အခန်း ၁၉၀၈
Vol. 128 Ch. 1908
အပိုင်း ( 1908 ) အောင်နိုင်သူမရှိပါ။
သို့သော်၊ မရဏဓားက မာနကြီးသူ ဖြစ်သည်။
သူသည် သေခြင်း၏သားတော် ဖြစ်၏။ သူက လုမင်ကို အညံ့ခံပြီး လုမင်၏အမိန့်ကို နာခံရသည်ဟု ဝန်ခံမည် မဟုတ်ပေ။
မရဏဓားက မပြောလိုသောကြောင့် လုမင်ကလည်း သဘာဝအတိုင်း မပြောနေတော့ပါ။
"မရဏဓား၊ မင်းရဲ့ လက်ရှိကျင့်ကြံမှုနဲ့ ငါ့ကို တားဆီးချင်ရင် လိုသေးတယ်"
ဟန်ရှင်းဟဲက အေးစက်စွာ ပြောသည်။
မရဏဓားက အန္တိမသူတော်စင်နယ်ပယ်၏ အထွတ်အထိပ်တွင်ရှိပြီး ဟန်ရှင်းဟဲက အန္တိမသူတော်စင်နယ်ပယ်၏ ပြီးပြည့်စုံခြင်းသို့ ရောက်နေပြီ။
မရဏဓားက သူ့ကို ယှဉ်နိုင်မည် မဟုတ်ပေ။
"ငါတို့ မတိုက်ခိုက်ကြည့်ဘဲ ဘယ်လိုလုပ်သိမှာလဲ"
မရဏဓားက ပြောလိုက်သည်။ သူ့ခန္ဓာကိုယ်ပေါ်ရှိ သေခြင်းစွမ်းအင်က ပိုသိပ်သည်းလာ၏။
"မင်းက တိုက်ခိုက်ချင်ရင် မင်းရဲ့ဆန္ဒကို ငါဖြည့်ဆည်းပေးမယ်"
ဟန်ရှင်းဟဲက အေးစက်စွာ ပြောလိုက်သည်။ ထာဝ၏အလင်းက ပိုမို တောက်ပလာသည်။ အနှိုင်းမဲ့တောက်ပသော ဓားအလင်းကလည်း ပို၍ စူးရှလာ၏။ ၎င်းက ကြောက်မက်ဖွယ် စွမ်းအားတို့ဖြင့် အချိန်မရွေး ပေါက်ကွဲနိုင်သကဲ့သို့ပင်။
"ဟန်ရှင်းဟဲ၊ ငါတို့ရဲ့တိုက်ပွဲက မပြီးသေးဘူး"
လုမင်က ရှေ့ကို တိုးလာခဲ့သည်။ ထိုအချိန်တွင် လုမင်၏ အနက်ရောင်ဆံပင်များက သွေးနီရောင် ပြောင်းလာ၏။ သူ့မျက်လုံးများကလည်း သွေးများ စိမ့်ထွက်နေသကဲ့သို့ နီရဲလာတော့သည်။ အရိုးထဲထိ အေးစေသော လူသတ်ချင်စိတ်က လုမင်၏ ခန္ဓာကိုယ်မှ ဖြာထွက်နေပြီ ဖြစ်သည်။
ထိုအချိန်တွင် လုမင်က သေမင်းနတ်ဘုရားအဖြစ်သို့ ပြောင်းလဲသွားသကဲ့သို့ပင်။
ဤသည်မှာ တတိယသွေးမျိုးဆက်၏ စွမ်းအားဖြစ်သည်။
လုမင်က တတိယ သွေးမျိုးဆက်ကို မသုံးခဲ့တာကြာပြီ။ တတိယသွေးမျိုးဆက်၏ စွမ်းအားက ထူးဆန်းလွန်းသဖြင့် လုမင် အသုံးပြုခဲသည်။
သို့သော်လည်း ယနေ့မှာတော့ သူ သုံးရတော့မည်။
