အခန်း ၁၉၁၄
Vol. 128 Ch. 1914
အပိုင်း ( 1914 ) မျောက်မိစ္ဆာတောင်တွင် တိုက်ခိုက်ခြင်း။
"မျောက်မိစ္ဆာတောင်လား၊ သူတို့က ဘယ်လောက်ထိ သန်မာကြလဲ"
လုမင်က မေးလိုက်သည်။
"မျောက်မိစ္ဆာတောင်မှာ ရှေးဟောင်း မျောက်မိစ္ဆာတစ်မျိုး နေထိုင်တယ်။ သူတို့က မွေးရာပါ အကန့်အသတ်မဲ့ခွန်အားကို ပိုင်ဆိုင်ထားပြီး ကြောက်စရာကောင်းတဲ့ တိုက်ခိုက်နိုင်စွမ်း ရှိကြတယ်"
"မျောက်မိစ္ဆာတောင်ရဲ့ အသန်မာဆုံး မျောက်မိစ္ဆာက ဧကရာဇ်တစ်ပိုင်းနယ်ပယ်ပဲ။ အန္တိမသူတော်စင်နယ်ပယ်က မျောက်မိစ္ဆာတွေလည်း အများကြီးရှိကြတယ်။ မကြာသေးခင်က မဟာမိတ်အဖွဲ့ တော်တော်များများဟာ မျောက်မိစ္ဆာတောင်ကို စူးစမ်းချင်ပေမဲ့ မျောက်မိစ္ဆာတွေရဲ့ အသတ်ခံခဲ့ရတယ်"
အိုးရန်ဝူရွှမ့်က ရှင်းပြလိုက်သည်။
"ဧကရာဇ်တစ်ပိုင်းအဆင့်လား"
လူများစွာမှာ မျက်မှောင်ကြုတ်သွားကြသည်။
ဧကရာဇ်တစ်ပိုင်းအဆင့် မျောက်မိစ္ဆာ၏ ကာကွယ်မှုဖြင့် အစီရင်ဓာတ်ပြားကို ရရှိရန် မလွယ်ကူတော့ပေ။
သို့သော်လည်း ကံကောင်းချင်တော့ ဤနေရာမှာ အစီရင်ကမ္ဘာတစ်ခုဖြစ်သော သူတော်စင် စစ်မြေပြင် ဖြစ်သည်။ ဤကမ္ဘာတွင် သေဆုံးသွားလျှင်သော်မှ သူတို့၏ မူလခန္ဓာမှာ အန္တရာယ်ကင်းလိမ့်မည်။
"အိုးရန်၊ လမ်းပြပါ"
လုမင်က အိုးရန်ဝူရွှမ့်ကို ပြောလိုက်သည်။
အိုးရန်ဝူရွှမ့်က ခေါင်းညိတ်ပြီး ရှေ့မှ လျှောက်သွား၏။ လူတိုင်းက သူ့နောက်မှ လိုက်သွားကြတော့သည်။
သူတော်စင်စစ်မြေပြင်က အဆုံးမဲ့ ကျယ်ပြောသည်။ နာရီအနည်းငယ်ကြာအောင် ပျံသန်းပြီးနောက် သူတို့ရှေ့တွင် ကြီးမားသော တောင်ကြီးတစ်လုံး ပေါ်လာ၏။
"ဂါး... ဂါး..."
