အခန်း ၁၉၃၀

အပိုင်း ( 1930 ) ကောင်းကင်ဧကရာဇ်တောင်၏ အပြောင်းအလဲ။

"ဒီတိုက်ပွဲမျိုးကို ရိုးရှင်းတယ်ဆိုပြီး လျှော့မတွက်လိုက်နဲ့၊ သူတို့ရဲ့ လှုပ်ရှားမှုတိုင်းဟာ မဟာလမ်းစဉ်ရဲ့ စွမ်းအားတွေ ပါဝင်နေတယ်။ ဒါက အရမ်းကြောက်စရာကောင်းတယ်။ သတိမထားရင် တစ်ချက်တည်းနဲ့ အသက်သေဆုံးသွားနိုင်တယ်"

ယွမ်တောင် မြင့်မြတ်သောကျောင်းတော်မှ ဆရာတစ်ဦးက ယွမ်တောင် မြင့်မြတ်သောကျောင်းတော်၏ တပည့်များကို ရှင်းပြလိုက်သည်။

"မဟာဧကရာဇ်အဆင့် တန်ခိုးရှင်ကြီးတွေက ကောင်းကင်နဲ့မြေကမ္ဘာကို ထိန်းချုပ်ထားကြတယ်။ သူတို့ရဲ့ လှုပ်ရှားမှုတိုင်းကို မဟာလမ်းစဉ်နဲ့ ကမ္ဘာကြီး၏ စွမ်းအားက ပံ့ပိုးတာလေ။ ဒါက ကောင်းကင်ဧကရာဇ်တောင်မှာမို့လို့ပေါ့။ အပြင်ဘက်မှာဆိုရင် သူတို့ရဲ့ ပေါ့ပေါ့ပါးပါး တိုက်ခိုက်မှုက ကမ္ဘာကို ဗြောင်းဆန်စေပြီး ဖျက်ဆီးပစ်နိုင်စွမ်းရှိတယ်"

ဆရာက ဆက်လက်ရှင်းပြလိုက်၏။ လူတိုင်းက ဂရုတစိုက် စောင့်ကြည့်နေခဲ့ကြသည်။

ကံမကောင်းစွာဖြင့်၊ သူတို့၏နယ်ပယ်က အလွန်နိမ့်ပါးပြီး ဧကရာဇ်နယ်ပယ်သို့ မရောက်ရှိကြသေးပါ။ မဟာဧကရာဇ်နယ်ပယ်၏ လေးနက်မှုကို နားလည်ရန် ၎င်းတို့အတွက် ခက်ခဲပြီး ပွဲကြည့်ရုံသာ ကြည့်နိုင်ကြသည်။

"ဝုန်း... ဝုန်း"

ကောင်းကင်ဧကရာဇ်တောင်တွင် သူတို့နှစ်ယောက်၏ တိုက်ပွဲအရှိန်က ပိုမြင့်တက်လာသည်။ သူတို့၏ အမူအရာများသည်လည်း ပို၍ လေးနက်လာ၏။

တိုက်ခိုက်မှုတိုင်းတွင် ကြောက်စရာကောင်းသော အတက်အကျများ ဖြစ်ပေါ်လာရသည်။ ကောင်းကင်ဧကရာဇ်တောင်က အနည်းငယ်တုန်ခါသွားပြီး လေဟာနယ်မှာတော့ ပြင်းထန်စွာ တုန်ခါနေတော့သည်။

ကောင်းကင်ဧကရာဇ်တောင်ထိပ်တွင် အုံ့ဆိုင်းနေသော စွမ်းအင်အလွှာတစ်ခု ရှိသည်။ ၎င်းက အလွန်လျှို့ဝှက်ဆန်းကြယ်ပြီး အတွင်းပိုင်းမှ စွမ်းအားအများစုကို ပိတ်လှောင်ထားခဲ့ပေသည်။

မကြာမီတွင် မဟာဧကရာဇ်နှစ်ပါးက ရာနှင့်ချီသော လှုပ်ရှားမှုများကို ဖလှယ်ခဲ့ကြသည်။ သို့သော်လည်း အနိုင်အရှုံးက မသိသာသေးပါ။ ထို့နောက် နှစ်ယောက်စလုံးက လက်နက်များကို ထုတ်ယူလိုက်ကြသည်။