တတိယသွေးမျိုးဆက်၏ အကူအညီဖြင့် လုမင်၏ အရှိန်အဝါက မြင့်တက်လာခဲ့သည်။
ခြေလှမ်းအနည်းငယ် လှမ်းလိုက်ပြီးနောက် လုမင်က မရဏဓားနှင့် ပခုံးချင်းယှဉ် ရပ်လိုက်သည်။
"တိုက်ခိုက်ကြ... ဒီကောင်ကို ရိုက်ကြ၊ တွိ...တွိ"
ပေါင်ပေါင်က အော်ပြောလိုက်သည်။ သူက လျင်မြန်သွက်လက်စွာဖြင့် လုမင်၏နောက်သို့ လိုက်သွား၏။ သူမ ဖြတ်ကျော်သွားသောအခါ လေဟာနယ်က ရေလှိုင်းများကဲ့သို့ လှုပ်ရှားသွားရသည်။ သူ့ခန္ဓာကိုယ်က မတည်ရှိဘဲ အခြား ဟင်းလင်းပြင်တစ်နေရာတွင် ရှိနေသကဲ့သို့ပင်။
ထို့အပြင် ချင်ယွဲ့၊ လော့ထျန်းယီနှင့် အခြားသူများလည်း ရှေ့သို့ တိုးလာခဲ့ကြသည်။ သူတို့၏ အရှိန်အဝါများက အလွန်ကြောက်စရာကောင်း၏။
"သတ်"
မရဏဓားက ပထမဆုံး တိုက်ခိုက်မှုပြုသည်။ သူက ဟန်ရှင်းဟဲကို ဓါးဖြင့် ခုတ်ချလိုက်၏။ ဓားအလင်းများ ဖြတ်သန်းသွားတိုင်း သုသာန်တစပြင်ပမာ တိတ်ဆိတ်သွားရတော့သည်။
"ဝုန်း"
လုမင်က ဒုတိယမြောက် တိုက်ခိုက်သူဖြစ်သည်။ သူက တာ့ယန်ဆေးမီးဖိုကို ပင့်မြှောက်လိုက်သည်။ သူတော်စင်စွမ်းအင်တို့ကို သွန်းလောင်းပြီးနောက် ကြီးကျယ်ခမ်းနားသော အင်အားတို့ဖြင့် ဟန်ရှင်းဟဲဆီသို့ ရိုက်ချလိုက်၏။
ထို့နောက် ပေါင်ပေါင်၊ ချင်ယွဲ့နှင့် အခြားသူများက တစ်ချိန်တည်းတွင် တိုက်ခိုက်ခဲ့ကြသည်။
ဤတိုက်ခိုက်မှုဟာ တကယ့်ကို ထိတ်လန့်တုန်လှုပ်စရာပင်။
"ဒီနေ့ ငါ မင်းကို သန်မာသူတစ်ဦးဖြစ်ခြင်းရဲ့ အဓိပ္ပါယ်ကို ငါပြမယ်။"
ဟန်ရှင်းဟဲက ဟိန်းဟောက်ပြီး ဓားအလင်းများကို ဆက်တိုက် ထုတ်ဖော်လိုက်သည်။ ရာနှင့်ချီသော ဓားအလင်းများက လုမင်နှင့် အခြားသူများဆီသို့ ဖြတ်သန်းသွား၏။
မရဏဓားက သေခြင်း၏ဓားဖြင့် ဆက်လက်ခုတ်ထစ်ခဲ့သည်။ ဓားအလင်းများက ပိုပို၍ ပေါ်လာပြီး ဓားအလင်းအနည်းငယ်ကို ပိတ်ဆို့ခဲ့ပေသည်။
လုမင်၏ လက်ထဲမှ တာ့ယန်ဆေးမီးဖိုကလည်း တောင်ကြီးတစ်လုံးကဲ့သို့ပင်။ ဆေးမီးဖို ကျရောက်လာသည်နှင့် ထာဝရဓားအလင်းများက ပျက်သုဉ်းသွားရသည်။