သူတို့က ဝေးကွာနေသော်လည်း မိစ္ဆာသားရဲများ၏ အော်ဟစ်ဟိန်းဟောက်သံများကို ကြားနေရသေးသည်။
မကြာမီ၊ မျောက်မိစ္ဆာတောင်သို့ ရောက်ရှိလာခဲ့ကြသည်။
"ခဏနေရင် ကျင့်ကြံမှုအားနည်းတဲ့သူတွေက အပြင်မှာနေပြီး မျောက်မိစ္ဆာတွေရဲ့ အာရုံစိုက်မှုကို ဆွဲဆောင်ပါ။ သန်မာတဲ့သူတွေကတော့ ငါနဲ့အတူ လိုက်ပါပြီး တောင်ထိပ်ကို ထိုးဖောက်ကြစို့"
လုမင်က လူတိုင်း၏တာဝန်ကို စီစဉ်ပေးလိုက်သည်။
သူတော်စင် စစ်မြေပြင်တွင် သေဆုံးခြင်းက တကယ်သေခြင်း မဟုတ်ပေ။ ထို့ကြောင့် မျောက်မိစ္ဆာများကို ဆွဲဆောင်ရန် အားနည်းသူများကို ငါးစာအဖြစ် အသုံးချခြင်းက အကောင်းဆုံးနည်းလမ်း ဖြစ်သည်။
မည်သူမျှ ကန့်ကွက်မှုမရှိသောကြောင့် လူတိုင်းက မျောက်မိစ္ဆာတောင်သို့ ချဉ်းကပ်သွားကြလေသည်။
"တစ်ယောက်ယောက်လာနေတယ်"
လုမင်၏ မျက်နှာအမူအရာက ရုတ်တရက် ပြောင်းလဲသွားပြီး အခြားတစ်ဘက်သို့ လှမ်းကြည့်လိုက်သည်။
ထိုလမ်းကြောင်းမှ ပျံသန်းလာသော လူတစ်စု ရှိ၏။
ရှေ့တွင် ပျံသန်းလာသူများက ဝတ်စုံဖြူဝတ် လူငယ်များ ဖြစ်သည်။ သူတို့တစ်ဦးစီက ချောမောကြပေသည်။
"ရှဲ့နျန်ကျွင်း"
လုမင်က အံ့သြသွားပြီး မျက်မှောင်ကြုတ်လိုက်သည်။
ရှဲ့နျန်ကျွင်းကို ဤနေရာတွင်တွေ့ရန် သူ မမျှော်လင့်ထားပေ။
"သူတို့က ရှေးဟောင်း ရှန့်မျိုးနွယ်ဝင်တွေပဲ"
လော့ထျန်းယီက ခပ်တိုးတိုး ပြောလိုက်သည်။
ရှေးဟောင်း ရှန့်မျိုးနွယ်ကလည်း တန်ခိုးကြီးသော ရှေးဟောင်းမျိုးနွယ်တစ်ခုပင်။
ရှေ့မှ ဝတ်စုံဖြူဝတ် လူငယ်များက ရှေးဟောင်းရှန့်မျိုးနွယ်မှ ဖြစ်သည်။
ရှေးဟောင်းရှန့်မျိုးနွယ်ဝင်များ၏ နောက်ကွယ်မှ လူများကတော့ ရှေးဟောင်းရှန့်မျိုးနွယ်နှင့် မဟာမိတ်ဖွဲ့ထားသော ပါရမီရှင်များ ဖြစ်မည်။
ရှေးဟောင်းရှန့်မျိုးနွယ်မှ လူများကလည်း အစီရင်ဓာတ်ပြားကို ရယူရန် မျောက်မိစ္ဆာတောင်သို့ တက်လှမ်းလိုကြောင်း ထင်ရှားသည်။
"လုမင်"
ရှဲ့နျန်ကျွင်းက လုမင်ကို တအံ့တသြ ကြည့်လိုက်သည်။
"ဒါက လုမင်တို့အဖွဲ့ပဲ"