ဟန်မိသားစု၏ မဟာဧကရာဇ်က ဓားတစ်လက်ကို အသုံးပြုပြီး ဟဲမိသားစု၏ မဟာဧကရာဇ်မူကား ဆေဘာဓားတစ်လက်ကို အသုံးပြုသည်။

၎င်းတို့က အလွန်ကြောက်စရာကောင်းသော ဧကရာဇ်လက်နက်များ ဖြစ်ကြမည်မှာ သံသယဖြစ်ဖွယ် မရှိပေ။ နှစ်ယောက်သား ဆက်လက်တိုက်ပွဲဝင်ခဲ့ကြသည်။

သို့သော်လည်း သူတို့နှစ်ဦးက ကျင့်ကြံမှုအဆင့် တူညီသလို ခွန်အားကလည်း ကွာခြားမှုမရှိပါ။ အကြိမ်ပေါင်းများစွာ ရင်ဆိုင်ခဲ့ကြသော်လည်း အောင်နိုင်သူ မရှိသေးပေ။

နှစ်ယောက်သား အပြင်းအထန် တိုက်ခိုက်နေကြစဉ်တွင်၊ ကောင်းကင်ဧကရာဇ်တောင်‌ထိပ်မှာ လူရိပ်တစ်ခုက ရုတ်တရက် ပေါ်လာသည်။

လူတိုင်း တုန်လှုပ်သွားကြ၏။

အစပိုင်းတွင်၊ ကောင်းကင်ဧကရာဇ်တောင်ထိပ်မှာ တိုက်ပွဲဝင်နေသော မဟာဧကရာဇ်ကြီးနှစ်ယောက်သာ ရှိသည်။ နောက်ထပ် လူတစ်ဦးက မည်သို့ရှိလာနိုင်မည်နည်း။

ထို့ပြင်၊ ဤလူရိပ်က လေဟာနယ်ကို ခွဲပြီး ထွက်ပေါ်လာခြင်း မဟုတ်ပေ။ သူက ကောင်းကင်ဘုံဧကရာဇ်တောင်တွင် ပုန်းအောင်းနေခဲ့ခြင်းဖြစ်ကြောင်း ထင်ရှားသည်။

ထိုလူရိပ်က ပေါ်လာသည်နှင့် တပြိုင်နက် ဟဲမိသားစု၏ မဟာဧကရာဇ်ကို တိုက်ခိုက်ခဲ့သည်။ သူ၏ တိုက်ခိုက်မှုက အလွန်ပြင်းထန်ပြီး မဟာဧကရာဇ်နှစ်ပါးထက် အားနည်းမှုမရှိပေ။

ထိုသူကလည်း မဟာဧကရာဇ်ကြီးဖြစ်ကြောင်း သိနိုင်သည်။

လူတိုင်း တုန်လှုပ်သွားကြသည်။ မဟာဧကရာဇ်တစ်ပါးက ကောင်းကင်ဧကရာဇ်တောင်ထိပ်တွင် မည်ကဲ့သို့ ရုတ်တရက်ပေါ်လာနိုင်သနည်း။

"လော့မျိုးရိုး၊ မင်းပဲ။ မင်းတို့ တကယ်ကောက်ကျစ်တယ်"

ဟဲမိသားစု၏ မဟာဧကရာဇ်က ဒေါသတကြီး အော်ဟစ်လိုက်သည်။

လော့မျိုးရိုးလား။

လူများစွာ တုန်လှုပ်သွားကြသည်။

ယွမ်တောင်တွင် လော့မျိုးရိုးအမည်ဖြင့် မဟာဧကရာဇ်တစ်ပါးတည်းသာ ရှိခဲ့သည်။ ၎င်းမှာ ရှေးဟောင်နေမင်းမြင့်မြတ်နယ်မြေရှိ တာ့လော့ကောင်းကင်ဂိုဏ်း၏ ဧကရာဇ်ကြီးပင်။