ပေါင်ပေါင်၊ ချင်ယွဲ့နှင့် အခြားသူများကတော့ ကျန်သော ဓားအလင်းများကို ပိတ်ဆို့ရန် အတူတကွ လုပ်ဆောင်ခဲ့ပေသည်။
"ပေါင်ပေါင်"
ကြောက်စရာကောင်းသော တိုက်ခိုက်မှုတစ်ခု ဖြစ်ပွားခဲ့သည်။ ထိပ်တန်း ပါရမီရှင် ဆယ်ဦးက အစွမ်းကုန် တိုက်ခိုက်ခဲ့ဟ။ ထိတ်လန့်တုန်လှုပ်ဖွယ် အသံများကို နေရာတိုင်းတွင် ကြားရသည်။ ယွမ်တောင် မြင့်မြတ်သောကျောင်းတော် တစ်ခုလုံးပင် တုန်ခါသွားပုံရပေသည်။
သို့ရာတွင်၊ လုမင်က တတိယသွေးမျိုးဆက်ကို အသုံးပြုခဲ့ပြီး မရဏဓားကလည်း တိုက်ပွဲတွင် ပါဝင်လာပြီးနောက် နောက်ဆုံးတွင် ဟန်ရှင်းဟဲကို လက်ရည်ညီစွာ တိုက်ခိုက်နိုင်ခဲ့သည်။
မျက်စိတစ်မှိတ်အတွင်းမှာပင် ဒါဇင်နှင့်ချီသော တိုက်ခိုက်မှုများကို ဖလှယ်ခဲ့ကြသော်လည်း ရလဒ်ကို မဆုံးဖြတ်နိုင်သေးပေ။
ဟန်ရှင်းဟဲက အစွမ်းကုန်သုံးပြီး တိုက်ခိုက်သော်လည်း လုမင်နှင့် အခြားသူများကို မထိခိုက်စေနိုင်တော့ပါ။
ဟန်ရှင်းဟဲ၏ အားသာချက်က သူ၏ကျင့်ကြံမှု ဖြစ်သည်။ သူ၏ ကျင့်ကြံမှုအဆင့်က အခြားသူများထက် သိသာစွာ မြင့်မား၏။
လုမင်နှင့် တခြားသူများမှာတော့ လူအင်အားက ပိုများသည်။ နိယာမအမျိုးမျိုးဖြင့် သူတို့၏ အင်အားက အလွန်ကြောက်စရာကောင်းပေသည်။
"ဝါးမျိုလော့"
တိုက်ပွဲကြားတွင် လုမင်က တာ့ယန်ဆေးမီးဖို၏ အဖုံးကိုဖွင့်လိုက်သည်။ တာ့ယန်ဆေးမီးဖိုက ဟန်ရှင်းဟဲကို ဝါးမြိုလိုသော ပြင်းထန်သော ဝါးမျိုခြင်းစွမ်းအားဖြင့် ပေါက်ကွဲခဲ့၏။
ဟန်ရှင်းဟဲက ဟိန်းဟောက်ပြီး ထာဝရ၏အလင်းရောင်ဖြင့် ဆေးမီးဖို၏ ဝါးမျိုခြင်းစွမ်းအင်ကို ဖြိုခွဲပစ်လိုက်သည်။ သို့သော်လည်း နောက်အခိုက်အတန့်တွင်၊ သူ့ကို ပေါင်ပေါင်က အချိန်ဟင်းလင်းပြင် နိယာမဖြင့် ဖုံးအုပ်လိုက်ပေရာ သူ့ခန္ဓာကိုယ်က နှေးကွေးလာတော့သည်။
"ဝုန်း"