ရှေးဟောင်းရှန့်မျိုးနွယ်ဝင်များနှင့် အခြားသူများ၏ အမူအရာများကလည်း လေးနက်သွားကြပေသည်။
လုမင်တို့အဖွဲ့၏ တိုက်ခိုက်ရေးအင်အားက သူတို့ကို သတိထားစေသည်။ ယခုမူ၊ လုမင်တို့အဖွဲ့နှင့် ကြုံတွေ့ခဲ့ရသောကြောင့် အစီရင်ဓာတ်ပြားကို သိမ်းပိုက်ရန်မှာ ပို၍ ခက်ခဲပေတော့မည်။
"လုမင်၊ ယွမ်တောင် မြင့်မြတ်သောကျောင်းတော်မှာ ပြန်ဆုံကြမယ်လို့ ငါ မမျှော်လင့်ထားဘူး။ တိုက်ဆိုင်လိုက်တာ"
ရှဲ့နျန်ကျွင်းက ပြုံးလျက် ပြောလိုက်သည်။
"တကယ် တိုက်ဆိုင်မှုပဲ"
လုမင်က တည်ငြိမ်စွာ တုံ့ပြန်ခဲ့၏။
ရှဲ့နျန်ကျွင်းက စန်းပြည်နယ်တွင် သူ့ကို တစ်ကြိမ်ကူညီခဲ့ဖူးသည်။ သူက နတ်ဘုရားသားတော်နှင့် တိုက်ပွဲမတိုင်မီ၊ နတ်ဘုရားသားတော်၏ ကျင့်ကြံမှုနှင့် လျှို့ဝှက်ချက်များကို ပြောပြဖူးပေသည်။
သို့သော်လည်း လုမင်ကတော့ ရှဲ့နျန်ကျွင်းအပေါ် အကောင်းမြင်စိတ်နည်းနေဆဲ ဖြစ်သည်။ ရှန်းဟွမ်တိုက်ကြီးသို့ ပြန်ရောက်ပါက သူတို့နှစ်ဦးက ရန်သူများအဖြစ် ရှိဦးမည်။
လူများစွာက လုမင်ကိုတလှည့်၊ ရှဲ့နျန်ကျွင်းကိုတလှည့် အံ့အားသင့်စွာ ကြည့်လိုက်ကြသည်။
လုမင်နှင့် ရှဲ့နျန်ကျွင်းက သိကျွမ်းပြီးသားလား။
"ငါ မင်းကို တကယ်လေးစားမိတယ်။ မင်းက ဘယ်လိုလုပ်ပြီး မိန်းမလှလေးတွေ အများကြီးနဲ့ သိကျွမ်းနေရတာလဲ။ ပြောရမယ်ဆိုရင် ငါကိုယ်တိုင်ကလည်း ထူးချွန်ပြီး ချောမောပါတယ်။ ဒါပေမဲ့ ငါကျတော့ မိန်းမလှလေးတွေ အများကြီးကို ဘာဖြစ်လို့ မသိရတာလဲ"
ဟွမ်လီက သူ့ခေါင်းကိုကုပ်ပြီး ရေရွတ်လိုက်သည်။
ချင်ယွဲ့၊ ဟွမ်လင်၊ လော့ထျန်းယီနှင့် အခြားသူများ၏ မျက်နှာပေါ်တွင် ထူးဆန်းသော အရိပ်အယောင်များ ပေါ်လာ၏။
ဟွမ်မျိုးနွယ်၏ အခြားသူများမှာတော့ လုမင်ကို လေးစားမှုအပြည့်ဖြင့် ကြည့်နေကြတော့သည်။
ရှဲ့နျန်ကျွင်းက လုမင်၏ သဘောထားကို စိတ်မ၀င်စားသလို အနည်းငယ် ပြုံးလိုက်သည်။
"လုမင်၊ နင်က အစီရင်ဓာတ်ပြားကို ရယူဖို့ ဒီကို ရောက်နေတာလား"
"ဒါက သဘာဝပဲ"