လုမင်၏ မျက်လုံးများမှာလည်း အရောင်လက်လာသည်။

ရုတ်တရက်ပေါ်လာသော ဧကရာဇ်ကြီးက လော့စန်းချုံး၏ အဘိုးဖြစ်သော တာ့လော့ကောင်းကင်ဂိုဏ်း၏ မဟာဧကရာဇ် ဖြစ်နိုင်သည်။

တာ့လော့ကောင်းကင်ဂိုဏ်း၏ မဟာဧကရာဇ်ကြီးက ကောင်းကင်ဧကရာဇ်တောင်ထိပ်တိုင် အချိန်အတော်ကြာ ပုန်းအောင်းနေခဲ့ခြင်းဖြစ်ကြောင်း ထင်ရှားသည်။ သူက ဟန်မိသားစု၏ မဟာဧကရာဇ်နှင့် ပူးပေါင်းပြီး ဟဲမိသားစု၏ မဟာဧကရာဇ်ကိုသတ်ရန် အခွင့်အရေးကို စောင့်နေခြင်းပင်။

"ငါမင်းကိုပြောခဲ့ပါတယ်၊ ဒီနေ့က မင်းရဲ့သေနေ့ပဲ"

ဟန်မိသားစု၏ မဟာဧကရာဇ်က ကြိမ်းမောင်းပြီး ဟဲမိသားစု၏ မဟာဧကရာဇ်ကို ဓားဖြင့်ခုတ်လိုက်သည်။

တူညီသောအဆင့် တန်ခိုးရှင်နှစ်ဦးနှင့် ရင်ဆိုင်ရသောအခါ ဟဲမိသားစု၏ မဟာဧကရာဇ်က လုံးဝ မယှဉ်နိုင်တော့ပါ။ သူက ချက်ခြင်းပင် အားနည်းချက်တစ်ခုရှိလာသည်။

"မကောင်းတော့ဘူး"

"ဟန်မိသားစု၊ မင်းတို့ တကယ်ကို ကောက်ကျစ်ယုတ်မာပါလား"

ဟဲမိသားစု၏ လူများက ဒေါသတကြီး ဟိန်းဟောက်လိုက်ကြသည်။ သူတို့၏ မျက်နှာများမှာတော့ စိုးရိမ်ပူပန်မှူတို့ ပြည့်နေတော့သည်။

မဟာဧကရာဇ်ကြီး ကျဆုံးသွားပါက ဟဲမိသားစုအတွက် ကပ်ဆိုက်မည် ဖြစ်သည်။

မဟာဧကရာဇ်မရှိလျှင် သူတို့က ဟန်မိသားစုကို တိုက်ခိုက်နိုင်မည် မဟုတ်ပါ။ ဟန်မိသားစု၏ ဖျက်ဆီးခံရမည် ဖြစ်သည်။ မရေမတွက်နိုင်သော နှစ်ပေါင်းများစွာ အမွေဆက်ခံခဲ့သည့် ဟဲမိသားစုက ပျက်သုဉ်းသွားပေလိမ့်မည်။

"စစ်ပွဲမှာ အရာအားလုံးက တရားမျှတတယ်။ အဲဒါကို မင်းတို့မသိဘူးလား"

ဟန်မိသားစု၏ ကျွမ်းကျင်သူများက ကျေနပ်‌ပျော်ရွှင်နေပြီး လှောင်ပြောင်လိုက်ကြသည်။ သူတို့၏ မဟာဧကရာဇ်က ဟဲမိသားစု၏ မဟာဧကရာဇ်ကို သတ်ပစ်နိုင်မည်ဟု မျှော်လင့်မိ၏။ ထိုသို့ဆိုလျှင် ဟန်မိသားစုက အနာဂတ်တွင် ပို၍ပင် အားကောင်းလာမည် ဖြစ်သည်။