မရဏဓား၏ ဓားအလင်းက ဟန်ရှင်းဟဲကို ထိလုနီးပါး ဖြစ်သွားသည်။ ဟန်ရှင်းဟဲက ၎င်းကို ကပ်သီလေး ရှောင်ရှားခဲ့ပြီး တစ်ချိန်တည်းမှာပင် ချင်ယွဲ့နှင့် အခြားသူများ၏ တိုက်ခိုက်မှုများကို ရှောင်ထွက်ခဲ့ပေသည်။ သူက ချင်ယွဲ့၊ ဟွမ်လင်နှင့် အခြားသူများဆီသို့ ကြောက်မက်ဖွယ်ကောင်းသော ဓားအလင်းအနည်းငယ်ကို ထုတ်လွှတ်လိုက်သည်။
သို့သော်လည်း ပေါင်ပေါင်၏ အချိန်ဟင်းလင်းပြင် နိယာမက ချင်ယွဲ့နှင့် အခြားသူများကို ဖုံးအုပ်သွားသည်။ သူတို့၏ ခန္ဓာကိုယ်များက ဝေဝါးလာပြီး ဓားအလင်းများကို ရှောင်တိမ်းနိုင်ခဲ့ကြပေသည်။
ပေါင်ပေါင်၏ အချိန်ဟင်းလင်းပြင် နိယာမက တိုက်ပွဲတစ်ခုတွင် ကြီးမားသော ပံ့ပိုးပေးနိုင်စွမ်း ရှိသည်။ ထို့အပြင်၊ ၎င်း၏ တိုက်ခိုက်နိုင်စွမ်းက အလွန်ကြောက်စရာကောင်းပြီး ခုခံရန် မဖြစ်နိုင်ပေ။
အချိန်ကြာလာသည်နှင့်အမျှ တိုက်ပွဲက ပိုမိုပြင်းထန်လာသည်။ တိုက်ပွဲမြေပြင်တွင် ပြိုးပြိုးပြက်ပြက် အလင်းတန်းများက အဆက်မပြတ် ထွက်ပေါ်နေပြီး ပေါက်ကွဲသံများကလည်း တအုန်းအုန်း ဖြစ်၏။
တိုက်ခိုက်မှုပေါင်း တစ်ရာခန့် ဆက်လက်ဖြစ်ပွားခဲ့သော်လည်း ရလဒ်ကို မဆုံးဖြတ်ရသေးပေ။
"ဝုန်း"
ဟန်ရှင်းဟဲနှင့် လုမင်၊ မရဏဓားနှင့် အခြားသူများက ထိပ်တိုက်တွေ့ကြပြီးနောက် အဝေးကို ပြန်ဆုတ်သွားကြသည်။
ဟန်ရှင်းဟဲ၏ မျက်နှာက မည်းမှောင်နေပြီ။
ယနေ့ အခြေအနေက သူ့ထိန်းချုပ်မှုအောက်တွင် မရှိတော့သလိုပင်။
သူသည် လုမင်ကိုသာ တိုက်ခိုက်သော်လည်း လူအများ၏ ဝိုင်းရံခြင်းကို ခံခဲ့ရသည်။ ထို့ပြင် သူတို့ တစ်ဦးစီက ကြောက်စရာကောင်းသော ပါရမီရှင်များ ဖြစ်ပေသည်။
"လုမင်၊ ငါမင်းကို ပြောလိုက်မယ်။ ငါ့ဟန်မိသားစုက ကောင်းကင်ဧကရာဇ်ဓားကို ယူဖို့ စိတ်ပိုင်းဖြတ်ထားတယ်။ မင်းတို့တွေ အဲဒါကို မကာကွယ်နိုင်ဘူး"
ဟန်ရှင်းဟဲက အေးစက်စွာ ပြောလိုက်သည်။