လုမင်က ပြောသည်။
"တိုက်ဆိုင်လိုက်တာ... ငါတို့ကလည်း အစီရင်ဓာတ်ပြားကို လုယူဖို့ ဒီကိုရောက်နေတာ၊ နင့်ကို ငါ တစ်ကြိမ်ကူညီဖူးတာကို ထောက်ထားပြီး အစီရင်ဓာတ်ပြားကို ငါတို့အတွက် ဘာဖြစ်လို့ မပေးရတာလဲ"
ရှဲ့နျန်ကျွင်းက ပြုံးလျက် ပြော၏။
"ပေးရမယ်၊ မျောက်မိစ္ဆာတောင်မှာ ဧကရာဇ်တစ်ပိုင်းအဆင့် မျောက်ဝံရှိတယ်။ ငါ အလျှော့ပေးလိုက်ရင်တောင် မင်းတို့ဘာသာ မရယူနိုင်မှာ ကြောက်ရတယ်။ ဒါကြောင့် ကိုယ့်အစွမ်းစနဲ့ ကြိုးစားတာက ပိုကောင်းပါတယ်"
လုမင်က နှုတ်ခမ်းတွန့်ရုံပြုံးပြီး ပြောလိုက်သည်။ ထို့နောက်တွင် သူက ရှဲ့နျန်ကျွင်းနှင့် စကားမဖြုန်းတီးတော့ပေ။ ရက်စက်ကြမ်းကြုတ်သော မျောက်ဝံတောင်၏ တစ်ဖက်ခြမ်းသို့ ပျံသန်းသွားကြသည်။
ရှေးဟောင်းရှန့်မျိုးနွယ်က အစီရင်ဓာတ်ပြားကို လိုချင်လျှင် ကိုယ်တိုင်ကြိုးစားကြစေမည် ဖြစ်သည်။ ပိုစွမ်းသူက အစီရင်ဓာတ်ပြားကို ရရှိနိုင်လိမ့်မည်။ သူတို့ကတော့ နောက်ဆုတ်မည် မဟုတ်ပေ။
မျောက်မိစ္ဆာတောင်၏ အခြားတစ်ဖက်ကို ရောက်သောအခါ မူလအစီအစဉ်အတိုင်း လုပ်ကြသည်။
အားနည်းသူတချို့က မျောက်မိစ္ဆာတောင်သို့ ဦးစွာ ပြေးသွားကြ၏။
မကြာမီ၊ မျောက်မိစ္ဆာတောင်ပေါ်မှ သားရဲများ၏ ကျယ်လောင်သော အော်ဟစ်သံများ ထွက်ပေါ်လာသည်။ မျောက်မိစ္ဆာများက ထိုလူများနောက်သို့လိုက်ကာ အဝေးတွင် ပျောက်ကွယ်သွားတော့သည်။
'ပေါင်ပေါင်'
ဤအခွင့်အရေးကို အသုံးချ၍ လုမင်က ပေါင်ပေါင်ထံသို့ အသံပို့လွှတ်ပြီး ပြောလိုက်သည်။
"တွိ..."
ပေါင်ပေါင်က သူမ၏ လက်သေးသေးလေးများကို ဝှေ့ယမ်းကာ တောင်ထိပ်အထိပေါက်သော အချိန်ဟင်းလင်းပြင် လမ်းကြောင်းတစ်ခုကို ဖောက်လုပ်လိုက်သည်။
လူတိုင်းက အချိန်ဟင်းလင်းပြင် လျှောက်လမ်းထဲသို့ ပြေးဝင်သွား၏။
"ဂါး"
ထိုအချိန်တွင် တောင်ထိပ်မှ ကြောက်မက်ဖွယ်ရာ ဟိန်းဟောက်သံတစ်ခု ထွက်ပေါ်လာခဲ့သည်။ အမြင့်မီတာတစ်ရာရှိပြီး လက်ထဲတွင် ဧရာမတုတ်ကြီးတစ်ချောင်းကို ကိုင်ထားသော မျောက်ကြီးတစ်ကောင် ပေါ်လာ၏။ ၎င်းက အချိန်ဟင်းလင်းပြင် လျှောက်လမ်းထံသို့ တုတ်ဖြင့် ပစ်လွှတ်လိုက်တော့သည်။