အားလုံးက ကောင်းကင်ဧကရာဇ်တောင်ကို စိတ်လှုပ်ရှားစွာ ကြည့်နေကြလေသည်။ မဟာဧကရာဇ်ကြီးတစ်ပါး ကျဆုံးသွားပါက လူအများအပြား ညိစွန်းမည် ဖြစ်သည်။ ၎င်းက ကောင်းကင်ဧကရာဇ်မြို့တော်၏ ဖွဲ့စည်းပုံကို သိသိသာသာ ပြောင်းလဲစေလိမ့်မည်။

ဟဲမိသားစု၏ မဟာဧကရာဇ်က ခုခံရန် အစွမ်းကုန် ကြိုးစားသည်။ သို့သော်၊ သူက မဟာဧကရာဇ်နှစ်ပါးနှင့် မယှဉ်နိုင်‌ပါ။

မကြာမီတွင် ဟဲမိသားစု၏ မဟာဧကရာဇ်ကို တာ့လော့ကောင်းကင်ဂိုဏ်းမှ မဟာဧကရာဇ်ကြီး၏ တိုက်ခိုက်မှုက ထိမှန်သွားသည်။ သူ့ခန္ဓာကိုယ်က ပြင်းထန်စွာ တုန်ခါသွားသည်။ သူ့မျက်နှာက မျက်နှာနီမြန်းသွားပြီး သွေးအန်လုနီး ဖြစ်သွား၏။

"ဝှစ်"

ဟန်မိသားစု၏ မဟာဧကရာဇ်က ဓားဖြင့် ခုတ်ချလိုက်ရာ ဟဲမိသားစု၏ မဟာဧကရာဇ်မှာ လွတ်ရုံလေး ရှောင်တိမ်းလိုက်နိုင်သည်။

"သတ်"

ဟန်မိသားစု၏ မဟာဧကရာဇ်က ဓားချက်များကို ဆက်တိုက်ထုတ်ဖော်လိုက်သည်။ သူ၏ တိုက်ခိုက်မှုများက ပိုမြန်ဆန်လာ၏။ ဟဲမိသားစု၏ မဟာဧကရာဇ်က ဒဏ်ရာရခဲ့ပြီး ရှောင်တိမ်းရန် ပိုမိုခက်ခဲလာတော့သည်။

"ရွှပ်"

နောက်ထပ် အနည်းငယ် လှုပ်ရှားပြီးနောက်၊ ဟဲမိသားစု၏ မဟာဧကရာဇ်က နောက်ဆုံးတွင် မရှောင်နိုင်တော့ပါ။ ဟန်မိသားစုမှ မဟာဧကရာဇ်၏ ဓားချက်က သူ့ရင်ဘတ်ကို လှီးဖြတ်ခဲ့သည်။ ရှည်လျားသော ဓားဒဏ်ရာတစ်ခု ပေါ်လာပြီး သူ့တစ်ကိုယ်လုံး နှစ်ခြမ်းကွဲလုနီးပါး ဖြစ်သွား၏။

မဟာဧကရာဇ်ကြီး၏ သွေးများက ကောင်းကင်ဧကရာဇ်တောင်ထိပ်ကို ဖြန်းပက်သွားတော့သည်။

ဟဲမိသားစု၏ မဟာဧကရာဇ်က ဒေါသတကြီး အော်ဟစ်လိုက်သည်။ သူက နောက်ဆုတ်ချင်သော်လည်း တာ့လော့ကောင်းကင်ဂိုဏ်းမှ မဟာဧကရာဇ်က သူ့လမ်းကို ပိတ်ဆို့ထား၏။

သူက ဒေါသတကြီး အော်ဟစ်လိုက်သည်။

အကယ်၍ သူတို့က ကောင်းကင်ဧကရာဇ်တောင်တွင် မရှိခဲ့လျှင် မဟာဧကရာဇ်နှစ်ပါးသည် သူ့ကို ထိန်းသိမ်းထားနိုင်မည် မဟုတ်ပေ။ သူ့ခွန်အားဖြင့် စိုးရိမ်စရာမရှိဘဲ လွတ်မြောက်နိုင်သည်။