"မှန်တယ်၊ ငါ့ ဟန်မိသားစုက ကောင်းကင်ဧကရာဇ်ဓားကို ယူဖို့ ဆုံးဖြတ်ထားတယ်"
ဟန်ရှင်းဟဲ၏ စကားသံအဆုံးတွင် ယွမ်တောင် မြင့်မြတ်သောကျောင်းတော်၏ အပြင်မှ အသံတစ်ခုက ထွက်ပေါ်လာ၏။ ထို့နောက်၊ ထိုအရပ်မှ ကြီးမားသော ဖိအားတစ်ခု ရုတ်တရက် ထွက်ပေါ်လာတော့သည်။
ထို့နောက်တွင် လေထဲမှ လျှောက်လာနေသော အဘိုးအို သုံးဦးကို တွေ့လိုက်ရသည်။
အဘိုးအို တစ်ဦးစီတွင် လှည့်ပတ်နေသော နတ်အလင်းစက်ဝိုင်း တစ်ခုစီ ရှိသည်။
လူအများ၏ မျက်လုံးအိမ်များ ကျဉ်းမြောင်းသွား၏။ ထိုအရာက ကမ္ဘာ့နတ်အလင်းများ ဖြစ်သည်။ တစ်နည်းဆိုရသော်၊ ဤအဘိုးအိုသုံးဦးသည် စစ်မှန်သောဧကရာဇ်များပင်။
အဘိုးအိုသုံးဦးက နတ်ဘုရားသုံးပါးကဲ့သို့ ကမ္ဘာ့နတ်အလင်းများ ဝန်းရံလျက် လေထဲတွင် ရပ်နေကြသည်။ တုနှိုင်းမရအောင် ကြောက်စရာကောင်းသော ဖိအားတစ်ခုက ပြန့်နှံ့သွား၏။ ပါရမီရှင်များ အားလုံးက သူတို့အပေါ်သို့ တောင်ကြီးတစ်လုံးဖြင့် ဖိချလိုက်သလို ခံစားလိုက်ရတော့သည်။
"အကြီးအကဲတို့..."
ဟန်ရှင်းဟဲက အဘိုးအိုသုံးဦးကို လက်ယှက်ပြလိုက်သည်။
"လုမင်၊ ကောင်းကင်ဧကရာဇ်ရဲ့ဓားကို ငါတို့ဆီ လွှဲပေးလိုက်ပါ။ ဒါက ကောင်းကင်ဧကရာဇ်ရဲ့ ကိုယ်ရေးကိုယ်တာဓားပဲ။ မင်းက ဒါကို ကိုင်ဆောင်ဖို့ အရည်အချင်းမရှိဘူး"
အလယ်မှ အဘိုးအိုက လုမင်ကိုကြည့်ကာ ပြောလိုက်သည်။ လုမင်က သူ့အပေါ် ကျရောက်လာသည့် ပြင်းထန်သော ဖိအားတစ်ခုကို ခံစားလိုက်ရပြီး နောက်ကိုဆုတ်သွားရတော့သည်။
"လူငယ်က မလုပ်နိုင်ရင် အဘိုးကြီးက လုပ်မှာလား။ အေးပေါ့လေ၊ ဒါက အဓိက အင်အားစုကြီးတစ်ခုရဲ့ ပုံစံပဲ"
လုမင်က လှောင်ပြောင်ပြောဆိုလိုက်သည်။
"အမှန်ပဲ၊ သိုင်းဧကရာဇ်တွေက မျိုးဆက်သစ်လူငယ်တွေရဲ့ ကိစ္စတွေမှာ ဝင်ရောက်စွက်ဖက်ချင်နေတာ ရှက်စရာကောင်းလွန်းတယ်"
ထိုအချိန်တွင် ယွမ်တောင် မြင့်မြတ်သောကျောင်းတော်၏ နက်နဲရာအရပ်မှ အသံတစ်ခု ထွက်ပေါ်လာခဲ့သည်။