"ဝုန်း"
ဧရာမတုတ်ကြီးက ဖြတ်ကျော်ဖြတ်သွားစဉ် ကောင်းကင်နှင့်မြေပြင်က ကျယ်လောင်စွာ ပေါက်ကွဲသံများ ထွက်ပေါ်လာခဲ့ရသည်။ အချိန်ဟင်းလင်းပြင် လျှောက်လမ်းက ပြိုကျသွား၏။
လုမင်နှင့် အခြားသူများက အချိန်ဟင်းလင်းပြင် လျှောက်လမ်းအတွင်းသို့ ဝင်ရောက်ခဲ့ကြသော်လည်း လမ်းတစ်ဝက်ကို မရောက်မီတွင် အချိန်ဟင်းလင်းပြင် လျှောက်လမ်းအတွင်းမှ တွန်းထုတ်ခံလိုက်ရပေသည်။
'ဒါက တကယ်ကို အလုပ်မဖြစ်ဘူးပဲ။ ဧကရာဇ်တစ်ပိုင်းအဆင့် ကျွမ်းကျင်သူရဲ့ စွမ်းအားက တကယ်ကို အံ့ဩစရာကောင်းတယ်'
လုမင်က သူ့စိတ်ထဲမှ တွေးလိုက်သည်။
ဧကရာဇ်တစ်ပိုင်းအဆင့် ကျွမ်းကျင်သူများက အမှန်တကယ် အစွမ်းထက်သည်။ ပေါင်ပေါင်က အချိန်ဟင်းလင်းပြင်လျှောက်လမ်းကို ဖွင့်လိုက်သည်နှင့် ချက်ချင်း ရှာဖွေတွေ့ရှိပြီး ဖျက်ဆီးခံခဲ့ရပေသည်။ ဒါက အချိန်ဟင်းလင်းပြင် လျှောက်လမ်းကို အသုံးပြု၍ တောင်ထိပ်သို့ တက်လှမ်းရန် သူ၏အစီအစဉ်ကို ပျက်စီးစေခဲ့သည်။
"ဂါး"
မျောက်ကြီးတစ်ကောင်က တောင်ထိပ်တွင် ရပ်ကာ ကောင်းကင်သို့ မော့ပြီး ဟိန်းဟောက်လိုက်သည်။
"ဂါး... ဂါး"
မျောက်မိစ္ဆာတောင် တစ်ခုလုံးတွင် ကျယ်လောင်စွာ ဟိန်းဟောက်သံများက ဆက်တိုက် ထွက်ပေါ်လာသည်။ ဧရာမ မျောက်များကလည်း တစ်ကောင်ပြီးတစ်ကောင် ပေါ်လာကြ၏။ တချို့က လက်ဗလာ၊ တချို့ တုတ်များကို ကိုင်ထားပြီး တချို့ကလည်း ကျောက်တုံးကြီးများကို ကိုင်ဆောင်ထားကြသည်။ သူတို့က လုမင်နှင့် အခြားသူများဆီသို့ ပြေးဆင်းလာကြတော့သည်။
အဝေးမှ၊ အိမ်လုံးတမျှ ကြီးမားသော ကျောက်တုံးများက သူတို့ထံသို့ ပစ်လွင့်လာခဲ့ကြသည်။
"သတိထားကြ"
လုမင်က အော်ဟစ်သတိပေးလိုက်သည်။ လူတိုင်းက လျှပ်စီးလက်သကဲ့သို့ တောင်ထိပ်ကို ပြေးတက်သွား၏။
ပြေးလွှားနေစဉ်၊ ပေါင်ပေါင်က သူ၏လက်ကို ရှေ့သို့ဆန့်ပြီး ဖိချဟန်ပြုလိုက်သည်။ သူရှေ့မှ ဟင်းလင်းပြင်က လှုပ်ရှားလာပြီး ဟင်းလင်းပြင်စွမ်းအားကြောင့် ကျောက်တုံးကြီးများမှာ ကြေမွသွား၏။