သို့သော်လည်း၊ ကောင်းကင်ဧကရာဇ်တောင်မှာတော့ အခြေအနေက မတူတော့ပါ။

ထောင်ချောက်ထဲကို ကျသွားပြီဖြစ်ကြောင်း သူနားလည်လိုက်သည်။ ကောင်းကင်ဧကရာဇ်တောင်တွင် တိုက်ခိုက်ရန်က ဟန်မိသားစု၏ မဟာဧကရာဇ်ကြီးနှင့် အခြားသူ၏ အကြံအစည်ဖြစ်ကြောင်း သူနားလည်ပေသည်။

"မဟာဧကရာဇ်"

ဟဲမိသားစုမှ လူများက ဝမ်းနည်းပူဆွေးစွာ အော်ဟစ်လိုက်ကြသည်။

ဟဲမိသားစု၏ မဟာဧကရာဇ်က ယနေ့ ဤနေရာတွင် ကျဆုံးတော့မည်လော။

ဟန်မိသားစု၏ လူများမှာတော့ အလွန်ဝမ်းသာသွားသည်။

သို့သော်၊ ဤအခိုက်အတန့်တွင် ပြောင်းလဲမှုတစ်ခု ရုတ်တရက် ဖြစ်ပေါ်ခဲ့သည်။

"ဝမ်"

ရုတ်တရက်၊ ကောင်းကင်ဧကရာဇ်တောင်က ပြင်းထန်စွာ တုန်ခါသွားသည်။ အဆုံးမရှိသော အလင်းတန်းများက လေထဲတွင် ပြည့်လျှံသွား၏။

"ဝုန်း... ဝုန်း"

ထို့နောက်မှာတော့ ကျောက်တုံးအစအနများက နေရာအနှံ့ ပျံ့လွင့်သွားကာ ကောင်းကင်ဧကရာဇ်တောင်မှ အံ့ဩဖွယ်ရာ ပေါက်ကွဲသံများ ထွက်ပေါ်လာတော့သည်။

"ဘာတွေဖြစ်နေတာလဲ"

လူများစွာ၏ အမူအရာက သိသိသာသာ ပြောင်းလဲသွားသည်။ ကောင်းကင်ဧကရာဇ်တောင်က ဘာများဖြစ်သနည်း။ ဒါမျိုးက တစ်ခါမှ မဖြစ်ဖူးပေ။

"ဒါဟာ မဟာဧကရာဇ်ကြီးရဲ့ သွေးပဲ။ မဟာဧကရာဇ်ကြီးရဲ့ သွေးကို ကောင်းကင်ဧကရာဇ်တောင်က စုပ်ယူသွားခဲ့ပြီ"

အစစ်အမှန်ဧကရာဇ်တချို့က ဟိန်းဟောက်လိုက်သည်။ သူတို့၏ အားကောင်းသော မြင်နိုင်စွမ်းနှင့် ဝိညာဉ်အသိဖြင့် ဝေးကွာသောနေရာတွင် ရှိနေသော်လည်း ၎င်းကို သတိပြုမိခဲ့ကြပေသည်။

လူတိုင်း အံ့ဩသွားကြသည်။ မဟာဧကရာဇ်၏သွေးဖြင့် ကောင်းကင်ဧကရာဇ်တောင်က အဘယ်ကြောင့် ရုတ်တရက် ပြောင်းလဲသွားသနည်း။

"ဝုန်း... ဝုန်း... ဝုန်း"

ထိုအချိန်တွင် ကောင်းကင်ဧကရာဇ်တောင်မှ ကြောက်မက်ဖွယ်ရာ လှိုင်းလုံးကြီးသုံးခု ထွက်ပေါ်လာသည်။

မဟာဧကရာဇ်ကြီးသုံးပါးထံမှ ဖြစ်၏။

ယခင်က မဟာဧကရာဇ်ကြီးများ၏ တည်ရှိနေခြင်းကို ကောင်းကင်ဧကရာဇ်တောင်မှ လုံးလုံးလျားလျား ဖိနှိပ်ခံခဲ့ရသည်။ ယခုမူ၊ ကောင်းကင်ဧကရာဇ်တောင်က ၎င်း၏ဖိနှိပ်မှုအားတို့ ဆုံးရှုံးသွားပုံရသည်။

"သွား"