စကားသံအဆုံးတွင်၊ လေထဲမှာ လူရိပ်များစွာ ပေါ်လာကြသည်။
ဤလူရိပ်များကိုလည်း ကမ္ဘာ့နတ်အလင်းက ဝန်းရံထား၏။ ၎င်းတို့က စစ်မှန်သောဧကရာဇ်များပင်။
သူတို့က ယွမ်တောင် မြင့်မြတ်သောကျောင်းတော်၏ ဆရာများ ဖြစ်ကြသည်။
ယွမ်တောင် မြင့်မြတ်သောကျောင်းတော်၏ ဆရာအများစုက မည်သည့် အင်အားစုကမှ မဟုတ်ပေ။ အများစုမှာ တစ်ကိုယ်တော် ကျင့်ကြံသူများ သို့မဟုတ် နှစ်ပေါင်းများစွာ သီးခြားနေထိုင်ခဲ့သူများ ဖြစ်သည်။ အဆုံးတွင်၊ သူတို့ကို မဟာဧကရာဇ်ကြီးသုံးပါးက ယွမ်တောင် မြင့်မြတ်သောကျောင်းတော် ဆရာများဖြစ်လာစေရန် ဖိတ်ခေါ်ခြင်းခံခဲ့ရပေသည်။
ဟန်မိသားစုမှ စစ်မှန်သောဧကရာဇ်များက မျက်နှာပျက်သွားကြသည်။
သူတို့သည် မူလက ဟန်ရှင်းဟဲကို လုမင်ထံမှ ကောင်းကင်ဧကရာဇ်ဓားကို လုယူစေလိုသော်လည်း မအောင်မမြင်ဘဲဖြစ်မည်ဟု သူတို့ မမျှော်လင့်ခဲ့ပေ။ ထို့ကြောင့် ကိုယ်တိုင် ထွက်လာရန်မှတပါး သူတို့မှာ ရွေးချယ်စရာ မရှိတော့ပါ။
ယွမ်တောင် မြင့်မြတ်သောကျောင်းတော်မှ ဆရာများက ဤကိစ္စတွင် ဝင်ရောက်စွက်ဖက်မည်ဟုလည်း သူတို့ တွေးမိခဲ့ကြသည်။
"ဒါက ယွမ်တောင် မြင့်မြတ်သောကျောင်းတော်ပဲ၊ ကျေးဇူးပြုပြီး ထွက်သွားကြပါ"
ယွမ်တောင် မြင့်မြတ်သောကျောင်းတော်မှ ဆရာတစ်ဦးက ဧည့်သည်များကို ထွက်ခွာရန် တိုက်ရိုက်ပြောလိုက်သည်။
"ကျုပ်တို့က ကောင်းကင်ဧကရာဇ်ဓားကို ယူရမယ်"
ဟန်မိသားစု၏ စစ်မှန်သောဧကရာဇ်တစ်ပါးက ဆိုသည်။
"ကောင်းကင်ဧကရာဇ်ဓားကို လုမင်က ဆွဲထုတ်လိုက်တဲ့အတွက် သဘာဝအတိုင်းပဲ သူပိုင်တယ်။ ခင်ဗျားတို့က ဆွဲထုတ်နိုင်စွမ်းမရှိဘူး၊ ဒါတောင် တစ်ဖက်လူဆီက အလကားယူချင်သေးတယ်။ ဒါက ရယ်စရာမဟုတ်ဘူးလား။ ဒီပုံစံနဲ့ ကိုယ့်ကိုယ်ကိုယ် ကောင်းကင်ဧကရာဇ်ရဲ့ သားမြေးတွေလို့ ခေါ်ဝံ့သေးတယ်လား"
ဆရာတစ်ဦးက အထင်မြင်သေးစွာ ပြောလိုက်သည်။ သူက ဟန်မိသားစု၏ စစ်မှန်သောဧကရာဇ်များကို လုံးဝ မျက်နှာသာမပေးပါ။