ထို့နောက် မိစ္ဆာသားရဲ မျောက်ကြီးများက ပြေးဆင်းလာကြတော့သည်။
ပေါင်ပေါင်က သူ့လက်ကိုဝှေ့ယမ်းလိုက်သောအခါ ကြည်လင်သော ပူဖောင်းများက ထွက်ပေါ်လာပြီး မျောက်များစွာကို ဖုံးအုပ်သွားသည်။ လုမင်နှင့် အခြားသူများက ထိုမျောက်ကြီးများကို အလွယ်တကူပင် တိုက်ခိုက်သတ်ဖြတ်ခဲ့ပေသည်။
ထိုမျောက်ကြီးများက သေဆုံးပြီးသည်နှင့် တပြိုင်နက် သဘာဝစွမ်းအင်များအဖြစ်သို့ ပြောင်းလဲကာ ပျောက်ကွယ်သွားကြသည်။
လုမင်အပြင် ချင်ယွဲ့၊ ဟွမ်လင်၊ လော့ထျန်းယီ၊ ဟွမ်လီ၊ အိုးရန်ဝူရွှမ့်၊ လော့ရှန်း၊ လုံချန်နှင့် ပေါင်ပေါင်တို့ ရှိသည်။ စုစုပေါင်း ကိုးယောက်ရှိ၏။ သူတို့အားလုံးက အန္တိမသူတော်စင်နယ်ပယ် ကျင့်ကြံမှုရှိပြီး ဘုရင်ခန္ဓာများ ဖြစ်ကြသည်။ သူတို့က အတူတကွ လှုပ်ရှားသောအခါ သူတို့၏အမြန်နှုန်းက အံ့မခန်းပင်။
မျောက်မိစ္ဆာများက အန္တိမသူတော်စင်နယ်ပယ် အဆင့်နိမ့်အဆင့် သို့မဟုတ် အန္တိမသူတော်စင်နယ်ပယ်၏ အထွတ်အထိပ်ပင် ဖြစ်စေကာမူ... သူတို့အဖွဲ့မှ ချက်ချင်း သတ်ဖြတ်ခြင်းကို ခံခဲ့ရပေသည်။
သူတို့က ထက်ရှလွန်းသော ဓားတစ်လက်ကဲ့သို့ တောင်ထိပ်ကို ပြေးတက်သွားကြသည်။
တစ်ချိန်တည်းမှာပင်၊ တောင်၏ တစ်ဖက်ခြမ်းမှ အော်ဟစ်သံများ ထွက်ပေါ်လာခဲ့သည်။ ရှေးဟောင်းရှန့်မျိုးနွယ်က စတင်လှုပ်ရှားနေပြီဖြစ်ကြောင်း ထင်ရှားပေသည်။
"ရှေးဟောင်းရှန့်မျိုးနွယ်က ရောက်လာကြတာ အချိန်ကောင်းပဲ။ သူတို့က ငါတို့အတွက် မျောက်မိစ္ဆာတွေကို ဆွဲဆောင်ပေးနိုင်တယ်"
အိုးရန်ဝူရွှမ့်က ပြုံးလိုက်သည်။
တခြားသူများလည်း ရယ်မောလိုက်ကြလေသည်။
အမှန်ပင်၊ ရှေးဟောင်းရှန့်မျိုးနွယ်၏ တည်ရှိမှုက မျောက်မိစ္ဆာများစွာကို ဆွဲဆောင်နိုင်ခဲ့သည်။ သူတို့အပေါ် ဖိအားကလည်း တော်တော်လေး လျော့ကျသွားပေသည်။
မိနစ်အနည်းငယ်အကြာတွင်၊ လုမင်နှင့်အဖွဲ့က ဝောင်ထိပ်သို့ရောက်ရှိခဲ့ကြသည်။