အခြားသူများကလည်း သူတို့၏ ဧကရာဇ်လက်နက်များကို ထုတ်ယူလိုက်ကြသည်။

"ကစဉ့်ကလျား ကပ်ဘေးလက်ချောင်း"

ဤတစ်ကြိမ်တွင် လုမင်က ပထမဆုံး စတင်တိုက်ခိုက်သည်။ သူက ကစဉ့်ကလျား ကပ်ဘေးလက်ချောင်းကို အင်အားအပြည့်ဖြင့် ထုတ်ဖော်လိုက်၏။ တစ်ချိန်တည်းမှာပင် သူ့ရိပ်က လှုပ်ရှားလာပြီး ဟန်ရှင်းဟဲဆီသို့ လျင်မြန်စွာ ပြေးသွားသည်။ အဆုံးမဲ့ရွန်းများက သူ၏ ဘယ်ဘက်လက်မှ ထွက်လာပြီး ဟန်ရှင်းဟဲကို ဦးတည်သော တံဆိပ်ခတ်ခြင်းအင်အားကို ထုတ်လွှတ်လာတော့သည်။

တစ်ချိန်တည်းမှာပင်၊ ထိုက်ကျိ ယင်ယန်ကားချပ်က ထိုက်ကျိအစီရင်ဓာတ်ပြားမှ ပေါ်လာသည်။ ၎င်းက ယင်ယန်ငါး ဓားနှစ်ချောင်းအဖြစ်သို့ ပြောင်းလဲသွားပြီး ဟန်ရှင်းဟဲဆီသို့ ခုတ်ထစ်လိုက်၏။

သူက လေပြင်းမုန်တိုင်းကဲ့သို့ တိုက်ခိုက်မှုများကို ဆက်တိုက် ထုတ်ဖော်ခဲ့သည်။ သာမန် ပြီးပြည့်စုံခြင်းအဆင့် အန္တိမသူတော်စင်တစ်ပါးပင်လျှင် ဤတိုက်ခိုက်မှုလှိုင်းလုံးကြီးအောက်တွင် သေဆုံးရမည်။

လုမင်က တိုက်ခိုက်သည်နှင့် အခြားသူများကလည်း တိုက်ခိုက်လိုက်ကြသည်။

"အိပ်မက်နဲ့ လက်တွေ့"

လော့ထျန်းယီက အော်လိုက်သည်။ လိပ်ပြာလေးများက ကောင်းကင်တွင် ပေါ်လာခဲ့သည်။ လိပ်ပြာများက တောင်ပံများကိုခတ်ပြီး ဟန်ရှင်းဟဲဆီသို့ ပျံသန်းသွား၏။

ဤလိပ်ပြာများက ပုံရိပ်ယောင်များများဖြင့် ဖွဲ့စည်းထားခြင်း ဖြစ်သည်။ ၎င်းတို့က အစစ်အမှန် သို့မဟုတ် အတုအယောင် ဖြစ်နိုင်ကြပြီး အလွန်အစွမ်းထက်ပေသည်။

ချင်ယွဲ့နှင့် အခြားသူများကလည်း ဟန်ရှင်းဟဲကို အတူတကွ တိုက်ခိုက်ခဲ့ကြသည်။

"ဘယ်လောက်တောင် ကြောက်စရာကောင်းတဲ့ တိုက်ခိုက်မှုတွေလဲ"

ပတ်ဝန်းကျင်ရှိ ပါရမီရှင်များ အားလုံး ထိတ်လန့်သွားကြသည်။ ဤကဲ့သို့ လူများစွာက အတူတူတိုက်ခိုက်ခြင်းကို သူတော်စင်ဘုရင်စာရင်းရှိ ထိပ်တန်းပါရမီရှင်များပင် တားဆီးနိုင်မည်ဟု မည်သူမျှ မယုံကြည်တော့ပေ။

"ကလေးကွက်တွေ"

ဟန်ရှင်းဟဲ၏ အမူအရာကတော့ မပြောင်းလဲပါ။ သူက ဓားအလင်းဖြင့် ခုတ်ထစ်လိုက်သည်။ ဓားအလင်း ကိုးခုက လုမင်နှင့် အခြားသူများဆီသို့ ဖြတ်သန်းသွားသည်။

ဓားအလင်းသုံးစင်းက လုမင်ဆီသို့ ဖြတ်သွား၏။ ကျန်သော ဓားအလင်းများက တစ်ဦးလျှင် တစ်ခုစီ ဖြတ်သန်းသွားတော့သည်။