ဟဲမိသားစု၏ မဟာဧကရာဇ်ကြီးက ဟိန်းဟောက်ပြီး သူ့စွမ်းအားကို အကုန်အစင် ထုတ်ဖော်လိုက်သည်။ သူက ဓားဖြင့်ခုတ်ပြီး ကျယ်ပြောသော ကောင်းကင်ကို ခွဲချလိုက်၏။ ကောင်းကင်တွင် ကြီးမားသော အလျားလိုက် အက်ကွဲကြောင်းတစ်ခု ပေါ်လာသည်။ ဟဲမိသားစု၏ မဟာဧကရာဇ်ကြီးက ဓါးအလင်းအဖြစ် ပြောင်းလဲကာ ဟင်းလင်းပြင်အက်ကြောင်းထဲသို့ ပြေးဝင်သွားတော့သည်။

"ထွက်သွားဖို့ မစဉ်းစားနဲ့"

ဟန်မိသားစု၏ မဟာဧကရာဇ်နှင့် တာ့လော့ကောင်းကင်ဂိုဏ်း၏ မဟာဧကရာဇ်ကလည်း ဟဲမိသားစု၏ မဟာဧကရာဇ်နောက်သို့လိုက်ကာ ဟင်းလင်းပြင်အက်ကြောင်းထဲသို့ ပြေးဝင်သွားခဲ့သည်။

ချက်ချင်းပင်၊ လေဟာနယ်အက်ကြောင်းအတွင်းမှ ကြောက်မက်ဖွယ်ရာ အတက်အကျများ ထွက်ပေါ်လာ၏။

"ဝုန်း... ဝုန်း... ဝုန်း"

အလင်းရောင်များ ပိုမိုတောက်ပလာသည်နှင့်အမျှ ကောင်းကင်ဧကရာဇ်တောင်က ပြင်းထန်စွာ တုန်ခါသွားသည်။ အဆုံးတွင် အလင်းရောင်ခြည်က လူရုပ်သွင်တစ်ခုအဖြစ်သို့ ပြောင်းလဲသွား၏။

ဤရုပ်သွင်က အဖြူရောင် ၀တ်စုံကို ၀တ်ဆင်ထားကာ အလွန်ငယ်ရွယ်ပုံရသည်။ သူ့ကိုကြည့်ရသည်မှာ အသက်သုံးဆယ်အရွယ်ခန့်သာ ရှိဦးမည်။

သူက ချောမောခန့်ညားပြီး ကမ္ဘာကြီးကို လွှမ်းမိုးထားသည့် အရှိန်အဝါတစ်ခုလည်း ရှိသည်။

သူက ကမ္ဘာလောက၏အထက်တွင် တစ်ဦးတည်း ရပ်တည်နေသူကဲ့သို့ပင်။

"ကောင်းကင်... ကောင်းကင်ဧကရာဇ်၊ သူက ကောင်းကင်ဧကရာဇ် ဖြစ်နိုင်မလား"

လူအများက တုန်လှုပ်စွာ ရေရွတ်လိုက်ကြသည်။

ထိုစဉ်...

လေဟာနယ်အက်ကြောင်းတစ်ခုမှ ဟန်မိသားစု၏ မဟာဧကရာဇ်ကြီး ထွက်ပေါ်လာသည်။ သူ့မျက်နှာက အလင်းရောင်များဖြင့် မှုန်ဝါးနေ၏။ သူက ကောင်းကင်ဧကရာဇ်တောင်ပေါ်ရှိ ကောင်းကင်ဧကရာဇ်၏ အရိပ်ကို အံ့သြစွာဖြင့် ကြည့်လိုက်သည်။

ထို့နောက် တာ့လော့ကောင်းကင်ဂိုဏ်း၏ မဟာဧကရာဇ်ကြီးလည်း သူ့အနားတွင် ပေါ်လာ၏။

"ဝှစ်"

ခပ်လှမ်းလှမ်းတွင်၊ လေဟာနယ်က အက်ကွဲသွားပြီး ဟဲမိသားစု၏ မဟာဧကရာဇ်ကြီး ပေါ်လာတော့သည်။